#الحسن
ﺑﺎﻗﻲ ﺍﻟﺠﺰﺀ ﺍﻟﺤﺎﺩﻱ ﻭﺍﻟﺨﻤﺴﻴﻦ 💔🛡
صورة 3.4K صورة 101 صورة 31
ﺑﻮﺍﺳﻄﺔ GomanFared
ﻣﻘﻌﻤﺰﺓ ﻓﻲ ﺍﻟﺼﺎﻟﻮﻥ ﻭﻣﻌﺎﻫﺎ ﺭﺍﺟﻠﻬﺎ ﻭﺑﻮﻫﺎ ... ﻫﻲ ﺗﺮﻛﻴﺰﻫﺎ ﻛﻠﻪ ﻉ ﺑﻮﻫﺎ ﺍﻟﻠﻲ ﺩﺍﻳﺮ ﺭﻭﺣﻪ ﻣﺮﻛﺰ ﻓﻲ ﺍﻟﺘﻠﻔﺰﻳﻮﻥ ﻭﻭﺍﺿﺢ ﻋﻘﻠﻪ ﻓﻲ ﻣﻜﺎﻥ ﺗﺎﻧﻲ ...
ﺭﺍﺟﻠﻬﺎ ﻣﺮﻛﺰ ﻋﻠﻴﻬﺎ ﻭﻋﻠﻴﻪ .. ﻭﻳﺘﻨﻬﺪ ﺑﻜﺘﻤﺎﻥ ﻭﻳﺨﻤﻢ ﺷﻦ ﺑﻴﺼﻴﺮ ...
ﺍﺑﺘﺴﺎﻡ : ﺑﺎﺑﺎ ...
ﻻﺭﺩ ...
ﺍﺑﺘﺴﺎﻡ ﺑﺼﻮﺕ ﺃﻋﻠﻰ : ﺑﺎﺍﺑﺎ ..
ﻋﺒﺪﺍﻟﻘﺪﻭﺱ ﺗﻠﻔﺘﻠﻬﺎ ﺑﺮﻓﻌﺔ ﺣﻮﺍﺟﺐ : ﺧﻴﺮ ﻳﺎﺑﺎﺑﺎ ..
ﺍﺑﺘﺴﺎﻡ : ﺍﻧﺖ ﺍﻟﻠﻲ ﺧﻴﺮﻙ ﺗﺒﺎﻥ ﻣﺶ ﻉ ﺑﻌﻀﻚ ﺣﺘﻰ ﺍﻟﻐﺪﻱ ﻣﺎﺗﻐﺪﻳﺶ ﺯﻳﻦ ..
ﻋﺒﺪﺍﻟﻘﺪﻭﺱ ﺍﺑﺘﺴﻢ : ﻻﻳﺎﺑﺎﺑﺎ ﻋﺎﺩﻱ ﻳﻌﻨﻲ ﻧﻔﻜﺮ ﻓﻲ ﺍﻟﺨﺪﻣﻪ ..
ﺑﻼﻝ : ﺭﺑﻲ ﻳﻌﺎﻭﻧﻚ .. ﺍﺑﺘﺴﻤﻠﻪ ﻋﺒﺪﺍﻟﻘﺪﻭﺱ ﻣﺠﺎﻣﻠﻪ ﻭﺭﺟﻊ ﺷﺎﻑ ﻟﻠﺘﻠﻔﺰﻳﻮﻥ .. ﺍﻣﺎ ﺍﺑﺘﺴﺎﻡ ﻓﺸﺎﻓﺖ ﻟﺒﻼﻝ ﺑﻨﻈﺮﺓ ﺣﺰﻥ .. ﻭﻫﻮ ﻏﻤﺾ ﻋﻴﻮﻧﻪ ﻭﻓﺘﺤﻬﻢ ﺑﺈﺑﺘﺴﺎﻣﻪ ﺑﺶ ﻳﺨﻔﻒ ﻋﻨﻬﺎ ﻭﻫﻲ ﺍﺑﺘﺴﻤﺖ ﺍﺑﺘﺴﺎﻣﻪ ﺧﻔﻴﻔﻪ ﻭﺭﺟﻌﺖ ﺷﺎﻓﺖ ﻟﻠﺘﻠﻔﺰﻳﻮﻥ ..
***
ﻓﻲ ﻣﻨﻄﻘﻪ ﻣﻦ ﻣﻨﺎﻃﻖ ﻃﺮﺍﺑﻠﺲ ﺍﻟﺮﺍﻗﻴﻪ .. ﻧﻘﺮﺑﻮﺍ ﺍﻛﺜﺮ ﻟﺼﺎﻟﺔ ﺍﻓﺮﺍﺡ ﻛﺒﻴﺮﺓ ﻭﻣﺸﻬﻮﺭﺓ ﻭﻟﻴﻬﺎ ﺳﻨﻴﻦ ﻭﺳﻨﻴﻦ ... ﻳﻨﺴﻤﻊ ﻣﻨﻬﺎ ﺻﻮﺕ ﺍﻷﻏﺎﻧﻲ ﻋﺎﻟﻲ .. ﻧﺨﺸﻮﺍ ﺩﺍﺧﻞ .. ﺍﻟﺪﻧﻴﺎ ﻣﻘﻠﻮﺑﻪ ﻣﻌﺎﺯﻳﻢ ﻭﻣﻨﺸﻄﻪ ﺭﺍﺑﺨﻪ .. ﻭﺍﻟﻌﺮﻭﺳﻪ ﻉ ﺍﻟﻜﻮﺷﻪ .. ﻭﻓﻲ ﻭﺣﺪﻩ ﺗﺒﺎﻥ ﻣﺘﺮﻳﺴﻪ ﻉ ﺍﻟﻮﺿﻊ ﻭﺗﺮﺍﻗﺐ ﻫﻨﻲ ﻭﻫﻨﻲ .. ﺭﻥ ﺗﻠﻴﻔﻮﻧﻬﺎ ﻃﻠﻌﺖ ﻣﻦ ﺍﻟﺰﺣﻤﻪ .. ﻭﺧﺸﺖ ﻟﻮﺍﺣﺪ ﻣﻦ ﺣﻤﺎﻣﺎﺕ ﺍﻟﺼﺎﻟﻪ .. ﻟﻘﺖ ﻭﺣﺪﻩ ﺗﺴﺎﻭﻱ ﻓﻲ ﻣﻜﻴﺎﺟﻬﺎ ﺭﺍﺟﺘﻬﺎ ﻟﻴﻦ ﻃﻠﻌﺖ .. ﻃﻮﻝ ﻓﺠﺮﺗﻬﺎ ﺳﻜﺮﺕ ﺍﻟﺤﻤﺎﻡ ﺑﺎﻟﻤﻔﺘﺎﺡ .... ﺭﺩﺕ ..
ﻣﻠﻴﺤﻪ : ﻫﺎﻩ ﻳﺎﺻﻼﺡ ..
ﺻﻼﺡ : ﻣﻊ ﺍﻟﺴﺎﻋﻪ 11 ﺣﻴﺠﻮﺍ ﻳﺮﻓﻌﻮﻫﺎ ..
ﻣﻠﻴﺤﻪ : ﺷﻮﻑ ﻳﺎﺻﻼﺡ ﺍﻧﻲ ﺿﺤﻴﺖ ﻭﺧﻠﻴﺖ ﻋﺮﺱ ﺑﻨﺘﻲ ﺍﻟﻜﺒﻴﺮﺓ ﻣﺮﺣﻠﻪ ﻣﻦ ﻣﺮﺍﺣﻞ ﺷﻐﻠﻚ ...
ﺻﻼﺡ : ﻏﻴﺮ ﺭﻳﺤﻲ ﺭﻭﺣﻚ ﻓﻴﻔﺘﻲ ﻓﻴﻔﺘﻲ ...
ﺿﺤﻜﺖ ﺑﺨﺒﺚ : ﻗﺘﻠﻲ ﺍﻟﺴﺎﻋﻪ ..11
ﺻﻼﺡ ﺍﺑﺘﺴﻢ ﺗﻬﻜﻤﺎ : ﺍﻳﻪ ..
ﻣﻠﻴﺤﻪ ﺑﻀﺤﻜﻪ : ﺳﺎﻓﺎ ﺳﺎﻓﺎ ... ﻭﺻﻜﺮ .. ﻃﻠﻌﺖ ﻭﻫﻲ ﻓﺮﺣﺎﻧﻪ ﻭﻛﻤﻠﺖ ﻟﻴﻠﺔ ﺍﻟﺤﻔﻠﻪ ..
ﻃﺒﻌﺎ ﻣﻠﻴﺤﻪ ﺍﺧﺖ ﻭﺍﺣﺪ ﻣﻦ ﺭﺟﺎﻝ ﺍﻟﻜﻮﺑﺮﺍ ﻭﻫﻤﺎ ﺗﻮﺍﻧﺴﻪ .. ﺭﺍﺟﻠﻬﺎ ﻣﻴﺖ ﻭﺗﻜﻔﻞ ﺑﻴﻬﻢ ﺧﻮﻫﺎ ﺍﻟﻠﻲ ﻭﻛﻠﻬﺎ ﻭﻭﻛﻞ ﺑﻨﺎﺗﻬﺎ ﻣﻦ ﻓﻠﻮﺱ ﺍﻟﺤﺮﺍﻡ ﻣﺎﻛﺎﻧﺶ ﻳﻬﻤﻬﺎ ﺷﻲ ﻏﻴﺮ ﺍﻟﻔﻠﻮﺱ ﻭﺍﻟﻌﺰ ﺍﻟﻠﻲ ﻋﺎﻳﺸﻪ ﻓﻴﻬﻢ ﻭﻛﺎﻧﺖ ﺗﺴﺎﻋﺪ ﻓﻴﻪ ﻭﺗﻐﻨﻢ ﻣﻨﻪ ﻣﻘﺎﺑﻞ ﻣﺴﺎﻋﺪﺍﺗﻬﺎ ﻣﺒﺎﻟﻎ ﻛﺒﻴﺮﻩ ...
....
ﺣﻴﻤﺸﻲ ﺍﻟﻤﻮﻛﺐ ﻳﺎﺧﺪ ﺍﻟﺒﻨﺖ ﻭﻃﺒﻌﺎ ﺯﻱ ﻣﺎﺗﻌﺮﻓﻮﺍ ﺭﺍﺟﻠﻬﺎ ﻳﻜﻮﻥ ﻭﺍﺣﺪ ﻣﻦ ﺍﻟﺠﻤﺎﻋﻪ .. ﻳﻌﻨﻲ ﺯﻳﺘﻨﺎ ﻓﻲ ﺩﻗﻴﻘﻨﺎ .. ﻓﻲ ﺍﻟﻌﻠﻦ ﺣﻴﺒﺎﻥ ﻣﻮﻛﺐ ﻋﺎﺩﻱ ﺟﺪﺍ ﻛﻠﻜﺴﻮﺍ ﻏﻨﻮﺍ ﻭﺍﺭﻗﺼﻮﺍ .. ﻭﺍﺳﺘﻌﺪﻭﺍ .. ﺍﺳﺘﻌﺪﻭﺍ ﻷﻱ ﻃﺎﺭﺉ .. ﻣﺠﺮﺩ ﺗﻮﺻﻠﻮﺍ ﻟﻠﻤﻜﺎﻥ ﺍﻟﻤﺘﻔﻖ ﻋﻠﻴﻪ ﺳﻴﺎﺭﺓ ﺍﻟﻌﺮﻭﺳﻪ ﺣﺘﺎﺧﺪ ﻃﺮﻳﻖ ﻭﺍﻧﺘﻮﺍ ﺗﺎﺧﺪﻭﺍ ﻃﺮﻳﻖ ﺗﺎﻧﻲ ... ﻟﻴﻦ ﺗﻮﺻﻠﻮﺍ ﻟﻠﻤﻜﺎﻥ ﺍﻟﻤﻌﻠﻮﻡ ....
ﺍﻱ ﺧﻄﺄ ... ﺍﻳﻴﻴﻲ ﺧﻄﺄ ... ﻣﻬﻤﺎ ﻛﺎﻥ ﺑﺴﻴﻂ .. ﺑﻐﻴﺮ ﺷﻮﻓﺖ ﺩﻣﻜﻢ ﻳﺴﻴﺢ ﻗﺪﺍﻣﻲ ﻣﺶ ﺣﻨﺮﺿﻰ .... ﻭﻣﺶ ﻏﻴﺮ ﺍﻧﺘﻢ ﺑﺲ ... ﻋﺎﺋﻼﺗﻜﻢ ﻛﻠﻬﺎ ﺍﺭﻭﺍﺣﻬﻢ ﻓﻴﺪﻱ ... ﻭﻗﺪ ﺍﻋﺬﺭ ﻣﻦ ﺍﻧﺬﺭ ... ﻭﺍﺷﺮ ﺑﺴﺒﺎﺑﺘﻪ ﻭﻳﺤﺮﻙ ﻓﻴﻬﺎ ﺗﻬﺪﻳﺪﺍ ﺑﺪﻭﻥ ﻣﺎﻳﺘﻜﻠﻢ ... ﻭﻟﻒ ﻭﻃﻠﻊ ﻭﻃﻠﻌﻮﺍ ﻭﺭﺍﻩ ﺣﺮﺳﻪ ..
...
ﺍﻟﻤﻠﺘﺤﻲ : ﺍﻧﺘﺸﺮﻭﺍ ﻓﻲ ﻣﻮﺍﻗﻌﻬﻢ
ﺍﻟﻤﻬﺒﻮﻝ : ﺗﻤﺎﻡ ..... ﺍﻟﻤﻬﺒﻮﻝ ﻛﺎﻥ ﻓﻲ ﺍﻋﻠﻰ ﺳﻄﺢ ﻓﻲ ﺍﻟﻤﻜﺎﻥ .. ﻣﻘﺎﺑﻞ ﻣﻘﺮ ﺍﺟﺘﻤﺎﻉ ﺍﻃﺮﺍﻑ ﺍﻟﺼﻔﻘﻪ ﻭﻛﺎﻥ ﻳﻮﺗﻲ ﻓﻲ ﺑﻨﺪﻗﻴﺔ ﻗﻨﺎﺹ ...
***
ﻣﻘﻌﻤﺰﻳﻦ ﻓﻮﻕ ﺍﻟﺴﻄﺢ ﻭﻫﻲ ﻓﺤﻀﻨﻪ ..
ﻫﺎﻟﻪ ﺗﺸﻮﻑ ﻟﻠﻘﻤﺮ : ﺍﻟﻴﻮﻡ 14 ﻓﻲ ﺍﻟﺸﻬﺮ ﺍﻟﻌﺮﺑﻲ ..
ﺣﺴﺎﻥ : ﺍﻫﺎ ﻗﺪﺭﺗﻴﻪ ﻣﻦ ﺷﻜﻞ ﺍﻟﻘﻤﺮ ..
ﻫﺎﻟﻪ ﺑﺈﺑﺘﺴﺎﻣﻪ : ﺍﻳﻪ ..
ﺣﺴﺎﻥ ﺑﺄﺑﺘﺴﺎﻣﻪ : ﺍﻟﻘﻤﺮ ﺍﻟﻠﻲ ﻋﻨﺪﻱ ﺍﻧﻲ ﻛﻞ ﻟﻴﻠﻪ ﻃﺎﻟﻊ ..
ﻫﺎﻟﻪ ﺿﺤﻜﺖ .. ﻭﺣﺴﺎﻥ ﺑﺎﺳﻬﺎ ﻣﻦ ﺧﺪﻫﺎ ﺑﻮﺳﻪ ﻃﻮﻳﻠﻪ ..
ﻫﺎﻟﻪ ﺑﻀﺤﻜﻪ : ﺣﺴﺎﻥ .. ﺍﻧﺖ ﺷﻦ ﺗﺒﻲ ﻭﻟﻴﺪ ﻭﻻﺑﻨﻴﻪ ..
ﺣﺴﺎﻥ : ﻫﻮ ﺍﻛﻴﺪ ﺍﻟﻠﻲ ﻳﺠﻲ ﻣﻦ ﺭﺑﻲ ﻳﺎﻣﺤﻼﻩ .. ﻟﻜﻦ ﺍﻧﻲ ﻧﺒﻲ ﺑﻨﻴﻪ .. ﻭﺣﺘﻲ ﺍﺳﻤﻬﺎ ﻓﻲ ﻋﻘﻠﻲ .
ﻫﺎﻟﻪ ﺑﻌﺪﺕ ﻭﺷﺒﺤﺘﻠﻪ : ﺷﻦ ﻫﻮ ..
ﺣﺴﺎﻥ ﺷﺒﺤﻠﻬﺎ ﺑﺤﺐ : ﻫﺪﺍﻳﻪ ..
ﺷﺒﺤﻮﺍ ﻟﻌﻴﻮﻥ ﺑﻌﺾ ﻫﻠﺒﻪ ... ﻭﻗﺮﺑﻮﺍ ﻟﺒﻌﺾ ... ﻭﻛﺎﻧﺖ ﺍﻟﺒﻮﺳﻪ ﻃﻮﻳﻠﻪ .. ﺑﻌﺪﻳﻦ ﺧﺪﺍﻫﺎ ﻓﺤﻀﻨﻪ ﻭﻗﺎﻝ " ﻧﺤﺒﻚ .."💓 ﻭﻫﻲ ﺍﻛﺘﻔﺖ ﺑﺤﻀﻨﻪ ﺑﻘﻮﺓ ﺭﺩﺍ ﻋﻠﻴﻪ ..
***
ﺍﻟﺨﻮﺍﺕ ﻗﺎﺭﻧﺎﺕ ﺍﻟﺮﻭﺱ ﺑﺒﻌﺾ ..
ﻣﺪﻳﺤﻪ ﺑﻀﺤﻜﻪ : ﻳﺎﻛﺒﺪﻱ ﻃﻠﻊ ﺭﻭﻣﺎﻧﺴﻲ ﺑﺄﻣﺘﻴﺎﺯ ..
ﻋﻠﻴﺎ ﻭﻫﻲ ﺣﺎﻃﻪ ﺍﻳﺪﻫﺎ ﻉ ﻗﻠﺒﻬﺎ : ﻫﻴﺒﻪ ﻭﺭﺟﻮﻟﻪ ﻭﺷﺨﺼﻴﻪ ﻭﺍﺧﻼﻕ ﻭﻭﺳﺎﻣﻪ ﻭﺭﻛﺎﺯﺓ ﻭﺭﻭﻣﺎﻧﺴﻴﻪ .. ﻛﺒﻴﺪﺗﻲ ﻳﺎﻧﺎﺱ 😍
ﻣﺪﻳﺤﻪ : ﻫﻬﻬﻬﻬﻬﻬﻬﻬﻬﻬﻪ .. ﻳﺎﺭﺑﻲ ﻫﺎﺩﻱ ﻫﻲ ﻧﻔﺴﻬﺎ ﺍﻟﻠﻲ ﻛﺎﻧﺖ ﺗﺒﻲ ﺍﻃﻔﺸﻪ ﺑﺄﻱ ﻃﺮﻳﻘﻪ ﻟﻤﺎ ﺧﻄﺒﻬﺎ ...
ﻋﻠﻴﺎ ﻗﺮﻧﺖ ﺣﻮﺍﺟﺒﻬﺎ ﻭﺿﺮﺑﺘﻬﺎ : ﻣﻌﺎﺵ ﺍﺫﻛﺮﻳﻨﻲ ﺑﻐﺒﺎﺋﻲ ﺍﻷﺣﺒﺶ ..
ﻣﺪﻳﺤﻪ : ﻫﻬﻬﻬﻬﻬﻬﻬﻬﻬﻬﻬﻪ
ﺍﻣﻴﺮﻩ ﺍﻟﻠﻲ ﻛﺎﻧﺖ ﺭﺍﻗﺪﻩ ﻓﻲ ﺯﺍﻭﻳﺔ ﺩﺍﺭ ﺍﻟﻤﻌﻴﺸﻪ .. ﻛﺎﻧﺖ ﻓﺎﺗﺤﻪ ﺻﻮﺭ ﺳﺮﻣﺪ ﻭﺗﺘﻔﺮﺝ ﻋﻠﻴﻬﻢ ﻭﺗﺘﻨﻬﺪ " ﻣﺶ ﻋﺎﺭﻓﻪ ﻋﻼﺵ ﺣﺎﺳﻪ ﺑﻘﻠﺒﻲ ﻳﻨﻘﺒﺾ ﻟﻤﺎ ﻧﻔﻜﺮ ﺷﻦ ﺑﻴﺼﻴﺮ ﻓﻴﻨﺎ ﺑﻌﺪﻳﻦ .. ﻓﺮﻕ ﺍﻟﻌﻤﺮ ﻣﺶ ﻣﻬﻢ ﻋﻨﺪﻱ ﺍﻫﻮ ﻋﻠﻴﺎ ﻭﺍﻟﺤﺴﻦ ﻳﻬﺒﻠﻮﺍ ﻣﻊ ﺑﻌﺾ .. ﺑﺲ ﺍﻟﻠﻲ ﻣﺨﻮﻓﻨﻲ ﺍﻧﺖ ﻭﻣﺶ ﻋﺎﺭﻓﻪ ﻋﻼﺵ ..."
***
ﺍﻟﺨﻮﺍﺕ ﻛﻞ ﻭﺣﺪﻩ ﻓﻲ ﺳﺮﻳﺮﻫﺎ ﻭﻣﻘﺎﺑﻼﺕ ﺑﻌﺾ ..
ﺟﻨﺎﻥ : ﻳﻌﻨﻲ ﺍﻧﺘﻲ ﻣﻮﺍﻓﻘﻪ ﻋﻠﻴﻪ ﻏﻴﺮ ﺗﺒﻲ ﺗﻌﺒﻴﻪ ﺷﻮﻳﻪ ..
ﺧﻮﻟﻪ : ﺍﻳﻪ .. ﻣﺎﻧﺒﻴﺸﻲ ﻳﺤﺲ ﺍﻧﻲ ﺳﺎﻫﻠﻪ ... ﺍﻟﺮﺍﺟﻞ ﻻﺯﻡ ﻳﺘﻌﺐ ﻉ ﺍﻟﻤﺮﺍﺓ ﺍﻟﻠﻲ ﻳﺒﻴﻬﺎ ﺑﺶ ﻳﺤﺲ ﺑﻘﻴﻤﺘﻬﺎ .. ﻟﻤﺎ ﺗﻘﺪﻣﻲ ﺗﻨﺎﺯﻻﺕ ﺍﻧﺘﻲ ﺑﺲ ﻭﺗﺒﺎﺩﺭﻱ ﺩﻳﻤﺎ ﺍﻧﺘﻲ ﺍﻷﻭﻝ .. ﺣﻴﺤﺲ ﺑﺄﻧﻚ ﺗﻤﻮﺗﻲ ﻓﺤﺒﻪ ﻭﺗﻤﻮﺗﻲ ﻣﻦ ﻏﻴﺮﻩ ﺣﻴﺮﻛﺐ ﻋﻠﻴﻚ ..
ﺟﻨﺎﻥ : ﻓﻲ ﻓﺮﻕ ﺑﻴﻦ ﺭﻳﺎﺽ ﻭﺳﻠﻴﻢ ..
ﺧﻮﻟﻪ : ﺍﻟﺮﺍﺟﻞ ﺭﺍﺟﻞ ﻟﻤﺎ ﻳﺤﺲ ﺍﻟﻤﺮﺍﺓ ﺳﺎﻫﻞ ﻳﻮﺻﻞ ﻓﻴﻬﺎ ﻣﺶ ﺣﻴﺪﻳﺮﻟﻬﺎ ﻗﻴﻤﻪ ..
ﺟﻨﺎﻥ ﺷﺒﺤﺖ ﻷﺧﺘﻬﺎ ﺑﻌﺪﻳﻦ ﺷﺒﺤﺖ ﻓﻲ ﺍﻟﻔﺮﺍﻍ ﻭﺍﺑﺘﺴﻤﺖ : ﺍﻟﻠﻲ ﻋﻨﺪﻱ ﺍﻧﻲ ﻏﻴﺮ ﺍﻟﻐﻴﺮ ..
ﺧﻮﻟﻪ : ﻫﻬﻬﻬﻬﻬﻬﻬﻪ
***
ﺑﺮﻧﻴﻪ ﻛﺎﻧﺖ ﻣﻘﻌﻤﺰﺓ ﺑﺮﻭﺣﻬﺎ ﻓﻲ ﺍﻟﺠﻨﺎﻥ ...
ﻃﻠﻌﺘﻠﻬﺎ ﺍﻧﻌﺎﻡ ﺷﺒﺤﺘﻠﻬﺎ ﺷﻮﻳﻪ ﺑﻌﺪﻳﻦ ﻗﺪﻣﺖ ﻭﻗﻌﻤﺰﺕ ﺣﺪﺍﻫﺎ ..
ﺍﻧﻌﺎﻡ : ﻏﺮﻳﺒﻪ ﺍﻣﻲ ﻗﺒﻞ 9 ﺭﺍﻗﺪﻩ ..
ﺑﺮﻧﻴﻪ ﺗﻨﻬﺪﺕ : ﻣﺎﻧﻲ ﻋﺎﺭﻓﻪ ﺧﻴﺮﻩ ﺧﻠﻮﻗﻲ ﺿﺎﻳﻘﺎﺕ ﻭﻗﻠﺒﻲ ﻧﺎﺧﺼﻨﻲ ..
ﺍﻧﻌﺎﻡ : ﺗﻔﻜﺮﻱ ﻓﺒﻮﻱ ..
ﺑﺮﻧﻴﻪ ﺷﺒﺤﺘﻠﻬﺎ : ﺍﻟﻴﻮﻡ ﺍﻟﺼﺒﺢ ﻛﻠﻤﻨﻲ ﺻﻮﺗﻪ ﻣﺎﻋﺠﺒﻨﻴﺶ ...
ﺍﻧﻌﺎﻡ : ﺑﻮﻱ ﻳﺪﻭﺭ ﻣﻦ ﻣﻜﺎﻥ ﻟﻤﻜﺎﻥ ﻓﺾ ﻧﺰﺍﻋﺎﺕ ﺻﻠﺢ .. ﺩﻭﺷﻪ ﻭﺟﺪﺍﻝ ... ﻃﺒﻴﻌﻲ ﺍﻣﻲ ﺑﻴﺘﻌﺐ ..
ﺑﺮﻧﻴﻪ : ﺑﻮﻙ ﻓﻴﻪ ﺣﺎﺟﻪ ﻣﺎﻧﻐﺒﻰ ﻓﻴﻪ ﺣﺎﻓﻈﺎﺗﻪ ﺯﻱ ﻛﻒ ﻳﺪﻱ .. ﻭﻗﺎﻣﺖ ﺍﻳﺪﻫﺎ ...
ﺍﻧﻌﺎﻡ : ﺇﻥ ﺷﺎﺀ ﺍﻟﻠﻪ ﺧﻴﺮ ...
ﺑﺘﻴﻨﻪ ﺗﺸﺒﺢ ﻟﻮﻟﺪﻫﺎ ﺍﻟﻠﻲ ﻣﻘﻌﻤﺰ ﻭﻳﺸﻮﻑ ﻟﺘﻠﻴﻔﻮﻧﻪ ..
ﺑﺘﻴﻨﻪ : ﺷﻦ ﻣﺪﺍﻳﺮ ﻓﻲ ﺧﺪﻣﺘﻚ ..
ﻻﺭﺩ ...
ﺑﺘﻴﻨﻪ : ﻣﻨﻨﺼﺼﻒ ..
ﺷﺒﺢ ﻷﻣﻪ ﺑﺮﻓﻌﺔ ﺣﺎﺟﺐ
ﺑﺘﻴﻨﻪ : ﻓﺸﻨﻮ ﺳﺎﺭﺡ ..
ﻫﺰ ﺭﺍﺳﻪ ﺑﺎﻟﻨﻔﻲ : ﻣﺶ ﺳﺎﺭﺡ
ﺑﺜﻴﻨﻪ ﺑﻀﺤﻜﻪ : ﻏﻴﺮ ﻗﻮﻝ ﻭﻟﻴﺪﻱ ﻛﺎﻥ ﻓﺤﺎﺟﻪ ﺗﻔﺮﺡ ﻓﺮﺣﻨﻲ ..
ﻣﻨﺼﻒ ﻏﻤﺾ ﻋﻴﻮﻧﻪ ﻭﻓﺘﺤﻬﻢ ﺑﻤﻠﻞ : ﺍﻣﻲ ﺑﺎﻟﻠﻪ ﻋﻠﻴﻚ ﺳﻜﺮﻱ ﻉ ﺍﻟﻤﻮﺿﻮﻉ ﺍﻟﺰﻓﺖ ﻫﺬﺍ ﻭﻣﻌﺎﺵ ﺗﻔﺘﺤﻴﻪ ..
ﺑﺘﻴﻨﻪ : ﻋﻼﺵ ﻭﻟﻴﺪﻱ ﻋﻼﺵ ﺑﺲ .. ﺑﻨﺖ ﺧﺎﻟﻚ ..
ﻣﻨﺼﻒ ﺑﺼﻮﺕ ﻋﺎﻟﻲ : ﺍﻣﻤﻤﻤﻲ ... ﺍﻧﻲ ﻧﻮﺽ ﻣﺮﺓ ﻭﺣﺪﻩ ﺧﻴﺮ .. ﻭﻧﺎﺽ ﻭﺧﺶ ﻟﺪﺍﺭﻩ .. ﻭﺍﻣﻪ ﺗﻨﻬﺪﺕ ﺑﻀﻴﻖ ...
***
ﻣﻜﺎﻥ ﺍﻟﻌﻤﻠﻴﻪ ...
ﻃﺎﻳﺮﺓ ﻫﻠﻴﻜﻮﺑﺘﺮ ﻫﺒﻄﺖ ﻓﻲ ﺍﻟﻤﻜﺎﻥ ... ﻛﺎﻥ ﺑﻌﻴﺪ ﻋﻠﻴﻬﺎ ﺷﻮﻳﻪ ﻭﺍﻗﻒ ﺍﻟﻜﻮﺑﺮﺍ ﻭﻣﻌﺎﻩ ﺍﻟﻜﺎﻣﻠﻴﻮﻥ ﻭﺍﺑﻮﺍﻟﺨﻨﺴﺎﺀ ﻭﻣﺠﻤﻮﻋﻪ ﻣﻦ ﺍﻟﺮﺟﺎﻝ ﺍﻟﻤﻨﺘﺸﺮﻳﻦ .. ﻧﺰﻝ ﻣﻨﻬﺎ ﻭﺍﺣﺪ ﺿﺨﻢ ﺍﻟﺠﺴﻢ ﻭﻧﺰﻝ ﺑﻌﺪﻩ ﺭﺍﺟﻞ ﺍﺭﺑﻌﻴﻨﻲ ﻭﺍﺿﺢ ﺍﻧﻪ ﻣﺶ ﻋﺮﺑﻲ ..
ﺩﺍﺭ ﺑﻌﻴﻮﻧﻪ ﻓﻲ ﺍﻟﻤﻜﺎﻥ .... ﺑﻌﺪﻳﻦ ﺷﺒﺢ ﻟﻠﻜﻮﺑﺮﺍ ﻗﺪﻣﻠﻪ
ﺟﻴﺮﻣﻲ : ﻃﺎﺏ ﻣﺴﺎﺅﻙ ..
ﺍﻟﻜﻮﺑﺮﺍ : ﻭﻣﺴﺎﺅﻙ .. ﻫﻞ ﻛﺎﻧﺖ ﺭﺣﻠﺘﻚ ﻣﺮﻳﺤﻪ ..
ﺟﻴﺮﻣﻲ : ﺑﻌﺾ ﺍﻟﺸﻲ ..
ﺍﻟﻜﻮﺑﺮﺍ : ﺣﺴﻨﺎ ﻓﻠﻨﺪﺧﻞ ﺍﻟﻜﻮﻣﺎﻧﺪﺍ ﻳﻨﺘﻈﺮ ..
ﺟﻴﺮﻣﻲ ﻫﺰ ﺭﺍﺳﻪ ﺑﺈﻳﺠﺎﺏ ﻭﺧﺸﻮﺍ ﻛﻠﻬﻢ ...
...
ﺍﻟﻤﻠﺘﺤﻲ : ﺷﻜﻠﻪ ﺍﻧﺠﻠﻴﺰﻱ ..
ﺍﻟﻤﻬﺒﻮﻝ : ﺭﻭﺳﻲ ...
ﺍﻟﻤﺪﻣﻦ : ﻣﺘﺄﻛﺪ !...
ﺍﻟﻤﻬﺒﻮﻝ : ﺍﻳﻪ ﺑﺤﺘﺚ ﻋﻨﻪ ﻭﺍﺣﺪ ﻣﻦ ﺍﻫﻢ ﺍﻋﻀﺎﺀ ﻋﺼﺎﺑﺔ ﻣﺎﻓﻴﺎ ﻛﺒﻴﺮﺓ ﻋﺎﻟﻤﻴﻪ ﻭﻟﻴﻪ ﺷﻐﻠﻪ ﺍﻟﺨﺎﺹ ﻓﻲ ﺑﻼﺩﻩ .. ﻛﺎﻥ ﻳﻨﺸﺪ ﻭﻳﻨﺤﺒﺲ ﻭﻣﺎﺗﻔﻮﺗﺶ ﻋﻠﻴﻪ ﺳﻨﻪ ﻭﻳﻄﻠﻊ ...
ﺍﻟﻤﻠﺘﺤﻲ : ﻣﺪﻋﻮﻡ ...
ﺍﻟﻤﺪﻣﻦ : ﺯﻱ ﺟﻤﺎﻋﺘﻨﺎ ﺍﻟﻠﻲ ﺗﻮﺍ ﺿﺎﺑﻂ ﻛﺒﻴﺮ ﻓﻲ ﻣﻜﺎﻓﺤﻪ ﺍﻹﺭﻫﺎﺏ ﻳﺨﻔﻲ ﻣﻠﻒ ﻭﺍﺣﺪ ﺍﺭﻫﺎﺑﻲ ﺑﺶ ﻳﺤﻤﻴﻪ ..
ﺟﻤﺎﻋﻪ ﻣﻦ ﺍﻻﻣﻦ ﺍﻟﻌﺎﻡ ﻫﻤﺎ ﺍﺍﻟﻠﻲ ﺣﻴﺤﺮﺳﻮﺍ ﺍﻟﺒﻀﺎﻋﻪ ﺍﻟﻠﻲ ﺣﻴﻨﻘﻠﻮﻫﺎ ﺍﻟﻴﻮﻡ ﻓﻲ ﺍﻟﻤﻮﻛﺐ .. ﺳﻴﺎﺳﻲ ﻛﺒﻴﺮ ﻭﺭﺟﻞ ﺍﻋﻤﺎﻝ ﻫﻮ ﺍﻟﻠﻲ ﺣﻴﻐﺴﻞ ﻓﻠﻮﺱ ﺍﻟﺼﻔﻘﺎﺕ ﺍﻟﻤﺸﺒﻮﻫﻪ ...
ﺍﻟﻤﻬﺒﻮﻝ : ﻭﺷﻦ ﺍﻟﻠﻲ ﺿﻴﻊ ﺑﻼﺩﻧﺎ ﻏﻴﺮ ﺿﻴﺎﻉ ﺍﻷﻣﺎﻧﻪ .....
....
ﻛﺎﻧﻮﺍ ﺩﺍﺧﻞ ﺣﺎﺿﺮﻳﻦ ﺟﻤﻴﻊ ﺍﻃﺮﺍﻑ ﺍﻟﺼﻔﻘﻪ ... ﻛﺎﻧﻮﺍ ﻓﻲ ﻣﺠﻤﻮﻋﺘﻴﻦ ... ﺟﻬﻪ ﻳﺘﻤﻮﺍ ﻓﻲ ﺻﻔﻘﻪ ﺍﻟﺴﻼﺡ .. ﻭﺟﻬﺔ ﺑﻴﻊ ﻭﺷﺮﺍﺀ ﻣﺨﺪﺭﺍﺕ ... ﺑﻌﺪ ﻧﻘﺎﺵ ﻃﺎﻝ ... ﺍﺗﻔﻘﻮﺍ ﺍﻻﻃﺮﺍﻑ ..
ﺍﻟﺮﻭﺳﻲ ﺩﺍﺭ ﻣﻜﺎﻟﻤﻪ ... ﺧﻼﻝ 10 ﺩﻗﺎﻳﻖ ﻛﺎﻥ ﻭﺍﺻﻠﻪ ﻃﻴﺎﺭﺓ ﺗﺎﻧﻴﻪ ﻛﺎﻥ ﻓﻴﻬﺎ ﺍﻟﺒﻀﺎﻋﻪ ... ﺍﻣﺎ ﺍﻟﺴﻼﺡ ﻓﻮﺻﻞ ﺑﺤﺎﻭﻳﺎﺕ ﻛﺒﻴﺮﺓ ﻣﺤﻄﻮﻃﻪ ﻓﻲ ﺷﺎﺣﻨﺎﺕ .. ﻭﻃﺒﻌﺎ ﺑﻤﺴﺎﻋﺪﻩ ﺟﻤﺎﻋﻪ ﻳﺨﺪﻣﻮﺍ ﻓﻲ ﺍﻟﻤﻮﺍﻧﺊ ﻟﻸﺳﻒ ...
ﺑﺪﻭﺍ ﻳﻮﺯﻋﻮﺍ ﻓﻲ ﺍﻟﺒﻀﺎﻋﻪ ﻉ ﺳﻴﺎﺭﺍﺕ ﺍﻟﻤﻮﻛﺐ ﺍﻟﻠﻲ ﻛﺎﻧﻮﺍ 12 ﺳﻴﺎﺭﺓ 7.. ﻣﻨﻬﻢ ﻋﺎﺍﻟﻴﺎﺕ ...
....
ﺍﻟﻤﻠﺘﺤﻲ : ﺗﺄﻫﺒﻮﺍ ...
ﺍﻟﻤﺪﻣﻦ : ﺍﺳﺘﻌﺪﻭﺍ ...
ﺍﻟﻤﻬﺒﻮﻝ ﻳﺸﺒﺢ ﻟﻠﺴﺎﻋﻪ ﻓﻲ ﺍﻳﺪﻩ ﻓﺎﺗﻮﺍ ﺑﺎﻟﺰﺑﻂ 5 ﺩﻗﺎﻳﻖ ..
ﺍﻟﻤﻬﺒﻮﻝ : ﺍﺑﺪﻭﺍ ...
...
ﻓﻲ ﻧﻔﺲ ﺍﻟﻠﺤﻈﻪ
ﺍﻟﻜﻮﺑﺮﺍ : ﺳﺘﺴﺮ ﻛﺜﻴﺮﺍ ﻟﺘﻌﺎﻭﻧﻚ ﻣﻌﻨﺎ ..
ﺟﻴﺮﻣﻲ ﺑﺄﺑﺘﺴﺎﻣﻪ : ﻳﺒﺪﻭ ﺫﻟﻚ ..
ﻓﺠﺄﺓ ...💥💥💥💥💥🔫🔫🔫 ﺿﺮﺏ ﺭﺻﺎﺹ ﻣﺘﻮﺍﺻﻞ ..
ﺟﻴﺮﻣﻲ ﻓﻨﺺ ﻋﻴﻮﻧﻪ ﺑﺼﺪﻣﻪ ..
ﺍﻟﻜﻮﺑﺮﺍ ﺍﻧﺼﻌﻖ : ﺷﻨﻮﻭﻭﻭﻭﻫﺬﺍﺍﺍﺍﺍﺍ ...
ﺧﺸﻮﺍ ﻣﻦ ﺑﺮﺍ : ﺍﻟﺸﺮﻃﻪ ...
ﺍﻟﻜﻮﺑﺮﺍ ﻗﻌﺪ ﺟﺎﻣﺪ ﻓﻲ ﻣﻜﺎﻧﻪ ﻣﻦ ﺍﻟﺼﺪﻣﻪ ﻭﻗﻌﺪ ﻳﻘﻮﻝ : ﻃﻠﻌﻮﺍ ﺍﻟﻜﻮﻣﺎﻧﺪﺍ .. ﺗﻠﻔﺖ ﻭﺑﺼﻮﺕ ﻋﺎﺍﻟﻲ : ﺍﻟﻜﻮﻭﻭﻭﻭﻭﻣﺎﻧﺪﺍﺍﺍ ﻃﻠﻠﻠﻌﻮﻭﻭﻭﻩ ...
ﻃﻮﻝ ﻣﺸﻮﺍ ﺭﺟﺎﻟﻪ .. ﻭﻳﻦ ﻣﺎﻓﻲ ﺍﻟﻜﻮﻣﺎﻧﺪﺍ ...
ﺍﻣﺎ ﺟﻴﺮﻣﻲ ﻭﺭﺟﺎﻟﻪ ﻃﻮﻝ ﻃﻠﻌﻮﺍ ...
ﻛﺎﻧﺖ ﻓﻲ ﻣﻮﺍﺟﻬﺎﺕ ﻣﺴﻠﺤﻪ ﻗﻮﻳﻪ ﻭﻗﻮﺍﺕ ﺍﻷﻣﻦ ﻣﺘﻘﺪﻣﻪ ﻛﻠﻬﺎ ...
ﺍﻟﻤﻬﺒﻮﻝ ﻣﻮﺟﻪ ﺍﻟﻘﻨﺎﺻﻪ ﻣﺘﺎﻋﻪ ﺟﻬﺔ ﻣﺨﺮﺝ ﻟﻠﻤﺒﻨﻲ ﺍﻟﻠﻲ ﻛﺎﻧﻮﺍ ﻣﺠﺘﻤﻌﻴﻦ ﻓﻴﻪ .. ﻳﺮﺍﻗﺐ ﻭﻛﺎﻥ ﻣﺘﻮﻗﻊ ﺍﻥ ﻓﻲ ﺣﺪ ﺣﻴﻄﻠﻊ ﻣﻦ ﻫﻨﻲ ... ﻭﻣﺎﻫﻲ ﺇﻻ ﻟﺤﻈﺎﺕ ﻭﻃﻠﻌﻮﺍ ﻣﺠﻤﻮﻋﻪ ﻓﻲ ﻭﺳﻄﻬﻢ ﺷﺨﺺ ﻻﺑﺲ ﺍﺳﻮﺩ ﻭﻗﺒﻌﻪ ﺳﻮﺩﺍ .. ﻣﺎﻛﺎﻧﺶ ﻭﺍﺿﺢ ﺍﻟﻤﻼﻣﺢ .. ﺑﺲ ﺍﻟﻮﺍﺿﺢ ﺍﻥ ﺷﺨﺺ ﻣﻬﻢ ﻳﺤﺎﻭﻟﻮﺍ ﻳﻄﻠﻌﻮﻩ ﺳﺎﻟﻢ ..
ﺍﻟﻤﻬﺒﻮﻝ ﻭﺟﻪ ﺍﻟﻘﻨﺎﺻﻪ ﻣﺘﺎﻋﻪ ﻟﻠﻬﺪﻑ ﻭﺭﻛﺰ ﻋﻠﻴﻪ ﻛﻮﻳﺲ ... ﺍﻳﺪﻩ ﻉ ﺍﻟﺰﻧﺎﺩ .... ﺭﻛﺰ ﺍﻛﺜﺮ .. ﻭﺿﻐﻂ ﻉ ﺍﻟﺰﻧﺎﺩ ...
ﺍﻧﻄﻠﻘﺖ ﺭﺻﺎﺻﻪ ﻣﺤﺪﺩﻩ ﺍﻟﻬﺪﻑ ﺑﺪﻗﻪ ﺗﻮﺟﻬﺖ ﻟﺘﺴﺘﻘﺮ ... ﻓﻲ ﺻﺪﺭ ﺍﻟﻜﻮﻣﺎﻧﺪﺍ ...
ﺩﺏ ﺍﻟﺬﻋﺮ ﻓﻲ ﺍﻟﺮﺟﺎﻝ ﺍﺍﻟﻲ ﻳﺤﺎﻭﻟﻮﺍ ﻳﻄﻠﻌﻮﻩ .. ﺟﺰﺀ ﻣﻨﻬﻢ ﻗﺎﻣﻮﺍ ﺍﻟﻜﻮﻣﺎﻧﺪﺍ ﻭﺣﻄﻮﻩ ﻓﻲ ﺳﻴﺎﺭﺓ ﻭﻃﺎﺭﻭﺍ ﺑﻴﻪ .. ﻭﺍﻟﺠﺰﺀ ﺍﻟﺜﺎﻧﻲ ﻗﻌﺪ ﻳﻀﺮﺏ ﺑﺎﻟﺮﺻﺎﺹ ﻭﻳﻦ ﻣﺎﻛﺎﻥ ﻣﺼﺪﺭ ﺍﻟﻄﻠﻘﺔ ﺍﻟﻠﻲ ﻃﻠﻌﺖ .. ﻓﻲ ﻧﻔﺲ ﺍﻟﻮﻗﺖ ﻛﺎﻥ ﺍﻟﻤﻬﺒﻮﻝ ﻧﺎﺯﻝ ﻣﻦ ﻟﻠﺴﻄﺢ ﻳﺠﺮﻱ ﻓﻲ ﺍﻟﺪﺭﻭﺝ ..
ﺍﻟﻤﻬﺒﻮﻝ : ﻳﺎﺗﺮﻳﺲ ﻗﻨﺼﻨﺎ ﺻﻴﺪ ﻛﺒﻴﺮ ..
ﺍﻟﻤﻠﺘﺤﻲ : ﺭﺍﺟﻞ ..
ﺍﻟﻤﺪﻣﻦ : ﺍﻧﻲ ﺗﻮﺍ ﺧﺸﻴﺖ ﻟﻠﻤﻜﺎﻥ ﻭﻣﻌﺎﻱ ﻗﻮﺓ ﺻﺎﺩﺭﻧﺎ ﺍﻟﺒﻀﺎﻋﻪ ﻛﻠﻬﺎ ...
ﺍﻟﻤﻠﺘﺤﻲ : ﻭﺣﻨﻲ ﺣﺎﺻﺮﻧﺎ ﺣﺎﻭﻳﺎﺕ ﺍﻟﺴﻼﺡ ..
ﺍﻟﻤﻬﺒﻮﻝ : ﺗﺮﻳﺲ ... ﺍﻟﺠﻤﺎﻋﻪ ﺍﻟﻠﻲ ﻑ ﺍﻟﻤﻜﺎﻥ ﻟﺤﻘﻮﺍ ﻉ ﺍﻟﺒﺎﻗﻲ ﻛﻠﻬﻢ ﺩﺍﺧﻞ ...
ﻉ ﻃﻮﻝ ﺍﻟﻤﺪﻣﻦ ﺗﻮﺟﻪ ﻟﺪﺍﺧﻞ ..
: ﻳﺎﻓﻨﺪﻱ ﺍﻟﺒﺲ ﺍﻟﻮﺍﻗﻲ ..
ﺍﻟﻤﺪﻣﻦ : ﻣﺶ ﻭﻗﺘﻪ .. ﻭﻃﻠﻊ ﻃﻮﻝ ﻳﺠﺮﻱ ﻭﻭﺭﺍﻩ ﻋﻨﺎﺻﺮ ... ﻟﻤﺢ ﻭﺍﺣﺪ ﻳﺠﺮﻱ ﺯﺑﻄﻪ ﻣﻨﻮ ﺿﺮﺏ ﻋﻠﻴﻪ ﻃﻮﻝ .. ﻭﺍﻟﺸﺨﺺ ﻫﺬﺍ ﻃﺎﺡ ﻓﻲ ﻣﻜﺎﻧﻪ ...
ﺍﻟﻤﺪﻣﻦ ﺍﺷﺮ ﻟﻠﻌﻨﺎﺻﺮ ﺍﻟﻠﻲ ﻣﻌﺎﻩ : ﺷﺪﻭﻭﻭﻩ ..
ﻭﻛﻤﻞ ﺟﺮﻱ ﺧﺶ ﻟﻤﻜﺎﻥ ﻓﺎﺿﻲ ... ﻭﻗﻒ ﺟﺮﻱ ﻭﻗﻌﺪ ﻳﻤﺸﻲ ﺑﺤﺬﺭ ﻭﻓﻲ ﺍﻳﺪﻩ ﺳﻼﺣﻪ ..
...
ﺍﻟﻜﻮﺑﺮﺍ ﻳﺠﺮﻱ ﺑﺼﻌﻮﺑﻪ ﺑﺲ ﻛﺎﻥ ﻳﻀﻐﻂ ﻉ ﺭﻭﺣﻪ ..
ﺍﻟﻜﻮﺑﺮﺍ : ﺍﻃﻤﻨﺘﻮﺍ ﻉ ﺍﻟﻜﻮﻣﺎﻧﺪﺍ ..
: ﻣﻬﻨﺎﺵ ﻃﻠﻌﻮﻩ ﻣﻊ ﺑﺪﺍﻳﺔ ﺍﻟﻬﺠﻮﻡ ..
ﺍﻟﻜﻮﺑﺮﺍ ﻭﻫﻮ ﻳﺠﺮﻱ ﻭﺑﻐﻞ ﻳﻘﻮﻝ : ﺍﻟﺤﺴﻦ ... ﺍﻟﺤﺴﺴﻦ ..
***
ﻓﻲ ﺍﻟﺴﻴﺎﺭﺓ ﺍﻟﻠﻲ ﺭﺍﻓﻌﻪ ﺍﻟﻜﻮﻣﺎﻧﺪ ﺍﻟﻠﻲ ﻛﺎﻥ ﻣﺘﻜﻲ ﻓﻲ ﺍﻟﻜﺮﺳﻲ ﺍﻟﺨﻠﻔﻲ ﻭﻭﺍﺿﺢ ﺍﻧﻪ ﻉ ﻣﻮﻋﺪ ﻣﻊ ﻫﺎﺩﻡ ﺍﻟﻠﺬﺍﺕ ... ﻓﻲ ﻭﻗﺘﻬﺎ ﺍﻟﺮﺻﺎﺻﻪ ﺍﻟﻠﻲ ﺍﺧﺘﺮﻗﺖ ﺻﺪﺭﻩ ﻣﺎﻛﺎﻧﺶ ﺍﻟﻤﻬﺎ ﻳﻌﺎﺩﻝ ﺷﻲ ﻣﻦ ﺃﻟﻢ ﺳﻨﻴﻦ ﻭﺳﻨﻴﻦ ﻫﻮ ﺗﺴﺒﺐ ﻓﻴﻪ ﻟﻨﻔﺴﻪ ﻭﻗﺘﻠﻪ ﺍﻟﻨﺪﻡ ﺍﻟﻒ ﻣﺮﺓ ﻓﺎﻟﻴﻮﻡ ﻋﻠﻴﻪ ..
ﻓﻼﺵ ﺑﺎﻙ ...
ﺻﺪﻣﺘﻲ ﻳﺎﺑﻮﻱ ﺍﻟﻴﻮﻡ ﺧﻠﺘﻨﻲ ﻧﺘﻤﻨﻰ ﺍﻟﻤﻮﺕ .. ﻋﻼﺵ ﻳﺎﺑﻮﻱ ﻋﻼﺵ .. ﻋﻤﺮﻱ ﻛﻠﻪ ﻣﻦ ﻟﻤﺎ ﺣﻠﻴﺖ ﻋﻴﻮﻧﻲ ﻭﺍﻧﻲ ﻧﻤﺸﻲ ﺑﻴﻦ ﺍﻟﻠﻲ ﻧﻌﺮﻓﻬﻢ ﻭﻧﻘﻮﻝ ﺍﻧﻲ ﻭﻟﺪ ﻋﻠﻲ ﺍﻟﺼﺎﺩﻕ ﺍﻟﺮﺍﺟﻞ ﺍﻟﻄﻴﺐ ﺍﻟﻠﻲ ﻟﻴﻪ ﻗﺪﺭﻩ ﻭﻫﻴﺒﺘﻪ ﺑﻴﻦ ﺍﻟﻨﺎﺱ ﺍﻟﺘﻘﻲ ﺍﻟﺼﺎﻟﺢ ... ﻣﺎﻛﻨﺘﺶ ﻧﺒﻲ ﻧﻜﻮﻥ ﻏﻴﺮ ﻭﻟﺪﻙ ﻭﺍﻧﺖ ﺍﻛﺜﺮ ﻭﺍﺣﺪ ﺗﻌﺮﻑ ﻗﺪﺍﺵ ﻧﺤﺒﻚ ﻳﺎﺑﻮﻱ .. ﻃﻠﻌﺖ ﻋﺎﻳﺶ ﻓﻲ ﻛﺬﺑﻪ ﻛﺒﻴﺮﻩ ﻓﻲ ﻭﻫﻢ ﻛﺒﻴﺮ .. ﺍﻛﺜﺮ ﺷﺨﺺ ﻓﻲ ﺍﻟﺪﻧﻴﺎ ﻧﻮﺛﻖ ﻓﻴﻪ ... ﺍﻟﻮﺣﻴﺪ ﺍﻟﻠﻲ ﻧﻮﺛﻖ ﻓﻴﻪ ﻳﻄﻠﻊ ... ﻳﻄﻠﻊ ... ﻭﺧﺒﻂ ﺑﻜﻔﻮﻓﻪ ﻉ ﺑﻌﺾ ﺑﻘﻮﺓ ... ﻭﺍﺷﺮ ﻉ ﻓﻤﻪ ... ﻭﺍﻟﻠﻪ ﻣﺎﻗﺎﺩﺭ ﻧﻄﻠﻌﻬﺎ ﻣﻦ ﻓﻤﻲ ..
: ﺳﻴﻒ ... ﺍﻫﺪﺍ ﻭﺍﺳﻤﻊ ..
ﺳﻴﻒ : ﺷﻨﻮ ﻫﻮ ﺍﻟﻠﻲ ﺗﺒﻴﻨﻲ ﻧﺴﻤﻌﻪ ﺍﻛﺜﺮ ﻣﻦ ﺍﻟﻠﻲ ﺳﻤﻌﺘﻪ .. ﺃﻧﻲ ﺍﻟﺮﺍﺋﺪ ﺳﻴﻒ ﺍﻟﺼﺎﺩﻕ ﻓﻲ ﺟﻬﺎﺯ ﻣﻜﺎﻓﺤﻪ ﺍﻟﻤﺨﺪﺭﺍﺕ .. ﺍﻟﻠﻲ ﺷﺎﺩ ﻣﻠﻒ ﻭﺣﺪﻩ ﻣﻦ ﺍﻛﺒﺮ ﻋﺼﺎﺑﺎﺕ ﺗﺠﺎﺭﺓ ﺍﻟﺴﻢ ﺍﻟﻬﺎﺭﻱ ﺍﻟﻠﻲ ﻗﺎﻋﺪ ﻳﻘﺘﻞ ﻓﻲ ﻭﻻﺩ ﻫﺎﻟﺒﻼﺩ ... ﻛﺒﻴﺮ ﻋﺼﺎﺑﻪ ﺍﻟﻤﺠﺎﺭﻡ ﻫﺎﺩﻱ ﻳﻄﻠﻊ ﺑﻮﻩ ... ﻫﻬﻬﻬﺎﺍﻉ .. ﻭﺍﻟﻠﻪ ﻟﻮ ﻳﻌﺰﻭﻧﻲ ﻧﻘﺒﻞ ﺍﻟﻌﺰﻱ ... ﺳﻜﺖ ﻭﺷﺒﺢ ﻟﺒﻮﻩ ﻫﻠﺒﻪ .. ﺑﻌﺪﻳﻦ ﺍﺷﺮ ﺑﺴﺒﺎﺑﺘﻪ .. ﺍﻧﻲ ﻣﻦ ﺍﻟﺤﻮﺵ ﻫﺬﺍ ﺣﻨﻄﻠﻊ ﻭﻣﺶ ﺣﻨﻘﻌﺪ ﺩﻗﻴﻘﻪ .. ﻭﻣﻦ ﻫﺎﻟﻠﺤﻈﻪ ﻣﺶ ﺣﻨﺘﻌﺎﻣﻞ ﻣﻌﺎﻙ ﺇﻻ ﺑﺼﻔﺘﻚ ﺍﻟﻠﻲ ﻋﺮﻓﺘﻬﺎ ﻋﻨﻚ ﺗﻮﺍ ... ﻭﺣﻨﻘﺪﻣﻚ ﻟﻠﻌﺪﺍﻟﻪ ﻣﺠﺮﺩ ﻣﺎﻧﺸﺪ ﻓﻲ ﺍﻳﺪﻱ ﺩﻻﺋﻞ ﻣﺎﺩﻳﻪ ﻋﻨﻚ ﻭﻟﻮ ﻛﻠﻔﺘﻨﻲ ﺭﻭﺣﻲ ...
: ﻭﻭﻟﺪﻙ ﻣﻨﻴﻦ ﻳﻜﺒﺮ ﺣﻴﻌﺮﻑ ﺍﻥ ﺑﻮﻩ ﺣﺒﺲ ﺟﺪﻩ ..
ﺳﻴﻒ : ﻳﻌﺮﻑ ﺍﻥ ﺑﻮﻩ ﺣﺒﺲ ﺟﺪﻩ .. ﻭﻻﻳﻌﺮﻑ ﺍﻥ ﺑﻮﻩ ﺧﺎﻥ ﺍﻻﻣﺎﻧﻪ ﻭﺳﻜﺖ ﻉ ﻣﺠﺮﻡ ﺑﺲ ﻹﻧﻪ ﺑﻮﻩ ... ﻧﺒﻴﻚ ﺗﻨﺴﻰ ﺍﻥ ﻋﻨﺪﻙ ﻭﻟﺪ ﺍﺳﻤﻪ ﺳﻴﻒ ... ﻭﺍﻥ ﻋﻨﺪﻙ ﺣﻔﻴﺪ ﺍﺳﻤﻪ ﺍﻟﺤﺴﻦ ... ﻭﻟﻒ ﻭﻃﻠﻊ ﻣﻦ ﺣﺪﺍﻩ ... ﻭﺧﻼﻩ ﻣﺼﺪﻭﻡ ﻣﻬﺪﻭﺩ ﻣﺶ ﻋﺎﺭﻑ ﺷﻨﻮ ﻳﺪﻳﺮ ﻭﻻﻛﻴﻒ ﻳﺘﺼﺮﻑ .. ﺍﻟﻘﺪﺭ ﻓﺮﺽ ﻋﻠﻴﻪ ﻳﻮﺍﺟﻪ ﻭﻟﺪﻩ ﻭﺟﻪ ﻟﻮﺟﻪ ..
ﻓﻲ ﻟﺤﻈﻪ ﺗﻐﻴﺮﺕ ﻣﻼﻣﺤﻪ ﻟﻠﺤﺪﻩ ﻭﺑﺪﺕ ﻋﻠﻴﻬﻢ ﺍﻟﻘﺴﻮﺓ ﻟﻒ ﻳﺸﺒﺢ ﻭﻳﻦ ﻣﺎﻓﻲ ﺍﻟﻬﺎﺗﻒ ﺗﻮﺟﻬﻠﻪ .. ﻭﻗﺎﻡ ﺍﻟﺴﻤﺎﻋﻪ ﻭﺿﺮﺏ ﻉ ﺭﻗﻢ ﻣﻌﻴﻦ .. ﻧﺎﺩﻱ ﻣﺮﺗﻴﻦ ﻭﺭﺩ
: ﺳﻴﻒ ... ﻧﻔﺬﻭﻩ ﺍﻟﻠﻲ ﻗﻠﺘﻜﻢ ﻋﻠﻴﻪ ﻓﻲ ﺣﻘﻪ ....... ﻣﻌﺎﺵ ﻓﻲ ﻏﻴﺮ ﻫﻜﻲ ... ﻣﺶ ﻫﻮ ﺑﺮﻭﺣﻪ ... ﺯﻭﺟﺘﻪ ﻣﻌﺎﻩ ....... ﻻﺍﺍﺍﺍﻻ .. ﺍﻟﺤﺴﻦ ﻻﺍﺍ ..... ﺳﻴﻒ ﻭﻣﺮﺗﻪ ﺑﺲ .... ﻭﺻﻜﺮ ﻃﻮﻝ ...
ﺍﻧﻔﺘﺢ ﺍﻟﺒﺎﺏ ﻭﺧﺸﺖ ﻣﺮﺗﻪ ...
: ﺧﻴﺮﻩ ﺳﻴﻒ ﺧﻴﺮﻛﻢ ﺷﻦ ﺻﺎﺭ ﺑﻴﻨﺎﺗﻜﻢ ...
: ﻣﺎﺗﺪﺧﻠﻴﺶ ﺣﺎﺟﻪ ﺑﻴﻨﻲ ﻭﺑﻴﻦ ﻭﻟﺪﻱ ..
ﻗﺪﻣﺘﻠﻪ : ﺍﻱ ﻫﻮ ﻣﺶ ﻭﻟﺪﻱ ﻟﻜﻦ ﺍﻋﺰ ﻣﻨﻪ ﻳﻄﻠﻊ ﺳﻴﻒ ﻣﻦ ﺍﻟﺤﻮﺵ ﺍﻧﻲ ﺣﻨﻄﻠﻊ .. ﻭﻟﻔﺖ ﻭﻃﻠﻌﺖ ..
ﺍﻣﺎ ﻫﻮ ﺍﻧﻬﺪ ﻉ ﺍﻟﻜﺮﺳﻲ ﻭﺷﺪ ﺭﺍﺳﻪ ﺑﺈﻳﺪﻩ ﻭﻏﻤﺾ ﻋﻴﻮﻧﻪ ﺑﺄﻟﻢ ..
ﺍﻟﻮﻗﺖ ﺍﻟﺤﺎﺿﺮ ..
ﺍﻟﻜﻮﻣﺎﻧﺪﺍ ﻳﺸﻬﻖ ﺑﺼﻮﺕ ﻋﺎﻟﻲ ..
: ﺧﻼﺹ ﺷﻜﻠﻪ ﺑﻴﻮﺩﻉ ..
ﻭﻗﻔﻮﺍ ﺍﻟﺴﻴﺎﺭﺓ ﻭﻧﺰﻟﻮﺍ ﻓﺘﺢ ﻭﺍﺣﺪ ﻣﻨﻬﻢ ﺍﻟﺒﺎﺏ ﻳﺤﺎﻭﻝ ﻳﺪﻳﺮﻟﻪ ﺍﻧﻌﺎﺵ .. ﺑﺲ ﺑﻼ ﻓﺎﻳﺪﻩ ... ﻟﻔﻆ ﺍﻟﻜﻮﻣﺎﻧﺪﺍ ﺍﻧﻔﺎﺳﻪ ﺍﻷﺧﻴﺮﻩ ...
...
ﻓﻲ ﻧﻔﺲ ﺍﻟﻮﻗﺖ ..
ﺍﻟﻤﻬﺒﻮﻝ ﻛﺎﻥ ﻳﻼﺣﻖ ﻓﻲ ﻣﺠﻤﻮﻋﻪ ﻭﻣﻌﺎﻩ ﺳﺎﻣﺮ ﻣﻌﺎﻭﻧﻪ ﺍﻟﻠﻲ ﻛﺎﻥ ﻭﺍﺣﺪ ﻣﻦ ﻣﺠﻤﻮﻋﻪ ﺍﻟﻤﺪﻣﻨﻴﻦ .. ﻗﺪﺭﻭﺍ ﻳﺸﺪﻭﺍ 3 ﻣﻨﻬﻢ ...
ﻭﺯﻭﺯ ﻣﻨﻬﻢ ﺍﺿﻄﺮﻭﺍ ﻳﻘﺘﻠﻮﻫﻢ ﺍﺛﻨﺎﺀ ﺍﻟﻤﻮﺍﺟﻬﻪ .. ﺍﻟﻠﻲ ﺷﺪﻭﻫﻢ ﻛﺎﻧﻮﺍ ﻋﻨﺎﺻﺮ ﻣﻦ ﺍﻷﻣﻦ ﺍﻟﻌﺎﻡ ﻣﺘﻮﺍﻃﺌﻴﻦ ﻣﻊ ﻣﻨﻈﻤﻪ ﺍﻟﻜﻮﺑﺮﺍ ..
ﺍﻟﺤﺴﻦ : ﺍﻟﺤﺒﻞ ﻳﺴﺘﻨﻰ ﻓﻲ ﺭﻗﺎﺑﻴﻜﻢ ...
...
ﺍﻟﻔﻬﺪ ﻭﻫﻮ ﻳﻤﺸﻲ ﺑﺴﻼﺣﻪ .. ﺍﺗﻨﻴﻦ ﻛﺎﻧﻮﺍ ﻳﺠﺮﻭﺍ ﻓﻲ ﻣﺒﻨﻰ ﻗﺪﺍﻣﻪ .. ﺧﺶ ﻭﺭﺍﻫﻢ ﻃﻮﻝ ..
ﺍﻟﻜﻮﺑﺮﺍ ﻣﻌﺎﺵ ﻗﺪﺭ ﻳﺘﻨﻔﺲ ﻛﻮﻳﺲ ﺣﻮﻝ ﻣﻦ ﻉ ﻭﺟﻬﻪ ﺍﻟﻘﻨﺎﻉ ..
: ﻓﻲ ﺳﻴﺎﺭﺓ ﺗﺴﺘﻨﻰ ﻓﻴﻨﺎ ﺑﻌﺪ ﻧﻄﻠﻌﻮﺍ ﻣﻦ ﻫﻨﻲ ..
ﻳﺴﻤﻌﻮﺍ ﻓﻲ ﺻﻮﺕ ﺍﻹﺷﺘﺒﺎﻛﺎﺕ ﺑﺮﺍ ..
ﺍﻟﻜﻮﺑﺮﺍ ﺑﻐﻴﻆ ﻭﻫﻮ ﺩﺍﻫﺶ : ﻛﺎﺍﻥ .. ﻧﻌﺮﻑ ﻣﻦ .. ﻫﻮ .. ﺍﻟﻠﻲ ﺑﺎﻉ ...
: ﺧﻴﺮﻙ ..
ﺍﻟﻜﻮﺑﺮﺍ : ﻣﺶ .. ﻭﻗﺘﻪ ..
ﺍﻟﻔﻬﺪ ﻭﺭﺍﻫﻢ ﺑﻤﺴﺎﻓﻪ ﻭﻣﺶ ﺣﺎﺳﻴﻦ ﺑﻴﻪ ﺻﻮﺏ ﻉ ﺍﻟﻠﻲ ﻛﺎﻥ ﻳﺠﺮﻱ ﺟﻨﺐ ﺍﻟﻜﻮﺑﺮﺍ ﻭﻳﺤﻤﻲ ﻓﻴﻪ ﻭﺍﻃﻠﻖ ... ﺟﺖ ﻓﻲ ﻇﻬﺮﻩ ﻭﻃﺎﺡ ﻓﻲ ﻣﻜﺎﻧﻪ ...
ﺍﻟﻔﻬﺪ : ﻛﻮﺑﺮﺍ ... ﺧﻼﺹ .. ﺗﻤﺘﻠﻚ .. ﻣﺎﻋﻨﺪﻛﺶ ﻣﻔﺮ ..
ﺍﻟﻜﻮﺑﺮﺍ ﺍﻟﻠﻲ ﻭﻗﻒ ﻓﻲ ﻣﻜﺎﻧﻪ ﻭﻫﻮ ﻋﺎﻃﻲ ﺑﺎﻟﻈﻬﺮ : ﻭﺍﻧﺖ ﻣﺘﻮﻗﻊ ﺍﻧﻲ ﻧﺴﻠﻤﻚ ﻧﻔﺴﻲ ... ﻭﻧﻤﻨﺤﻚ ﺷﺮﻑ ﺍﻟﻘﺒﺾ ﻋﻠﻴﺎ ..
ﺍﻟﻔﻬﺪ : ﻣﺎﻓﻴﺶ ﺷﺮﻑ ﻳﻤﻨﺢ ﻟﻴﻜﻢ ﻭﻻ ﺑﺄﻱ ﺷﻜﻞ ﻭﻻ ﺗﻌﺮﻓﻮﺍ ﺷﻨﻮ ﻫﻮ ﺍﻟﺸﺮﻑ ﺃﺻﻼ ..
ﺍﻟﻜﻮﺑﺮﺍ : ﻫﻬﻬﻬﻬﻪ ... ﺍﻧﺖ ﻟﻮ ﻗﺒﻀﺖ ﻋﻠﻴﺎ ﺣﻴﻠﺒﺴﻮﻙ ﻭﺳﺎﻡ .. ﻳﻌﻨﻲ ﺍﻧﻲ ﻣﻨﺤﺘﻚ ﺷﺮﻑ ..
ﺍﻟﻔﻬﺪ : ﻣﺎﻋﻨﺪﻳﺶ ﻭﻗﺖ ﻱ
ﻧﻀﻴﻌﻪ ﻣﻌﺎﻙ ﻓﻲ ﻛﻼﻡ ﻓﺎﺭﻍ ﺳﻠﻢ ﻧﻔﺴﻚ ...
ﺍﻟﻜﻮﺑﺮﺍ ﻗﻌﺪ ﺳﺎﻛﺖ ... ﻭﺍﻟﻔﻬﺪ ﺍﺳﺘﻐﺮﺏ ﻟﻬﺎﻟﺴﻜﻮﺕ .. ﻗﺎﻝ ﻓﻲ ﻧﻔﺴﻪ " ﻻﺯﻡ ﻳﻨﻌﻄﺎ ﻓﺮﺻﻪ ﻳﻔﻜﺮ .. ﻭﻟﻮﻋﻨﺪ ﻭﻗﺘﻬﺎ ﺣﻜﻢ ﻉ ﺭﻭﺣﻪ ﺑﺎﻟﻤﻮﺕ ﻭﻗﺘﻲ "..
ﺩﺍﻡ ﺍﻟﺴﻜﻮﺕ ﻫﺬﺍ ﺗﻼﺗﻪ ﺩﻗﺎﻳﻖ .. ﺗﺨﻠﻞ ﻫﺎﻟﺼﻤﺖ ﺃﺻﻮﺍﺕ ﺍﻹﺷﺘﺒﺎﻛﺎﺕ ﺍﻟﻠﻲ ﺑﺪﺕ ﺗﺨﻒ .
...
ﺍﻟﺤﺴﻦ ﺗﻘﺎﺑﻞ ﻫﻮ ﻭﺍﺣﻤﺪ ...
ﺍﻟﺤﺴﻦ : ﺍﻣﺸﻲ ﻉ ﺭﺍﺱ ﻗﻮﺓ ﻟﻠﻤﻜﺎﻥ ﺍﻟﻠﻲ ﻛﺎﻧﻮﺍ ﺣﻴﺮﻓﻌﻮﻟﻪ ﺍﻟﺒﻀﺎﻋﻪ ﻣﻤﻜﻦ ﻳﻜﻮﻧﻮﺍ ﺭﻓﻌﻮﺍ ﺣﺪ ﻣﻦ ﺍﻟﻜﺒﺎﺭ ﻏﺎﺩﻱ ..
ﺍﺣﻤﺪ : ﺍﻧﺖ ﻣﻦ ﺿﺮﺑﺖ ﺑﺎﻟﺰﺑﻂ ..
ﺍﻟﺤﺴﻦ : ﻣﺶ ﻋﺎﺭﻑ ﻣﻨﻮ .. ﺑﺲ ﻭﺍﺣﺪ ﻛﺎﻧﻮﺍ ﺣﺮﻳﺼﻴﻦ ﻉ ﺭﻭﺣﻪ ﺍﻛﺜﺮ ﻣﻦ ﺭﻭﺍﺣﻬﻢ ... ﺑﺴﺮﻋﻪ ﻳﺎﺍﺣﻤﺪ ﻧﻔﺪ ﺍﻟﻠﻲ ﻗﻠﺖ ﻋﻠﻴﻪ ..
ﺍﺣﻤﺪ : ﺗﻢ .. ﻭﻣﺸﻲ ﻳﺠﺮﻱ ..
ﺍﻣﺎ ﺍﻟﺤﺴﻦ ﻗﺎﺑﻠﻪ ﺍﻟﻤﺒﻨﻲ ﺍﻟﻠﻲ ﻛﺎﺍﻧﺖ ﺣﺘﻢ ﻓﻴﻪ ﺍﻟﺼﻔﻘﻪ ﻭﺧﺸﻠﻪ ﺑﺴﺮﻋﻪ .
...
ﺍﻟﻔﻬﺪ : ﻛﻮﺑﺮﺍ ﺧﺪﻳﺖ ﻭﻗﺘﻚ ﻭﺯﻳﺎﺩﻩ ..
ﺍﻟﻜﻮﺑﺮﺍ : ﻟﻮ ﺗﻠﻔﺖ ﻭﺟﻴﺘﻚ .. ﻋﻠﻴﺎ ﺍﻷﻣﺎﻥ ...
ﺍﻟﻔﻬﺪ : ﻟﻮ ﻣﺎﻛﻨﺘﺶ ﻋﺎﻃﻴﻚ ﺍﻣﺎﻥ ﻛﻨﺖ ﻃﺮﺑﻘﺘﻚ ﻭﻛﻨﺖ ﻣﻠﻮﺡ ﺣﺪﺍ ﺻﺎﺣﺒﻚ ﺗﻮﺍ ...
ﺍﻟﻜﻮﺑﺮﺍ ﺗﻨﻬﺪ ﺑﺈﺣﺒﺎﻁ .. ﻭﺑﺪﻱ ﻳﺘﻠﻔﺖ ﺑﺎﻟﺸﻮﻳﻪ ...
ﺍﻟﻔﻬﺪ ﺑﺪﻱ ﻳﻨﺰﻝ ﻓﻲ ﺳﻼﺣﻪ ﻣﻊ ﻟﻔﺔ ﺍﻟﻜﻮﺑﺮﺍ ﻟﻴﻪ ... ﻟﻌﻨﺪ ﺍﺻﺒﺢ ﻣﻘﺎﺑﻠﻪ ﺗﻤﺎﻣﺎ ...
ﺍﻟﺼﺪﻣﻪ ﺍﻟﻠﻲ ﺻﺎﺑﺖ ﺍﻟﻔﻬﺪ ﺷﻼﺗﻪ ﻋﻦ ﺍﻟﺘﻔﻜﻴﺮ ﻭﺍﻟﺤﺮﻛﻪ .. ﻣﺶ ﻣﺼﺪﻕ ﻋﻴﻮﻧﻪ .. ﻣﺶ ﻣﺴﺘﻮﻋﺐ ﺍﻟﻠﻲ ﻳﺸﻮﻑ ﻓﻴﻪ ... ﺍﻟﻠﻲ ﻗﺎﻋﺪ ﻳﺼﻴﺮ ﺗﻮﺍ ﻻﻳﺼﺪﻕ ...
ﻓﻲ ﻟﺤﻈﻪ ﺧﻄﻢ ﻋﻠﻴﻪ ﺷﺮﻳﻂ ﻟﻘﺎﺀﺍﺗﻪ ﺑﺴﺮﻣﺪ ﻛﺎﻧﺖ ﻧﻈﺮﺍﺗﻪ ﻭﺍﺿﺤﻪ ﺑﺲ ﺑﺮﺍﺀﺓ ﺷﻜﻞ ﺳﺮﻣﺪ ﻭﺭﻭﺣﻪ ﺍﻟﺤﻠﻮﺓ ﺧﻼﺗﻪ ﻣﺎﻳﺸﻮﻓﺎﺵ ﻛﻮﻳﺲ،ﻟﻌﻨﺪ ﻣﺎﺍﺫﻛﺮ ﻧﻬﺎﺭ ﺍﻟﻠﻘﺎﺀ .. ﻭﺯﺑﻂ ﻭﻗﺘﻬﺎ ﺍﻥ ﺳﺮﻣﺪ ﻛﺎﻥ ﻳﺒﻲ ﻳﻄﻠﻌﻪ ﻣﻦ ﺍﻟﻤﺮﻛﺰ ﻗﺼﺪﺍ ﺑﺶ ﻳﻔﻀﻰ ﺍﻟﺠﻮ ﻟﻠﺸﺨﺺ ﺍﻟﻠﻲ ﺍﺳﺘﺨﺪﻣﻪ ﻟﺴﺮﻗﻪ ﻣﻠﻒ ﻋﺰ ﺍﻟﺪﻳﻦ ...
ﺍﻟﻜﻮﺑﺮﺍ ﻛﺎﻥ ﻣﺮﻛﺰ ﻋﻠﻴﻪ ﻋﻴﻨﻪ ﻟﻤﺤﺖ ﺍﻳﺪﻩ ﺍﻟﻠﻲ ﺷﺎﺩ ﺑﻴﻬﺎ ﺍﻟﻤﺴﺪﺱ .. ﻓﻠﺤﻈﻪ ... ﺑﻠﻤﺤﺔ ﻋﻴﻦ .. ﻃﻠﻊ ﺳﺮﻣﺪ ﺍﻟﻤﺴﺪﺱ ﻣﻦ ﺗﺤﺖ ﻛﻢ ﺑﺎﻟﻄﻮﻩ ﺍﻷﺳﻮﺩ ﻭﺻﻮﺏ ﻉ ﻳﺪ ﺍﻟﻔﻬﺪ .. ﺍﻟﻔﻬﺪ ﺍﻧﻄﻠﻖ ﻣﻦ ﺍﻳﺪﻩ ﺍﻟﻤﺴﺪﺱ ﻭﺍﻧﺠﺮﺡ .. ﻗﺎﻋﺪ ﺷﺎﺩ ﺍﻳﺪﻩ ﻭﻳﺘﺄﻟﻢ ﻭﻳﺸﻮﻑ ﻟﺴﺮﻣﺪ ..
ﺳﺮﻣﺪ ﺍﻟﻜﻮﺑﺮﺍ : ﻫﻬﻬﻬﻬﻬﻬﻬﻬﻬﻪ ﺍﻩ .. ﻳﺎﺍﺳﻤﺮ ﻳﺎﺃﺳﻤﺮﺍﻧﻲ ... ﻣﻜﺘﻮﺑﻠﻚ ﺍﻧﺖ ﺗﻨﻮﻝ ﺷﺮﻑ ﻣﻮﺗﻚ ﻉ ﺍﻳﺪﻱ ... ﻭﺻﻮﺏ ﻉ ﺍﻟﻔﻬﺪ ...
ﺍﻟﺤﺴﻦ ﺍﻟﻠﻲ ﻛﺎﻥ ﻉ ﻣﻘﺮﺑﻪ ﻣﻦ ﺍﻟﻤﻜﺎﻥ ﺍﻟﻠﻲ ﻫﻤﺎ ﻓﻴﻪ ﺳﻤﻊ ﺻﻮﺕ ﺍﻃﻼﻕ ﺍﻟﻨﺎﺭ ... ﺧﺶ ﻳﺠﺮﻱ ﻃﻮﻝ ...
....
ﺳﺮﻣﺪ ﺍﻟﻜﻮﺑﺮﺍ : ﻋﻨﺪﻙ ﺣﺎﺟﻪ ﺍﺧﻴﺮﻩ ﺗﺒﻲ ﺗﻘﻮﻟﻬﺎ ﻧﻮﺻﻠﻬﺎ ﻟﺒﻨﺖ ﺧﻮﻱ ..
ﺍﻟﻔﻬﺪ : ﺍﻧﺖ ﺍﻗﺬﺭ ﻭﺍﺣﻘﺮ .. ﻣﻦ ﻋﺮﻓﺖ .. ﻟﻜﻦ ﻟﻴﻚ ﻳﻮﻡ .. ﻭﻧﻬﺎﻳﺘﻚ ﺣﺘﻜﻮﻥ .. ﻉ ﻳﺪﻩ ..
" ﺍﻟﻔﻬﻬﻬﻬﻬﺪ "
ﺳﺮﻣﺪ ﻣﺠﺮﺩ ﺳﻤﻊ ﺻﻮﺕ ﺍﻟﺤﺴﻦ ﺍﻧﺘﻔﺾ ﺍﻃﻠﻖ ﻉ ﺍﻟﻔﻬﺪ ﻓﻲ ﺍﻛﺜﺮ ﻣﻦ ﻣﻜﺎﻥ ﻓﻲ ﺟﺴﻤﻪ ... ﻭﻃﻠﻊ ﻳﺠﺮﻱ ﺑﺴﺮﻋﻪ ﻭﻫﻮ ﺿﺎﻏﻂ ﻉ ﺭﺟﻠﻪ ..
ﻭﺍﻟﺤﺴﻦ ﺧﻼﺹ ﺣﻴﻮﺻﻞ ﻟﻤﻜﺎﻧﻬﻢ .. ﺍﻟﻠﺤﻈﻪ ﺍﻟﻠﻲ ﻭﺻﻞ ﻓﻴﻬﺎ ﺳﺮﻣﺪ ﻟﻠﻤﺨﺮﺝ ﻭﻃﻠﻊ .. ﻫﻲ ﺍﻟﻠﺤﻈﻪ ﺍﻟﻠﻲ ﻭﺻﻞ ﻓﻴﻬﺎ ﺍﻟﺤﺴﻦ .. ﺍﻧﺼﺪﻡ ﻟﻤﺎ ﻟﻘﻲ ﺍﻟﻔﻬﺪ ﻣﺮﻣﻲ ﻉ ﺍﻷﺭﺽ .. ﻣﺸﺎﻟﻪ ﻳﺠﺮﻱ ﻭﻧﺰﻟﻪ ﻉ ﺭﻛﺎﺑﻪ .. ﻭﺍﻟﻔﻬﺪ ﻛﺎﻥ ﻳﻄﻠﻊ ﻓﻲ ﺍﻟﺮﻭﺡ ..
ﺍﻟﺤﺴﻦ : ﻣﺤﻤﺪ .. ﺷﺪ ﺣﻴﻠﻚ ﻳﺎﻟﻔﻬﺪ ﺍﻷﺳﻮﺩ .. ﻣﺶ ﺑﺴﻬﻮﻟﻪ ﺗﻤﻮﺕ ﺍﻧﺖ ..
ﺍﻟﻔﻬﺪ ﻛﺎﻥ ﻳﺸﺒﺤﻠﻪ ﺑﻌﻴﻮﻥ ﺟﺎﺣﻈﻪ ﻛﺎﻥ ﻓﻤﻪ ﻳﺘﺤﺮﻙ ﻳﺒﻲ ﻳﻘﻮﻝ ﺣﺎﺟﻪ ..
ﺍﻟﺤﺴﻦ : ﻣﺎﺗﻌﺒﺶ ﺭﻭﺣﻚ .. ﻛﻠﻢ ﺟﻤﺎﻋﺘﻪ ﻓﻲ ﺍﻟﺴﻤﺎﻋﻪ .. ﺍﻹﺳﻌﺎﻑ ﺑﺴﺮﻋﻪ ﻳﺎﺳﺎﺍﺍﻣﺮ ﺍﻟﻤﺒﻨﻰ ﺍﻟﻠﻲ ﻭﺭﺍ ﻣﻘﺮ ﺍﻟﺼﻔﻘﻪ ..
ﺍﻟﻔﻬﺪ ﺑﺼﻌﻮﺑﻪ .. ﺳﺴﺴﺲ ... ﺳﺴﺴﺲ ...
ﺍﻟﺤﺴﻦ ﺿﻴﻖ ﻋﻴﻮﻧﻪ ﻭﻫﻮ ﻳﺸﺒﺤﻠﻪ ..
ﺍﻟﻔﻬﺪ .... ﺳﺴﺴﺮ .... ﺳﺴﺲ ...... ﺱ .... ﺭ ....
ﺍﻟﺤﺴﻦ ﺑﺨﻮﻑ ﺷﺪﻳﺪ ﻉ ﺍﻟﻔﻬﺪ : ﺍﻫﺪﻯ ﺗﻮﺍ ﺑﻌﺪﻳﻦ ﺗﻜﻠﻢ ..
ﺍﻟﻔﻬﺪ ﻋﻴﻮﻧﻪ ﺍﺭﺗﻔﻌﻮﺍ ﻓﻮﻕ .. ﻭﻃﻠﻊ ﺍﻟﺪﻡ ﻣﻦ ﻓﻤﻪ ﻭ ﻗﻌﺪ ﻳﺨﺾ ..
ﺍﻟﺤﺴﻦ ﺑﺬﻋﺮ ﻣﻤﺰﻭﺝ ﺑﺎﻷﻟﻢ : ﻗﻮﻝ ﻻﺇﻟﻪ ﺇﻻ ﺍﻟﻠﻪ ..
ﺍﻟﻔﻬﺪ ﺑﺼﻌﻮﺑﻪ ﺷﺪﻳﺪﻩ :. ﻻ .. ﺇﻝ .. ﻩ .. ﺇ .. ﺍﻻ .. ﺍﻟﻠﻪ ...
ﻗﺒﻞ ﻟﺘﻄﻠﻊ ﺭﻭﺣﻪ ﺟﻲ ﺑﻴﻦ ﻋﻴﻮﻧﻪ ﺍﻣﻪ ... ﻭﺟﺖ ﺑﻴﻦ ﻋﻴﻮﻧﻪ ﺷﻤﻮﺳﺘﻪ ﺟﻨﺎﻥ ...
>> ﺍﻟﻔﻬﺪ ﻭﺟﻨﺎﻥ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ ...
ﺍﻟﻔﻬﺪ ﻫﺪﻯ ﺿﺤﻚ : ﺍﻧﻲ ﺍﻧﺴﺎﻥ ﻣﺤﻈﻮﻅ ﻭﺭﺿﻲ ﻭﺍﻟﺪﻳﻪ ..
ﺟﻨﺎﻥ ﺍﺑﺘﺴﻤﺖ ﺑﺨﺠﻞ : ﺣﺘﻰ ﺃﻧﻲ <<..
ﻓﻲ ﻭﺩﺍﻧﻪ ﻳﺴﻤﻊ ﻓﻲ ﺻﻮﺗﻬﺎ ﻭﻫﻲ ﺗﻐﻨﻲ
>> ﺣﺒﻴﺒﻲ ﺭﻭﺡ ﺍﻟﺴﻤﺎﺭﺓ .. ﻭﺍﺧﺪ ﻋﻘﻠﻲ .. ﺣﺒﻴﺒﻲ ﺭﻭﺡ ﺍﻟﺴﻤﺎﺭﻩ <<
ﺍﺑﺘﺴﻢ ﺍﺑﺘﺴﺎﻣﻪ ﺧﻔﻴﻔﻪ .. ﻓﻬﺎﻟﻠﺤﻈﻪ ﻣﻠﻚ ﺍﻟﻤﻮﺕ ﺧﺪﻱ ﺍﻷﻣﺎﻧﻪ ﺑﺶ ﻳﺮﺩﻫﺎ ﻟﺼﺎﺣﺒﻬﺎ ...
ﻭﻣﺎﺕ ﺍﻟﻔﻬﺪ 💔...
... ﻳﺘﺒﻊ
