القلب الضائع

البارت الثالث والثلاثون

واحب كلشي صعب ، عفتك لان تنلاح 💚
_________________________________________

اباوع ع الطريق ،،، بطريقي للبصرة يعني للحبس يعني للتقيد يعني للهمجية مال فهد احسه همجي وما يعرف يتصرف افكر شلون راح احط عيني بعينة وأخوه مات وشلون راح يتقبلني ابيتة وهوة يعتبرني وساخة ضليت افكر لبين ما كال الرجال وصلنة انتبهت اي صح هاذة الفرع مال بيت العشيرة نطيتة فلوس وتمشيت ،،، هذولة شلون كاعدين كلهم ابيت واحد شنو ما يخافون او بالأحرى ميريدون يرتاحون ويلبسون براحتهم اذا همة هلكد عددهم معناها ملكو راحة لا بلبس ولا بالحنس ،،، والله اني لو اموت ما اعيش هيج عيشة مثل مالتهم ،،، تقريبا ٥٠ نفر ابيت واحد أو يعني لا مو خمسين بس هواي نفرات لا ونوب يحشون بغل وبقرة هاي اذا ينحشن ،،، انتبهت ع أفكاري هاي اني وين وصلت وشجابني ع البقرة والبغل

اباوع ع البيت كلة سواد والرايات واللوحات الي مكتوب عليهة المرحوم ابراهيم حاتم والمرحوم مهند راضي اترحمولهم قريتلهم الفاتحة وباوعت ع البيت كلة سواد ورايات وعلامات وبردات سود انتبهت ع نفسي همزين لابسة بنطرون وكوت سود بس الحذاء ابيض يلة مو مشكلة دكيت الباب فتحتهة سمية طبيت اجت ياسو حضنتني وتبجي وطبعا اني لازم اشاركهة البجية متفوتني فايتة ،،، طبيت كبل صعدت للغرفة

اكو باب داخلي للبيت واكو باب خارجي

دائما الناس تفوت من الباب الخارجي بس اني اتوقعت اباب الخارجي بي رياجيل ف دكيت الباب الداخلي وفتحتهة سمية المهم صعدت بدلت كبل كلتلهة لياسو تنطيني ملابس منهة لان اخاف البس من ملابسي ويحجون علية لان ضيقات خلي اتشفة الشر ،،، انطتني تيشيرت جوة الركبة شتوي وعريض و ويا بجامة زينة علية وشوي ياسمين هم رشيقة مو مثلي يعني اني ضعيفة بس ياسو رشيقة وياسو احلى وحدة من باب عمامي ،،، لبستهن وياسو انطتني شال علمود اجفة شر المشاكل لان هاي فاتحة ف ميصير اكعد اعاند هسة مو وكت عناد ورعونية ف لبست الشال

حطيتة علة راسي وياسو سوتيالي يخبل صار شفت نفسي غير انسانة وكلش لايكلي الشال

مسحت شكو مكياج بوجهي مجرد عدلت حاجبي لان اتخربط نزلنة اني وياسو بوكتهة جان ثاني يوم الفاتحة نزلت رحت حضنت ام فهد وبجينة اني وياهة ونوب مناك اجت ام ابراهيم هم اتحاضنة وبجينة بس مو ماتو امي وابوي ابد ما سوينة هيج شي اساسا جنت حتة ما ادري وين مدفونين هذاك اليوم يلة عرفت

ورة ما حضنتهن صبرت بيهن شوي وية النسوان وكمت عنهن رحت وية ياسو للمطبخ واشوف فيلق مال بنات

شوف هوة البيت قسمو نصين من الصالة وغاد مال نسوان ومن الاستقبال وغاد مال زلم والفاصل بينهن بردة ،،، طبيت للمطبخ واشوف فيلق بنات موجودات كلت السلام عليكم ردن السلام عادي وبعضهن كعدن يسولفن وياي وبعضهن بس يسمعن وبعضهن بس يباوعن وبعضهن يهزن ايدهن ،،، جانن تقريبا ١٢ بنية هيج شي كامن ٦ بنات بقن ستة ( ياسمين وسمية وحوراء واسراء واستبرق ونرجس ) دنسولف اني واسراء وياسو تشاركنة الحديث كل شوي وسمية تستمع واستبرق ونرجس كاعدات كدامي علة الكرسي ،،، سمية أشرت لاسراء وراحت بقينة بس اني وياسو واستبرق ونرجس ،،،

كالت استبرق لياسو ع اساس دتسمعني وتحط النقاط علة الحروف " اكول سوسو شوكت ننخطب اني وفهودي ونخلص

ردت ياسمين " حبيبتي اولا ميصير تحجين هيج لان هاي فاتحة ثانيا متشوفين عدنة فاتحة بعد شكو جبتي سيرة الخطوبة ثالثة ترة مو اكيد انتي لفهد يعني احنة كلنة ك اختيارات انو انتي مناسبة لفهد بس منو يكول فهد يقبل

ردت استبرق " يااا ليش عيني غير من الصغر يكولون استبرق لفهد وفهد لاستبرق "

ردت ياسمين " حبيبتي هاي بس امج تكولهة وام فهد تشاركهة الأحلام "

حطيت ايدي علة حلكي عود ع اساس نعسانة بس اني بالأصل حطيت ايدي علة حلكي لانو خربانة ضحك خطية اتفشلت البنية ،،، كتمت ضحكتي لان اجن سمية واسراء

كالت نرجس " بنات اشو ماكو هواي ناس

ردت إسراء "خية غير بيهم بالطريق وبيهم باجر يجون وبيهم اجو وراحو وتعالي شوفي الصالة مليانة ناس دسكتي

كالت نرجس " يا اجو ناس بعد هم "

كالت سمية " اي خية اجو بس غير انتي كاعدة هنا ومتدرين هناك شكو

كالت نرجس " ليش شكو

كالت سمية " خية غير دا يحجون بيج انتي واختج دروحي شوفي

كمزت نرجس هية واستبرق وراحن للصالة

سمية " اووف كطيعة غير يروحن

كعدت إسراء ع الكرسي وكامت تبجي وكالت " اوووف بوية هنودي من هسة اشتاقيتلك شلون بية

جانت تحجي وتبجي وترجف ،،، استغرب عليهة ترجف رجف مو طبيعي يعني تهتز هز

راحتلهة سمية وكالت " ولج خية البارحة كضيتيهة بجي ونوح كافي عيني امج هم خطية

كامت إسراء وراحت للاستقبال سالتهن لعد خوات ابراهيم ومهند وين

ردت ياسمين " اريام ورواء جوة واسراء هسة راحت وخطية من البارحة لليوم يبجن وحتة احنة بجينة دم بس هسة حتة دموعنة خلصت خطية ميستاهلون "

رديت " شلون ماتو "

ردت " جانو رايحين لبغداد علمود شغل جاييهم وهمة مرادو يفوتون الفرصة خطية راحو واندعمت سيارتهم بسيارة واحد وهسة بعد الفاتحة راح تصير كعدة عشاير

ردت سمية " اي والله الله أليستر "

رديت " خطية ما يستاهلون فد انقهرت عليهم مع انو حتة ما شايفتهم "

ردت سمية " كلنة ع هاذة الطريق "

مرت ايام الفاتحة الثلاث والنسوان كل شوي وحدة ذابتلهة دستة دموع واليوم راحو يكعدون العشاير ،،، رجعو النار تتطافر من عيونهم

سألت ام راضي هاي شبيكم

كال فهد " بالله بربج اكو شيخ عشيرة هيج زربة راح يكوللهم فصلية وفلوس ونوب الوادم قبلت

لطمت ام راضي " يبووو حيجيبولي فصلية

يتبع ...