#الحسن
ﺍﻟﺠﺰﺀ ﺍﻟﺨﺎﻣﺲ ﻭﺍﻷﺭﺑﻌﻴﻦ 🌹
صورة 4.1K صورة 109 صورة 6
ﺑﻮﺍﺳﻄﺔ GomanFared
ﻭﺻﻠﺖ ﻗﻮﺓ ﺍﻟﺪﻓﺎﻉ ﺍﻟﻤﺪﻧﻲ ﻣﻊ ﻭﺣﺪﻩ ﻣﻦ ﺟﻬﺎﺯ ﺍﻻﻣﻦ .. ﻟﺤﻖ ﻋﻠﻴﻬﻢ ﻫﻮ ﻧﺰﻝ ﺑﻌﺪ ﻋﺒﺎ ﻣﺨﺰﻥ ﺍﻟﺴﻼﺡ .. ﻭﺻﻞ ﻓﻴﻬﻢ ﻭﻫﻮ ﻳﺘﻔﺤﺺ ﻓﻲ ﺍﻟﻤﻜﺎﻥ ..
ﺍﻟﺪﻓﺎﻉ ﺍﻟﻤﺪﻧﻲ .. ﺑﺪﻭﺍ ﻳﻨﺰﻟﻮﺍ ﻓﻲ ﺳﺮﻣﺪ ﺑﺤﺬﺭ .. ﺍﻟﻤﻜﺎﻥ ﻣﺄﻣﻦ ﻭﻗﻮﺍﺕ ﺍﻷﻣﻦ ﺗﻤﺸﻂ ﻓﻴﻪ .. ﻣﺎﻓﻲ ﺣﺪ ﻣﺎﻓﻴﺶ ﺍﻱ ﺍﺛﺮ ﻟﻴﻬﻢ ...
ﻧﺰﻟﻮﺍ ﺳﺮﻣﺪ ... ﻭﺣﻄﻮﻩ ﻓﻲ ﺳﻴﺎﺭﺓ ﺍﺳﻌﺎﻑ ﻭﻃﻮﻝ ﺗﺤﺮﻛﺖ ﺍﻟﺴﻴﺎﺭﺓ ..
ﻭﺍﺣﺪ ﻣﻦ ﺍﻟﺪﻓﺎﻉ : ﺍﻣﺸﻮﺍ ﺑﺴﺮﻋﻪ ﺍﻟﺮﺍﺍﺍﺍﻓﻌﻪ ﺑﻄﻴﻴﻴﻴﻴﻴﺢ ..
ﻃﻮﻝ ﺍﻧﺴﺤﺒﺖ ﻗﻮﺍﺕ ﺍﻷﻣﻦ ﻭﺍﻟﺪﻓﺎﻉ ﺍﻟﻤﺪﻧﻲ ﻭﺍﻟﺤﺴﻦ ﺣﺘﻰ ﻫﻮ ﺭﻛﺐ ﺍﻟﺴﻴﺎﺭﻩ ... ﺗﺤﺮﻛﻮﺍ ﻣﻊ ﺑﻌﺾ ... ﻭﻣﺠﺮﺩ ﻣﺎﺑﻌﺪﻭﺍ ﺷﻮﻳﻪ ..
ﻃﺎﺣﺖ ﺍﻟﺮﺍﻓﻌﻪ ﻭﺩﺍﺭﺕ ﻫﺰﺓ ﺍﺷﺒﻪ ﺑﻬﺰﺍﺕ ﺍﻟﺰﻻﺯﻝ ...
....
ﻓﻲ ﻣﺼﺤﺔ ﻣﻦ ﻣﺼﺤﺎﺕ ﻃﺮﺍﺑﻠﺲ ..
ﺧﺶ ﻳﺠﺮﻱ ﻭﻳﺪﻭﺭ ﻋﻠﻴﻪ ﻟﻴﻦ ﺩﻟﻮﻩ ﻉ ﺍﻟﻤﻜﺎﻥ ﺍﺍﻟﻠﻲ ﻫﻮ ﻓﻴﻪ ﺍﻟﻌﻨﺎﻳﻪ ..
ﻃﻠﻊ ﺍﻟﺪﻛﺘﻮﺭ ..
ﺍﻟﺤﺴﻦ : ﺷﻦ ﺣﺎﻟﻪ ..
ﺍﻟﺪﻛﺘﻮﺭ : ﻣﻀﺮﻭﺏ ﻟﻠﻤﻮﺕ ... ﺑﺲ ﻣﺎﺯﺍﻝ ﻣﻜﺘﻮﺑﻠﻪ ﻋﻤﺮﻩ .. ﺭﺟﻠﻴﻪ ﺍﻟﺰﻭﺯ ﻓﻴﻬﻢ ﻛﺴﺮ ... ﺭﻗﺒﺘﻪ ﺍﻧﺨﻠﻌﺖ ﻓﻲ ﺿﻠﻊ ﻓﻲ ﺍﻟﻘﻔﺺ ﺍﻟﺼﺪﺭﻱ ﻣﻜﺴﻮﺭ ﻭﻧﺎﻳﺶ ﻭﺣﺪﻩ ﻣﻦ ﺍﻟﺮﺋﺘﻴﻦ .. ﻭﻻﺯﻡ ﻣﻦ ﻋﻤﻠﻴﻪ ﻓﻮﺭﺍ .. ﻋﻦ ﺍﺫﻧﻚ ..
ﺍﻟﺤﺴﻦ ﻣﺘﺄﺳﻒ ﻫﻠﺒﻪ ﻟﺤﺎﻝ ﻋﻤﻪ ...
ﺑﻌﺪ ﺷﻮﻳﻪ ﺑﻠﻎ ﺑﻮﻩ ﻭﻋﻤﻪ ﻣﺤﻤﺪ ﺍﻟﻠﻲ ﻧﺒﻪ ﻋﻠﻴﻬﻢ ﻣﺎﻳﺠﻴﺒﻮﺵ ﺳﻴﺮﺓ ﻟﺠﺪﻩ ﻭﺟﺪﺍﻩ ﻧﻬﺎﺋﻲ ..
***
ﻋﻠﻴﺎ ﺑﺨﻮﻑ : ﻧﺘﺼﻞ ﺑﻴﻪ ﻣﺎﻳﺮﺩﺵ ﺑﻌﺪﻳﻦ ﺳﻜﺮﻩ ..
ﺍﻧﻌﺎﻡ ﺑﺒﻜﻲ : ﺑﺎﻩ ﻷﻣﻲ ﻣﺎﺗﺤﻀﺮﺵ ﻓﻲ ﺑﺮﻧﺎﻣﺠﻪ ﻛﺎﻥ ﻫﺬﺍ ﺍﺷﺒﺢ ﺷﻦ ﺻﺎﺭﻟﻬﺎ ﺗﻮﺍ ... ﺑﺲ ﻳﺎﺭﺑﻲ ﺷﻦ ﻧﺪﻳﺮ ﻟﻤﺎ ﺗﻨﻮﺽ ..
ﻫﺎﻟﻪ : ﻳﺴﺘﺮ ﺍﻟﻠﻪ ﺇﻥ ﺷﺎﺀ ﺍﻟﻠﻪ ﻧﻜﻮﻧﻮﺍ ﻋﺮﻓﻨﺎ ﺣﺎﺟﻪ ﻟﺒﻴﻦ ﻣﺎﺗﻨﻮﺽ ..
ﻉ ﺧﺸﺔ ﺣﺴﺎﻥ ﻭﻭﺟﻬﻪ ﻣﺎﻳﺘﻔﺴﺮﺵ : ﻟﻘﻮﻩ ..
ﺍﻧﻌﺎﻡ ﺑﻠﻬﻔﺔ ﺧﻮﻑ : ﻭﻳﻦ ...
ﺣﺴﺎﻥ : ﻋﻤﺘﻲ ﺍﻫﺪﻱ .. ﻓﻲ ﺍﻟﻤﺴﺘﺸﻔﻰ ..
ﺧﺒﻄﺖ ﺍﻧﻌﺎﻡ ﻉ ﻭﺟﻬﻬﺎ .. ﺷﺪﺗﻬﺎ ﻫﺎﻟﻪ : ﺍﻧﻌﺎﻡ ﺍﻫﺪﻱ ﺧﻞ ﻧﻔﻬﻤﻮﺍ ﺷﻦ ﺻﺎﺭ ..
ﺣﺴﺎﻥ : ﺿﺎﺭﺑﻴﻨﻪ ..
ﻛﻠﻬﻢ ﺷﻬﻘﻮﺍ ﺻﻮﺕ ﻭﺍﺣﺪ ...
ﺣﺴﺎﻥ : ﺍﺳﻜﺘﻮﺍ .. ﻭﻣﺎﺗﺠﻴﺒﻮﺵ ﺳﻴﺮﺓ ﻟﺤﻨﺎﻱ .. ﻗﻮﻟﻮﻟﻬﺎ ﻣﺴﺎﻓﺮ .. ﻫﻜﻲ ﻗﺎﻝ ﺑﻮﻱ .. ﻣﺎﺗﺠﻴﺒﻮﺵ ﺳﻴﺮﻩ ﻟﺤﺪ ... ﺗﺼﺮﻓﻮﺍ ﻃﺒﻴﻌﻲ ..
ﻛﻠﻬﻢ ﻫﺰﻭ ﺭﻭﺳﻬﻢ ﺑﺈﻳﺠﺎﺏ .. ﻭﺍﻧﻌﺎﻡ ﺗﺒﻜﻲ ﺑﺼﻤﺖ ..
***
ﻣﺤﻤﺪ ﻭﻋﺎﺑﺪ ﻭﺍﻗﻔﻴﻦ ﻉ ﺭﻭﺷﻦ ﺍﻟﺰﺟﺎﺝ ﻣﺘﺎﻉ ﻏﺮﻓﺔ ﺍﻟﻌﻨﺎﻳﻪ ﻭﻳﺸﻮﻓﻮﺍ ﻓﻴﻪ ﻛﻴﻒ ﻣﺤﺎﻭﻃﻪ ﺑﻴﻪ ﺍﻷﺟﻬﺰﺓ ﻳﺘﺄﻣﻠﻮﺍ ﻓﻴﻪ ﺍﻟﺰﻭﺯ ﺑﻮﺟﻮﻩ ﻣﻠﻴﺎﻧﺔ ﺃﺳﻒ ﻭﺧﻮﻑ ....
ﻋﺎﺑﺪ : ﻟﻬﺎﻟﺪﺭﺟﻪ ....
ﻣﺤﻤﺪ ﻫﺰ ﺭﺍﺳﻪ ﺍﻳﻤﻴﻦ ﻭﻳﺴﺎﺭ ﺑﺈﺳﺘﻴﺎﺀ ..
ﺍﻟﻤﻤﺮﺿﻪ ﺟﺘﻬﻢ : ﻟﻮ ﺳﻤﺤﺘﻮﺍ ﺍﻃﻠﻌﻮﺍ ﺧﻼﺹ ..
ﺍﻟﺰﻭﺯ ﻣﺸﻮﺍ ﺧﻄﻮﺍﺕ ﻟﻠﺨﻠﻒ ﻭﻫﻤﺎ ﻳﺸﻮﻓﻮﻟﻪ ﺑﻌﺪﻳﻦ ﻟﻔﻮﺍ ﻭﻃﻠﻌﻮﺍ ..
ﺍﻟﺤﺴﻦ ﺑﺮﺍ ﺍﻟﻤﺼﺤﻪ ﻣﻊ ﺍﻟﻔﻬﺪ ..
ﺍﻟﺤﺴﻦ : ﻓﻜﺮﺕ ﺍﻧﻪ ﻣﺠﺮﺩ ﺗﻬﺪﻳﺪ ﺗﺨﻮﻳﻒ .. ﻣﺎﻓﻲ ﺷﻲ ﺟﺪﻱ ﺑﺲ ﻟﻸﺳﻒ ﻃﻠﻌﺖ ﻏﺎﻟﻂ ..
ﺍﻟﻔﻬﺪ : ﻋﻤﻚ ﻳﺘﺤﺮﻯ ﺑﺪﻗﻪ ﻋﻦ ﻣﻌﻠﻮﻣﺎﺗﻪ ﺍﻟﻠﻲ ﻳﻄﻠﻊ ﻓﻴﻬﻢ ﻑ ﺍﻹﺫﺍﻋﻪ ... ﻣﺼﺎﺩﺭﻩ ﻉ ﺍﻟﻐﺎﻟﺐ ﻧﺎﺱ ﺗﻌﺎﺩﻱ ﻓﻲ ﺍﻟﻠﻲ ﻳﺘﻜﻠﻢ ﻋﻠﻴﻬﻢ .. ﻧﺘﻮﻗﻊ ﺍﻧﻬﻢ ﻳﺒﻮﻩ ﻳﻘﻮﻝ ﻣﻦ ﻫﻤﺎ ﻟﻜﻦ ﻫﻮ ﺭﺍﻓﺾ ...
ﺍﻟﺤﺴﻦ ﻗﻌﺪ ﻳﻔﻜﺮ ﻓﻲ ﻛﻼﻡ ﺍﻟﻔﻬﺪ ﻓﻌﻼ .. ﺍﺣﺘﻤﺎﻝ ﻭﺭﺍﺩ ﺧﺼﻮﺻﺎ ﺍﻥ ﺳﺮﻣﺪ ﻣﺘﻜﺘﻢ ﻉ ﺃﺳﺮﺍﺭ ﺷﻐﻠﻪ ..
ﺩﺍﺭﻭﻟﻪ ﻋﻤﻠﻴﻪ ﻭﻧﺠﺤﺖ ﺑﺲ ﻗﻌﺪ ﻋﻨﺪﻩ ﻣﺸﻜﻠﻪ ﺣﺘﻼﺯﻣﻪ ﻓﻲ ﺍﻟﺘﻨﻔﺲ ﺑﺴﺒﺐ ﺍﻟﺠﺮﺡ ﺍﻟﻠﻲ ﺻﺎﺭ ﻓﻲ ﺍﻟﺮﺋﻪ ..
ﻗﺎﻋﺪ ﻓﻲ ﺍﻟﻌﻨﺎﻳﻪ ﺍﻟﻤﺸﺪﺩ ﻭﻣﺎﻓﺎﺭﻗﺎﺵ ﺍﻟﺤﺴﻦ ﺑﺘﺎﺗﺎ ..
ﺑﺮﻧﻴﻪ ﺍﻟﻠﻲ ﻛﺬﺑﻮﺍ ﻋﻠﻴﻬﺎ ﻭﻗﺎﻟﻮﻟﻬﺎ ﺳﺮﻣﺪ ﺳﺎﻓﺮ ﻗﻠﺒﻬﺎ ﻣﺶ ﻣﻄﻤﻦ ﻭﺣﺎﺳﻪ ﻓﻲ ﺷﻲ ﻹﻥ ﺍﻟﻠﻲ ﺣﻮﺍﻟﻴﻬﺎ ﻣﺶ ﻃﺒﻴﻌﻴﻴﻦ .. ﻭﻓﻨﻔﺲ ﺍﻟﻮﻗﺖ ﺳﺮﻣﺪ ﻻﺍﺗﺼﻞ ﻭﻻﺳﺄﻝ ﻭﻫﻲ ﺯﺍﺩ ﺷﻜﺖ .. ﺍﻣﺎ ﺍﻟﺤﺎﺝ ﻋﻠﻲ ﺍﻭﻝ ﻣﺎﻋﺮﻑ ﻛﺎﻟﻌﺎﺩﻩ ﺍﻧﻌﺰﻝ ﺑﺮﻭﺣﻪ ﻭﻣﺎﻣﻤﺸﺎﺵ ﺷﺎﻓﻪ ﻟﻜﻦ ﻛﺎﻥ ﻳﻄﻤﻦ ﻋﻠﻴﻪ ﻣﻦ ﻭﻻﺩﻩ ..
ﻛﺎﻧﻮﺍ ﻣﺘﻜﺘﻤﻴﻦ ﻋﻦ ﺍﻟﺨﺒﺮ ﻭﻣﺎﻳﺒﻮﺷﻲ ﻳﻄﻠﻊ ﺑﺲ ﻓﺒﻼﺩﻧﺎ ﻣﺎﻓﻲ ﺷﻲ ﻣﺪﺭﻕ .. ﻗﺎﻣﺖ ﺍﻟﻘﻴﺎﻣﻪ ﻭﺩﺍﺭﻭ ﺗﻐﻄﻴﺎﺕ ﺑﺨﺼﻮﺹ ﺍﻟﻤﻮﺿﻮﻉ ﻭﺧﻠﻮﻫﺎ ﻗﻀﻴﻪ ﺗﻘﻴﻴﺪ ﺣﺮﻳﺔ ﺍﻹﻋﻼﻡ .. ﻭﺍﻷﺗﻬﺎﻣﺎﺕ ﺍﺗﺠﻬﺖ ﺍﺻﺎﺑﻌﻬﺎ ﺗﺸﻴﺮ ﻟﻠﺒﻲ ... ﺍﻟﻠﻲ ﻛﺎﻥ ﻣﺒﺮﺩ ﺍﻋﺼﺎﺑﻪ ﻉ ﺍﻵﺧﺮ ﻛﺎﻟﻌﺎﺩﻩ ﻭﻭﻛﻞ ﻣﺤﺎﻣﻴﻪ ﻳﺪﺍﻓﻊ ﻋﻨﻪ ﺣﺘﻰ ﻓﻲ ﺍﻟﻤﻨﺎﺑﺮ ﺍﻷﻋﻼﻣﻴﻪ ﻭﺯﻱ ﻣﺎﻫﻮ ﻣﻌﺮﻭﻑ ﻋﻦ ﻣﻨﺼﻒ ﺷﻴﻄﺎﻥ ﻭﻳﻌﺮﻑ ﻳﺘﻜﻠﻢ ﻛﻮﻳﺲ ..
***
>> ﺍﻣﻴﺮﻩ ﻟﻮ ﺻﺎﺭﺕ ﻓﻴﺎ ﺣﺎﺟﻪ .. ﻧﺒﻴﻚ ﺗﻘﻮﻟﻲ ﻷﺧﺘﻚ .. ﺗﻘﻨﻊ ﺍﻟﺤﺴﻦ ﻳﺴﻴﺐ ﺧﺪﻣﺘﻪ ﻷﻧﻬﻢ ﺣﻴﻀﻴﻌﻮﻩ <<..
ﺍﻣﻴﺮﺓ ﺗﺬﻛﺮ ﻑ ﻫﺎﻟﻜﻼﻡ ﻭﺩﻣﻮﻋﻬﺎ ﻣﺎﻓﺎﺭﻗﻮﺵ ﻋﻴﻮﻧﻬﺎ ﻭﻫﻲ ﺗﻔﻜﺮ ﻓﻴﻪ ﻭﻑ ﺣﺎﻟﻪ ﻭﻓﻲ ﺍﺧﺘﻬﺎ ﻭﺭﺍﺟﻞ ﺍﺧﺘﻬﺎ ..
ﻗﺎﻣﺖ ﺗﻠﻴﻔﻮﻧﻬﺎ ﻭﺍﺳﺘﺠﻤﻌﺖ ﻧﻔﺴﻬﺎ ﻭﺍﺗﺼﻠﺖ ﺑﻌﻠﻴﺎ ..
ﻋﻠﻴﺎ ﻛﺎﻧﺖ ﺗﺤﺎﻭﻝ ﺗﺸﻐﻞ ﻧﻔﺴﻬﺎ ﺑﺎﻟﻘﺮﺍﻳﻪ ﺑﺮﻏﻢ ﻧﻔﺴﻴﺘﻬﺎ ﺍﻟﺘﺎﻋﺒﻪ .. ﺍﻭﻝ ﻣﺎﺭﻥ ﺗﻠﻴﻔﻮﻧﻬﺎ ﻓﺰﺕ ﺗﺤﺴﺎﺑﻪ ﺍﻟﺤﺴﻦ ﻟﻘﺎﺗﻪ ﺃﻣﻴﺮﻩ ..
ﺭﺩﺕ : ﺍﻳﻮﻩ ﺍﻣﻴﺮﻩ ..
ﺍﻣﻴﺮﺓ ﺑﻨﺒﺮﺓ ﺑﺎﻛﻴﻪ : ﻛﻴﻒ ﺣﺎﻟﻜﻢ ..
ﻋﻠﻴﺎ ﺗﻨﻬﺪﺕ : ﺯﻱ ﻣﺎﻫﻮ ﻣﺎﺗﻐﻴﺮ ﺷﻲ ..
ﺍﻣﻴﺮﺓ : ﻭﺳﺮﻣﺪ ..
ﻋﻠﻴﺎ : ﻗﺎﻋﺪ ﻓﻐﻴﺒﻮﺑﻪ .. ﺑﺲ ﻗﻮﻟﻴﻠﻲ ﺧﻴﺮﻩ ﺻﻮﺗﻚ
ﺍﻣﻴﺮﺓ ﺗﺒﻜﻲ ﺑﺼﻤﺖ ..
ﻋﻠﻴﺎ : ﺍﻣﻴﺮﺓ ... ﺍﻟﻠﻲ ﻓﺒﺎﻟﻲ ﺻﺢ؟
ﺍﻣﻴﺮﺓ ﻗﺎﻋﺪﻩ ﺳﺎﻛﺘﻪ ..
ﻋﻠﻴﺎ ﺗﻨﻬﺪﺕ : ﻣﻌﻨﺎﻫﺎ ﺻﺢ ..
ﺍﻣﻴﺮﺓ ﻗﻌﺪﺕ ﺗﺒﻜﻲ ﺑﺎﻟﺼﻮﺕ ..
ﻋﻠﻴﺎ : ﺣﺒﻴﺒﺘﻲ ﺧﻼﺹ .. ﺧﻼﺹ ..
ﺍﻣﻴﺮﺓ ﻣﺴﺤﺖ ﺩﻣﻮﻋﻬﺎ ﻭﺗﻤﺎﻟﻜﺖ ﻧﻔﺴﻬﺎ : ﻋﻠﻴﺎ ..
ﻋﻠﻴﺎ : ﺷﻨﻮ ..
ﺍﻣﻴﺮﺓ : ﻓﻲ ﺷﻦ ﻧﺒﻲ ﻧﺤﻜﻴﻬﻮﻟﻚ ..
ﻋﻠﻴﺎ ﺧﺎﻓﺖ : ﺍﺣﻜﻲ ﻧﺴﻤﻊ ﻓﻴﻚ ..
ﺍﻣﻴﺮﺓ : .......
***
ﺍﻧﻌﺎﻡ ﻃﺎﻟﻌﻪ ﻣﻦ ﺍﻟﺪﺍﺭ ﺑﺘﻤﺸﻲ ﺗﺸﻮﻑ ﺧﻮﻫﺎ ﺍﻧﺼﺪﻣﺖ ﺑﺄﻣﻬﺎ ﻗﺪﺍﻣﻬﺎ ..
ﺑﺮﻧﻴﻪ ﺑﺤﺪﻩ : ﻭﻳﻦ ﻣﺎﺷﻴﻪ ...
ﺍﻧﻌﺎﻡ ﺑﺮﺑﻜﻪ : ﺍﺣﻤﻢ .. ﺑﻨﺰﻭﺭ ﻭﺣﺪﻩ ﺻﺎﺣﺒﺘﻲ .. ﺭﺍﻗﺪﻩ ﻓﻲ ﺍﻟﻤﺴﺘﺸﻔﻰ ..
ﺑﺮﻧﻴﻪ ﺷﺒﺤﺘﻠﻬﺎ ﺷﺒﺤﻪ ﺗﺨﻮﻑ ﻭﺷﺪﺗﻬﺎ ﻣﻦ ﺍﻳﺪﻫﺎ ﻭﺟﺮﺗﻬﺎ ﻭﻣﺸﺖ ﺑﻴﻬﺎ ﻟﻠﺼﺎﻟﻪ ﻭﻭﻗﻔﺘﻬﺎ ﻗﺪﺍﻡ ﺍﻟﺘﻠﻔﺰﻳﻮﻥ ﻭﺍﻧﻌﺎﻡ ﺍﻧﺼﺪﻣﺖ ..
ﺑﺮﻧﻴﻪ ﺑﻨﺒﺮﺓ ﺑﺎﻛﻴﻪ : 3 ﺍﻳﺎﻡ ﻭﻭﻟﺪﻱ ﻫﺬﺍ ﺣﺎﻟﻪ ﻭﺍﻧﻲ ﻣﺎﻧﻌﻠﻤﺶ ..
ﺍﻧﻌﺎﻡ ﻋﻴﻮﻧﻬﺎ ﻓﻲ ﺍﻟﺘﻠﻔﺰﻳﻮﻥ ﻭﻣﺶ ﻗﺎﺩﺭﺓ ﺗﺮﺩ ..
ﺑﺮﻧﻴﻪ : ﻣﺎﺷﺘﻴﻠﻪ ..
ﺍﻧﻌﺎﻡ ﺷﺒﺤﺖ ﻷﻣﻬﺎ ﻭﻗﻌﺪﺕ ﺳﺎﻛﺘﻪ ..
ﺑﺮﻧﻴﻪ ﺷﺪﺗﻬﺎ ﻣﻦ ﺩﺭﺍﻋﻬﺎ ﻭﻫﺰﺗﻬﺎ ﻭﺑﺼﻮﺕ ﻋﺎﻟﻲ : ﺗﻜﻠﻤﻤﻤﻲ ﻣﺎﺍﺍﺍﺍﺷﺘﻴﻴﻴﻴﻠﻪ ..
ﺍﻧﻌﺎﻡ ﺍﻧﻔﺰﻋﺖ ﻭﻏﻤﻀﺖ ﻋﻴﻮﻧﻬﺎ ﻭﺑﻌﻴﺎﻁ : ﺍﻳﻴﻴﻴﻴﻴﻪ .. ﺍﻳﻴﻴﻴﻴﻴﻴﻴﻪ
ﺑﺮﻧﻴﻪ : ﻣﺎﺷﻴﻪ ﻣﻌﺎﻙ .. ﻭﺗﻮﺟﻬﺖ ﻟﺪﺍﺭﻫﺎ ﻟﺒﺴﺖ ﺟﻼﺑﻴﺘﻬﺎ ﻭﺷﺎﺭﺑﺘﻬﺎ ﻭﻃﻠﻌﺖ ..
ﺑﺮﻧﻴﻪ : ﻫﻴﺎ ..
ﺍﻧﻌﺎﻡ : ﺍﻣﻲ ﺍﻧﺘﻲ ﻛﻮﻳﺴﻪ ..
ﺑﺮﻧﻴﻪ : ﻛﻮﻳﺴﻪ ﻛﻮﻳﺴﻪ ﻫﻴﺎﺍﺍ ..
ﻃﻠﻌﺖ ﻫﻲ ﻭﺍﻧﻌﺎﻡ ﻭﺭﻛﺒﻮﺍ ﺍﻟﺴﻴﺎﺭﺓ ﻭﻃﻠﻌﻮﺍ ...
ﻓﻲ ﺍﻟﻤﺼﺤﻪ ..
ﺍﻟﺤﺴﻦ : ﻣﻌﺎﺵ ﻳﺤﻜﻲ ﻣﻌﺎﻱ ﻓﻲ ﺷﻲ ﻭﺍﻧﻲ ﻣﺎﻧﺤﺒﺶ ﻧﻀﻐﻂ ﻋﻠﻴﻪ ﻫﻮ ﺑﺎﻟﺬﺍﺕ ﻣﺎﻳﺒﻴﺶ ﻳﻘﻮﻝ ﻣﺎﻳﻘﻮﻟﺶ ..
ﻋﺎﺑﺪ : ﺍﻧﻲ ﺣﺴﻴﺘﻪ ﻣﺪﺭﻕ ﺷﻲ ﻣﻦ ﺍﺧﺮ ﻣﺮﺓ ﻣﺶ ﻉ ﺑﻌﻀﻪ ﻃﺎﻟﻊ ﺧﺎﺵ ﻭﻳﺘﻜﻠﻢ ﺑﺎﻟﺘﻠﻴﻔﻮﻥ ..
ﻣﺤﻤﺪ : ﺣﺘﻰ ﺍﻧﻲ ﻻﺣﻈﺖ ..
ﺍﻟﺤﺴﻦ ﻗﻌﺪ ﻳﻔﻜﺮ ﻓﻜﻼﻣﻬﻢ ﻓﻌﻼ ﺍﻟﻔﺘﺮﺓ ﻫﺎﺩﻱ ﻫﺬﺍ ﻭﺿﻊ ﺳﺮﻣﺪ .. ﺯﺍﺩ ﺍﺿﺎﻳﻖ ﺍﻟﺤﺴﻦ ﻻﻧﻪ ﻻﺣﻆ ﻭﻣﺎ ﺃﻫﺘﻤﺶ ﻭﺣﺲ ﺍﻧﻪ ﻫﻮ ﺍﻟﺴﺒﺐ ﻭﺍﻥ ﺍﻟﻠﻲ ﺩﺍﺭ ﻫﻜﻲ ﻓﻌﻤﻪ ﺩﺍﺭﻩ ﺑﺴﺒﺒﻪ ﻣﺸﻲ ﻉ ﺟﻬﺔ ﻭﺷﺎﻑ ﺍﻟﺮﺳﺎﻟﻪ ﺍﻟﻠﻲ ﻭﺻﻠﺖ ﻣﻦ ﺭﻗﻢ ﻣﺠﻬﻮﻝ ﺑﻌﺪ ﻣﻜﺎﻟﻤﺔ ﺍﻟﻔﻴﺪﻳﻮ ..
( ﺍﻧﺖ ﺍﻟﻠﻲ ﺍﺟﺒﺮﺗﻨﻲ .. ﻭﻫﺎﺩﻱ ﺍﻟﺒﺪﺍﻳﻪ ﻳﺎ ﺍﻓﻨﺪﻳﻨﺎ .. ﺗﻌﺎﻟﻰ ﺧﻮﺩ ﻋﻤﻚ ﻣﻦ **** ﺑﺲ ﺗﻌﺎﻝ ﺑﺴﺮﻋﻪ ﻳﺎﺗﻠﺤﻖ ﻳﺎﻣﺎﺗﻠﺤﻘﺶ ) ...
ﻳﻌﻨﻲ ﺍﻟﻘﺼﻪ ﺗﺨﺼﻪ ﻫﻮ .. ﻗﻌﺪ ﻳﻔﻜﺮ ﺍﻛﺜﺮ ﺷﻦ ﻫﻮ ﺍﻟﻠﻲ ﻣﺪﺭﻗﻪ ﻋﻠﻴﻪ ﺳﺮﻣﺪ ﻃﻮﻝ ﻫﺎﻟﻤﺪﻩ ... ﺍﻧﺼﺪﻡ ﻟﻤﺎ ﺳﻤﻊ ﺻﻮﺕ ﺣﻨﺎﻩ ﻭﻫﻲ ﺗﻜﺸﺦ .. ﺗﻠﻔﺖ ﻟﻘﺎﻫﺎ ﻭﺍﻗﻔﻪ ﻉ ﻋﺎﺑﺪ ﻭﻣﺤﻤﺪ ﻭﺗﻬﺰﺏ ﻓﻴﻬﻢ .. ﻣﻂ ﺷﻮﺭﺍﺑﻪ ﺑﺈﺳﺘﻴﺎﺀ ﻭﻣﺸﺎﻟﻬﺎ .. ﺷﺪﻫﺎ
ﺍﻟﺤﺴﻦ : ﺍﺭﺟﻮﻙ ﺣﻨﺎﻱ ﺃﻫﺪﻱ .. ﺣﻨﻲ ﺩﺭﻗﻨﺎ ﻋﻠﻴﻚ ﻉ ﺧﺎﻃﺮﻙ ..
ﺑﺮﻧﻴﻪ ﺑﺒﻜﻲ : ﻭﻫﺎﻧﻲ ﻋﺮﻓﺖ ﺷﻦ ﺻﺎﺭﻟﻲ ﻣﺘﺖ ؟ !! ﻣﺎﻣﺘﺶ ﻭﻟﺪﻱ ﺍﻟﻠﻲ ﻗﺎﻋﺪ ﻳﻤﻮﺕ ..
ﺣﻀﻨﻬﺎ ﺍﻟﺤﺴﻦ : ﻣﺎﺗﻘﻮﻟﻴﺶ ﻫﻜﻲ ﺑﺈﺫﻥ ﺍﻟﻠﻪ ﺣﻴﻨﻮﺽ ﺳﺎﻟﻢ ﺻﺪﻗﻴﻨﻲ ﺣﻴﻄﻠﻊ ﻣﻨﻪ .. ﻗﻄﻮﺱ ﺑﺴﺒﻌﻪ ﺍﺭﻭﺍﺡ ﻭﻟﺪﻙ ﻫﺬﺍ ..
ﻉ ﺟﻴﺔ ﺣﺴﺎﻥ ﻭﻋﻠﻲ ..
ﻋﻠﻲ : ﺣﻨﺎﻱ ..
ﺣﺴﺎﻥ ﺷﺒﺢ ﻹﻧﻌﺎﻡ ﺍﻟﻠﻲ ﻫﺰﺕ ﻛﺘﺎﻓﻬﺎ ﺑﻘﻠﺔ ﺣﻴﻠﻪ ..
ﻋﺎﺑﺪ : ﺷﻦ ﺻﺎﺭ ﻣﻌﺎﻛﻢ .
ﻋﻠﻲ ﻭﻫﻮ ﻳﺸﺒﺢ ﻟﺒﺮﻧﻴﻪ ﻫﺰ ﺭﺍﺳﻪ ﺑﺈﻳﺠﺎﺏ : ﻛﻠﻪ ﺗﻤﺎﻡ ..
ﺍﻧﻌﺎﻡ ﺟﺒﺪﺕ ﺣﺴﺎﻥ ﻉ ﺗﺮﻛﻴﻨﻪ ..
ﺍﻧﻌﺎﻡ : ﻉ ﺷﻨﻮ ﻳﺪﻭﺍ ﺑﻮﻙ ﻭﺧﻮﻙ ..
ﺣﺴﺎﻥ ﺗﻨﻬﺪ : ﻓﻲ ﺣﺎﻟﺔ ﻣﺎﻓﺎﻗﺶ ﺣﺘﻰ ﺍﻟﻴﻮﻡ ﺣﻴﺮﻓﻌﻮﻩ ﺑﺎﻹﺳﻌﺎﻑ ﺍﻟﻄﺎﺋﺮ ﺑﺮﺍ ﺍﻟﺒﻼﺩ ..
ﺍﻧﻌﺎﻡ ﻣﺎﺍﺗﺖ ﻣﻦ ﺍﻟﺨﻮﻑ : ﻳﺎﺍﺍﺭﺏ ﺳﺘﺮﻙ ..
ﺷﻮﻳﻪ ﻭﺟﺖ ﻣﻤﺮﺿﻪ ﺧﺸﺖ ﺑﺘﺸﻮﻓﻪ .. ﻛﻠﻬﻢ ﺷﺒﺤﻮﻟﻬﺎ ... ﺷﻮﻳﻪ ﻭﻓﺘﺤﺖ ﺍﻟﺒﺎﺏ ﻭﻃﻠﻌﺖ ﺗﺠﺮﻱ ..
ﺍﻟﺤﺴﻦ : ﺧﻴﺮﻫﺎ ﻫﺎﺩﻱ ..
ﻋﺎﺑﺪ : ﺳﺘﺮﻙ ﻳﺎﺍﻟﻠﻪ ..
ﺷﻮﻳﻪ ﻭﺟﻲ ﺍﻟﺪﻛﺘﻮﺭ ﻭﺧﺶ ﻭﺳﻜﺮ ﺍﻟﺒﺎﺏ ..
ﺑﺮﻧﻴﻪ ﺑﺨﻮﻑ : ﻳﺎﺍﺍﺭﺑﻲ ﻛﺒﺪﻱ ﺍﻧﺴﺤﻨﺖ ﻳﺎﺍﺭﺑﻲ ..
ﺍﻧﻌﺎﻡ : ﺍﻫﺪﻱ ﻳﺎﺃﻣﻲ ﺑﺎﻟﻠﻪ ﻋﻠﻴﻚ .
ﺑﺮﻧﻴﻪ : ﻣﻌﺎﺵ ﺗﻘﻮﻟﻲ ﺍﻫﺪﻱ ﻣﻌﺎﺵ ﺗﻘﻮﻟﻬﺎﻟﻲ ..
ﺍﻟﺤﺴﻦ : ﺍﺷﺸﺶ ﺧﻼﺹ ﺣﻨﺎﻱ .. ﻭﺣﻀﻨﻬﺎ ﻭﻫﻲ ﺗﺒﻜﻲ ..
ﻃﻠﻊ ﺍﻟﺪﻛﺘﻮﺭ ﻭﻉ ﻭﺟﻬﻪ ﺍﺑﺘﺴﺎﻣﻪ ﺧﻠﺘﻬﻢ ﻳﺴﺘﺒﺸﺮﻭﺍ : ﺍﻟﺤﻤﺪ ﻟﻠﻪ ﺗﻌﺪﺍ ﻣﺮﺣﻠﺔ ﺍﻟﺨﻄﺮ ﻭﻓﺎﻕ ..
ﻛﻠﻬﻢ ﻓﺮﺣﻮﺍ ﺑﺈﺭﺗﻴﺎﺡ ﺷﺪﻳﺪ .. ﺍﻟﺤﺴﻦ ﻭﺧﺮ ﻭﻭﻗﻒ ﻉ ﺍﻟﺤﻴﻂ ﺑﻮﺟﻬﻪ ﻭﺣﻂ ﺭﺍﺳﻪ ﻋﻠﻴﻪ ﻭﻏﻤﺾ ﻋﻴﻮﻧﻪ ﺑﺸﺪﻩ ﻭﻓﺘﺤﻬﻢ ﻭﺗﻨﻔﺲ ﺑﻘﻮﺓ ..
***
ﺍﻟﺤﻤﺪ ﻟﻠﻪ ﻳﺎﺭﺑﻲ ..
ﺟﻨﺎﻥ ﺑﺪﻣﻮﻉ : ﺍﺍﺍﻩ ﻳﺎﺭﺑﻲ ﻭﺍﻟﻠﻪ ﻗﺮﻳﺐ ﻣﺘﺖ ﻭﺭﺍﻩ ..
ﺧﻮﻟﻪ ﺗﻤﺴﺢ ﻓﻲ ﺩﻣﻮﻋﻬﺎ : ﺍﻟﺤﻤﺪ ﻟﻠﻪ ..
ﻭﺳﻴﻠﻪ : ﺍﻥ ﺷﺎﺀ ﺍﻟﻠﻪ ﻳﺤﻂ ﻋﻘﻠﻪ ﻓﻲ ﺭﺍﺳﻪ ﺑﻌﺪ ﺍﻟﻠﻲ ﺻﺎﺭ ..
....
ﻫﺎﻟﻪ : ﺗﻮﺍ ﻛﻴﻒ ﺑﻠﻐﻨﻲ ﺣﺴﺎﻥ ..
ﺳﺎﺭﺓ ﺗﻤﺴﺢ ﻓﺪﻣﻮﻋﻬﺎ : ﺍﻟﺤﻤﺪ ﻟﻠﻪ ..
ﻋﻠﻴﺎ : ﺍﻟﺤﻤﺪ ﻟﻠﻪ .. ﺗﻮﺍ ﺳﺎﺭﺓ ﺑﺮﻱ ﺍﺭﺗﺎﺣﻲ ﺍﻧﺘﻲ ﺣﺎﻣﻞ ﻣﺶ ﺑﺎﻫﻲ ﻟﻴﻚ ﺍﻟﺴﻬﺮ ..
ﺳﺎﺭﺓ ﺑﻨﺒﺮﺓ ﺣﺎﺩﻩ : ﻣﺎﻳﺼﻴﺮﻟﻲ ﺷﻲ .. ﻭﻣﺸﺖ ﺧﺸﺖ ﻟﺪﺍﺭ ﺍﻟﻤﻌﻴﺸﻪ ..
ﻋﻠﻴﺎ : ﻣﺘﻐﻴﺮﺓ ﻣﻌﺎﻱ ..
ﻫﺎﻟﻪ : ﻣﻤﻜﻦ ﻣﻀﺎﻳﻘﻪ ﻣﻦ ﻳﻮﻡ ﺍﻟﻤﺸﻜﻠﻪ ..
ﻋﻠﻴﺎ ﺗﻨﻬﺪﺕ : ﺍﻧﻲ ﺑﻨﺮﻛﺐ ﻧﺮﻗﺪ
ﻫﺎﻟﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻋﻠﻴﺎ ﺭﻛﺒﺖ ﻭﻫﻲ ﻣﻀﺎﻳﻘﻪ ..
***
ﺭﺍﻗﺪﻩ ﻭﻫﻲ ﺗﺘﻔﺮﺝ ﻉ ﺻﻮﺭﻩ ﻭﺩﻣﻮﻋﻬﺎ ﺗﻨﺰﻝ ﻭﺻﻠﺘﻬﺎ ﺭﺳﺎﻟﻪ
( ﺳﺮﻣﺪ ﻓﺎﻕ ﻭﺣﺎﻟﻪ ﻛﻮﻳﺲ )
ﺿﺤﻜﺖ ﻣﻦ ﺑﻴﻦ ﺩﻣﻮﻋﻬﺎ ﺣﻄﺖ ﻉ ﺻﻮﺭﺓ ﻣﻦ ﺻﻮﺭﻩ ﻭﺣﻀﻨﺘﻬﺎ ﻭﻫﻲ ﺗﺒﻜﻲ ﻣﻦ ﺍﻟﻔﺮﺣﻪ ..
***
ﺭﻭﺡ ﻟﻠﺤﻮﺵ ﺑﻌﺪ ﺍﻃﻤﻦ ﻉ ﺣﺎﻟﺔ ﻋﻤﻪ ﻟﻴﻪ 4 ﺷﺒﻪ ﻣﺎﻳﺮﻗﺪﺵ .. ﺧﺶ ﻟﻠﺤﻮﺵ ﺑﻬﺪﻭﺀ ﺷﻢ ﺭﻳﺤﺘﻬﺎ ﻏﻤﺾ ﻋﻴﻮﻧﻪ ﻭﺧﺪﻱ ﻧﻔﺴﻬﺎ ﺍﻟﻠﻲ ﻣﻌﺒﻲ ﺍﻟﺤﻮﺵ .. ﺍﺭﺗﺎﺡ ﺑﺰﻳﺎﺩﻩ ﺗﻮﺟﻪ ﻟﻠﺪﺍﺭ ﻭﻫﻮ ﺷﺎﺩ ﺟﺎﻛﺘﻪ ﺑﺈﻳﺪﻩ ﻭﺣﺎﻃﻬﺎ ﻭﺭﺍ ﻇﻬﺮﻩ ﻭﻗﻒ ﻉ ﺍﻟﺒﺎﺏ ﻟﻤﺎ ﻟﻘﺎﻫﺎ ﺣﺎﻃﻪ ﺳﻤﺎﻋﺎﺕ ﻓﻲ ﻭﺫﻧﻬﺎ ﻭﺗﻜﺘﺐ ﻓﻲ ﺍﻟﻤﺬﻛﺮﻩ ..
ﻗﻌﺪ ﻗﺮﻳﺐ 10 ﺩﻗﺎﻳﻖ ﻣﺎﺣﺴﺘﺶ ﺑﻴﻪ ﻭﻫﻮ ﻣﻤﻠﺶ ﻣﻦ ﻭﻗﻔﺘﻪ ﻭﻫﻮ ﻳﺘﺄﻣﻞ ﻓﻴﻬﺎ ﻭﺷﻮﻗﻪ ﻟﻴﻬﺎ ﻣﺎﻻﺵ ﺣﺪ ..
ﻫﻴﺎ ﻗﺎﻣﺖ ﺭﺍﺳﻬﺎ ﺗﺤﺮﻙ ﻓﻲ ﺭﻗﺒﺘﻬﺎ ﻭﺟﻌﺘﻬﺎ ﺷﻮﻳﻪ ﺣﺴﺖ ﺑﺨﻴﺎﻝ ﻭﺍﻗﻒ ﻉ ﺍﻟﺒﺎﺏ ﺍﻟﺘﻔﺘﺖ ﺟﻴﻬﺘﻪ ﺑﺎﻟﺸﻮﻳﻪ ﻟﻴﻦ ﺷﺎﻓﺎﺗﻪ ﺍﺭﺗﺴﻤﺖ ﻉ ﻭﺟﻬﻬﺎ ﺍﺑﺘﺴﺎﻣﻪ ﻓﺮﺣﻪ ﻭﺷﻮﻕ .. ﺣﻮﻟﺖ ﺳﻤﺎﻋﺎﺗﻬﺎ ﻭﻧﺎﺿﺖ ﺗﺠﺮﻳﻠﻪ ﺯﻱ ﺍﻟﻄﻔﻠﺔ ﺍﻟﺼﻐﻴﺮﺓ ﺯﻱ ﻣﺎﺗﻌﻮﺩ ﻋﻠﻴﻬﺎ ﻭﻋﺮﻓﻬﺎ .. ﺣﻀﻨﺎﺗﻪ ﻭﻫﻲ ﺷﺎﺩﻩ ﻓﺮﻗﺒﺘﻪ ﻭﻫﻮ ﺣﺎﻭﻃﻬﺎ ﺑﺈﻳﺪﻳﻪ ﻣﻦ ﺧﺼﺮﻫﺎ ﻭﺩﻓﻦ ﻭﺟﻬﻪ ﻓﻲ ﺭﻗﺒﺘﻬﺎ ﻭﻳﺸﻢ ﻓﺮﻳﺤﺘﻬﺎ ﺑﺸﻮﻕ ﺷﺪﻳﺪ ..
ﻋﻠﻴﺎ : ﺍﺳﺘﺎﺣﺸﺘﻚ ﻣﻮﻭﻭﺕ ..
ﺍﻟﺤﺴﻦ : ﻣﺶ ﺍﻛﺜﺮ ﻣﻨﻲ ...
ﻗﻌﺪﻭﺍ ﺣﺎﺿﻨﻴﻦ ﺑﻌﺾ ﻫﻠﺒﻪ .. ﺑﻌﺪﻳﻦ ﺑﻌﺪﺕ ﻋﻠﻴﺎ ﻭﻫﻲ ﺷﺎﺩﻩ ﻭﺟﻬﻪ ﺑﺈﻳﺪﻫﺎ : ﺿﺎﻋﻒ ﻭﺟﻬﻚ ﺷﺎﺣﺐ ..
ﺍﻟﺤﺴﻦ ﺑﻀﺤﻜﻪ : ﻣﺎﻓﻴﺎ ﺷﻲ ...
ﻋﻠﻴﺎ : ﺍﻳﻪ ﻣﺎﻓﻴﻚ ﺷﻲ ﺩﻳﻤﺎ ﻭﺍﻧﺖ ﻣﺎﻓﻴﻚ ﺷﻲ ﺣﺘﻰ ﻭﺍﻧﺖ ﻣﻀﺮﻭﺏ ﺑﺮﺻﺎﺻﻪ ﻓﻨﺺ ﺻﺪﺭﻙ ﻣﺎﻓﻴﻚ ﺷﻲ ..
ﺍﻟﺤﺴﻦ ﺑﻌﺸﻖ : ﺍﻧﻲ ﻣﺎﻓﻴﺎ ﺷﻲ ﻏﻴﺮﻙ ﺍﻧﺘﻲ ﺍﻧﺘﻲ ﻭﺑﺲ ..
ﺑﺮﻏﻢ ﺗﻌﺒﻪ ﺷﻮﻗﻪ ﻛﺎﻥ ﺍﻗﻮﻯ ﺑﻬﻠﺒﻪ .. ﺷﻮﻕ ﻣﺎﻻﺵ ﻃﺎﻗﻪ ﻳﺄﺟﻞ ﺍﻟﺘﻌﺒﻴﺮ ﻋﻨﻪ ﻟﻮﻗﺖ ﺗﺎﻧﻲ 💗...
***
ﻋﺒﺪﺍﻟﻘﺪﻭﺱ : ﺍﻟﻠﻲ ﺩﺍﺭ ﻫﻜﻲ ﺑﺮﺩ ﻉ ﻗﻠﺒﻲ ..
ﻣﻨﺼﻒ : ﺟﻤﺎﻋﺘﻨﺎ ﺍﻛﻴﺪ ..
ﻋﺒﺪ ﺍﻟﻘﺪﻭﺱ : ﺍﻱ ﻛﺎﻥ ﻳﺒﻴﻬﺎ ﻣﻦ ﺯﻣﺎﻥ ..
ﻣﻨﺼﻒ : ﻗﺎﻟﻮﺍ ﻋﻠﻘﺔ ﻣﻮﻭﺕ ﻭﻣﺪﻗﺪﻕ ﺩﻗﺪﻳﻖ ..
ﻋﺒﺪﺍﻟﻘﺪﻭﺱ : ﺍﻥ ﺷﺎﺀ ﺍﻟﻠﻪ ﻣﻌﺎﺵ ﻧﺸﻮﻑ ﻭﺟﻬﻪ .. ﺍﻟﻤﻬﻢ ﺗﻮﺍ ﺧﻠﻴﻨﻲ ﻣﻨﻪ .. ﺣﻔﻠﺔ ﺑﻨﺘﻲ ﻳﻮﻡ ﺍﻟﺨﻤﻴﺲ .. ﺩﻭﺷﻪ ﻣﺎﻧﺒﻴﺶ ..
ﻣﻨﺼﻒ ﺍﺑﺘﺴﻢ : ﺍﻃﻤﻦ ﻛﻠﻪ ﺗﺤﺖ ﺍﻟﺴﻴﻄﺮﻩ
ﻋﺒﺪﺍﻟﻘﺪﻭﺱ : ﻛﻮﻳﺲ ..
***
ﺍﻟﺴﺎﻋﻪ 2 ﻟﻴﻼ ..
ﺯﻭﺯ ﻳﻤﺸﻮﺍ ﻑ ﻣﻤﺮ ﻃﻮﻳﻞ ﻛﻤﻠﻮﻩ ﻭﻫﻤﺎ ﺳﺎﻛﺘﻴﻦ ﻟﻴﻦ ﻭﺻﻠﻮﺍ ﻟﻐﺮﻓﻪ ﻣﺠﻬﻮﻟﻪ ﺧﺸﻮﺍ ﻭﺳﻜﺮﻭﺍ ﺍﻟﺒﺎﺏ ..
: ﺍﻟﺨﻄﻮﺓ ﺍﻟﺘﺎﻧﻴﻪ ..
: ﺧﺎﺵ .. ﺑﻘﻮﺓ .. ﻭﺍﻧﺪﻓﺎﻉ ..
: ﻣﻌﺎﺵ ﻓﻲ ﻭﻗﺖ .. ﺍﻗﻞ ﻣﻦ 15 ﻳﻮﻡ ..
: ﺍﻟﺨﻄﻮﺓ ﺍﻟﺘﺎﻧﻴﻪ ... ﻫﺪﻭﻭﻭﻭﺀ ...
ﺍﻟﺰﻭﺯ ﺷﺒﺤﻮﺍ ﻟﺒﻌﺾ ﻭﺷﺒﺤﻮﻟﻪ ..
: ﺍﺳﻤﻌﻮﺍ ﺍﻟﻜﻼﻡ ..
: ﺗﻢ ..
***
ﻃﻠﻌﺖ ﻣﻦ ﺍﻟﺪﻭﺵ ﻟﻘﺎﺗﻪ ﺭﺍﻗﺪ
ﻋﻠﻴﺎ : ﺭﻗﺪ ﻣﻦ ﻏﻴﺮ ﻣﺎﻳﻨﺸﻒ ﺷﻌﺮﻩ ﻭﻓﺎﺗﺢ ﺍﻟﻤﻜﻴﻒ ..
ﺧﺪﺕ ﺍﻟﺮﻳﻤﻮﺕ ﻭﺳﻜﺮﺍﺗﻪ .. ﻭﻗﻔﺖ ﻋﺎﻟﻤﺮﺍﻳﻪ ﻧﺸﻔﺖ ﺷﻌﺮﻫﺎ ﻭﺗﻤﺸﻂ ﻓﻴﻪ .. ﺷﻮﻳﻪ ..
ﺍﻟﺤﺴﻦ ﻧﺎﺽ ﺑﺘﺬﻣﺮ : ﺗﺲ .. ﻋﻼﺵ ﺳﻜﺮﺗﻴﻪ
ﻋﻠﻴﺎ ﻭﻫﻲ ﺗﻤﺸﻂ ﻓﻲ ﺷﻌﺮﻫﺎ : ﺣﻀﺮﺗﻚ ﻣﺎﻧﺸﻔﺘﺶ ﺷﻌﺮﻙ ﻭﺭﺍﻗﺪﻟﻲ ﺗﺤﺘﻪ .. ﻭﺑﻌﺪﻳﻦ ﻣﺎﺯﺍﻝ ﺑﻜﺮﻱ ﻉ ﺍﻟﻤﻜﻴﻒ ﺍﻟﻠﻲ ﻓﺎﺗﺤﻬﻮﻟﻲ ﻣﻦ ﺗﻮﺍ ..
ﺍﻟﺤﺴﻦ : ﺍﻧﺘﻲ ﻣﺨﻠﻴﻪ ﺍﻟﺤﻮﺵ ﺣﺮﻳﻘﻪ ﺑﺎﻟﺪﻓﺎﻳﺎﺕ ﺍﻟﻠﻲ ﻓﺎﺗﺤﺘﻴﻬﻢ ..
ﻋﻠﻴﺎ : ﻣﺎﺯﺍﻝ ﺍﻟﺼﻘﻊ ﻣﺎﺗﻤﺶ ..
ﺍﻟﺤﺴﻦ : ﺍﻭﻭﻭﻓﻒ ﻋﻨﺎﺩ ﻋﻨﺎﺩ ﻋﻨﺎﺩ ..
ﻋﻠﻴﺎ ﻣﺸﺘﻠﻪ : ﻫﻬﻬﻬﻬﻬﻬﻪ .. ﻣﺎﻧﻌﺎﻧﺪﺵ ﺍﻧﺖ ﺍﻟﻠﻲ ﻣﺴﻜﺮﺭﺍﺳﻚ ..
ﺍﻟﺤﺴﻦ ﺑﺮﻓﻌﺔ ﺣﺎﺟﺐ : ﺍﻧﻲ ﺍﻟﻠﻲ ﻣﺴﻜﺮ ﺭﺍﺳﻲ ﺻﺢ !! ﺑﻪ ﺍﻓﺘﺤﻲ ﺍﻟﺮﻭﺷﻦ ..
ﻋﻠﻴﺎ ﺑﻀﺤﻜﻪ : ﺑﺎﻩ .. ﻗﻌﺪ ﻣﻌﺎﻫﺎ ﺑﻌﻴﻮﻧﻪ ﻟﻴﻦ ﻓﺘﺤﺖ ﺍﻟﺮﻭﺷﻦ ...
ﺍﻟﺤﺴﻦ ﻓﺘﺢ ﺍﻳﺪﻩ : ﺗﻌﺎﻟﻲ ﻳﺎﺳﻤﻮﺣﻪ ..
ﻋﻠﻴﺎ ﺿﺤﻜﺖ ﻭﻣﺸﺘﻠﻪ ﻭﺧﺸﺖ ﻓﻲ ﺣﻀﻨﻪ .. ﻭﻫﻮ ﺣﻀﻨﻬﺎ ﺑﺈﻳﺪﻳﻪ ﺍﻟﺰﻭﺯ ... ﻭﻏﻤﺾ ﻋﻴﻮﻧﻪ ..
ﻋﻠﻴﺎ : ﺷﻦ ﺣﺎﻝ ﺳﺮﻣﺪ ..
ﺍﻟﺤﺴﻦ : ﻛﻮﻳﺲ ..
ﻋﻠﻴﺎ : ﺍﻣﺘﻰ ﻳﻄﻠﻊ ..
ﺍﻟﺤﺴﻦ : ﻣﺎﺍﺍﺍﺯﺍﺍﻝ ..
ﻋﻠﻴﺎ : ﺍﻣﺘﻰ ﻳﻌﻨﻲ ..
ﺍﻟﺤﺴﻦ ﺗﻨﻬﺪ : ﺍﺳﺒﻮﻉ ﺑﺎﻟﻜﺜﻴﺮ 10 ﺍﻳﺎﻡ ..
ﻋﻠﻴﺎ : ﻣﻦ ﺍﻟﻠﻲ ﺩﺍﺭ ﻓﻴﻪ ﻫﻜﻲ ..
ﻻﺭﺩ ..
ﻋﻠﻴﺎ : ﺍﻟﺤﺴﻦ ﻣﻦ ﺍﻟﻠﻲ ﺿﺮﺑﻪ ﻫﻜﻲ ..
ﻻﺭﺩ ..
ﻋﻠﻴﺎ : ﺭﻗﺪﺕ ..
ﻻﺭﺩ ..
ﻋﻠﻴﺎ ﺗﻨﻬﺪﺕ : ﺍﻟﻠﻪ ﻳﻘﻄﻊ ﺍﻳﺪﻳﻬﻢ ﻳﺎﺭﺏ .. ﺣﻘﺮﺍﺀ .. ﻧﺤﺴﺎﺑﻮﺍ ﺍﺭﻭﺍﺣﻨﺎ ﺍﻓﺘﻜﻴﻨﺎ ﻣﻨﻬﻢ ﻟﻜﻦ ﺷﻲ .. ﻻﺯﻡ ﻳﻘﻌﺪ ﻣﻨﻬﻢ ﻣﻦ ﻳﻨﻜﺪ ﻋﻠﻴﻨﺎ ... ﺳﻜﺘﺖ .. ﺍﺻﻼ ﻃﺒﻴﻌﻲ ﻣﺎﺯﺍﻝ ﻗﺎﻋﺪﻳﻦ ﻓﻲ ﺍﻟﺒﺪﺍﻳﻪ ﺗﺒﻲ ﺳﻨﻴﻦ ﻭﺳﻨﻴﻦ ﻉ ﻣﺎﺗﺴﺘﻘﺮ .. ﺑﺮﺃﻳﻚ ﻗﺪﺍﺵ ﺗﺒﻲ ﺳﻨﻪ ..
ﺍﻟﺤﺴﻦ : ﺍﺭﺭﺭﺭﺭﻗﺪﻳﻴﻴﻲ ﻳﺎﺻﺪﺍﺍﺍﺍﺍﺍﺍﻉ ..
ﻋﻠﻴﺎ : ﻫﻬﻬﻬﻬﻬﻬﻬﻬﻬﻬﻬﻪ .... ﺑﺎﻩ ﺧﻼﺹ ﻫﺎﻩ ﻏﻤﻀﺖ ﻋﻴﻮﻧﻲ ..
ﺍﻟﺤﺴﻦ ﺿﻤﻬﺎ ﺑﺰﻳﺎﺩﻩ ﻭﻫﻮ ﻳﻔﻜﺮ ﻓﻜﻼﻣﻬﺎ ﻓﻌﻼ ﺍﻟﻄﺮﻳﻖ ﻃﻮﻳﻠﻪ ﻭﺗﺒﻲ ﺻﺒﺮ .. ﺍﻟﺼﺒﺮ ... ﺍﺳﺎﺱ ﺍﻵﺳﺘﻤﺮﺍﺭ .. ﻭﺍﻟﺒﻨﺎﺀ ﻳﺒﻲ ﻭﻗﺖ ﻃﻮﻳﻞ ﻉ ﻋﻜﺲ ﺍﻟﻬﺪﻡ ﺍﻟﻠﻲ ﻣﺎﻳﺎﺧﺪﺵ ﺩﻗﺎﻳﻖ ...
***
ﻓﺎﺕ ﺍﺳﺒﻮﻉ ..
ﺳﺮﻣﺪ ﻃﻠﻊ ﻣﻦ ﺍﻟﻤﺴﺘﺸﻔﻰ .. ﺩﺍﺭﻭﻟﻪ ﺳﺮﻳﺮ ﻓﻲ ﺍﻟﻤﺮﺑﻮﻋﻪ ﻷﻥ ﺍﻟﻨﺎﺱ ﺑﻴﻤﺸﻮﺍ ﻋﻠﻴﻪ ﻭﻳﺠﻮﺍ ﻭﺍﻟﻌﻴﻠﻪ .. ﻣﻠﺘﻤﻪ ..
ﻋﻠﻴﺎ : ﺣﻔﻠﺘﻬﺎ ﺣﻠﻮﺓ ﻫﻠﺒﻪ ..
ﺟﻨﺎﻥ : ﺳﺎﻓﺮﺕ ..
ﻋﻠﻴﺎ : ﺍﻳﻪ ﺷﻬﺮ ﻋﺴﻞ ..
ﺟﻨﺎﻥ : ﻭﻳﻦ ..
ﻋﻠﻴﺎ : ﻗﺒﺮﺹ ..
ﺟﻨﺎﻥ : ﺣﻠﻮﺓ ...
ﻓﺎﻃﻤﻪ : ﻳﺎﺑﻨﺎﺕ ﺍﻟﺸﺎﻫﻲ ﻭﺍﻟﺤﻠﻮﺍﺕ ﻓﻲ ﻧﺴﺎﻭﻳﻦ ﺟﻮ ﺗﻮﺍ
ﻋﻠﻴﺎ : ﺍﻫﻢ ﻭﺍﺗﻴﺎﺕ ..
ﻃﻠﻌﺖ ﻋﻠﻴﺎ ﺑﺴﻔﺮﺓ ﺍﻟﺸﺎﻫﻲ ﻟﺤﻘﺘﻬﺎ ﺟﻨﺎﻥ ﺑﺎﻟﺤﻠﻮﻳﺎﺕ .. ﻃﺒﻌﺎ ﺍﻡ ﻋﻠﻴﺎ ﻭﺍﺧﺘﻬﺎ ﻛﺎﻧﻮﺍ ﻣﻮﺟﻮﺩﺍﺕ ﻭﺃﻣﻴﺮﺓ ﺑﺘﻤﻮﺕ ﻭﺗﺸﻮﻑ ﺳﺮﻣﺪ ..
ﻓﺎﺕ ﻭﻗﺖ ﻭﺟﻲ ﺍﻟﻠﻴﻞ ..
ﺍﻧﻌﺎﻡ : ﺑﻨﻤﺸﻲ ﻧﺸﻮﻑ ﺳﺮﻣﺪ ﻃﻠﻌﻮﺍ ﻣﻦ ﺣﺪﺍﻩ ﺍﻟﺮﺟﺎﻟﻪ ..
ﺍﻣﻴﺮﺓ ﻣﺮﻛﺰﺓ ﻣﻌﺎﻫﺎ .. ﻧﺎﺿﺖ
ﺯﻳﻨﺐ : ﻭﻳﻦ ﻣﺎﺷﻴﻪ ..
ﺍﻣﻴﺮﺓ ﺑﺮﺑﻜﻪ : ﺑﻨﻤﺸﻲ ﻟﻠﺤﻤﺎﻡ ...
ﺯﻳﻨﺐ : ﺑﺎﻩ .
ﻃﻠﻌﺖ ﺍﻣﻴﺮﺓ ﻭﻫﻲ ﺗﺸﻮﻑ ﺣﻮﺍﻟﻴﻬﺎ ﻛﺎﻥ ﻓﺤﺪ ﻣﺮﻛﺰ ﻣﻌﺎﻫﺎ ﺩﺍﺭﺕ ﺭﻭﺣﻬﺎ ﺑﺘﻤﺸﻲ ﻟﻠﺤﻤﺎﻡ ﺷﻮﻳﻪ ﻭﺭﺟﻌﺖ ﻭﻣﺸﺖ ﻣﻦ ﺍﻟﺠﻬﺔ ﺍﻟﻠﻲ ﻣﺸﺖ ﻣﻨﻬﺎ ﺍﻧﻌﺎﻡ ..
ﻓﻲ ﺍﻟﻤﺮﺑﻮﻋﻪ ..
ﺳﺮﻣﺪ : ﻳﺎﻭﺩﻱ ﺑﺮﻱ ﻓﺤﺎﻟﻚ ..
ﺍﻧﻌﺎﻡ ﺑﻀﺤﻜﻪ : ﺍﻛﻴﺪ ﻣﺎﺗﺒﻲ ﺷﻲ ..
ﺳﺮﻣﺪ ﺑﺘﺬﻣﺮ : ﺍﺳﺘﻐﻔﺮ ﺍﻟﻠﻪ ..
ﺍﻧﻌﺎﻡ ﺑﻀﺤﻜﻪ : ﺍﻟﺤﻖ ﻣﺶ ﻓﻴﻚ ... ﻭﻃﻠﻌﺖ ..
ﻫﻮ ﺿﺤﻚ ﻭﺍﺗﻜﻰ ﻭﻋﻴﻮﻧﻪ ﻣﻐﻤﻀﺎﺕ ..
ﺷﻮﻳﻪ ﻭﻃﻖ ﺍﻟﺒﺎﺏ ..
ﺳﺮﻣﺪ ﻭﻫﻮ ﻣﻐﻤﺾ ﻋﻴﻮﻧﻪ : ﺷﻦ ﻧﺴﻴﺘﻲ ﻳﺎﻋﺶ ..
ﺍﻧﻔﺘﺢ ﺍﻟﺒﺎﺏ .. ﻫﻮ ﺷﺒﺢ ﺟﻬﺔ ﺍﻟﺒﺎﺏ ﻭﺗﻔﺎﺟﺄ ... ﺑﻌﺪﻳﻦ ﺭﻓﻊ ﺣﺎﺟﺒﻪ ﺍﻟﻴﻤﻴﻦ ﻭﺍﺑﺘﺴﻢ ..
ﺍﻣﻴﺮﻩ ﺳﻜﺮﺕ ﺍﻟﺒﺎﺏ ﻭﺷﺒﺤﺘﻠﻪ ﺑﺨﺠﻞ ﻭﺧﺪﻭﺩﻫﺎ ﻣﺘﻮﺭﺩﺍﺕ : ﺣﻤﺪ ﻟﻠﻪ ﻉ ﺳﻼﻣﺘﻚ ..
ﺳﺮﻣﺪ : ﻃﺐ ﻭﺣﺪﻩ ﻭﺣﺪﻩ ﻭﺑﻼﺵ ﻛﻞ ﺩﺍ
ﻳﺠﻲ ﻣﺮﺓ ﻭﺣﺪﻩ ﺣﺘﺠﻨﻦ ﻛﺪﺍ
ﻟﻮ ﺩﺍ ﺍﻟﻨﻈﺎﻡ ﻣﻌﺎﻙ ﺑﺎﻟﺸﻜﻞ ﺩﺍ
ﻣﺎﻗﺪﺭﺵ ﻋﻠﻴﻪ ..
ﺍﻣﻴﺮﺓ : ﻫﻬﻬﻬﻬﻬﻪ .. ﻣﻌﻨﺎﻫﺎ ﺣﺎﻟﻚ ﺑﺎﻫﻲ ..
ﺳﺮﻣﺪ : ﺑﺸﻮﻓﺘﻚ ﺍﻛﻴﺪ ﺣﻴﻜﻮﻥ ﺑﺎﻫﻲ .. ﻻﺯﻡ ﻳﻜﻮﻥ ﺑﺎﻫﻲ ..
ﺍﻣﻴﺮﺓ : ﺧﻔﺖ ﻋﻠﻴﻚ ﻫﻠﺒﻪ ..
ﺳﺮﻣﺪ ﺑﺈﺑﺘﺴﺎﻣﻪ : ﺧﺎﻓﻲ ﻋﻠﻴﺎ ﻣﻦ ﻛﻼﻣﻚ ﻫﺬﺍ .. ﻧﻈﺮﺍﺗﻚ ﺍﻟﺨﺠﻮﻟﻪ .. ﻣﻦ ﺣﻼﻭﺗﻚ ﺍﻟﻠﻲ ﺗﺰﻳﺪ ﻟﻤﺎ ﺗﺘﺤﺸﻤﻲ .. ﻣﻦ ﺗﺄﺛﻴﺮﻙ ﻋﻠﻴﺎ ﻛﻞ ﻣﺎﻧﺸﻮﻓﻚ ..
ﺍﻣﻴﺮﺓ ﻗﻠﺒﻬﺎ ﺑﻴﻔﺮ ﻣﻦ ﻛﻼﻣﻪ ﺍﻟﺤﻠﻮ ﻛﺎﻥ ﻳﻘﻮﻝ ﻓﻴﻪ ﺑﻨﺒﺮﺓ ﺣﻠﻮﺓ ﻭﻋﻴﻮﻧﻪ ﻧﻈﺮﺗﻬﻢ ﺗﺴﺤﺤﺤﺮ ...💖
ﺳﺮﻣﺪ : ﺍﻣﻴﺮﺓ ﻗﻴﻤﻲ ﺭﺍﺳﻚ ..
ﺍﻣﻴﺮﺓ ﻗﺎﻣﺖ ﺭﺍﺳﻬﺎ ﻭﻭﺟﻬﻬﺎ ﻧﺎﺭ ﻣﻦ ﺍﻟﺨﺠﻞ ...
ﺳﺮﻣﺪ ﺑﺈﻋﺠﺎﺏ ﺷﺪﻳﺪ : ﺍﺍﺍﺍﻩ ﻳﺎﻗﻠﺒﻲ ﺍﻟﻤﺘﻤﺮﻣﺪ ..
ﺍﻣﻴﺮﻩ : ﻫﻬﻬﻬﻬﻬﻪ .. ﺳﻤﻌﺖ ﺻﻮﺕ ..
ﺍﻣﻴﺮﺓ ﻭﺳﺮﻣﺪ 🠾
ﻣﺎﻧﻠﻴﺔ ﺍﻟﺒﺎﺏ ﺗﺤﺮﻛﺖ ..
ﺍﻣﻴﺮﺓ ﻭﺳﺮﻣﺪ 😨😨
ﻓﻠﻤﺢ ﺍﻟﺒﺼﺮ ﺍﻣﻴﺮﻩ ﺟﺮﺕ ﺍﺩﺭﻗﺖ ﺑﺤﺪﺍ ﺍﻟﺪﻭﻻﺏ ﻣﻦ ﺟﻬﺔ ﺍﻟﺤﻴﻂ ﻓﻬﺎﻟﻠﺤﻈﻪ ﺍﻧﻔﺘﺢ ﺧﺶ ﺍﻟﺤﺴﻦ ﻭﺳﻜﺮ ﺍﻟﺒﺎﺏ ..
ﺍﻟﺤﺴﻦ : ﺣﺼﻠﺖ ﻋﻠﻴﻚ ..
ﺳﺮﻣﺪ ﺑﻀﺤﻜﻪ ﻣﺮﺗﺒﻜﻪ : ﺍﻧﻲ ﺭﺍﺟﻞ ﻣﺮﻳﺾ ﻭﺍﻳﺎﻣﻲ ﺳﻮﺩ ﻣﺶ ﻧﺎﻗﺺ ﺭﻋﺎﻳﺶ ..
ﺍﻟﺤﺴﻦ : ﺳﺮﻣﺪ ﺧﻠﻴﻨﺎ ﻓﻲ ﺍﻟﺠﺪ .. ﺍﺣﻜﻴﻠﻲ ﺑﺎﻟﺘﻔﺼﻴﻞ ﺷﻦ ﺻﺎﻳﺮ ﻣﻌﺎﻙ ﻭﺍﻧﻲ ﻣﻨﻌﺮﻓﺎﺵ ..
ﺳﺮﻣﺪ ﺑﻀﺤﻜﻪ : ﺭﻩ ﻫﺬﺍ ﺍﻭﻝ ﻳﻮﻡ ﻟﻴﺎ ﺑﺮﺍ ﺍﻟﻤﺴﺘﺸﻔﻰ ..
ﺍﻟﺤﺴﻦ ﺑﺠﺪﻳﻪ : ﺳﺮﻣﺪ ..
ﺳﺮﻣﺪ ﺍﺑﺘﺴﻢ ﻭﺷﺒﺢ ﻟﻌﻴﻮﻧﻪ : ﻃﻠﺒﻮﺍ ﻳﻘﺎﺑﻠﻮﻧﻲ ﺑﺶ ﻳﺘﻔﺎﻫﻤﻮﺍ ﻣﻌﺎﻱ ﻛﻢ ﻣﺮﺓ ﺑﺲ ﺍﻧﻲ ﻛﻨﺖ ﺭﺍﻓﺾ .. ﻟﻴﻦ ﻭﺻﻠﺖ ﺍﻟﻘﺼﻪ ﺍﻧﻬﻢ ﻳﺠﻮﺍ ﻟﻠﺤﻮﺵ ..
ﺍﻟﺤﺴﻦ ﺑﺼﺪﻣﻪ : ﻟﻠﺤﻮﺵ ..
ﺳﺮﻣﺪ : ﺍﻳﻪ ﻭﺍﻣﻲ ﺍﺍﻟﻠﻲ ﻓﺘﺤﺖ ﻗﺎﻟﻠﻮﻟﻬﺎ ﺣﻨﻲ ﺻﺤﺎﺏ ﺳﺮﻣﺪ ﻭﺍﻣﻲ ﻗﺎﻟﺘﻠﻲ ﺷﻜﺎﻻﺗﻬﻢ ﻣﺎﺭﻳﺤﺘﻨﻴﺶ ﻛﻴﻒ ﺗﻌﺮﻑ ﻧﺎﺱ ﺯﻱ ﻫﺎﺩﻭ .. ﻣﺴﺘﻮﻋﺐ .. ﻓﺎﻫﻢ ﺷﻦ ﻗﺼﺪﻫﻢ ﻣﻦ ﺍﻟﺤﺮﻛﻪ ﻫﺎﺩﻱ ..
ﺍﻟﺤﺴﻦ : ﻛﻤﻞ ..
ﺗﻨﻬﺪ ﺳﺮﻣﺪ : ﻣﺸﻴﺘﻠﻬﻢ ﻟﻤﻜﺎﻧﻬﻢ .. ﺍﻭ ﻫﻤﺎ ﺍﻟﻠﻲ ﺭﻓﻌﻮﻧﻲ ﺯﻱ ﻣﺎﻧﺸﻮﻓﻮﺍ ﻓﻲ ﺍﻷﻓﻼﻡ .. ﻏﻄﻮﻟﻲ ﻋﻴﻮﻧﻲ .. ﻟﻴﻦ ﻭﺻﻠﺖ ﻟﻤﻜﺎﻧﻬﻢ ..
ﺍﻟﺤﺴﻦ : ﻣﻦ ﻗﺎﺑﻠﺖ ..
ﺳﺮﻣﺪ : ﻭﺍﺣﺪ ﺑﺲ ﻣﺎﺷﻔﺘﺎﺵ ..
ﺍﻟﺤﺴﻦ : ﻣﻘﻨﻊ ..
ﺳﺮﻣﺪ ﺑﻀﺤﻜﻪ : ﻋﻴﻮﻧﻲ ﻗﻌﺪﻭﺍ ﻣﻐﻤﻀﺎﺕ ..
ﺍﻟﺤﺴﻦ ﺑﺮﻓﻌﺔ ﺣﺎﺟﺐ : ﺍﻫﺎ ..
ﺳﺮﻣﺪ : ﻋﺮﺽ ﻋﻠﻴﺎ ﻣﺒﻠﻎ ﺧﻴﺎﻟﻲ ﻣﻘﺎﺑﻞ ﻧﻘﻮﻟﻠﻬﻢ ﻣﻨﻴﻦ ﻧﺠﻴﺐ ﻓﻤﻌﻠﻮﻣﺎﺗﻲ ..
ﺍﻟﺤﺴﻦ : ﻭﺍﻧﺖ ﺭﻓﻀﺖ ..
ﺳﺮﻣﺪ ﺑﻀﺤﻜﺖ : ﻗﻠﺘﻠﻬﻢ ﻳﺰﻳﺪﻭﺍ ﺍﻟﺴﻌﺮ .
ﺍﻟﺤﺴﻦ : ﺿﻴﻊ ﻓﻲ ﺍﻟﻮﻗﺖ ..
ﺳﺮﻣﺪ ﺑﺄﺑﺘﺴﺎﻣﻪ : ﻳﺲ ..
ﺍﻟﺤﺴﻦ : ﻛﻠﻤﻮﻙ ﻋﻠﻴﺎ ..
ﺳﺮﻣﺪ : ﻻ ..
ﺍﻟﺤﺴﻦ ﺍﺳﺘﻐﺮﺏ ..
ﺳﺮﻣﺪ : ﺍﻧﺖ ﺷﻦ ﺩﺧﻠﻚ ..
ﺍﻟﺤﺴﻦ : ﻣﺠﺮﺩ ﺳﺆﺍﻝ ... ﺳﻤﻌﺖ ﺍﺳﻢ
ﺳﺮﻣﺪ ﻳﺤﺎﻭﻝ ﻳﺬﻛﺮ ..
ﺍﻟﺤﺴﻦ : ﺍﻟﻜﻮﺑﺮﺍ ...
ﺳﺮﻣﺪ ﺿﻴﻖ ﻋﻴﻮﻧﻪ : ﺑﺼﺮﺍﺣﻪ ﻻ .. ﻣﺶ ﻣﺬﻛﺮ ﺍﻧﻬﻢ ﻧﺎﺩﻭﺍ ﺑﺄﺳﻤﺎﺀ .. ﺷﺎﺩﻳﻦ ﻛﻠﻤﻪ ﻳﺎﺭﺍﺱ ﻭﺑﺲ ..
ﺍﻣﻴﺮﻩ ﺗﺴﻤﻊ ﻓﻲ ﺍﻟﺤﺪﻳﺚ ﻭﻣﺴﻜﻴﻨﻪ ﻛﺎﻥ ﺗﻠﻘﻰ ﺗﻜﺘﻢ ﺣﺘﻰ ﻧﻔﺴﻬﺎ ﺑﺶ ﻣﺎﻳﺤﺴﺶ ﺑﻴﻬﺎ ﺍﻟﺤﺴﻦ .. ﺳﺮﻗﻠﻬﺎ ﻧﻈﺮﺓ ﺳﺮﻣﺪ .. ﻗﻌﺪﺕ ﺗﺘﻮﺳﻠﻪ ﺑﻌﻴﻮﻧﻬﺎ ﺑﺶ ﻳﺨﻠﺼﻬﺎ ﻣﻦ ﻫﺎﻟﻮﺭﻃﻪ ..
ﺳﺮﻣﺪ ﺷﺒﺢ ﻟﻠﺤﺴﻦ : ﺍﺣﻤﻢ .. ﺣﺎﺱ ﺭﻭﺣﻲ ﺗﺎﻋﺐ ﻭﺑﻨﺮﻗﺪ ..
ﺍﻟﺤﺴﻦ ﻧﺎﺽ : ﺗﻤﺎﻡ ﺍﺭﺗﺎﺡ .. ﺷﺒﺤﻠﻪ ﺷﻮﻳﻪ ﻭﺑﻌﺪﻳﻦ ﻟﻒ ﻭﻃﻠﻊ ﺳﻜﺮ ﺍﻟﺒﺎﺏ ..
ﺍﻣﻴﺮﺓ ﺍﻣﻴﺮﺓ : ﻭﻭﻙ ﻋﻠﻴﺎ ﻗﺮﻳﺐ ﻣﺘﺖ ..
ﺳﺮﻣﺪ ﺑﻀﺤﻜﻪ : ﺑﻌﻴﺪ ﺍﻟﺴﻮ ..
ﺍﻣﻴﺮﺓ ﺑﻀﺤﻜﻪ : ﺍﻛﻴﺪ ﺗﻮﺍ ﻗﺎﻟﺒﻴﻦ ﺍﻟﺪﻧﻴﺎ ..
ﻣﺎﻧﻴﻠﻴﺔ ﺍﻟﺒﺎﺏ ﺗﺤﺮﻛﺖ .. ﺑﺴﺮﻋﻪ ﺍﻣﻴﺮﻩ ﻭﻟﺖ ﻟﻤﻜﺎﻧﻬﺎ ..
ﺍﻟﺤﺴﻦ ﺧﺶ : ﻧﺴﻴﺖ ﻧﻘﻮﻟﻚ ﻓﻲ ﺿﺎﺑﻂ ﺑﻴﺠﻲ ﻳﻬﺪﺭﺯ ﻋﻠﻴﻚ ﺍﻟﺼﺒﺢ ..
ﺳﺮﻣﺪ ﺍﺑﺘﺴﻢ ﺑﺮﺑﻜﻪ : ﺣﺎﺿﺮ ..
ﺍﻟﺤﺴﻦ : ﺧﻴﺮﻩ ﻭﺟﻬﻚ ﺍﺻﻔﺮ ..
ﺳﺮﻣﺪﺑﺮﺑﻜﻪ : ﻭﺟﻬﻲ ...!! ﺍﻳﻪ ﻣﻦ ﻗﻠﺔ ﺍﻟﻨﻮﻡ ..
ﺍﻟﺤﺴﻦ ﺑﺘﻬﻜﻢ : ﺍﻧﺖ ﺍﻛﺜﺮ ﻣﻦ ﺭﻗﺪ ﻓﻬﺎﻟﻔﺘﺮﺓ ..
ﺳﺮﻣﺪ ﺑﻨﻔﺎﺫ ﺻﺒﺮ : ﺧﻼﺹ ﺑﻨﺮﻗﺪ
ﺍﻟﺤﺴﻦ ﺑﺈﺑﺘﺴﺎﻣﻪ ﻉ ﺟﻨﺐ : ﺗﻢ .. ﻭﺳﻜﺮ ﺍﻟﻀﻲ ﻭﻃﻠﻊ ...
ﺍﻣﻴﺮﺓ ﻭﺳﺮﻣﺪ 🠾
ﺍﻣﻴﺮﺓ : ﻳﺎﻣﺎﺍﺍﻣﺎ ..
ﺳﺮﻣﺪ ﻳﺘﻠﻤﺲ ﻳﺪﻭﺭ ﻓﻲ ﺗﻠﻴﻔﻮﻧﻪ .. ﻭﺍﻣﻴﺮﺓ ﺗﺘﻠﻤﺲ ﻭﺗﻤﺸﻲ ...
ﻋﺘﺮﺕ ﺍﻣﻴﺮﺓ ﻭﺳﺮﻣﺪ ﻓﻲ ﻧﻔﺲ ﺍﻟﻠﺤﻈﻪ ﺣﺲ ﺑﺸﻲ ﻃﺎﺡ ﻋﻠﻴﻪ ﻭﻓﺘﺢ ﺍﻟﻔﻼﺵ .. ﺟﺖ ﺍﻣﻴﺮﺓ ﻓﻲ ﻭﺟﻬﻪ .. ﺍﻣﻴﺮﺓ ﻗﺮﻳﺐ ﻣﺎﺗﺖ ﻟﻤﺎ ﻟﻘﺖ ﺭﻭﺣﻬﺎ ﻓﻲ ﺣﻀﻨﻪ ﻭﻫﻮ ﻗﻠﺒﻪ ﻗﺮﺑﻊ ﻗﺮﺑﻊ 💗..
ﺍﻣﻴﺮﻩ ﻧﺎﺿﺖ ﺑﺴﺮﻋﻪ .. ﺟﺒﺪﺕ ﺗﻠﻴﻔﻮﻧﻪ ﻭﺻﻠﺖ ﻓﻲ ﺍﻟﻀﻲ ﻓﺘﺤﺎﺗﻪ ﻭﺣﻄﺖ ﺍﻟﺘﻠﻴﻔﻮﻥ ﻉ ﺍﻟﻄﺎﻭﻟﻪ ﺑﺘﻔﺘﺢ ﺍﻟﺒﺎﺏ ﺍﻧﻔﺘﺢ ﻭﻃﻠﻌﺖ ﻓﻲ ﻭﺟﻬﻬﺎ ﻋﻠﻴﺎ ..
ﻋﻠﻴﺎ ﺑﺼﺪﻣﻪ : ﺍﻣﻴﺮﻩ ..
ﺍﻣﻴﺮﺓ ﺑﺘﻤﻮﺕ ﻣﻦ ﺣﻘﺎﺭﺓ ﺍﻟﻤﻮﻗﻒ ﺍﻟﻠﻲ ﻫﻴﺎ ﻓﻴﻪ ﻭﻃﺖ ﺭﺍﺳﻬﺎ ﻟﻮﻃﺎ ...
ﻋﻠﻴﺎ ﺑﺤﺰﻡ : ﺗﺤﺮﻛﻲ ﺑﺮﻱ ﻷﻣﻲ ﺍﺩﻭﺭ ﻋﻠﻴﻚ ﺑﻮﻱ ﺟﻲ ...
ﺍﻣﻴﺮﺓ ﻉ ﻃﻮﻝ ﻃﻠﻌﺖ .. ﻭﻋﻠﻴﺎ ﺷﺒﺤﺖ ﻟﺴﺮﻣﺪ ﺍﻟﻠﻲ ﻛﺎﻥ ﻭﺟﻬﻪ ﺍﻟﻮﺍﻥ ﻣﻦ ﺍﻹﺣﺮﺍﺝ .. ﻗﺪﻣﺖ ﻋﻠﻴﺎ ..
ﻋﻠﻴﺎ : ﺳﺮﻣﺪ ﺍﻧﻲ ﻧﻌﺮﻓﻚ ﻳﻜﻔﻲ ﺍﻧﻚ ﺗﺮﺑﻴﻪ ﺣﻨﺎﻱ ﺑﺮﻧﻴﻪ ﻭﺟﺪﻱ ﻋﻠﻲ .. ﺑﺲ ﻟﻴﺎ ﻋﻨﺪﻙ ﺭﺟﺎﺀ .. ﺭﺍﻋﻲ ﺳﻦ ﺍﺧﺘﻲ ﺃﻭﻻ ... ﻭﺍﻟﻘﺮﺍﺑﻪ ﺍﻟﻠﻲ ﺑﻴﻨﺎﺗﻨﺎ ﺗﺎﻧﻴﺎ ... ﻭﻃﻠﻌﺖ ﻭﺳﻜﺮﺕ ﺍﻟﺒﺎﺏ ..
ﺳﺮﻣﺪ ﺗﻨﻬﺪ ﺑﺄﻟﻢ ﻭﻏﻤﺾ ﻋﻴﻮﻧﻪ ﻳﺤﺎﻭﻝ ﻳﺮﻗﺪ ...
... ﻳﺘﺒﻊ
