The LOEY

Part 20

Unicode

အနောက်က မျက်ဝန်းစိမ်းတို့နှင့် တည့်တည့်ဆုံလိုက်သည်နှင့် ဘခ်ဟျွန်းတစ်ကိုယ်လုံး တောင့်တင်းသွား၏။

ဘခ်ဟျွန်းထက် ခေါင်းတစ်လုံးစာလောက်ပိုမြင့်ပြီး ခန္တာကိုယ်တစ်ဝက်စာလောက် ပိုကြီးသည်။ အနောက်ကနေ အုပ်မိုးထားသည့် ထိုကျားသစ်နက်က သူ့ကို အစာအဖြစ် ရွေးမည်ဆိုလျှင် သွားကြားပင် ညပ်မည်မဟုတ်လောက်။ ပထမဆုံးတွေးမိသည့် အတွေးကား ဘခ်ဟျွန်းအား နှစ်ဖက်စလုံးက အစာအဖြစ် လုနေကြခြင်းဟူ၍။ တစ်ခုကောင်းသည်ကား ထိုဝံပုလွေတို့၏ အကြည့်တို့က ဘခ်ဟျွန်းပေါ်မှာမရှိတော့သလို ကျားသစ်နက်ကြီး၏ အကြည့်တို့ကလည်း ဘခ်ဟျွန်းထံတွင်မရှိ။ လွတ်ဖို့အခွင့်အလမ်းတစ်ခုရသည့်အလား။ ကြံဆနေပါသော်ငြား ခြေထောက်ကတစ်ချက်လေးပင် လှုပ်၍မရပြန်။

ရုတ်ချည်း ဘခ်ဟျွန်းအနောက်ကနေ မာန်ဖီလျက် ခုန်အုပ်သွားသော ကျားသစ်နက်က ဝံပုလွေအုပ်များထံ တည့်တည့်ဦးတည်လိုက်ခြင်းသာ။ ကိုက်ခဲနေသည့် အသံပေါင်းစုံ ထွက်နေသည်များကို မကြည့်ဝံ့တော့။ ချက်ချင်းပင် လွတ်ရာလွတ်လမ်းသို့ ရောက်ရန် ဦးတည်ရာမဲ့ပြေးလွှားခဲ့မိ၏။ ခပ်ဝေးဝေးကျန်ခဲ့သော ထိုသားရဲများကြောင့် တိတ်တဆိတ်သက်မောချမိသော်ငြား ပြေးနေသည်ကို မရပ်နိုင်သေး။

ရှေ့လမ်းကိုပင် မမြင်ရသည်အထိ မှောင်မဲနေသော ပတ်ဝန်းကျင်ထဲ ခံစားလာရသည်က ထို့ထက် ပိုဆိုးမည်ထင်ရသော သားရဲများ တဖြည်းဖြည်း အုံခဲလာသယောင်။ မမြင်ရသော်ငြား အန္တရာယ် အငွေ့အသက်များကို ခံစားနေရသည်။ ကျောချမ်းစေပြီး ထောင်သောင်းများစွာသော မျက်လုံးများအောက် ပြေးလွှားနေရသည့်နှယ် အသက်ရှူမဝဖြစ်စေသည်။

အလင်းရောင်တစ်နေရာသို့ ရောက်လိုရောက်ငြား ပြေးနေသော်ငြား သိသိသာသာ မောဟိုက်လာသည်နှင့် ခြေလှမ်းများက အားယုတ်လာ၏။ ထို့ထက် တဖြည်းဖြည်း နီးကပ်လာသော အန္တရာယ်အငွေ့အသက်တို့ကို ခံစားမိသည်မို့ အရှိန်ပြန်မြှင့်မိသော်ငြား ခြေထောက်ကလိုက်မနိုင်တော့။ ရှေ့ခြေတစ်လှမ်းချလိုက်မိချိန်တွင် ကျွံဝင်သွားသော မြေသားနှင့်အတူ နှလုံးသားတစ်ခုလုံး လေဟပ်ခံလိုက်ရ၏။ ပြုတ်ကျပြီ ဆိုသည့်တစ်လုံးတည်းသာ ခေါင်းထဲပေါ်လာပြီးနောက် နာကျင်မှုတစ်ခုနှင့်အတူ အသိစိတ်အစုံသည် အမှောင်ထဲတိုးဝင်သွားတော့၏။