#الحسن
#جمان_فريد
الجزء 37
جناااان...
جنان التفت تشبح لخوها اللي جاي بسرعه والخوف ماليه ..وصل فيها..
الحسن بخوف شديد: وينها!!!
جنان: داخل...طلعت مغمى عليها الراجل شد فرينو قبل ليوصل فيها ..
الحسن : وعلاش اغمى عليها..
جنان: الدكتور قال ضغطها هابط ودمها نازل..
الحسن بلع ريقه ووزع نظره ع المكان لين جت عينه ع صحباتها واقف عليهم واحد..
الحسن : منو هذا..
جنان التفتت: اه..هذا الشاب اللي قريب ضربها هو اللي اسعفها ..
الحسن قدم جيهتهم ولحقاته جنان..
ابتسام: ياخوي والله ماليه لزوم خلاص هي كويسه
الشاب: لامش حنمشي لين نطمن عليها ونشوف شن تبي وشن محتاجه..
نرجس: علاش هذا كله كان ضربتها نقولوا...
الشاب: اكيد اغمى عليها من الخوف..
نرجس: ياودي ضغطها هابط من الأصل..
الشاب يشبح لغرفتها : نقدروا نشوفها..
الحسن اللي كان يسمع في حديثهم: نقدروا نشوفوا عرض كتافك..
الشاب شبحله : من حضرتك..
الحسن: توكل ع الله توكل..
الشاب: شن علاقتك انت..
جنان: راجلها...
الشاب:😨اسف جدا جدا..لاباس عليها نستأذن...وطار من قدامه طول والحسن يشبحله بإزدراء..بعدين لف وجهه جهة صحباتها..
الحسن: خشيتوا شفتوها ..
نرجس: لا حصلنا في هذا..تو بنخشوا بعد اذنك طبعا..
الحسن : تفضلوا..شبح لإبتسام اللي مابتش تشبحله..ابتسم بتهكم..
خشولها البنات...
جنان: لولو حبيبتي لاباس عليك..
عليا وهي راقده ع السرير ودايريلها تغذيه: ماتشوفي باس..
ابتسام: قريب متنا من الخوف عليك علاش هامله روحك هكي..
عليا دمعتها نزلت طول..
نرجس: والله خوفتينا عليك هلبه..
عليا بصوت باكي: سامحوني..
جنان: الحسن لبرا..
عليا شبحتلها ونزلوا دموع بدل الدمعه..
جنان حست بأن في شي صاير بيناتهم...
***
أبله ريحانه في ولي امر يبي يشوفك ..
ريحانه: ووواك..
الأبله بضحكه: لوطا في الإداره..
نزلت ريحانه وهي تتأفف وصلت لمكتب المديره..طقت بعد اذن الدخول خشت..قعدت جامده في مكانها..
المديرة: خشي ابله ريحانه..
ريحانه تشبحله بصدمه وخشت ..
المديرة: نستأذن..
ريحانه فنصت : ابله سهير
المديرة: هو قال بيدوي معاك في شي خاص ببنته..
ريحانه قعدت تشبح للمديرة اللي طلعت وسكرت الباب..شبحتله هو..
ريحانه بغضب: ولي امر ومداير العار وتلاحق في ابلة بنتك بالذمه انت اب صاالح انت اكيد بنتك وحده من الحميرات المزبكات قليلات الادب اللي نقري فيهم..هادوما حالفه بالله ماضاله إلا مسقطتهم..وانت لو جاتك مراهقة متأخرة برا عيشها قدام ثانويات البنات..وناضت جت بتمشي..شدها من ايدها وجبدها ليه..
منذر: جروة..ولسانك طويل..لكن خشيتي راسي هلبه..
ريحانه: حول ياوسخ حول..
منذر: غصب عنك حتحبيني ..وتموتي فيا..بتسكري راسك حنكسره..وغيري مش حنخليه يفكر فيك حتى مجرد التفكير...
ريحانه بكل قوتها فكت يدها ودفاته: واحد معفن زيك انت مايحلمش يطول ظفري ..ومشت طلعت من المكتب وخلاته.
منذر: نو نوريك شن يديرفيك المعفن اللي مش عاجبك ياجروة...
***
طلعوا من بحداها صاحباتها وخلوها ترتاح لين تم التغذيه روحوا وجنان معاهم اللي روحت بطلب من الحسن..
الحسن كان مقعمز برا ع نار يبي يخش يشوفها..ناض وجي جهة الباب فتحه بالشويه وخش..لقاها راقده سكر الباب بالشويه ..وقدم لين وصل فيها قعد يشبحلها ويتأمل في تفاصيلها اللي يعشقهم 💓..
قرب وقعمز حداها ع سريرها...وهو يشوف لملامحها الذبلانه...هو فهاللحظه حس روحها ان ظلمها..وتأكد ان منصف يبي يدير اي بش يفرقهم..تنهد حط ايده ع ايدها..هي برودة ايديه لما لمست ايدها السخونه فيقتها..فتحت عيونها بالشويه تحساب روحها تتخايل سكرتهم وفتحتهم من جديد وتأكدت ان هو كانت نظرته كلها خوف عليها..
الحسن : شن تحسي...
عليا وهي تشبحله كانت تبي تقوله نحس في قلبي ..قلبي مفطور مجروح وانت السبب..بس ردها كان بدون كلام ..سحبت ايدها من ايده ولفت وجهها للجهة التانيه..
الحسن مااضايقش ..ممكن عذرها اللي هي فيه بسببه..هو اللي عذبها ووصلها لهني..بس مش منه لو هي تعذبت مرة هو تعذب قدها 100مرة..
الحسن: شويه وتطلعي...
عليا: روح بيا لحوش اهلي..
الحسن انصدم..
عليا شبحتله بحده : مش اني في نظرك خاينه وانت عايفني ..خلاص روح بيا لحوش اهلي..ولو تبي تخلص ع أخر ..عطيني كلمتي..
الحسن قدم: حتروحي معاي ورجليك فوق راسك..ولو اني شايفك زي ماقلتي..لحظه ع ذمتي ماتقعدي...وخلاص منك مانبيش نخلص..ولاانتي حتخلصي لو كنتي تبي الخلاص...وتوا تمرقدي لين اتم التغديه..
ولف وطلع وخلاها مفنصة من اسلوبه..شويه وملامح وجهها تغيرت لإبتسامه وهالأبتسامه تحولت لضحكه..تبعتها تنهيده طالعه من القلب❤...بعدين غمضت عيونها وهي مبتسمه وتتذكر في شكله كيف كان قبل شوي💖
***
ماشيه وفي ايديها ورقه وكانت تمشي بعصبيه لين وصلت لمكتب الأدارة..
خوله:السيد رياض موجود
السكرتيرة: ايه موجود..
خوله: ياريت تقوليله نبي نشوفه ومش حناخد من وقته 5دقايق..
السكرتيرة ركزت عليها انها معصبه : حاضر..كلماته السكرتيرة وسكرت..
السكرتيرة: تفضلي..
خوله طول توجهت للمكتب فتحت الباب وخشت داخل وبقوة واندفاع..حطت الورقه ع الطاوله: لو سمحت وقع..
رياض يشبح للورقه ببرود: شنو هذا..
خوله بحده: استقاله..
رياض: السبب..
خوله شبحتله برفعة حاجب: أنت ادرى..
رياض شبحلها ببرود: ارفعيها وولي لمكتبك..
خوله بعصبيه: حتى لورفضتها مش حنولي..ولو بتقولي عقد ماعقد مش حيهمني..وقعاد هني معاش قاعده ...
انفتح الباب وخشت بنيه صغيرونه ووراها وليد..
يقين وصلت في بوها وتشبح لخوله: بابا خيرها..
رياض ابتسم لبنته: معصبه شويه ..
يقين مشتلها ووقفت قدامها: ترا انزلي شويه..
خوله بأبتسامه خفيفه نزلت لمستواها..حطت البنيه ايدها ع راس خوله وقعدت تمشي عليه: لما بابا يزعلني هكي اديرلي حنينه معاش نزعل بعدين..
خوله ابتسمت: شن اسمك..
يقين: يكين..
خوله بضحكه: يكين..انتي حلوة هلبه...
يقين: حتى انتي وضحكت..
خوله شبحت لرياض باست يقين ع راسها ووقفت: ماغيرتش كلامي ...والتفت وطلعت وهما يشبحولها..
وليد شبحله: توقعت ردة فعلها هادي..
رياض وهو مبتسم ويشبح جهة الباب: توقعت اسوأ من هكي..وشبح لبنته ..بس يقين كان ليها تأثير خاص..❤
***
واقف يشبحلها والممرضه تفكلها في يبرة التغذيه وتساعد فيها تنوض..بعد ناضت..مشتله ..
الممرضة: لاباس عليك..
عليا ابتسمت : لايوريك باس..
طلعت الممرضه ..وهي وراها..وهو وراها هي...
عليا تمشي وهو جنبها..
"مش هذا الحسن الصادق"
"ايه هو جذاب ع الطبيعه اكثر"..
عليا شبحتلهم بحده وشقلبت عيونها وهي تمشي..
تلاته تانيات..
"هو هو مش قتلك"
"عليك شخصيه تقتل"
"حرام هذا ياخد وحده بس"
فنصت عليا والتفتت تشبحلهم وهي تمشي بعدين شبحتله هو ماشي ولاكأنه في شي..
وصلوا للواجهه...
"حييي الحسن الصادق"
"هووو ياقلبي "
عليا في نفسها"هذا غير ضابط شرطه مالا كانه ممثل ولا مغني شن درتوا"..هي شبحتله ومن غيرتها قربت منه وشدت في إيده ..هو تكهرب كالعاده تأثيرها عليه المعتاد لما تلمسه ..شبح لإيده شبحلها لقاها تشبح القدام بعصبيه وحواجبها مقرونه...زبطها غارت..ابتسم ...وقعدوا هكي لين وصلوا في السيارة..فتحلها الباب ومشي ركب..هي ركبت..وتحركوا...
***
روحوا أهل عليا لحوشهم وهما خاشين...
"أمي"..
جعفر وزينب التفتوا بصدمه...
منذر بألم وشوق: امي حمد لله ع سلامتك..
زينب تشبحله بحده وعيونها مليانات دموع بينما جعفر ملامح وجهه تبدلت لملامح مرتاحه..
جعفر: زينب قوليله يخش للجنان...وخش داخل..
هو شبح لبوه لين خش وبعدين شبح لأمه..
زينب بنبرة حاده: تعالى خش...وخشت..
منذر بفرحه خش داخل.."طبعا متنكر بطاقيه ومداير لحيه ونظرات"..
خش لقي امه مقعمزة وتشبحله: تعالى قعمز..
قدم بخطوات مستحيه وقعمز حداها..
منذر: امي كيف حالك..
زينب : الحمد لله..
منذر: شن قالولك غادي..
زينب: معروفه بنيتي ضعيفه عطوني حبوب مقويه لازم نمشي عليها ديمه...
منذر: امي لو تبي نطلعك...
زينب: نموت ولاينصرف عليا قرش حرام..
سكت منذر وبلع ريقه..
زينب: اطمنت ع حالي توا توكل امشي بسرعه..
منذر: حاضر.... بس قبل لنطلع بالله عليك امي بالله عليك خليني نبوس ايديك بالله ..
زينب شاده دمعتها بالقوة وقست قلبها بزياده: اطلع ...
منذر ابتسم بألم ويأس...وناض..خدي شهيق وزفير وجي بيطلع ..امه كانت تشبحله وجت بين عيونها ذكرى من الماضي..
فلاش باك..
زينب: بإذن الله حتفوز ..تمسك بالدعاء اللي علمتهولك..
منذر ابتسم: حاضر..
جعفر من برا: هيا يامنذر...
منذر بصوت عالي : جااااي يابوي..امي عطيني ايدك..
ابتسمت زينب مدت ايدها وباسها منذر..ومشي وصل في الباب شبح لأمه ودارلها 🖐 وهي ردتها وطلع..
الوقت الحاضر...
شبحت زينب للروشن جنبها لقت جعفر يشبحلها شبحوا لبعض هلبه...اشرلها بعيونه..وهي ابتسمت..شبحت للباب منذر كيف فتح الباب...
زينب بصوت عالي : تعالى
تلفت منذر شبحلها لقاها ماده ايدها قاعد واقف مصدوم ...بعدين مشي يجري نزل ع ركابه باس ايدها بعمق باسها مرة اتنين تلاته وبعدين باسها من داخل أكثر من مرة..
قام راسه وشبح لعيونها لقي دموعها نزلوا..قام ايده ومسحهم ...قعدوا يشبحوا لبعضهم هلبه بنظرات شوق سنيين وسنين شوق من نوع اخر شوق ام لأبنها وشوق الأبن لأمه...شوق المتغرب وهو في بلاده..بدون تردد حضن أمه ..وهي معش قدرت لفت ايديها عليه وحضناته ..وبدوا يبكوا هما الزوز يبكوا بالعبره..كان يتمنى منذر في هديكا الله لو يموت يموت وهو في حضنها يموت براحه يرتاح من كل شي..وهي تمنت لو انها تقدر ترده في بطنها من جديد..بش معاش يفارقها..بش معاش في شي ياخده منها مرة تانيه...
هالمشهد كان يتفرج عليه جعفر..ودموعه تنزل بحرقه وبأسف...فهاللحظه رن تليفونه لقاه راجل بنته "الحسن" رد ..
جعفروهو يحاول يعدل نبرة صوته: السلام عليكم..
الحسن :وعليكم السلام الحمد لله ع السلامه.
جعفر : الله يسلمك ولدي..
الحسن: عمي حني توا خشينا لشارعكم..
جعفر شبح طول لمرته وولده..
جعفر: باهي ولدي نستنوا فيكم..وصكر..
الحسن استغرب بس ماباش يدقق..
جعفر طلع للجنان : نوض داخل اختك وراجلها جايين..
منذر شبحله وبعدين ناض...
زينب: هيا بسرعه خش ..
منذر شبحلهم الزوز..
طق الباب...
جبده بوه : هيا خش تحرك..
منذر زي المصدوم خش طول داخل...
جعفر وزينب مسحوا دموعهم...استجمعوا انفسهم خدوا شهيق وزفير..رسموا ابتسامه ع وجوههم...طق من جديد..
توجه بسرعه جعفر للباب وفتحه..
لقي الحسن وعليا ووراهم اميره..
جعفر: اهلا..تفضلوا تفضلوا..
الحسن : يزيد فضلك...
خشوا داخل سلموا الحسن وعليا عليه وبعدهم اميرة وتوجهت عليا لأمها حضنتها ...وسألتها ع حالها..وبعد سلام وكلام ..خششوهم داخل...جعفر وزينب واضح انهم مش ع بعضهم مش عارفين منذر قاعد في الحوش ولاطلع منه..
ناضت عليا للكوجينه هي وأميره...منذر كان فيها لما سمع صواتهم طلع برا الكوجينه من جهة الجنان ووقف حدا الباب
عليا واقفه ع الثلاجه ادور كان في عصير..وأميره فتحت الفريز ادور في الشكلاطه..
عليا : حاسه امي مش ع بعضها وكأنها باكيه..
اميرة بخوف: شن قصدك
عليا : ماتخافيش مانقصدش اللي فبالك بس انتي ناسيه اليوم شنو...
اميرة تفكرت : ايه صح..
عليا : جابته في ليلة عرفه..
اميرة: اسكتي بالله عليك ..ره تسمعك..
عليا حطت الباكو ع الرخامه وماقدرتش تشد دموعها
اميره: علياااا....
عليا قعدت تبكي ..
اميرة قربت منها : امي ياعليا مش ناقصه..
عليا ببكي: علاش هكي صارله علاش ..خوي الكبير اللي مفروض يكون سندي وظهري..هو سبب كسرتي وقهرتي ..
اميرة نزلوا دموعها...
عليا : بس تعرفي ع قد مادار قلبي مش كارهه بكل..
اميره: حتى مديحه تقول فيها تقول ندعي عليه وقلبي يوجعني ونستغفر بعدها...
عليا تنهدت : ربي يسامحه وخلاص...هيا خل نطلع الصفره...
طلعوا هما الزوز...
بس منذر برا كان واقف ع الحيط عيونه مفتوحات بصدمه ودموعه ينزلوا....شويه وتحرك بخطوات ثقيله وطلع من الحوش بدون مايحس عليه حد...
***
طالعه من الكليه عندها متأخر ..تفاجئت لما شافته واقف قدامها ومحول جبس ايده..ابتسمت بفرح ممزوج بالدهشه ومشتله طول..
هاله : حسان...
حسان بحب: قلب حسان❤
هاله بضحكه: ايدك كويسه معاش تحس بشي..
حسان قعد يحرك فيها قدامها..
هاله شبحت لوطا:ورجلك؟
حسان نقز ...
هاله : ههههههههههههه..
من بعيد كان يشوف فيهم شخص قلبه قاعد محروق..قاعد متمنيها ومتحسر عليها..انصدم لما شاف الشخص اللي بداته عليه أو هو هكي شايف ..شخص عكسها هي تماما واضح من لبسه ومن الضربه اللي في حاجبه اللي يديروا فيها الشباب الصايع أو هكي هونظرته...قدم جيهتهم ...
خالد: هي هادي النوعيه اللي تعجبك ...
التفت وانصدمت وحسان يشبحله بإستغراب..
خالدبتهكم: تسيبيني اني وتاخدي واحد زي هذا ..
حسان بعصبيه: من هو هذا...
خالد: قوليله ...ان اني اللي عشمتيه وفوتيه ياشيخه..
حسان بغضب شديد : بتصكر فمك انت ولانسكره بإيدي...
خالد: نماذجك انت مانخشش معاهم في جدالات ...ع العموم الطيبون للطيبيات وكملي الباقي بروحك ياشيخه...
هاله بحده: ايه صدقت الطيبون للطيبات هذا علاش ربي بعدني عنك وخلاني نصيبه ..لانه طيب من داخل..لانه يحب ربي لإنه يعرفه اكثر منك ..اللي خداك العجب وخلاك تزكي نفسك وتقيم الناس ع حسب نظرتك القاصرة ..برا راجع نفسك كويس وتعالى قيم غيرك..ياشيخ خالد..
خالد قهره كلامها خصوصا انه كان في مجمع شبحلهم بنظرة غل ولف ومشي..
اما هي في عز غضبها التفتت لحسان لقاته يشوفلها بحب بعشق بإعجاب..
هيا ابتسمت: هيا نروحوا وقت..
ابتسم وشد ايدها ولبس نظراته ومشوا...❤
***
روحوا للحوش خشوا ..ركبوا الدروج..مشت جيهة الفاصل
الحسن : ماتركبيش ...
عليا التفتت : شنو ..
الحسن اشرلها بحواجبه : خشي هني..
عليا : باه نبدل..
الحسن: قلت..خششي..
عليا سكتت وخشت وهو خش وراها..
الحسن وعليا: السلام عليكم..
برنيه : وعليكم السلام...لاباس بنيتي لاباس..
عليا قعمزت حداها: لايوريك باس حناي..
برنيه : ريتي شن درتي فروحك لاتاكلي لاتشربي لاترقدي كويس ..ره نشوف يابنتي مش عميه..اشقي بصحتك ره والله مانافعك حد كان صارتلك حاجه..
الحسن شبح لحناه برفعة حواجب...
انعام بضحكه: امي هههههههه...لاباس عليك لولو...
عليا : لايوريك باس...
الحسن : انعام نوضي حطيلي غدي
عليا بإحراج : احمم ..تونحط اني
الحسن : قعمزي انتي ..انعام حطيه برا..
انعام : بتغدا في الجنان..
الحسن هز راسه بإيجاب: ولو درتوا عصير من فواكه الحوازة حطيه
انعام ابتسمت : تمام..وناضت
عليا تشبحله وهو شبحلها غيرت عيونها وبرنيه تراقب فيهم..
شويه وطلعت انعام من الكوجينه..
انعام: غداك واتي برا..
الحسن ناض ووقف : نوضي..
عليا : اني؟
الحسن : ايه ..نوضي هيا..
ناضت عليا وهي مستغربه ومش هي بس حتى برنيه وانعام..
ماشي وهي وراه طلعوا للجنان ..قعمز....
الحسن: قعمزي هني ..واشر ع كرسي مقابله وقريب منه..
قعمزت عليا..وهو خدي الكشيك وحطه في الصونيه وعباه وقربه لفمها..
هي مصدومه : شنو هذا كله..
الحسن : اللي يسمعك يصدق..انتي تاكلي كشيكين فكشيك...
عليا : شنووووو...
الحسن بصوت عالي: كووولي..
فتحت فمها لاإراديا ورمشت عيونها وكلت..هو رفع حاجبه وابتسم ع جنب..وهي تشبحله وبس..
عطاها العصير وشربت..قعد يوكل فيها لين حست
روحها معاش قادرة لكن هو سكر راسه..
عليا: والله العظيم ماعاد نقدر..
الحسن حط الكشيك في فمه وقعد ياكل...
عليا تشبحله وبس..
عليا : نقدر نوض توا...
الحسن : نكمل قبل..وقعد ياكل ع مهله وهي قريب تطربق
وبرنيه و انعام اللي كانوا يراقبوا فيهم قعدوا يضحكوا عليهم ..
***
معناها هو معجب بيك..
خوله: باه وبعدين..
جنان: انتي ماخليتناش نعرفوا بعدين هادي..
خوله: ومش لازم نعرفوا خلاص اني غادي معاش بنمشي ..
سمعوا صوت رساله ماسنجر..وكانت من تليفون جنان..شافته ابتسمت..
خوله بضحكه: غير كان نعرف من هذا بس..
جنان ابتسمت ومشت لسريرها وقعمزت عليه وقعدت تهدرز ع السمارة...❤
***
في الليل...
تشبح للمرايه ..كانت لابسه قفطان وردي حلو متاع حوش قصير لفوق الركبه بشوي وفارده شعرها دارت كريمه لإيدها وجهها...ومشت للدولاب طلعت حوايج بتلبسهم غدوة للكليه..
سمعت باب الحوش ابتسمت..بس كان عقلها يقوللها في هلبه حاجات..
خش لدار النوم شافها لاهيه تعلق في اللبسه وقلبه بيفر 💓
التفتت شبحتله ببرود ومشت جهة دولاب الأحديه طلعت منه شن بتلبس..وحطاته بحدا الباب جت جنبه بالزبط وهي مطبسه تحط فكندرتها نزل عليها شعرها لما وقفت ع حيلها وخراته بإيدها فاحت ريحتها الحلوة عليه ومشت..من حداه..متوجهه للسرير..
الحسن وجهه أحمر: احمم..بنرقد برا..
عليا : تصبح ع خير ..ورقدت وهي عاطيه بالظهر وتغطت بالورغان..
هو كان يبي يرقد ع السرير..يعني قريب منها..يحسابها بتقوله تعالى ارقد هني بس اتفاجأ بردها..مايندريش مسكين بالحرب اللي أعلنتها عليه عليا حتاخد بتارها في الأيام اللي عذبها فيهم..
هو خش طلع حوايجه من الدولاب ومرة مرة يشوفلها..لين طلع من الدار..وسكر الضي..
عليا ابتسمت "هادي البدايه"....
طلع الحسن بدل..بعدين انطرح ع الكنبه ..اذكر الليله اللي رقدت جنبه فيها...قعد يفكر..هي لما تجي راقده تخلي في ضي الاباجورة مفتوح واضويه الحوش الخافته مفتوحه معناها ماتحبش الظلام..ابتسم بمكر..وناض..فتح باب الشقه بهدوء..مشي فصل التاكو..اللي ليه علاقة بشقته..
وولا سكر الباب بهدوء..وهو يتلمس رجع للكنبه ورقد عليها وهو يستنى ..غمض عيونه...حوالي 10دقايق حس بضي ع وجهه فتح عيونه وسكرهم فيسع..
الحسن : اطفيه..
عليا : خيره الضي..
الحسن : اطفي هذا ولا حوليه من قدام وجهي..عليا رفعاته فوق..
عليا:خيره الضي..
الحسن وهو مسكر عيونه: هرب..
عليا : قداش لينا الكلمه هادي معاش سمعناها شن صار توا..
الحسن بتهكم : انشديهم..
عليا متعصبه منه ومن بروده...
الحسن : بري ارقدي..
عليا بإحراج: مانحبش الظلام..
الحسن : وشن بنديرلك..
عليا سكتت ..
الحسن فتح عيونه:شن تبي..
عليا وعيونها لوطا وعاقده حواجبها ووجهها احمر : ادنى غادي..
الحسن : علاش..
عليا: اوففف ...
الحسن : معاش تنفخي
ناض من مكانه ووقف: ارقدي..
عليا قعدت تشبحله وهي كيف بترقد حركت التليفون جي الفلاش ع عيونه..
الحسن جبد التليفون :هاتي الهم جاي
عليا بهمس:بربري..
الحسن : حصله..
عليا شقلبت عيونها ورقدت وهي عاطيه بالظهر وهو ابتسم..حط التليفون بعيد شويه وفلاشه مفتوح..وتمدد جنبها
كان يشبحلها..وهي عاطيه بالظهر وحاسه قلبها قريب يطير من صدرها ويمشيله..قعدت فايقه شويه لين خداها..النوم وهو كذلك..
الصبح..
فتحت عيونها حست روحها مكتفه..ركزت كويس..لقت روحها في حضنه وهو محاوطها بإيديه..
عليا ابتسمت ..وشويه وبعدت ايديه هو ناض..
الحسن بصوت ناعس:خيرك..
عليا:صبح الصبح..
الحسن ركز ع فيرندا لقي ضي الصبح جاي منها..
عليا: ممكن تحول..
الحسن ابتسم بتهكم: علاش اني شادك..
عليا ركزت انه حول ايده جت بتنوض ناض معاها..شبحوا لبعض وكانوا قراب هللللبه ..عيونهم المستاحشه بعضها من قدرتش تمنع بعضها من الكلام في الحب والشوق ...والقلوب اللي تضرب بعنف لو تلقي تتحرر من صدورهم وتحضن بعض..ولكن للعقل في بعض المواقف الكلمه الأخيره..
عليا بعدت..وهو بعد لما شافها بعدت.
عليا بدون ماتشبحله : حول خل بننزل..
الحسن وزع نظره عليا ابتسم ورفع حاجبه اليسار لما جت عينه ع قفطانها المرفوع شويه ركزت عليا..قريب ماتت من الخجل...
عليا نزلت القفطان وغمضت عيونها بخجل : حول هيا..
الحسن : اني حولت من زمان..
فتحت عيونها لقاته محول رجليه ناضت بسرعه تجري للدار اما هو ضحك وبعدين اتكى ع الكنبه "آاااه منك ياريلا"...
***
عيونكم عليه ..ايه محمد رزق الله..ماتسهوش عنه للحظه..تمام...صكر ووقف ع المرايه...
: وجه بريء لين فايت فيه بس نحبه اكثر من وجهي الحقاني...تنهد...ولف وطلع...
...يتبع...
