#الحسن
#جمان_فريد
الجزء33
لو سمحتي..خلاص الوقت تم
بالسيف طلعت تجر في رجليها جر ..وصلت في الباب شافتله وبعدين طلعت...قلبها خلاص معاش يقدر يتحمل خايفه هلبه
بالذات وان وضعه ماتغير فيه شي
اليوم اللي بعده
كانت في حراسه مشدده ع المستشفى بالذات في الدور اللي فيه الحسن..اساسا هو في المستشفى التابعه للشرطه..
جو اهله وقت الزيارة
جنان : آاااه يارب..
انعام : اليوم تالت يوم..
خوله ببكي : مش قادرة نستوعب لتوا..
هاله تشبح لعليا: لاقدر الله لو صارت حاجه مش كويسه عليا حتريح فيها..
سارة تشبحلها: ياروحي عليها كيف واقفه حدا الباب وماتبيش تحول..
عابد: بوي وضعه مش مطمني..
محمد : حتى اني ملاحظ ماباش يجي بكل..
سرمد: بوي مش قادر ينسى..
عابد : وهو في حد فينا نسي..
محمد شبحلهم الزوز بحده: سكروا ع الموضوع..
سكتوا الزوز..
فجأة...سمعوا صوت جهاز انذار جاي من عنده ..كلهم انصدموا وخافوا..
فلحظه الدكتور ووراه الممرضات خشوا داخل..
عليا بتوهان: شن في..خيرهم ..شنو..
شدتها انعام: تعالي حبيبتي..
عليا بخوف: شن ..في ..لاش..هكي دارو..
عابد: شن صار..
محمد:ربي يلطف..
سرمد يراقب في الوضع وبس...
داخل...
الدكتور : بسرعه حطي الماده ع صدره هيا..شغلوا الجهاز..
خط نبضات القلب مستقيم..الحسن حاليا قاعد يموت...
الدكتور بدي بالصدمات
الصدمه الأولى... خط مستقيم..💔
الصدمه التانيه..خط مستقيم💔
الدكتور: قوووه..
الصدمه التالته خط مستقيم 💔
الصدمه الرابعه خط مستقيم ....
اللي حوالين الدكتور آيسوا خلاص بس هو لا..
الدكتور: قوووووووه..
قوه ع درجه قصوى ...
الصدمه الخامسه ...خط مستقيم..
الممرضه : خلاص يادكتور..
الدكتور قعد يشبح بصدمه ..بعدين استجمع نفسه..
دار اخر صدمه ...خط مستقيم..
لوح من ايديه الجهاز ..وحط ايديه ع بعضهم فوق صدر الحسن..وقعد يدير في عمليه الإنعاش...في اخر شي..
الدكتور: يااااالله...وضغط بأقوى من عنده...
توت..توت..توت..توت..ايه رجع النبض ..رجع...
كلهم اندهشوا من اللي صار..أما الدكتور غمض عيونه وطاح ع ركابه وتنفس الصعداء...
برا...
مش فاهمين شي قريب يهبلوا...بكي وخلاص وهي مغمضه عيونها وتدعي بس لين طلع الدكتور..كلهم جوه..
الدكتور شبح لعليا ابتسم : بفضل الله..رديتهولك..
شهقات الفرحه..ضحك..دموع الحزن اللي تبدلت بفرح..كلهم يحضنوا في بعض ومش مصدقين..
عليا بصدمه ممزوجه بالفرحه: مش قلتلكم قلتها اني راجلي قوي ريتوه وعدني ووفي بوعده..وعدني واللي زيه لما يوعد يوفي قلتلكم..عقاب رصاصه..مادير شي فيه بطلي اني ..كلهم يشبحولها ومتأثرين بكلامها بس لاحظوا انها مش مزبوطه..فعلا شويه وانقطع صوتها وفقدت الوعي..
وصل خبر للحاج علي..اللي سجد لربي سجود شكر...وقرر يطلع صدقه ع سلامة اغلى احفاده ع قلبه..
...
الدكتور : حيقعد ثلاته ايام تانيه لين يولي احسن وبعدها يقدر يطلع بس لازم ياخد نقاهه من خدمته لأني نعرفه كويس..
عابد: تو نشوف كيف نتصرف معاه..
الدكتور : ياريت تقدر تفرض عليه يبعد هالفتره..
عابد: إن شاء الله..
الدكتور : طبعا حيفيق..بشكل كامل غدوة الصبح بأذن الله..الحمد لله ع سلامته ومايشوف باس..
عابد : تسلم يادكتور..
روحوا هديكا الليله والقلوب مطمنه والفرحه مش ساعيتهم..بينما عليا قعدت حطولها اكياس تغذيه لأنها لاتاكل لاتشرب ولهالسبب فقدت الوعي..
***
عبدالقدوس: هههههههههههههههههههههه
منصف بغيظ: شنو يابيي متشمت في روحك
عبدالقدوس بضحكه: لاوالله فيك أنت..
منصف: خاطري نعرف انت مع مني..
عبدالقدوس قدمله: اني مع نفسي وبسسس...
***
تاني يوم الصبح..
الجهاز مخترق أكيد لازم تبدوا تخدموا من داخل..
الحسن : وهذا اللي بيصير..من الأول حسيت بشي غلط..بس ماحبيتش ندخل في اللي يديره الأفندي جاد الله وثقت في خبرته أكثر من حدسي..
انفتح الباب ..خش الدكتور...
الدكتور: تتكلم في الخدمه..
الفهد: ههههههههه من اول مافاق ...
الدكتور : ههههههههههه تجري في دمه..
الحسن: شن وضع المستشفى..
الدكتور : الحراسه مشدده..بس قولي انت كيف قعمزت هكي..ماتحسش بوجع..
الفهد: اني ساعدته..
الحسن : مانحس بشي..
الدكتور : كان تحس بشي قول خل نتصرف..خير ماناكل طريحه تانيه...
الحسن ضيق عيونه بإستغراب...
الفهد بضحكه: هذا ياسيدي بعد طلعت من العمليه الباشا عزف لعيلتك السيمفونيه متاع الدكاترة نفسها..هو حالته خطيره وحني درنا اللي علينا ومن هالكلام..
مرتك هزباته ومسحت بكرامته الوطا وقعدت تضرب فيه وتقول ردهولي..
الحسن فاتح عيونه ع وسعهم بدهشه وقلبه يدق..
الدكتور: هههههههههه تي تعرف اني نديرلك في عملية الإنعاش بكل ماعندي من قوة اكثر خوفا منها..تدفني لولاقدر الله صارلك شي..
الحسن ابتسم ع جنب: باه ..امتى نطلع..
الدكتور: يومين جنب هاليوم..
....
اول مافاقت ناضت من السرير حولت يبرة التغديه ومشت لمكانه اللي تعودت تراجيه فيه بس ماكانش موجود..قريب ماتت مشت تجري وادور في حد تسأله..
عليا وهي داهشه وخايفه: بالله عليك الحسن الصادق وينه.
الممرضه بإبتسامه: نزلوه الدور التاني ...فاق..
مجرد سمعت كلمة فاق مشت تجري نزلت لوطا من الدروج متجاهله الأصانصير..وصلت وسألت قالولها وين تمشي..قعدت تمشي وادور لين انخبطت فالدكتور ..
عليا : وينه!!!!
الدكتور أشر بصبعه : غادي الغرفه ***...دفاته من قدامها ومشت تجري ..ضحك الدكتور ومشيي..
وصلت في الباب وقفت غمضت عيونها خدت نفس..فتحت عيونها حطت ايدها ع مقبض الباب...وفتحاته ببطء وخشت قامت عيونها شافته مقعمز ع حيله وصدره العاري مغطيينه الضمدات يشبحلها بنظره ...ياااااااااااه قداش استاحشتها..
عيونها المشتاقه ..تغيرت نظرتهم للحده..وملامحها للغضب سكرت الباب وقدمت ..
عليا بعصبيه وتأشر بسبابتها: انت واحد مستهتر وماعندكش احساس بالمسؤوليه...لاتقول وراي اهل لاتقول وراي مراه لاتقول وراي ناس قلوبها حتنحرق عليك..انت توا عندك اولويات..عندك مراة في رقبتك توا معاش حر نفسك..استوعب ياراجل...سكتت وتستنى في رده
الحسن ابتسم : الله يسلمك..
الفهد وهو مفنص: هي ..اني نستأذن..الحسن وهو يشبحلها هز راسه بإيجاب..طلع الفهد وهي قاعده تشبحله بحده...
الحسن : هكي المراة العاقله الناضجه تكلم راجلها اللي طالع من الموت..
عليا : ايه لما يبدا حادف روحه للموت بدون تفكير هكي تكلمه واكثر..
الحسن : هههههآااه..
عليا بخوف:خيرك..
الحسن غمض عيونه وملامحه تبين انه يتوجع مشتله تجري قربت عليه ..
عليا :شن تحس قولي ..
الحسن بصوت يدوب طالع: قلبي...
عليا بخلعه : خيره قول..
الحسن : يبي...آااه..
عليا : شن يبي..قوول تربح..
الحسن فتح عين وحده : قطايف..
عليا غمضت عيونها: يااااااعديم الإحساااااس قطعتني..
الحسن : هههههه..آااه..شبحلها ..حق والله حق..
عليا شبحتله شويه بعدين : ههههههههههههههههههه
الحسن وهو يتأمل في ضحكتها: أستاحشتك...
عليا سكتت وشبحتله بنظرات كلها شوق : حمد لله ع سلامتك..
الحسن ابتسم : الله يسلمك..قعمزي..
جت بتقعمز ع الكرسي اللي كان مقعمز عليه الفهد..
الحسن بنبره حاده: خودي الكرسي اللي غادي..
ابتسمت ومشت خدت الكرسي اللي قال عليه وقعمزت بحداه...
***
برنيه : ياربي ليك الشكر اللي رديت حسونه..
انعام بضحكه : هيا يام وقت ع الزيارة..
سرمد: هيا ياعيله..
...
وصل جعفر ومرته وبنته للمستشفى ..ركبوا لغرفة الحسن..
طق الباب جعفر قالوله خش..
اول مافتح الباب وخش ماقدرش يخفي فرحته الكبيرة اللي شاف الحسن رجع لدنيا من جديد ولا للبنته اللي كانت حتهبل لو صار فيه شي..
جعفر : الحمد لله ع سلامتك وليدي..
الحسن : الله يسلمك عمي..
زينب : الحمد لله ع سلامتك ولدي..
الحسن : الله يسلمك عمتي..
اميره : وأخيرا شفتك ع الطبيعه وجها لوجه..
كلهم: ههههههههههههههههه
الحسن بضحكه : الله يسلمك
كلهم: ههههههههههههههههه
طق الباب انفتح..
خشت برنيه لما راته عيونها تعبوا دموع وزغرطت..وقدمت وحضناته..
برنيه: الحمد لله ع سلامتك ياغالي...
الحسن يمسح في دموعها: الله يسلمك ياغاليه..
انعام باست ع راسه: الحمد لله ع سلامتك ..
الحسن :الله يسلمك..
اميره عيونها ع سرمد وهو يراجي ف دوره بش يسلم ع الحسن....
سرمد: قلتها قرينديزر ...وسلم عليه
الحسن اكتفي بإبتسامه..
سلموا العيليتين ع بعض ...سرمد شبح لأميره اللي فيسع غيرت عيونها عنه وجهها احمر وهو ابتسم..
شويه وجو الباقي ودار الحسن تعبت..
خش الدكتور ع صوت ضحكهم..
الدكتور: هذا شنو..المريض طلع من العنايه اليوم الصبح..
كلهم شبحوله..
الدكتور: متأسف بس ضروري تطلعوا..
عابد :معليشي..خلاص اصلا زيارة المريض مفروض ماتكونش طويله..
جعفر بضحكه: صح...هيا ياعيله ناضت زينب واميرة ..سلموا ع الحسن وعليا وهما طالعين..اميرة قامت عيونها فسرمد اللي ابتسملها وهي قريب هبلت...طلعوا...وشويه وكلهم بدوا يطلعوا..
برنيه : ره مرتك ماكلت شي الأيام اللي فاتوا..
شبحلها بنظرة حاده...
عليا قعدت ساكته..
الحسن : بالله ياسرمد جيبلها اسكالوب وبيتزا تحبهم..ومتاخدش مشروب خود عصير ..
سرمد بضحكه : حاضر...سلموا عليه وطلعوا كلهم..وسكروا الباب..
عليا وهي متنرفزة: كيف تقوله خودلها اساكلوب وبيتزا مع بعض..تو يقول شن هالهايشه..
الحسن :هادي الحقيقه...
عليا : حسسسسسسسن..
الحسن: ال حسن...
عليا :حسن ...حسن...حسن....حسن ...
الحسن : ههههههههااااه..
عليا بضحكه: خلاص خلاص الحسن
ابتسم وهو يتأمل فيها وهي تحشمت..
طق الباب..انفتح
وخشوا اربعه ممرضات..وقعدوا يشبحوله بإعجاب..
الحسن : شن في..
ممرضه منهم: بنغيرولك ع الجرح..
عليا برفعه حاجب واشرت بصبعها: انتوا الأربعه..!
هزوا روسهم بأيجاب ..
عليا بإبتسامه مصطنعه: معليشي حبيباتي ماتعبوش رواحكم..مشت خدت منهم الحاجات ..تو نغيره اني..
كلهم شبحولها بصدمه..
عليا : اني طالبه طب ..وشاركت مسعفه في الحرب عندي خبره يعني وتوا بروا شوفوا شن عندكم..
هو شاد ضحكته..
وهما طلعوا منغاضات...
عليا جت بحداه: 4بيغيروا جرح ..يحسابوه ديناصور...
الحسن رفع حواجبه...
عليا : ترا شويه...وبدت تحوله في الضماد وهي قريبه منه وهو يشم في ريحتها ويتأمل فيها وهي منشغله ...
كل ماتقرب منه مشاعره تتحرك بقوة...لين كملت ..وهي تلف في اخر لفه من الفاشه عليا ومحاوطته بإيدها..
عليا : هكي كويس..ماردش عليها ..قامت عيونها لقت نظرته ليها تتكلم وتحكي وهي قاعده تسمع وتفهم..قرب منها وهي قربت..وباسوا بعض...ع خشت سرمد اللي لاطق ولاتنحنح ..
تلخبطوا هي وخرت وراسها لوطا...وهو دار روحه يساوي في الفاشه ووجهه طماطم...
سرمد: احمم...هذا العشي قدم حطه ع سرير الحسن..
سرمد بضحكه: تصبحوا ع خير وطلع وسكر الباب..وقعد يمشي ويضحك"قريب نمشي نخطب ونتزوج توا..زوجوني حرام عليكم..زوجوني يرحم والديكم ههههههههه"...
...
مقعمزة تاكل وهو يناشب فيها لكن ماعدتلش عليه...
الحسن : اللهم بارك..ماخليتي شي..
عليا ترقص في حواجبها: صحتين ع قلبي...
الحسن ابتسم...
طق الباب..وخش الدكتور عطي للحسن دوا وتأكد من تغيير الجرح وطلع...وعليا قعدت تهدرز عليه لين بدي يغمض فعيونه لإن الدوا فيه منوم.. رقد...
قربت منه وقعدت تتأمل فيه " الحمد لله اللي ردك ليا...حسيت روحي رجعتلي..حياتي مانقدرش نتخايلها من غيرك...غير تطلع من هني كل شي في حياتنا حيتغير كل شي"...شبحت لإيده حطت إيدها عليها وبعدين قامتها وحضنتها وباستها...وهي تتأمل فيه بكل حب...💖💖💖
....يتبع...
