تبعها عامر بعينيه ووسع ابتسامتو الجانبية الماكرة ثم جمع الوقفة.. وضرب الدورة نيشان عند أسد وقف وراه ثم تحدر عند ودنو وقال بهمس ومصطفى كان متبع هاد الحركة:
- مسيو أسد.. كنظن بغيتي تعرف مال حبيبتك.. تبعنيي..!!
قالها واستاقم في الوقفة ثم تحرك بعيد على ديك الطابلة ومشا لمكان منعازل.. بينما جمع أسد وقفتو وهو حاس بدمو كيغلي وعروق وجهو برزو وشد على قبضة ايدو.. شاف في عامر من بعيد بشوفات قاتلة ثم تحرك جيهتو بسرعة..
وقف قدامو وقال بصرامة:
- هدر دبا آشنو قلتي لنور.. ؟
ابتاسم عامر جنب ثم قال:
- هه مالك زربان.. غير تسناا..
دوز أسد ايدو على وجهو كيتحكم في أعصابو.. ثم قال ضاغط على سنانو ووجهو كيتحدى عامر.. هاد الأخير لي حط الكاس ديالو وقال بجد:
- نور تعطاتها مهمة أخرى..!
شاف فيه أسد بصدمة.. ثم هز حاجبو وقال بسخرية:
- هه نور.. غير حلم هي أصلا غادي تخرج من هاد المهزلة..
جاوبو عامر وقال ببرود:
- هي وقعات عليها يعني كلشي بإرادتها.. وأنا معندي مندير ليها.. ولكن متخافش غادي تنفد هاد المهمة مع شي عميل محترف وأنا غادي نوقف على هادشي..
قاطعو أسد وشدو من كول القاميجة ديالو وعينيه كيف القرطاس كيشوف فيه.. بينما عامر بسرعة حيد ليه ايدو وكمل بالبرود ديالو:
- ولكن كاين حل آخر.. الى بغيتي تنظم لهاد القضية وتبقا في جنب حبيبتك فأنا دبا عطيتك فرصة..
زاد خرج أسد زفيرو بغضب وحس بالفار كيخرج ليه من عينيه.. شاف فيه وقال ظاغط على سنانو:
- نتا واحد حقير..!
ضحك عامر باستهزاء ثم هز ملف من فوق الطابلة ومدو لأسد وقال:
- تفضل هادي هي فرصتك..!
قال أسد بغضب:
- نتا من اللول درتي هادشي غير باش توصل ليا.. وتخليني نضطر نظم ليها..
تنهد عامر بغيظ وقال:
- اه.. ولكن ماشي غير نتا حتى نور.. حيث نتوما محترفين وخصوصا مني كتكونو بجوج.. ههه قوة الحب كتنتاصر على المجرمين..
نثر ليه أسد الملف من ايدو بقوة ثم فتحو وبلا مايقراه خدا ستيلو وقعو ورماه ليه في وجهو ثم دار بسرعة بلا مايزيد شي كلمة باركة عليه غير الغضب لي ركب فيه.. مرجعش للطبلة وإنما دخل مباشرة مع الباب.. ثم للدروج غادي طالع للغرفة ديالها..
ببنما هي كانت واقفة قدام المرايا ديال غرفتها وكتبكي.. مقدرتش تصبر هي ندمت علاش وقعت على ديك القضية وبعد ست شهور غادي تبعد من هنا وغادي تبعد على أسد.. غادي تبعد على حبها الأول.. واللعنة ماشي غير هو على گاع أصدقاءها حسات براسها غادي تخسر كلشي وترجع لحياتها المظلمة اللولة.. حياتها ديال الخنقة.. سمعت الدقان في الباب على إثرها بدات كتمسح دموعها ومشات بسرعة فتحت الباب..
ضرب قلبها بقوة مني شافتو واقف حدا الباب.. بعدت شوية وخلاتو دخل.. سد الباب بالساروت وقال بحدة:
- علااش واافقتي على ديك القضية..!؟
دازو دموعها فور مادكر ليها هاد الموضوع.. هبطت راسها وقالت:
- أنا مكانش عندي شي حل..
من نبرة صوتها عرفها كتبكي.. قرب حداها أكثر ثم حط ايدو تحت دقنها وهز ليها وجهها كيشوف في الدموع.. مسح ليها دميعاتها وقال بهدوء:
- متبكيش نتي عارفة أنه أنا مغاديش نتخلا عليك..
مسحت دموعها وقالت:
- أنا داك النهار سمعتك قلتي لعامر أنك غادي ترجع تعيش حياتك.. هادشي كيعني أنه أنـ
قاطعها أسد وقال بصرامة:
- أنا قلت بلي مغاديش نتخلا عليك..!
شافت ليه في عينيه وقالت ببراءة:
- أسد.. دير شي حاجة وهدر مع عامر أنا مبغيتش نبعد عـ
سكتت قبل ماتكملها الشيء لي خلاه قرب وجهو عند ودنها وقال بهمس:
- تبعدي على آشنو..؟؟
أنت تقرأ
رواية فداء الوطن [ مكتملة ]
Acción❀ فِــــــداءُ الوَطـــــــن ❀ بقلــــم: ريكس نونـــا ′ YTTY242 ′ لا تتشابه النساء أبداً ، فـ في كل امرأة حكاية وذكرى وسطر جديد من الرواية لكن هناك امرأة تظل لا تتكرر مرة أخرى ولا يشملها قانون النسيــ...
![رواية فداء الوطن [ مكتملة ]](https://img.wattpad.com/cover/247255374-64-k656452.jpg)