The LOEY

Part 60

Unicode

မနက်လင်းသည်နှင့် ငှက်ပေါင်းစုံအသံကြောင့် ချန်းယောလ်မျက်ဝန်းတို့ ပွင့်ဟလာ၏။ မျက်စံတို့က အိပ်ပျော်ထားတာကြောင့် ရီဝေနေရာကနေ စက္ကန့်ဝက်အတွင်းမှာပင် သတိချပ်လိုက်မှုကြောင့် ဆတ်ကနဲကျဥ်းမြောင်းသွားကြလျက်။

နံဘေးက နာရီကိုလှည့်ကြည့်တော့ မနက်ခင်း ၅ နာရီသာရှိသေးသည်။ သူ့ရင်ခွင်ထဲက အကောင်ပေါက်လေးကတော့ ပီပီပြင်ပြင်ကိုဖက်အိပ်လို့ ပါးစပ်လေးဟောင်းလောင်းဟနေပုံက အိမ်မက်ကမ္ဘာထဲ လက်ပစ်ကူးနေသေးဟန်ပေါက်သည်။ လက်မောင်းကို ခုအိပ်ထားသော ခေါင်းလေးအား အသာမကာဆွဲထုတ်ရင်း ခေါင်းအုံးပေါ်ခပ်သာသာ ပြန်ချပေးရသည်။ မနိုးသွားသော်ငြား တစ်ဖက်ကိုလှည့်လို့ ကျောပေးသွားသော ကောင်လေးက ညည်းသံလေးတစ်ခုနှင့်။

ချန်းယောလ်ကုတင်ပေါ်က ခြေချလိုက်သော်ငြား ထမသွားဘဲ အတွေးနက်နေဆဲ။

ညက သိလိုက်ရသည့်ကိစ္စအကြီးကြီးနှင့်ပတ်သက်ပြီး သူ့ထံတွင်ထူးထူးခြားခြား တုန်လှုပ်အံ့ဩရိပ်မရှိသော်ငြား ခန့်မှန်း၍မရသည့်ကိစ္စတစ်ခုကိုတော့ သိလိုက်ရသည်။ နေနတ်အဖွဲ့အစည်းနှင့်ပတ်သက်၍။

စွမ်းအားဖြန့်ကျက်ပွဲနေ့က သူ့ကိုသိသိသာသာ ထိုးဖောက်မတတ် စူးစိုက်ကြည့်သွားသော နေနတ်အဖွဲ့အစည်းက ခေါင်းဆောင်ကို ပြန်လည်အမှတ်ရမိသည်။ ကျောမလုံဖြစ်နေတာ ဤကိစ္စထင်၏။ ချန်းယောလ်အတွက်တော့ လက်တစ်ဆစ်မျှပင် အရေးမပါသောကိစ္စလေးဖြစ်သည်မို့ ခေါင်းထဲထည့်ဖို့မလိုသော်ငြား တစ်ဖက်သူအတွက်တော့ ချန်းယောလ်၏ဖြစ်တည်မှုက ကြောက်လန့်ဖွယ်ရာ ခြိမ်းခြောက်မှုတစ်ခုနှယ်။

လှောင်ပြောင်ရယ်မောချင်စိတ်သာဖြစ်မိ၏။

အတွေးတို့မတည်ငြိမ်သေးခင်မှာပင် သူ့ကျောကိုထိကပ်လာသော ခပ်အေးအေးအရာတစ်ခု​ကြောင့် လှည့်ကြည့်လိုက်တော့ ဘခ်ဟျွန်း၏ခြေဖဝါးဖွေးဖွေး။ စောင်အောက်က လှစ်ဟထွက်နေသည့် ခြေဖဝါးလေးအား အသည်းယားစိတ်ကြောင့် ဆွဲယူကြည့်တော့ အေးစက်နေသည်နှင့် အနွေးဓာတ်ကအလိုအလျောက် ထုတ်ပေးမိလိုက်၏။