The LOEY

Part 34

Unicode

နေ့စဥ်ရက်ဆက် လေ့ကျင့်မှုများသည် ဘခ်ဟျွန်းအတွက် တိုးတက်မှုရှိသည့်တိုင် နှေးကွေးနေဆဲဖြစ်သည်။ ဓားကိုစိတ်စွမ်းအားနှင့် ထိန်းချုပ်နိုင်သွားခြင်းက တစ်ပတ်ကြာလောက်မျှကျင့်ပြီး ကျွမ်းကျင်သွားပြီ ဖြစ်သော်ငြား အမိန့်ပေးရာတွင်တော့ အခက်အခဲ ရှိနေဆဲဖြစ်သည်။

ထိုဒုတိယအဆင့်ကို လေ့ကျင့်နေသည်မှာ သုံးရက်ခန့်မျှရှိပြီဖြစ်ပြီး ပထမနှစ်ရက်အထိ အဆင်ပြေချောမွေ့သော်ငြား တတိယရက်အထိ ဘာမျှမတိုးတက်လာတော့ သိပ်အခြေအနေမဟန်တော့။ ပုံမှန်ဆို သူ့အတွက် တိုးတက်ဖို့ကြာချိန်က တစ်ရက်သာဖြစ်သင့်သည်ပင်။ ကျန်သည့် ထိန်းချုပ်ရမည့် ပုံစံနှင့်နည်းလမ်းတွေကို ပိုင်နိုင်နေပြီဖြစ်သော်ငြား အဓိကအချက်မှာ ဓားကိုလုံလုံလောက်လောက် မကိုင်တွယ်နိုင်ခြင်းဖြစ်ပြီး လက်တစ်ဆုပ်စာ ထိုဓားက ဓားခုတ်ကောင်နှယ် လွတ်ထွက်ကာ ဖမ်းရပြုရလည်း ခက်ခဲသေးသည်မို့။

လက်ထဲပြန်ခေါ်ယူခြင်း အမိန့်ကိုသုံးတိုင်း ဘယ်သောအခါမှ လက်အတွင်းလှလှပပ ကျဆင်းသည်ဟူ၍မရှိ။ မြေကြီးတွင် ထိုးစိုက်၍တစ်ဖုံ၊ အပစ်ခံလိုက်ရသလို ခြေထောက်အောက် တချွင်ချွင် ပစ်ကျလာခြင်းကတစ်ဖုံ၊ ဖမ်းမည်ပြင်လိုက်သော်ငြား အာရုံနှစ်ခုစိုက်ရာမှ ထွေပြားပြီး ဓားကိုထိန်းချုပ်မှုလွတ်ကာ အန္တရာယ်ပြုခံရသည်က တစ်ဖုံ၊ စသဖြင့်။ တော်တော်ခက်ခဲလှ၏။ ဓားကသေးနေသည်မို့ ပိုဆိုးခြင်းဖြစ်ပြီး ချန်းယောလ်ကတော့ သူဤအဆင့်က မတက်မချင်းဓားကိုလည်း ပုံပြောင်းနေခွင့်ရှိမည်မဟုတ်ဟု ဆိုသည်မို့သာ ကြိတ်မှိတ်နေရခြင်းဖြစ်သည်။

မဟုတ်လျှင် ကိုင်ရပြုရလွယ်သည့် လက်နက်တစ်စုံတစ်ခုအဖြစ် ပြောင်းလဲလိုက်ပြီးဖြစ်သော်ငြား သေချာပေါက်တော့ သူဤဓားကို ကျွမ်းကျွမ်းကျင်ကျင် မကိုင်တွယ်တတ်သေးသရွေ့ ချန်းယောလ်က တခြားလက်နက်တွေပြောင်းခွင့်ပြုမည်မဟုတ်ပါချေ။

အတွေးကို ခေတ္တဖြတ်ကာ စိတ်ပြန်စုစည်းပြီး သက်ပြင်းမှုတ်ထုတ်လိုက်သည်။ လက်အနေအထားကို သင့်တော်သလို ပုံစံချကာ နောက်ဆုံးတစ်ချက် ပစ်လိုက်ရာမှ မိမိပစ်မှတ်ကိုထိဖို့ လက်တစ်ဆစ်အလိုလောက်ကို ရောက်သည်မို့ ဘခ်ဟျွန်းပျော်ရွှင်ကာ ဓားကိုပြန်လာရန်စိတ်အတွင်းမှ အမိန့်ပေးလိုက်သည်။ တစ်ဆက်တည်းဆိုသလို မရရအောင် လှလှပပဖမ်းပြမည်ဟူသော အတွေးနှင့်အတူ ပြင်ဆင်ထားရပြီး ဓားကိုလည်းထိန်းချုပ်မှုအာရုံ မလွတ်သွားစေရန် သတိထားရသည်။