القلب الضائع

البارت الرابع والستون

قالت له كم تحبني.؟ اجابها : سأمشي الان و المسافة التي تكون بيننا هي مقدار حبي لك ولم يعد منذُ عامين ما اعرف هو يحبها او غلط بالطريق او خطفوه الجن او هرب...
___________________
اشيل ماعون بإيدي والعصير بإيدي الثانية
وافتح الباب برجلي واطفي الضوه بكصتي المهم ماارجع مرة ثانية
__________________

" شوي واسمع صوت زوجات عمامي يهلهلن وعمامي يصلون ع النبي والدبكات مال الرجلين ع الدرج ،،، صعدن البنات حضنتهن وهاي الي تكول حصير خالة وهاي الي تكول حصير عمة وهاي الي تكول اني اقرر اسميهم ، كتلهن خلي انزل جوة ساعدني فدوة ، ساعدني ونزلت جوة ع كيف وصلت للصالة واشوف عمامي يبوسون بفهد واجن زوجات عمامي يبوسن ويهلهلن مدري شكوو شنو يعني اول مرة يجي طفل لهالبيت والله حرت وية تصرفاتهم الغير منطقية ،،، اجة عمي بوسني وطلع ٢٠٠ الف حطهن بيدي ما قبلت اخذهن ابد بس فهد يأشرلي براسة بمعنى اخذيهن ف اخذتهن واتشكرت منة كعدت وية عمامي وزوجات عمامي دنسولف والبنات راحن للمطبخ يحضرن الاكل لبين ما يأذن ونصلي ،،، صار الاذان كام فهد كومني فد خجلت لان نصهم يباوعون وهوة يتصرف وياي عبالك باجر اجيب يعني لازم ايدي اذا ردت اكوم يكول لاء اكعدي لا تتحركين ،،، كمنة وكفنة كدام المغسلة اتوضينة ورحنة لغرفة جدو وبيبي فرشتة دا نصلي هوة كدامي واني وراه بشوية يعني بمسافة صغيرة كلش ،،، خلصنة باوعلي ابتسم كال ، يتقبل الله ، رديت ، منا ومنكم صالح الاعمال ،،، خلصنة صلاة دا اوخر الجادر كالي

فهد " لا توخريه عوفي اكعدي ع القبلة ع كيفج "

رجعت كعدت كالي " الزمي سبحة واحمدي الله ١٠٠ مرة ع الاطفال هذول وبعدهة اقري ٥٠ مرة اية الكرسي وانه هم راح احمد الله ١٠٠ مرة واقرة اية الكرسي ٥٠ مرة عسا ولعل رب العالمين يخلقهم بصحة وعافية ما بيهم خطأ "

رديت " ماعندك دعاء او شي يحفظهم "

رد " لاء بس اعرف اية الكرسي للحفظ والصون خلينة نقراها ونحمد الله ونشوف "

صدك خلصنة حسيت كلبي ارتاح فد نوب ،،، خلصنة اجة كومني ع كيفة ونزعلي الجادر باسني من راسي وطلعنة اتعشينة ويجيبون يحطون كدامي بس والله لو يعرفون خلفتي يمكن معوقة والله حتة بوجهي ما يباوعون بس مصالح ونوب نبصت عمة الاء بوجود ايريلا وايسر كالت

عمة الاء " انشاء الله يوم الي نزوج ايسر وحدة تشبه ايريلا "

ايريلا جانت كاعدة بصفي عاد لزمت ايدي حسيت اصابعهة نغزت بايدي من كثر العصبية كالت

ايريلا " اي والله كون ياخذ وحدة حلوة يستاهل خوية ايسر "

اباوع نصهم كاتمين الضحكة وعمة الاء تبتسم بفشل خطية ،،، خلصنة اكل وهاي نور اكلت عباس بنظراتهة ادري هية اختي غير تطلع علية بس لاء تختلف تماما ، ضليت اباوعلهة لبين ما شفت عباس رفع راسة خزرهة وهز براسة بمعنى شكو ، هية هم ما قصرت خزرتة ودارت وجهة ،، هية غير تجوز ماكو خلصنة اكل كامو يغسلون غسلو ورجعو راح عباس ما نتبهت انو نور راحت وراه ، اني هم ردت اروح اغسل اخذني فهد قبل ما نفوت للمطبخ سمعت حس جاي منة مال نور وعباس
اشرت لفهد بمعنى انتظر خلي اسمع خزرني بمعنى لاء ما هتميت

" هسة انتة ليش شايف نفسك ما ادري ترة بالصدفة اجت عيني بعينك وبعدين شكو تخزر ترة تصير حلو اقصد تخوف لمن تخزر "

باوع عليهة وكال بعصبية " يا بنت الناس اذا ما وليتي من وجهي وعفتيني براحتي العب بيج طوبة "

ردت " ما تكدر واتحداك اذا تكدر "

رد " يا رحمة الله الواسعة ، ولج بابة انتي بنية وانه ولد انعلي الشيطان وروحي لا ابتلي بيج شوازاني انه ابنت عم مثلج ادري مو هاي اختج اشو مؤدبة بس انتي "

ردت " والله اني مؤدبة بس كلبي الخرة حبك وحب هاي العيون اني شكوو "

رد " لا اله الا الله روحي من وجهي روحي "

ردت " اشو بعيني انتة انتة واني اني ونشوف منو الي يربح "

رد " شنربح بابة نلعب شطرنج احنة "

ردت بعصبية " اذا ما خليتك تحبني "

رد بعصبية " لا تخليني اطلع من طوري اشو انتي ما مترباية بابة عيب عيب هاذة الكلام "

ستوهة دا تحجي طبيت خزرتهة غسلت واجة فهد وراي هم غسل باوعت لنور كلت " نور تعاي وياي "

ردت " وين "

رديت " دا اراويج شي "

ردت "اوك "

اخذتهة ورحت للاستقبال كلتلهة " راح تفشلينة وتحطين سمعتنة بالكاع والله العظيم بابة الولد ما يريدج لا تصيرين لزكة "

ردت "انتي لا تدخلين "

كالت هيج وطلعت اتعجب ع تصرفاتهة ولا عبالك عمرهة ٢٧ سنة .

طلعت كعدنة بالاستقبال نسولف وهاي نوب كعدت تشاقة وية مؤيد ومؤمل وتلعب حجرة ورقة مقص واذا ربحت بكل مرة ينطوهة ربع توزعهن للجهال وتضحك وتشاقة اباوع ع عباس يباوع ع اخوه وروحة طافرة ، باوعت ع فهد كتلة

" تعبتني هاي البنية نهايتهة مو خير ...

يتبع ...