#الحسن
ﺍﻟﺠﺰﺀ ﺍﻟﺮﺍﺑﻊ ﻭﺍﻟﺴﺘﻴﻦ 🍃
صورة 3.8K صورة 95 صورة 19
ﺑﻮﺍﺳﻄﺔ GomanFared
ﻟﻴﻠﺘﻬﺎ ﺃﺣﻤﺪ ﻣﺎﺭﻗﺪﺵ ﻭﻫﻮ ﻳﻔﻜﺮ ... ﻳﻔﻜﺮ ﻓﻲ ﻛﻞ ﺗﻔﺼﻴﻞ ﻓﻲ ﺍﻟﻘﻀﻴﺔ ﻗﺴﻤﻬﺎ ﻷﺟﺰﺍﺀ ﻭﻗﺪ ﻳﺤﻠﻞ ﻓﻲ ﻛﻞ ﺟﺰﺀ ... ﻭﻗﻒ ﻋﻦ ﺗﻔﺼﻴﻞ ﻣﻬﻢ ﺍﻟﺨﺪﺍﻣﻪ ﺍﻟﻠﻲ ﻗﺎﻟﺖ ﺍﻧﻬﺎ ﺷﺎﻫﺪﻩ ﻉ ﺍﻟﺤﺎﺩﺙ .. ﺩﻭﺭ ﻭﺭﺍﻫﺎ ﻟﻴﻦ ﻋﺮﻑ ﻋﻨﻮﺍﻧﻬﺎ .. ﻳﺪﻭﺏ ﺭﻗﺪ ﺳﺎﻋﺘﻴﻦ ﻭﺍﻟﺼﺒﺢ ﺗﻮﺟﻪ ﻟﺤﻮﺷﻬﺎ ... ﻛﺎﻧﺖ ﺗﺴﻜﻦ ﻓﻲ ﺍﺣﺪ ﺍﻷﺣﻴﺎﺀ ﺍﻟﺸﻌﺒﻴﻪ ﻓﻲ ﺍﻟﻌﺎﺻﻤﻪ ... ﻭﺻﻞ ﻉ ﻗﺪ ﻣﺎﻃﻖ ﻣﺎﺣﺪ ﻓﺘﺢ .. ﻳﻌﻨﻲ ﺍﻟﺤﻮﺵ ﻓﺎﺿﻲ ...
ﺟﺎﺭﻫﻢ ﺍﻟﻠﻲ ﻣﻘﺎﺑﻠﻬﻢ ﻃﻠﻊ ..
ﺍﻟﺠﺎﺭ : ﻣﻌﻠﻴﺸﻲ ﻳﺎﺧﻮﻱ ﺍﻟﻨﺎﺱ ﺍﻟﻠﻲ ﻫﻨﻲ ﻟﻴﻬﻢ ﻣﺪﻩ ﻣﺴﻴﺒﻴﻦ ﺍﻟﺤﻮﺵ ..
ﺍﺣﻤﺪ ﺍﺗﻔﺎﺟﺄ ﻭﻗﺪﻡ ﻟﻠﺮﺍﺟﻞ : ﻗﺪﺍﺵ ﻟﻴﻬﻢ ﻫﻚ ﻳﻌﻨﻲ ...
ﺍﻟﺠﺎﺭ : ﻓﻮﻕ ﺍﻟﺸﻬﺮ ..
ﺍﺣﻤﺪ " ﻣﻦ ﻟﻤﺎ ﺑﺪﺕ ﺍﻟﻘﻀﻴﻪ .."
ﺍﻟﺠﺎﺭ : ﻗﺮﻳﺒﻬﻢ؟
ﺍﺣﻤﺪ ﺍﺑﺘﺴﻢ : ﺍﻳﻪ .... ﺑﻨﺴﺄﻟﻚ ...
ﺍﻟﺠﺎﺭ : ﺗﻔﻀﻞ ..
ﺍﺣﻤﺪ : ﺟﺎﺭﺗﻜﻢ ﺧﺪﻣﺖ ﻓﻲ ﺣﻮﺵ ﺗﺎﻧﻲ ﺑﻌﺪ ﺣﻮﺵ ﻧﻬﻠﻪ ﺍﻟﺼﻴﺪ ..
ﺍﻟﺠﺎﺭ : ﻻ ﻣﺎﺧﺪﻣﺘﺶ .. ﻛﺎﻧﺖ ﺗﻘﻮﻝ ﻟﻤﺮﺗﻲ ﻣﺎﻟﻘﺘﺶ ﺣﻮﺵ ﺯﻱ ﺣﻮﺵ ﻧﻬﻠﻪ ﻭﻻﻣﺮﺍﺓ ﺯﻳﻬﺎ ﻃﻴﺒﻪ ﻭﻣﺘﻔﺎﻫﻤﻪ .. ﻫﻲ ﺳﻴﺒﺖ ﺍﻟﺨﺪﻣﻪ ﻋﻨﺪﻫﺎ ﻣﻦ 4 ﺷﻬﻮﺭ ...
ﺍﺣﻤﺪ ﺑﺼﺪﻣﻪ : 4 ﺷﻬﻮﺭ ..!!!
ﺍﻟﺠﺎﺭ : ﺍﻳﻪ .. ﻫﻲ ﻳﻌﻨﻲ ﻣﺶ ﻫﻲ ﺍﻟﻠﻲ ﺳﻴﺒﺖ ﺍﻟﻠﻲ ﻓﻬﻤﺘﻪ ﺍﻥ ﻧﻬﻠﻪ ﺳﻴﺒﺖ ﺣﻮﺷﻬﺎ ..
ﺍﺣﻤﺪ : ﻛﻴﻒ ﻭﻗﺮﻳﺐ ﻟﻴﺒﻴﺎ ﻛﻠﻬﺎ ﺗﻌﺮﻑ ﺍﻥ ﻟﻴﻠﺔ ﻗﺘﻞ ﻧﻬﻠﻪ ﻛﺎﻧﺖ ﻋﻨﺪﻫﺎ ..
ﺍﻟﺠﺎﺭ ﻗﺪﻡ ﻷﺣﻤﺪ : ﻟﻴﻠﺘﻬﺎ ﻣﺎﻃﻠﻌﺘﺶ ﻣﻦ ﺣﻮﺷﻬﺎ ﺃﺻﻼ ...
ﺍﺣﻤﺪ ﺯﺍﺩ ﺍﻧﺼﺪﻡ
ﺍﻟﺠﺎﺭ : ﻧﺴﺎﺑﺎﺗﻲ ﻟﻴﻠﺘﻬﺎ ﻛﺎﻧﻮﺍ ﻣﺘﻌﺸﻴﻴﻦ ﻋﻨﺪﻱ ... ﻭﺍﻟﻌﻴﺎﻝ ﺑﻌﺘﺖ ﻟﺠﻤﻴﻠﻪ ﺟﺎﺭﺗﻨﺎ ﻫﺎﺩﻱ ﺫﻭﻗﺘﻬﺎ ﻣﻦ ﺍﻟﻠﻲ ﻃﻴﺒﺎﺗﻪ ﻭﻫﻲ ﺍﻟﻠﻲ ﻓﺘﺤﺖ ﺍﻟﺒﺎﺏ ﻭﺧﺪﺕ ﻣﻨﻬﺎ ﺍﻟﺼﻮﻧﻴﻪ ... ﺑﺎﻟﻌﻼﻣﻪ ﻛﺎﻧﺖ ﻭﺣﺪﻩ ﻣﻦ ﺑﻨﺎﺗﻬﺎ ﻣﺮﻳﻀﺔ ﻣﺎﻃﻠﻌﺘﺶ ﺑﻜﻞ ﻣﻦ ﺣﺪﺍﻫﺎ ..
ﺍﺣﻤﺪ ﺍﺑﺘﺴﻢ ﺑﺬﻫﻮﻝ ..
.....
ﻓﻲ ﺍﻟﻨﻴﺎﺑﻪ
ﻭﻛﻴﻞ ﺍﻟﻨﻴﺎﺑﻪ ﺳﻬﻴﻞ : ﻣﺘﺄﻛﺪ ﻣﻦ ﺍﻟﻠﻲ ﻗﻠﺘﻪ ..
ﺍﻟﺮﺍﺟﻞ ﺑﺮﺑﻜﻪ : ﺍﻳﻪ ﻭﺍﻟﻠﻪ ﻳﺎﻓﻨﺪﻱ ..
ﺳﻬﻴﻞ : ﻭﻗﻊ ﻉ ﺷﻬﺎﺩﺗﻚ ...
ﺧﺪﻱ ﺍﻟﺠﺎﺭ ﺍﻟﻮﺭﻗﻪ ﻭﻭﻗﻊ ﻋﻠﻴﻬﺎ ..
ﻻﺣﻈﻮﺍ ﺍﺣﻤﺪ ﻭﺳﻬﻴﻞ ﺍﻧﻪ ﺧﺎﻳﻒ ﻫﻠﺒﻪ ..
ﺳﻬﻴﻞ : ﻧﺒﻴﻚ ﺗﻄﻤﻦ ﺣﻨﺄﻣﻨﻮﻟﻚ ﺣﻤﺎﻳﻪ .. ﺍﻧﺖ ﻭﻟﻴﺖ ﺍﻫﻢ ﺷﺨﺺ ﻓﻲ ﺍﻟﻘﻀﻴﻪ ﺍﻫﻢ ﻣﻦ ﺍﻟﻤﺘﻬﻢ ﻧﻔﺴﻪ ..
ﺍﺣﻤﺪ ﺿﺤﻚ ..
ﺍﻟﺠﺎﺭ : ﺍﻧﻲ ﻭﺍﻟﻠﻪ ﻣﺎﻧﺒﻲ ﻧﻮﻟﻲ ﻣﻬﻢ .. ﻏﻴﺮ ﺧﻮﻧﺎ ﻫﺬﺍ ﺧﺪﺍﻧﻲ ﺑﺎﻟﻜﻼﻡ ..
ﺍﺣﻤﺪ ﺑﻀﺤﻜﻪ : ﺍﻧﺖ ﺍﻟﻠﻲ ﺧﺎﻃﺮﻙ ﺗﺪﻭﻱ ﻭﺧﻼﺹ ..
ﺳﻬﻴﻞ ﺑﺈﺑﺘﺴﺎﻣﻪ : ﺗﻘﺪﺭ ﺗﺘﻔﻀﻞ ..
ﻧﺎﺽ ﺍﻟﺮﺍﺟﻞ ﻳﺮﻋﺶ ﻣﺴﻜﻴﻦ ﻃﻠﻊ ﺑﺎﻟﺴﻴﻒ ﻣﻦ ﺍﻟﻤﻜﺘﺐ ..
ﺍﺣﻤﺪ : ﻣﻦ ﺍﻟﺠﻴﺮﺍﻥ ﻗﻴﺎﺩﻳﻦ ﺍﻷﺣﻮﺍﻝ ... ﺑﺲ ﻧﻔﻌﻨﺎ ﻫﻠﺒﻪ ﻃﺒﻌﻪ ﺍﻟﺰﻓﺖ ﻫﺬﺍ ..
ﺳﻬﻴﻞ ﺑﻀﺤﻜﻪ : ﺭﺏ ﺿﺎﺭﺓ ﻧﺎﻓﻌﻪ .. ﺗﻮﺍ ﻣﺠﺮﻯ ﺍﻟﻘﻀﻴﻪ ﺣﻴﺘﻐﻴﺮ .. ﻭﺍﺧﺘﻔﺎﺀ ﺍﻟﺸﻐﺎﻟﻪ ﺍﻛﺒﺮ ﺩﻟﻴﻞ ﻉ ﺍﻥ ﻓﻲ ﺷﻲ ﻣﺤﺎﻙ ﺿﺪ ﺍﻟﻌﻘﻴﺪ ﺍﻟﺤﺴﻦ ﺍﻟﺼﺎﺩﻕ ..
ﺍﺣﻤﺪ ﺍﺑﺘﺴﻢ : ﺣﺴﻴﺖ ﺍﻧﻚ ﻣﺶ ﻣﺼﺪﻕ ﺍﻱ ﺷﻲ ﻣﻦ ﺍﻟﻠﻲ ﺻﺎﺭ ..
ﺳﻬﻴﻞ : ﻣﻤﻜﻦ ﻣﺎﻧﻌﺮﻓﺎﺵ ﻣﻌﺮﻓﻪ ﺷﺨﺼﻴﻪ .. ﺑﺲ ﺍﻟﻠﻲ ﺳﻤﻌﺘﻪ ﻋﻨﻪ ﻉ ﺟﻤﻴﻊ ﺍﻷﺻﻌﺪﻩ .. ﻳﺒﻴﻦ ﻣﻌﺪﻧﻪ ﻛﻮﻳﺲ ..
ﺍﺣﻤﺪ ﻫﺰ ﺭﺍﺳﻪ ﺍﻳﺠﺎﺑﺎ ﻣﻮﺍﻓﻘﻪ ﻓﻲ ﺍﻟﻜﻼﻡ ...
...
ﺍﺣﻤﺪ ﺑﻌﺪ ﻃﻠﻊ ﻣﻦ ﺍﻟﻨﻴﺎﺑﻪ ﺗﻮﺟﻪ ﻟﻠﻤﺮﻛﺰ ﻭﻛﻴﻒ ﻧﺰﻝ ﻣﻦ ﺳﻴﺎﺭﺗﻪ ..
" ﺃﻓﻨﺪﻱ ﺍﺣﻤﺪ .."
ﺗﻠﻔﺖ ﺍﺣﻤﺪ ﻭﺍﺗﻔﺎﺟﺄ ﻫﻠﺒﻪ ...
ﺍﻧﻌﺎﻡ ﻗﺪﻣﺖ ﺑﺨﻄﻮﺍﺕ ﺧﺠﻮﻟﻪ : ﻣﻌﻠﻴﺸﻲ ﻣﻤﻜﻦ ﻧﺘﻜﻠﻢ ﻣﻌﺎﻙ ..
ﺍﺣﻤﺪ ﺍﺑﺘﺴﻢ : ﻣﻤﻜﻦ ...
....
ﻓﻲ ﺣﺪﻳﻘﻪ ﻗﺮﻳﺒﻪ ﻣﻦ ﺍﻟﻤﺮﻛﺰ ..
ﺍﻧﻌﺎﻡ ﻣﻨﺪﻫﺸﻪ ﺑﻔﺮﺣﻪ : ﻳﻌﻨﻲ ﻣﺶ ﺣﻴﻌﺪﻣﻮﻩ ..
ﺍﺣﻤﺪ ﺑﺈﺑﺘﺴﺎﻣﻪ : ﺍﻟﻠﻲ ﺻﺎﺭ ﻏﻴﺮ ﻣﺠﺮﻯ ﺍﻟﻘﻀﻴﻪ .. ﺑﺲ ﻓﻲ ﻣﺸﻜﻠﻪ ﺣﺎﻭﻟﺖ ﻧﻜﻠﻢ ﺍﻛﺜﺮ ﻣﻦ ﻣﺤﺎﻣﻲ ﻣﻦ ﺍﻟﻠﻲ ﻟﻴﻬﻢ ﺑﺎﻉ ﻭﺍﺳﻢ .. ﻛﻠﻬﻢ ﺗﻬﺮﺑﻮﺍ ﻣﻦ ﺍﻟﻘﻀﻴﻪ ﻭﻗﺎﻟﻮﺍ ﺍﻧﻬﺎ ﺧﺎﺳﺮﻩ ..
ﺍﻧﻌﺎﻡ : ﻛﻴﻒ ﻳﻌﻨﻲ ..
ﺍﺣﻤﺪ : ﻓﻲ ﺣﺪ ﻣﻜﻠﻤﻬﻢ ...
ﺍﻧﻌﺎﻡ : ﻣﺆﺍﻣﺮﺓ ﺩﻧﻴﺌﻪ ﻭﻗﺬﺭﺓ ..
ﺍﺣﻤﺪ : ﺍﻧﻌﺎﻡ ..
ﺍﻧﻌﺎﻡ ﺷﺒﺤﺘﻠﻪ ..
ﺍﺣﻤﺪ ﺑﺨﺠﻞ : ﺍﻋﺬﺭﻳﻨﻲ ﻹﻥ ﺣﻮﻟﺖ ﺍﻟﺮﺳﻤﻴﺎﺕ .. ﺑﺲ .. ﺑﺼﺮﺍﺣﻪ ... ﻣﺶ ﻋﺎﺭﻑ ﻳﻌﻨﻲ ".. ﻗﻌﺪ ﻳﻔﺘﺮﺵ "
ﺍﻧﻌﺎﻡ ﺑﻀﺤﻜﻪ : ﻣﺎﻓﻴﺶ ﻣﺸﻜﻠﻪ .. ﺍﻋﺘﺒﺮﻧﻲ ﺍﺧﺘﻚ ..
ﺍﺣﻤﺪ " ﻣﺎﻋﻨﺪﻳﺶ ﺧﻮﺍﺕ ﻭﻣﺎﻧﺒﻴﺶ ﺧﻮﺍﺕ :" ﺍﺣﻤﻢ ... ﻛﻮﻳﺲ ﻭﺍﺑﺘﺴﻢ ﻣﺠﺎﻣﻠﻪ .. ﺗﻨﻬﺪ ﻭﻧﺎﺽ .. ﺍﻟﻤﻬﻢ ﺗﻮﺍ ﺑﺸﺮﻱ ﺍﻟﻌﻴﻠﻪ ﻭﺯﻭﺟﺘﻪ ﺗﺤﺪﻳﺪﺍ ..
ﺍﻧﻌﺎﻡ ﺍﺑﺘﺴﻤﺖ : ﺍﻛﻴﺪ ... ﻧﺴﺘﺄﺫﻧﻚ ... ﻭﻣﺸﺖ ﻭﺍﺣﻤﺪ ﻣﻌﺎﻫﺎ ﺑﻌﻴﻮﻧﻪ ﻟﻴﻦ ﺍﺧﺘﻔﺖ ﻣﻦ ﻗﺪﺍﻣﻪ .. ﺗﻨﻬﺪ ﻣﻦ ﻗﻠﺒﻪ ﻭﺿﺤﻚ .. ﻭﻭﻻ ﻟﻠﻤﺮﻛﺰ ..
....
ﻗﻮﻟﻲ ﻭﺍﻟﻠﻪ .. ﺍﺣﻠﻔﻲ ﺑﺎﻟﻠﻪ ... ﺍﺣﻠﻔﻲ ﻉ ﺍﻟﻤﺼﺤﻒ ..
ﺍﻧﻌﺎﻡ ﺑﻀﺤﻜﻪ : ﻭﺍﻟﻠﻪ ﺍﻟﻌﻈﻴﻢ ﺯﻱ ﻣﺎﻧﺤﻜﻴﻠﻚ ..
ﻋﻠﻴﺎ : ﺁﺍﺍﺍﺍﻩ ﻳﺎﺭﺑﻲ ﻳﺎﺍﺍﺍﺭﺑﻲ .. ﺍﻣﺲ ﺑﺲ ﻛﻨﺖ ﻓﺎﻗﺪﻩ ﺍﻷﻣﻞ ﺑﺎﻟﻤﺮﺓ .. ﻳﺎﺭﺑﻲ ﺳﺒﺤﺎﻧﻚ .. ﻭﻗﻌﺪﺕ ﺗﺒﻜﻲ ..
ﺑﺮﻧﻴﻪ ﻭﺩﻣﻮﻋﻬﺎ ﻳﻨﺰﻟﻮﺍ : ﻣﻌﺎﺩ ﻋﺮﻓﻨﺎﻙ ﻓﻲ ﻛﻞ ﺣﺎﻝ ﺗﺒﻜﻲ ..
ﻋﻠﻴﺎ ﺿﺤﻜﺖ ﻣﻦ ﺑﻴﻦ ﺩﻣﻮﻋﻬﺎ : ﺩﻣﻮﻉ ﺍﻟﻔﺮﺡ ﻳﺎﺣﻨﺎﻱ .. ﺍﻟﻠﻲ ﺯﻱ ﺩﻣﻮﻋﻚ ﺗﻮﺍ ..
ﺿﺤﻜﻮﺍ ﺑﺮﻧﻴﻪ ﻭﺍﻧﻌﺎﻡ ...
ﺍﻧﻌﺎﻡ : ﺑﺲ ﻓﻲ ﺣﺎﺟﻪ ﻗﺎﻟﻲ ﻋﻠﻴﻬﺎ ﺍﻷﻓﻨﺪﻱ .. ﻫﻮ ﺗﻮﺍ ﻻﺯﻣﻪ ﻣﺤﺎﻣﻲ ﺧﻴﺮ ﻣﻦ ﺍﻟﺮﻛﻴﻚ ﻫﺬﺍﻛﺎ ﻟﻜﻦ ﻭﻳﻦ ﻳﻤﺸﻲ ﻳﻜﻠﻢ ﻣﺤﺎﻣﻴﻴﻦ ﻳﺮﻓﻀﻮﺍ ﻳﺎﺧﺪﻭﺍ ﺍﻟﻘﻀﻴﻪ ﻭﻗﺎﻝ ﺍﻥ ﻓﻲ ﺣﺪ ﻣﻜﻠﻤﻬﻢ ﻭﺍﺿﺤﻪ ..
ﻋﻠﻴﺎ ﻣﺴﺤﺖ ﺩﻣﻮﻋﻬﺎ ﻭﻗﻌﺪﺕ ﺗﻔﻜﺮ ﻭﺍﺫﻛﺮﺕ ﺍﺧﺮ ﻣﺮﺓ ﻛﺎﻧﺖ ﻓﻴﻬﺎ ﻓﻲ ﺣﻮﺵ ﺍﻫﻠﻬﺎ ..
ﻓﻼﺵ ﺑﺎﻙ ..
ﻣﻘﻌﻤﺰﺓ ﻫﻲ ﻭﺍﻣﻬﺎ ﻭﺑﻮﻫﺎ ﻭﻋﻤﺘﻬﺎ ﻭﻭﻟﺪ ﻋﻤﺘﻬﺎ ..
ﺑﺘﻴﻨﻪ : ﻭﺿﻌﻪ ﺻﻌﺐ ﻫﻠﺒﻪ ﻛﻞ ﺷﻲ ﺿﺪﻩ ..
ﻋﻠﻴﺎ : ﻣﺆﺍﻣﺮﺓ ﻣﺤﺒﻮﻛﻪ ﺻﺢ ...
ﺟﻌﻔﺮ : ﺍﻟﺮﺍﺟﻞ ﺑﺮﻱﺀ ﻭﻣﺘﺄﻛﺪﻳﻦ ﻣﻦ ﻫﺎﻟﺸﻲ ..
ﻣﻨﺼﻒ : ﺳﻠﻤﻨﺎ ﺟﺪﻻ ﺍﻧﻪ ﺑﺮﻱﺀ .. ﺑﺲ ﺯﻱ ﻣﺎﻗﺎﻟﺖ ﺍﻣﻲ .. ﻛﻞ ﺷﻲ ﺿﺪﻩ .. ﻻﺑﺴﺘﻪ ﻻﺑﺴﺘﻪ .. ﺣﺘﻰ ﻟﻮ ﺣﺎﻭﻟﺘﻮﺍ ﺗﻮﻛﻠﻮﺍ ﻋﺸﺮﻳﻦ ﻣﺤﺎﻣﻲ ﻏﻴﺮ ﺍﻟﻤﺤﺎﻣﻲ ﻣﺘﺎﻋﻪ ﺣﻴﺮﻓﻀﻮﺍ ﺍﻟﻘﻀﻴﻪ .. ﻷﻧﻬﺎ ﺧﺎﺳﺮﺓ ﻣﺴﺒﻘﺎ ..
ﻋﻠﻴﺎ ﻧﺎﺿﺖ : ﻣﺎﻧﺒﻴﺶ ﻧﻐﻠﻂ ﻓﻲ ﺍﻟﺪﻭﺓ ﻓﺤﻀﻮﺭ ﺍﻟﻜﺒﺎﺭ .. ﻧﻨﺴﺤﺐ ﺧﻴﺮ .. ﻭﻣﺸﺖ ﻭﺧﻠﺘﻬﻢ ﻭﺧﺸﺖ ﺩﺍﺧﻞ ..
ﺍﻟﻮﻗﺖ ﺍﻟﺤﺎﺿﺮ ...
ﻋﻠﻴﺎ " ﺗﻤﺎﻡ .."
***
12 ﻇﻬﺮﺍ
ﺳﻠﻮﻯ : ﻟﻬﺎﻟﺪﺭﺟﻪ ﻭﺍﺛﻘﻴﻦ ﻣﻨﻪ ..
ﺍﻣﻴﺮﻩ؛ ﻭﺍﻛﺜﺮ ...
ﺳﻠﻮﻯ : ﺍﻧﺘﻮﺍ ﺍﻷﺩﺭﻯ ﺑﻴﻪ ﻭﻣﺎﺩﺍﻡ ﺍﺧﺘﻚ ﻭﺍﻗﻔﻪ ﻣﻌﺎﻩ ﻣﻌﻨﺎﻫﺎ ﺑﺮﻱﺀ ﻻﻥ ﺻﻌﺐ ﺍﻟﻤﺮﺍﺓ ﺗﺘﺤﻤﻞ ﺧﻴﺎﻧﻪ ﺭﺍﺟﻠﻬﺎ ﺗﻜﻮﻥ ﻣﻔﻀﻮﺣﻪ ﻉ ﺍﻟﻤﻸ .. ﻭﻋﻠﻴﺎ ﻧﻌﺮﻓﻬﺎ ﻣﺎﺗﺘﺤﻤﻠﺶ ﺍﻱ ﺷﻲ ﻳﻬﻴﻦ ﻛﺮﺍﻣﺘﻬﺎ ..
ﺍﻣﻴﺮﻩ ﺍﺑﺘﺴﻤﺖ : ﺻﺢ .. ﺑﺘﺮﻭﺣﻲ ﻃﻮﻝ ..
ﺳﻠﻮﻯ : ﺍﻫﻮ ﺧﻮﻱ ﺟﻲ .. ﺑﻨﻤﺸﻮﺍ ﻟﻠﺤﻮﺍﺯﻩ ﺍﻟﻴﻮﻡ ..
ﺍﻣﻴﺮﻩ ﺑﻀﺤﻜﻪ : ﺍﻹﻣﺘﺤﺎﻧﺎﺕ ﺗﻤﻮﺍ ﻭﺍﻟﻘﺮﺍﻳﻪ ﻛﻠﻬﺎ ﺗﻤﺖ ﺍﺣﺘﻔﻠﻲ ..
ﺳﻠﻮﻯ : ﻫﻬﻬﻬﻬﻬﻬﻬﻬﻬﻪ ﻣﺶ ﻏﻴﺮ ﻫﻴﺎ ﻧﺸﻮﻓﻚ ﻉ ﺧﻴﺮ ﻭﺣﻀﻨﻮﺍ ﺑﻌﺾ .. ﻭﻣﺸﺖ ﺳﻠﻮﻯ .. ﺍﻣﺎ ﺃﻣﻴﺮﻩ ﻛﺎﻧﺖ ﻭﺍﻗﻔﻪ ﻗﺪﺍﻡ ﻣﺤﻞ ﺍﻟﻮﺭﺩ ﻃﻠﻊ ﺍﻟﻠﻲ ﻳﺒﻴﻊ ﺑﺮﺍ ﻭﺍﺷﺮﻟﻬﺎ ﺑﻌﻴﻮﻧﻪ ﺗﺨﺶ ..
ﺷﺎﻓﺖ ﺍﻣﻴﺮﺓ ﺩﺍﺧﻞ .. ﻟﻘﺖ ﺳﺮﻣﺪ ﻭﺍﻗﻒ ﻗﺎﻳﻢ ﺍﻳﺪﻳﻪ ..🖐
ﺍﻣﻴﺮﻩ ﺍﺑﺘﺴﻤﺖ ﺑﻔﺮﺡ ﺧﺶ ﺍﻟﺒﺎﻳﻊ .. ﺧﺸﺖ ﺑﻌﺪﻩ ...
ﺳﺮﻣﺪ ﺑﺄﺑﺘﺴﺎﻣﻪ ﻭﺩﺍﺭ ﺣﺮﻛﻪ ﺑﺄﻳﺪﻩ : ﺗﻔﻀﻠﻲ .. ﺍﻣﻴﺮﺗﻲ ﺍﻟﺠﻤﻴﻠﻪ ..
ﺍﺑﺘﺴﻤﺖ ﺃﻣﻴﺮﻩ ﺑﺨﺠﻞ .. ﻭﺧﺸﺖ ﻟﻠﻤﻜﺎﻥ ﺍﻟﻠﻲ ﻗﻌﻤﺰﻭﺍ ﻓﻴﻪ ﺍﻭﻝ ﻣﺮﺓ ﻣﻊ ﺑﻌﺾ ... ﺑﺲ ﻣﺎﻛﺎﻧﺶ ﻓﻲ ﻃﺎﻭﻟﻪ ﻭﻛﺮﺍﺳﻲ ... ﻟﻜﻦ ﺍﻧﺒﻬﺮﺕ ﺑﺘﻨﺴﻴﻖ ﺍﻟﻮﺭﺩﺓ ﻉ ﺷﻜﻞ ﻛﻠﻤﻪ ...
( ILove you...my princces ) ... ﻛﺎﻧﺖ ﻉ ﺍﻟﺤﻴﻂ ..
ﺍﻣﻴﺮﻩ ﺣﻄﺖ ﺍﻳﺪﻫﺎ ﻉ ﻓﻬﻤﺎ ﻭﻗﻌﺪﺕ ﺗﻀﺤﻚ ..
ﺳﺮﻣﺪ ﻳﺘﺄﻣﻞ ﻓﻴﻬﺎ : ﻋﺠﺒﺎﺗﻚ ..
ﺍﻣﻴﺮﻩ ﻭﻫﻲ ﺗﺸﺒﺤﻠﻬﺎ : ﺗﻬﺒﺒﺒﺒﺒﺒﻞ 💕..
ﺳﺮﻣﺪ ﻗﺮﺏ ﻣﻨﻬﺎ : ﺣﻮﻟﺖ ﺷﻮﻛﻬﺎ ﺑﻴﺪﻱ ..
ﺷﺒﺤﺘﻠﻪ ﻭﺷﺒﺤﺖ ﻷﻳﺪﻳﻪ ... ﻛﺎﻧﻮﺍ ﻣﺠﺮﺣﺎﺕ .. ﺍﻧﺼﺪﻣﺖ ﻭﻭﺟﻌﻬﺎ ﻫﻠﺒﻪ ﺷﺪﺕ ﺍﻳﺪﻩ ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ : ﻋﻼﺵ ﻫﻜﻲ .. ﻣﻦ ﻗﺎﻟﻚ ﻧﺒﻴﻚ ﺗﺄﺫﻱ ﻧﻔﺴﻚ ﺑﺴﺒﺒﻲ ..
ﺳﺮﻣﺪ ﻭﻫﻮ ﺗﺤﺖ ﺗﺄﺛﻴﺮ ﺍﻟﻤﻮﻗﻒ : ﻛﻞ ﺷﻲ ﻳﻬﻮﻥ ﻉ ﺧﺎﻃﺮﻙ ...
ﺍﻣﻴﺮﻩ ﺷﺒﺤﺘﻠﻪ .. ﻗﻌﺪﻭﺍ ﻳﺸﺒﺤﻮﺍ ﻟﻌﻴﻮﻥ ﺑﻌﺾ ..
ﺍﻣﻴﺮﺓ " ﺑﺮﻏﻢ ﺍﻥ ﻋﻴﻮﻧﻚ ﻳﺴﺤﺮﻭﺍ ﻓﻴﺎ ﺑﺲ ﻧﻔﺲ ﺍﻟﺨﻮﻑ ﻳﺨﺶ ﻗﻠﺒﻲ ﻟﻤﺎ ﻧﺘﺄﻣﻠﻬﻢ .."
ﻃﻠﻘﺖ ﺍﻳﺪﻩ ﻭﻣﺴﺤﺖ ﺩﻣﻌﺘﻬﺎ ﺍﻟﻠﻲ ﻧﺰﻟﺖ : ﻫﺬﺍ ﺍﻟﻮﺭﺩ ﻣﻦ ﺟﻨﺎﻧﻜﻢ ﻭﻻ ..
ﺳﺮﻣﺪ ﻭﻫﻮ ﻣﺮﺗﺒﻚ ﻣﻦ ﺍﻟﻤﻮﻗﻒ ﻭﺣﻚ ﺭﻗﺒﺘﻪ : ﺍﺣﻤﻢ .. ﺍﻳﻪ ..
ﺍﻣﻴﺮﺓ ﺍﺑﺘﺴﻤﺖ : ﻋﺮﻓﺘﻪ ... ﻗﺮﺑﺖ ﻣﻦ ﺍﻟﻮﺭﺩ ﻭﻗﻌﺪﺕ ﺗﺸﻢ ﻓﻴﻪ ﻭﻫﻮ ﻳﺘﺄﻣﻞ ﻓﻴﻬﺎ ﺑﻌﺪﻳﻦ ﻗﺎﻝ : ﻓﻲ ﺳﺆﺍﻝ ﻓﻲ ﺑﺎﻟﻲ ﻣﻦ ﻣﺪﻩ ﻧﺒﻲ ﻧﻄﺮﺣﻪ ﻋﻠﻴﻚ .
ﺍﻣﻴﺮﻩ ﺷﺒﺤﻠﺘﻪ ﻭﺑﻀﺤﻜﻪ : ﺍﻃﺮﺣﻪ ﻳﺎﺳﻴﺪﻱ ..
ﺿﺤﻚ ﺳﺮﻣﺪ ﺑﻌﺪﻳﻦ ﻗﺎﻝ : ﺧﻮﻙ ﻣﻨﺬﺭ ... ﺷﻦ ﻳﻌﻨﻴﻠﻚ ..
ﺍﻣﻴﺮﺓ ﻭﺟﻬﻬﺎ ﺗﻐﻴﺮ : ﺑﺼﺮﺍﺣﻪ .. ﻭﻻﺷﻲ .. ﺍﻧﻲ ﻣﺎﻭﻋﻴﺘﺶ ﻉ ﺍﻟﺪﻧﻴﺎ ﻭﻫﻮ ﻣﻌﺎﻧﺎ .. ﻛﻞ ﺍﻟﻠﻲ ﻧﻌﺮﻓﻪ ﻋﻨﻪ ﺍﻧﻪ ﺷﺨﺺ ﻣﺶ ﻛﻮﻳﺲ ﻭﻋﺎﻕ ﻭﻣﺠﺮﻡ .. ﻭﻳﺎﻣﺎ ﺟﺎﻧﺎ ﻣﻨﻪ ..
ﺳﺮﻣﺪ ﺑﻠﻊ ﺭﻳﻘﻪ ﺑﺘﻮﺗﺮ : ﻳﻌﻨﻲ ... ﻟﻮ ﻗﺎﻟﻮﻟﻚ ﺗﺴﺎﻣﺤﻴﻪ ..
ﻗﻄﻌﺖ ﻋﻠﻴﻪ : ﻻﻧﺒﻲ ﻧﺴﺎﻣﺤﻪ ﻭﻻﻧﻌﺮﻓﻪ ﺑﺎﻟﻠﻪ ﻋﻠﻴﻚ ﻏﻴﺮ ﺍﻟﺴﻴﺮﺓ ..
ﺳﺮﻣﺪ : ﺧﻼﺹ ﺧﻼﺹ ... ﺍﺳﻒ ﻟﻮﺿﺎﻳﻘﺘﻚ .. ﺣﻘﻚ ﻋﻠﻴﺎ ..
ﺍﻣﻴﺮﻩ ﻗﺎﻋﺪﺓ ﻣﺘﻀﺎﻳﻘﻪ ...
ﺳﺮﻣﺪ : ﻳﻌﻄﻴﻨﻲ ﻛﻴﻪ ﻭﻟﻔﻌﻴﻪ ﻣﻠﻮﻳﻪ ﻉ ﻗﻮﻟﺖ ﺃﻣﻲ ... ﻹﻧﻲ ﺿﺎﻳﻘﺘﻚ ..
ﺍﻣﻴﺮﻩ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻪ .. ﺑﻌﻴﺪ ﺍﻟﺴﻮ ﻋﻠﻴﻚ ..
ﺳﺮﻣﺪ ﺑﺈﺑﺘﺴﺎﻣﻪ : ﺧﻔﺘﻲ ﻋﻠﻴﺎ !!
ﺍﻣﻴﺮﻩ ﺑﺨﺠﻞ : ﺍﻣﻤﻢ ... ﺍﻳﻪ ..
ﺳﺮﻣﺪ : ﻋﻼﺵ ..
ﺍﻣﻴﺮﻩ ﺑﺨﺠﻞ : ﻫﻜﻲ ..
ﺳﺮﻣﺪ : ﻛﻴﻒ ﻫﻜﻲ ؟
ﺍﻣﻴﺮﺓ : ﺳﺮﺭﺭﻣﺪ !!
ﺳﺮﻣﺪ : ﺍﺭﺟﻮﻙ ﻓﺮﺣﻲ ﻗﻠﺒﻲ .. ﺣﺴﺴﻴﻨﻲ ﺍﻥ ﻣﺸﺎﻋﺮﻱ ﻣﺶ ﻣﻦ ﻃﺮﻓﻲ ﺑﺲ ..
ﺍﻣﻴﺮﻩ ﺷﺒﺤﺘﻠﻪ : ﻋﻼﺵ ﺍﻧﻲ .... ؟ﺍﻧﺖ ﺣﻮﺍﻟﻴﻚ ﺍﻟﻒ ﺑﻨﺖ ﻳﺘﻤﻨﻮﺍ ﺗﺸﺒﺤﻠﻬﻢ .. ﻋﻼﺵ ﺍﺧﺘﺮﻧﻲ ﺍﻧﻲ ﻣﻨﻬﻢ ﻛﻠﻬﻢ ...
ﺳﺮﻣﺪ ﺍﺑﺘﺴﻢ : ﺍﻟﺤﺐ ﻣﺶ ﺑﺎﻷﺧﺘﻴﺎﺭ ... ﺍﻟﺤﺐ ﺣﺎﺟﻪ ﺗﻔﺮﺽ ﻓﺮﺽ .. ﻭﻗﻠﺒﻲ ﺍﺳﺘﺴﻠﻢ .. ﺍﻧﺘﻲ ﺍﺣﻠﻰ ﺣﺎﺟﻪ ﺻﺎﺭﺕ ﻓﻘﺪﺭﻱ ...
ﺍﺣﻠﻰ ﺷﻲ ﺍﻧﺠﺒﺮﺕ ﻋﻠﻴﻪ ﻓﻲ ﻫﺎﻟﺪﻧﻴﺎ .. ﺍﻧﺘﻲ .. ﺍﻟﺤﺎﺟﻪ ﺍﻟﻮﺣﻴﺪﻩ ﺍﻟﺤﻠﻮﻩ ﻓﻲ ﺣﻴﺎﺗﻲ ﻛﻠﻬﺎ ..
ﺃﻣﻴﺮﺓ ﺗﺸﺒﺢ ﻟﻌﻴﻮﻧﻪ ﻧﻈﺮﺗﻬﻢ ﻛﺎﻧﺖ ﻏﻴﻴﻴﻴﺮ .. ﺣﺘﻰ ﺍﻟﺸﻲ ﺍﻟﻠﻲ ﺗﺸﻮﻑ ﻓﻴﻪ ﻓﻌﻴﻮﻧﻪ ﻳﺨﻮﻓﻬﺎ ﻣﺎﺷﺎﻓﺘﺎﺵ ﻫﺎﻟﻤﺮﻩ ..
ﺍﻣﻴﺮﻩ ﻗﻠﺒﻬﺎ ﻳﺪﻕ ﺑﻘﻮﺓ ﻭﻣﺸﺎﻋﺮﻫﺎ ﻣﻦ ﻗﻮﺗﻬﺎ ﺧﻠﺘﻬﺎ ﺗﺘﺸﺠﻊ ..
ﺍﻣﻴﺮﻩ : ﻧﺤﺒﻚ ...
ﺳﺮﻣﺪ ﻗﺮﻳﺐ ﻣﺎﺕ ﻣﻦ ﺗﺄﺛﻴﺮ ﺍﻟﻜﻠﻤﻪ ﻗﻠﺒﻪ ﻳﺮﻛﺐ ﻭﻳﻨﺰﻝ ... ﻭﺍﻧﻔﺎﺳﻪ ﺗﺴﺎﺭﻋﺖ ﺑﻘﻮﺓ ...
ﺍﻣﻴﺮﻩ ﺭﻛﺰﺕ ﻋﻠﻴﻪ ﻭﻓﻀﻠﺖ ﺍﻹﻧﺴﺤﺎﺏ .. ﻃﻠﻌﺖ ﺟﺮﻱ ﻣﻦ ﺑﺤﺪﺍﻩ ﻭﻫﻮ ﻗﺎﻋﺪ ﺟﺎﻣﺪ ﻓﻤﻜﺎﻧﻪ "... ﺁﺍﺍﺍﺍﻩ ... ﻟﻮ ﻧﻤﻮﺕ ﺑﻌﺪ ﺍﻟﻠﺤﻈﻪ ﻫﺎﺩﻱ ﺍﺣﻠﻰ ﺧﺘﺎﻡ ﻟﺤﻴﺎﺗﻚ ﻳﺎﺳﺮﻣﺪ ... ﺍﻫﺪﺍ ﻳﺎﻗﻠﺒﻲ ﺧﻴﺮﻙ ..."..
ﻗﻌﺪ ﻳﻀﺤﻚ .. ﻭﺯﺍﺩ ﺍﻟﻀﺤﻚ .. ﻭﻋﻠﻲ ﺻﻮﺗﻪ ﻭﻫﻮ ﻳﻀﺤﻚ ...
ﻓﺮﺣﺎﻥ ﺑﺸﻜﻞ ﻏﺮﻳﺐ ...
💕 ﻓﺎﺗﺖ ﻫﺪﻳﻜﺎ ﺍﻟﻠﻴﻠﻪ ﻉ ﻋﻠﻴﺎ ﻭﻫﻲ ﻓﺮﺣﺎﻧﻪ ﻭﻓﻲ ﺩﺍﺧﻠﻬﺎ ﺃﻣﻞ ﻛﺒﻴﺮ ﻓﺒﺮﺍﺀﺓ ﺯﻭﺟﻬﺎ ﻭ ﺣﺒﻴﺒﻬﺎ ﻭﺭﺟﻮﻋﻪ ﻟﻴﻬﺎ ..
ﻉ ﺃﻣﻴﺮﻩ ﻭﻫﻲ ﺗﻔﻜﺮ ﻓﻲ ﺍﻟﻠﻲ ﺻﺎﺭ ﺍﻟﻴﻮﻡ ﻭﻣﺶ ﻣﺼﺪﻗﻪ ﻛﻴﻒ ﺍﻋﺘﺮﻓﺖ ﻟﺴﺮﻣﺪ ... ﺑﺮﻏﻢ ﺍﻧﻬﺎ ﻭﻗﻔﺖ ﻋﻨﺪ ﺳﺆﺍﻟﻪ ﻉ ﺧﻮﻫﺎ .. ﻭﻗﺎﻟﺖ ﻓﻲ ﻧﻔﺴﻬﺎ " ﻋﻼﺵ ﺳﺄﻟﻨﻲ ﻋﻦ ﻣﻨﺬﺭ " ﻭﻣﺎﻟﻘﺘﺶ ﺍﺟﺎﺑﻪ ﻟﻬﺎﻟﺴﺆﺍﻝ ...
ﻭﺳﺮﻣﺪ ﺍﻟﻠﻲ ﺍﻧﻌﺰﻝ ﻉ ﺍﻟﻌﺎﻟﻢ ﻭﻗﻌﺪ ﻫﺎﻳﻢ ﻓﻲ ﺍﻟﻌﺎﻟﻢ ﻣﺘﺎﻋﻪ ﻋﺎﻟﻢ ﺍﻣﻴﺮﻩ ﺍﻟﻠﻲ ﻗﺎﻋﺪ ﻣﻐﻤﺾ ﻋﻴﻮﻧﻪ ﻭﻳﺬﻛﺮ ﻓﻴﻬﺎ ﻟﻤﺎﺷﺪﺕ ﺍﻳﺪﻩ ﻭﺍﻋﺘﺮﻓﺘﻠﻪ ﺑﺤﺒﻬﺎ ﻧﺎﺳﻲ ﻛﻞ ﺷﻲ ﻛﻞ ﺷﻲ ....
ﻭﻉ ﺭﻳﺤﺎﻧﻪ ﻋﻜﺴﻬﻢ .. ﺍﻟﻠﻲ ﻛﺎﻧﺖ ﺗﻔﻜﺮ ﺑﻄﺮﻳﻘﻪ ﺗﺤﻂ ﻓﻴﻬﺎ ﺣﺪ ﻟﺒﻮﻫﺎ ﻭﻋﻤﻬﺎ ﺑﺲ ﻣﺶ ﻋﺎﺭﻓﻪ ﺷﻨﻮ ﺍﺍﻟﻠﻲ ﻻﺯﻡ ﺍﺩﻳﺮﻩ ﺑﺎﻟﺰﺑﻂ ...
***
ﺍﻟﻴﻮﻡ ﺍﻟﻠﻲ ﺑﻌﺪﻩ ...
ﻣﻨﺼﻒ ﻓﻲ ﻣﻜﺘﺒﻪ ﻭﻣﻌﺎﻩ ﻣﻮﻛﻠﻪ ..
ﻣﻨﺼﻒ : ﻧﺨﺪﻣﻚ ﺑﻌﻴﻮﻧﻲ ..
ﺍﻟﻤﻮﻛﻠﻪ ﺑﺸﺨﻠﻌﻪ : ﻳﺴﻠﻤﻮﺍ ﻋﻴﻮﻧﻚ ﺍﻟﺤﻠﻮﺍﺕ ..
ﻣﻨﺼﻒ ﺍﺑﺘﺴﻢ ﺑﺨﺒﺚ ..
ﻓﺠﺄﻩ ﺍﻧﻔﺘﺢ ﺍﻟﺒﺎﺏ ﺑﻘﻮﺓ ﻟﻴﻦ ﺗﻘﺮﺑﻊ ...
ﻫﻮ ﺍﻧﺼﺪﻡ ...
ﺍﻟﺴﻜﺮﺗﻴﺮﻩ : ﺍﺳﻔﻪ ﺑﺲ ﻫﻲ ﺍﺻﺮﺕ ﺗﺨﺶ ..
ﻣﻨﺼﻒ ﻧﺎﺽ ﻭﻗﻒ : ﺗﻤﺎﻡ ﻣﺎﻓﻴﺶ ﻣﺸﻜﻠﻪ ...
ﻃﻠﻌﺖ ﺍﻟﺴﻜﺮﺗﻴﺮﻩ ..
ﻋﻠﻴﺎ : ﻧﺒﻲ ﻧﻜﻠﻤﻚ ﺷﻮﻳﻪ ..
ﺍﻟﻤﻮﻛﻠﻪ ﻧﺎﺿﺖ : ﺗﻤﺎﻡ ﺍﻧﻲ ﻧﺴﺘﺄﺫﻥ .. ﻧﺘﻼﻗﻮﺍ .. ﻣﻴﻨﻮ .. ﻭﻃﻠﻌﺖ ﻭﻫﻲ ﺗﻤﺸﻲ ﺑﻤﻴﺎﻋﻪ ..
ﻋﻠﻴﺎ ﺍﺑﺘﺴﻤﺖ ﺑﺘﻬﻜﻢ ...
ﻣﻨﺼﻒ ﺍﺑﺘﺴﻢ ﺑﺨﺒﺚ ﻭﻗﺎﻝ : ﻏﺮﺗﻲ ..
ﻋﻠﻴﺎ ﺷﺒﺤﺘﻠﻪ : ﻟﻴﻚ ﻳﺪ ﻓﻲ ﺍﻟﻠﻲ ﺻﺎﻳﺮ ﻟﺮﺍﺟﻠﻲ ..
ﻣﻨﺼﻒ ﺣﺮﻗﺎﺗﻪ ﻛﻠﻤﺔ ﺭﺍﺟﻠﻲ .. ﻣﺸﻲ ﻗﻌﻤﺰ ﻭﺭﺍ ﻣﻜﺘﺒﻪ ...
ﻣﻨﺼﻒ ﺗﻬﻜﻤﺎ : ﺭﺍﺟﻠﻚ ... ﺍﻫﺎ ﻫﺬﺍ ﺍﻟﻠﻲ ﺍﻧﺤﺒﺲ ﺑﺘﻬﻤﺔ ﻗﺘﻞ ﻋﺸﻴﻘﺘﻪ ...
ﻋﻠﻴﺎ ﺿﺤﻜﺖ ﻭﻗﺪﻣﺖ : ﺭﻣﺘﻨﻲ ﺑﺪﺍﺋﻬﺎ ﻭﺍﻧﺴﻠﺖ .. ﺍﻟﺤﺎﺟﺎﺕ ﻫﺎﺩﻱ ﺧﻼﻫﺎ ﻟﻴﻚ .. ﻫﻮ ﺍﺷﺮﻑ ﻣﻦ ﺍﻧﻪ ﻳﻔﻜﺮ ﺣﺘﻰ ﻣﺠﺮﺩ ﺍﻟﺘﻔﻜﻴﺮ ﻓﻲ ﺍﻟﺪﻧﺎﺀﺍﺕ ﻫﺎﺩﻱ ... ﺍﻟﻤﻬﻢ .. ﻧﺒﻲ ﻧﻌﺮﻑ ... ﺍﻧﺖ ﻭﺭﺍ ﺭﻓﺾ ﺍﻟﻤﺤﺎﻣﻴﻴﻦ ﻟﻘﻀﻴﺘﻪ ..
ﻣﻨﺼﻒ ﻛﻼﻣﻬﺎ ﺣﺎﺭﻗﻪ ﻭﻗﺎﻝ ﺑﺤﺪﻩ : ﻗﺘﻠﻚ ﻗﺒﻞ ﻗﻀﻴﺘﻪ ﺧﺎﺳﺮﺓ ..
ﻗﺎﻃﻌﺎﺗﻪ : ﺍﻟﻜﻼﻡ ﻫﺬﺍ ﻣﺎﻳﺨﺸﻠﻴﺶ ﺭﺍﺱ ﻭﺍﻧﻲ ﻣﺘﺄﻛﺪﻩ ﺍﻧﻚ ﺍﻧﺖ ﺍﻟﻠﻲ ﻭﺭﺍﻫﺎ ... ﻗﺪﻣﺖ ﻭﺧﺒﻄﺖ ﺑﺈﻳﺪﻫﺎ ﻉ ﻣﻜﺘﺒﻪ ﺑﻘﻮﺓ .. ﺍﺳﻤﻊ ﺍﺑﻌﺪ ﻋﻦ ﺍﻟﺤﺴﻦ .. ﻭﺃﻻ ﻭﺍﻟﻠﻪ ﺍﻟﻌﻈﻴﻢ ﻧﺪﻣﺮﻙ ﻭﻧﻨﻬﻴﻚ ..
ﻣﻨﺼﻒ ﺑﺴﺨﺮﻳﻪ : ﺍﻟﻜﻼﻡ ﻛﺒﻴﺮ ﻋﻠﻴﻚ ﻫﻠﺒﻪ ﻳﺎﺣﺒﻲ ..
ﻋﻠﻴﺎ ﺑﻘﺮﻑ : ﺍﻟﻠﻪ ﻳﻘﺮﻓﻚ ﻗﺮﻓﺘﻨﻲ ... ﺍﻛﺜﺮ ﻣﺎﻧﻲ ﻗﺎﺭﻓﻪ ﻣﻨﻚ .. ﻭﺑﻤﻜﺮ ... ﺑﻌﺪ ﺗﻔﺮﺟﺖ ﻉ ﻓﻴﺪﻳﻮﺍﺗﻚ ﻭﻓﻀﺎﻳﺤﻚ ﻓﻲ ﺑﺎﺭﺍﺕ ****** ﻭﻓﻲ ﻓﻨﺎﺩﻕ ﺩﺑﻲ .. ﻭﻭﻭ .. ﻭﻻﺑﻼﺵ ..
ﻣﻨﺼﻒ ﻣﻨﺼﺪﻡ ﺑﻘﻮﺓ ..
ﻋﻠﻴﺎ : ﻛﻠﻪ ﻋﻨﺪﻱ ﺑﺎﻟﺼﻮﺕ ﻭﺍﻟﺼﻮﺭﺓ .. ﻳﻌﻨﻲ ﻟﻮ ﻓﻜﺮﺕ ﻧﺰﻟﻬﻢ ﻗﺪﺍﺵ ﻳﺤﺼﻠﻮﺍ ﻣﺸﺎﻫﺪﻩ ﻉ ﺍﻟﻴﻮﺗﻴﻮﺏ .. ﻭﻻﻳﻜﺎﺕ ﻭﻛﻮﻣﻨﺘﺎﺕ ﻓﻲ ﺍﻟﻔﻴﺲ .. ﺍﻭﻭﻭﻭ ﻻﻻ .. ﻓﻀﻴﺤﻪ ﺑﺠﻼﺟﻞ ..
ﻣﻨﺼﻒ ﻣﺶ ﻗﺎﺩﺭ ﻳﺮﺩ ﻣﻦ ﺻﺪﻣﺘﻪ ..
ﻋﻠﻴﺎ ﺑﺤﺰﻡ : ﻗﺴﻤﺎ ﺑﺮﺏ ﺍﻟﻜﻮﻥ .. ﻛﺎﻥ ﻣﺎﺻﻠﺤﺘﺶ ﺍﻟﻠﻲ ﺩﺭﺗﻪ ﻭﺣﻮﻟﺖ ﻣﻦ ﻃﺮﻳﻖ ﺍﻟﺤﺴﻦ .. ﻣﻈﺎﻟﻪ ﺇﻻ ﻧﺎﻫﻴﺎﺗﻚ .. ﻭﻟﻔﺖ ﻭﻃﻠﻌﺖ ﻭﻗﺮﺑﻌﺖ ﺍﻟﺒﺎﺏ ﻭﺧﻼﺗﻪ ﻗﺮﻳﺐ ﻳﻨﺸﻞ ﻣﻦ ﺍﻟﺼﺪﻣﻪ ...
***
ﺍﺣﻤﺪ ﻣﺸﻲ ﻟﻠﺤﺴﻦ ﺯﻳﺎﺭﺓ ﻭﻓﻬﻤﻪ ﺍﻟﻠﻲ ﺻﺎﺭ .. ﻭﺍﻟﺤﺴﻦ ﻭﻛﻞ ﺍﺣﻤﺪ ﺑﻤﻬﻤﻪ ﻓﺎﺟﺌﺖ ﺍﺣﻤﺪ ﻫﻠﺒﻪ ﻭﻟﻤﺎ ﺳﺄﻟﻪ ﻋﻦ ﺍﻟﺴﺒﺐ .. ﻗﺎﻟﻪ " ﺑﻌﺪﻳﻦ ﺗﻌﺮﻑ .."
ﻃﻠﻊ ﺍﺣﻤﺪ ﻣﻦ ﻋﻨﺪﻩ ﻳﻮﻣﻬﺎ ﻭﻫﻮ ﻳﻔﻜﺮ ﻫﻠﺒﻪ .. ﻭﻓﺪﻣﺎﻏﻪ ﺃﻟﻒ ﺷﻲ ..
ﻣﺮﻭﺍ ﺗﺤﺪﻳﺪﺍ ﻳﻮﻣﻴﻦ ﻭﻭﻛﻠﻮﺍ ﻣﺤﺎﻣﻲ ﻛﺒﻴﺮ ﻛﺎﻥ ﻣﺴﺎﻓﺮ ﺑﺮﺍ ﺍﻟﺒﻼﺩ ﻣﺎﻛﺎﻧﺶ ﻳﻌﺮﻑ ﻫﻠﺒﻪ ﻋﻦ ﺍﻟﻘﻀﻴﻪ ﺷﺮﺣﻠﻪ ﺃﺣﻤﺪ ﺣﻴﺜﻴﺎﺗﻬﺎ ﻛﺎﻣﻠﻪ .. ﻭﻫﻮ ﻭﺍﻓﻖ ﻳﺴﺘﻠﻤﻬﺎ .. ﻭﻗﺪﻡ ﻉ ﺍﻟﻨﻘﺾ ﻓﻲ ﺣﻜﻢ ﺍﻷﻋﺪﺍﻡ ﻭﻗﺒﻼﺗﻪ ﺍﻟﻤﺤﻜﻤﻪ
...
ﻣﺤﻤﺪ : ﺍﻟﻤﺤﺎﻣﻲ ﻫﺬﺍ ﺧﻄﻴﺮ ﻫﻠﺒﻪ ..
ﺳﺮﻣﺪ : ﻣﺤﻤﺪ ﻣﺎﺗﻮﺗﺮﺵ .. ﺍﺣﻨﻲ ﻣﺎﺷﻴﻴﻦ ﻓﻲ ﺍﻟﺴﻠﻴﻢ ﻟﻮ ﻳﺠﻴﺒﻮﺍ ﻣﻴﺔ ﻣﺤﺎﻣﻲ .. ﺍﻛﺜﺮ ﺷﻲ ﻳﻘﺪﺭ ﻳﺪﻳﺮﻩ ﺍﻧﻪ ﻳﺨﻔﻒ ﺍﻟﺤﻜﻢ ﻣﻦ ﺍﻋﺪﺍﻡ ﻟﻤﺆﺑﺪ .
***
ﻛﺎﻥ ﻣﻘﻌﻤﺰ ﻓﻲ ﺍﻟﻤﻬﺠﻊ ﻛﺎﻧﻮﺍ ﺍﻟﻤﺴﺎﺟﻴﻦ ﻫﺎﻳﺒﻨﻪ ﻭﻣﺤﺘﺮﻣﻴﻨﻪ ﻫﻠﺒﻪ .. ﻛﺎﻥ ﻳﻘﺮﺃ ﻓﻲ ﺍﻟﻘﺮﺁﻥ ﻟﻴﻪ ﺍﻧﻔﺘﺢ ﺑﺎﺏ ﺍﻟﻤﻬﺠﻊ ..
ﺍﻟﺤﺎﺭﺱ : ﺍﻟﺤﺴﻦ ﺍﻟﺼﺎﺩﻕ ... ﺯﻳﺎﺭﺓ ..
ﻧﺎﺽ ﺍﻟﺤﺴﻦ ﻭﻃﻠﻊ ﻣﻌﺎﻩ ... ﻭﻓﺒﺎﻟﻪ ﺍﻥ ﺍﻟﻠﻲ ﺟﺎﻳﻪ ﺍﺣﻤﺪ ...
ﻭﺻﻞ ﻟﻠﻤﻜﺎﻥ ﺍﻟﻠﻲ ﻓﻴﻪ ﺍﻟﺰﻳﺎﺭﻩ ﻭﻛﺎﻥ ﺍﻧﻔﺮﺍﺩﻱ ... ﺍﻧﻔﺘﺢ ﺍﻟﺒﺎﺏ ﻭﺧﺶ ... ﻭﺍﻧﺼﺪﻡ ...
ﺍﻟﺤﺎﺭﺱ ﻃﻠﻊ ﻭﺻﻜﺮ ﺍﻟﺒﺎﺏ ...
ﺍﻟﺤﺴﻦ ﺑﻐﻀﺐ : ﺍﻧﺘﻲ ﺷﻦ ﺩﻳﺮﻱ ﻫﻨﻲ ...
ﻋﻠﻴﺎ : ﻧﺒﻴﻊ ﻓﻲ ﺧﻀﺮﺍ ..
ﺍﻟﺤﺴﻦ : ﻋﻠﻴﺎﺍﺍ ..
ﻋﻠﻴﺎ ﺑﻌﺘﺐ : ﻫﻜﻲ ﺗﺴﺘﻘﺒﻠﻨﻲ ﺑﻌﺪ 59 ﻳﻮﻡ ﻭ 11 ﺳﺎﻋﻪ ﻭ 10 ﺩﻗﺎﻳﻖ ﻓﺮﺍﻕ ..
ﺍﻟﺤﺴﻦ ﺭﻓﻊ ﺣﺎﺟﺒﻪ ﺍﻟﻴﺴﺎﺭ : ﻭﻫﺎﺩﻭﺍ ﺣﺴﺒﺘﻴﻬﻢ ﺑﺎﻟﺨﻄﺎﻥ ﻉ ﺍﻟﺤﻴﻂ ﻭﻻﻭﻓﻲ ﺍﻟﻜﺮﺍﺳﻪ ..
ﻋﻠﻴﺎ ﺑﺤﺐ : ﺣﺴﺒﺘﻬﻢ ﻓﻘﻠﺒﻲ ..
ﺍﻟﺤﺴﻦ ﺗﻨﻬﺪ ﻭﻗﻌﻤﺰ ﻣﻘﺎﺑﻠﻬﺎ : ﺷﻦ ﺍﻟﻤﻼﻳﻪ ﻭﺍﻟﺨﻤﺎﺭﺍﻟﻠﻲ ﻻﺑﺴﺘﻴﻬﻢ ﻫﺎﺩﻡ ..
ﻋﻠﻴﺎ : ﻟﺰﻭﻡ ﺍﻟﺠﻴﺔ ﻫﻨﻲ ..
ﺍﻟﺤﺴﻦ : ﺍﻛﻴﺪ ﺭﻓﻌﺘﻲ ﺍﻟﺨﻤﺎﺭ ﻉ ﻭﺟﻬﻚ ﺑﺶ ﻳﺘﺄﻛﺪﻭﺍ ﻣﻨﻚ ..
ﻋﻠﻴﺎ : ﻻ ﻛﺎﻥ ﻓﻲ ﻭﻛﻴﻞ ﺍﻟﻨﻴﺎﺑﻪ ﺟﻲ ﻣﻌﺎﻧﺎ ﺍﻧﻲ ﻭﻣﺼﻌﺐ .. ﺧﺸﻴﺖ ﻃﻮﻝ ..
ﺍﻟﺤﺴﻦ ﺍﺑﺘﺴﻢ ﻉ ﺟﻨﺐ : ﻳﻌﻨﻲ ﻣﺎﺻﺪﻗﺘﻴﺶ ﺍﻟﻠﻲ ﺍﻧﻘﺎﻝ ..
ﻋﻠﻴﺎ : ﻟﻮ ﻋﻴﻮﻧﻲ ﺷﺎﻓﻮﺍ ﺣﻨﻜﺬﺑﻬﻢ ..
ﺍﻟﺤﺴﻦ : ﻫﺪﻱ ﻳﺎﻫﻮﻭﻭ ... ﻭﺯﻉ ﻧﻈﺮﻩ ﻉ ﺍﻟﻤﻜﺎﻥ ... ﻣﺎﻳﺠﻴﺶ ﺑﻜﻞ ..
ﻋﻠﻴﺎ ﺿﺤﻜﺖ ﺑﺨﺠﻞ ﺭﻛﺰﺕ ﻉ ﻟﺤﻴﺘﻪ : ﻋﻨﺪﻙ ﻋﻠﻢ ﺗﻬﺒﻞ ﺑﺎﻟﻠﺤﻴﻪ ..
ﻭﺷﻌﺮﻙ ﻛﻴﻒ ﻃﻮﻝ .. ﻣﻨﻈﺮﻙ ﻳﺠﻨﻨﻦ .. ﺍﺳﻤﻊ ﺗﻄﻠﻊ ﻣﻦ ﻫﻨﻲ ﺗﻘﺺ ﻭﺗﺤﻠﻖ .. ﻣﻦ ﻏﻴﺮﻫﻢ ﺍﺭﺣﻢ ...
ﺍﻟﺤﺴﻦ ﺑﻀﺤﻜﻪ : ﻏﻴﺮ ﻧﻄﻠﻊ ..
ﻋﻠﻴﺎ ﺣﻄﺖ ﺍﻳﺪﻫﺎ ﻉ ﺍﻳﺪﻩ : ﺑﺄﺫﻥ ﺍﻟﻠﻪ ﺣﺘﻄﻠﻊ ﺯﻱ ﻣﺎﻃﻠﻊ ﺳﻴﺪﻧﺎ ﻳﻮﺳﻒ ﻣﻦ ﺳﺠﻨﻪ ﻣﻌﺰﺯ ﻣﺮﻓﻮﻉ ﺍﻟﺮﺍﺱ ..
ﺍﻟﺤﺴﻦ ﻗﺎﻡ ﺍﻳﺪﻫﺎ ﻭﺑﺎﺳﻬﺎ ﺑﻌﻤﻖ ﻭﻫﻮ ﻣﻐﻤﺾ ﻋﻴﻮﻧﻪ ﻭﻋﻠﻴﺎ ﺗﺸﺒﺤﻠﻪ ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ...
ﺍﻟﺤﺴﻦ : ﺍﺍﺍﺍﻩ .. ﺍﺳﺘﺎﺣﺸﺘﻚ ﻓﻮﻕ ﻣﺎﺗﺘﺼﻮﺭﻱ .
ﻋﻠﻴﺎ : ﻣﺶ ﺍﻛﺜﺮ ﻣﻨﻲ .
ﺍﻟﺤﺴﻦ : ﺍﻧﻲ ﺍﻛﺜﺮ ..
ﻋﻠﻴﺎ : ﻻﺍﻧﻲ ﺍﻛﺜﺮ ..
ﺍﻟﺤﺴﻦ : ﺍﻧﻲ ﻣﻦ ﻟﻤﺎ ﺍﻧﺤﺒﺴﺖ ﺣﺘﻰ ﺻﻮﺭﺓ ﻣﻨﻚ ﻣﺎﻋﻨﺪﻳﺶ .. ﻭﺍﻧﺘﻲ ﻋﻨﺪﻙ ﺻﻮﺭ ﻭﻓﻴﺪﻳﻮﺍﺕ ﻫﺬﺍ ﻏﻴﺮ ﺍﻟﺘﻠﻔﺰﻳﻮﻥ ..
ﻳﻌﻨﻲ ﺍﻧﻲ ﺍﻛﺜﺮ ..
ﻋﻠﻴﺎ : ﺑﺎﻟﻌﻜﺲ ﻭﻳﻦ ﻣﺎﻧﺸﻮﻓﻚ ﻓﻲ ﺻﻮﺭﺓ ﺍﻭ ﻏﻴﺮﻫﺎ ﻳﺰﻳﺪ ﺷﻮﻗﻲ ﺍﻛﺜﺮ ﻭﺍﻛﺜﺮ ..
ﺍﻟﺤﺴﻦ ﺍﺑﺘﺴﻢ : ﻛﺎﻥ ﻗﺪﺭﻟﻲ ﺭﺑﻲ ﻭﻃﻠﻌﺖ .. ﺣﺘﻌﺮﻓﻲ ﻣﻨﻲ ﺍﺳﺘﺎﺣﺶ ﺍﻟﺘﺎﻧﻲ ﺍﻛﺜﺮ ..
ﻋﻠﻴﺎ ﺿﺤﻜﺖ ﺑﺨﺠﻞ ﻭﻭﺟﻬﻬﺎ ﺍﺣﻤﺮ ..
ﺍﻟﺤﺴﻦ ﺑﺈﺑﺘﺴﺎﻣﻪ : ﺷﻦ ﺩﺍﻳﺮ ﻣﻌﺎﻙ ﺍﻟﻨﻔﺮ ﺍﻟﺜﺎﻟﺖ ..
ﻋﻠﻴﺎ ﺿﺤﻜﺖ : ﺍﻫﻮ ﻭﺣﻢ ﺑﺲ ﻣﺶ ﻗﻮﻱ ..
ﺍﻟﺤﺴﻦ : ﻉ ﺍﺳﺎﺱ ﻓﻬﻤﺖ ﺗﻮﺍ ... ﺍﻟﻤﻬﻢ ﺣﺎﻟﻜﻢ ﺑﺎﻫﻲ ..
ﻋﻠﻴﺎ : ﺍﻳﻪ ﺍﻟﺤﻤﺪ ﻟﻠﻪ ﺍﻃﻤﻦ ..
ﺍﻟﺤﺴﻦ : ﻋﻠﻴﺎ ﺩﻳﺮﻱ ﺑﺎﻟﻚ ﻉ ﺭﻭﺣﻚ ﺍﺭﺟﻮﻙ ...
ﻋﻠﻴﺎ : ﺍﻃﻤﻦ ﻳﺎﺭﻭﺡ ﻋﻠﻴﺎ .. ﺍﻧﻲ ﻛﻮﻳﺴﻪ ﻣﺎﺗﺨﺎﻓﺶ ...
ﻃﻖ ﺍﻟﺤﺎﺭﺱ ﻭﻓﺘﺢ ﺍﻟﺒﺎﺏ : ﺧﻼﺹ ﻭﻗﺖ ﺍﻟﺰﻳﺎﺭﺓﺗﻢ ...
ﻋﻠﻴﺎ ﻋﻴﻮﻧﻬﺎ ﺩﻣﻌﻮﺍ : ﺭﺩ ﺑﺎﻟﻚ ﻉ ﺭﻭﺣﻚ ..
ﺍﻟﺤﺴﻦ ﻓﻨﺺ ﻓﻴﻬﺎ ﻓﻬﻤﺖ ﻭﻧﺰﻟﺖ ﺧﻤﺎﺭﻫﺎ ... ﺍﺑﺘﺴﻢ ﻭﻃﻠﻊ ﻭﻫﻲ ﻃﻠﻌﺖ ﺑﻌﺪﻫﺎ ﻭﺩﻣﻮﻋﻬﺎ ﻣﺎﻭﻗﻔﻮﺵ ...
***
ﺑﺪﻱ ﺍﺣﻤﺪ ﺑﻤﻬﻤﺘﻪ ... ﺍﻟﻠﻲ ﻫﻮ ﻓﻜﺮ ﻓﻴﻬﺎ ﻭﻋﻄﻲ ﻋﻠﻢ ﺑﻴﻬﺎ ﻟﻠﻌﻤﻴﺪ ﻋﺎﺩﻝ .. ﻭﺍﻟﻠﻲ ﺍﻟﺤﺴﻦ ﺑﻨﻔﺴﻪ ﻃﻠﺒﻬﺎ ﻣﻨﻪ ...
ﻭﺍﻗﻒ ﻉ ﺩﺭﺍﺟﻪ ﺑﻤﺴﺎﻓﻪ ﺑﻌﻴﺪﻩ ﺷﻮﻱ ﻣﻦ ﺣﻮﺵ ﻋﻠﻲ ﺍﻟﺼﺎﺩﻕ ﺑﻌﺪ ﻏﻴﺮ ﺑﻤﻈﻬﺮﻩ ﺗﻤﺎﻣﺎ .. ﻛﺎﻥ ﻻﺑﺲ ﺳﻮﺭﻳﻪ ﻧﺺ ﻛﻢ ﺑﻮﺩﺭﻳﻪ ﻭﺷﺮﻁ ﺟﻴﻨﺰ ﻃﺎﻗﻴﻪ ﻭﻧﻈﺎﺭﺍﺕ ﻭﺳﻼﺳﻞ .. ﻭﺷﺒﺸﺐ ﺻﺒﻊ ...
ﻛﺎﻥ ﻳﺴﺘﻨﻰ ﻓﻲ ﻃﻠﻌﺔ ﺳﺮﻣﺪ ﻣﻦ ﺍﻟﺤﻮﺵ .. ﺍﺑﺘﺴﻢ ﻟﻤﺎ ﺷﺎﻑ ﺍﻧﻌﺎﻡ ﻃﺎﻟﻌﻪ ﻫﻲ ﺳﺎﺭﻩ ﻭﻣﺮﻋﻲ ﻗﻌﺪ ﻣﻌﺎﻫﺎ ﺑﻌﻴﻮﻧﻪ ﻟﻴﻦ ﺭﻛﺒﻮﺍ ﺍﻟﺴﻴﺎﺭﺓ ﻭﻣﺸﻮﺍ ... ﺷﻮﻳﻪ ﻭﺟﻲ ﺣﺴﺎﻥ ﻟﻠﺤﻮﺵ ﻭﺧﺶ ... ﺑﻌﺪﻫﺎ ﺷﺎﻑ ﻭﺍﺣﺪ ﻣﺎﺷﻲ ﻉ ﺭﺟﻠﻴﻪ ﺟﻲ ﻟﻠﺤﻮﺵ ﺭﻛﺰ ﻟﻘﺎﻩ ﻣﺤﻤﺪ ﻓﺘﺢ ﺍﻟﺒﺎﺏ ﻭﺧﺶ ... ﺑﻌﺪ ﺣﻮﺍﻟﻲ ﻋﺸﺮﺓ ﺩﻗﺎﻳﻖ ﺑﺎﻟﺰﺑﻂ ﻃﻠﻊ ﻫﻮ ﻭﺳﺮﻣﺪ ﻭﻉ ﻋﺠﻞ ﺭﻛﺒﻮﺍ ﺍﻟﺴﻴﺎﺭﺓ ... ﻭﺗﺤﺮﻛﻮﺍ ... ﻃﻠﻊ ﻭﺭﺍﻫﻢ ﺑﻤﺴﺎﻓﻪ ..
ﻓﻲ ﺍﻟﺴﻴﺎﺭﻩ ..
ﻣﺤﻤﺪ : ﻫﻮ ﻗﺎﻝ ﻳﺒﻲ ﻳﺸﻮﻓﻚ ..
ﺳﺮﻣﺪ : ﺍﻟﻔﺮﻋﻮﻥ ﺩﻳﻦ ﺍﻣﻪ ﻓﻠﻮﺱ ..
ﻣﺤﻤﺪ : ﺧﺴﺎﺭﺗﻪ ﻳﻮﻡ 3\29 ﻋﻮﺿﻨﺎﻫﺎ ﺷﻦ ﻣﺎﺯﺍﻝ ﻳﺒﻲ ..
ﺳﺮﻣﺪ : ﺻﻔﻘﺔ ﻭﻳﺒﻴﻨﻲ ﻧﺨﺶ ﻣﻌﺎﻩ ﻓﻴﻬﺎ ...
ﻣﺤﻤﺪ : ﻳﻌﻨﻲ ﻋﻨﺪﻙ ﻓﻜﺮﻩ ﺷﻦ ﻳﺒﻲ ﻣﻨﻚ ..
ﺳﺮﻣﺪ ﻫﺰ ﺭﺍﺳﻪ ﺑﺈﻳﺠﺎﺏ ...
ﺍﺣﻤﺪ ﻭﺭﺍﻫﻢ ﻭﺍﺧﺪ ﺍﺣﺘﻴﺎﻃﻪ ...
ﻭﻗﻔﺖ ﺍﻟﺴﻴﺎﺭﻩ ﻗﺪﺍﻡ ﻣﻮﻝ ﻛﺒﻴﺮ .. ﻧﺰﻝ ﺳﺮﻣﺪ ﺧﺶ ﻭﻣﺤﻤﺪ ﻗﻌﻤﺰ ﻣﻜﺎﻧﻪ ﻭﺗﺤﺮﻙ ﺑﺎﻟﺴﻴﺎﺭﻩ ..
ﺍﺣﻤﺪ ﺍﺳﺘﻐﺮﺏ ... ﺗﻮﺟﻪ ﻟﻠﻤﻮﻝ ﻭﻧﺰﻝ ﻭﺧﺶ ..
***
ﻋﻠﻴﻚ ﻣﻜﺎﻥ ﻣﻌﻔﻦ ﻭﺍﻟﻠﻲ ﻓﻴﻪ ﻛﻠﻬﻢ ﻣﻌﻔﻨﻴﻦ ﺣﺎﺷﺎ ﻭﻟﺪ ﻋﻤﻲ ..
ﺳﻬﻴﻞ ﺑﺮﻓﻌﺔ ﺣﺎﺟﺐ : ﺍﻧﺘﻲ ﻓﻴﻪ ﺗﻮﺍ
ﺭﻳﺤﺎﻧﻪ : ﻟﻮﻻ ﺍﻟﻈﺮﻭﻑ ﻣﺎﻛﻨﺖ ﺟﻴﺖ ﺍﺻﻼ ...
ﺳﻬﻴﻞ ﺍﺑﺘﺴﻢ : ﻳﺎﺍﺑﻨﻲ ﺍﻓﺘﺢ ﺍﻟﺒﺎﺏ .. ﻓﺘﺢ ﺍﻟﺤﺎﺭﺱ ﺑﺎﺏ ﻣﻜﺎﻥ ﺍﻟﺰﻳﺎﺭﺓ ﻭﺧﺸﺖ ﺭﻳﺤﺎﻧﻪ ...
ﺳﻬﻴﻞ : ﺷﻮﻳﻪ ﻭﺑﺠﻴﺒﻮﻩ ﻭﻃﻠﻊ ﻭﺻﻜﺮ ﺍﻟﺒﺎﺏ ..
ﺭﻳﺤﺎﻧﻪ : ﺧﻴﺮﻩ ﻗﺎﺭﻧﻬﻢ ﻭﻗﺎﻟﺐ ﺧﻠﻴﻘﺘﻪ ... ﻣﻔﺮﻭﺽ ﻳﻔﺮﻗﻮﺍ ﻓﻲ ﺍﻟﻤﻌﺎﻣﻠﻪ ﺑﻴﻦ ﺍﻟﻤﺠﺎﺭﻡ ﻭﻏﻴﺮﻫﻢ ..
***
ﺍﺣﻤﺪ ﻛﺎﻥ ﻭﺭﺍ ﺳﺮﻣﺪ ﻭﺳﺮﻣﺪ ﻣﺎﺣﺴﺶ ﺑﻴﻪ .. ﺑﺲ ﺑﻌﺪﻳﻦ ﺟﺎﻩ ﺷﻌﻮﺭ ﺍﻧﻪ ﻣﺮﺍﻗﺐ ... ﻏﻴﺮ ﻃﺮﻳﻘﻪ ﻭﺧﺶ ﻓﻲ ﺍﻟﺰﺣﻤﻪ .. ﻭﺍﺣﻤﺪ ﺷﺒﻪ ﺿﻴﻌﻪ .. ﻗﺎﻋﺪ ﻳﻤﺸﻲ ﻭﻳﺪﻭﺭ ﺑﺲ ﺑﺪﻭﻥ ﻣﺎﻳﻠﻔﺖ ﺍﻷﻧﺘﺒﺎﻩ .. ﺧﻼ ﺭﻭﺣﻪ ﻫﺎﺩﻱ ﻭﺍﻋﺘﻤﺪ ﻉ ﺣﺪﺳﻪ ﻭﻛﻤﻞ ﻃﺮﻳﻘﻪ ﻑ ﺟﻬﺔ ﻣﻌﻴﻨﻪ ... ﺗﻮﻗﻊ ﺍﻧﻪ ﻣﻤﻜﻦ ﻳﻜﻮﻥ ﺭﺍﻛﺐ ﺍﻟﺪﻭﺭ ﺍﻟﺘﺎﻧﻲ .. ﺭﻛﺐ ﺑﺎﻟﺴﻠﻢ ﺍﻟﻤﺘﺤﺮﻙ ... ﻭﻭﺻﻞ ﻭﻛﻤﻞ ﺑﺤﺚ ... ﻟﻤﺎ ﺷﺎﻑ ﺍﺻﻨﺼﻴﺮ ﺍﺗﻔﺎﺟﺄ ﻳﻌﻨﻲ ﺳﺮﻣﺪ ﻧﺰﻝ ﻣﻨﻪ .. ﻗﺎﻋﺪ ﻣﺎﺷﻲ ﺑﺄﺣﺒﺎﻁ ﻭﻳﻮﺯﻉ ﻓﻲ ﻧﻈﺮﻫﻊ ﺍﻟﻤﻜﺎﻥ ﺟﺖ ﻋﻴﻨﻪ ﻉ ﺍﻟﺮﻭﺷﻦ ﺷﺎﻑ ﻣﻨﻪ ﺷﻲ ﺧﻼﻩ ﻳﺘﻔﺎﺟﺄ
ﺍﻟﺴﺎﺣﻪ ﺍﺍﻟﻠﻲ ﻭﺭﺍ ﺍﻟﻤﻮﻝ ﻣﻦ ﺑﻌﻴﺪ ﺷﻮ ﻣﺪﺭﺳﻪ ﺳﻴﺎﺭﻩ ﺳﻮﺩﺍ ﻋﺎﻟﻴﻪ ﺑﺤﺪﺍﻩ ﻭﺍﺣﺪ ﺿﺨﻢ ﺍﻟﺠﺴﻢ .. ﺷﻮﻳﻪ ﻭﻟﻤﺢ ﻭﺍﺣﺪ ﻣﺘﻮﺟﻪ ﺟﻴﻬﺘﻬﻢ ﻻﺑﺲ ﺍﺳﻮﺩ ﻓﻲ ﺍﺳﻮﺩ ... ﻟﻤﺎ ﺟﻲ ﻳﺮﻛﺐ ﺍﻟﺴﻴﺎﺭﻩ ﺑﺎﻥ ﻭﺟﻬﻪ .. ﻓﺘﺢ ﺍﺣﻤﺪ ﻋﻴﻮﻧﻪ ﻉ ﻭﺳﻌﻬﻢ ﺑﺪﻫﺸﻪ ﺷﺪﻳﺪﻩ ... ﺑﻌﺪﻳﻦ ﺍﺑﺘﺴﻢ .. ﺯﻱ ﻣﺎﺗﻮﻗﻌﺖ ...
***
ﺟﺎﻳﻪ ﺑﺮﻭﺣﻚ ... ﺗﻮ ﻣﺶ ﺣﻼﻝ ﺍﻟﻮﺍﺣﺪ ﻳﺬﺑﺤﻚ ..
ﺭﻳﺤﺎﻧﻪ ﺑﺄﺑﺘﺴﺎﻣﻪ ﻣﺮﺗﺒﻜﻪ : ﻭﺗﺼﺒﺢ ﻓﻲ ﺟﺮﻳﻤﺘﻴﻦ .. ﻭﻳﻄﻠﻘﻮﺍ ﻋﻠﻴﻚ ﻟﻘﺐ ﺳﻔﺎﺡ ﺍﻟﻨﺴﺎﺀ ...
ﺍﻟﺤﺴﻦ ﺣﺮﻙ ﺭﺍﺳﻪ ﺍﻳﻤﻴﻦ ﻭﺍﻳﺴﺎﺭ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ ...
ﻋﻼﺵ ﺟﺎﻳﻪ ﺗﻜﻠﻤﻲ ..
ﺭﻳﺤﺎﻧﻪ : ﺍﻟﻠﻲ ﺣﺘﺴﻤﻌﻪ ﻣﻨﻲ ﻣﺶ ﺳﺎﻫﻞ ..
ﺍﻟﺤﺴﻦ ﺿﻴﻖ ﻋﻴﻮﻧﻪ : ﺧﺸﻲ ﻃﻮﻝ ﻓﻲ ﺍﻟﻤﻮﺿﻮﻉ ..
ﺭﻳﺤﺎﻧﻪ ﺗﻨﻬﺪﺕ .............:
***
ﺗﻮﺟﻪ ﺍﺣﻤﺪ ﻟﻠﻤﺮﻛﺰ ﺑﻌﺪ ﻏﻴﺮ ﺣﻮﺍﺟﻴﻪ ﻭﻫﻮ ﻓﺮﺣﺎﻥ ﺑﺎﻟﻨﺘﻴﺠﻪ ﺍﻟﻠﻲ ﻭﺻﻠﻠﻬﺎ ... ﺧﺶ ﻃﻮﻝ .. ﻭﻣﺸﻲ ﻟﻤﻜﺘﺐ ﺍﻟﻌﻤﻴﺪ ﻃﻖ ﺍﻟﺒﺎﺏ ﻭﺍﺩﻯ ﺍﻟﺘﺤﻴﻪ ..
ﻋﺎﺩﻝ : ﺻﺎﻳﺮ ﺷﻲ ..
ﺍﺣﻤﺪ : ﺍﻟﻠﻲ ﻓﺒﺎﻟﻲ ﻭﺑﺎﻟﻚ ﻃﻠﻊ ﺻﺢ ...
ﻋﺎﺩﻝ ﺍﺗﻔﺎﺟﺄ ﻭﺑﻌﺪﻳﻦ ﻫﺰ ﺭﺍﺳﻪ ﺑﺄﻳﺠﺎﺏ ...
***
ﻋﺎﺭﻑ ..
ﺭﻳﺤﺎﻧﻪ ﺑﺼﺪﻣﻪ ﺿﻴﻘﺖ ﻋﻴﻮﻧﻬﺎ : ﻉ .. ﻋﺎﺍ .. ﺭﻑ ..
ﺍﻟﺤﺴﻦ : ﺍﻳﻪ ... ﻗﺒﻞ ﻳﻮﻡ ﻣﻦ ﻗﺘﻞ ﻧﻬﻠﻪ ﻓﻼﺵ ﺑﺎﻙ ...
ﺍﻟﺤﺴﻦ ﻣﺎﺷﻲ ﻓﻲ ﺍﻟﻤﻤﺮ : ﺭﺑﻲ ﻳﻬﺪﻳﻚ ﻳﺎﻋﻠﻴﺎ ... ﻗﺪﺍﺵ ﺧﻴﻂ ﺷﺤﻦ ﺭﻳﺤﺎﺗﻪ ﻟﺘﻮﺍ ...
ﻭﻗﻒ ﻗﺪﺍﻡ ﺩﺍﺭ ﺳﺮﻣﺪ ﻓﺘﺤﻬﺎ ﻭﺍﺳﺘﻐﺮﺏ ﻛﻴﻒ ﺧﻼﻫﺎ ﻣﻔﺘﻮﺣﻪ ... ﻟﻤﺎ ﻣﺎﻟﻘﺎﺵ ﺍﻟﻼﺏ ﺗﻮﺏ ﺯﺍﻝ ﺍﺳﺘﻐﺮﺍﺑﻪ ..
ﻣﺸﻲ ﻟﻤﻜﺘﺒﻪ ﻓﺘﺢ ﻭﺍﺣﺪ ﻣﻦ ﺍﻟﻘﺠﺎﺭ ﻳﺪﻭﺭ ﻛﺎﻥ ﻓﻲ ﺷﺤﻦ ﻣﺎﻟﻘﺎﺵ ..
ﻓﺘﺢ ﺍﻟﻠﻲ ﻣﻦ ﺟﻬﻪ ﺍﻟﺘﺎﻧﻴﻪ .. ﻭﻫﻮ ﻳﺪﻭﺭ ﻟﻔﺖ ﺍﻧﺘﺒﺎﻫﻪ ﺯﻭﺯ ﺧﻮﺍﺗﻢ ﻓﻲ ﺍﻟﻘﺠﺮ ... ﻗﺎﻡ ﻭﺍﺣﺪ ... ﻟﻘﻲ ﻣﻨﻘﻮﺵ ﻋﻠﻴﻪ ﺍﺳﻢ ﺳﺮﻣﺪ ... ﺭﺩﻩ .. ﻗﺎﻡ ﺗﺎﻧﻲ ... ﻭﺍﻧﺼﺪﻡ ... ﻗﺮﺑﻪ ﻟﻴﻪ ﻗﻌﺪ ﻣﺮﻛﺰ ﻓﻴﻪ ﻫﻠﺒﻪ ... ﺣﻮﻝ ﻧﻈﺮﻩ ﻣﻦ ﻋﻠﻴﻪ ﻭﻫﻮ ﻳﻔﻜﺮ .. ﺑﻠﻊ ﺭﻳﻘﻪ ... ﻭﺣﺲ ﺑﺘﻔﻜﻴﺮﻩ ﺍﻧﺸﻞ ﺗﻤﺎﻣﺎ ... ﺭﺩ ﺍﻟﺨﺎﺗﻢ .. ﻭﻃﻠﻊ ﺑﺴﺮﻋﻪ ...
ﺍﻟﻮﻗﺖ ﺍﻟﺤﺎﺿﺮ ..
ﺍﻟﺤﺴﻦ : ﺻﺪﻓﺖ ﺍﻧﻲ ﻳﻮﻣﻬﺎ ﻛﻨﺖ ﺗﺤﺪﻳﺪﺍ ﻣﺎﺷﻲ ﻟﻤﺒﻨﻰ ﺍﻷﺳﺘﺨﺒﺎﺭﺍﺕ ﻧﺪﻭﺭ ﻉ ﻣﻠﻔﺎﺕ ﻗﺪﻳﻤﻪ ﻟﺸﻲ ﻳﺨﺺ ﺑﻮﻱ ﺳﻴﻒ .. ﻣﻦ ﺳﻨﻴﻦ ﻃﻮﻳﻠﻪ ... ﻣﻦ 2011 ﻓﺎﻟﺜﻮﺭﺓ ﺻﺎﺭﺕ ﻓﻲ ﺳﺮﻗﺔ ﺍﺗﻼﻑ ﻟﻤﻠﻔﺎﺕ ﻣﻦ ﻣﺒﻨﻰ ﺍﻹﺳﺘﺨﺒﺎﺭﺍﺕ ﺑﺲ ﻛﺎﻥ ﻓﻲ ﻇﺒﺎﻁ ﻗﺪﺭﻭﺍ ﻳﻨﻘﺬﻭﺍ ﺟﺰﺀ ﻛﺒﻴﺮ ﻣﻨﻬﺎ .. ﺧﺸﺖ ﻟﻸﺭﺷﻴﻒ .. ﻭﻗﻌﺪﺕ ﺍﻧﺪﻭﺭ ﻓﻲ ﻣﻠﻔﺎﺕ ﺗﺨﺺ ﺳﻨﻪ ..**** ﻭﻓﻌﻼ ﻟﻘﻴﺖ ﻭﺍﺣﺪ ﻭﺍﻧﺼﺪﻣﺖ ﺻﺪﻣﺔ ﻋﻤﺮﻱ ﺗﺎﻧﻴﻪ ﻟﻤﺎ ﺷﻔﺘﻪ ..
ﺭﻳﺤﺎﻧﻪ ﺑﺨﻮﻑ : ﺷﻦ ﺷﻔﺖ ..
ﺍﻟﺤﺴﻦ ﺷﺒﺤﻠﻬﺎ : ﺟﺪﻱ ﻭﺟﺪﻙ ... ﺍﻟﺤﺎﺝ ﻋﻠﻲ ..
ﺭﻳﺤﺎﻧﻪ ﺍﺑﺘﺴﻤﺖ ﺑﺘﻬﻜﻢ : ﺍﻟﻜﻮﻣﺎﻧﺪﺍ ..
ﺍﻟﺤﺴﻦ ﺗﻔﺎﺟﺄ ...
ﺭﻳﺤﺎﻧﻪ : ﻣﻦ ﻟﻤﺎ ﻋﺮﻓﺖ ﺍﻟﻠﻲ ﻋﺮﻓﺘﻪ ﻭﺍﻧﻲ ﻧﺪﻭﺭ ﻭﺭﺍﻫﻢ ﻭﺍﻛﺘﺸﻔﺖ ﻫﻠﺒﻪ ﺣﺎﺟﺎﺕ ..
ﺍﻟﺤﺴﻦ ﺿﻴﻖ ﻋﻴﻮﻧﻪ : ﺭﻳﺤﺎﻧﻪ ﻣﺎﺗﻠﻔﻴﺶ ﻭﺍﺩﻭﺭﻱ ﺷﻦ ﺍﻟﻠﻲ ﺧﻼﻙ ﺗﺸﻜﻲ ﻓﻴﻬﻢ ﻣﻦ ﺍﻷﺳﺎﺱ ..
ﺭﻳﺤﺎﻧﻪ ﺗﻠﺨﺒﻄﺖ ﺑﺎﻟﻤﺮﺓ ﺷﻦ ﺣﻨﻘﻮﻟﻪ ﻓﻲ ﺻﺪﺍﻗﻪ ﺑﻴﻨﻲ ﻭﺑﻴﻦ ﻭﺍﺣﺪ ﻣﻦ ﻋﺼﺎﺑﺘﻬﻢ ..
ﺍﻟﺤﺴﻦ ﺑﺼﻮﺕ ﻋﺎﻟﻲ : ﺭﻳﺤﺎﺍﺍﺍﻧﻪ ..
ﺭﻳﺤﺎﻧﻪ ﺑﻠﻌﺖ ﺭﻳﻘﻬﺎ : ﻣﺎ . ﻣﻤﻢ .. ﻣﺎﺍ .. ﻩ
ﻃﻖ ﺍﻟﺒﺎﺏ ﻭﺧﺶ ﺍﻟﺤﺎﺭﺱ : ﺍﻟﻮﻗﺖ ﺗﻢ ...
ﺭﻳﺤﺎﻧﻪ ﻓﺮﺣﺖ ...
ﺍﻟﺤﺴﻦ ﻧﺎﺽ ﻭﻗﻒ ﻳﺸﺒﺤﻠﻬﺎ ﺑﺘﻮﻋﺪ : ﺣﻨﻌﺮﻑ ... ﻭﻃﻠﻊ ﻣﻊ ﺍﻟﺤﺎﺭﺱ ﻭﻫﻲ ﺧﺪﺕ ﻧﻔﺲ ﻋﻤﻴﻖ ﻭﻧﺎﺿﺖ ﻭﻛﻴﻒ ﺑﺘﻠﻒ ﻭﺗﻄﻠﻊ ..
ﺭﻳﺤﺎﻧﻪ : ﺷﻦ ﻓﻲ
ﺳﻬﻴﻞ ﺍﺑﺘﺴﻢ : ﺍﺧﺮ ﻣﺮﺓ ﺗﺠﻲ ﻫﻨﻲ ..
ﺭﻳﺤﺎﻧﻪ : ﺑﺎﻟﻠﻪ ﺣﻮﻝ ﻣﻦ ﻗﺪﺍﻣﻲ ﻭﻣﺸﺖ ﻭﻫﻮ ﻭﺭﺍﻫﺎ ﻃﻠﻊ ﻭﺳﻜﺮ ﺍﻟﺤﺎﺭﺱ ﺍﻟﺒﺎﺏ .. ﺭﻳﺤﺎﻧﻪ ﻛﺎﻧﺖ ﺗﻤﺸﻲ ﺑﺜﻘﻪ ﻟﻌﻨﺪ ﻣﺎﺷﺎﻓﺖ ﻭﺍﺣﺪ . ﻣﻨﻈﺮﻩ ﻳﺨﻮﻑ ﺷﺎﺩﻩ ﺷﺮﻃﻲ ﻟﻤﺎ ﺷﺎﻓﻬﺎ ﺻﻔﺮ .. ﻭﻗﻌﺪ ﻳﻨﺎﺷﺐ ﻗﺪﻣﻠﻪ ﺳﻬﻴﻞ ﻭﻋﻄﺎﻩ ﻛﻒ ﻣﺴﻤﻮﻉ ﻷﻗﺼﻰ ﻃﺮﺍﺑﻠﺲ ...😂
ﺳﻬﻴﻞ ﺑﻐﻀﺐ : ﺍﺭﻓﻌﻮﺍ ﺍﻟﺤﺜﺎﻟﻪ ﻫﺬﺍ ﻟﻼﻧﻔﺮﺍﺩﻱ ... ﺗﻠﻔﺘﻠﻬﺎ ﻫﻲ ﺧﺎﻓﺖ ... ﺷﻦ ﻣﻮﻗﻔﻚ ﺍﻧﺘﻠﻔﻲ ﺍﻃﻠﻌﻲ ..
ﺭﻳﺤﺎﻧﻪ ﺧﺎﻓﺖ ﻭﻃﻠﻌﺖ ﺑﺴﺮﻋﻪ ﻭﻫﻲ ﻣﺘﻜﻨﻄﻴﻪ ..
ﺭﻳﺤﺎﻧﻪ : ﻗﻠﻴﻞ ﺍﻟﺬﻭﻕ ﺍﻟﻬﻤﺠﻲ ..
ﻭﺻﻠﺖ ﻓﻲ ﺳﻴﺎﺭﺗﻬﺎ ﻭﺭﻛﺒﺖ ... ﺷﺒﺤﺖ ﻟﻠﻮﺍﺟﻬﻪ ﻟﻘﺎﺗﻪ ﻭﺍﻗﻒ ﺣﺎﻁ ﺍﻳﺪﻳﻪ ﻓﻲ ﺟﻴﻮﺑﻪ ﻭﻻﺑﺲ ﻧﻈﺮﺍﺗﻪ ﻭﻳﺸﻮﻓﻠﻬﺎ ...
ﺭﻳﺤﺎﻧﻪ " ﻟﻜﻦ ﻳﻬﺒﻞ ﺍﻟﺤﻘﻴﺮ ﻋﻠﻴﻚ ﺷﺨﺼﻴﻪ ﺷﺨﺼﻴﺘﻪ ﺍﻟﺤﻴﻮﺍﻥ .."
ﺍﺷﺮﻟﻬﺎ ﺑﺈﻳﺪﻩ ﺗﻤﺸﻲ .. ﻭﻫﻲ ﺧﺎﻓﺖ ﻃﻮﻝ ﺗﺤﺮﻛﺖ .. ﻭﻫﻮ ﺍﺑﺘﺴﻢ ﻭﺗﻮﺟﻪ ﻟﺴﻴﺎﺭﺗﻪ ﻭﻣﺸﻲ ﻟﻠﻤﺮﻛﺰ ...
****
ﻭﺗﻤﻀﻲ ﺍﻷﻳﺎﻡ ..
ﺑﺮﻏﻢ ﻗﺒﻮﻝ ﺍﻟﻨﻘﺾ .. ﻟﻜﻦ ﻛﻞ ﺟﻠﺴﻪ ﻛﺎﻧﺖ ﺗﺘﺄﺟﻞ ﻟﻠﺸﻬﺮ ﺍﻟﻠﻲ ﺑﻌﺪﻩ ... ﻛﻞ ﺍﻣﻠﻬﻢ ﻓﻲ ﺍﻟﺨﺪﺍﻣﻪ ﺍﻟﻠﻲ ﻗﻠﺒﻮﺍ ﻋﻠﻴﻬﺎ ﺍﻟﺪﻧﻴﺎ ﻭﻻﻟﻴﻬﺎ ﺍﺛﺮ .. ﻭﻭﺿﻊ ﺍﻟﺤﺴﻦ ﻣﺎﺗﻐﻴﺮ ﻓﻴﻪ ﺷﻲ ..
ﻣﺮﻭﺍ ﺃﺭﺑﻌﻪ ﺷﻬﻮﺭ 📆📆📆📆
ﻻﺟﺪﻳﺪ ﻓﻲ ﺍﻟﻘﻀﻴﻪ ﺑﺮﻏﻢ ﺍﻧﻪ ﺍﻟﻤﺤﺎﻣﻲ ﺩﺍﻳﺮ ﺟﻬﺪﻩ ..
ﺭﺟﻌﺖ ﻋﻴﻠﺔ ﺍﻟﺤﺴﻦ ﻟﺤﺎﻟﺔ ﺍﻟﻴﺄﺱ ﻣﻦ ﺟﺪﻳﺪ .. ﻣﺎﻋﺪﺍ ﻋﻠﻴﺎ ﺍﻟﻠﻲ ﻛﺎﻧﺖ ﺣﺎﺳﻪ ﺍﻥ ﺭﺑﻲ ﺣﻴﻔﺘﺤﻬﺎ ... ﺟﺎﺑﺖ ﺳﺎﺭﺓ ﻭﻟﺪ ﻭﺳﻤﺎﺗﻪ ﻋﻠﻲ ﻟﻜﻦ ﻣﺎﻗﺪﺭﺗﺶ ﺗﻔﺮﺡ ﺑﺠﻴﺎﺑﻬﺎ ﻣﺴﻜﻴﻨﻪ .. ﻉ ﻋﻜﺲ ﻣﺪﻳﺤﻪ ﺍﻟﻠﻲ ﺟﺎﺑﺖ ﺑﻨﻴﻪ .. ﻭﺩﺍﺭﺕ ﺍﺳﺒﻮﻉ ﻓﻲ ﺻﺎﻟﻪ ﺑﻌﺪ ﻗﺎﻟﺘﻠﻬﺎ ﻋﻠﻴﺎ ﺍﺩﻳﺮ ... ﺑﺲ ﻫﻲ ﻣﺎﻣﺸﺘﺶ ﻃﺒﻌﺎ ..
ﻛﺒﺮﺕ ﺑﻄﻦ ﻋﻠﻴﺎ ﻫﻲ ﺗﻮﺍ ﺣﺎﻣﻞ ﻓﻲ ﺍﻟﺴﺎﺩﺱ ... ﻭﻫﺎﻟﻪ ﺧﺸﺖ ﺷﻬﺮﻫﺎ ...
ﻋﻠﻴﺎ ﻛﺎﻧﺖ ﺗﺼﻠﻲ ﻛﻞ ﻟﻴﻠﻪ ﻓﻲ ﻗﻴﺎﻡ ﺍﻟﻠﻴﻞ ﻭﺗﺴﺘﻐﻔﺮ ﻭﺗﺪﻋﻲ ... ﻭﻛﺎﻧﺖ ﺛﻘﺘﻬﺎ ﻓﻲ ﺍﻟﻠﻪ ﻛﺒﻴﺮﻩ ﻷﺑﻌﺪ ﺣﺪ ...
ﻓﻲ ﻳﻮﻡ ﻧﺎﺿﺖ ﻣﻦ ﺍﻟﻨﻮﻡ ﻭﺣﺎﺳﻪ ﺑﺸﻌﻮﺭ ﻏﺮﻳﺐ ﺑﻌﺪ ﺣﻠﻤﺖ ﺣﻠﻢ ... ﻭﻛﺄﻧﻬﺎ ﻗﺪﺍﻡ ﺑﺎﺏ ﺍﻟﺴﺠﻦ ﺩﺧﻠﺖ ﻣﻼﻳﺘﻬﺎ ﻣﻦ ﺗﺤﺖ ﺍﻟﺒﺎﺏ ﻭﺗﻘﻮﻝ ﻟﻠﺤﺴﻦ " ﺍﻧﻲ ﺟﺎﻳﻪ ﻧﻄﻠﻌﻠﻚ .." ﺷﻮﻳﻪ ﻭﺍﻧﻔﺘﺢ ﺑﺎﺏ ﺍﻟﺴﺠﻦ ﻭﻃﻠﻊ ﻣﻨﻪ ﺍﻟﺤﺴﻦ ﻭﻫﻮ ﻻﺑﺲ ﺍﻟﻠﺒﺴﻪ ﺍﻟﻌﺮﺑﻴﻪ ﺍﻟﻠﻲ ﻫﺪﺍﺗﻬﺎﻟﻪ ﻭﻛﺎﻥ ﻏﺎﻳﻪ ﻓﻲ ﺍﻟﻮﺳﺎﻣﻪ ..💕 ﻭﺗﻢ ﺍﻟﺤﻠﻢ
ﻋﻠﻴﺎ ﺷﺒﺤﺖ ﻟﻠﻤﺼﺤﻒ ﻟﻘﺎﺗﻪ ﻣﻔﺘﻮﺡ ﻟﻤﺎ ﺟﺖ ﺑﺘﺴﻜﺮﻩ ﺟﺖ ﻋﻴﻨﻬﺎ ﻉ ﺁﻳﺔ ..
◇ ﻓﻨﺎﺩﻯ ﻓﻲ ﺍﻟﻈﻠﻤﺎﺕ ﺃﻥ ﻻﺇﻟﻪ ﺇﻻ ﺃﻧﺖ ﺳﺒﺤﺎﻧﻚ ﺇﻧﻲ ﻛﻨﺖ ﻣﻦ ﺍﻟﻈﺎﻟﻤﻴﻦ ¤ ﻓﺄﺳﺘﺠﺒﻨﺎ ﻟﻪ ﻭﻧﺠﻨﻴﺎﻩ ﻣﻦ ﺍﻟﻐﻢ ﻭﻛﺬﻟﻚ ﻧﻨﺠﻲ ﺍﻟﻤﺆﻣﻨﻴﻦ ◇
ﻋﻠﻴﺎ ﺍﺑﺘﺴﻤﺖ ﺑﺎﺭﺗﻴﺎﺡ ﺳﻜﺮﺕ ﺍﻟﻤﺼﺤﻒ ﻭﺣﻄﺎﺗﻪ ﻉ ﺍﻟﺮﻑ ﺍﻟﻠﻲ ﻻﺻﻖ ﻓﺎﻟﺤﻴﻂ .. ﻭﻣﺸﺖ ﻟﺪﺍﺭ ﺍﻟﻨﻮﻡ .. ﺧﺸﺖ ﻟﻠﺤﻤﺎﻡ ﺩﻭﺷﺖ ..
ﺑﻌﺪﻫﺎ ﻃﻠﻌﺖ ﻟﺒﺴﺖ ﻭﻓﻄﺮﺕ .. ﻭﻧﺰﻟﺖ ﻟﻮﻃﺎ .. ﻟﻘﺖ ﺍﻧﻌﺎﻡ ﺑﺮﻭﺣﻬﺎ ﻓﻲ ﺍﻟﻜﻮﺟﻴﻨﻪ ..
ﻋﻠﻴﺎ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﺨﻴﺮﺍﺕ ..
ﺍﻧﻌﺎﻡ ﺍﺑﺘﺴﻤﺖ : ﺻﺒﺎﺡ ﺍﻟﻮﺭﺩﺍﺕ .. ﺷﺒﺤﺖ ﻟﺒﻄﻨﻬﺎ .. ﺷﻨﻮ ﺟﻮ ﺍﻟﺴﻤﺢ ..
ﻋﻠﻴﺎ ﺑﻀﺤﻜﻪ : ﺑﺪﻱ ﻳﺮﻓﺲ ..
ﺍﻧﻌﺎﻡ : ﺍﻟﻠﻪ ... ﻳﺎﻭﺧﻴﺘﻲ ﻧﺠﻴﻪ ..
ﻋﻠﻴﺎ ﺣﻄﺖ ﺍﻳﺪﻫﺎ ﻉ ﺑﻄﻨﻬﺎ ﻭﻗﻌﺪﺕ ﺗﻀﺤﻚ ..
ﺍﻧﻌﺎﻡ : ﻋﺮﻑ ﺍﻟﺤﺴﻦ ﺍﻧﻚ ﺣﺎﻣﻞ ﺑﻮﻟﺪ؟
ﻋﻠﻴﺎ : ﻭﻣﻦ ﺑﻴﻘﻮﻟﻪ ﻛﺎﻥ ﺣﺮﻡ ﻋﻠﻴﺎ ﺯﻳﺎﺭﺗﻪ ..
ﺍﻧﻌﺎﻡ : ﺣﻴﻄﻠﻊ ﺑﺈﺫﻥ ﺍﻟﻠﻪ ﻭﺗﻌﺮﻓﻲ ..
ﻋﻠﻴﺎ ﺑﻤﺰﺡ : ﻣﺎﻗﺎﻟﺘﻠﻚ ﺷﻲ ﺍﻟﻌﺼﻔﻮﺭﺓ ﺍﻟﻠﻲ ﺗﺠﻴﺒﻠﻚ ﻓﻲ ﺍﻷﺧﺒﺎﺭ ..
ﺍﻧﻌﺎﻡ ﻭﺟﻬﻬﺎ ﻭﻻ ﺍﺣﻤﺮ ﻭﺍﺭﺗﺒﻜﺖ : ﻋﺼﻔﻮﺭﺓ ﺷﻨﻮ ! ؟؟
ﻋﻠﻴﺎ ﺑﻀﺤﻜﻪ : ﺍﻳﻪ ﺻﺢ .. ﻋﺼﻔﻮﺭ ﻫﻮ ﻣﺶ ﻋﺼﻔﻮﺭﺓ .. ﻻﻳﺎﻭﺩﻱ ﻉ ﻃﻮﻟﻪ ﻭﻋﺮﺿﻪ ﻭﺟﻬﺎﻣﺘﻪ ﻧﻘﻮﻟﻮﺍ ﺻﻘﺮ ..
ﺍﻧﻌﺎﻡ ﺑﺘﻤﻮﺕ ﻣﻦ ﺍﻟﺨﺠﻞ : ﺷﻦ ﺗﻔﺘﻔﺘﻲ ﻉ ﺍﻟﺼﺒﺢ ...
ﻋﻠﻴﺎ ﺑﻀﺤﻜﻪ : ﻳﺎﺳﺮﻙ ﻣﻦ ﺍﻟﺠﻮ ﺍﻟﻠﻲ ﺩﻳﺮﻱ ﻓﻴﻪ .. ﻋﺎﺭﻓﻪ ﺍﻧﻚ ﺗﺘﻮﺍﺻﻠﻲ ﻣﻊ ﺃﺣﻤﺪ ..
ﺍﻧﻌﺎﻡ : ﻭﻃﻲ ﺻﻮﺗﻚ ..
ﻋﻠﻴﺎ : ﺑﺎﻩ ﻗﻮﻟﻴﻠﻲ ﺷﻦ ﻗﺎﻟﻚ .
ﺍﻧﻌﺎﻡ : ﺍﺣﻤﻢ ﺷﻲ ﻣﺎﻓﻴﺶ ﺟﺪﻳﺪ ..
ﻋﻠﻴﺎ : ﺣﻴﻴﻲ ﻣﺎﻻ ﺍﻟﻬﺪﺭﺯﺓ ﺍﻟﻠﻲ ﺗﻬﺪﺭﺯﻭﺍ ﻓﻴﻬﺎ ﻉ ﺷﻨﻮ ...
ﺍﻧﻌﺎﻡ ﻗﺮﺻﺘﻬﺎ : ﻫﺪﺭﺯﺓ ﺷﻨﻮ ﻳﺎﺟﺤﺸﻪ ..
ﻋﻠﻴﺎ : ﺍﺣﺤﺤﺤﺢ ... ﻫﻬﻬﻬﻬﻪ ﻳﺎﻣﺴﻤﻮﻣﻪ .. ﻋﻨﺒﺔ ﺍﻟﻌﺸﺎﻕ ﺗﺸﻬﺪ ...
ﺍﻧﻌﺎﻡ ﺿﺤﻜﺖ ﺑﺨﺠﻞ ..
ﻋﻠﻴﺎ : ﺷﺎﺩﻩ ﻫﺎﻟﺘﻠﻴﻔﻮﻥ ﻭﺗﻬﺪﺭﺯﻱ ﻭﺗﺒﺘﺴﻤﻲ ﻭﺗﻀﺤﻜﻲ .. ﻣﺎﻳﻄﻠﻊ ﻣﻨﻚ ﺍﻧﺘﻲ ﻭﺍﻷﻓﻨﺪﻱ ﺍﺣﻤﺪ
ﺍﻧﻌﺎﻡ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻪ .. ﻳﺎﺣﻤﺎﺭﺓ ... ﺗﺮﺍﻗﺒﻲ ﻓﻴﺎ ..
ﻋﻠﻴﺎ ﺿﺤﻜﺖ ..
ﺍﻧﻌﺎﻡ : ﺟﻮﻙ ﻣﻠﻴﺢ ﺍﻟﻴﻮﻡ ...
ﻋﻠﻴﺎ ﺍﺑﺘﺴﻤﺖ : ﻋﻨﺪﻱ ﺍﺣﺴﺎﺱ ﺍﻥ ﺑﻴﺼﻴﺮ ﺷﻲ ﺣﻠﻮ ﺍﻟﻴﻮﻡ ..
ﺍﻧﻌﺎﻡ : ﻳﺎﺍﺍﺍﺭﺏ .. ﺍﻟﻴﻮﻡ ﺍﺣﻤﺪ ﻣﺎﺷﻴﻠﻪ ..
ﻋﻠﻴﺎ : ﺍﻟﻠﻪ .. ﺑﺎﻫﻲ ﺑﺎﻟﻠﻪ ﻋﻠﻴﻚ ﻗﻮﻟﻴﻠﻪ ﻳﻮﺻﻠﻪ ﻫﺎﻟﺮﺳﺎﻟﻪ ..
....
ﻗﺎﻟﺘﻠﻚ ﺍﻗﺮﺍ ﺍﻵﻳﻪ 88 ﻣﻦ ﺳﻮﺭﺓ ﺍﻷﻧﺒﻴﺎﺀ ﻭﺃﻋﻤﻞ ﺑﻴﻬﺎ ..
ﺍﻟﺤﺴﻦ ﺍﺑﺘﺴﻢ ﺑﻌﺪﻳﻦ ﺷﺒﺢ ﻷﺣﻤﺪ ﻭﺿﻴﻖ ﻋﻴﻮﻧﻪ : ﻭﻛﻴﻒ ﻗﺎﻟﺘﻬﺎﻟﻚ ..
ﺍﺣﻤﺪ ﺑﺮﺑﻜﻪ : ﻭﺻﻠﺘﻬﺎﻟﻲ ﻋﻦ ﻃﺮﻳﻖ ﺧﻮﻙ .. ﻗﺎﻟﺘﻬﺎ ﻟﻤﺮﺗﻪ ﻭﻣﺮﺗﻪ ﻗﺎﻟﺘﻠﻬﺎﻟﻪ ﻭﻫﻮ ﻗﺎﻟﻬﺎﻟﻲ 😅
ﺍﻟﺤﺴﻦ 🙄:
ﺍﺣﻤﺪﻧﺎﺽ : ﺍﺣﻤﻢ .. ﻫﻲ ﻣﺎﻧﻌﻄﻠﺶ ﻋﻠﻴﻚ ..
ﺍﻟﺤﺴﻦ ﺑﺘﻬﻜﻢ : ﺍﻳﻪ ﻣﺎﻫﻮ ﻭﺭﺍﻱ ﺧﺪﻣﻪ ..
ﺍﺣﻤﺪ ﺑﻀﺤﻜﻪ : ﻗﺪﺍﺵ ﺗﺤﺐ ﺍﺩﻗﻖ .. ﻫﻴﺎ ﻣﺎﻻ ﻓﻲ ﺃﻣﺎﻥ ﺍﻟﻠﻪ .. ﺗﻮﺻﻲ ﺷﻲ ..
ﺍﻟﺤﺴﻦ : ﻧﻮﺻﻴﻚ ﻉ ﺭﻭﺣﻚ .. ﺭﺩ ﺑﺎﻟﻚ ﻳﺎﺃﺣﻤﺪ ..
ﺍﺑﺘﺴﻢ ﺍﺣﻤﺪ ... ﻭﻃﻖ ﻉ ﺍﻟﺒﺎﺏ ﻓﺘﺤﻠﻪ ﺍﻟﺤﺎﺭﺱ ﻭﻃﻠﻊ ﻭﺑﻌﺪﻫﺎ ﻃﻠﻌﻮﺍ ﻭﺭﺍﻩ ﺍﻟﺤﺴﻦ ..
***
ﺳﻬﻴﻞ ﻓﻲ ﻣﻜﺘﺒﻪ ﻛﺎﻧﺖ ﻋﻨﺪﻩ ﻣﻜﺎﻟﻤﻪ ... ﻛﻤﻠﻬﺎ ﻭﺧﺶ ﻋﻠﻴﻪ ﻋﻨﺼﺮ ..
ﺍﻟﻌﻨﺼﺮ : ﻳﺎﻓﻨﺪﻱ ﻓﻲ ﻭﺍﺣﺪ ﺑﺮﺍ ﻳﻘﻮﻝ ﺍﻧﻪ ﺧﻮ ﻧﻬﻠﻪ ﺍﻟﺼﻴﺪ ﻳﺒﻲ ﻳﻘﺎﺑﻠﻚ ..
ﺳﻬﻴﻞ ﺑﺈﺳﺘﻐﺮﺍﺏ : ﺩﺧﻠﻪ ..
ﻃﻠﻊ ﺍﻟﻌﻨﺼﺮ ﻭﺷﻮﻳﻪ ﻭﺧﺶ ﺧﻮ ﻧﻬﻠﻪ ..
ﺳﻬﻴﻞ : ﺗﻔﻀﻞ ..
ﻗﺪﻡ ﺧﻮ ﻧﻬﻠﻪ ﻭﻗﻌﻤﺰ : ﺍﻧﻲ ﺟﺎﻱ ﻭﻣﺴﺘﻌﺠﻞ ﻫﻠﺒﻪ .. ﺑﺲ ﻧﺒﻲ ﻧﻮﺻﻞ ﺃﻣﺎﻧﻪ ﺍﺧﺘﻲ ﻭﺻﺘﻨﻲ ﻧﻮﺻﻠﻬﺎ ﻟﻮﺻﺎﺭﺗﻠﻬﺎ ﺣﺎﺟﻪ ..
ﺳﻬﻴﻞ : ﺍﻣﺎﻧﻪ !!
ﺧﻮ ﻧﻬﻠﻪ ﻃﻠﻊ ﺣﺎﺟﻪ ﻣﻦ ﺟﻴﺒﻪ : ﺍﻳﻪ ... ﻣﻮﺟﻮﺩﻩ ﻓﻲ ﺍﻟﻔﻼﺵ ﺍﻫﻮ .. ﻣﺪﻫﻮﻟﻪ .. ﺧﺪﺍﻩ ﺳﻬﻴﻞ ...
ﺧﻮ ﻧﻬﻠﻪ : ﻣﻤﻜﻦ ﻧﻜﻮﻥ ﻋﻄﻠﺖ ﺑﻴﻪ ﺑﺲ ﺻﺎﺭﺕ ﻣﻌﺎﻱ ﻣﺸﺎﻛﻞ ﺷﻐﻠﺘﻨﻲ ..
ﺳﻬﻴﻞ : ﺍﻟﻤﻬﻢ ﺟﻴﺖ ﻭﺟﺒﺘﻪ ﺍﻥ ﺷﺎﺀ ﺍﻟﻠﻪ ﻳﻜﻮﻥ ﻓﻴﻪ ﺷﻲ ﻣﻬﻢ ...
***
ﺍﻳﻪ ﻫﺎﺩﻱ ﺣﻄﻴﻬﺎ ﻫﻨﻲ ... ﺍﻳﻮﺍ ... ﺷﻄﻮﺭﺓ ..
ﻳﻘﻴﻦ : ﻭﻻ ﺣﻠﻮ ..
ﺧﻮﻟﻪ ﺑﻀﺤﻜﻪ : ﻟﻤﺎ ﺑﺎﺑﺎ ﻳﺠﻲ ﻧﻘﻮﻟﻪ ﻳﻘﻴﻦ ﻫﻲ ﺍﻟﻠﻲ ﺭﺗﺒﺖ ﺍﻟﻤﻜﺘﺐ ﻭﺧﻼﺗﻪ ﺣﻠﻮ ﻫﻜﻲ ..
ﻳﻘﻴﻦ ﺍﺑﺘﺴﻤﺖ : ﻭﻧﻘﻮﻟﻪ ﺍﻧﺘﻲ ﺳﺎﻋﺪﺗﻴﻨﻲ ...
ﺧﻮﻟﻪ ﺑﻀﺤﻜﻪ : ﻳﺎﺣﻼﺕ ﺍﻟﺒﻨﻮﺗﺎﺕ ﻭﺑﺎﺳﺘﻬﺎ ﻭﻳﻘﻴﻦ ﺣﻀﻨﺖ ﺧﻮﻟﻪ ..
ﺑﺮﺍ ...
ﺧﺸﺖ ﺑﻌﺼﺒﻴﻪ ﺷﺒﺤﺖ ﻟﻠﺴﻜﺮﺗﻴﺮﻩ ..
ﺭﺑﻴﻌﻪ : ﺩﺍﺧﻞ ﻣﻊ ﻳﻘﻴﻦ ..
ﺧﺸﺖ ﺑﻐﻀﺐ ﻓﺘﺤﺖ ﺑﺎﺏ ﺍﻟﻤﻜﺘﺐ ﺑﻌﻨﻒ .. ﺍﻧﺨﻠﻌﻮﺍ ﺍﻟﺰﻭﺯ .
ﻗﺪﻣﺖ ﻟﺨﻮﻟﻪ : ﺍﻧﺘﻲ ﻣﺎﺗﺘﺤﺸﻤﻴﺶ ﻭﻗﺤﻪ ﻫﻠﺒﻪ .. ﻓﻮﻕ ﻣﺎﺧﺪﻳﺘﻲ ﻣﻨﻲ ﺭﺍﺟﻠﻲ ﺗﺒﻲ ﺗﺎﺧﺪﻱ ﺑﻨﺘﻲ ..
ﺧﻮﻟﻪ : ﻣﺶ ﺣﻨﺰﻝ ﻧﻔﺴﻲ ﻭﻧﺮﺩ ﻋﻠﻴﻚ ..
ﻟﻴﻠﻰ ﺑﻬﺰﻭﺓ : ﻉ ﺍﺳﺎﺱ ﻣﺶ ﻧﺎﺯﻟﻪ ﻫﻲ ﺗﻲ ﻓﺎﻷﺭﺽ .. ﻋﻴﻠﻪ ﺯﺑﺎﻟﻪ ..
ﺧﻮﻟﻪ ﻛﺎﻧﺖ ﺗﺒﻲ ﺗﻀﺮﺑﻬﺎ ﺑﺲ ﺗﻤﺎﻟﻜﺖ ﻧﻔﺴﻬﺎ ﻗﺪﺍﻡ ﻳﻘﻴﻦ ..
ﺧﻮﻟﻪ : ﻏﻴﺮ ﺍﻟﺒﻨﺖ ﺑﺤﺪﺍﻧﺎ ..
ﻟﻴﻠﻲ : ﺷﻦ ﻛﻨﺘﻲ ﺩﺭﺗﻲ ..
ﺧﻮﻟﻪ ﺳﻜﺘﺖ ...
ﻟﻴﻠﻲ ﺷﺪﺕ ﺍﻳﺪ ﺑﻨﺘﻬﺎ : ﻫﻲ ﺗﻌﺎﻟﻲ ﻣﺎﻣﺎ ..
ﻳﻘﻴﻦ ﺗﺒﻜﻲ : ﻻﻻ ﻣﺎﻧﺒﻴﺶ ﻧﻤﺸﻲ ﻣﻌﺎﻙ .
ﻟﻴﻠﻰ : ﻳﺎﺃﻓﻌﻰ ﺣﺘﻰ ﺑﻨﺘﻲ ﻛﺮﻫﺘﻴﻬﺎ ﻓﻴﺎ ... ﻗﻌﺪﺕ ﺗﺠﺒﺪ ﻓﻲ ﺍﻟﺒﻨﺖ .. ﺗﻌﺎﻟﻲ ﻫﻴﺎ ..
ﺧﻮﻟﻪ : ﺑﺎﻟﺸﻮﻳﻪ ﺑﺘﺨﻠﻌﻲ ﺍﻳﺪ ﺍﻟﺒﻨﺖ ...
ﻟﻴﻠﻰ : ﺳﻜﺮﻱ ﻓﻤﻚ ﺍﻧﺘﻲ ... ﻫﻴﺎ ﺗﻌﺎﻟﻲ ﻫﻴﺎ ..
ﻳﻘﻴﻦ ﺗﻮﺟﻌﺖ : ﺍﺍﺍﺍﺍﺍﻱ ..
ﺧﻮﻟﻪ ﺟﺒﺪﺕ ﻳﺪ ﻟﻴﻠﻰ ﻭﺩﻓﺘﻬﺎ ﻃﺎﺣﺖ ..
ﻉ ﺧﺸﺔ ﺭﻳﺎﺽ ﺍﻟﻠﻲ ﻟﻘﻲ ﺍﻟﻤﻮﻇﻔﻴﻦ ﻭﺍﻗﻔﻴﻦ ﺣﺪﺍ ﺑﺎﺑﻪ ﻭﻳﺴﻤﻌﻮﺍ ﻓﻲ ﺍﻟﻌﺮﻛﻪ ..
ﺭﻳﺎﺽ : ﺷﻨﻮ .. ﻫﺬﺍ ..
ﻟﻴﻠﻲ ﺑﺘﺼﻨﻊ ﺗﺒﻜﻲ : ﻫﺎﺩﻱ ﻃﻴﺤﺘﻨﻲ ﻳﺎﺭﻳﺎﺽ ..
ﺭﻳﺎﺽ ﺷﺒﺢ ﻟﺨﻮﻟﻪ .. ﺧﻮﻟﻪ ﺟﺖ ﺑﺘﻄﻠﻊ ﺷﺪﺕ ﻳﻘﻴﻦ ﻓﻲ ﺭﺟﻠﻬﺎ ﻭﺗﺒﻜﻲ : ﻣﺎﺗﻤﺸﻴﺶ .. ﺍﻧﻲ .. ﺧﺎﻳﻔﻪ ...
ﺗﺄﺛﺮﺕ ﺧﻮﻟﻪ ﻭﻧﺰﻟﺖ ﻟﻤﺴﺘﻮﺍﻫﺎ ﻭﺣﻀﻨﺘﻬﺎ ..
ﻭﺭﻳﺎﺽ ﺷﺒﺢ ﻟﻠﻴﻠﻰ : ﻧﻮﺿﻲ ﺍﻃﻠﻌﻲ .. ﺍﺧﺘﻔﻲ .. ﺑﺼﻮﺕ ﻋﺎﻟﻲ .. ﻭﺟﻬﻚ ﻣﺎﻧﺒﻴﻴﻴﻴﺶ ﻧﺸﻮﻭﻭﻓﻪ ..
ﻧﺎﺿﺖ ﺑﺴﺮﻋﻪ ﻟﻴﻠﻰ ﻭﻃﻠﻌﺖ .. ﻭﺧﻮﻟﻪ ﻗﺎﻣﺖ ﻳﻘﻴﻦ ﻓﻲ ﻏﻤﺮﻫﺎ ﻭﺟﺖ ﺑﺘﻄﻠﻊ ..
ﺭﻳﺎﺽ : ﻭﻳﻦ ..
ﺧﻮﻟﻪ : ﺑﻨﻐﻴﺮﻟﻬﺎ ﺟﻮﻫﺎ ﺳﺎﺩﻫﺎ ﺭﻋﺎﻳﺶ .. ﻭﻃﻠﻌﺖ ﻣﻦ ﺣﺪﺍﻩ ..
ﻫﻮ ﺗﻨﻬﺪ ﻭﺍﺑﺘﺴﻢ ...
***
ﻭﺍﻟﻠﻪ ﺟﺒﺖ ﺍﻷﺳﺘﺎﺫ ﻣﺤﻤﻮﺩ ﻭﺟﻴﻨﺎﻙ ﺟﺮﻱ ..
ﺳﻬﻴﻞ ﻓﺘﺢ ﺍﻟﻼﺏ ﺗﻮﺏ : ﺗﻌﺎﻟﻮﺍ ﺑﺤﺪﺍﻱ ...
ﻣﺸﻮ ﺍﺣﻤﺪ ﻭﺍﻟﻤﺤﺎﻣﻲ ﻭﻗﻔﻮﺍ ﺣﺪﺍ ﺳﻬﻴﻞ ..
ﺳﻬﻴﻞ : ﻫﺬﺍ ﻓﻼﺵ ﺟﺎﺑﻪ ﺍﻟﻴﻮﻡ ﺧﻮ ﻧﻬﻠﻪ ﺍﻟﺼﻴﺪ ﺍﻟﻠﻲ ﻋﺎﻳﺶ ﻓﻜﻨﺪﺍ .. ﻭﻗﺎﻝ ﺍﻥ ﺍﺧﺘﻪ ﻭﺻﺎﺗﻪ ﻳﺴﻠﻤﻪ ﻟﻠﺸﺮﻃﻪ ﻟﻮ ﺻﺎﺭﺗﻠﻬﺎ ﺣﺎﺟﻪ ...
ﺍﺣﻤﺪ ﻭﻣﺤﻤﻮﺩ ﺍﺗﻔﺎﺟﺌﻮﺍ ...
ﺣﻂ ﺳﻬﻴﻞ ﺍﻟﻔﻼﺵ .. ﻭﻃﻠﻊ ﻓﻴﻪ ﻓﻴﺪﻳﻮ ﻓﺘﺤﻪ ...
ﻣﺤﺘﻮﺍﻩ
ﻧﻬﻠﻪ ﻣﻘﻌﻤﺰﻩ ﻓﻲ ﻣﻜﺘﺒﻬﺎ ... ﻭﺗﺸﺒﺢ ﻟﻜﺎﻣﻴﺮﺍ ﻗﺪﺍﻣﻬﺎ ..
} ﻧﻬﻠﻪ : ﺍﻟﺴﻼﻡ ﻋﻠﻴﻜﻢ ..
ﺍﻟﻔﻴﺪﻳﻮ ﻟﻮ ﻓﻲ ﺣﺪ ﺷﺎﻓﻪ ﻏﻴﺮ ﺧﻮﻱ ﻣﻌﻨﺎﻫﺎ ﺍﻧﻲ ﺗﻮﺍ ﻓﻲ ﻋﺎﻟﻢ ﻏﻴﺮ ﻫﺎﻟﻌﺎﻟﻢ .. ﺳﻜﺘﺖ ... ﺍﻧﻲ ﻧﻬﻠﻪ ﻋﺒﺪ ﺍﻟﻤﺠﻴﺪ ﺍﻟﺼﻴﺪ ﻋﻀﻮ ﻣﺴﺘﻘﻞ ﻓﻲ ﺍﻟﺒﺮﻟﻤﺎﻥ .. ﺧﺪﻣﺖ ﺑﺄﺧﻼﺹ ﻭﺑﻨﺰﺍﻫﻪ ﻭﻳﺸﻬﺪ ﻋﻠﻴﺎ ﺍﻟﻠﻪ ﻗﺒﻞ ﺍﻟﻠﻲ ﻳﻌﺮﻓﻮﻧﻲ .. ﺍﻧﻲ ﺍﺭﻣﻠﺔ ﻗﻴﺲ ﺍﻷﺳﻄﻰ .. ﺿﺎﺑﻂ ﻣﺨﺎﺑﺮﺍﺕ ﺳﺎﺑﻖ .. ﻣﺎﺕ ﻏﺪﺭ ﻉ ﻳﺪ ﻋﺼﺎﺑﺎﺕ ﻣﺎﻓﻴﺎ ﻓﻲ ﺍﻟﺒﻼﺩ ﺗﺮﻋﺎﻫﺎ ﻭﺗﺪﻋﻢ ﻓﻴﻬﺎ ﻭﺟﻮﻩ ﺳﻴﺎﺳﻴﻪ ﻭﺳﻴﺎﺩﻳﻪ ﻓﻲ ﺍﻟﺪﻭﻟﻪ ... ﺻﻔﻮﻩ ﺑﻌﺪ ﻋﺮﻓﻮﺍ ﺍﻥ ﺣﻴﺴﻠﻢ ﻣﻌﻠﻮﻣﺎﺕ ﻋﻨﻬﻢ ﻟﻠﻨﺎﺋﺐ ﺍﻟﻌﺎﻡ ﻭﻋﺜﺮﻭﺍ ﻉ ﺍﻟﻤﻌﻠﻮﻣﺎﺕ ﻭﺧﻔﻮﻫﺎ .. ﻗﺮﺭﺕ ﻧﺎﺧﺪ ﺑﺘﺎﺭﻩ .. ﺭﺷﺤﺖ ﻧﻔﺴﻲ ﻓﻲ ﺍﻷﻧﺘﺨﺎﺑﺎﺕ ﻭﻓﺰﺕ ﺑﻤﻘﻌﺪ .. ﻭﺑﺪﻳﺖ ﻧﺪﻭﺭ ﻭﺭﺍ ﺍﺳﻤﺎﺀ ﺑﻌﻴﻨﻬﺎ ﻣﺘﻮﺭﻃﻪ ﻓﻲ ﺗﺠﺎﺭﺓ ﺍﻟﻤﺨﺪﺭﺍﺕ ﻭﺍﻟﺒﺸﺮ .. ﻭﻧﻘﻞ ﺍﻷﻣﻮﺍﻝ ﻟﻠﺨﺎﺭﺝ ﺳﺮﻗﻪ .. ﻭﻏﺴﻴﻞ ﺍﻷﻣﻮﺍﻝ .. ﺑﺲ ﺣﺴﻮﺍ ﺑﻴﺎ ... ﻭﻫﺪﺩﻭﻧﻲ ﺍﻛﺜﺮ ﻣﻦ ﻣﺮﺓ ... ﻭﻋﺮﺿﻮﺍ ﻋﻠﻴﺎ ﺍﻏﺮﺍﺀﺍﺕ ﻛﺬﻟﻚ .. ﻣﺎﻟﻘﻴﺘﺶ ﺍﻻ ﺣﻞ ﻭﺍﺣﺪ ﺍﻧﻲ ﻧﺘﻌﺎﻭﻥ ﻣﻊ ﺍﻟﺸﺮﻃﻪ ﺑﺎﻟﺨﻔﺎﺀ ... ﻭﺍﻻﺳﻢ ﺍﻟﻮﺣﻴﺪ ﺍﻟﻠﻲ ﺟﻲ ﻓﺒﺎﻟﻲ ﺍﻟﺤﺴﻦ ﺍﻟﺼﺎﺩﻕ .. ﺍﻟﻠﻲ ﻭﻗﻒ ﻣﻌﺎﻱ ﻭﻗﻔﻪ ﻋﻤﺮﻱ ﻣﺎﺣﻨﻨﺎﺳﺎﻫﺎ .. ﻟﺪﺭﺟﻪ ﺍﻥ ﺧﻼ ﺻﻐﺎﺭﻱ ﻋﻨﺪﻩ ﻓﻲ ﺣﻮﺷﻪ ﻟﻔﺘﺮﻩ ﺑﻌﺪ ﻫﺪﺩﻧﻲ ﺑﻴﻬﻢ ﺯﻋﻴﻢ ﺍﺣﺪ ﺍﻟﻌﺼﺎﺑﺎﺕ ﺍﻟﻤﺪﻋﻮ ﺍﻟﻜﻮﺑﺮﺍ .. ﺍﻟﻠﻲ ﺗﻬﺠﻢ ﻉ ﺣﻮﺷﻲ ﻭﺣﻮﺵ ﺍﺧﺘﻲ ﻛﺬﻟﻚ .. ﻭﻃﻠﺐ ﻣﻨﻲ ﺍﻥ ﻛﻞ ﻣﺎﺟﻤﻌﺖ ﻣﻦ ﻣﻌﻠﻮﻣﺎﺕ ﻧﺨﻠﻲ ﻋﺒﺪ ﺍﻟﻘﺪﻭﺱ ﺍﻟﺒﻲ ﻫﻮ ﺍﻟﻠﻲ ﻳﺘﺤﻤﻠﻬﺎ .. ﻛﻠﻤﺖ ﺍﻷﻓﻨﺪﻱ ﺍﻟﺤﺴﻦ ﻭﻗﺎﻟﻲ ﺍﺳﺘﻤﺮﻱ ﻣﻌﺎﻫﻢ ﻟﻴﻦ ﺗﻮﺻﻠﻲ ﻓﻴﻬﻢ ﻭﻃﺒﻌﺎ ﻫﻮ ﻣﺎﺍﺟﺒﺮﻧﻴﺶ ﺍﻧﻲ ﺍﻟﻠﻲ ﻛﻨﺖ ﻧﺒﻲ ﻧﺪﻳﺮ ﺍﻱ ﺷﻲ ﺑﺶ ﻧﺎﺧﺪ ﺑﺘﺎﺭ ﺯﻭﺟﻲ ﺍﻟﺮﺍﺣﻞ ﻭﻧﺨﺪﻡ ﻫﺎﻟﺒﻼﺩ .. ﺍﻟﺤﺴﻦ ﺍﻟﺼﺎﺩﻕ ﺗﺤﻤﻞ ﺧﻄﺮ ﻭﺟﻮﺩ ﺻﻐﺎﺭﻱ ﻓﻲ ﺣﻮﺷﻪ .. ﻭﺗﻬﺠﻢ ﻉ ﺣﻮﺷﻪ ﻣﺠﺮﻣﻴﻦ ﺑﺶ ﻳﺨﻄﻔﻮﺍ ﺻﻐﺎﺭﻱ ﻟﻜﻦ ﺍﻫﻠﻪ ﺣﻤﻮﻫﻢ .. ﻭﺯﻭﺟﺘﻪ ﺧﺴﺮﺕ ﺟﻨﻴﻨﻬﺎ ﻓﻲ ﺳﺒﻴﻞ ﺣﻤﺎﻳﺘﻬﻢ .. ﺍﺿﻄﺮﻳﺖ ﺑﻌﺪﻳﻦ ﺑﻤﺴﺎﻋﺪﺗﻪ ﻟﺘﻬﺮﻳﺒﻬﻢ ﻋﻦ ﻃﺮﻳﻖ ﺍﻟﺤﺪﻭﺩ ﻟﺘﻮﻧﺲ ﻭﻣﻨﻬﺎ ﻳﻤﺸﻮﺍ ﻟﺨﻮﻱ ﻓﻲ ﻛﻨﺪﺍ .. ﺑﺲ ﻣﻊ ﺍﻷﺳﻒ ﺍﻟﻤﺪﻋﻮ ﺍﻟﻜﻮﺑﺮﺍ ﻭﺻﻠﻬﻢ ﻭﻫﺪﺩﻧﻲ ﺑﻴﻬﻢ ... ﻓﻲ ﺍﻟﻨﻬﺎﻳﻪ ﻧﺒﻲ ﻧﻘﻮﻝ .. ﻭﺍﺛﻘﻪ ﻭﻣﺘﺄﻛﺪﻩ ﺍﻧﻬﻢ ﻣﺶ ﺣﻴﺨﻠﻮﻧﻲ ﺣﻴﻘﺘﻠﻮﻧﻲ .. ﻭﻟﻬﺬﺍ ﺍﻧﻲ ﻣﺎﺧﻠﻴﺘﺶ ﻣﻮﺗﻲ ﻳﻜﻮﻥ ﺑﺪﻭﻥ ﻓﺎﻳﺪﻩ .. ﻭﻷﻧﻲ ﻣﺘﻮﻗﻌﻪ ﺍﻧﻬﻢ ﺣﻴﺮﺟﻌﻮﺍ ﻳﺘﻬﺠﻤﻮﺍ ﻋﻠﻴﺎ ﻓﻲ ﺣﻮﺷﻲ .. ﺣﻄﻴﺖ ﻓﻲ ﺍﻟﺼﺎﻟﻪ ﻓﻲ ﺍﻟﺪﻭﺭ ﺍﻷﻭﻝ ﻓﻲ ﻟﻮﺣﻪ ﻣﻌﻠﻘﻪ ﻉ ﺍﻟﺤﻴﻂ .. ﻛﺎﻣﻴﺮﺍ ﺻﻐﻴﺮﺓ ﺍﻟﺤﺠﻢ ﻣﺘﻄﻮﺭﺓﻭﺗﻘﻨﻴﺘﻬﺎ ﻋﺎﻟﻴﻪ ﻭﺭﺍ ﻣﺮﺵ ﺍﻟﻠﻮﺣﻪ ﺑﻨﺤﻄﻬﺎ ﺗﻮﺍﻉ ﻭﺿﻊ ﺍﻟﺘﺴﺠﻴﻞ ... ﻟﻮ ﻓﻌﻼ ﺻﺎﺭ ﻓﺒﺎﻟﻲ .. ﻧﺒﻲ ﺍﻟﻌﺎﻟﻢ ﻛﻠﻪ ﻳﻌﺮﻑ ﻣﺪﻯ ﻭﺣﺸﻴﺔ ﻭﺩﻧﺎﺀﺓ ﻫﺎﻟﻨﺎﺱ .. ﻭﻳﻌﺮﻓﻮﺍ ﺍﻥ ﻣﺶ ﻣﺒﺎﻫﺎﺓ ﺍﻭ ﻣﻔﺎﺧﺮﺓ ﺑﺲ ﺣﺒﺎ ﻓﺪﻳﺖ ﺍﻟﺒﻼﺩ ﻫﺎﺩﻱ ﺑﺮﻭﺣﻲ ﻭﻻ ﺃﺭﻳﺪ ﻣﻘﺎﺑﻞ ﻣﻨﻬﺎ ﺇﻻ ﺍﻧﻬﺎ ﺗﺬﻛﺮﻧﻲ .. ﻧﺰﻟﺖ ﺩﻣﻌﻪ ﻭﻣﺴﺤﺘﻬﺎ .. ﻭﻭﻗﻒ ﺍﻟﻔﻴﺪﻳﻮ .."
ﺍﺣﻤﺪ ﻭﺳﻬﻴﻞ ﻭﻣﺤﻤﻮﺩ ﻛﺎﻧﻮﺍ ﻣﺬﻫﻮﻟﻴﻦ ...
ﺳﻬﻴﻞ ﺑﺼﺪﻣﻪ : ﻻﺯﻡ ﻧﺒﻌﺘﻮﺍ ﻭﺣﺪﻩ ﺗﻤﺸﻲ ﻟﻠﺤﻮﺵ ﻓﻮﺭﺍ ...
... ﻳﺘﺒﻊ
