القلب الضائع

البارت الثامن عشر

" مات موت الله "

كمت ابجي " الله يرحمة "

" يلة عمي احنة شوي ونجي سوو طريق "

" ماشي "

كلت للمرة الي وياهم انو راح يجيبون ابو اسعد

كمنة حضرنة الصالة لان راح يجون يعزون هم ،،، كمت اني وايري والمرة ،،، لانو نور كاعدة يم ريم وخطية ريم تبجي وتون وتشهك ومابيهة حيل كلشي تسوي ،،، خلصنة الصالة واجن نسوان تقريبا يتراوح عددهن من ١٣ إلى عشرين مجنت حاسبتهم بس مبينين هيج يعني ينعدون ،،، جبنة ريم كعدناهة يمنة بالصالة وكل شوي تجي مرة وتبجي شوي وتحضن ريم وريم متصدك تبجي وتون ،،، تقريبا ساعة ب ٤ العصر جابو الجثة ،،، مع انو ماكو هيج شي بتركيا واصلا مخالف لعادات تركيا بس احنة ردنة الفاتحة تكون ع اصلنة ،،، جابو الجثة والتمينة نبجي ونون ونشهك ويا روح ما بعدج روح ،،، والنسوان يكومن بينة واحنة نبجي لبين ما بالكوة شالو القبر من يمنة وريم ملخت نفسهة تملخ ...

مرن ثلاث ايام الفاتحة ومخلصيهة بس بجي بالكوة نحط لكمة بحلكنة ،،، لو ريم صارت بس عظم اساسا

من بعد إيام الفاتحة صارت كل وحدة بغرافتهة تكعد ومن ضمنهن اني ،،، وبيوم جنت دا اكلب بحسابات الشركة واشوف شصاير مصاير بهاي الايام وجتني نور عيونهة حمرة كتلتلهة شكو كالتلي ...

نور " اخذتلي غفة وشفت عمو يحجي وياي

" اي شحلمتي كملي "

نور " ولج شفت وجهة ثكيل ويأشرلي بأيدة بمعنى لاء وبعدهة راح واجت مرة ثانية كالت بالج يم ريم فدوة "

" اي بعد

نور " شنو بعد ولج كعدت من النوم ارجف من الخوف شبية عمو هيج يسوي وياي ومنو هاي المرة وشعليهة بريم ولج مينا كمت اخاف ولج خاف ريم مسحورة "

" لا يمعودة شسالفة وبعدين نور ترة انتي كبيرة ميلج هل شغلات مال خوف "

نور " ولج ادري بس من مات عمو كمت اخاف "

" يمعودة صلي ع النبي عمرج ٢٤ سنة شسالفة ونوب دكتورة علم نفس وتخافين "

نور " اووف اسكتي صارت بية رجفة "

" خل اخلص واشوف شنو شغلتجن انتن "

راحت وخلصت شغلي كمت اشوفهن شديسون

رحت ل ايريلا شفتهة جاي تصلي ظهر وعصر لانو اجلتهن عفتهة ورحت لريم شفتهة نايمة ،،، ضليت امسد براسهة بعدين كمت احجي وياهة وبعدهة كامت وصارت تحجيلي و تبجي وتكول ما متعودة ع فراقة هدئتهة وكمت اشوف نور لكيتهة تشرب شاي وصافنة رحت سويت كهوة وكعدت يمهة نسولف ...

شهر كامل كل واحد منعزل وحالتنا زفت ولبين مخلص الشهر وايريلا قررت ترجع للعراق ،،، اعترضنة بس من جهة ثانية شغلهة هناك ،،، فاجأتني نور لمن رادت تروح للسليمانية ترتاح شوي ،،، اعترضت وحجيت وبجيت بس ما فاد كالت ان قبلتي وان ما قبلتي اني اروح لان اني مو نور الصغيرة وتخافين عليهة وبعدين هية فترة سياحة دا اريح راسي ،،، مكدرت اضغط عليهة ف هية هم ورة ايري بأسبوع راحت للسليمانية بقينة اني وريم ،،، ونوب ريم انتكست حالتهة كلش وفاجئتني من اجت حجت وياي وكالت

ريم " مينا تعاي يمي

جاوبتها بفرح وحسيتهة راح تتغير للأحسن " ها كولي جيت

ريم " مينا اني راح اطلع للشمال "

كمت اصيح اتهسترت " يعني انتي هم راح تعوفيني مووو ولج ليش مو هاذة بيت ابوج شبيجن هيج تريدن تهجن وين محبتجن لهذة البيت

كامت وجاوبتني بصياح "  اي لان تعبت فاهمة تعبت من كلشي تعبت ولج خسرت اهلي اني كلشي ديروح مني بوكت واحد مو حرام ولج مو حرام نبقة أيتام اني من جهة وانتي ونور من جهة وايري من جهة كلنة ايتااااام افتهمتي ماعدنة احد احنة ماعدنة خووووش ف لهذة ماكو شي يخليني ابقة بتركيا اني راح اروح للعراق واعيش بالشمال مو نور راحت للسليمانية (بالعراق ) بعد شكو

جاوبتها " وانتي حتروحين مووو ولج نسيتي احنة أيتام ورب العالمين يحبنة ولج انتي مو وحيدة احنة الله اخذ اهالينة علمود يريحهم ويختبرنة ويختبر صبرنة ولج انتي مؤمنة شبيج انكلبتي وهيج صرتي متعرفين انو الله ديختبرج وخلاكم بطريقي وصرنة وحدة سند للثانية ولج رب العالمين ديختبرج معقولة هيج عندج سهل تخسرين بأختبار رب العالمين "

ريم " شوفي ان قبلتي وان ما قبلتي اني عكب باجر طيارتي وراح اروح وكلت انطيج خبر وهسة نعست اريد انام وتصبحين ع خيرر "

اتفاجئت ،،، معقولة هاي ريم ،،، إذا مو السفر ف اني معقولة هيج تحجي وياي ،،، هيج هينة عدهة هاي الفيلا او هاي العيشة وتريد تروح للشمال ،،، عمو ابو اسعد  نطاهة كل ورثة ونطاني شركة الي ونطة الفيلا نص لايري ونص لنور اما باقي الورث الرئيسي ف هوة كلة لريم ،،، هيج جان تقسيمة ،،، بس متوقعت ريم هيج تتغير وتنسة لمتنة بهاذة البيت تريد تروح وتعوفني زين والشركة ...

رحت دا اصعد انام جان اسمعهة تبجي وتشهك بصوت ناصي بس مع الأسف خانته شهكاتهة وطلعت بصوت أعلى ،،، اتنهدت ورحت الغرفتي وهاي اليومين كلهن ريم بالغرفة بس مجرد من اني نايمة تطلع تاخذ اكل او كهوة وترجع للغرفة بحيث صارت بس عظام ،،، اما اني ف مستحيل اتخلى عن النظام الي جنة عايشينة وية ابو اسعد وراح اكمل حياتي حتة وهنة ماكو ...

قبل سفر ريم بيوم ،،، طلعت من الغرفة كل ضنهة اني نايمة نزلت دتسوي كهوة جان تشوفني اتنهدت وراحت للمطبخ ،،، رحت وراهة وكلتلهة

"شنو ناوية تسوين بالشركة لمن تسافرين ...