#الحسن
#جمان_فريد
الجزء 16💓💓💓
وصل حسان لحوش جده ومعاه خواته جنان وخوله...طبعا عروسته كانت سابقاته..جابوها خوه الكبير علي ومرته وبنتهم ميسون ...طبعا وصلت عليا حتى هي وجابوها سرمد ومعاه انعام وخوله ...واتنين مقعمزين في الصاله الكبيرة اللي يديروا فيهاعيله الحاج علي مناسباتهم وعزايمهم الكبيرة..والمعازيم طبعا يقارنوا بيناتهم ...هاله فيلوها كان عادي ومكياجها تقليدي..وهي كانت ضاعفه هلبه هلبه ومافيش ع وجهها ابتسامه ..
عليا كانوا فيلوها مش تقليدي زي القفطان ولأن شعرها قصير دارتلها المزينه نفخه بسيطه ونزلتلها خصله مموجه غليطه ع وجهها وكانت حاطه "هيدبيس " ع شعرها..مافيش طرحه..
ومكياجها كان ناعم لكن ابرز جمالها الفاتن..بس حتى هي عابسه..الناس لاحظوا...وكذلك أهل العرسان اللي معرفوش كيف يديرولهم بش تتغير رياكشنات وجوههم..
عند خيمه الرجاله
اللي كانت نظام الخيم الأوروبيه وكبيرة هلبه..وفيها معازيم من كبار الناس قدرا ومناصب .. العرسان الزوز كانوا لابسين بدالي سود...وطالعين خياااال😍😍😍...
حسان كان يشبح للحسن اللي كان مقعمز بين الضباط من المعازيم...
حسان "اليوم هذا اسود يوم فحياتي وكله منك انت اللي طيحتني في هالبلوه الغبرة..."
قعد يفكر يبي يدير شي للحسن ع قد مامقهور منه..شبحله وشبح لمعازيمه..شويه وحرك عيونه جيهة الدي جي اللي كان مداير أغاني ليبيه لمحمد حسن بس...ضيق عيونه وهو يشبحله..بعدين حرك عيونه جهة عمه سرمد اللي كان واقف ع واحد من المعازيم ويهدرز..لمعت في راسه فكرة خبيثه ابتسم بمكر...بعدين نادى.
حسان: ععععممم ساااااام..
سرمد سمعه واشرله براسه بمعنى شنو..اشرله هو براسه بمعني تعالى ..
سرمد استأذن من اللي كان يكلم فيه وتوجه لحسان..
سرمد بضحكه: شنو ياعريس...
حسان : قاعد عاشق للتحديات...!!
سرمد غمض عيونه :انت غير جبت سيرة التحدي..جسمي تقعشر...وقلبي يضرب بقوة...
حسان: ههههههههههه...تمااااام...نبي نتحداك تحدي وبالمرة نخلوا هالليله مميزة ولاتنسى...
سرمد بحماس: قوووول هياااا...
حسان : نتحداك تمشي لدي جي وتغير أغنيه من اللي دايرهم وتحط حاجه غير وتغني وترقص معاها...
سرمد شبح للحسن: انت تبي تقصر ايامي من الدنيا
حسان: هههههههه...انت عمه مهما صار..
سرمد شبح لحسان ...
حسان : خلاص فوت ولاكأني قتلك شي..
سرمد وقف ع حيله..ومشي طلع من الخيمه..لحظات وخش ووقف ع دي جي...حسان كان يراقب بحماس...
دي جي: قسما بالله ماعندي قدره نواجه الفندي..
سرمد بضحكه: خليها عليا اني نتحمل المسؤوليه...
دي جي: اني مادخلي بشي..
سرمد ابتسم:اطمن ...
سرمد وجه نظره للحاضرين وزع نظره عليهم وابتسم ..سكر الأغنيه اللي كانت محطوطه وحط سي دي من عنده...
شد المايك وقدم ..وكلهم وجهوا نظرهم ليه ...وبدي يغني ...
مافيا مافيا
مافيا مافيا مافيا
مافيا مافيا
مافيا مافيا مافيا مافيا مافيا مافيا...
كلهم يشبحوا بصدمه إلا حسان كان يضحك🤣
مابخفش من حد ولاعمري حكش
وأي حد يواجهني حخده وش
مادام ع الحق خاخد حقي آه معلش
ولومش فايق يلا روح اعمل ريفرش...
الحسن عيونه يقدح منهم النار..عار معرعر قدام الناس اللي عازمهم...سرمد كان يغني ويرقص ويتجنب يشبحله..شبح لحسان وأشرله يجي..ناض حسان بقوة واندفع وقعد يرقص ويغني معاه..
مافيا مافيا
مافيا مافيا مافيا
مافيا مافيا
مافيا مافيامافيا مافيا مافيا مافيا مافيا...
في اللي كانوا يضحكوا وفي المصدومين وفي اللي عجبهم الجو..والحاج علي معاش عرف يتصرف لين تمت الأغنيه...
سرمد يتكلم بالمايك: حبيت نكسر الروتين ونغير الجو شويه ونخلي هالليله مميزة بزياده لولاد خوتي جت عينه في عين الحسن اللي شبحله شبحه قسماته نصين بلع ريقه..وغير نظره بسرعه...
...
فاتت اجواء العرس وتمت الحفله.. وجي وقت العرايس يركبوامع عرسانهم للشقق
طلعت هاله الأولى..مابتش تشبح لحسان بكل ولاهو...زغرطتت عليهم برنيه...وركبوا هما الزوز لشقتهم هو قدامها وهي وراه والإتنين تقول ماشين بيعدموهم...
...
الحسن كان يستنى...طلعت عليا ...كانت لابسه الكاب ومش باينه زين هو شبحلها بطرف عينه..
برنيه: اسمع ياولد البنيه أمانه ف رقبتك حط في راسك ره الزواج مسؤوليه اكبر من مسؤوليتك في الخدمه..
الحسن : كلامك ع راسي ياحناي..اطمني حنكون قد المسؤوليه مهما كانت...
برنيه : وانتي بنيتي..نهار يغلط فيك تعاليلي اني ولاالحاج علي طول وحقك حناخدوه تالت ومتلت..
عليا ابتسمت: ربي يطول فعمركم ع طاعته..
الحسن يشوفلها بطرف عينه ومبتسم ع جنب..
برنيه : سلمك بنيتي..هي بري اركبي مع راجلك لحوشكم..
عليا بلعت ريقها ومشت معاه..
ركبوا الزوز هو قدامها وهي وراه..هي مخنوقه هلبه..اما هو فكان قلبه ..قربع قربع قربع قربع...
...
خلينا نشوفوا شن صار مع حسان وهاله..
اول مافتح الباب خش وخشت وراه ..سكر الباب..
هي برغم خوفها استجمعت نفسها..وقامت عيونها فيه..انصدمت فيه كيف طالع حلو وجذاب هلبه تلخبطتت مرة وحده..
هو لاحظها ابتسم بتهكم ورفع حاجبه بغرور..هي ركزت ع نظرته..رجعت لوعيها...وارتسمت ع وجهها ملامح حاده..
دار النوم وين..
حسان بضحكه خبيثه: لهالدرجه عجبتك..
هاله صدمتها كلمته بس تشجعت وقالت: يععع..مجرد تخايلت قريب رجعت..
حسان فتح عيونه بصدمه ..
هاله : ترا حول ...دفاته وقعدت ادور بروحها لين لقت دار النوم..خشت وسكرت الباب بالمفتاح...
حسان تكنطى ومشي قعد يخبط عليها في الباب..
حسان : افتحي ياشينه ..ماعندي ماندير بيك ره...نبي ناخد حوايجي بس..وبنرقد في ابعد نقطه عنك في الحوش..تعرفي علاش..هههههه..لاني نخاف من الأشباح...
مافيش رد
حسان: افتحي ياغوله تي غير من حاير فيك..ههههههه..حتى المكياج مافلقش في زومتك...
شويه وانفتح الباب وطلعت وكانت لابسه توته مسكرة ووشاح..وفاتت من جنبه للمطبخ..لحقها وهو يضحك بسخريه..
حسان: هههههههههههه غير علاش متعبه روحك..والله والله مافيك مايحرك فيا شعره..اني شفت الحمر والبيض والسمر الفاتنات..انتي جنبهم يتحشموا يحطوا جنب خانتك أنثى..
هاله وهي واقفه ع الثلاجه..خنقتها العبره.. طلعت كيكه وعصير..وسكرت التلاجه وطلعت من الكوجينه وفاتت من جنبه وولت للدار وخلتها مفتوحه وتجاهلاته تماما..
خش ووقف ع الدولاب بياخد حوايجه ويشوفلها كيف تاكل وتشرب...
حسان "والله لما نخليك تبكي ليل ونهار..."
....
عند عليا والحسن..
فتح الباب..
الحسن : تفضلي ...وخر...وخشت هي قبله...وخش بعدها ورد الباب ...
الحسن : دار النوم تمشي طول تنزلي درجتين ع يدك اليمين دار النوم...
المطبخ ع ايدك اليسار..احمم..خودي راحتك هذا حوشك توا..
ولف وطلع وقف وهو عاطي بظهره.. تبي اي حاجه...كلميني اني حنبات لوطا وحنقعد فايق..
عليا : شن حيقولوا لو شافوك لوطا..
الحسن وهو عاطي بظهره: مافي حد حيعرف..وطلع وسكر الباب...
عليا قعدت تشبح جهة الباب هلبه...تنهدت ومشت وين ماقاللها وخشت لدار النوم حولت كابها حاطته ع السرير وقعدت تشبح لدار النوم كيف كانت حلوة هلبه وراقيه...
"ايه نسيت نقولك"...
التفتت طول ...هو قاعد مسهم فيها عيونه انفتحوا ع وسعهم وفمه انفتح شويه من كثر ماانبهر من اللي شافه..
آية من آيات الجمال قدامه..عيونها...آاااه من عيونها..هما سبب تمرد قلبه عليه..اللي بدي كل مايشوفها يبي يفر..يقوله اني موجود اني نحس..اني نبي نحب...نبي نعيش الحب..مش حتقدر تمنعني أكثر من هكي...وزع نظره عليها ..ركز بنظره ع شفايفها المليانات المكتسيات باللون الأحمر..
عليا مركزه ع نظراته وطت عيونها لوطا واحمروا خدودها من الخجل: شن بتقول..
الحسن استاقض : احمم....غدوا...الصبح..غمض عيونه وضرب بصوابعه ع راسه..احمم غدوة الصبح..الفطور لوطا الساعه 8:30 بالزبط..
عليا: باهي..لف وطلع بسرعه..وسمعت الباب متاع الحوش تسكر بالقوة...تنهدت....وطلعت حاجه من شنطتها بش تلبسها...
...
كنت عارف من البدايه..
الحسن : شن عارف؟
سرمد: تزوجتها لإنك حسيت اتجاهها بالمسؤوليه..مش لأنك تبيها..
الحسن قعد ساكت ويتفرج ع النجوم..
سرمد شبحله:تعرف للحظه قريب صدقت انك بديت تحب..
الحسن ابتسم بتهكم..
سرمد رجع شبح للسمي:شن فبالك توا..كيف تتقدر تتفاهم مع العيله مع حناك تحديدا...
الحسن: بنخلي كل شي للوقت...ايه حقه..خدي شرشاف وضربه بيه...شن العار اللي درته بكري...
سرمد حول الشرشاف من علي وجهه: خوك شيطان الرجيم غرني..قالي نتحداك دير هكي..وانت عارف تاثير كلمة نتحداك عليا..
الحسن : حلال فيكم الواحد يحبسكم تلاته ايام الصبح طريحه في الليل طريحه ..ومايخش بطونكم اخطا كسرة خبزة يابسه وطاسه ميه وحده في اليوم..
سرمد فنص عيونه : لا إله إلا الله...
***
هديكا الليله مرت ع كل واحد بشكل...
عليا اللي كانت راقده ع السرير وتبكي..وتفكر في حياتها اللي انقلبت في مرة وحده وكيف كل شي تغير تماما...عكس ماكانت تبي وتتمنى.ليلة عمرها ماحستش بيها كانت ليله باهته بلامعنى..بدت حاسه روحها من هاللحظه مجبرة ع انها تعيش حياة جديده انفرضت عليها..
هاله اللي كانت مش احسن حال منها تبكي ع حظها اللي جابها لحسان..اللي كانت تسمع في صوته برا كيف يكلم في وحده مكالمة فيديو وكلام غزل وكلام تاني خارج التغطيه ..سكرت وذانها بإيديها بش ماتسمعش وقعدت تبكي..
اما الحسن فكان يتأمل في السمي المعبيه نجوم اللي كانت اقربله من عليا..اللي قاعد يتصارع هو قلبه ومشاعره بش مايستسلمش لحبها...لانه حيضعف ..وهو أكثر شي يكره يعيشه الضعف..
من جهة تانيه...
ريحانه كانت تبكي وهي تذكر في عليا كيف كانت طالعه .
وكيف لمحت الحسن كيف كان لابس بدله سودا وطالع فيها غايه في الوسامه والجاذبيه ..علاش مكانش نصيبها علاش مش هي عروسته...طول الليل تقول لنفسها فالكلام هذا وتبكي بصمت..
وفي مكان بعيد عن بلادنا
كان شبه ثمل من الشرب ويرقص في وحده من البارات وحاوليه بنات الليل..من قهرته قاعد يدير هكي..حبيبته اللي حلم بيها من لما كانت صغيره...وكان ع وشك هالحلم يتحقق..غيره خداها منه بش يحققه..او هو اللي ضيع هالحلم بإيديه ...
***
تاني يوم
الصبح
الساعه 7...
كان جعفر يشرب في قهوة الصبح مع زينب ..
جعفر تنفس بعمق وابتسم: حاس روحي خفيف ريشه..
زينب وهي تشرب في القهوة: اممم..حتى اني هذا وين تريحت ع بنتي...
جعفر عبست ملامحه: بس تعرفي قاعد مش قادر نمشي حكايه ان بوه وأمه مش راضيين..
زينب: معليشي ..سيورهم يرضوا...انت كان تشوف الحاجه كيف فرحانه بيها..وخواته حتى هما...الحمد لله..
جعفر: الحمد لله ..بس زعمه حتتأقلم معاهم؟!
زينب: هما ناس طيبين وعليا حتحبهم وحيحبوها..
***
ناضت الصبح توضت وصلت ولبست قفطان أزرق كحلي فيه حزام بيج من النص ومنفوخات كمامه من جهة الكتاف ولبست وشاح بيج واكتفت بلمسة أي لاينر في عيونها..ومرطب شفايف ع فمها..ولبست خاتم ذهب ع هيئه ورده..ركزت ع ايدها لقت حديده منصف شبحتلها هلبه بعدين حولتها وحطتها ع الزيانه..ولبست كندرة خفيفه..وطلعت من الحوش..
وهي طالعه لقت سلفتها طالعه من شقتها في نفس الوقت كانت لابسه سروال اسود واسع شوي وبلوزة طويله لونها رصاصي ووشاح اسود فالرصاصي..ابتمست عليا..
عليا: صباح الخير..
هاله ابتسمت : صباح النور...
عليا : نازله ؟
هاله : ايه..
عليا: تعالي ننزلوا مع بعض ..
هاله ابتسمت: هيا..
نزلوا الزوز ...لين وصلوا في الباب الفاصل لقوه مردود طقت عليا ع الخفيف..ماحد رد...
عليا بضحكه : خل نخشوا عادي عيله توا حني ..
هاله بضحكه: ايه..
فتحت عليا الباب وخشوا وقابلتهم الصاله ...كان الحوش هادي وواضح ماحد فايق غيرهم..
عليا: شكلنا زي اللي يقولوا عليهم المصاروةصحيوا من النجمه..
هاله : ههههه ايه قبل الشحاته وبنتها...
عليا : هههههههه..
هاله: تعرفي متعوده اول مانوض ندير دورة ع حوش ونبخره بالوشق ونحط بكرج قهوه ع النار..سكتت شويه..وندير فطيره..
عليا بإبتسامه: خلاص نقسموا اللي قلتيه بيناتنا..
هاله : اني ندير الفطيره والقهوة
عليا بضحكه: اني مالا حنضم ونبخر...زعمه الكوجينه وين..
هاله : تعالي نستكشفوا..ضحكوا الزوز وقعدوا يدوروا لين لقوا الكوجينه كانت مسكره
خشت عليا مع هاله دورت معاها الحاجات..لقوهم ..خدت عليا الوشق وطلعت..وهاله حطت بكرج كبير ع النار وبدت تعجن في الفطيره..
عليا لادت عالحوش وبخراته كله ..حطت البخاره ع الطاوله حدا الروشن...ووقفت تتفرج ع الجنان اللي كله غرس وشجر وكان منسق وكبير وحلو هلبه..
ع طلعت الحاجه برنيه من دارها شمت الوشق المخلط بريحة القهوة والفطيره..ابتسمت بإستغراب..شبحت للحوش لقاته مرتب وريحة الوشق فاحت اكثر ولقت عليا واقفه ع الروشن قربت منها
برنيه : صباح الخير بنيتي..
عليا التفتت وابتسمت : صباح الخير ياحناي وباست ع راسها..
برنيه عجبتها الحركه: نايضه بكري..
عليا بضحكه : مش بروحي..حتى سلفتي معاي...
برنيه : بالله!!
عليا : تعالي معاي ياحناي..شدت عليا فيد برنيه ومشوا للمطبخ..لقت هاله اطيب في الفطيره...وكانوا طروفها كبار وشفافات ومنظرهم يسهف...
برنيه: اللهم صل ع النبي..
هاله التفتت وابتسمت وجت لبرنيه باست ع راسها: صباح الخير يا...شن تحبي اناديلك...
برنيه بإبتسامه : زي مانادتني سليفتك...حناي..
هاله بإبتسامه: حاضر...
خدت برنيه طرف فطيره قسماته ع عليا وذاقوها ..
برنيه : مصلي ع النبي فيها الزايد ...
عليا : والله عندها الحق اللهم بارك..
هاله بإبتسامه : صحتين..
برنيه : سلمك بنيتي..ايه ..خل نلحق ندير عصيده جدكم الحاج يبيها فطور..اول ماتبدا الدنيا تصقع يطلبها..
عليا: حناي خليها عليا..
برنيه : اللطف ياربي عرايس ومن اول يوم ع التطييب
عليا وهاله اضايقوا لما سمعوا كلمة عرايس...
عليا تصنعت ابتسامه : عادي ياحناي..بالله عليك خليني نديرها..
برنيه بضحكه : على كيفك هي ديريها...
عليا لبست المرقه وقامت كمامها وبتبدا فيها..
برنيه تشبحلهم وفرحانه بيهم بعدين خطر ع بالها سؤال: وين رجالتكم؟!
الزوز تبتوا ع لقطه ..تشجعت هاله وجاوبت: احمم قاعد راقد
عليا : احمم وحتى اني خليته راقد..
برنيه هزت راسها بإيجاب برغم انها حاسه ان في شي...
***
روح للحوش بعد صلى الفجر ورجا لين تفتح الكوشه بش ياخد خبزة...توجه للكوجينه سمع صوت بكي..خش لقي مرته تبكي..
عابد : وسيله؟؟
وسيله قاعده تبكي ..
عابد حط الشكارة ع الطاوله: استهدي بالله خلاص..
وسيله ببكي: والله قهرة...قهرة..ولادي الزوز تزوجوا وكل واحد نصيبه احرف من التاني ..وفوقها اني مانكونش معاهم ..بالذات الحسن..الحسن اللي نتصبح ونتمسى واني نراجي أمتى يتزوج...يتزوج هكي ..واني مش معاه..لاخطبتله لافرحتله لازغرطتله..لاشفته عريس لابس البدله..وقعدت تبكي أكثر..
عابد: عرس علي لتوا الناس تحكي بيه وبكرنا وفرحنا بيه..قدرلنا ربي في الحسن مانفرحوش هالفرحه الحمد لله ..قضاء ربي وقدره وفيه الخيره اهم شي يتهنوا ويرتاحوا..
وسيله زادت تبكي..وعابد حرك راسه يمين ويسار بأسف..
***
العيله بدوا ينوضوا ...باقي النساوين خشوا يعولوا ع الفطور...
انعام ...ساره..فاطمه...ريحانه..اللي كانت تتمنى لو في إيدها الموت تطلقها ع عليا وهي تشبح فيها كيف تهدرز وتضحك مع العيله واندمجت معاهم من اول يوم
....
صباح الخير ياجدي..
الحاج علي وهو يغسل في ايديه وبرنيه تصب عليه: صباح الخير يافندينا..
سرمد: صباح الخير يابوي...
الحاج علي : خير من وجهك انت يجي خير!!
سرمد فهم بضحكه: عادي ياحاج مشيها بجوها...
برنيه : عينك يامدقوق..تحساب روحك صغير ..
سرمد : تلاقيتوا عليا...خلاص استسلمت ..سامحوني وامسحوها في وجه الحسن..
الحسن ضربه ع كتفه..
سرمد يتحسس في كتفه: 😂
الحسن شبح للصونيه اللي بحدا جده: فطرت عصيده..
الحاج علي: ايه ومش أي عصيده حاجه ماشاء الله..
سرمد: عصيده الحويجه مالا شنو..
برنيه : لا والله ماحطيت فيها يد..
الحسن : منو اللي دارها بش الحاج شكرها هكي..
برنيه بإبتسامه: مريتك...
الحسن قلبه بدي عاد 💓💓💓💓💓💓💓💓
سرمد: بجدياااات!!!
برنيه: تي كان تشوف منين نضت الصبح هذاكا الحوش المضموم والوشق اللي يفحفح والقهوة ع النار والفطيره..اللهم صل ع نبي زي مريتك زي مرت خوك ...كناين الفروح...
الحسن ولاكلمه يسمع وبس..
***
ايه وانتي هاله..
هاله : اني طالبه في كليه اللغات قسم انجليزي نقرا سنه تالته..
انعام : ماشاء الله ..يعني تتكلمي انجليزي كويس..
هاله بضحكه: تقدري تقولي هكي...
سارة بضحكه: الله وحد ع كناينا ...
كلهم ضحكوا...
فاطمه: عليا بنيتي قصصي الخبزة
عليا : حاضر...
وف عز ماهما منشغلين...
"صباح الخير"..
عليا لما سمعت الصوت ارتبكت جرحت ايدها: آااه..
خش طول وجاها شد ايدها: بسرعه انعام طلعي قطنه وفاشه وسبيرتوا..
انعام مصدومه هزت راسها بإيجاب...وجابتهوله من الدولاب اللي فوقها..قعد يعقم في الجرح:وين كان عقلك ..
عليا ووجهها أحمر: مادخلكش..
شبحلها وهي عيونها في صبعها...رجع لف الفاشه عليه ووخر...
كلهم واقفين يتفرجوا بصدمه...وهاله ابتسمت بألم..حست إن في فرق كبير بين حسان وخوه..
الحسن شبحلهم كيف يشبحوله وجه انقلب الوان...هو نسي روحه لما سمعها توجعت..
الحسن: بسرعه مدوا مفرش الفطور..عندنا مانديروا ...وطلع طول..
ساره شبحت لعمتها بدهشه..وانعام ابتسمت وغمزتلها وسارة ضحكت وشبحت لعليا اللي غاصت في قصان الخبزة من الخجل...
اما ريحانه فكانت تشبح بغل ووقعدت تخلط في الطن بالزيتون بغل غلها..
***
غدوة...
بلال: ايه غدوة إن شاءالله..
الساكته : باه ...إن شاء الله خير..لكن اسمع كان لقيتها مش قنينه ..انسى
بلال : ههههههههههههه...حتعجبك هلبه يام صدقيني..
الساكته بضحكه : تو نشوفوا...
....
وعلاش قلتيلهم تعالوا...
ابتسام : استاحشتهم..
عبدالقدوس: استاحشتيهم وانتي اسبوع اللي فات كنتي عندهم؟
ابتسام تاكل: اممم..بابا اني نشم في ريحه امي في خالاتي طبيعي كان نلقا نشوفهم كل يوم...
عبدالقدوس شبحلها بشك"نقص ايدي من منبتها كان طلعتي ماتعرفيش هذاكا الهلفوت ..لكن ظفرك ماحيطوله لو اضطريت نقتله"...
ابتسام شبحتله: افطر بابا..
عبدالقدوس: واني شن قاعد ندير نفطر..!
ابتسام رجعت تشبح لفطورها وهي تتحاشى في نظرات الشك متاع بوها ..وهو رجع يفطر ويفكر شن حيدير لو طلع اللي فباله صح...
...يتبع...
