#الحسن
#جمان_فريد
الجزء الأول⭐
طرابلس....في يوم ما....
الساعه 12ظهرا...
اواخر الصيف والجو شبه معتدل ...الناس مشغولين بحياتهم..نقربوا اللقطه أكثر لأحد أحياء العاصمه..تحديدا لطريق فيها سيارات تمشي لكن مش مزدحمه..حنقربوا أكثر ع سيارة سودا عاليه روشنها القدامي مفتوح اللي فيها متكي بذراعه ع حافة الروشن...نقربوا اكثر داخل السيارة..شخص لابس اسود في اسود ولابس نظارات سود في ايده التانيه جهاز اصدر الجهاز هذا صوت....
:من الحسن 2الي الحسن 1حول...
قرب الجهاز من فمه:حسن واحد معاك حول
:الأمور تمام الحركه طبيعيه مافي شي يثير للريبه ..حول
:تمام خلوا عيونكم مفتوحه وماتغفلوش بكل اي شي تستغربوه ركزوا عليه...حول
:تمام ...حول..
بعد الجهاز وقعد يوزع في نظره ع الطريق بعدها قرب الجهاز لفمه..
:من الحسن 1للحسن أربعه حول..
:الحسن 4معاك حول ..
:شنو شنو ...حول
:الأمور تمام إلى هادي اللحظه عناصرنا متوزعين واني ع مسافه من الحوش وعيوني عليه ...حول...
:تمام ...حول ...
:سيدي مالكش نفس في سندوتش طعميه ...حول
: ماتخلنيش نبيتك في المركز اليوم ...حول...
ضحك الضابط اللي كان يكلم فيه طبعا حاط جهاز في وذنه يكلم فيه القائد متاعه..ويقلي في الطعميه..
بينما القائد متاعه وهو يمشي في الطريق وقف حول نظراته وشبح لجهة معينه لفترة بعدين لبس نظراته وتحرك بطريقه لهديكا الجهه..
***
بري جيبيلي الوشقه يانعيمه..
نعيمه: حاضر مدام وسيله...
وسيله وهي تتأمل في الدار : كويس ولت تقول مرايه..
جتها نعيمه : تفضلي مدام...خدتها وسيله وقعدت تبخر في الدار...
وسيله وهي تبخر في السرير: طفيتي ع الغدي..
نعيمه: ايه يامدام ...
رن الجرس..
وسيله بفرحه: جي ياكبدي جي حطت البخارة ع الطاوله وطلعت هيا ونعيمه وسكرت الباب..
وسيله : بري للمطبخ يانعيمه انا حنفتح..
نعيمه هزت راسها ومشت ووسيله فتحت الباب..
وسيله : وليدي حضرت الضابط الحسن الصادق..
الحسن ابتسم نص ابتسامه وحضن أمه وباس راسها وخشوا داخل وسكر هو الباب ..
الحسن : كيف حالكم
وسيله : الحمد لله ياغالي انت اللي وينك اسبوعين لاتقول نجي ونشوف أمي ...
الحسن : عارفه ياأمي اني نخدم مانلعبش..وقعمز..
وسيله قعمزت جنبه وحاطه ايدها ع خده: هالخدمه اللي سلاتك سل رحت خلال ...
الحسن حول ايدها وباسها: شن مدايرة الغدي..
وسيله :كل اللي يحبه قلبك عصبان ورشده كسكساس وامبطن..
الحسن هز راسه بإيجاب: امتى يروح بوي..
وسيله :نص ساعه هكي
الحسن : كويس ...قوليلهم يديروا قهوة ناقصه سكر..
وسيله ناضت : حاضر ياغالي ..ومشت وسيلة كلمت نعيمه ادير القهوة...
الحسن ديما يبات في المركز او تكون عنده مهمات ويطول فيها قليل النادر مايجي لحوش بوه..وف الغالب يكون في حوش جده بو بوه يقضي وقته مع عمه سرمد لو كان فاضي طبعا...
***
الحمد لله يااارب اللي بلادنا استقرت وولالها الأمن...
ابتسام: هههههههههه ...تقري في الأخبار...
نرجس: ايه شوفي كيف قبضوا ع واحد من اكبر الروس في تجارة المخدرات...
عليا وهي تكتب : الله يمسحهم يااارب..
نرجس: وكالعاده الحسن الصادق جاب راسه..
ابتسام : مشهور هلبه الضابط هذا..
نرجس: اخته تقرا هني..
ابتسام بدهشه: حق!!من هي ؟!
نرجس: البنيه اللي عيونها ملونات الأولى ع الدفعه...
ابتسام حطت ايدها ع فمها : معقوله...عمرها ماقالتها..
نرجس: ايه وحده تانيه ره رافعه خشمها بيه وخوي وخوي...
عليا: شن رايكم هكي كويس..
ابتسام: لخصتيها كعادتك بطريقه تفتح النفس ع القرايه..
عليا: صوروها واللي يبي عطوه..
نرجس: حاساتك ياعليا حتفوتي بنت الصادق السنه هادي..
كيف جت عليا بترد رن تليفونها شافته ابتسمت..
ابتسام بضحكه: حبيب القلب...
نرجس بضحكه : نوضي ردي ياحنه نوضي..
عليا ناضت وهي تضحك وردت ..
عليا: آلو
منصف: قلبي حبي عمري آاااه استاحشتك بجنون
عليا بإبتسامه خجوله: اني أكثر..
منصف: غير امتى تفوت السنه والسنه اللي بعدها كبدي طابت اني..
عليا بضحكه:زي مافاتت السنه الأولى..
منصف: اني ع نار وانتي بارده..ومشكله كل يوم تزيدي حلاوة واني معاش عندي حيل...
عليا بخجل:خلاص منصف تحشم...
منصف: هههههههههههه اكيد وجهك احمر توا ونقرتك الحلوة زايده غارقه في ذقنك...آاااه ياقلبي...عسلتي خلينا نقروا فاتحه بس ع الأقل توا...
عليا: منصف خلاص عاد كلهم سنه ومعاها اصبر كيف ماصبرت قبل..
منصف تنهد: امري لله وخلاص...
عليا بضحكه: امتى مروح..
منصف: غدوة ياقلبي...
عليا : توصل سالم يااارب..منصف وقت ع محاضرتي تو نكلمك بعدين..
منصف : اوكي ياعمري ردي بالك ع روحك نحبك..
عليا ابتسمت : حتى اني ..باي وصكرت..
منصف صكر وجاه صاحبه قعمز مقابله ع طاولة احد المطاعم..
صاحبه: كنت تكلم في خطيبتك..
منصف وهو يشرب في العصير اشر بحواجبه بمعنى ايه...
صاحبه بضحكه : كان تندري عليك في حضن مني بايت البارح
منصف شرق : كح كح كح..سكر فمك..
صاحبه : ههههه...بجديات منصف مادام تحبها علاش ادير فيه الجو هذا...
منصف: كساد بس نستمتع بحياتي...لين نتزوج وبعدين نفوت السريب هذا كله..
صاحبه: وكان جي نهار وعرفت باللبز متاعك..
منصف بخوف وعصبيه: من وين حتعرف ...وبعدين خلاص ياسر صكر الموضوع...
صاحبه : هههههههه تمام...
***
خش راجل الشيب مغطي راسه ولحيته يبان عليه الوقار وكان انيق ومنظره حسن...
عابد: السلاااام عليكم...
طلعت وسيله من المطبخ مبتسمه : وعليكم السلام..جيت فوقتك
عابد بضحكه: حضرة الضابط جي...
وسيله بضحكه: ايه في الجنان من الخلف...
عابد هز راسه بإيجاب ورجع طلع بش يمشيله...
🛡واقف يتفرج ع كروم العنب ويتأمل فيهم ..
عابد جاه : مالحقتش عليه السنه هادي ..
الحسن تلفت وتوجه لبوه وباس ايده وراسه: كيف حالك يابوي...
عابد بإبتسامه: الحمد لله ..حط ايده ع كتفه...شن حالك انت والخدمه شن امورها..
الحسن: الحمد لله كله تمام...
عابد : امك وتت الغدي خش نتغدوا وبعدين نهدرزوا
الحسن هز راسه بإيجاب ومشي معاه وهما ماشيين ..خشت جنان للحوش..
جنان بفرحه ادربك ع الشيت: خويا ياخويا ياخويا..
الحسن بصوت عالي : هيييييه في الشارع ره..
جنان : هههههه ومشتله تجري وحضناته..استاحشتك يابطلي..
الحسن قعد يمسح ع راسها : هيا تعالي خشي...
عابد: تجي انت تنسانا...
طلقت جنان خوها وحضنت بوها ضحك وخشوا كلهم..
***
عليا وابتسام في طريقهم للحوش..
ابتسام: تعبت ياعليا واني نقنع فيه، اني نهائي مش معارضه لفكرة زواجه بس هو مسكر راسه...
عليا : قوليله انك في يوم حيجيك نصيبك وتمشي وهو يقعد بروحه من بيه..
ابتسام: والله تجرأت وقلتها قولي شن رد عليا
عليا بضحكه : شنو
ابتسام بضحكه: قالي اصلا لما بنزوجك حتعيشي معاي في الحوش انتي وراجلك...
عليا: ههههههههههههههههه والله جو عليه بوك
أبتسام بإستياء: حنقعد بحداه طول عمري من الراجل اللي بيرضى ياخد وحده يعيش معاها في حوش بوها...
عليا بتهكم: اطمني في هلبه يرضوا ناسيه انتي بنت مني
ابتسام بإزدراء:وانتي متوقعه اني نقبل بالنماذج اللي زي هادي
عليا: هههههههههه خلاص امالا اقعدي مع بوك للأبد
ابتسام بضحكه: هوهذا...سكتت ابتسام لما شافت شي خلاها خايفه..هيا عليا..
عليا : خيرك وقعدت توزع في نظرها ع المكان وقفت في مكانها وقعدت تشبح بنظرات حاده للشخص اللي واقف ع سيارة لامبرجيني اخر موديل...
ابتسام : فوتيه عليا..بوك شن قايلك...
عليا: لا مش حنفوته اخر مرة دار موقف خلا بوي متحشم قدام الناس..وتقدمت نحو هالشخص بقوة واندفاع....
عليا: انت امتى بتعتقنا في حالنا...
: ههههع مستحيل ..
عليا: خاف ربك فينا شويه بس حرام عليك ..
: ههههههههه نخاف ربي فيكم ..علاش انتم خفتوا ربي فيا..
عليا: اللي داره بوي كان لمصلحتك..
قرب منها: لمصلحتي !!ولا لمصحلته هو..شفتي وين وصلني تفكيره في مصلحتي..
عليا: من عمايلك ماتحطش بوي شماعه لأخطائك..
ابتسم بتهكم: بنت بوك من يوم يومك...
عليا: ومن زيي...بنت جعفر الحافظ الراجل التقي المحترم اللي ناس كلها مدايرتله قيمه وقدر عالي ...مفروض حتى انت تفرح بيه وترفع له راسه مش تحشمه بعمايلك وسمعتك الزباله...
: كويس ياعليا زيدي..حيجي يوم يابنت بوك ونكسر بوك بيك...ومشي بسرعه ركب السيارة وتحرك وخلاها واقفة مصدومه ومتألمه....
جتها ابتسام: شن قالك
عليا بألم: كيف ولا هكي منذر كيف....
ابتسام:الدنيا ورفقة السو ياصاحبتي ..
عليا تنهدت وشدت ع ايدها صاحبتها وكملوا طريقهم..
***
في حوش عابد الصادق...
بعد الغدي
الحسن وبوه يشربوا في الشاهي الأخضر عادة عابد اللي خداها عنه الحسن...
عابد: متقوي بيك وانت اللي مشجعه
الحسن: مش محتاج نقويه ولانشجعه هو بروحه هكي تفكيره اللي فراسه يديره وأنت عارفه...
عابد: لو سكتوله توا مش حيسكتوله بعدين لو تمادى...
الحسن وهو يشرب في الشاهي: اللي يفكر يمس شعره من راسه حكم ع روحه بمواجهتي ...
عابد بضحكه: عارف من الأول ماحد مكبرله راسه غيرك..
الحسن: اليوم بنمشي نحضر معاه الحلقة متاع برنامجه
عابد بأستغراب : علاش...
الحسن مط شورابه : هكي وخلاص..
عابد بنظرة شك : تمام...
الحسن ناض: خل بنخش نتكا شويه...ابعتوا من ينوضني العصر...
عابد هز راسه بإيجاب وهو يشرب في الشاهي...
***
طلعت من المطبخ بعد غسلت الماعين وتوجهت لغرفة المعيشه..
ابتسمت لما شافت عيلتها مجتمعه
عليا: شن خاطركم ندير حاجه ناكلوها مع القهوة بعد العصر..
زينب ابتسمت : فشن خاطرك ياجعفر...
جعفر لاهي بالأخبار ومش مركز معاهم...
مصعب بضحكه ضرب ع كتف بوه بخفة: بوي..
تلفتله جعفر: هاه
مصعب: ريلتك تسأل شنو نبو حاجه حلوة للقهوة العشيه...
جعفر شبح لعليا وابتسم: الريلا متاعي نبيها ديرلي هذيكا الكيكه ..لاإله إلاالله ..شن سماها
اميرة: اللي دارتها لما جتنا عمتي بتينه..
جعفر اشر بصبعه ع أميرة: ايووااااه...
فرحت أميرة..
عليا بضحكة: كيكة الكراميل من عيوني..ياروح الريلا..ومشت تجري للمطبخ...
جعفر ضحك ولا يتفرج ع التلفزيون..
"الريلا نوع من أنواع الغزال يقولوله الغزال الأريل"...🦌
***
هيا بسرعه...قسموا ارواحكم اربعه اربعه وتوزعوا ع الجنان..
إنعام بضحكه: هههههههههههه
برنيه: وانتي شن ديري هني تحركي ديري السفنز اللي عليه...
انعام: باهي هيا...خشت انعام داخل سمعت صوت تليفون يرن...سررررمد ياسررررمد تليفووونك..
سرمد نزل من دروج : اكيد الحسن ....مشاله يجري ورد..
سرمد : ايوه ابوعلي ..
الحسن : شن جو...
سرمد: تمام..انت شن امورك...
الحسن: تمام..امتى البرنامج متاعك يبدا...
سرمد :الساعه 8....
الحسن : تمام اني بنصلي العصر ونجي..
سرمد : مليح بكل نستنى فيك...وصكر..وطلع من مكتبه..تلاقى هو وأمه خاشه..
برنيه : من كنت تكلم...
سرمد: الحسن..قولي للبنات يخشوا لما يجي...
برنيه : لا مش حيخشوا..سمعتهم انعام جت...
انعام: امي الحسن لما يفصل الله لايروعك فكينا منه
برنيه : ماعليكمش فيه تو نتفاهم معاه...
سرمد بضحكه: شن في بالك ياأمي..
برنيه: في بالي يتزوج ويستقر ياسره الشيب بدي يعبي في راسه..
انعام: وتبيه يختار وحده من بناويت خواتك
برنيه: شن ناقصهم فلاحه وزين وبعدين كان مش هما وحده غيرهم حالفه بالله ماهو تام هالعام قبل مايتزوج كاسح الراس هذا..
سرمد : حتى لو هو دارها وتزوج وهادي من سابع المستحيلات فأني مش حنتزوج توا ياأمي بتاتا ومشي وخلاهم...
انعام : زابطك
برنيه : ورجليه فوق راسه يتزوج الحسن هو حيلحقه...وتلفتت للروشن وهي تتفرج ع بناويت خواتها وهما يكدوا في البساطات.....
***
شن يبي فينا يعتقنا يخلينا في حالنا
عليا: مديحه وطي صوتك..
مديحة بقلق: تو تشوفي ياعليا كان مادرالناش خارقه في عرسي اني وياك..
عليا خافت بس اظاهرت بالعكس: ماعنده مايدير..غير ردي بالك تقولي لبوي..
مديحة: وعلاش بنقوله شن بإيده مسكين ياسر العار اللي داروهله يومها لما قعد يسطرب هو وشلته الفاسده قدام الجامع اللي يصلي فيه بوك..
عليا:تقول مش خونا معقوله هذا يكون ولد زينب وجعفر اللي يوزعوا طيبه ع العالم ومازال يفضل..
مديحه : الله غالب جي بروحه...
عليا تنهدت وملامحها تغيرت للفرح: منصف غدوة مروح
مديحه : الله !!
عليا : كلمني بكري وقالي..
اميرة خشت : علاش كل اسبوعين مسافر..
عليا التفتت شن كل اسبوعين متاعك هادي ليه شهرين ماسافرش قبل هالسفرة..وبعدين هو عند خدمه وعارفه يخدم عند مني...
اميرة عوجت فمها"ماتحبش منصف"
مديحه: شن جوها بنته قاعده تبيه يتزوج
عليا بضحكه: ايه وسكر راسه حتى لما قالتله سيورني نمشي ع حالي وتقعد بروحك..قاللها انتي كان بتتزوجي حتسكني معاي
اميرة ومديحه: هههههههههههه...
***
ماتمليش...
ابتسام : لا مش حنمل لين تسمع كلامي...
عبد القدوس: ههههههههه ..تعبي في روحك..
ابتسام : اني توا ماشيه للجامع نروح نتفاهموا..ومشت من حداه..
عبدالقدوس"مستحيل نخليك لحد مايقدركش ويعرف قيمتك مافي حد حيحبك زي بوك في الدنيا"
عبد القدوس صبري..رجل اعمال وعضو في البرلمان.زوجته متوفيه من سنين وعنده منها ابتسام اللي تعلق بيها هلبه وماباش يتزوج ع خاطرها..
ابتسام بنت طيبه حنونه ملتزمه بدينها تقرا في الجامع وع وشك ختم القرآن ..لبسها عادي ومحتشم والملايه تلبس فيها لما تمشي للجامع..بوها يشوف فيها ملاك نازل من السمي ومافي حد يستاهلها ولو استسلم لفكرة زواجها فمش لاي حد حيعطيها وحيرغمه يعيش معاهم..ع قد ماجوها هو كان يرفض منه ليه..ابتسام بنوته ناعمه وحلوة وهي صديقة عليا المقربه..
***
بعد العصر..
في حوش الحاج علي..
البنات مازال حاصلات في بسطات خالتهم وجتهم بنت محمد تعاون فيهم...ومناظر البنات لما يغسلوا البساطات تحفه..اللي مشمرة سروالها فوق اللي رافعه قفطانها اللي رابطه محرمه ع راسها ومتوزعات في كل الجنان كل اربعه ع بساط..
فجأة يتفتح الباب..كلهم توجهوا بأنظارهم للباب بيشوفوا منو بيخش..عيونهم توسعت وكل وحده تبتت ع لقطه..
شافوا واحد طول بعرض لابس سروال اسود وبدي رصاص ونظرات سود وفي ايده ساعه سودا..
كلهم هذا وضعهم 😍😍😍😍😍😍😍😍😍😍😍
الحسن قرن حواجبه وقربع الباب بقوة انتفضوا منها وكل وحده ولت اللي دير فيه وهو خش ويمشي بحذر بش يتخطا الميه واللي يخطم بحداهم قريب يدوخوا من ريحه عطره وطريقته الحلوة في المشي..كان قمه في الرجوله وجذاب للشلاتيت 😍😂 ....
راجوه لين خش واللي هذا دارت ردت فعل اللي دارت روحها داخت واللي تخبط ع وجهها واللي تمروح ع روحها..
: هذا منو ياهووولي
: زي ممثلين هيوليود..
ريحانه بغيره: خلاص انتي وياها خل نكملوا اللي في ايدنا...
....
تو هذا منظر هذا متشرتعات زي البخور في سوق للعتق..
سرمد شاد ضحكته: بيغسلوا بساطات اكيد هكي بيكون وضعهم..
الحسن بعصبيه: عارفني جاي ولا خيركم ماقلتوش لفية امهم يخشوا داخل..
برنيه جاته: بنات اختي راهم
الحسن سكت وهو معصب ع الأخر..
برنيه : وبعدين علاش متعفرت هكي..
الحسن يحاول يهدي: مايجيش ياحناي المنظر اللي شفتهم بيه برا...
برنيه : هو عندك حق وليدي بس مايندروش عليك جاي..
شبح لسرمد: ماقاللكمش هذا...
برنيه : عارفه انت يقول في شي هو...
سرمد:😨😨😨
برنيه : قعمز سلم وليدي انعام مدايرة سفنز خل نجيبلك منه طريفات مع طويسة شاهي خضرا..
قعمز الحسن غمض عيونه وفتحهم وهز راسه بإيجاب ومازال معصب...
سرمد: حناك هادي مايقدرها حد ...
الحسن : باهي قعمز واحكيلي ..شنو موضوع حلقتك بالزبط..
قعمز سرمد وبدي يحكيله..بعد كم ساعه توجه الحسن هو وسرمد لمقر التلفزيون حضر حلقة برنامجه المباشر وكالعاده كان موضوعاته جريئة ويحط في ايده ع الوتر الحساس ويضرب في جماعه الدوله الفاسدين اللي يحاولوا يخفوا اعمالهم الغير قانونيه ورا ستار مناصبهم...
روح هديكا الليله مع الحسن وفي سيارة وراهم..
سرمد: نفسها كل ليله...
الحسن وهو يشوف للسيارة من المرايه: يخوفوا فيك يبوا يقولولك انهم وراك وحيتمكنوا منك في اللحظه المناسبه..
سرمد: عارفهم...
كملوا طريقهم حط الحسن سرمد في الحوش وتوجه هو للمركز....
***
في مكان ما أحد المكالمات الهاتفيه...
: معاه الحسن..
:عارف عندي علم...كملوا شغلكم ومادروروش
: تم..
***
في المركز...
خش بخطوات طويله واللي يشوفه يأدي التحيه لين وصل في مكتبه وخلا الباب مفتوح خش وراه ضابط وسكرها..
حول سلاحه الحسن وقعمز: شن صار معاك..
آدم:قاعدين يمشوا ويجوا...
الحسن : 4ايام بإذن الله و حنخشوا عليهم..
آدم : تمام ..ايه ملف المحبوس "بلال القاضي"جبتهولك امس شفته...
الحسن : بلال هو نفسه جبتوه..
آدم : ايه..
ناض الحسن حط سلاحه في خصره وتوجه للباب وطلع ولحقه آدم...
امرهم يجيبوا بلال لمكتب التحقيقات وخش المكتب....
الحسن:مانبي حد يخش عليا كائنا من كان اي حد يخش انت المسؤول قدامي..
آدم : تمام سيدي ومشي...وخش الحسن وسكر الباب
....
يمشي جنب الضابط اللي شاده بالكلبش..وهو مبتسم تهكما..
بلال:تو فعقابات الليل شنو يبوا فيا هادم
الشرطي : امشي وانت ساكت..
بلال مط شواربه تهكما وسكت..
طقوا ع باب المكتب لما وصلوا ببلال في الباب..وخشوا ..
الحسن في ايده سلسله كان يشبحلها وبلال يشبحله..
الحسن : خش...
طلعوا الشرطي وآدم وسكروا الباب...
وقعمز بلال وهو مكلبش مقابل الحسن.
الحسن قام سلسله ووراها لبلال: شن تعنيلك..
بلال عيونه تعبوا دموع لكن حاول يتماسك : شي يخصني..
الحسن قعد يشبحلها: هادي سلسله فضة لأمك ليلتهاكنت مروح بيها من الصايغ بعد صلحها لإنها كانت مقطوعه..بس للاسف مالحقتش تعطيها..
بلال محاولا اخفاء المه: جايبني توا بش تحكيلي القصه هادي..
الحسن شبحله : جايبك هني ..بش نتفاهموا اني وياك ع طريقه تطلع بيها من هني وتكمل فيها اللي بديت بيه..
بلال ضيق عيونه : مافهمتش..
هز راسه الحسن بإيجاب وأشر بسبابته الزوز: خل وذانك معاي وركز في اللي حنقوله...
بلال: قول..
الحسن:تعرف عبد القدوس البي...
بلال: هذا اللي يطلع في التلفزيون..
الحسن: عضو في البرلمان ورجل أعمال كبير..
بلال متهكما: بالجوده وبعدين
الحسن شبحله بحده: الراجل هذا عليه دائرة شك بتورطه ببعض الأعمال ودعمه لبعض الناس المطلوبين..مافيش في ايدينا دلائل عليه...
بلال بسخريه: وشن تبيني اني نجيبها..
الحسن هز راسه بإيجاب : ايه..
بلال انصدم: شن هو..
الحسن وهو يعدد ع صوابعه: حنطلعك من هني..حندفع عنك ديونك...وحنجيبلك المحل اللي شريته وضحك عليك صاحبك وخداه منك بالإحتيال..
بلال مصدوم وساكت..
الحسن : لو وافقت تنفد الخطه المرسومه من قبلنا وتتولى هالمهمه خلال 4ايام تطلع من هني...
بلال يفكر وساكت..
الحسن ناض: عندك اسبوع خود وقتك فيه وفكر نهاية الأسبوع نسمع قرارك..ولما جي الحسن بيطلع...
بلال: موافق...
"الأحداث اللي فالبدايه اساس للأحداث الجايه تابعوني"
...يتبع...
ارجعو اقرو المقدمة ضفت تعريف الشخصيات
