#الحسن
#جمان_فريد
الجزء19💖
ادور وتتفرج ع شقة بنتها بإنبهار وفرحانه هلبه...
زينب : اللهم صل ع النبي ...اللهم بارك..والله حرام تقولي عليها شقه..
مديحه : صح تبارك الله...
اميره : كبيره هلبه ماشاء الله..
عليا بإبتسامه: تعالوا قعمزوا....
جعفر قعمز: ماريتش راجلك لوطا..
عليا تلخبطتت اضطرت تكذب: كان عازم صحابه اللي ماجوش في العرس ع الغدي وطلع هو وياهم مش حيعطل..
خيره مصعب ماجاش
زينب : والله معاد ملحقين نشوفوه وهو خدمه وقرايه...
عليا بإبتسامه: ربي يفتح عليه وخيي..
كلهم: آااامين..
....
اللهم بارك يابنتي ...
هاله ابتسم: يبارك في عمرك وبيي..تفضل
يونس: يزيد فضلك...والله فرحت من قلبي لما شكروك الحاج والحاجه ...مانستغربش بنيتي ونعرفك..
هاله بإبتسامه: حتى هما ناس طيبه يابوي ليا معاهم يومين بس والله حسيت روحي وكإني نعرفهم من سنين..
يونس : الحمد لله..
....
برنيه : وينك لتوا الحاج جعفر وعويلته ليهم نص ساعه فوق..
الحسن : انشغلت شويه..هيا عن اذنك ياحناي..ومشي ركب طول...
....
اميرة ومديحه مع عليا في الكوجينه
اميره: كان ياخدوني حتي اني كنه سهفني جوكم
عليا: معاش عندهم عزبايه غير سرمد..
اميره تحشمت وسكتت..
مديحه : كوجينتك ماناقصتها حاجه كل شي فيها من الألف للياء ..ماشاء الله...
انفتح باب الحوش..
مديحه حطت وشاحها ع راسها واميره كذلك...
خش الحسن وعيونه لوطا: السلام عليكم
اميرة ومديحه : وعليكم السلام...
الحسن : وين عمي وعمتي ..
عليا : في الصاله داخل..ع طول الحسن توجهلهم..
اميره قعدت تمروح ع روحها: يالهووو بااالي..
مديحه: عليك شخصيه شخصيته ومحترم لين خلاص..
عليا : باه انتي وياها عاونوني بلا قطاف فارغ..
مديحه بضحكه: بدينا نغاروا
اميره : شكلنا
عليا وهي لاهيه بالصفرا ووجهها أحمر: ياديروا معاي حاجه مفيده يااطلعوا من حداي 😳
مديحه وأميره : ههههههههههههه
عليا في نفسها"نغار عليه عينه ع شنو ياحسرة...باهي علاش اضايقت لما قعدوا يتكلموا عليه هكي!!طبيعي لأنهم عاطينه اكبر من حجمه المتعجرف هذا 😡قال نغار عليه قال 😏"
طبعا تعشوا اهل عليا عندها وماحد من أهل الحسن ركب فضلوا يخلوهم ع راحتهم "ناس تفهم"...
اما هاله فالسيد حسان ماجاش وهاله قعدت تحرق وتسحن وحست بالإهانه..يونس اضايق لكن حاول مايبينش لبنته...
مع 9روحوا عيلة عليا..وشويه ولحقهم بوهاله..نزل الحسن وسقد الزوز وطارتله لين خلاص لما عرف ان حسان ماجاش قعد برا رجاه لين يروح...
مع 11روح..نزل من السياره يغني وجوه مليح..
الحسن : امتى تولي راجل!!!
حسان تلفتله: اسمع اني قاعد محترمك لأنك اكبر مني بس لكل شي حدود
الحسن بعصبيه: انت لو كنت محترم ولا تعرف شي عن الإحترام..راك اليوم قعدت واستقبلت بو زوجتك اللي جاي زيارة لبنته..
حسان انصدم هو كان ناسي مره وحده..
الحسن : ايه انت متزوجها غصب عنك ومعاملتك ليها واضحه هلبه..لكن دير اعتبار لبوك ع الأقل ان هي بنت صاحبه والراجل اليوم جاك وخش حوشك وقعد مع بنته بروحها...شن حيفهم قولي..حس يابني آدم حس ولو لمرة وحده كون راجل..ومشي وخلاه..
ركب حسان وهو طايرتله من هزايب الحسن..خش للحوش وقربع الباب لقي هاله تبكي ناضت كيف بدت بتتكلم..
حسان: ماتعرفيش تتصلي وتقولي بوك بيجي ولادرتيها بلعاني بش تحطيني في موقف بايخ واطلعيني ماننفعش..لاوفوق هكي ماشيه تشكي هني وهني ان معاملتي ليك مش كويسه ..من الأول قايلك ماتطمعي مني بشي..احمدي ربك اللي راضي نقعد معاك ف حوش واحد..
تإنتي اصلا وين كنتي تحلمي ياخدك حسان ولدك الصادق..كان هذا راك لتوا قاعده تبيعي في الطعميه في الطريق...ارضي بعيشتك اللي عايشتيها بتبدي بجو الصغار..انتلفي روحي من وين ماجيتي ..ولف ومشي لداره..
هاله كانت مصدومه من اللي سمعاته ..استجمعت نفسها ..ومشت بكل اندفاع لداره وفتحت الباب بالقوة لقاته كيف محول كانتيتره ..تحشمت ..تخلبطتت..بس سرعان مارجعت لوعيها..
هاله قدمت وتشبح لعيونه بحده: ماطيحني فيك غير النصيب ولولاه ماكنتش رضيت بيك لو مش ع خاطر بوي الراجل المريض بالقلب ره تانيه وحده ماقعدتلك فيه..ايه اني بعت الطعميه وهادي شي يشرفني ومش حننكره وحتى بعت الفطيره..كنت ناكل في لقمتي بشرفي نصرف ع روحي بش مانحسسش بوي اني ناقصني شي وهو عاجز يوفره...ايه اني مافياش انوثه صح تخليت عنها بش مانخليش اللي من أمثالك يطمعوا فيا ..لله حكمه فإني نخش في ذمة واحد زيك...حرام وحده زيي تعيش معاه لإنه زاني..والزاني لاينكح إلا زانية أو مشركه ..جبدت تليفونه اللي كان ع الكامدينو ومدتهوله..وتوا تفضل كمل سهرتك مع اللي يناسبوك ويليقوا بوك..نجاسه في بعضها..
حسان كلامها حرقه لإنه حق وجعه هلبه ومن كثر ماوجعه تصرف تصرف واحد حس بالإهانه..ضربها كف بقوة قوته لين وذنها وجعتها..هاله مانزلتش من عينها دمعه حطت عينها فعينه وابتسمت بهزوة وطلعت ..هو من كثر الغضب سكر الباب وراها بالقوة...
أما هي مشت لدار النوم سكرت عليها بكت بكت لين طاب مافي خاطرها وناضت توضت وصلت ودعت لربي وقرت قرآن ورقدت...
...
واقف قدام الباب متردد يخش ولا يولي من وين ماجي..بعد تفكير قرر يخش فتح الباب..وخش..لقي اضوية الحوش مطفيه مفتوح الضي الخافت بس..توجه لدار النوم لقاها مسكرة..تردد يطق..بعدين طق..
عليا كانت بتخش فراشها لما سمعت طقت الباب..عرفاته هو مشت للباب وفتحاته...
عليا : نعم..
الحسن يشبحلها كيف لابسه توته ورديه مرسوم عليها رسمه "سنوايت" وقايمه شعرها ووجهها صافي من غير ولاذرة مكياج ..كانت طفله في ملامحها طفله حلوة بالمرة..
الحسن : احمم..كنت ..كنت نبي نشكرك ع الغدي اللي درتيه..كان كويس ..
عليا لماشافت ملامحه كيف متحشم وعيونه لوطا لاإراديا ابتسمت أول مرة تشوفه هكي: واجبي مايستحقش الشكر..
الحسن : باه..احمم..تصبحي ع خير ولف مشي من بحداها وطلع من الشقه..وهي تنهدت وسكرت الباب ..ومشت خشت لفراشها رن تليفونها بنغمه رساله فتحتها
(امس شفت راجلك ووصيته عليك ..عليا لو وجعك لمرة وحده ماتتردديش تسيبيه واني حناخدلك حقك منه...وحنرجعك لحضني الحضن اللي مش حتلقي احن منه عليك في الدنيا)
عليا نزلوا دموعها ومسحت الرساله..حطت ايدها ع قلبها مازال يحبه ومش متقبل غيره ..حطت التليفون ع الكامدينو..ورقدت وهي تبكي ...لين داخت ومشت في النوم..
***
🍃فاتوا الأيام...
هاله وحسان معاش تقابلوا من بعد اخر مرة يطلع من الصبح ومايروحش إلا وهي راقده وهي ارتاحت منه بالمرة..كلموا الحاج اللي قرريديرلهاهي وعليا سياره بسواق يوصلهم للجامعه ويروح بيهم ويرفع هاله للجامع
كانوا الزوز يراجو امتى يبدا الأسبوع الجاي بش يرجعوا للقرايه..
حال الحسن وعليا زي ماهو ماتغير شي كانوا يتجنبوا في بعض وهو مرات مايروحش من المركز..الكل ملاحظين ع العرسان وضعهم اللي مش طبيعي بس ماحد حب يدخل ..الحاجه برنيه مش راضيها بكل بس قاعده ساكته وتتفرج لين تشوف اخرتها معاهم شنو...
ابتسام خلال هالفترة قاطعت بوها ورافضه حتى تاكل معاه اللي وجعها اكثر من انه لز أم بلال..هو كلام أم بلال بدت تشك في بوها وبدت ثقتها بيه تنهز....
***
أخر الأسبوع
كانت نهاية الخريف...
عيلة الحاج علي كلهم بيطلعوا للحوازة اللي مساحتها 7هكتارات وفيها كل انواع الفواكه والخضرا..ومبني فيها حوش كبير ع دورين..وفيها حوض سباحه..ومنسقه بطريقه حلوه من جميع النواحي..
لأول مره من اكثر من 10سنين يمشي معاهم الحسن..
قسموا رواحهم ع السيارات..
هاله ركبت مع محمد وعيلته..
وعليا ركبت مع الحاج علي وبرنيه وانعام وساره..
الحسن ركب معاه سرمد وحسان ومرعي ..
توجهوا غادي كانت في مسافه لابأس بيها...
سبقوهم غادي عيله علي ومعاه خوله وجنان...
وصلوا غادي وتلاقوا ببعض وسلموا ع بعض ..وفيسع ماانقسموا الرجاله والنساوين...
جنان خاشه بصونيه كبيره : من اتبل اللحم قطعوه وجابوه
انعام : خليه تو نتبله..
عليا قعدت تشبحلهم متحشمه تقوللهم انها ماتاكلش في اللحم...بعد عولوا ع الشوا وسلايطه..طلعوا يدهوروا في الحوازة..
عليا حاسه بألم وهي تذكر لما كانوا يمشوا لحوازة راجل عمتها..ذكرياتها غادي كانت حلوة..حست روحها بتبكي..شافتهم لقتهم لاهيين بالهدرزة...انسحبت من بحداهم وقعدت تمشي لين بعدت ..لقت كرسي رخام طويل وقدامه طاوله رخام طويله وعليهم مظله قعمزت بروحها وقعدت تتفرج ع الخضرا..والشجر اللي طايحه أغلب وراقه..خطر ع بالها منصف لما قال انه حيشري حوازة بعد زواجهم ويخليها هي ادير فيها اللي تبيه..خطر ع بالها لما كان يشريلها في الدجاج في كل طلعه للحوازه بش يديرهولها..بدت تبكي كانت تحضن في نفسها من شعور الوحشه اللي تحس بيه...علاش صار هكي معاها علاش هي مضطرة تعيش حياه عكس اللي كانت تبيها..
تنهدت بقوة، قعدت ادور بعيونها في المكان لما هبت ريح حركت باقي وراق الشجر اللي كان نصه طايح حست روحها زي هالورقه طاحت من عرفها وقعدت تاخد فيها ريح وين ماتبي لإنها بدون اراده..مجبرة...لإنها ضعيفه..
وهي ادور بعيونها تبتت عليه لما شافته واقف من بعيد شوي حاط ايديه فجيوبه ويشبحلها..شبحتله بحده وناضت من مكانها..ومشت بتولي من وين ماجت خطمت من جنبه ولاكإنه موجود وهو قعد معاها بعيونه لين اختفت..
...
جنان : والله ياعمو انت احسن من يشوي في المعموره..
سرمد: وانتي احسن من يطبل لحد في العالم 😂
جنان: خزووو خلاص برا دور من يرفع معنوياتك بعد اليوم..لفتت وجهها عنه متصنعه الزعل شافت عليا جايه ووراها بمسافه الحسن..
جنان اشرت بإيدها: تعالوا ...
وصلت فيهم عليا الأولى بعدين الحسن...
الحسن قام بإيده شوايه كلاها: اممم مش بطال ...
سرمد: معناها مليييح بكل ..عليا لازم تعرفي حاجه ع راجلك لايحب يمدح ولا يحب من يمدحه..اقصى درجات المدح عنده الكلمه اللي قالها بكري..
عليا ابتسمت مجامله وهو دار روحه لاهي ياكل...
جنان: هههههههههه..مدت لعليا شوايه..ذوقي لولو..
عليا ماتحبش اللحم المشوي بتاتا ولاتجامل في الماكله: لااالا..
جنان: خيرك ...
سرمد : ماتحبيشي؟
عليا هزت راسها بإيجاب وعيونها لوطا من الخجل..
جنان: اووو ..ياريتك قلتي يالولو
سرمد قعد يشبح للحسن اللي داير روحه مركز ع صونية متاع الشوا وياكل...
عليا : مافيش مشكله عادي..ندير اي شي تاني..
انعام تنادي من بعيد شوي: علياااااا جنااااان تعالوا..
تلفتوا الزوز ومشولها...
اما الحسن قعد واقف شويه بعدين : سرمد اني ماشي مشوار وجاي..
سرمد ابتسم : اوكي...
لف الحسن ومشي وسرمد قعد يشبحله لين اختفي ضحك ورجع لهي بالشوا...
***
بلادنا زين ع زين بلادنا ورد وياسمين
بلادنا تخاف من العين بلادنا زين ع زين..
: اسكت ياصداع..
منذر: تمساح خليني رايق ..باليز..
التمساح :تو اللي زيك مفروض مايروقش والحسن الصادق ولا نسيبه..
منذر: هههههههههههه بالعكسسسسس اللعب حيحلو
التمساح : خاطري نعرف فشن تفكر..
منذر رقص حواجبه: لم ولن تعرف...
التمساح : باهي سوق سوق..خل نوصلوا بسرعه ...
منذر: اوكييين..وطار بالسياره...
***
وتوا برا طاوله فيها سلايط..ومشاريب..وتوا الصواني ويراجو امتى يكمل سرمد شوي..
انعام : اخر طرحه...
جنان : مش عارفه بس خلاص حسيته قريب يكمل...
هاله : عليا حقه ماتاكليش في اللحم المشوي..
عليا : ايه..
انعام : ياريتك قلتي..
سارة: تحشمت ياروحي..معاش تتحشمي مرة تانيه حني عيلتك ره..
ابتسمت عليا..
مجيده : تبي نبكبك مكرونه ع السريع..
عليا: لا والله ماحاطه حاجه ع نار..اصلا السلايط هلبه تو ناكل مع الخبزة مافيش مشكله...
ريحانه كان تلقى تشويها من كثر غيرتها منها...
ميسون: مرت عمو نبيك تعلميني طريقة الأيلانير..
عليا بضحكه: بعد اذن أمك حاضر..
مجيده بضحكه: صدعتيلي راسي وهي تتكلم ع طريقه رسمة عيونك..
فاطمه : تي هي عويناتها اللهم صل ع النبي مايبوشي بكل..
عليا تحشمت: تسلمي ابله فاطمه..
برنيه اللي كانت تسمع فيهم وساكته : عيون الريم عيونها..
عليا خلاص قريب غاصت في حوايجها من الخجل...
سارة: ختسلم اللي يتحشموا..
كلهم :😂😂😂😂😂
عليا : 😳
سرمد يضبح: انعاااااام تعالي خودي مني..
انعام : هياااا هييي...
مشتله وخدت منه الصونيه...وخشت للكوجينه ..اتفاجئت لما لقت الحسن واقف ع الرخامه وقايم كمامه ويدير في حاجه حطت الصونيه وقدمتله لقاته يتبل في الدجاج..
انعام شبحتله وابتسمت: هادي اسرع طريقه تتبيل..
الحسن هز راسه بإيجاب...
انعام شبحتله "محلاه الراجل اللي زيك ياولد خوي حنيته بأفعاله ..ربي يهنيكم يااارب"...لفت ومشت للصونيه خدتها وطلعت..
....
قعمزوا كلهم ع الطاوله رجاله ونساوين...وفرقت انعام مع فاطمه وخوله اللحم في الصواني..
الحاج علي: وين الافندي..
سرمد شبح لعليا ورجع شبح لبوه: عنده مايدير
برنيه : العفو يااارب..خدمة الهم هادي مش قادر يسيبها حتى في جو زي هذا..شبحت لعليا..خيرك بنيتي ماتاكليش..
انعام : ماتاكلش في اللحم المشوي
برنيه : خيررك يابنتي ماقلتي..!!!
عليا بخجل: عادي مافيش مشكله..
الحاج علي: مايجيش يابنتي حني ناكلوا وانتي تتفرجي..
سرمد بضحكه: اطمن ياحاج اطمني ياحاجه..يعني هي بتكون مرت الحسن وبتنقصها حاجه..طلع ع خاطرها شري دجاج ويشوي فيه توا..
عليا انصدمت وقعدت فاتحه عيونها ع وسعهم..
انعام بضحكه: واني ريته بعيوني وهو يتبل فيه..الحسن اللي طاسة الميه يبعت من يجيبهاله..خاش الكوجينه وحاصل في الدجاج والتومه..
كلهم متفاجئين وعيونهم توجهت لعليا اللي قريب تبخرت من الحشم..
ابتسم الحاج علي وكمل ماكله وبرنيه كذلك..وبعدين كلهم رجعوا لهوا بماكلتهم..الاريحانه اللي قريب تبكي...
عليا ناضت..
جنان: وين ماشيه..
عليا : بنمشيله..
جنان ابتسمت ولت تاكل..
اما عليا فمشت...ولفت من الجهة التانيه لقاته واقف ويشوي قعدت تشبحله وتتأمل فيه..."علاش يدير هكي ..يعني هو هكي فعلا ولا يحب يعيش دور البطوله وخلاص"..
قدمتله لين وصلت فيه وبدت تضحك: ههههههههههههههههه
الحسن قام عيونه فيها : شن يضحك فيك
عليا هدت ضحك: هذا شنو نصه محروق
الحسن وجهه ولااحمر: هذا اللي طلع معاي بتاكلي باهي ماتبيش طلعيه للكلاب ياكلوه
عليا شبحتله هلبه وهو متحشم ويشبح للشوا
عليا خدت من الصونيه وكلت: اممم مش بطال .."قلدت صوته"
هو لا اراديا ولأول مرة يضحك وعليا تشوف ضحكته بس كانت ع خفيف..
عليا ابتسمت: فات فيك وتعبت وجبته وتبلته وشويته خلاص ناكله وأمري لله..
الحسن بتهكم: فيك الخير...
عليا ضحكت ...وشويه وكمل ورفع الصونيه ومشوا هو وياها للمكان اللي يتغدوا فيه العيله..لما شافوهم جايين مع بعض قعدوا يشبحولهم
ميسون: الله ياجنجون قداش طالعين ع بعض
جنان: حتى فرق العمر بيناتهم مش باين وابتسمت..
خدت منه عليا الصونيه ولت قعمزت فمكانها وهو مشي قعمز في مكانه تجاهل نظراتهم المتفاجئه اللي محاصراته وبدي ياكل..
هاله ابتسمت بحسرة شبحت لحسان لقاته طايح ياكل ..
هاله في نفسها"فرق السمي عن الأرض بينك وبين خوتك لمن طالع مش عارفه" ...تنهدت وكملت ماكله...
أما ريحانه تشبح لعليا بحقد"ينزل ع بطنك بالسم إن شاء الله"
كملوا غداهم ...خشوا الرجاله قيلوا ..والنساوين تعاونوا ع الماعين حتى هما بعد كملوا اتكوا شويه...
بعد العصر
برنيه تصفق بإيديها: هيا انتي وياها بسرعه،قعدت تعد ع صوابعها..بنلقطوا التفاح...والمشماش..جنان بضحكه: والله عارفين ياحناي بالله...
كلهم : هههههههههههههههه...
برنيه : تحركي يامطيورة تحركي...
طلعوا كلهم ومعاهم صواني ولقوا الرجاله سابقينهم لشجر التفاح ...
توزعوا وبدوا يلقطوا...هاله مع انعام ..سارة وخوله ..ميسون وجنان وعليا...ريحانه وامها ومجيده...والرجاله قراب عليهم...
مشي الجو بالهدرزة والضحك..ومرة مرة ياكلوا هزيبه من برنيه بش يخفوا ارواحهم...
عليا لما كانت تلقط وخرت شويه ...جت عينها ع تفاحه حمرا كبيره منظرها يسسسهف..لكن كانت فوق بكل ...كانت تشبحلها وتشوف كان تقدر توصل فيها..مدت يدها لقت الحكايه مستحيله...حاولت توقف ع روس صوابعها مافيش أمل نزلت ايدها وهي متحسرة وارتسمت ع وجهها ملامح الإحباط ..
الحسن كان مركز عليها ضحك في نفسه وقال"من بين التفاح كله جت في خاطرها هادي...متعبه البنت هيا"
عليا قاعده تشبح للتفاحه...
جنان: فوتيها تو بعدين الرجاله يقطفوها...
عليا : جي خاطري فيها..
ميسون : قصدك حامل..
عليا🤤😳
جنان قرصتها: شن تخترفي انتي..
عليا : قصدي حلوة تسهف يعني جت في خاطري 😳..تس لكن مستحيل نوصل فيها..قامت ايدها بمحاوله يائسه..بس فجأه حست روحها وكأنها طارت فوق...لقت روحها قدام التفاحه مباشرة..
عليا: ياربي رحمتك شن صار توا...
الحسن وهو قايمها : هيا خوديها بسرعه..كتفي انخلع..
عليا شبحت لوطا لقاته قايمها ركزت ع اخر جمله قالها: عينك اني مش سمينه..
الحسن : غير خوديها توا بعدين انتناقشوا في موضوع وزنك..
كلهم يتفرجوا ومذهولين كل مرة الحسن يفاجئهم بحركه شكل تبين جانب تاني في شخصيته عمرهم ماشافوه..ركزوا ع حديثهم وبدوا يضحكوا..
عليا اتنرفرت: معاش نبيها هي نزلني..
الحسن : عينك ..تاخديها توا ولانقلبك ع وجهك..
عليا مابتش ترد..الحسن تحرك شويه حست روحها بطيح..
عليا: اااااه خلاص خلاص ..وجبدت التفاحه...ابتسم نص ابتسامه وهما ضحكوا..
لما نزلها جت في حضنه قعدوا يشبحوا ل بعض ايديها ع كتافه وهو محاوطها بإيديه من خصرها..كانوا قراب هلبه هلبه ....الحسن كان حيتهور وعليا مستسلمه بلاحركه...
"ووووووووه..."
انخلعوا كلهم وهما كانوا مركزين ع المشهد الرومانسي اللي كان ع وشك الوقوع...
الحسن طلق عليا وقدمله: خير بلاك؟؟؟؟
حسان بربكه بلع ريقه: ءء....اللعبه..
الحسن : لعبه !!!!قام ايده بيضربه بوكس..بس جت قدامه من بعيد هاله ...تحشم يضربه قدام مرته..نزل ايده وولا من جديد لشجر التفاح ...
***
شن بتستفيد لو رفعت عليه قضيه ..
منصف: نبي نلعب بيه شويه...
عبدالقدوس: العب ياسيدي..الحق حتى اني متنرفز منه...يبيها...
منصف ابتسم بخبث : كويس....خل نكسروا خشمه شويه ...
....يتبع...
