The LOEY

Part 14

Unicode

အကြည့်ချင်းဆုံနေရာမှ ဖြတ်ကနဲ မျက်တောင်ခတ်သွားသော ထိုကောင်လေး၏ အံ့ဩရိပ်တို့ကြောင့် chanyeol ခေါင်းထဲ အသိပေးချက် တဝီဝီမြည်လာတော့၏။

ဖတ်

ဘာမျှပင်မစဥ်းစားနိုင်သေး။ အလန့်တကြား တုန်လှုပ်စိတ်နှင့်အတူ ဆတ်ကနဲလှုပ်ရှားမိလိုက်သည့် လက်နှစ်ချောင်းက ထိုကောင်လေး နဖူးပေါ်တည့်တည့်။ ဖတ် ကနဲ အသံ တစ်ချက် ထွက်ပေါ်လာပြီးသည့်နောက် ချက်ချင်းပင် ပြူးကျယ်နေသည့် မျက်ဝန်းများက စွမ်းအားကြောင့်လား အိပ်ပျော်သွားသည်လား၊ အင်အားကြောင့် သတိလစ်သွားသည်လားမသိ။ chanyeol ကို မြင်ပြီးချက်ချင်း ပြူးကျယ်ကုန်သည့် မျက်လုံးတို့ကတော့ ချက်ချင်းပင် မှိတ်ကျကုန်တော့၏။

တကယ်တော့ အေးဆေးသက်သာလုပ်ရန် ဖြစ်သော်ငြား အတွေးက မဆုံးသေးခင်ပင် လက်ကလှုပ်ရှားမိတာ အားပါသွားခြင်းဖြစ်သည်။ တကယ်မရည်ရွယ်ပါ။ မိများသွားလျှင်ဟူသော စိတ်က သူ့ကိုဖိစီးစေပြီး ဘာလုပ်လို့လုပ်ရမှန်း မသိတော့သည်အထိ ကြောင်အသွားစေခြင်းကြောင့်ဖြစ်သည်။

ပြန်စဥ်းစားကြည့်မှ chanyeol ထို ရိုးရိုးရှင်းရှင်း မျက်လုံးမှေးများကြောင့် တော်တော်လန့်သွားရသည်ပင်။

သက်ပြင်းအသာချလိုက်မိသည်။ သူကပဲ ဒီလူသားကို လန့်ရတယ်လို့။ လူသားကပဲ ထူးဆန်းနေသည်လား၊ chanyeol ကပဲ ထူးဆန်းနေသည်လား မသိတော့ပါ။ စူပုတ်နေသည့်အလား ဖောင်းကားနေသည့် ပါးတစ်ဖက်ခြမ်းကို လက်ညိုးဖြင့်တို့မိတော့ နစ်ဝင်သွားသည့် အသားအရေက chanyeol ကို သတိလက်လွတ်ပြုံးမိစေ၏။

_____

baekhyun ထိုနေ့ ညနေက မုန့်ထွက်ဝယ်ခြင်းဖြစ်သည်။ ဗိုက်ဆာသည်လည်းမဟုတ်၊ ပျင်းပျင်းရှိ ပါးစပ်က တောင်ဝါးမြောက်ဝါး လုပ်ချင်လာ၍ လမ်းထိပ်ရှိ ဆိုင်လေးထံပြေးဝယ်ခြင်းဖြစ်သည်။

သိပ်လည်း မမှောင်သေးသည်မို့ စိတ်ချလက်ချ ထွက်သွားပြီး အပြန်တွင် ပြဿနာတက်သည်။ ပုံမှန်လူခြေတိတ်သည့် ဘက်အခြမ်းများ မသွားရဲသည်မို့ တမင်ရှောင်ကွင်းသွားသော်ငြား တည့်တိုးသည့်အဖြစ်။ သူကပဲ ကံဆိုးလွန်းနေသည်လားတော့မသိ။ ဝယ်လာသည့် မုန့်လေးတွေ အလစ်သုတ်ခံရသည်။