بسم الله وع بركة الله....
#الحسن
المقدمه⭐
هالمرة القصه مختلفه الخيال واخد أكبر حيز فيها..حنحكي عن احداث خيالية تماما....وحنتفرض انها صارت في بلادنا...
بعد استقرارها واستباب الأمن فيها وانتهاء الحروب والصراعات...
الأمن🛡
نعمه من اعظم نعم الله ومع وجود الأمن كل شي يبدا ساهل وموجود...البناء..الإزدهار..الأمن هو اساس بناء أي دوله...وبدون الأمن تختفي هلبه مقومات للحياه..
حنتخيل في روايتي وضع ليبيا بعد استتباب الأمن فيها ..حتكون روايتي هالمرة خليط بين الآكشن والإثارة والعلاقات الإجتماعيه اللي الحب من أهم انواعها💗
"الحسن الصادق"بطل روايتي..واللي الروايه ع اسمه..ضابط في جهاز الشرطه قسم مكافحة المخدرات..رتبته رائد ملقب "الليث الجريح" نسبه لجرح في جسمه من شظية قنبله منفجرة اثرها قاعد في ظهره ماتحولش..ومش هذا الجرح الوحيد...جسمه معبي اثار اصابات طلقات ناريه ..كانوا جماعة المافيه وتجار المخدرات لمايسمعوا بإصابه خطيرة للحسن يقولوا خلاص انتهي وينوض منها بقدرة الله سليم معافى...
عمره 37..انسان جدي لأبعد حد قليل الكلام تعابير وجهه ديما حاده وجامده ..وضحكته ماحد يعرف كيف شكلها..
مايعرفش يبتسم إلا تهكما...كان ضابظ ملتزم بدينه ومستقيم..لهالسبب ربي ديما حاميه..
بوه عابد الصادق..رجل ليه مكانته بين الناس شيخ جامع كبير..وصاحب خير وربي انعم عليه..يحب ولده الحسن وديما يفخر بيه قدام كل الناس..
امه وسيله مراة طبعها صعب شويه وادير في حساب هلبه لكلام الناس وعندها الحسن واقطع الخبر..
خوه الكبير علي عمره 45سنه طيب وع حاله وعنده محل قطع غيار سيارات ومتزوج وعنده بنت
ميسون عمرها 17سنه..وولد اسمه صهيب عمره 14سنه..
الحسن يجي بعده
بعدهم خوله عمرها 32سنه متزوجه وماعندهاش صغار..
بعدهم سارة مخطوبه لولد عمها عمرها26
بعدهم حسان 25واحد مستهتر وصايع وع قد مادارو فيه مافيشي فايده..والحسن عنده رعب يخاف منه هلبه ...
اخر العنقود جنان عمرها 19 سنه طالبة الطب..والوحيده القريبه ع الحسن..اللي ديما يفضل الإنعزال وقليل الخلطه حتى بعيلته..ماعدا عمه..اصغر من الحسن ب5سنين..
اسمه سرمد..سماه بو الحسن بهالأسم لأنه لما جي ع الدنيا..
كان عابد يقرا في آية "ان جعلنا الليل سرمدا "ووصلهم خبر ولادته سموه هالأسم...
جد الحسن متزوج زوز نساوين أم عابد وبعدين توفت وبعد سنين تزوج برنيه..مراة طيبة لكن قويه..جابتله..
محمد متزوج وعنده مرعي" خطيب سارة" وريحانه وهادي تموت في الحسن وهو لايندري حتى ع شكلها كيف..
وإنعام مطلقة من غير صغار وهي اصغر من سرمدبسنه..
يعني الحسن عند عم وعمه اصغر منه...
ماتسألوش عن النساوين في حياة الحسن بعييييييد هلبه عنهم ...مايعرفش غير محارمه المقربين..حتى بناويت العيله مايعرفهمش بكل..ولاعمره عرف حاجه اسمها حب ومشاعر حتى في أيام المراهقه..
انسان جاد للغايه وحاد هلبه في طبعه لذلك حتى النساوين برغم انهم بيهبلوا عليه بس يخافوا يقربوا منه...
والزواج مايبيشي نهائي عقله في خدمته وديما يقول اني متزوج شارتي متاع الشرطه...🛡..وعشقي بلادي وبس..
برغم عدم رضا بوه وأمه بس ماباليد حيله..حياة الحسن الشخصيه مايقدر يدخل فيها...
***
تمشط في شعرها الأسود الطويل ع المرايا ..ملامحها غايه في الجمال وعيونها تضرب القلب في مقتل ..بس نظرتهم حاده ديما ..وياما مطيحه قلوب في غرامها غير جمالها الفتان..كانت شخصيتها قويه ولسانها طويل..
نحكي ع عليا بطلة الروايه عمرها 19سنه..طيبة لكن واعرة احيانا طالبه طب من عيلة حالتهم متوسطه..
بوها اغلى ماعندها "جعفر" شيخ جامع راجل طيب وحكيم والناس كلها تحبه..
امها زينب طيبه حتى هي وأهم شي عندها عيلتها بس...
اختها الكبيرة مديحه مخطوبه عمرها 26سنه..
بعدها منذر حنحكي عليه في الأجزاء الجايه لإن قصته قصه..
بعده مصعب عمره 22سنه..
بعده عليا..
واخر العنقود اميرة عمرها 16سنه...
عليا مخطوبه لولد عمتها منصف محامي و مستشار قانوني وعمره 27سنه..يحبوا بعض هو وعليا ويوتوا لعرسهم مع اختها مديحه...
***
الروايه مازال فيها ابطال وقصتها مختلفه وحتعرفوها اكيد بإذن الله 😘
نص ساعة وانزل الجزء الاول
#تعديل
تعريف بشخصيات رواية الحسن⭐
عائله الحاج علي الصادق...
الحاج علي..
زوجته الأولى..رقيه ..توفت وجابتله ..عابد..
بعد سنين..
تزوج برنيه...عنده منها
1محمد متزوج ...زوجته فاطمه
صغاره...مرعي....ريحانه...
2سرمد عزابي عمره32سنه
3انعام مطلقه عمرها تلاتين عام...
....
عائله عابد علي الصادق..
زوجته وسيله ...عنده منها
1الكبير علي متزوج ..زوجته مجيده..
عنده منها ..ميسون ...صهيب
2الحسن عزابي عمر 37سنه
3خوله متزوجه عمرها 32سنه..
4ساره مخطوبه لولد عمها "مرعي" عمرها26سنه
5حسان عزابي عمره 25سنه..
6جنان عمرها 19سنه...
....
عائلة جعفر الحافظ
زوجته زينب..
صغارهم
مديحه عمرها 26سنه مخطوبه
مصعب عمره 22سنه
عليا19سنه
أميرة16سنه
منذر اكبرهم عمره 30سنه...بوه متبري منه...ومنفصل عن عيلته من سنين طويله..
...
عائلة خطيب عليا
بوه جواد
امه بتينه"عمة عليا"
صغارهم
منصف الكبير عمره 27سنه "خطيب عليا"
رشا عمرها 23سنه
نوال20سنه
....
عائلة صديقة عليا المقربه
عبدالقدوس صبري البي...زوجته متوفيه
بنته الوحيده ابتسام عمرها 19سنه
...
هاله "هادي من ابطال الروايه"
بوها يونس ...زوجته متوفيه
خوتها 3متوفيين
هاله عمرها 20سنه...
....
بلال "من أبطال الروايه"
بوه متوفي...
امه ..الساكته...
بلال ولدها الوحيده عمره 26سنه...
....
عائلة الفهد الأسود" من أبطال الروايه"
بوه متوفي...
امه نبيهه
محمد"الفهد الأسود"..عمره36سنه
عنده اخت اسمها سلسبيل متزوجه ومهاجره..
....
الروايه"أكشن....اثارة ....غموض....حب"
خياليه تماما...
وفيها حقائق مخفيه صادمه ...حاولوا تنسجموا معاها 😚😚😚
