#الحسن
#جمان_فريد
الجزء الثاني 🛡
بسبس زي ماوصيتك ركزي في كل شي وصوريلي الشيتات معاك.........هههههههههههه حيجي يوم ونردهولك ....تمام ...سلام...وصكرت...وقعدت تشبح للروشن وتشوف في العمارات اللي قاعدة في طور البناء ابتسمت بإرتياح "الحمد لله اللي رجع كل شي زي ماكان وأحسن"
كانت في السيارة واللي يسوق خوها وفي جنبه أمها وللتالي هي وخواتها الزوز....متوجهين لحوش عمتهم الموجود في مزرعه كبيرة...
عمتها بتينه هي عمتها الوحيده يعني بوها ماعنداش غير هالأخت كان في غيرهم 3اولاد بس ماتوا في الصراعات والحروب واحد من خوتهم اللي مات ...مات بعمليه تصفيه هالعمليه قام بيها ولد خو الحاج علي جد الحسن..وقعد في تار بين العيلتين لين جي نهار وخداه خوهم التاني وصفا ولد عم الحاج علي ..وقعدت بين العيلتين عداوة لهاللحظه...
المهم بتينه هادي متزوجه تاجر سجاد كبير وحالتها الماديه مرتاحه...عندها ولد وزوز بنات...
الولد الكبير منصف"خطيب عليا"
اللي بعده رشا عمرها 23سنه تكره عليا وتغير منها هلبه
اللي بعدها نوال عمرها 20سنه طيوبه...
راجلها جواد رجل كويس ومتواضع ويقدر في بو عليا هلبه...
🌼وصلوا للمزرعه فتح العامل الباب وخشوا بالسيارة ..وصلوا بحدا الحوش...نزلوا..وكان في استقبالهم بتينه ومعاها نوال..
زينب سلمت ع بتينه احضان وبوسات..بعدها مديحه وبعدين عليا..
بثينه تحضن في عليا: الله وحد ع بنية خوي زايده في الزين شن توكلي فيها يازينب...
زينب بإبتسامه: بنتي رضية والدين هذا علاش ربي زايدها زين من عنده..
عليا مبتسمه وجهها أحمر 😳😊
سلمت بعدين عليا ع نوال اللي قالتلها في وذنها:خطيبك ربع ساعه ويوصل..ابتسمت عليا بخجل وماعلقتش وخشوا كلهم داخل...
***
يعني ماأعترضش..
الحسن: زي ماقتلك هادي فرصته ليه تلاته سنين في الحبس ومشغول ع أمه اللي قاعده بروحها..
العقيد جاد الله : برغم اني وافقت ع مضض ع اللي خططتله يالحسن لكن ثقتي فيك كبيرة لهذا مطمن بعض الشي...
الحسن: واني إن شاء الله حنكون قد ثقتك..
العقيد : شن صار في البوكشاش...
الحسن ابتسم بتهكم: في ظهر قوي مسنود عليه مش مخلي وراه شي وكل مابنوصلوا فيه يهرب ..وينحط غيره كبش فداء..
العقيد: الولد هذا خطير ومش ساهل بكل...
الحسن : اكسرله ظهره حينكشف ع حقيقته قطوس من ورق..
العقيد: ههههههههههه...عارف قصته ولا...
الحسن سرح وهو يذكر في اللي صار قبل سنين أول ماخش لسلك الشرطه قسم المكافحه في أول مهمه...
فلاش باك...
الضابط : فتشتوا الحوش كله..
الحسن : ايه نظيف تماما...وكانت اصوات بكاء نساء تعلا اكثر وأكثر..
الضابط بأسف: والله الشيخ جعفر مايستاهل تصير فيه هالفضيحه..
فجأة طلعوا عناصر من الشرطه وهما شادين شاب عمره 17سنه وكان شبه دايخ ويجروا فيه برا لسيارة الشرطه...
لفوا الضابط والحسن بيمشوا وراهم...وقفهم صوت بنت صغيره..
"عمي الشرطي"
الضابط تلفت هو والحسن اللي قعد يشبح للبنيه الصغيره اللي كانت قمه في الجمال بيضا وعيونها سود وكبار معبيات بالدموع ورموشها زي المظله فوق عيونها وقايمه شعرها الأسود الطويل الناعم ديل حصان ولابسه توته سماويه صيفيه متاع شورط..
الضابط : شنو يابنتي ..
عليا ببكي: عمو ماتضربوش خوي هلبه هو كان كويس رجعولنا خوي الكويس بش بابا معاش يبكي..
تأثروا الحسن والضابط..والضابط قدملها وباس راسها: حاضر بنتي....
زينب بنبرة باكيه : عليااااااااا تعاااالي ..
عليا تلفتت لأمها ابتسمت للضابط ببراءة وشبحت للحسن اللي يشبحلها بنظره حاده تلاشت ابتسامتها وشبحتله بحدة حتى هي وخشت تجري.....
الوقت الحاضر...
العقيد: بعد طلع من الحبس التابع للمكافحه طلع اسوأ من الأول وانخرط في عصابات تجارة المخدرات وفوقت قصير ولا من أهم الروس...ع أيام الفوضى كان من جماعة******
وهو اللي يسير في أكبر العمليات...
الحسن فتح ايده : لازم نشدوا في ايدنا اللي يدخله لحوش خالته...وسكر ع ايده...ولو فلح بلال في اللي طلبته منه حيجيبلنا راسه وراس الأكبر منه...
العقيد:إن شاء الله يقدها..ومايلبزهاش أكثر...
الحسن هز راسه بإيجاب...
***
نزل من سيارته متوجه وين مافي بوه وخاله ولد خاله اللي لما شافوه قعدوا يأشروله بإيديهم مشالهم وسلم عليهم ..قعمز شويه بعدين خش داخل بش يسلم ع أمه والباقي..اول ماخش طاحت عينه ع خطيبته اللي كان يطير عقله كل مايشوفها كل مالها تزيد في الجمال وهو يغرق في حبها اكثر وأكثر..يسلم ع امه وخواته وعقله معاها يراجي أمتى يوصل فيها واول ماوصل فيها ناضت سلمت عليه باليد..
عليا بخجل: الحمد لله ع سلامتك😳
منصف وهو ذايب فيها: سلامتي !!!سلامة شنو وانتي تزيد تعذبي في قلبي بجمالك...😍
بتينه بضحكه: تحشم ياولد رانا بحداكم..
منصف وهو في حاله: امي زوجوهالي الليله ..
عليا بتموت من الخجل: منصصصصف 🙈
كلهم : ههههههههههههههههه ماعدا أميره تقول من يكسرلها في رقبتها...
زينب بضحكه: خلاص وليدي هانت كلها سنه وكم شهر...
منصف بتصنع المفاجأة:سنه وكم شهر بس..
بثينه بضحكه : بس بس
كلهم : ههههههههههههههههه
منصف وهو يشبحلها: الصبر ياااخالق الصبر..
عليا:😳😳🙈
***
علاش ماتمشيش تعالج انت علاش فهمني...
سليم شدها من ذراعها بقوة وعيونه يقدحوا شرار: تبي تقولي ان العله فيا اني ياكلبه...اني صاغ سليم مافيا شي..العله منك منك انتي..
خولة ببكي: علة شنو اللي مني انت بروحك شاهد ع االكشف اللي درته في اكثر من مكان وكلهم قالوا ماعنديش ولا مشكله..لكن انت قولي عالجت ولالا ...
انعمي من الغضب وضربها كف طيحها لوطا وقعد يضرب فيها كالشوات: يامسخه ياحقيرة اني راجل مافيا شي مافيا شي راجل غصب عنك وعن اللي جابك ...ووقف..توتشوفي ياكلبه تو ناخد عليك في اقرب وقت وحتشوفي كيف صغاري حيعبوا الدنيا وانتي اللي حتخدميهم هما وامهم ..وضربها كالشو وطلع...وهي قعدت شاده بطنها وتبكي بأعلى صوت والدم يسيل من فمها من أثر الكف..
💔خوله وسليم كانت بيناتهم قصه حب قويه وسليم يعشق خوله بجنون بعد تزوجوا عطلوا في الإنجاب ولما كشفوا خولة طلعت سليمه لكن سليم كانت عنده مشكله تخلي فرصه الإنجاب عنده معدومه ماكانش حد يعلم غيره بهالحقيقه...تغير هلبه ع خوله وحط فيها هي العله وبدي يعامل فيها معامله مهينه لأبعد حد حتى قدام أهله يهين فيها وهذا كله بسبب شعوره بالنقص وخوفه الكبير من ان لو خولة عرفت تسيبه..وخوله كانت تسكت وداري عليه لأنها تحبه...
***
غير كان خليتني اني درت الغدي..
زينب : وعلاش اديريه انتي ولا اني والصبايا محاوطات بينا خل هما يديروه ويوصلنا زي اللالات..
بتينه: ههههههههههههه عطيك الهني يازينب...
في المطبخ البنات يوتوا في الغدي اللي كان بازين..مديحه طيبت طبيخته وعليا ادير في عجينته وهي اللي بتعصده وتكركبه...
رشا : هي خلاص وتيت الصفر كملوا انتوا الباقي وطلعت...
كلهم يشبحولها بإزدراء..
اميرة: سامحيني نوال اختك اكبر دراه كبد عرفتاه البشريه..
مديحه شاده ضحكتها: أميييييره..
نوال بضحكه: عندها الحق حتى اني نقول فيها
كلهم : ههههههههههههههههه
عليا تحط في الصواني ع الأرض: اطلعوا كان ماعندكم ماديروا خل نكمل شغلي...
مديحه بضحكه: هي تعالوا نطلعوا بالمرة نوريلك شن خديت يانوال وتعطيني رايك ذوقك حلو بالمرة...
نوال بغرور مصطنع : سانكيو...
اميره: ههههههههه صدقت عمرها...هي اطلعي قدامي...ضحكوا التلاته وطلعوا...
وعليا نزلت الطنجرة لوطا وحطت فيها المغرف وشمرت سروالها لقبل الركبه بشوي..وقعمزت شدت الطنجرة برجليها اللي لابسه فيهم شبشب وبدت تعصد وتغني..
ع هدير البوسطا اللي كانت ناقلتنا
من ضيعة حملايا ع ضيعة تنورين
تزكرتك ياعليا وتزكرت عيونك
بخرب بين عيونك ياعليا شو حلوين
"حلوين وبس هما"
عليا انخلعت وناضت: ماتعرفش تتنحنح منصف 😳
ضحك وقدملها : دورت عليك بنعطيك الهديه اللي جبتهالك قالولي في المطبخ...
عليا بإحراج: كلبات يبوك تشوفني بهالمنظر😡😳
منصف: ههههههههههههههههه ...وخيره المنظر اللي شفتك بيه.. قرب اكثر...حلوة في كل حالاتك لاتقاومي ..
عليا تلقائيا جبدت المغرف من الطنجرة وقامته: بعد منصف😳
منصف:ههههههههههههههههههه...اه منك انتي ..والله مادايرلك حاجه ...ورالها حديدة ناعمه منقوش عليها اسمها من برا ومن داخل اسمه...
عليا : حلوة 😍
منصف : هاتي ايدك...
عليا: لا حنلبسها بروحي..
منصف: هههههههههههه..هاكي هاه..
خدتها عليا بسرعه وتلبس فيها ومنصف عيونه عليها قريب يهبل...
عليا بأبتسامه : حلوة هلبه وقامت راسها لقاته يشبحلها بهيام..خلاص منصف اطلع وقت ع الغدي...
منصف تنهد: حيجي يوم ونخلصه منك كله
عليا بخجل: برا باهي..
ضحك منصف وهو طالع: لوشتي ..
عليا بإبتسامه : امممم
منصف: نحبك💓
عليا: حتى اني💗 ...طلع منصف بالسيف وهي ولت لشغلها...
***
ع ذمته مش حتقعدي تبي ولاماتبيش
خوله تبكي: اصلا اني معاش نبيه مليت تعبت حاولت نكون معاه بنت اصل ع قد مانقدر بس مافيش فايده
الحسن بغضب: اللي داره والله ماهو مفوته ...الكلب مش حاسب ان في وراك تريس ولاكيف..
خولة ببكي: اني الغالطه اني اللي بسكوتي خليته يتمادى..
الحسن مرر صوابعه ع شعره بعصبيه وضرب الستيرسو بقوة لين انخلعت خوله وخافت...
فجأه اصدر الجهاز الأسود صوت...
:من الحسن تلاته للحسن واحد ..حول
قام الجهاز بعصبيه وقربه من فمه: شن صاير ...حول..
:يافندي..في واحد تهجم ع محل ذهب وكان مسلح بساطورضرب صاحب المحل وخدي اللي يجي قدامه ولما وصلنا فيه كان راكب موطو ..لحقناه وضربناله العجل بعيار ناري ...حول...
الحسن:هو في ايدكم توا...حول
:لايافندي قعدنا نطاردوا فيه خش بين المدنيين وخدي بنت صغيره من امها ويهدد لو يقرب عليه حد حيدبح البنت...حول
الحسن : خليكم محاوطين بيه ماتتصرفوش لين نوصل فيكم...حول.
خوله : تو انت مش تابع المخدرات شن علاقتك بالحاجات هادي..
الحسن وهو يشبح القدام: جهاز الشرطه قاعد في طور بناء هيكل جديد ليه...نحاولوا نساعدوا بعض بسبب قلة العناصر المدربه تدريب صح...
خوله هزت راسها بإيجاب...
الحسن زاد السرعه ووصل لحوش اهله نزلت اخته وهو جاي بيمشي شبح حسان خوه نازل وفيده ساكوا وكان لابس كانتيرا وشورط وسلسله في رقبته
وحدايد في ايديه شبحله بغل وهز راسه يتحلف فيه...حسان خاف غير عيونه والحسن انطلق بأقصى سرعه لمكان المشكله...
حسان قدم لخوله: خولة خيرك وشن هالشناطي اللي جايبتيهم معاك..
خوله بألم: دخل معاي الشناطي نخشوا وتعرف ...
حسان دخل معاها الشناطي وخشوا داخل...
****
مازاااال ماتبوش تخلوني نمشي فحالي ..وقام الساطور شكلكم تبوا تشوفوا راسها يدرجح هني...
البنيه قريب تموت بالبكي..
امها تعيط: والنبي ياوخييي تربح ياوخيييي بنتي ماليهاش ذنب ..
الناس يتفرجوا وعناصر الشرطه ماحاوطينه ومش قادرين يتصرفوا بتاتا...
🛡وصل الحسن لمكان المشكله ودرس بعيد وقعد يشبح من مسافه بعيده شويه في الوضع كيف شكله وقعد يفكر ويحسب فيها كويس..بعدين تكلم في الجهاز متاعه...
الحسن: اني جاي من الخلف لهيه ..حول..
ادم سمع الحسن بالسماعه اللي في وذنه وبدي يدوي: اسمع انت لو سلمت نفسك حتخف عنك العقوبه..
المجرم: هههههههههههههه قديمه هات غيرها...
آدم: بتعاند هكي حتزيد عليك الجنايات سرقه خطف شروع بالقتل يعني عمرك كله في الحبس..
المجرم وهو يرشف من خشمه: اممم لو خليتوني نمشي في حالي مش حيصير هذا كله..
في هالوقت آدم لمح الحسن وركز بنظره ع المجرم: عارف انك محاصر مستحيل نخلوك حتنشد هكي ولاهكي..
المجرم : وقتها الحلوة اللي في يدي حيدرجح راسها بين الرجلين
المراة: ووووووووووه عليا بنتي لااااا تربحوا شدت في آدم خلوه يمشي بالله عليكم..
في لحظه الحسن تقدم وفي ايده عصا غليظه تقدم بشويه بشويه وادم عين فيه وعين في المجرم ..والحسن زي الريح انطلق يجري متخطي الناس ونقز ونزل بالعصا ع راس المجرم جابه لوطا ونزل جنبه وشد الساطور..وآدم في نفس اللحظه انطلق وشد البنت...شبحوا ادم والحسن لبعض ابتسم آدم بإرتياح والحسن وقف على حيله : ارفعوه..
تقدموا العناصر قاموا المجرم ورفعوه والحسن قام شنطة الذهب وهو يراقب بنظراته الحاده في الأم كيف تحضن في بنتها بحرارة وتبوس فيها...
الناس صفقوا وفي ناس صورت اللي صار فيديو...وانفضوا بعدها مجرد ماتحركوا الشرطه من المكان ..والمراة روحت ببنتها...
***
اني شن قايلك ياعليا شن قايل
عليا: زودها يبي من يوقفه عند حده...
منصف رفع حواجبه: وانتي بتوقفيه..
عليا بحده : اللي نقدر عليه حنديره ومش حنسكتله كل شي ولابوي..
منصف يحاول يهدي نفسه: عليا حبيبتي ياعمري انتي..خوك هذا مخلوق خطير ..ماتعرفيش شن ممكن يدير معاك..
عليا : ماتبالغش اني اخته ره..
منصف بنفاذ صبر علا صوته: ياااعليا وسكت مسح بأيده ع وجهه ..حبيبتي افمهيني...خوك هذا معاش حاسبكم شي في حياته لاهمه بو لاام لاخوت لاخوات..يدير اللي مايخطرش ع بالك المهم ينتقم ع قولته...
سرحت عليا وهي تذكر في اسوء وأصعب يوم في حياتها برغم صغر سنها هذاكا الوقت..لكن مانستش منه ولاتفصيل
فلاش باك..
تربح ياوليدي تربح سلم نفسك وتعالج ع خاطري اني ع خاطر أمك
منذر وهو يعيط: تبييييني ننحبس أها تبوا تحبسوني ..ودف أمه من قدامه وطلع يجري شده مصعب..لكن ماقدراش وامه واخته يعيطوا وهما يشوفوا في حالته اللي تخوف...
دف خوه وطيحه وطلع يجري وكيف بيوصل في الباب بوه شده من الخلف..
جعفر وهو يبكي : ياولدي اللي ندير فيه لمصلحتك نبيك تولي منذر الأول منذر ولدي اللي ناس تحسد فيا عليه..
منذر مش واعي: حوووووووول حووووووووول خليني...
جعفر يشد فيه بالسيف شبح لعليا اللي كانت تشوف فيهم وتبكي ويشبح للباب..سمعوا صوت سيارات الشرطه..
منذر هبل: حوووووووووووول ..
جعفر معاش قادر: عليااااااا صكري الباب...
عليا بسرعه شديده صكرت الباب وبالسكارة.انطلق منذر لحق عليه مصعب وضرب ع راسه بزهريه طاح...
قعمز جعفر ع ركبيه وقعد يبكي: سامحني ياولدي كله لمصلحتك...
وامه كانت تعيط ومعاها اخته مديحه..
وخشت المكافحه طول...
الوقت الحاضر...
منصف: حبيبي وين سرحتي..
عليا دموعها نزلوا: علاش هكي صار..
منصف قلبه انعصر لما شاف دموعها قعد يمسح فيهم بطرف ابهامه: ماتبكيش ياعمري انتي كله مقدر ومكتوب..وغير الموضوع..نبيك الأيامات الجايه تمشي انتي وامك وخواتك وتشوفوا حوشنا شن درت فيه..
عليا ابتسمت من بين دموعها: الله!
منصف بإبتسامه: والله..نبيك تشوفيه وكان في شي ماعجبكش نغيره او شي تبيه نديره..
عليا وهي تشبح لعيونه: نحبك 💗
منصف غمض عيونه: الله يااااربي هالكلمه قداش ادير فيا من هوايل..💓💗💓
عليا ابتسمت بخجل ...
كانت العيون تراقب فيهم من بعيد بحب ماعدا عيون أميرة
اميرة"والله مايستاهلك ياوخيتي..آااه بس لو تعرفيه ع حقيقته"
اميرة في مرة كانت في حوش عمتها تساوي في شعرها ع مراية المدخل ..سمعت صوت مسج واصل لتليفون شبحت قدامها لقاته تليفون منصف انصدمت بالرساله اللي طلعت ع واجهه شن مكتوب فيها..قامت التليفون وفتحت الرمز اللي كان تاريخ ميلاد عليا...لقت رساله مكتوب فيها
(أول ماتوصل ع *****رح تلاقيني بالفندق اللي بنلتقي فيه رح عيشك ليله احلى من اخر ليله كنا فيها سوا...)
ووصلت بعدها صورة خليعه لنفس البنت اللي باعته الرساله مررت المحادثه لقاته مراسلها وقايللها كلام يستحي منه الشيطان ..اميرة رعشت مع بعضها ..طلعت من الرسايل وردت التليفون لمكانه مجرد ماسمعت اصوات هدرزة قريبه لفت ومشت تقابلت مع منصف..
منصف: اميرة شفتي تليفوني..
اميره وهي تشبحله بقرف: ع المدخل..ومشت..
هو استغرب لكن مادروش ومشي خدي تليفونه...
الوقت الحاضر
اميرة"ياااارب ماتخليشي ياخد اختي يااارب"
🌼اميره ماقدرتش تحكي لأختها طول خافت عليها من الصدمه لإنها تحب منصف هلبه..حاولت تلمح بس عليا مابتش تفهم وكانت تشوف في منصف أحسن راجل في العالم..
***
بعد مرور يوم في الليل...
كان في سيارة اجره يتأمل في ايده سلسله الفضة متاع أمه وباسها"جايك ياعمري"...
السواق : وصلنا ياخوي..
بلال عطاه اجرته ونزل من التاكسي وفإيده ساكوه..مشت السيارة ..وهو واقف وعيونه مفتوحات ع وسعهم من ذهوله بالفيلا الفخمه اللي واقف مقابلها...وزع نظره عليها..وابتسم تهكما وقال: بواباتك هلبه مش حنخشلك من ولاباب منهم
..حنخش من باب موجود داخل وهو اللي حينفتحلي بروحه ويدخلني.....
نقربوا اللقطه اكثر ع الفيلا ونخشوا داخل ..نشوفوا البنت وبوها كيف يتعشوا ويضحكوا...
عبدالقدوس: بنفتح مشروع كباب ايراني وانتي تمسكيه
ابتسام بضحكه: حييي عليك بعدين حنغلبك ونخفي اسمك من السوق..
عبدالقدوس: هههههههههههه الفلوس غيروك قبل اللي يوصلوا فيك...
ابتسام بضحكه: بنتك يابابا...
عبدالقدوس: هههههههههههههه يامعفنه..
ابتسام بإبتسامه: مانبدلك بشي ومانسمح لمكروه يمسك..
عبدالقدوس ابتسم ودموعه عبوا عيونه: ولا اني نفرط فيك مهما صار..
ابتسام: هههههههههههه بكل يابابا خلاص ارتاح مش حنتزوج حنقعد بحداك..
عبدالقدوس بضحكه: احسن شي..
الزوز ضحكوا...
يضحكوا ومش عارفين الأيام الجايه شن مدرقه ...
....يتبع...
