القلب الضائع

البارت السادس والخمسون

اكو  ناس حتى اذا لكيتهم بجهنم اشيل حطباتي  وروح  اتعذب بمكان ثاني
___________________________________
- خلي الفلوس على صفحة ، شنو الشي الي تحتاجه بحياتك؟
= الفلوس الي خليتها على صفحة .
___________________________

سنة ٢٠١٧ شهر ٣

طلعو كل عمامي وراحن البنات سدن باب الشارع لان فضحتنة

طلعو الكل واني واكفة بمكاني صافنة طلع اول واحد فهد شافهة انصدم كال " بنت النعال شتسوين هناا انتي "

ردت " تريد اطلكني مووو علمود يا شرشوحة منهن هاا علمود يا كحبة "

ضربهة راجدي اجو ولد عمامي يهدئون بي واني واكفة مثل الاطرش بالزفة لا ونوب عمامي دا يجرجرون بفهد يستفسرون

انتبهت من صفنتي ،،،

رحت اتوجهت يم المرة الي واكفة بالنص تهد وتعد كلتلهة كلام خلة الكل ينتبه

" اووكفي انتي قصدج فهد زوجي هوة زوجج "

ردت " هااي انتي الي اخذهة فهد علية موو "

باوعت ع فهد وكالت " واني اكول ليش ياخذ وحدة علية وهوة موت صديقة واخذني طلعت البنية من الكحاب التسهر وياهن موو "

انصدمت صدمة عمري شجاااي يصير جريتهة من ايدهة

" بس اسمعيني هسة انتي مرت فهد الاولى "

ردت مستهزءة متخصرة " اي حبيبتي ليش متدرين جذب عليج الاستاذ "

اجو الولد كبل طلعوهة برة  ، بقو بالبيت عمامي وايسر وعباس ومهيمن والبقية اخذو البنية يودوهة لبيتهة وطبعا كل نسوان عمامي موجودات بصفي خاف اسوي شي والبنات واكفات مصدومات

هاي السالفة بالحوش الي مابي سقف ♡

اتجهت ع فهد كدام الكل ، بعلت ريكي ونزلت دموعي انهضمت كلت بصوت مخنوك

"هاي مرتك الاولى "

رد " يا الله شهالبلاء شهلسنة الي ما تخلص ، بوية صعدي فوك خل افهمج لا تتخيلين اشياء من كيفج واسمعيني "

رديت والدموع بعيني " اسمعك "

رد " هسة شراح يفهمهة يا الله اوووف امشي للغرفة افهمج امشي "

رديت " فهمني هنا "

رد " هاي المرة تصير مرت صديقي ومن صديقي مات امنهة علية وهية بحجة اهلهة كالت اتزوجني وانة اتزوجتهة وبعدهة نهيت عليج هاي السالفة كلهة "

رديت بيأس وبقرف والدموع بعيني " طلكني "

رد بعصبية " ميناااااا لا تخليني ابتلي بيج وحق الخلقج "

رديت مرة ثانية بنفس الحالة الي جنت بيهة " طلكني كافي عاد بزعت مليت اختنكت طلكني ما ابقة وياك اني طلكني "

رفع ايدة دا يضربني بس وقف فجاة كال " ميناااا لا تخليني اطلع اعصابي عليج كدام الموجودين "

صرخت " يلة طلع يلااااا "

ضربني راشدي قوي لدرجة خلاني احس بالدوران ،،، رفعت راسي باوعت علية وايدي ع خدي صرت ابجي كتلة متوسلة

" طلكني "

باوع بعيني بحيرة وكال " انتي طالك طالك طالك ،،، انتي طالك بالثلاث "

بارت اليوم قصير جداااااا ، لان مريضة ♡

______
يتبع ...