#الحسن
#جمان_فريد
الجزء35
وقفت بسيارتها وطلعت منها ..وقعمزت في مكان فاضي..اطلقت العنان لدموعها انها تنزل..صدمه ..احباط..للحظه حست نفسها لقت الحب اللي دور عليه بس مع الأسف طلع وهم..بكت وبكت وبكت لين كبدها طابت...وبعدين ناضت ..خدت شهيق وزفير ومسحت دموعها وركبت السياره..ومشت ....
🍃فاتوا 5أيام بالزبط..
ابتسام تغيرت ولت تبي العزله وحتى صاحبتها ماتبي تحكيلهم تمشي للكليه وتلهي في روحها بالقرايه وماجابتش سيرة حتى لبوها بأنها سيبت بلال...
بلال اللي من يوم صار اللي صار وهو ضايع من غيرها برغم حالته لازم يوميا يشوفها يركب تاكسي كل صبح ويجي للكليه ويقعد يراقب فيها بدون ماتحس عليه..
الحسن رجع لحالته الأولى بدي يتجنب يقعد في الحوش اللي صار اخر مرة جرحله كرامته..وعليا ملاحظه عليه هالشي وكل ماتحاول تنفرد بيه كان يتهرب منها..
في يوم...
زينب تعبت...وعليا قريب ماتت من الخوف ع أمها رفعها الحسن لحوش اهلها طول الطريق كانوا ساكتين لين وصلوا للحوش كيف درس السيارة وعليا بتنزل..طلع منصف..
الحسن وهو طالع لاحظ عليا كيف وقفت مكانها لما شافاته..هي كانت منقرفه منه وكارهاته كانت تبي تدفل عليه ..وهو كان يشبحلها بشوق شديد..
الحسن : ماتبيش تخشي..
التفتت عليا وشبحتله بألم من نبرة صوته ماباش يشبحلها قدم وبيخش وهي مشت معاه..منصف كان يشبحله من فوق للوطا بغل..وهوو لاعبره...شبحه كيف شاد يد عليا وقريب انجن ..قعد معاهم بعيونه لين خشوا للحوش وخطرت في باله حاجه مشي طول باش ينفذها....
***
زاهيه : كان خلتيني نساعدك..
خوله : صحيتي زاهيه روحي انتي وراك حوش وصغار..
ابتسمت زاهيه : ع راحتك هي سلامات..
خوله : مع السلامه...
كان رياض موجود في المكتب داير روحه يخدم وهو مركز معاها..
شويه جتها رساله كانت صورة فتحتها وانصدمت..
كانت صورة لسليم وملاك في شهر العسل الباين في فرنسا...وكان حاضنها ..نفس المكان اللي مشوله هما شهر عسل ونفس الصورة خداها معاها هي وقتها..هي اضايقت وعصبت شن مازال يبي فيها علاش مازال لاحقها ...
خدت قرار انها تغير رقمها ..حدفت تليفونها ع المكتب وتأففت..
رياض : خيرك خوله ..
خوله وهي مضايقه: مافي شي ..
رياض : بس وجهك يقول غير هكي..
خوله معصبه وتبي تفش غلها في حد وبتجي في رياض: مش ملاحظ انك تجاوزت حدودك وتدخل هلبه في خصوصيات غيرك..لوسمحت خلي بيناتنا حدود للإحترام ..واذا في فبالك شي حوله من توا...وناضت وطلعت من المكتب وخلاته مصدوم...
***
طبعافي حوش أهل عليا كانوا حوش عمتها موجودين بش يطيروا السو ع زينب وموجودين خالاتها كذلك..وعليا لاهيه بالهدرزة معاهم ليها وقت ماشافتهمش..
منصف: 2000دينار..
رشا : اممم كويس ..
منصف : حطيها بحذر ..
رشا بضحكه: ماتوصيش ..مشي منصف وخشت رشا....قعدت ادور بعيونها في المكان طاحت عينها ع شنطة عليا اللي كانت محطوطه ع الصالون مشت فتحتها..وحطت فيها اللي قاللها عليه منصف...عطره اللي كانت شيشته صغيره ومعاها كرت فيه كلام...درقتهم كويس في الجيب الدخلاني ..ومشت..ولامن شاف ولامن دري..
شويه وجي الحسن ...طلعت عليا بعد سلمت ع العيله وهي طالعه لقت منصف واقف مع مصعب شبحتله بإزدراء وهو ابتسم..وهذا كان ع عيون الحسن اللي كان مقعمز في السياره..طلعت عليا وركبت السيارة..وهو تحرك ..وطول الطريق وهو يغلي وهي مضايقه هلبه من حالهم هذا..
وصلها للحوش وتوجه للمركز....
...
منصف : درتي زي ماقتلك..
رشا : ايه...
منصف: خودي..
رشا: احسن حاجه فيك انك سريع في معاملاتك..
منصف شبحلها بقرف وسكت..
***
مقعمزة تصحح في الكراسات..
ريحانه: قطيع حمير اللي نقري فيه أني مش بنادميه..وهاااه صفر...كول ع راسك. بهايم..
رن تليفونها وكان رقم غريب..
ريحانه: منو هذا توا...ردت..
ريحانه : آلو...
منذر: واحلى آلو..
ريحانه: منو انت..
منذر: اني واحد مكبد لين طايح سعده..
ريحانه: إن شاء الله ديما طايح..وصكرت عليه..ناقصني عاهات..
شويه وعاود قريب 5مرات ..وهي كانت تغني مع النغمه...ولامعبره
لين بعتلها رساله..فتحتها وانصدمت لقت فيها معلومات عنها اسمها كامل عمرها ..طولها وزنها المدارس اللي قرت فيهم امتى خشت المعهد وامتى تخرجت وامتى خدمت..
فاتحة عيونها وفمها ع وسعهم من الدهشه...
شويه وجتها رساله تانيه وكانت فيها صورته وهو مبتسم بإستفزاز..ومداير🖐..
ريحانه"الحيوان هذاكا"🤤....
***
في الليل عليا كانت توتي في حوايجها للجامعه...فكرت شن هي الشنطه اللي بتنسقها معاهم..فكرت في الشنطه اللي لبستها اليوم لما مشت لحوش اهلها..خدتها وفتحتها بش بتحط بطاقتها في الجيب الدخلاني لما جت بتحط البطاقه حست بشي قامته بإيدها انصدمت..شيشه عطر منصف..رعشت مع بعضها "من اللي حطها"...لقت البطاقه باينه من الجيب...طلعت وقرتها
(حبيبتي هذا عطري يصبرك هالفترة لين تخلصي منه)..
عليا : ياوسخ ياحقير...سمعت صوت الباب انفتح معاش عرفت شن ادير..بسرعه حطتهم في قجر الكاميدينو وسكراته وهو خش..لاحظ عليها الإرتباك...
الحسن : نوضي ديري قهوة جايني راجل ..غير مالقيت حد لوطا..
عليا وهي ترعش: حاا..ضر....وطلعت من الدار...هو قعد يشبح للقجر..عقله ماهناشي..بعد دام النظر..مشي طول وقعمز ع السرير وفتحه طول قابلوه العطر والكرت..وهو يرجف..خدي الكرت وقراه..الرصاصه اللي اخترقت صدره كانت ارحم مليون مرة من اللي شافه قتلاته اكثر منها...
عليا جت : شن ندي......
قام عيونه فيها شبحلها هلبه بعدين ناض حط الكرت ع الكامدينو ..وجي بيمشي..
عليا بلعت ريقها : اسمعني...هو فات من جنبها شدت ذراعه
الحسن بهدوء ونبرة حاده: ماتمسينيش..
عليا قريب ماتت حست قلبها بيوقف..حولت يدها وهو مشي بسرعه وطلع ...
عليا حطت ايديها الزوز ع صدرها حست روحها بتموت توجهت للقجر طلعت منه العطر والكرت وطول للمطبخ ولوحتهم في الكناسه ودموعها ينزلوا..
مشت بصعوبه قعمزت ع الصالون وهي منهاره بعدين حطت ايديها ع وجهها وقعدت تبكي بعبرتها...
اما هو من لما طلع وهو يقول لنفسه"من الأول كان مفروض تفهم هي ماتبيكش انت اللي ديما تبادر وهي تلقى روحها مجبرة انها تسايرك..هي تبيك تخلصها من خوها بس قالتهالك حتعيش مع وحده قلبها مع غيرك لكن انت اللي كنت اعمى واستسلمت لقلبك..قلبي هذا لو نقدر نجبده من صدري ونعفس عليه "..ومشي للفهد وقاله يمشوا للمركز لإنه مالقي حد فايق...
تاني يوم...
ناضت الصبح حست بألم في رقبتها لأنها رقدت ع الكنبه...ناضت حست براسها يوجع فيها...مشت طول ..دوشت وطلعت صلت ولبست حوايجها ونزلت تحت كانت تحاول تتصنع انها كويسه برغم ان عيونها المنفوخات من البكي قالوا غير هكي..جي السواق طلعت هي وهاله وبطريقهم للجامعه...
***
خشت للمكتب لقت موظفه تانيه مع زاهيه في المكتب..
خوله: صباح الخير..
الزوز : صباح النور...
قعمزت في مكتبها..
زاهيه : هادي زميلتنا الجديد موده..
خوله: اهلا وسهلا..
موده: اهلا بيك..
زاهيه: رياض سيب الشركه...
خوله انصدمت: سيب..
زاهيه : ايه...
خوله اتفاجئت "علاش سيب معقوله ع خاطر اللي صار امس..مستحيل"..حست بتأنيب ضمير ولامت نفسها ع أسلوبها معاه امس وتمنت لو تشوفه من جديد بش تعتذر..
***
منهمكه بمراجعه الحسابات اللي راسها صدع منهم قطع عليها اللي هي فيه احدهم قائلا..
هلال: مرحبا..
قامت راسها بالشويه وقعدت تشبحله وحواجبها مرفوعات..
هلال: نبي ناخد من وقتك طشة دقايق..ممكن..
انعام وزعت نظرها ع المكان وشبحتله : تفضل ..
هلال: ماينفعش هنا..
انعام برفعة حاجب : مالاينفع وين..
هلال: في القهوة اللي جنبكم ..
انعام شبحت للملف شويه بعدين ناضت : عشرة دقايق فقط لاغير..
هلال بضحكه: اللي تبيها ...
انعام طلعت من مكتبها ومشت معاه ومابتش تبتسم حتى نص ابتسامه اما فكان يضحك وجوه مليح..
***
مقعمزة في الكليه حاطه ايدها ع خدها ..كل ماتذكر اللي صار دموعها ينزلوا..ترن في وذنها كلمة "ماتمسنيش" حساته عافها ومعاش طايقها..حست روحها بتموت...فجأة قعدت تبكي بعبرتها..
ابتسام جايه من بعيد شافتها جتها تجري..
ابتسام: عليا خيرك..
عليا ببكي : بنموت ياإبتسام..
ابتسام خافت وقعمزت جنبها: بعيد السو خيرك شن صار...
عليا شبحتلها وحكتلها اللي صار كله..
ابتسام: اه بس لو يطيح في ايدي هالحقير...
عليا ببكي : الحسن ياابتسام حساته كرهني وعايفني وكإني وحده خاينه ومش كويسه والله نظرته لحظتها كرهتني في نفسي..
ابتسام :عليا انتي تحبيه..
عليا ببكي: نحبه؟؟! ...هادي كلمه ماتعبر ع شي..ابتسام اني نموت فيه التراب اللي يمشي عليه اني بديت عايشه ع حسه هو ياإبتسام..
ابتسام حطت ايدها ع ايد صاحبتها وقعدت ساكته...
مش قادرة تواسيها هي أصلا تبي من يواسيها ...
***
واثق فيه..
الحسن : زي ثقتي بنفسي..وهو اللي حيطلعهم واحد واحد..
جاد الله : مفروض خدمنا من داخل قبل ...تحمسنا هلبه وخدتنا الفرحه لما رجعت للشرطه هيبتها...
الحسن : معليشي..اللي صار خلانا نعيدوا حساباتنا ونلحقوا نصلحوا كل شي..ونداركوا اخطائنا...
جاد الله هز راسه بإيجاب: مش عارف شن كان صار فينا لو فقدناك...
الحسن: كلكم خير وبركه..واللي صار اني نتحمل جزء من الخطأ فيه..يعني زيي زيكم...
جاد الله ابتسم بألم ....
***
انعام تشرب في القهوة وتسمع في هلاال...
هلال: هما حيوافقوا في النهايه..بس انا نبيك توافقي من ناحيه المبدأ..وانا حندير المستحيل عشان يقبلوا..
انعام نزلت فنجان القهوة وبتهكم: اممم..عشان يقبلوا!!!..شبحتله...ولو ماقبلوش..
هلال بإبتسامه: حيقبلوا صدقيني..
انعام شبحتله وابتسمت بتهكم وناضت: ماتعبش روحك ولاتعبهم ..مافيش نصيب ياخوي...ومشت ..هو انصدم وناض وراها طول...
هلال وهوماشي وراها: غير استني..انسه انعام ..
انعام ماشيه وعيونها معبيات دموع..
هلال:ارجوك اسمعيني والله نبيك مستعد ندير المستحيل بش تولي حلالي..
انعام طلعت من المقهى ودموعها نزلوا...
هو جري ولحق عليها ووقف قدامها: ارجو....
سكت لما شافها تبكي ماتحملش دموعها..
انعام ببكي: اسمع كلام امك وبرا تزوج وحده تناسبك وخليني في حالي اللي فيا كافيني..
هلال: مالا وحق من خلقني وسواني وعدلني..غيرك ماني مزوز حطيها فراسك هذي انتي مقسومه
لهلال مراجع..والأيام حتوريك..ولبس نظراته ولف ومشي..
وهي وقفت مصدومه من اللي صار..وزعت نظرها ع الناس مسحت دموعها وولت للمصرف..
***
روحت عليا من الكليه..دارت دورتها ع روحها وحوشها..ونزلت للعيله..لقت برنيه تنقي في الشعير..ابتسمت وقعمزت حداها..
عليا: كيف حالك حناي..
برنيه : الحمد لله بنيتي امتى روحتي..
عليا : ليا ساعه ..شن ديري..
برنيه: بندير زميته...
عليا: قصدك انتي ديري فيها مش واتيه..
برنيه : مالا شنو..لابد اني اللي نديرها جدك وراجلك مايكلوهاش إلا مني..
عليا لما جت سيرته حست بغصه وسكتت..
برنيه ناضت: بالله بنيتي مديلي الصونيه ..
عليا : حاضر ..قامت الصونيه ..تو نوصلهالك وين ماتبي..
ابتسمت برنيه وطبطبت ع كتف عليا..ومشوا مع بعض طلعوا برا..
برنيه:الربيع خش
عليا : اها ..من يومين
برنيه كان قدامها المركاب ولعاته..وخدت طاجين كبير حطت فيه الشعير المنقي وبدت تحمس...
عليا بحداها وتراقب فيها شن ادير..شويه وحطت برنيه اللي حمساته في صونيه كبيره حداها..
عليا بحماس: خليني اني المرة هادي..
برنيه بضحكه: تقدري ..
عليا بضحكه : خل نجرب..
برنيه : هههههه..باه هي..
بدت تحمس عليا في الشعير وجابتها صح من أول مرة..
برنيه : ماشاء الله ماشاء الله..
عليا ابتسمت...كملت هي تحميس باقي الشعير...
انعام روحت..وجتهم طول...
انعام: تسوقي أمي..
برنيه : عليا هي اللي حمست..
انعام بدهشه : بجدياات!!
برنيه : والله لهي
عليا: ههههههههه
برنيه : هيا شاملي معاها الصونيه باش نرحيه..
عليا: قصدك حتى الرحي انتي!!
برنيه بضحكه: ايه ياحنه ايه..
شاملت عليا هي وإنعام الصونيه ورفعوها لمكان في الجنان..طارحه فيه برنيه فرشه كبيره ودايره الرحايه...
عليا مندهشه في اللي تشوف فيه وعاجبها الجو...قعمزت برنيه...وقعمزت حداها عليا...
انعام: خل نمشي نشوف الغدي...ومشت..
عليا تتفرج ع برنيه كيف ترحي..
عليابتوسل : بالله عليك حناي خليني نجرب
ضحكت برنيه : هي تعالي..
ناضت برنيه وقعمزت عليا في مكانها وربعت رجليها وبدت ترحي..
في الكوجينه..
انعام طفت ع الغدي...
خش الحسن: طاب الغدي..
انعام التفتت وابتسمت: اهلا..ايه توا كيف طاب..
الحسن: باهي ع السريع حطيلي..بنطلع برا طرابلس..
انعام: الحسن اصابتك قاعدة جديده..
الحسن : هيا هيا...بسرعه..
انعام: ههههههههه..
الحسن شاف حفاظه فيها غريبه وقف عليها وخدي طرف: حناي وين..
انعام وهي تسقي: برا ترحي ف شعير للزميته هي وعليا..
الحسن 💓💓💓💓💓💓
انعام: عليا حمستها تصدق..
الحسن داير روحه لاهي بالغريبه...
....
برنيه : تتعلمي بسرعه ماشاء الله..
عليا : امي ديما تقول فيها..
من بعيد شوي..
غصب عنه طلع ومشي جيهتهم مش بإيده..قلبه هو المتسلط عليه...يتأمل فيها وهي ترحي ومنسجمه ...لاإراديا ابتسم...
شويه ...ولف ومشي ..وهو يمشي يتلفت ويشوفلها لين خش داخل...
برنيه : هيا بنتي...
بدت هي وعليا تغربل فيها...وبعد كملوا حطوه في شكارة خيشه كبيره..عليا جت بتقيمها..
برنيه : لابنتي ماتقيمهاش من بكري وانتي تقيمي في الثقيل مرات تكوني حاطه في بطنك وانتي ماتندريش..
عليا مافهمتش قصدها..
قامت برنيه الشكارة وتوجهوا للكوجينه...كان الحسن عاطي بالظهر ويتغدا ع الواقف...عليا اول ماشافته كالعاده القلب يرجف💓
برنيه : وليدي خيرك تتغدا وانت واقف...
الحسن التفتلها : عندي خدمه طالع برا طرابلس..ترا انعام طاسه ميه من حداك..
انعام: عليا بالله صبيله ايديا مش نظاف..
مشت عليا عبتله ميه من ثلاجة الميه ..وقدمت وقربت منه ومدتله الطاسه ...خداها دون مايشبحلها حطها ع الرخامه ..وماشربهاش..ومشي من حداها..
الحسن : هي اني ماشي..
برنيه: امتى تروح..
الحسن :من تلاته ايام لأسبوع...
برنيه تنهدت: ربي يفتحها عليك ويبعد عليك ولادالحرام..
الحسن: السلام عليكم..وطلع..
هو طلع ومش مهتم للقلب االلي خلاه مكسور وراه حركته الأخيره وجعتها هلللبه..لهالدرجه حتى الميه من ايدها مايبيش ياخدها...!!موعرها...💔
***
الساكته:شن صار في عرسك انت وابتسام..
بلال يتغدا وقفت اللقمه في فمه: احمم..مازال شوي..
الساكته حطت الكاشيك: اجلتوا..!
بلال هز راسه بإيجاب وهو يمضغ في لقمته..
الساكته: وعلاش..
بلال: اممم..امي خلاص خليني نتغدا وبعدين نهدرزوا..
الساكته شبحتله بشك وسكتت...
***
عليا ماقدرتش تاكل موجوعه لين خلاص..راجت لين غسلت أماعين الغدي وركبت لشقتها مشت للدار وخشت قعمزت ع السرير ..رجعت اذكرت تفاصيل هذاكا اليوم..حست روحها انخنقت..طلعت من الدار ومشت للصاله قعمزت وهي حاطه راسها بين ايديها وتفكر يعني معقوله هو مصدق انها تخون فيه وانها قاعده تتواصل مع منصف من وراه ..معقوله مش شايف حبها ليه...معقوله مش حاس بأنها تحبه من تصرفاتها معاه من خوفها عليه..وهلبه حاجات تثبت ان هي تحبه ..
من حرقتها رقدت ع الكنبه حضنت نفسها وقعدت تبكي..
***
ليله...
مرت ع انعام وهي تبكي..وتفكر في هلال..حست انها انجذبتله وانه الوحيد اللي فعلا خلاها خاطرها تعطي نفسها فرصة جديده للحب..
وع خوله وهي تفكر ف رياض مش لشي..بس لإنها ماتحبش تكسر بخاطر حد ولاتجرح حد ماغلطش فيها وأكثر شي تفكر فيه لو ان فعلا رياض سيب الخدمه بسبب المشكله اللي صارت بيناتهم معناها... يعني رياض كان فباله شي ناحيتها...!
اما ابتسام فكانت طول الليل تفكر كيف ادير ..شن لازم ادير...فكرة تاخدها وفكرة تجيبها..ومش عارفه تاخد قرار...
💖الوحيدين اللي ليلتهم كانت حلوة هاله وحسان ...
وهما مقعمزين يتفرجوا ع فيلم ع اللاب توب بعد تعب حسان وهو يقنع فيها انه فيلم حلو ومحترم..كان مقعمز وهو مجبس وحالته جنبه وهي جنبه واللاب توب ع رجليهم وصونيه مكسرات بيناتهم ياكلوا ويتفرجوا ومرة مرة تجي لقطه رومانسيه هاله تقلب في وجهها وتهزب في حسان وهو يضحك عليها ويقوللها "عادي هادي حاجات بسيطه زي اللي نديروا فيها"..عيطت عليه وهي تضحك..وبعدين انسجمت مع قصة الفيلم..وماتم إلا هي واخدها النوم وراسها ع كتفه..هو اتكى يشم في ريحته وهو مبتسم غمض عيونه وخداه النوم ورقد💖💖💖
***
تاني يوم...
ناضت عليا حست روحها تعبانه مش قادرة تتحرك..في هديكا اللحظه رن تليفونها وكانت أمها...
عليا عدلت صوتها: صباح الخير ماما..
زينب :صباح الخير بنيتي..كيف حالك وكيف حال راجلك وناسك..
عليا : الحمد لله كويسين..انتي ماما كيف حالك..
زينب: الحمد لله بنتي اهو بنطلع لتونس..
عليا : احسن شي لازم تطمني ع روحك ماما ونطمنوا عليك..
زينب : إن شاء الله خير...بنتي..
عليا: نعم ماما..
زينب: زي ماتعرفي بنتي مديحه مش ف ليبيا "راجلها يخدم في تركيا"و اميرة شهاده السني..ومانقدرش نخليها تغيب ع قرايتها...
عليا ابتسمت: تبيها تجي تقعد عندي مرحبتين بيها
زينب بضحكه: يعني عادي راجلك مايضايقش..
عليا بضيق مخفي: هو اصلا طالع برا طرابلس اسبوع ..
زينب: معناها العشيه نجيبوها..
عليا بضحكه: جيبوها...
بعد كملت مكالمتها مع امها..كلمت هاله وقالت انها مش حتمشي اليوم..دارت ع حوشها وبعدين نزلت..بلغت العيله بسفر امها وان اختها حتجي وهما رحبوا بيها...
***
مع الظهر روحت للحوش ..تلاقت مع محامي بوها اللي بدت تتقزز كل ماتشوفه و هو لاحظ نظراتها ...
منصف: انسه ابتسام..
ابتسام وقفت وشقلبت وعيونها والتفتت وبحده : خير!!
منصف: من زمان واني نخدم مع بوك..وكان مافي بيناتنا إلا كل احترام ..شن اللي تغير توا وليتي حتى السلام ماترديش فيه..
ابتسام بحده : عرفتك ع حقيقتك لاأكثر..
شبحلها هلبه بعدين ابتسم بخبث: عرفتيني ع حقيقتي!!!..اممم ...تمام تمام...وجي بيمشي بعدين ولا..نبيك ماتنسيش ان حقيقتي وحقيقة بوك وحده.. ابتسم بتهكم ومشي...
وخلا ابتسام في قمة الغضب والألم في نفس الوقت..
***
بعد العصر
خشت لحوش اختها..بعد ماخشت اختها...
اميره : فرحت هلبه لما قالتلي ماما بنقعد عندك..
عليا بضحكه : حبيبتي...هيا تعالي ..
دخلتها للمطبخ وقعمزوا قعدوا يهدرزوا ..عليا ادير في النسكافيه واميرة مقعمزة حداها تحكيلها ع القرايه ...
***
بعد طول تفكير ..بعد ربطت الأحداث ببعضها..بعد مواجهه طويله بينها وبين ضميرها..مبادئها..اخلاق القرآن اللي عايشه فيها...خلتها تاخد قرار ومافيشي رجعه ..قامت تليفونها وكتبت رساله وبعتتها لرقم محدد...
***
في الليل..
واقفه ع الروشن تتأمل في جنان حوش ناس أختها..
اميرة: يهبل الجنان ياللوشه كبير هلبه..ومنسق وحلو..
عليا : ايه..ميرو ..بنخش الحمام شويه..ردي بالك ع الطاجين في الكوشه..
اميره التفتلها: باه...سمعت صوت الباب الرئيسي انفتح ..لفت وجهها للروشن قعدت مركزة مع السيارة اللي خشت..
••تحت..
سرمد درس السيارة والباين عليه رايق كعادته..نزل وهو يغني..
سرمد: انا جيلك وناويها بخطط واكيد ع الباب حخبط حتعملي ايه..
حتسلم بعديها..امممم...ترارارا..مش حافظها كلها خسارة..
ضحكت أميرة..
هو سكر باب السياره ووزع نظره ع الحوش ..لما رفع عيونه فوق...فتحهم ع وسعهم بدهشه..
سرمد وهو يشبحلها: ما الذي يريده القدر مني ؟
هي تشبحله ومش قادره تبعد عيونها عنه...سرمد ابتسم..وهي بادلاته الإبتسامه..
سرمد بضحكه: انتي مفروض اطلي عليا من غادي..التفت واشر بصبعه ع السمي..
هني اميره تحشمت خلاص خشت طول وهي تضحك"جرئ هلبه"..
سرمد تنهد وقاعد يشوف للروشن: سرمد ردبالك اطيح في اكبر فخ ممكن يطيح فيه الانسان في الحياة...انت بالذات ماينفعش اطيح فيه...عيونه لمعوا بدمعه..وركب وخش طول...
....يتبع...
