#الحسن
ﺍﻟﺠﺰﺀ ﺍﻟﺮﺍﺑﻊ ﻭﺍﻷﺭﺑﻌﻴﻦ
صورة 4.3K صورة 112 صورة 36
ﺑﻮﺍﺳﻄﺔ GomanFared
ﺣﻄﺖ ﺷﻌﺮﻫﺎ ﻭﺭﺍ ﻭﺫﻧﻬﺎ ﻭﻫﻲ ﺗﺒﺘﺴﻢ .. ﺣﺎﺳﻪ ﺑﺄﻥ ﺣﻴﺎﺗﻬﺎ ﺑﺪﺕ ﻣﻦ ﺍﻭﻝ ﻭﺟﺪﻳﺪ ﺑﺪﺍﻳﻪ ﺣﻠﻮﻩ .. ﻃﺎﺑﺖ ﺍﻟﻘﻬﻮﺓ ﻃﻔﺖ ﻋﻠﻴﻬﺎ ﻭﺣﻄﺘﻬﺎ ﻓﻲ ﺻﻔﺮﺓ ﻓﻲ ﺟﻨﺒﻬﺎ ﻃﺮﻭﻑ ﻛﻴﻜﻪ ﺩﺍﺭﺗﻬﺎ ﺑﻌﺪ ﺍﻟﻔﺠﺮ ..
ﺧﺪﺕ ﺍﻟﺼﻔﺮﺓ ﺣﻄﺘﻬﺎ ﻓﻲ ﺍﻟﺼﺎﻟﻪ ﻭﻓﺘﺤﺖ ﺍﻟﻔﻴﺮﻧﺪﺍ ﻹﻥ ﺍﻟﺠﻮ ﻛﺎﻥ ﺣﻠﻮ .. ﺍﺑﺘﺴﻤﺖ ﺧﺪﺕ ﺷﻬﻴﻖ ﻭﺯﻓﻴﺮ ﻭﻫﻲ ﻣﻐﻤﻀﻪ ﻋﻴﻮﻧﻬﺎ .. ﻓﺘﺤﺘﻬﻢ ﻭﺿﺤﻜﺖ .. ﻭﻣﺸﺖ ﻟﻠﺪﺍﺭ ﺑﺶ ﺗﻨﻮﺿﻪ .. ﻭﻗﻔﺖ ﻟﻠﺤﻈﺎﺕ ﺗﺘﺄﻣﻞ ﻓﻴﻪ ﻛﻴﻒ ﺭﺍﻗﺪ ﻉ ﺑﻄﻨﻪ ﻭﺍﻟﻮﺭﻏﺎﻥ ﻣﻐﻄﻴﻪ ﻣﺎﻋﺪﺍ ﻭﺣﺪﻩ ﻣﻦ ﺭﺟﻠﻴﻪ .. ﺿﺤﻜﺖ .. ﻭﻗﺮﺑﺘﻠﻪ ﻧﺰﻟﺖ ﻉ ﺭﻭﺱ ﺻﻮﺍﺑﻌﻬﺎ ﻗﺪﺍﻡ ﻭﺟﻬﻪ ..
ﻫﺎﻟﻪ : ﺣﺴﺎﻥ ... ﺣﺴﺎﻥ ... ﺣﺴﺎﻥ ..
ﺣﺴﺎﻥ ﻓﺘﺢ ﻋﻴﻮﻧﻪ ﺑﺎﻟﺸﻮﻳﻪ ﻭﺍﺑﺘﺴﻢ : ﻗﻠﺒﻲ ..
ﻫﺎﻟﻪ ﺍﺑﺘﺴﻤﺖ : ﺻﺒﺎﺡ ﺍﻟﺨﻴﺮ ..
ﺣﺴﺎﻥ : ﺻﺒﺎﺡ ﺍﻟﺤﺐ .. ﺻﺒﺎﺡ ﺍﻟﻌﺸﻖ .. ﺻﺒﺎﺡ ﺍﻟﻌﺴﻞ ﻭﻧﺎﺽ ﺑﺎﺳﻬﺎ .... ﻳﺎﺣﻠﻴﻠﻲ ...
ﻫﺎﻟﻪ : ﻫﻬﻬﻬﻬﻬﻬﻬﻬﻬﻪ .. ﻫﻴﺎ ﻧﻮﺽ ﺍﻏﺴﻞ ﻭﺟﻬﻚ ﻭﺻﺤﺼﺢ ﻭﺗﻌﺎﻟﻰ ﻟﻠﺼﺎﻟﻪ ..
ﺣﺴﺎﻥ ﺑﻀﺤﻜﻪ : ﺣﺎﺍﺍﺍﺿﺮ .. ﺃﻣﺮﻙ ﻉ ﺭﺍﺳﻲ .. ﺿﺤﻜﺖ ﻫﺎﻟﻪ ﻭﻃﻠﻌﺖ ﻣﻦ ﺍﻟﺪﺍﺭ ﻭﻫﻮ ﺧﺶ ﻟﻠﺤﻤﺎﻡ ...
***
ﺍﻧﺎ ﻗﻠﺒﻲ ﻟﻴﻪ ﺣﺎﺳﺲ ﻗﻮﻱ ﺑﺎﻟﺸﻜﻞ ﺩﺍ
ﻫﻮ ﺍﻟﻬﻮﺍ ﺑﻴﻌﻠﻲ ﺍﺣﺴﺎﺳﻨﺎ ﻛﺪﺍ ..
ﺻﺪﻗﻨﻲ ﺧﻼﺹ ﺻﺪﻗﺖ
ﺇﻥ ﺍﻧﺎ ﺣﺒﻴﺖ ﺩﻟﻮﻗﺖ ..
ﻭﻣﺎﻛﻨﺘﺶ ﺃﻋﺮﻑ ﻗﻠﺒﻲ ﺣﻴﺤﺒﻚ ﻛﺪﺍ ..
ﻭﻛﻨﺖ ﻓﻴﻦ ﺍﻧﺖ ﻭﻛﻞ ﺍﻟﺤﺐ ﺩﺍ ..
ﻭﻟﻴﻪ ﺳﺎﻳﺒﻨﻲ ﻟﻮﺣﺪﻱ ﻃﻮﻝ ﺍﻟﻌﻤﺮ ﺩﺍ ...
ﺳﻜﺘﺖ ﻭﺍﺑﺘﺴﻤﺖ ﺗﺸﺒﺢ ﻟﻠﺰﻣﻴﺘﻪ ﺍﻟﻠﻲ ﺍﺩﻳﺮ ﻓﻴﻬﺎ ... ﻫﻲ ﻣﺎﺭﻗﺪﺗﺶ ﻣﻦ ﺑﻌﺪ ﻣﺎﺻﻠﻮﺍ ﺍﻟﻔﺠﺮ .. ﻟﻜﻦ ﻫﻮ ﺭﻗﺪ ..
ﻭﺗﺖ ﺍﻟﻔﻄﻮﺭ ﻭﺗﺒﻲ ﺗﻤﺸﻲ .. ﺗﻨﻮﺿﻪ .. ﺭﺍﻗﺪ ﻉ ﺟﻨﺒﻪ ﺍﻟﻴﻤﻴﻦ ﻭﻭﺍﺿﺢ ﺭﺍﻳﺢ ﻓﻲ ﺍﻟﻨﻮﻡ ... ﻗﺮﺑﺖ ﻣﻨﻪ ...
ﻋﻠﻴﺎ : ﺍﻟﺤﺴﻦ ... ﺍﻟﺤﺴﻦ ... ﺍﻟﺤﺴﻦ ﻫﻴﺎ ﻧﻮﺽ ..
ﻣﺎﻓﻴﺶ ﺍﻱ ﺭﺩﺓ ﻓﻌﻞ ..
ﻋﻠﻴﺎ ﺍﺑﺘﺴﻤﺖ : ﺣﺴﺴﻦ .. ﺣﺴﺴﺴﻦ .. ﺣﺴﺴﻦ ..
ﺣﺘﻰ ﺑﻌﺪ ﻣﺎﻧﺎﺩﺗﻪ ﺑﻄﺮﻳﻘﺔ ﻫﺎﺩﻱ ﻣﺎﻓﻴﺶ ﺍﺳﺘﺠﺎﺑﻪ ..
ﻋﻠﻴﺎ ﻗﺮﺑﺖ ﺣﻄﺖ ﺍﻳﺪﻫﺎ ﻉ ﺧﺪﻩ : ﺍﻟﺤﺴﻦ .. ﺍﻟﺤﺴﻦ ﻓﻴﻖ ﺧﻼﺹ ﻋﺎﺩ ..
ﻫﻮ ﺩﺍﺭ ﺭﺩﺕ ﻓﻌﻞ .. ﺑﺲ ﻛﺎﻧﺖ ﻛﺘﺎﻟﻲ .. ﺗﻘﻠﺐ ﻭﺭﻗﺪ ﻉ ﺍﻟﺠﻬﺔ ﺍﻟﺘﺎﻧﻴﻪ ..
ﻋﻠﻴﺎ ﻭﻗﻔﺖ ﺑﺬﻣﺮ : ﺍﻭﻭﻭﻭﻭﻑ ..
ﻭﺧﺮﺕ ﺧﻄﻮﺗﻴﻦ ﻟﻠﻮﺭﺍ ﻭﻫﻲ ﺗﺸﺒﺤﻠﻪ ﺑﻀﻴﻖ ﻛﻴﻒ ﺭﺍﻗﺪ ﻭﻻﻣﻌﺒﺮﻫﺎ .. ﺭﻓﻌﺖ ﺣﺎﺟﺒﻬﺎ ﺍﻟﻴﻤﻴﻦ ﻭﺍﺑﺘﺴﻤﺖ ﺑﻤﻜﺮ .. ﻣﺸﺖ ﻟﻔﺖ ﻉ ﺟﻬﺔ ﺍﻟﺘﺎﻧﻴﻪ ﻣﻦ ﺍﻟﺴﺮﻳﺮ .. ﺭﻛﺒﺖ ﻭﻭﻗﻔﺖ ﻉ ﺍﻟﺴﺮﻳﺮ .. ﺷﺒﺤﺘﻠﻪ ﻭﺧﺪﺕ ﺷﻬﻴﻖ ﻭﺯﻓﻴﺮ ﻭﺑﺪﺕ ﺗﻨﻘﺰ ..
ﻋﻠﻴﺎ ﻭﻫﻲ ﺗﻨﻘﺰ : ﻧﻮﻭﻭﻭﻭﺽ ﻫﻴﺎ ..... ﻧﻮﺽ ... ﻳﺎﺍﺳﺮ ﻣﻦ ﺍﻟﻨﻮﻡ ﻫﻴﺎﺍﺍﺍﺍﺍﺍ
ﻫﻮ ﻳﻬﺰ ﻣﻊ ﺑﻌﻀﻪ ﻟﻜﻦ ﻗﺎﻋﺪ ﺭﺍﻗﺪ ﻣﺎﺍﺑﺪﺍﺵ ﺍﻱ ﺭﺩﺕ ﻓﻌﻞ ..
ﻫﻲ ﺗﻨﻘﺰ ﺗﻨﺮﻓﺰﺕ : ﻧﻮﻭﻭﻭﻭﺽ ... ﻧﻮﻭﻭﻭﻭﻭﻭﺽ .. ﻧﻮﻭﻭﻭﻭﻭﺽ ... ﻣﺎﺗﻨﺪﺭﻳﺶ ﻉ ﺭﻭﺣﻬﺎ ﺇﻻ ﻭﻫﻲ ﻃﺎﻳﺤﻪ ﻭﺭﺍﻗﺪﻩ ﺟﻨﺒﻪ ﻋﻜﻔﻬﺎ ﺑﺮﺟﻠﻪ ﻃﺒﻌﺎ ... ﻭﻫﻮ ﻣﻐﻤﺾ ﻋﻴﻮﻧﻪ ﺧﺪﺍﻫﺎ ﻓﻲ ﺣﻀﻨﻪ ..
ﺍﻟﺤﺴﻦ ﻭﻫﻮ ﻣﻐﻤﺾ ﻋﻴﻮﻧﻪ : ﺍﺭﻗﺪﻱ ﺍﺭﺭﺭﻗﻘﻘﻘﺪﻱ ..
ﻋﻠﻴﺎ : ﻣﺎﻧﺒﻴﻴﻴﺶ ..
ﺍﻟﺤﺴﻦ : ﺍﺭﻗﺪﻱ ..
ﻋﻠﻴﺎ : ﺍﻟﻠﻠﻠﻼ ..
ﺍﻟﺤﺴﻦ : ﺍﺭﻗﺪﻱ ..
ﻋﻠﻴﺎ : ﺍﻧﻠﻼﺍﺍﺍﺍﺍﺍﺍﺍﺍﺍ ..
ﺍﻟﺤﺴﻦ ﻓﺘﺢ ﻋﻴﻮﻧﻪ ﻗﺮﺑﻬﺎ ﻟﻴﻪ ﻭﺟﻬﻬﺎ ﻓﻲ ﻭﺟﻬﻪ : ﺣﺼﻠﻪ ﺣﺼﻠﻪ ..
ﻋﻠﻴﺎ ﺑﺈﺑﺘﺴﺎﻣﻪ ﻣﻐﺮﻭﺭﺓ : ﺣﺼﻠﻪ ﻭﺗﻤﻮﺕ ﻓﻴﻬﺎ ...
ﺍﻟﺤﺴﻦ ﻧﺎﺽ : ﻭﻫﻲ ﺟﻨﺖ ﻉ ﺭﻭﺣﻬﺎ
ﻋﻠﻴﺎ : ﻫﻬﻬﻬﻬﻬﻬﻪ ﻻ ﺑﺎﻟﻠﻪ ﻋﻠﻴﻚ .. ﻣﺪﺍﻳﺮﻩ ﻓﻄﻮﺭ ﻭﺟﻮ ... ﻫﻬﻬﻬﻬﻬﻬﻬﻪ ..
ﺍﻟﺤﺴﻦ ﻭﻻﺑﻲ ﻳﻌﺪﻝ ﻋﻠﻴﻬﺎ .. ﻭﺑﺪﻱ ﻳﻜﻤﻞ ﻓﻲ ﻭﺻﻠﺔ ﺍﻟﻌﺸﻖ .. ﺍﻟﻠﻲ ﻛﻤﻠﻬﺎ ﺣﺴﺎﻥ ﺣﺘﻰ ﻫﻮ ﺍﻟﻠﻲ ﻣﺨﻠﻬﺎﺵ ﺗﻠﺤﻖ ﺗﺸﺮﺏ ﻓﻨﺠﺎﻥ ﻗﻬﻮﺓ ..💖
🍀 ﻟﻮﻃﺎ ...
ﺍﻧﻌﺎﻡ : ﺍﺣﻤﻤﻢ ... ﺍﻓﻄﺮﻭﺍ ﺍﻛﻴﺪ ﻫﻤﺎ ﺑﻴﻔﻄﺮﻭﺍ ﻓﺤﻴﺎﺷﻬﻢ ..
ﺑﺮﻧﻴﻪ : ﻭﻋﻼﺵ ﻳﻔﻄﺮﻭﺍ ﺑﺮﻭﺍﺣﻬﻢ ﻋﺎﺭﻓﻴﻨﻲ ﻧﺤﺒﻬﻢ ﻳﻔﻄﺮﻭﺍ ﻣﻌﺎﻱ ..
ﺍﻧﻌﺎﻡ : ﺍﻫﻮ ﺍﻣﻲ ﺣﺪﺍﻙ ﺧﻮﺍﺗﻚ ﻭﺑﻨﺎﻭﻳﺘﻬﻢ ﻭﺣﻔﻴﺪﺍﺗﻚ ﻭﻛﻨﺎﻳﻨﻚ .. ﺍﻓﻄﺮﻱ ﺍﻣﻲ .. ﺍﻓﻄﺮﻭﺍ ..
ﺑﺮﻧﻴﻪ ﺳﻜﺘﺖ ﻭﺑﺪﺕ ﺗﻔﻄﺮ ﻭﻓﻄﺮﻭﺍ ﻛﻠﻬﻢ ﻭﻫﻤﺎ ﻳﻬﺪﺯﻭﺍ ﺳﺎﺭﻩ ﺷﺒﺤﺖ ﻹﻧﻌﺎﻡ ﻭﻏﻤﺰﺗﻠﻬﺎ ﺑﻤﻌﻨﻲ ﺷﻦ ﻓﻲ ﺍﻧﻌﺎﻡ ﺍﺑﺘﺴﻤﺖ ﻭﺑﺪﺕ ﺗﺎﻛﻞ .. ﻭﻛﺈﻧﻬﺎ ﻭﺻﻠﺖ ﺍﻹﺷﺎﺭﺓ ﻟﺴﺎﺭﺓ ﻭﻓﻬﻤﺖ ﻭﻓﺮﺣﺖ ﻫﻠﺒﻪ💕
***
ﺍﺳﻒ ﺟﺪﺍ ﺍﻟﻠﻲ ﺍﺗﺼﻠﺖ ﺑﻴﻚ ﺑﻜﺮﻱ ﻫﻜﻲ ..
ﺍﻟﻔﻬﺪ : ﻭﻻﻳﻬﻤﻚ ...
ﺳﺮﻣﺪ : ﻳﻌﻨﻲ ﻣﻮﺍﻓﻖ ﺗﻄﻠﻊ ﻣﻌﺎﻱ ﻓﻲ ﺣﻠﻘﺔ ﻏﺪﻭﺓ ..
ﺍﻟﻔﻬﺪ : ﺍﻛﻴﺪ ﻓﻲ ﺍﻟﺨﺪﻣﻪ ..
ﺳﺮﻣﺪ ﺑﺈﺑﺘﺴﺎﻣﻪ : ﻣﻤﻨﻮﻟﻚ .. ﻭﺟﻮﺩﻙ ﻏﺪﻭﺓ ﻣﻬﻢ ﺟﺪﺍ ﻣﻌﺎﻱ ..
ﺍﻟﻔﻬﺪ : ﺍﻧﻲ ﺑﺈﺫﻥ ﺍﻟﻠﻪ ﺣﻨﺰﻭﺭﻛﻢ ﺍﻟﻴﻮﻡ ﻭﻧﺘﻔﺎﻫﻤﻮﺍ ﺍﻛﺜﺮ ..
ﺳﺮﻣﺪ ﺿﻴﻖ ﻋﻴﻮﻧﻪ ﺑﺘﺴﺎﺅﻝ : ﺟﺎﻱ ﺯﻳﺎﺭﺓ .. ﻭﻻﺧﺪﻣﻪ ..
ﺍﻟﻔﻬﺪﺑﻀﺤﻜﻪ 2: ﻓﻲ ..1
ﺳﺮﻣﺪ : ﺍﻫﺎ ﺗﻤﺎﻡ ... ﻳﻠﻼ ﻧﺘﻼﻗﻮﺍ ﺑﻌﺪﻳﻦ ..
ﺍﻟﻔﻬﺪ : ﺇﻥ ﺷﺎﺀ ﺍﻟﻠﻪ ... ﻣﻊ ﺍﻟﺴﻼﻣﻪ ..
ﺳﺮﻣﺪ : ﻣﻊ ﺍﻟﺴﻼﻣﻪ .. ﻭﺻﻜﺮ .. ﺗﻠﻔﺖ ﻭﻗﺎﻡ ﺭﺍﺳﻪ ﺷﺒﺢ ﻟﺸﻘﺔ ﺍﻟﺤﺴﻦ ... ﺍﺑﺘﺴﻢ ﻭﺟﺎﻱ ﺑﻴﺨﺶ ﺟﺎﻩ ﻣﺴﺞ ﻗﺮﺍﻩ ﻭﺣﻂ ﺗﻠﻴﻔﻮﻧﻪ ﻓﺠﻴﺒﻪ ﻭﺧﺶ ...
***
ﺑﻌﺪ ﺍﻟﻈﻬﺮ ..
ﻟﺒﺴﺖ ﻗﻔﻄﺎﻥ ﻳﺎﺟﻮﺭﻱ ﻃﻮﻳﻞ ﺷﻴﻔﻮﻥ ﻛﻴﻒ ﻛﻤﻠﺖ ﺍﻷﻳﻼﻳﻨﺮ ﻟﻔﺖ ﺷﻌﺮﻫﺎ ﻉ ﺟﻨﺐ ﺑﺈﻳﺪﻫﺎ ﺩﻭﺭ ﻓﻲ ﻑ ﺧﻼﻝ ﻉ ﺧﺸﺘﻪ ...
ﺍﻟﺤﺴﻦ : ﺷﻦ ﺩﻭﺭﻱ ..
ﻋﻠﻴﺎ ﻭﻫﻲ ﺍﺩﻭﺭ : ﺧﻼﻝ ﺣﻄﻴﺘﻪ ﻫﻨﻲ ﻣﻌﺎﺵ ﻟﻘﻴﺘﻪ ..
ﺍﻟﺤﺴﻦ ﻗﺮﺏ ﻣﻨﻬﺎ ﻭﻭﻗﻒ ﻗﺪﺍﻣﻬﺎ ﺷﺒﺤﺖ ﻹﻳﺪﻳﻪ ﻭﻫﻤﺎ ﻳﻔﻜﻮﺍ ﻓﻲ ﺍﻟﺨﻼﻝ ﻣﻦ ﺍﻟﻘﻔﻄﺎﻥ ﻗﺮﻳﺐ ﻣﻦ ﺭﻗﺒﺘﻬﺎ ..
ﻋﻠﻴﺎ : ﻫﻬﻬﻬﻬﻬﻬﻪ ... ﺭﺳﻤﻲ ﺍﻧﺬﻫﺒﺖ ﺷﻴﺮﺗﻲ .. ﻗﻌﺪﺕ ﺗﺸﺒﺤﻠﻪ ﻧﻈﺮﺍﺗﻪ ﻫﺎﺩﻡ ﺗﻌﺮﻓﻬﻢ ﻛﻮﻳﺲ ..
ﺍﻟﺤﺴﻦ ﺑﻌﺸﻖ : ﺍﻧﻲ ﺍﻟﻠﻲ ﺍﻧﺬﻫﺒﺖ ﺷﻴﺮﺗﻲ ... ﻗﺮﺏ ﺍﻛﺜﺮ .. ﺍﻧﺘﻲ ﺫﻫﺎﺏ ﺷﻴﺮﻩ ...
ﻭﻻﺻﺎﺭ ﻣﻦ ﻧﺰﻭﻝ ﻭﻻﻏﻴﺮﻩ ...💕
....
ﻉ ﻋﻜﺲ ﻫﺎﻟﻪ ﻭﺣﺴﺎﻥ ﺍﻟﻠﻲ ﻧﺰﻟﻮﺍ ﻣﻊ ﺍﻟﻐﺪﻱ ﻭﻃﺒﻌﺎ ﺣﺴﺎﻥ ﻛﺎﻥ ﻳﻠﻘﻰ ﻣﺎﻳﻨﺰﻟﺶ ﻫﻮ ﻭﻳﺎﻫﺎ ﻟﻜﻦ ﻫﻲ ﺍﺻﺮﺕ ... ﻧﺰﻟﺖ ﻭﺧﺸﺖ ﺳﻠﻤﺖ ﻉ ﺍﻟﻠﻲ ﻟﻘﺎﺗﻪ ﻗﺪﺍﻣﻬﺎ .. ﻭﺧﺸﺖ ﻟﻠﻜﻮﺟﻴﻨﻪ .. ﻟﻘﺘﻬﻢ ﻳﺤﻄﻮﺍ ﻓﻲ ﺍﻟﻐﺪﻱ ...
ﻫﺎﻟﻪ ﺑﺈﺣﺮﺍﺝ : ﺍﻟﺴﻼﻡ ﻋﻠﻴﻜﻢ ..
ﻭﺳﻴﻠﻪ : ﻣﺎﺯﺍﻝ ﺑﻜﺮﻱ ..
ﻛﻠﻬﻢ ﺷﺒﺤﻮﺍ ﻟﻬﺎﻟﻪ ...
ﻫﺎﻟﻪ ﺑﻀﻴﻖ ﻭﺭﺑﻜﻪ : ﺍﺳﻔﻪ ... ﻏﻴﺮ ﻗﻌﺪﺕ ﻧﻘﺮﺍ ..
ﺍﻧﻌﺎﻡ : ﻭﻻﻳﻬﻤﻚ ..
ﻭﺳﻴﻠﻪ : ﻣﻌﻠﻴﺸﻲ ﺍﻧﻌﺎﻡ ﺧﻠﻴﻨﻲ ﻧﻜﻠﻢ ﻛﻨﺘﻲ ﻭﻣﺎﺗﺪﺧﻠﻴﺶ ..
ﺍﻧﻌﺎﻡ ﺷﺒﺤﺘﻠﻬﺎ ﺑﺈﺳﺘﻴﺎﺀ .
ﻭﺳﻴﻠﻪ : ﻣﻔﺮﻭﺽ ﺍﻧﺘﻲ ﻭﺍﻟﺘﺎﻧﻴﻪ ﻫﺪﻳﻜﺎ ﺍﻟﻠﻲ ﻟﺘﻮﺍ ﻣﺎﺷﺮﻓﺖ .. ﻣﻦ ﺍﻟﺼﺒﺢ ﻫﻨﺎﻳﺎ ... ﺍﻟﻌﻴﻠﻪ ﻣﻠﺘﻤﻪ ﺍﻟﻠﻲ ﻳﺴﻜﻦ ﺑﻌﻴﺪ ﻫﻨﻲ ﻳﻌﻮﻟﻮﺍ ﻭﺍﻧﺘﻢ ﺍﻟﻠﻲ ﻓﻮﻕ ﺣﻮﺵ ﺍﻟﻌﻴﻠﻪ .. ﺭﺍﻗﺪﺍﺕ ﻣﺎﺗﻨﺪﺭﻭﺍ ﻉ ﺣﺎﺟﻪ ..
ﺧﻮﻟﻪ : ﻣﺎﻣﺎ ..
ﻭﺳﻴﻠﻪ : ﺍﻧﻲ ﻗﻠﺖ ﺍﺻﺼﺺ .. ﺑﻨﺎﻭﻳﺖ ﺍﻷﺻﻮﻝ ﻣﺎﻳﺪﻳﺮﻭﺵ ﺩﻳﺮﻛﻢ .. ﻋﻴﻴﻴﺐ ﻋﻴﻴﻴﺐ ... ﻭﺗﻠﻔﺘﺖ ﻭﻟﺖ ﻟﻄﻨﺠﺮﺗﻬﺎ .. ﻣﺎﻛﻨﺘﺶ ﻧﺒﻲ ﻫﻜﻲ .. ﺍﻟﻠﻪ ﻳﺴﺎﻣﺢ ﺍﻟﻠﻲ ﻛﺎﻥ ﺍﻟﺴﺒﺐ ..
ﻫﺎﻟﻪ ﻛﻼﻡ ﻭﺳﻴﻠﻪ ﻧﺰﻝ ﻋﻠﻴﻬﺎ ﺯﻱ ﺍﻟﺴﻢ .. ﺟﺒﺪﺗﻬﺎ ﺍﻧﻌﺎﻡ ﻭﻃﻠﻌﺘﻬﺎ ..
ﺍﻧﻌﺎﻡ : ﻣﻌﻠﻴﺸﻲ ﻫﺎﻟﻪ ﺣﺒﻴﺒﺘﻲ ﻋﻤﺘﻚ ﻭﺗﻌﺮﻓﻴﻬﺎ ..
ﻫﺎﻟﻪ ﻭﻋﻴﻮﻧﻬﺎ ﻣﻌﺒﻴﺎﺕ ﺩﻣﻮﻉ : ﻋﺎﺩﻱ ..
ﺍﻧﻌﺎﻡ : ﺑﺮﻱ ﺣﺒﻴﺒﺘﻲ ﻗﻌﻤﺰﻱ ﻓﺪﺍﺭﻱ ﺑﺮﻱ ...
ﻫﺎﻟﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻣﺸﺖ ﻟﺪﺍﺭ ﺍﻧﻌﺎﻡ .. ﻭﻉ ﻃﻮﻝ ﻧﺰﻟﻮﺍ ﺩﻣﻮﻋﻬﺎ ...
ﺗﻐﺪﻭﺍ .. ﻭﻏﺴﻠﻮﺍ ﺍﻟﻤﺎﻋﻴﻦ .. ﺍﺫﻥ ﺍﻟﻌﺼﺮ .. ﻟﺒﻌﺪ ﺍﻟﻌﺼﺮ ﺷﺮﺑﻮﺍ ﺍﻟﺸﺎﻫﻲ ﻭﺍﻟﻘﻬﻮﺓ .. ﺭﻭﺣﻮﺍ ﺧﻮﺍﺕ ﺑﺮﻧﻴﻪ ﻭﺑﻨﺎﺗﻬﻢ .. ﻭﺧﺸﻮﺍ ﺍﻟﺒﺎﻗﻲ ﺑﻴﺪﻳﺮﻭﺍ ﺍﻟﻌﺸﻲ ..
ﺑﻌﺪ ﺍﻟﻤﻐﺮﺏ ..
ﻋﻠﻴﺎ ﺗﻠﺒﺲ ﻓﻲ ﻭﺷﺎﺣﻬﺎ : ﻳﺎﻋﻠﻴﻚ ﻣﻮﻗﻒ ﺑﻨﻨﺤﻂ ﻓﻴﻪ ﺗﻮ ..
ﺍﻟﺤﺴﻦ ﺑﻀﺤﻜﻪ : ﻣﺎﺗﺒﺎﻟﻐﻴﺶ ..
ﻋﻠﻴﺎ : ﻋﻨﺪﻙ ﺣﻖ ﻣﻦ ﺑﻴﻜﻠﻤﻚ ﺍﻧﺖ ﻭﻻﻳﻠﻮﻣﻚ ..
ﺍﻟﺤﺴﻦ : ﺗﻬﺒﻠﻲ ﻭﺍﻧﺘﻲ ﻣﺘﻨﺮﻓﺰﺓ .. ﻋﻠﻴﺎ ﻃﺎﺭﺕ ﺗﺠﺮﻱ ﻣﻦ ﺑﺤﺪﺍﻩ ﻭﻭﺻﻠﺖ ﻓﻲ ﺍﻟﺒﺎﺏ ..
ﺍﻟﺤﺴﻦ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻪ ..
ﻋﻠﻴﺎ ﻓﺘﺤﺖ ﺍﻟﺒﺎﺏ ﻭﻃﻠﻌﺖ ﻭﻫﻲ ﺷﺎﺩﺓ ﺿﺤﻜﺘﻬﺎ .. ﺳﻤﻌﺎﺗﻪ ﺻﻜﺮ ﺍﻟﺒﺎﺏ ﻭﻧﺰﻝ ﻳﺠﺮﻱ .. ﻋﻠﻴﺎ ﺗﺮﺍﺟﻲ ﻓﻴﻪ ﺷﻦ ﺑﻴﺪﻳﺮ .. ﺟﻲ ﺟﻨﺒﻬﺎ ﺷﺪﻫﺎ ﺧﺪﻱ ﺑﻮﺳﻪ ﻣﻦ ﺧﺪﻫﺎ ﻃﻮﻳﻠﻪ .. ﻭﺑﻌﺪﻳﻦ ﺿﺤﻚ ﻓﺘﺢ ﺍﻟﺒﺎﺏ ﻣﺘﺎﻉ ﺍﻟﻔﺎﺻﻞ ﻭﻣﺸﻲ .. ﻭﻫﻲ ﺗﺸﺒﺤﻠﻪ ﻭﺗﻀﺤﻚ ﺑﺨﺠﻞ ﺧﺸﺖ ﻟﻠﺤﻮﺵ ..
ﻫﻲ ﻣﻨﻈﺮﻫﺎ ﻛﺎﺍﺍﺍﺍﻥ ﺧﻴﻴﻴﻴﻴﻴﻴﻲ .. ﻟﻤﺎ ﻟﻘﺖ ﺍﻟﺤﻮﺵ ﺷﺒﻪ ﻓﺎﺿﻲ .. ﺗﻮﺟﻬﺖ ﻟﻠﻤﻄﺒﺦ ﻟﻘﺘﻬﻢ ﺣﺎﻃﻴﻦ ﺍﻟﻌﺸﻲ ﻭﻣﺎﻫﻨﺎﻙ ﺣﺪ .. ﻣﺸﺖ ﻟﺪﺍﺭ ﺍﻟﻤﻌﻴﺸﻪ ﻟﻘﺘﻬﻢ ﻓﻴﻬﺎ ﻣﺎﻋﺪﺍ ﺑﺮﻧﻴﻪ ﻭﻓﺎﻃﻤﻪ ﻣﺮﺕ ﻣﺤﻤﺪ ..
ﻋﻠﻴﺎ ﺑﺈﺣﺮﺍﺝ : ﺍﻟﺴﻼﻡ ﻋﻠﻴﻜﻢ ..
ﺭﺩﻭﺍ ﺍﻟﺴﻼﻡ ﻣﺎﻋﺪﺍ ﻭﺳﻴﻠﻪ ﺍﻟﻠﻲ ﺗﺸﺒﺤﻠﻬﺎ ﺑﻐﻞ ..
ﺧﺸﺖ ﻋﻠﻴﺎ ﻭﻗﻌﻤﺰﺕ ﺣﺪﺍ ﺟﻨﺎﻥ ﻭﻓﻲ ﺍﻳﺪﻫﺎ ﻛﺘﺎﺏ ﺍﻟﺒﺎﺭﺍ ..
ﻋﻠﻴﺎ : ﺧﻮﺩﻱ ﺟﻨﺎﻥ ..
ﺟﻨﺎﻥ ﺑﻀﺤﻜﻪ : ﻭﻳﻨﻚ ﻫﺬﺍ ﻛﻠﻪ ..
ﻋﻠﻴﺎ ﻭﺟﻬﻬﺎ ﻭﻻ ﺍﺣﻤﺮ : ﺍﺣﻤﻢ ﻛﻨﺖ ﻧﻘﺮﺍ ..
ﺟﻨﺎﻥ ﺿﺤﻜﺖ ﻭﺳﻜﺘﺖ ..
ﻭﺳﻴﻠﻪ ﺑﺼﻮﺕ ﻣﺴﻤﻮﻉ : ﺑﻘﻮﻟﻲ ﻛﺎﻥ ﻗﻌﺪﺗﻲ ﻓﻮﻕ ﺧﻴﺮ ﻋﻼﺵ ﻧﺎﺯﻟﻪ ..
ﻋﻠﻴﺎ ﺷﺒﺤﺘﻠﻬﺎ ﺑﺨﻮﻑ : ﺍﺳﻔﻪ ..
ﻭﺳﻴﻠﻪ : ﺍﺳﻔﻪ ... ﻫﻮ ﻫﺬﺍ .. ﻭﻛﺄﻧﻪ ﻣﺶ ﻫﺎﻣﻚ .. ﻣﺎﺍﻋﺘﻘﺪﺗﺶ ﺯﻳﻨﺐ ﻗﺼﺮﺕ ﻣﻌﺎﻙ ﻭﻋﻠﻤﺎﺗﻚ ﻛﻴﻒ ﺗﻜﻮﻧﻲ ﻛﻨﺔ ﻓﻲ ﺣﻮﺵ ﻋﻴﻠﻪ ..
ﻋﻠﻴﺎ ﺳﺎﻛﺘﻪ ﻭﺗﺤﺎﻭﻝ ﺗﺘﻤﺎﻟﻚ ﻧﻔﺴﻬﺎ ..
ﺳﺎﺭﺓ : ﺍﺭﺟﻮﻙ ﺍﻣﻲ ﻓﻜﻴﻨﺎ ﻋﺎﺩ ..
ﻭﺳﻴﻠﻪ ﺑﻌﺼﺒﻴﻪ : ﻓﻜﻮﻧﻲ ﺍﻧﺘﻢ .. ﻣﺶ ﻣﺘﺤﻤﻠﻴﻦ ﻓﻴﻬﻢ ﺷﻲ ﻭﺗﺤﺎﻣﻮﺍ ﻋﻠﻴﻬﻢ ﺣﺘﻰ ﻓﻲ ﺍﻟﻐﻠﻂ .. ﻣﺶ ﻋﺎﺭﻓﻪ ﺷﻦ ﺑﻴﻘﻮﻟﻮﺍ ﻋﻠﻴﻜﻢ ﺧﻮﺍﺕ ﺍﻟﺤﺎﺟﻪ ﻭﺑﻨﺎﺗﻬﻢ ﻭﻻﺷﻦ ﺑﻴﻘﻮﻟﻮﺍ ﻋﻠﻴﺎ ﺍﻧﻲ .. ﻟﻜﻦ ﺍﻟﺤﻤﺪ ﻟﻠﻪ ﺍﻟﻠﻲ ﻛﻞ ﻳﻌﺮﻑ ﺍﻧﻲ ﻣﺶ ﺭﺍﺿﻴﻪ ﻻ ﻋﻠﻲ ﺯﻭﺍﺝ ﺣﺴﺎﻥ ﻭﻻﺍﻟﺤﺴﻦ .. ﺍﻟﻠﻪ ﻏﺎﻟﺐ ..
ﻫﺎﻟﻪ ﻭﻋﻠﻴﺎ ﺩﻣﻮﻋﻬﻢ ﺗﻨﺰﻝ ..
ﻉ ﺧﺸﺔ ﺑﺮﻧﻴﻪ : ﺧﻴﺮ ﺑﻼﻙ ﺍﻧﺘﻲ ﺧﻴﺮﻙ .. ﺍﻣﺘﻰ ﺑﺘﺤﻄﻲ ﻋﻘﻠﻚ ﻓﺮﺍﺳﻚ ..
ﻧﺎﺿﺖ ﻭﺳﻴﻠﻪ : ﻋﻘﻠﻲ ﻓﺮﺍﺳﻲ ﻳﺎﻋﻤﺘﻲ ﺑﺲ ﻭﻻﺩﻱ ﺍﻟﻠﻲ ﻋﻘﻮﻟﻬﻢ ﻣﺶ ﻋﻠﻴﻬﻢ .. ﺍﻟﻠﻲ ﻗﺎﻃﻌﻮﻧﻲ ﻉ ﺧﺎﻃﺮﻫﻢ ﺍﻟﻠﻪ ﺃﻋﻠﻢ ﻣﻮﻛﻠﻴﻨﻪ ﻭﻻﻣﺸﺮﺑﻴﻨﻪ " ﻗﺼﺪﻫﺎ ﺍﻟﺴﺤﺮ "
ﻋﻠﻴﺎ ﻣﻌﺎﺵ ﺗﺤﻤﻠﺖ : ﻻ ﻣﻌﻠﻴﺸﻲ ﻻﻫﻨﻲ ﻭﻳﺎﺳﺮ .. ﺭﺍﻧﺎ ﺑﻨﺎﺕ ﻧﺎﺱ ﻭﻋﻴﻠﻪ ﻭﻣﺘﺮﺑﻴﺎﺕ ﺍﺣﺴﻦ ﺗﺮﺑﻴﻪ ﻭﻧﻌﺮﻓﻮﺍ ﺍﻷﻭﺻﻮﻝ ﻛﻮﻳﺲ ﻭﺃﺳﺄﻟﻲ ﺍﻟﻠﻲ ﻋﺎﺷﺮﻭﻧﺎ ﻋﻠﻴﻨﺎ .. ﻭﺑﻌﺪﻳﻦ ﻻﺯﻡ ﺗﻘﺘﻨﻌﻲ ﺍﻥ ﺣﻨﻰ ﻻﺟﺮﻳﻨﺎ ﻭﺭﺍ ﻭﻻﺩﻙ ﻭﻻﺟﺒﻨﺎﻫﻢ ﺑﺎﻟﺴﻴﻒ ﻋﻠﻴﻬﻢ .. ﻫﺬﺍ ﻧﺼﻴﺐ ﻧﺼﻴﺐ ﻣﻦ ﺭﺑﻲ ﺍﻗﺘﻨﻌﻲ ﺍﺭﺟﻮﻙ ﺍﻗﺘﻨﻌﻲ ..
ﻭﺳﻴﻠﻪ : ﻻﻣﺮﺑﻴﻪ ﻫﻠﺒﻪ ﺍﻟﻠﻲ ﺗﻜﻠﻤﻲ ﻓﻲ ﻋﺰﻭﺯﺗﻚ ﺑﻬﺎﻷﺳﻠﻮﺏ .. ﻟﺴﺎﻧﻚ ﺍﻃﻮﻝ ﻣﻨﻚ ﻗﻠﻴﻠﺔ ﺍﺩﺏ ..
ﻋﻠﻴﺎ ﺑﺒﻜﻲ ﻭﺻﻮﺕ ﻋﺎﻟﻲ : ﺍﺣﺘﺮﻣﻲ ﻧﻔﺴﻚ ..
" ﻋﻠﻴﺎﺍﺍﺍﺍﺍﺍﺍ .."
ﺍﻟﺘﻔﺘﻮﺍ ﻛﻠﻬﻢ ﺑﺼﺪﻣﻪ .. ﻣﻼﻣﺢ ﻭﺟﻪ ﺍﻟﺤﺴﻦ ﺗﺨﻮﻑ ..
ﺍﻟﺤﺴﻦ : ﺍﺭﻛﺒﻲ ﻓﻮﻕ ..
ﻋﻠﻴﺎ ﺗﺸﻮﻓﻠﻪ ﺑﺨﻮﻑ ﻭﺗﻮﺳﻞ ..
ﺍﻟﺤﺴﻦ ﺑﺼﻮﺕ ﻋﺎﻟﻲ : ﻫﻴﺎﺍﺍﺍﺍﺍﺍﺍ ..
ﻛﻠﻬﻢ ﺍﻧﻔﺰﻋﻮﺍ ﻭﻫﻲ ﻛﺎﻧﺖ ﺑﺘﻤﻮﺕ .. ﺑﺴﺮﻋﻪ ﻃﻠﻌﺖ ﻣﻦ ﺣﺪﺍﻫﻢ ...
ﺍﻟﺤﺴﻦ ﺷﺒﺢ ﻷﻣﻪ : ﻣﺶ ﻋﺎﺭﻑ ﺧﻴﺮﻙ ﻳﺎﺍﻣﻲ ﻣﺶ ﻋﺎﺭﻑ .. ﻣﻌﻘﻮﻟﻪ ﻛﻼﻡ ﺍﻟﻨﺎﺱ ﻭﻧﻈﺮﺗﻬﻢ ﺍﻫﻢ ﻋﻨﺪﻙ ﻣﻦ ﺭﺍﺣﺔ ﻭﻻﺩﻙ ..
ﻣﺎﺗﺸﻮﻓﻴﺶ ﻓﻲ ﻭﻟﺪﻙ ﺣﺴﺎﻥ ﻛﻴﻒ ﺗﻐﻴﺮ ﻛﻴﻒ ﻭﻻ ﺭﺍﺟﻞ ﻗﺪ ﻣﺴﺆﻭﻟﻴﻪ ﻳﺼﻠﻲ ﻭﻳﺨﺪﻡ ﻉ ﺭﺍﺳﻪ ﻭﺍﺳﺘﻘﺎﻡ ﻣﺶ ﺷﺎﻳﻔﺘﻴﻪ ﻛﻴﻒ ﺑﺎﻳﻨﻪ ﻓﻴﻪ ﺍﻟﺮﺍﺣﻪ ﺣﺴﺎﻥ ﻭﻻ ﺑﻨﺎﺩﻡ ﺗﺎﻧﻲ ﻭﻛﻠﻪ ﻣﻦ ﻭﺭﺍﺀ ﺍﻟﻤﺮﺍﺓ ﺍﻟﺼﺎﻟﺤﻪ ﺍﻟﻠﻲ ﻣﺶ ﻋﺎﺟﺒﺎﺗﻚ ﺩﺍﺭﺕ ﺍﻟﻠﻲ ﺍﻧﺘﻲ ﺍﻣﻪ ﻣﺎﻗﺪﺭﺗﻴﺶ ﺍﺩﻳﺮﻳﻪ ..
ﻫﺎﻟﻪ ﺩﻣﻮﻋﻬﺎ ﻳﻨﺰﻟﻮﺍ ...
ﺍﻟﺤﺴﻦ : ﻭﺍﻧﻲ ﺷﻮﻓﻴﻠﻲ ﺭﻛﺰﻱ ﻓﻴﺎ ﻣﺶ ﺣﺎﺳﻪ ﺍﻧﻲ ﺗﻐﻴﺮﺕ ﻭﻟﻴﺖ ﻧﻀﺤﻚ .. ﻧﻨﺴﺠﻢ ﻣﻊ ﺯﺣﻤﺔ ﺍﻟﻌﻴﻠﻪ ﺍﻟﻠﻲ ﻛﻨﺖ ﻧﻨﻔﺮ ﻣﻨﻬﺎ .. ﺣﺒﻴﺖ ﺍﻟﺤﻴﺎﺓ ﻳﺎﺍﻣﻲ ﺣﺒﻴﺘﻬﺎ ﺑﺴﺒﺐ ﻋﻠﻴﺎ ..
ﻛﻠﻬﻢ ﻳﺸﺒﺤﻮﻟﻪ ﻛﻴﻒ ﻳﺘﻜﻠﻢ ﻭﻋﻴﻮﻧﻪ ﻳﻠﻤﻌﻮﺍ ﺍﻟﺤﺐ ﻭﺍﺿﺢ ﻓﻲ ﻓﻴﻬﻢ .. ﻋﻴﻮﻧﻪ ﺍﻟﻠﻲ ﻋﻤﺮ ﻧﻈﺮﺍﺗﻬﻢ ﻣﺎﻛﺎﻧﺖ ﺗﻌﺒﺮ ﺑﺸﻲ ﻓﻴﻪ ﺣﻴﺎﺓ ..
ﺍﻟﺤﺴﻦ : ﺍﻧﺘﻲ ﺍﻣﻲ ﻉ ﻋﻴﻨﻲ ﻭﻉ ﺭﺍﺳﻲ ﻭﻟﻠﻤﺮﺓ ﺍﻷﺧﻴﺮﺓ ﻧﻘﻮﻟﻬﺎﻟﻚ .. ﺍﺣﺘﺮﺍﻣﻚ ﻟﻤﺮﺗﻲ ﻣﻦ ﺍﺣﺘﺮﺍﻣﻚ ﻟﻴﺎ .. ﺣﺒﻚ ﻟﻤﺮﺗﻲ ﻣﻦ ﺣﺒﻚ ﻟﻴﺎ .. ﺍﻟﻘﺪﺭ ﺍﻟﻠﻲ ﺗﻌﻄﻴﻪ ﻟﻤﺮﺗﻲ ﻗﺪﺭ ﻟﻴﺎ .. ﻭﺍﻟﻌﻜﺲ ﺻﺤﻴﺢ ..
ﺍﻣﻲ ﺍﺭﺟﻮﻙ ﺭﺍﺟﻌﻲ ﻧﻔﺴﻚ .. ﺭﻩ ﻧﻈﺮﺗﻚ ﻟﻠﻨﺎﺱ ﻏﻠﻂ ﻓﻐﻠﻂ .. ﻭﻟﻒ ﻭﻃﻠﻊ ﻭﺧﻼ ﺍﻣﻪ ﻣﺼﺪﻭﻣﻪ ﻣﻦ ﻛﻼﻣﻪ ..
ﻭﻫﺬﻳﻜﺎ ﺍﻟﻠﻴﻠﻪ ﻣﺸﺖ ﺑﺎﻟﻨﻜﺪ ﻉ ﺍﻟﻜﻞ ﺑﺎﻟﺬﺍﺕ ﻋﻠﻴﺎ ﻭﻫﺎﻟﻪ ﺍﻟﻠﻲ ﻓﺮﺣﺘﻬﻢ ﻣﺎﺗﻤﺖ ...
ﺑﻌﺪ ﺍﻟﻌﺸﺎﺀ ..
ﻭﺍﻗﻒ ﻣﻊ ﺻﺎﺣﺒﻪ ﻉ ﺗﺮﻛﻴﻨﻪ ﻓﺠﻨﺎﻥ ﺍﻟﺤﻮﺵ ﻛﺎﻥ ﻳﺴﻤﻌﻠﻪ ﻭﻫﻮ ﻳﻜﻠﻢ ﻓﻴﻪ ﻓﻲ ﻣﻮﺿﻮﻉ ﻣﻬﻢ ﻓﺎﺟﺌﻪ ﻫﻠﺒﻪ .. ﻟﺪﺭﺟﺔ ﻣﺎﻗﺪﺭﺵ ﻳﺮﺩ ﺑﺤﺮﻑ ﺑﻌﺪ ﻛﻤﻞ ﺻﺎﺣﺒﻪ ﻛﻼﻣﻪ ..
ﺍﻟﻔﻬﺪ : ﻋﺎﺭﻑ ﺍﻧﻲ ﻓﺎﺟﺌﺘﻚ ﻫﻠﺒﻪ .. ﻣﺎﻧﺒﻴﻜﺶ ﺗﺎﺧﺪ ﻣﻨﻲ ﻣﻮﻗﻒ ﻻﺩﺭﺕ ﻻﻋﻴﺐ ﻻﺣﺮﺍﻡ .. ﺟﻴﺖ ﻣﻦ ﺍﻟﺒﺎﺏ ﻃﻮﻝ ..
ﺍﻟﺤﺴﻦ : ﻛﻞ ﺍﻟﻠﻲ ﻧﻘﺪﺭ ﻧﻘﻮﻟﻬﻮﻟﻚ .. ﺍﻧﻲ ﺣﻨﻔﺘﺢ ﺍﻟﻤﻮﺿﻮﻉ ﻣﻌﺎﻫﺎ ﻭﻧﺸﻮﻑ ﺷﻦ ﺗﻘﻮﻝ ..
ﺍﻟﻔﻬﺪ ﺑﺈﺑﺘﺴﺎﻣﻪ : ﻭﺃﻧﺖ ﺷﻦ ﻗﻮﻟﻚ ..
ﺍﻟﺤﺴﻦ ﺑﺈﺑﺘﺴﺎﻣﻪ : ﺭﺍﺟﻞ ﻭﺍﺧﺘﻲ ﻣﺶ ﺣﺘﻠﻘﻰ ﺧﻴﺮ ﻣﻨﻚ ..
ﺍﻟﻔﻬﺪ ﺑﻔﺮﺣﻪ : ﺑﺎﺭﻙ ﺍﻟﻠﻪ ﻓﻴﻚ ...
ﻣﻦ ﺑﻌﻴﺪ
ﺳﺮﻣﺪ ﻭﻭﺍﻗﻒ ﻳﺸﺒﺤﻠﻬﻢ " ﻣﺶ ﻋﺎﺭﻑ ﻧﻘﻮﻟﻪ ﻭﻻﻻ ﺑﺲ ﻟﻮ ﺻﺎﺭﺕ ﺣﺎﺟﻪ ﺯﻱ ﻫﺎﺩﻱ ﻭﻫﻮ ﻣﺎﻋﻨﺪﺍﺵ ﻋﻠﻢ ﺣﻴﻄﻠﻌﻮﺍ ﻋﻠﻴﺎ ﺟﻨﻮﻧﻪ ﻭﻳﻦ ﻣﺎﺃﻧﻲ ﺣﻴﺤﻂ ﻓﻴﺎ ﻏﻀﺒﻪ ﻛﻠﻪ "..
***
ﺣﺴﺎﻥ ﻣﻦ ﺑﻌﺪ ﻧﺰﻝ ﻣﻊ ﻫﺎﻟﻪ ﻃﻠﻊ ﺑﺮﺍ ﺍﻟﺤﻮﺵ ﻋﻦ ﻗﺪ ﻣﺎﻛﺎﻥ ﺳﻌﻴﺪ ﻛﺎﻥ ﻳﺒﻲ ﻳﺴﻌﺪ ﻫﺎﻟﻪ ﺍﻛﺜﺮ ﻭﺃﻛﺜﺮ ﺷﺮﺍﻟﻬﺎ ﺣﺎﺟﻪ ... ﺭﻭﺡ ﻟﻠﺤﻮﺵ ﻭﺭﻛﺐ ﻓﻮﻕ ﻃﻮﻝ .. ﺧﺶ ﻟﺤﻮﺷﻪ .. ﻭﺗﻮﺟﻪ ﻟﺪﺍﺭ ﺍﻟﻨﻮﻡ ﺍﺳﺘﻐﺮﺏ ﻓﻀﻴﻬﺎ ﺍﻟﻤﻄﻔﻲ .. ﻓﺘﺤﻪ ﻟﻘﺎﻫﺎ ﺭﺍﻗﺪﻩ ﻗﻌﺪ ﻳﻜﻮﻥ ﻓﻲ ﻧﻔﺴﻬﺎ ﺍﻛﻴﺪ ﺗﻌﺒﺎﻧﻪ ﻭﻫﻲ ﺷﺒﻪ ﻣﺎﺭﻗﺪﺗﺶ ﺍﺑﺘﺴﻢ ﻭﻃﻔﺎ ﺍﻟﻀﻲ ﻭﺃﺟﻞ ﺣﻜﺎﻳﻪ ﺍﻟﻬﺪﻳﻪ ﻟﻠﻴﻮﻡ ﺍﻟﻠﻲ ﺑﻌﺪﻩ .. ﻭﻣﻜﺎﻧﺶ ﻳﻌﻠﻢ ﺍﻧﻪ ﻫﺎﻟﻪ ﺑﻠﻠﺖ ﻣﺨﺪﺗﻬﺎ ﺑﺪﻣﻮﻋﻬﺎ ﻟﻴﻠﺘﻬﺎ ﻭﻫﻲ ﺗﺒﻜﻲ ﺑﺼﻤﺖ ..
ﻋﻨﺪ ﻋﻠﻴﺎ
ﺍﻟﻠﻲ ﻛﺎﻧﺖ ﻣﻘﻌﻤﺰﺓ ﻉ ﺍﻟﺴﺮﻳﺮ ﻭﺗﺒﻜﻲ .. ﻣﺸﻨﺎﻩ ﺷﻌﻮﺭ ﺍﻟﺤﺰﻥ ﺍﻟﻠﻲ ﻳﺠﻴﻚ ﺑﻌﺪ ﺷﻌﻮﺭ ﺳﻌﺎﺩﻩ .. ﺍﻟﻨﻜﺪ ... ﺳﻤﻌﺖ ﺑﺎﺏ ﺍﻟﺤﻮﺵ ﺍﻧﻔﺘﺢ .. ﻭﻗﻌﺪﺕ ﺗﺴﺘﻨﻰ ﻓﻴﻪ ﻳﺨﺶ .. ﺧﺶ ..
ﺍﻟﺤﺴﻦ : ﻋﻼﺵ ﻣﺎﺭﻗﺪﺗﻴﺶ ..
ﻋﻠﻴﺎ ﺑﺒﻜﻲ : ﻛﻴﻒ ﺗﺒﻴﻨﻲ ﻧﺮﻗﺪ ..
ﺍﻟﺤﺴﻦ ﺷﺒﺤﻠﻬﺎ ﻫﻠﺒﻪ ﺑﻌﺪﻳﻦ ﻗﺎﻝ : ﻧﻌﺮﻓﻪ ﻟﺴﺎﻧﻚ ﻃﻮﻳﻞ ﻟﻜﻦ ﻣﺎﻧﻌﺮﻓﻜﺶ ﺗﺘﻤﺎﺩﻱ ﻓﻴﻪ ﻣﻊ ﺍﻷﻛﺒﺮ ﻣﻨﻚ ..
ﻋﻠﻴﺎ ﺑﻨﺒﺮﺓ ﺑﺎﻛﻴﻪ : ﻭﺍﻟﻠﻪ ﺍﻟﻌﻈﻴﻢ ﻋﻤﺮﻱ ﻣﺎﺩﺭﺗﻬﺎ ﻟﻜﻦ ﺍﺳﺘﻔﺰﺗﻨﻲ ﻫﻠﺒﻪ ﻫﻠﺒﻪ .. ﻗﻌﺪﺕ ﺗﺒﻜﻲ ..
ﺍﻟﺤﺴﻦ ﻗﺪﻡ ﻭﻭﻗﻒ ﻗﺪﺍﻡ ﺍﻟﺴﺮﻳﺮ : ﺍﻟﻜﻠﻤﻪ ﺍﻟﻠﻲ ﻗﻠﺘﻬﺎﻟﻬﺎ ﻗﻠﺔ ﺍﺣﺘﺮﺍﻡ ﻟﻴﺎ ﻗﺒﻞ ﻟﺘﻜﻮﻥ ﻟﻴﻬﺎ .. ﻭﺟﻌﺘﻨﻲ ﺃﻧﻲ ﺍﻛﺜﺮ ﻣﻨﻬﺎ ..
ﻋﻠﻴﺎ ﻗﺎﻣﺖ ﺭﺍﺳﻬﺎ ﺷﺒﺤﺘﻠﻪ ﺑﻌﺪﻳﻦ ﺍﻧﻬﺎﺭﺕ ﺑﺎﻟﺒﻜﻲ ﺑﺎﻟﻌﺒﺮﺓ ﺗﺒﻜﻲ ..
ﻫﻮ ﻣﺎﺗﺤﻤﻠﺶ ﻗﺪﻡ ﻭﻗﻌﻤﺰ ﺣﺪﺍﻫﺎ ...
ﺍﻟﺤﺴﻦ : ﺧﻼﺹ .. ﺍﻫﺪﻱ
ﻋﻠﻴﺎ ﺑﺎﻟﻌﺒﺮﺓ : ﺃﻧﺖ .. ﺯﻋﻠﺖ ..
ﺍﻟﺤﺴﻦ ﺑﻨﻈﺮﺓ ﺣﻨﻮﻧﻪ : ﻛﻨﺖ ﺑﺲ ﺗﻮﺍ ﻻ ..
ﻋﻠﻴﺎ ﺷﺒﺤﺘﻠﻪ ﺑﻌﻴﻮﻧﻬﺎ ﺍﻟﺤﻠﻮﺓ ﺍﻟﻤﻠﻴﺎﻧﺎﺕ ﺩﻣﻮﻉ : ﺍﻧﻲ ﻧﺤﺒﻚ ... ﻣﺎﻳﻬﻮﻧﺶ ﻋﻠﻴﺎ ﺯﻋﻠﻚ .. ﻟﻮ ﺗﺒﻴﻨﻲ ﻧﻨﺰﻝ ﺗﻮﺍ ﻧﻌﺘﺬﺭ ﻣﻨﻬﺎ ﻭﻧﺒﻮﺱ ﻉ ﺭﺍﺳﻬﺎ ﻧﻨﺰﻝ .. ﻭﻟﻮ ﺭﻭﺣﺖ ﻧﻤﺸﻮﻟﻬﺎ ﺇﻥ ﺷﺎﺀ ﺍﻟﻠﻪ ﺗﻮﺍ ..
ﺍﻟﺤﺴﻦ ﺍﺑﺘﺴﻢ ﺑﺤﺐ ﻭﺧﺪﺍﻫﺎ ﻓﺤﻀﻨﻪ ... ﻭﻫﻲ ﺣﻄﺖ ﺍﻳﺪﻳﻬﺎ ﻭﺭﺍ ﻇﻬﺮﻩ ﻭﺷﺪﺕ ﻓﻴﻪ ﺑﻘﻮﺓ .. ﺩﻳﻤﺎ ﺍﺩﻳﺮ ﻓﻴﻬﺎ ﻟﻤﺎ ﺗﺤﻀﻨﻪ ﻭﻫﻲ ﻓﺤﺎﻟﻪ ﺿﻌﻒ .. ﻫﻮ ﺑﺎﻟﻨﺴﺒﻪ ﻟﻴﻬﺎ ﻗﻮﺗﻬﺎ ﻭﺃﻣﺎﻧﻬﺎ ﺍﻏﻠﻰ ﺷﻲ ﻋﻨﺪﻫﺎ .. ﻣﺎﺗﺒﻴﺶ ﺗﻔﻘﺪﻩ ﻭﻻﺑﺄﻱ ﺷﻜﻞ ﻣﺎﺗﺒﻴﺶ ﻳﺨﻠﻴﻬﺎ ﻭﻻﻳﺒﻌﺪ ﻋﻨﻬﺎ .. ﻫﻮ ﺭﻭﺣﻬﺎ .. ﻭﻣﺎﻓﻲ ﺣﺪ ﻳﻘﺪﺭ ﻳﻌﻴﺶ ﻣﻦ ﻏﻴﺮ ﺭﻭﺡ ..
ﺍﻟﺤﺴﻦ ﺑﻌﺪﻫﺎ ﻭﺷﺪ ﺍﻳﺪﻳﻬﺎ ﺑﻮﺟﻬﻪ : ﺍﻟﻮﺟﻪ ﺍﻟﺤﻠﻮ ﻫﺬﺍ ﻳﺎﺳﺮﻩ ﺣﺰﻥ ﻧﺒﻲ ﻧﺸﻮﻓﻚ ﺗﻀﺤﻜﻲ .. ﺗﺸﻴﻄﻨﻲ .. ﺗﻬﺒﻠﻲ .. ﺗﻌﺼﺒﻲ .. ﻟﻜﻦ ﺗﺒﻜﻲ ﻻ ... ﻗﺮﺑﻬﺎ ﻟﻴﻪ ﻭﺑﺎﺳﻬﺎ ﺑﻜﻞ ﺣﻨﺎﻥ ﺑﺶ ﺗﺮﺗﺎﺡ ﻭﺗﻬﺪﺍ ﻗﻌﺪﻭﺍ ﻫﻜﻲ ﻟﻴﻦ ﻫﻮ ﻭﺧﺮ .. ﺣﻂ ﺭﺍﺳﻪ ﻉ ﺭﺍﺳﻬﺎ ﻭﺍﻟﺰﻭﺯ ﻣﻐﻤﻀﻴﻦ ﻋﻴﻮﻧﻬﻢ .
ﻋﻠﻴﺎ : ﻧﺤﺒﻚ .. ﻣﻮﺕ ..
ﺍﻟﺤﺴﻦ : ﻧﻌﺸﻘﻚ .. ﻓﺘﺤﻮﺍ ﻋﻴﻮﻧﻬﻢ ﻭﻗﻌﺪﻭﺍ ﻳﺸﺒﺤﻮﺍ ﻟﺒﻌﺾ ..
ﺍﻟﺤﺴﻦ ﺑﺈﺑﺘﺴﺎﻣﻪ : ﻏﺪﻭﺓ ﻋﻨﺪﻙ ﻛﻠﻴﻪ ..
ﻋﻠﻴﺎ ﺑﻀﺤﻜﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺍﻟﺤﺴﻦ ﺭﻓﻊ ﺣﺎﺟﺒﻪ : ﻣﻌﻨﺎﻫﺎ ﺍﺭﻗﺪﻱ ﺗﻮﺍ ﺧﻴﺮﻟﻚ ..
ﻋﻠﻴﺎ : ﻫﻬﻬﻬﻬﻬﻬﻬﻬﻬﻪ
ﺍﻟﺤﺴﻦ ﺣﻀﻨﻬﺎ : ﺍﻳﻮﻩ ﻫﺬﺍ ﺍﻟﻠﻲ ﻧﺒﻴﻪ ﻫﺬﺍ ﺍﻟﻠﻲ ﻧﺒﻲ ﻧﺸﻮﻓﻪ ﻭﻧﺴﻤﻌﻪ .. ﺑﻌﺪﻫﺎ .. ﺗﻮﺍ ﻧﻮﺿﻲ ﺩﻭﺷﻲ ﺑﺶ ﺗﺴﺘﺮﺧﻲ ﻭﺍﺭﻗﺪﻱ .. ﺑﺎﺳﻬﺎ ﻉ ﺭﺍﺳﻬﺎ ﻭﻧﺎﺽ ...
ﻋﻠﻴﺎ : ﻭﻳﻦ ﻣﺎﺷﻲ ..
ﺍﻟﺤﺴﻦ ﺑﻨﻘﻌﺪ ﻓﻲ ﺍﻟﺼﺎﻟﻪ ﻋﻨﺪﻱ ﺧﺪﻣﻪ ..
ﻋﻠﻴﺎ : ﻣﺎﺗﺒﻲ ﻧﺪﻳﺮﻟﻚ ﺷﻲ ..
ﺍﻟﺤﺴﻦ ﻗﺮﺻﻬﺎ ﻣﻦ ﺧﺸﻤﻬﺎ : ﺍﺭﻗﺪﻱ ﻭﺍﺭﺗﺎﺣﻲ ﻫﺬﺍ ﺍﻟﻠﻲ ﻧﺒﻴﻪ ..
ﺍﺑﺘﺴﻤﺖ ﻋﻠﻴﺎ ﻭﻫﻮ ﺭﺩ ﺍﻹﺑﺘﺴﺎﻣﻪ ﻭﻃﻠﻊ .. ﻭﻫﻲ ﺣﻄﺖ ﺍﻳﺪﻫﺎ ﻉ ﻗﻠﺒﻬﺎ ﻭﺗﻨﻬﺪﺕ .. ﻭﻧﺎﺿﺖ ﺧﺸﺖ ﻟﻠﺤﻤﺎﻡ ...
***
ﺑﺎﻩ ﺍﻧﺖ ﻟﻤﺤﻠﻲ ﻋﻠﻴﻬﺎ ﺗﻠﻤﻴﺢ ..
ﺍﻟﻔﻬﺪ : ﻻ ﻣﺎﺗﺠﻴﺶ ﻣﻔﺎﺟﺄﺓ ﻟﻮ ﻗﻠﺖ ﻋﻠﻴﻬﺎ ﺣﺘﻰ ﻟﻮ ﺑﺘﻠﻤﻴﺢ ..
ﺟﻨﺎﻥ : ﺑﺎﻫﻲ ﻫﻲ ﺣﻠﻮﺓ ..
ﺍﻟﻔﻬﺪ ﺗﻨﻬﺪ : ﺇﻥ ﺷﺎﺀ ﺍﻟﻠﻪ ﺗﻜﻮﻥ ﺣﻠﻮﺓ ..
ﺟﻨﺎﻥ : ﺣﻴﺮﺗﻨﻲ .. ﺷﻦ ﺑﻴﺮﻗﺪﻧﻲ ﺗﻮﺍ ..
ﺍﻟﻔﻬﺪ ﺍﺑﺘﺴﻢ : ﺍﺭﻗﺪﻱ ﺗﻮﺍ .. ﻭﻏﺪﻭﺓ ﺑﺈﺫﻥ ﺍﻟﻠﻪ ﺣﺘﻌﺮﻓﻲ ..
ﺟﻨﺎﻥ : ﺗﻤﺎﻡ .. ﺗﺼﺒﺢ ﻉ ﺧﻴﺮ ..
ﺍﻟﻔﻬﺪ : ﻭﺍﻧﺘﻲ ﻣﻦ ﺍﻫﻠﻪ ..
ﺟﻨﺎﻥ : ﻣﺤﻤﺪ ...
ﺍﻟﻔﻬﺪ " ﺭﻭﺣﻪ :" ﻧﻌﻢ ..
ﺟﻨﺎﻥ ﺑﺈﺑﺘﺴﺎﻣﻪ : ﻧﺤﺒﻚ .... ﻭﺻﻜﺮﺕ ..
ﺍﻟﻔﻬﺪ ﺍﺑﺘﺴﻢ ﺑﺄﻟﻢ : ﻳﺎﺭﺏ ﻫﻮﻥ ﻋﻠﻴﺎ ﻓﺮﺍﻗﻬﺎ ﻟﻮ ﻛﺎﺗﺒﻬﻮﻟﻲ ..
***
ﺗﺎﻧﻲ ﻳﻮﻡ ..
ﻭﺗﺖ ﺣﺎﺟﺘﻬﺎ ﻭﻗﻌﺪﺕ ﺑﺲ ﺍﻟﻤﻼﻳﻪ ﺑﺶ ﺗﻠﺒﺴﻬﺎ .. ﺧﺪﺗﻬﺎ ﻭﻭﻗﻔﺖ ﻗﺪﺍﻡ ﺍﻟﻤﺮﺍﻳﻪ .. ﻫﻮ ﺟﻲ ﻭﺭﺍﻫﺎ ..
ﺣﺴﺎﻥ : ﺣﺒﻴﺒﺘﻲ ﺍﻟﻴﻮﻡ ﻣﺶ ﻋﺎﺟﺒﺘﻨﻲ ..
ﻫﺎﻟﻪ ﺍﺑﺘﺴﻤﺖ : ﻛﻴﻒ ﻗﺼﺪﻙ ﻣﺶ ﺣﻠﻮﺓ ..
ﺣﺴﺎﻥ ﺣﻀﻨﻬﺎ : ﺍﻧﺘﻲ ﺗﻌﺮﻓﻲ ﺍﻧﻚ ﺍﺣﻠﻰ ﺣﺎﺟﻪ ﺗﺸﻮﻓﻬﺎ ﻋﻴﻨﻲ ﺑﻜﻞ ﺣﺎﻻﺗﻚ ..
ﻫﺎﻟﻪ ﺑﻀﺤﻜﻪ : ﺣﺴﺎﻥ ﺑﻨﻤﺸﻲ ﻟﻠﻜﻠﻴﻪ ﺭﻩ ..
ﺣﺴﺎﻥ ﺑﻀﺤﻜﻪ : ﻭﺣﺘﻰ ﺍﻧﻲ ﻋﻨﺪﻱ ﺧﺪﻣﻪ .. ﺑﺎﺳﻬﺎ ﻣﻦ ﺧﺪﻫﺎ ﻭﻭﺧﺮ ﻭﻃﻠﻊ ﺣﺎﺟﻪ ﻭﻟﻔﻬﺎ ﻉ ﺭﻗﺒﺔ ﻫﺎﻟﻪ ..
ﻫﺎﻟﻪ ﺑﺈﻧﺒﻬﺎﺭ : ﺣﺴﺎﻥ ..
ﺣﺴﺎﻥ ﻭﻫﻮ ﻳﻠﺒﺲ ﻓﻲ ﺍﻟﺴﻠﺴﻠﻪ : ﺣﻠﻮﻩ ..
ﻫﺎﻟﻪ : ﻫﻠﺒﻪ ".. ﻛﺎﻧﺖ ﺳﻠﺴﻠﻪ ﺫﻫﺐ ﻓﻲ ﺗﻌﻠﻴﻘﻪ ﺑﺤﺮﻑ .."H
ﺣﺴﺎﻥ : ﺍﺣﺘﺮﺕ ﺍﻣﺲ ﻓﻜﺮﺗﻠﻚ ﻓﻲ ﺣﺎﺟﻪ ﻣﻤﻴﺰﺓ ﻭﻣﺎﻟﻘﻴﺘﺶ ﺧﻴﺮ ﻣﻦ ﻫﻜﻲ .. ﺣﺮﻓﻲ ﻭﺣﺮﻓﻚ ﻭﺍﺣﺪ ..
ﺷﺮﻳﻦ ﺗﻠﻴﻔﻮﻥ ﻫﺎﻟﻪ ﻛﺎﻧﺖ ﻋﻠﻴﺎ ..
ﻫﺎﻟﻪ : ﺣﻴﻲ ﻋﻄﻠﺖ .. ﻟﺒﺴﺖ ﻣﻼﻳﺘﻬﺎ ﺑﺴﺮﻋﻪ .. ﻭﺳﺎﻭﺗﻬﺎ ﻭﺣﺴﺎﻥ ﻳﺘﻔﺮﺝ ﻋﻠﻴﻬﺎ ﻭﻫﻮ ﻣﺒﺘﺴﻢ .. ﻛﻤﻠﺖ ﻭﺧﺪﺕ ﺷﻨﻄﺘﻬﺎ ﻭﻗﻌﺪﺕ ﺗﺸﺒﺤﻠﻪ ﺍﺑﺘﺴﻤﺖ ﻭﻗﺮﺑﺖ ﻣﻨﻪ ﺑﺎﺳﺘﻪ ﺑﺴﺮﻋﻪ ﻭﻃﻠﻌﺖ ﻃﻮﻝ ..
ﺍﻣﺎ ﻫﻮ ﻏﻤﺾ ﻋﻴﻮﻧﻪ ﻭﺍﺑﺘﺴﻢ ﻭﺣﻂ ﺍﻳﺪﻩ ﻉ ﺭﺍﺳﻪ ﻭﻗﻌﺪ ﻳﺸﻔﺸﻒ ﻓﻲ ﺷﻌﺮﻩ ﻭﻳﻀﺤﻚ ..
***
ﻓﻲ ﺍﻟﻤﺮﻛﺰ ..
ﻭﺻﻞ ﻓﻲ ﻣﻜﺘﺐ ﺍﻟﺘﺤﻘﻴﻖ ﻓﺘﺢ ﺍﻟﺒﺎﺏ ﻭﺧﺶ ﻭﻗﻌﻤﺰ ..
ﺍﻟﺤﺴﻦ : ﺷﻨﻮ ﻓﻜﺮﺕ ..
ﺷﺮﻭﺩﺓ : ﻛﻞ ﺍﻟﻠﻲ ﻧﻌﺮﻓﻪ ﺣﻨﻘﻮﻟﻪ ﻣﺎﻋﻨﺪﻱ ﺷﻲ ﻧﺪﺭﻗﻪ ﺯﻳﺎﺩﻩ ﻉ ﺍﻟﻠﻲ ﺑﻨﻘﻮﻟﻪ ..
ﺍﻟﺤﺴﻦ : ﻧﺴﻤﻊ ..
ﺷﺮﻭﺩﺓ : ﺍﻧﻲ ﺯﻱ ﻣﺎﺗﻌﺮﻑ ﻣﻦ ﺍﻟﺪﺍﺋﺮﺓ ﺍﻟﻤﻘﺮﺑﻪ ﻟﻠﺮﻭﺱ ﺍﻟﻜﺒﺎﺭ ..
ﻭﻧﻌﺮﻑ ﺑﻌﺾ ﺍﻟﺤﺎﺟﺎﺕ ... ﻋﻨﻬﻢ .. ﻳﻌﻨﻲ ﺍﻟﻜﻮﻣﺎﻧﺪﺍ ﺍﻟﻠﻲ ﻛﻠﻤﺘﻪ ﻣﺮﺓ ﻭﺣﺪﻩ ... ﻭﺍﻟﺬﺭﺍﻉ ﺍﻷﺳﻮﺩ ... ﻭﺭﺍﺱ ﺍﻟﻠﻔﻊ .. ﻭﺍﻟﺼﺒﺎﺡ ..
ﺍﻟﺤﺴﻦ ﺑﺘﺮﻛﻴﺰ : ﻗﺼﺪﻙ ﻫﺎﺩﻡ ﻣﻦ ﺍﻟﺪﺍﻳﺮﺓ ﺍﻟﻀﻴﻘﻪ ...
ﺍﻟﺸﺎﺭﺩ : ﺍﻳﻪ ﺑﺲ ﻣﺎﺷﻔﺘﻬﻤﺶ ﻭﻻ ﻣﺮﻩ .. ﻛﻠﻬﻢ ﺗﻌﺎﻣﻠﺖ ﻣﻌﺎﻫﻢ ﻉ ﻃﺮﻳﻖ ﺍﻟﻬﺎﺗﻒ .. ﺣﺘﻰ ﺍﺻﻮﺍﺗﻬﻢ ﻣﺶ ﻧﻔﺴﻬﺎ ..
ﺍﻟﺤﺴﻦ : ﻣﺴﺘﺨﺪﻣﻴﻦ ﺑﺮﻧﺎﻣﺞ ﺗﻐﻴﻴﺮ ﺻﻮﺕ ..
ﺍﻟﺸﺎﺭﺩ : ﺍﻳﻪ ... ﺑﺲ ﺍﻫﻤﻬﻢ ﻣﻦ ﺑﻌﺪ ﺍﻟﻜﻮﻣﺎﻧﺪﺍ ﺍﻟﻜﻮﺑﺮﺍ ...
ﺍﻟﺤﺴﻦ : ﺍﻹﺳﻢ ﻫﺬﺍ ﺳﻤﻌﺘﻪ ﻫﻠﺒﻪ ..
ﺍﻟﺸﺎﺭﺩ : ﻫﺬﺍ ﺍﻟﻌﻘﻞ ﺍﻟﻤﺪﺑﺮ ﻭﻫﻮ ﻓﺎﻟﻐﺎﻟﺐ ﺍﻟﻠﻲ ﻣﺎﺳﻜﻬﻢ ﻛﻠﻬﻢ ﺑﺮﻏﻢ ﺍﻧﻪ ﻛﻴﻒ ﻣﺎﻓﻬﻤﺖ ﺍﺻﻐﺮﻫﻢ ..
ﺍﻟﺤﺴﻦ : ﺷﺎﻳﻔﻪ ..
ﺍﻟﺸﺎﺭﺩ : ﻣﺶ ﺑﺎﻟﺰﺑﻂ .. ﻛﺎﻥ ﺩﻳﻤﺎ ﻣﻘﻨﻊ ﻭﺻﻮﺗﻪ ﻣﺶ ﻃﺒﻴﻌﻲ ..
ﺍﻟﺤﺴﻦ : ﺍﻟﻮﺣﻴﺪ ﺍﻟﻠﻲ ﻗﺎﺑﻠﺘﻮﻩ ..
ﺍﻟﺸﺎﺭﺩ ﻫﺰ ﺭﺍﺳﻪ ﺑﺈﻳﺠﺎﺏ ..
ﺍﻟﺤﺴﻦ ﻗﻌﺪ ﻳﻔﻜﺮ ..
ﺍﻟﺸﺎﺭﺩ : ﻫﺬﺍ ﺷﺨﺺ ﺧﺒﻴﺚ ﻷﺑﻌﺪ ﺣﺪ ﻭﻣﺎ ﻳﻌﺮﻓﺶ ﺍﻟﺮﺣﻤﻪ ﺑﻜﻞ ﻣﺴﺘﻐﺮﺏ ﻛﻴﻒ ﻣﺎﻭﺻﻠﺶ ﻓﻴﺎ ﻟﺘﻮﺍ ﻭﻧﻬﻲ ﺍﻣﺮﻱ ..
ﺍﻟﺤﺴﻦ : ﻣﺸﺪﺩﻳﻦ ﻋﻠﻴﻚ ﺍﻟﺤﺮﺍﺳﻪ ﻭﺍﻟﻠﻲ ﻳﺨﺶ ﻋﻠﻴﻚ ﻭﻳﻄﻠﻊ ﻧﺎﺱ ﺍﻧﻲ ﻣﺨﺘﺎﺭﻫﻢ ﺑﻌﻨﺎﻳﻪ .. ﺷﻦ ﺗﺎﻧﻲ ..
ﺍﻟﺸﺎﺭﺩ : ﻓﻲ ﻛﻤﻴﺔ ﺑﻀﺎﻋﻪ ﻛﺒﻴﺮﺓ ﺣﺘﺨﺶ ﺍﻟﺒﻼﺩ ﻳﻮﻡ 3\29 ﻭﻣﺶ ﻣﺨﺪﺭﺍﺕ ﺑﺲ ... ﺳﻼﺡ ...
ﺍﻟﺤﺴﻦ : ﻧﺸﺎﻁ ﺗﺠﺎﺭﺓ ﺍﻟﺴﻼﺡ ﺟﺪﻳﺪ ﻋﻠﻴﻜﻢ ...
ﺍﻟﺸﺎﺭﺩ : ﻣﺎﻩ ﺍﻟﻜﻮﺑﺮﺍ ﻗﺒﻞ ﻟﻴﻤﺴﻚ .. ﻛﺎﻥ ﻳﺘﺎﺟﺮ ﻓﻲ ﺍﻟﺴﻼﺡ .. ﻣﻦ ﻗﺒﻞ ﺍﻟﺤﺮﺏ ﻟﻶﻥ ..
ﺍﻟﺤﺴﻦ : ﻛﻞ ﺍﻟﻠﻲ ﻗﻠﺘﻪ ﺧﻄﻴﺮ ﻫﻠﺒﻪ .. ﺑﺎﻩ ﺍﻟﺒﻲ ﻋﺒﺪﺍﻟﻘﺪﻭﺱ ..
ﺍﻟﺸﺎﺭﺩ : ﻫﺬﺍ ﻣﻦ ﺍﻫﻢ ﺭﺟﺎﻝ ﺍﻷﻋﻤﺎﻝ ﺍﻟﻠﻲ ﻣﻌﺘﻤﺪﻳﻦ ﻋﻠﻴﻬﻢ ﻓﻐﺴﻴﻞ ﺍﻷﻣﻮﺍﻝ ﻣﺘﺎﻋﻬﻢ ..
ﺍﻟﺤﺴﻦ : ﻳﻌﻨﻲ ﻫﻤﺎ ﺑﺮﺍ ﻋﻨﺪﻫﻢ ﺷﻲ ..
ﺍﻟﺸﺎﺭﺩ : ﺷﺮﻛﺎﺕ ﻭﻣﺸﺎﺭﻳﻊ ﻛﺒﻴﺮﻩ .. ﻣﻠﻜﻴﻨﻬﺎ ﻟﻨﺎﺱ ﺗﺎﻧﻴﻪ ﻣﺠﺮﺩ ﺻﻮﺭﺓ .. ﻛﻞ ﺷﻲ ﻋﻨﺪ ﺍﻟﺒﻲ ﻭﻋﺜﻤﺎﻥ ..
ﺍﻟﺤﺴﻦ : ﺍﻣﻤﻢ .... ﻭﻣﻨﺼﻒ ..
ﺍﻟﺸﺎﺭﺩ : ﺍﻟﺸﻴﻄﺎﻥ ﻫﺬﺍ ﺍﻭﺳﺦ ﻣﺤﺎﻣﻲ ﻣﻤﻜﻦ ﺗﺸﻮﻓﻪ ﻣﺎﺳﻚ ﻛﻞ ﺷﻲ ﻗﺎﻧﻮﻧﻲ ﻳﺨﺼﻬﻢ ...
ﺍﻟﺤﺴﻦ : ﻣﻨﺬﺭ ..
ﺍﻟﺸﺎﺭﺩ : ﻫﺬﺍ ﻣﻬﻢ ﻋﻨﺪﻫﻢ ﻹﻧﻪ ﻓﺨﻼﻝ ﻓﺘﺮﻩ ﻗﺼﻴﺮﺓ ﺟﺎﺑﻠﻬﻢ ﺻﻔﻘﺎﺕ ﻛﺒﻴﺮﻩ ﺩﻣﺎﻏﻪ ﻣﻠﻴﺢ ..
ﺍﻟﺤﺴﻦ : ﻋﻨﺪﻙ ﺷﻲ ﺗﺎﻧﻲ ...
ﺍﻟﺸﺎﺭﺩ : ﺍﻧﺖ ... ﺍﻧﺖ ﺷﻮﻛﻪ ﻓﻲ ﺣﻠﻮﻗﻬﻢ .. ﻣﺎﻳﺒﻮﺵ ﻳﻘﺘﻠﻮﻙ .. ﻟﻜﻦ ﺍﻟﻜﻮﺑﺮﺍ ﻧﺎﻭﻳﻠﻚ ﻉ ﺷﻲ ﺍﻛﺒﺮ ..
ﺍﻟﺤﺴﻦ ﺍﺑﺘﺴﻢ ﺑﺘﻬﻜﻢ : ﺯﻱ ..
ﺍﻟﺸﺎﺭﺩ : ﺑﺎﻟﺰﺑﻂ ﻣﺎﻧﻌﺮﻓﺶ .. ﺑﺲ ﻫﻮ ﺍﻟﻮﺣﻴﺪ ﺑﻴﻨﺎﺗﻬﻢ ﺍﻟﻠﻲ ﺭﺍﻓﺾ ﻣﻮﺗﻚ ... ﻭﻳﻘﻮﻝ ﺍﻟﺤﺴﻦ ﺍﻟﻤﻮﺕ ﺑﺎﻟﻨﺴﺒﻪ ﻟﻴﻪ ﺟﺎﺋﺰﺓ ﻭﻟﻐﻴﺮﻩ ﻣﻦ ﺯﻣﻼﺋﻪ ﺗﺤﻔﻴﺰ ...
ﺍﻟﺤﺴﻦ ﻗﻌﺪ ﻳﻔﻜﺮ ﻓﻲ ﺍﻟﻜﻼﻡ ﻭﻛﺄﻥ ﺍﻟﻜﻮﺑﺮﺍ ﻳﻌﺮﻓﻪ ﻋﻦ ﻗﺮﺏ ..
ﺗﺸﻮﺵ ﻓﻲ ﻫﺪﻳﻜﺎ ﺍﻟﻠﺤﻈﻪ ﺷﻮﻳﻪ ﺑﺲ ﺑﻌﺪﻳﻦ ﻃﺮﺩ ﻫﺎﻟﻔﻜﺮﻩ ﻣﻦ ﺭﺍﺳﻪ ﻭﻗﺎﻝ : ﻋﻨﺪﻙ ﺷﻲ ﻏﻴﺮﻩ ..
ﺍﻟﺸﺎﺭﺩ : ﺯﻳﺎﺩﻩ ﺣﺮﻑ ﻋﻦ ﻫﻜﻲ ﻣﺎﻋﻨﺪﻳﺶ ..
ﺍﻟﺤﺴﻦ ﻧﺎﺽ ﻭﺑﻴﻄﻠﻊ ..
ﺍﻟﺸﺎﺭﺩ ﺑﺘﻬﻜﻢ : ﻣﺎﻓﻴﺶ ﺷﻜﺮﺍ ﺻﺤﻴﺖ ..
ﺍﻟﺤﺴﻦ : ﻓﻲ ﺣﺒﻞ ﺣﻴﻨﻠﻒ ﻉ ﺭﻗﺒﺘﻚ ﺧﻼﻝ ﺍﻷﻳﺎﻡ ﺍﻟﺠﺎﻳﻪ .. ﻭﻓﺘﺢ ﺍﻟﺒﺎﺏ ﻭﻃﻠﻊ ..
ﺍﻟﺸﺎﺭﺩ ﺍﺑﺘﺴﻢ ﺑﺘﻬﻜﻢ " ﺧﻠﻴﻚ ﺩﺍﻳﺦ ﺯﻱ ﻣﺎﺩﻭﺧﺘﻨﺎ "
....
ﺟﺎﺩ ﺍﻟﻠﻪ : ﺭﺩ ﺑﺎﻟﻚ ﻣﺶ ﻛﻞ ﺷﻲ ﻗﺎﻟﻪ ﻣﻤﻜﻦ ﻳﻜﻮﻥ ﺻﺢ ..
ﺍﻟﺤﺴﻦ : ﺣﺘﻰ ﺍﻧﻲ ﻓﻜﺮﺕ ﻫﻜﻲ .. ﺗﻮﺍ ﺑﻨﺮﻛﺰ ﻣﻊ ﻋﺒﺪﺍﻟﻘﺪﻭﺱ .
ﺟﺎﺩ ﺍﻟﻠﻪ : ﻋﺮﺱ ﺑﻨﺘﻪ ﻗﺮﺏ ..
ﺍﻟﺤﺴﻦ : ﺃﺧﺮ ﺍﻷﺳﺒﻮﻉ ...
***
ﺍﻟﺴﺎﻋﻪ 11:30
ﻃﻖ ﺑﺎﺏ ﺍﻟﻔﺼﻞ ...
: ﻣﻌﻠﻴﺸﻲ ﻳﺎﺃﺑﻠﻪ ﻭﻳﻦ ﺍﻟﻄﺎﻟﺒﻪ ﺍﻣﻴﺮﺓ ﺍﻟﺤﺎﻓﻆ ..
ﺍﻣﻴﺮﺓ ﺑﺈﺳﺘﻐﺮﺍﺏ ﻗﺎﻣﺖ ﺍﻳﺪﻫﺎ : ﺃﻧﻲ ..
: ﻭﻟﻲ ﺍﻣﺮﻙ ﻟﻮﻃﺎ ﺧﻮﺩﻱ ﺷﻨﻄﺘﻚ ﻭﺍﻧﺰﻟﻲ ..
ﺍﻣﻴﺮﺓ ﻭﻫﻲ ﺑﺘﻤﻮﺕ ﺑﺎﻟﺨﻮﻑ ﺧﺪﺕ ﺷﻨﻄﺘﻬﺎ ﻭﻃﻠﻌﺖ ﻣﻦ ﺍﻟﻔﺼﻞ ﻧﺰﻟﺖ ﻟﻮﻃﺎ ﻭﻫﻲ ﺗﻔﻜﺮ ﻓﻲ ﺍﻣﻬﺎ ﺑﺲ ﻭﻗﺮﻳﺐ ﺗﺒﻜﻲ .. ﻟﻴﻦ ﻭﺻﻠﺖ ﻟﻮﻃﺎ .. ﻗﻌﺪﺕ ﺍﺩﻭﺭ ..
ﺍﻣﻴﺮﺓ : ﻭﻳﻨﻬﻢ ﻳﺎﺃﺑﻠﻪ ..
ﺍﻷﺑﻠﻪ : ﺧﻮﻙ ﻳﺮﺍﺟﻲ ﻓﻴﻚ ﺑﺮﺍ ..
ﺍﻣﻴﺮﺓ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻃﻠﻌﺖ ﻣﻦ ﺍﻟﻤﺪﺭﺳﻪ ﻗﻌﺪﺕ ﺍﺩﻭﺭ ﻉ ﺳﻴﺎﺭﺓ ﻣﺼﻌﺐ ﻣﻬﻨﺎﺵ ... ﻓﺠﺄﻩ ﺧﻄﻤﺖ ﻗﺪﺍﻣﻬﺎ ﻣﻮﻃﻮ ﻓﻴﻬﺎ ﻭﺍﺣﺪ ﻻﺑﺲ ﺍﺳﻮﺩ .. ﺳﺮﻭﺍﻝ ﻭﺟﺎﻛﺎ ﺟﻠﺪ ﺳﻮﺩﺍ ﻭﻻﺑﺲ ﺧﻮﺩﺍ .. ﻭﻗﻒ ﻭﺣﻮﻝ ﺍﻟﺨﻮﺩﺓ ..
ﺍﻣﻴﺮﺓ ﺣﻄﺖ ﺍﻳﺪﻳﻬﺎ ﻉ ﻓﻤﻬﺎ ﺑﺪﻫﺸﻪ : ﺷﻨﻮ .. ﺍﻧﺖ ..
ﺳﺮﻣﺪ : ﻫﻴﺎ ﺗﻌﺎﻟﻲ ..
ﺍﻣﻴﺮﺓ ﺷﺒﺤﺘﻠﻪ ﺑﺨﻮﻑ ..
ﺳﺮﻣﺪ : ﻣﺎﺗﺨﺎﻓﻴﺶ ﺳﺎﻋﻪ ﻭﻧﺮﺩﻙ ..
ﺍﻣﻴﺮﺓ ﻣﺎﺑﺘﺶ ﺗﺘﺤﺮﻙ ..
ﺳﺮﻣﺪ ﺑﻀﺤﻜﻪ : ﺷﻜﻠﻚ ﻧﺴﻴﺘﻲ ﻣﻦ ﻧﻜﻮﻥ ..
ﺍﻣﻴﺮﺓ : ﻻﻣﺬﻛﺮﺓ ﺑﺲ ﺍﻧﺖ ﻏﺮﻳﺐ ﺍﻃﻮﺍﺭ ﺍﻟﺤﻖ ..
ﺳﺮﻣﺪ : ﻫﻬﻬﻬﻬﻬﻬﻬﻬﻪ ... ﺗﻌﺎﻟﻲ ﺍﺭﻛﺒﻲ ﻭﺭﺍﻱ ﺣﻨﻌﻴﺸﻚ ﺳﺎﻋﻪ ﻣﺶ ﺣﺘﻨﺴﻴﻬﺎ ﻋﻤﺮﻙ ﻛﻠﻪ .. ﺍﺑﺘﺴﻤﻠﻬﺎ ﺍﺑﺘﺴﺎﻣﻪ ﺳﺤﺮﺗﻬﺎ .. ﻫﻴﺎ ﺍﻣﻴﺮﺓ .. ﺍﻃﻤﻨﻲ ﺍﻧﺘﻲ ﺍﻟﺸﻲ ﺍﻟﻮﺣﻴﺪ ﺍﻟﻠﻲ ﻧﺨﺎﻑ ﻋﻠﻴﻪ ﻓﻲ ﻫﺎﻟﺪﻧﻴﺎ ﺣﺘﻰ ﻣﻦ ﻧﻔﺴﻲ ..
ﺍﻣﻴﺮﺓ ﺷﺒﺤﺘﻠﻪ ﻫﻠﺒﻪ ﻭﺍﺑﺘﺴﻤﺖ .. ﻭﻃﻮﻝ ﻣﺸﺘﻠﻪ ﻭﻟﺒﺴﺖ ﺧﻮﺩﺓ ﺭﻛﺒﺖ ﻭﺭﺍﻩ ..
ﺳﺮﻣﺪ : ﺷﺪﻱ ﻓﻴﺎ ﻛﻮﻳﺲ .
ﺍﻣﻴﺮﺓ ﺑﻀﺤﻜﻪ ﺷﺪﺕ ﻓﻴﻪ : ﻫﻜﻲ ﺑﺎﻫﻲ ..
ﺳﺮﻣﺪﺑﻀﺤﻜﻪ : ﻣﻠﻴﺢ ﺑﻜﻞ ... ﻭﺍﻧﻄﻠﻖ ﺑﻴﻬﺎ ﻃﻮﻝ ... ﺍﺩﻫﻮﺭ ﺑﻴﻬﺎ ﻓﻲ ﺷﻮﺍﺭﻉ ﻃﺮﺍﺑﻠﺲ ﻭﻫﻲ ﻛﺎﻧﺖ ﻣﺴﺘﻤﺘﻌﻪ ﻉ ﺍﻵﺧﺮ .. ﻟﻴﻦ ﻭﺻﻠﻮﺍ ﻓﻲ ﻣﻜﺎﻥ ﻣﺴﺘﺨﻄﻲ .. ﻭﻗﻒ ﻧﺰﻟﺖ ﻫﻴﺎ ﺑﻌﺪﻳﻦ ﻧﺰﻝ ..
ﻗﺮﺏ ﻗﺎﻣﻬﺎ ﻭﺣﻄﻬﺎ ﻉ ﺍﻟﻤﻮﻃﻮ ﻭﻫﻲ ﻣﺼﺪﻭﻣﻪ ﻭﻣﺘﺤﺸﻤﻪ ﻭﻗﻒ ﺑﺤﺪﺍﻫﺎ ﻭﻫﻮ ﻳﻀﺤﻚ ..
ﺳﺮﻣﺪ ﺑﻀﺤﻜﻪ : ﺍﻧﻲ ﺟﺮﻱﺀ ﺷﻮﻱ ﻋﺎﺭﻑ ..
ﺍﻣﻴﺮﺓ ﻭﺟﻬﻬﺎ ﺍﺣﻤﺮ : ﻫﻠﻠﻠﺒﻪ ﻣﺶ ﺷﻮﻳﻪ .
ﺳﺮﻣﺪ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻪ ...
ﺍﻣﻴﺮﺓ : ﻋﻼﺵ ﺧﺪﻳﺘﻨﻲ ﻣﻦ ﺍﻟﻤﺪﺭﺳﻪ ﻭﻛﻴﻒ ﺍﻗﻨﻌﺘﻬﻢ ﺍﻧﻚ ﺧﻮﻱ ..
ﺳﺮﻣﺪ ﺑﺂﺑﺘﺴﺎﻣﻪ : ﻋﻨﺪﻱ ﺃﺳﺎﻟﻴﺒﻲ ﺍﻟﺨﺎﺻﻪ ..
ﺍﻣﻴﺮﻩ ﺭﻛﺰﺕ ﺑﻌﻴﻮﻧﻬﺎ ﻉ ﺍﻳﺪﻳﻪ ﻣﺎﻟﻘﺘﺶ ﺍﻟﺨﺎﺗﻢ ..
ﺳﺮﻣﺪ : ﻣﺎﺑﺘﺶ ﻧﻠﺒﺴﻪ ﺍﻟﻴﻮﻡ ﺣﺴﻴﺘﻪ ﺧﻮﻓﻚ ..
ﺍﻣﻴﺮﻩ : ﻻ ﻣﺎﺧﻮﻓﻨﻴﺶ ﺍﺛﺎﺭ ﻓﻀﻮﻟﻲ ﺑﺲ ..
ﺳﺮﻣﺪ ﺑﻀﺤﻜﻪ : ﻓﻲ ﺍﻟﻔﻀﻮﻝ ﺍﻧﻲ ﻧﺸﻬﺪﻟﻚ ..
ﺿﺤﻜﺖ ﺍﻣﻴﺮﻩ ﺑﺨﺠﻞ ..
ﺳﺮﻣﺪ ﻗﻌﺪ ﻳﺸﺒﺤﻠﻬﺎ : ﺍﻣﻴﺮﺓ ..
ﺷﺒﺤﺘﻠﻪ : ﺍﻣﻤﻢ ..
ﺳﺮﻣﺪ : ﺍﻧﺘﻲ ﺍﺣﻠﻰ ﺣﺎﺟﻪ ﻧﺸﻮﻓﻬﺎ ﻣﻦ ﺍﻭﻝ ﻣﺮﺓ ﺟﺖ ﻓﻴﻬﺎ ﻋﻴﻨﻲ ﻋﻠﻴﻚ ﻭﺍﻧﺘﻲ ﺷﺎﻏﻠﺘﻴﻨﻲ .. ﺑﺲ ﺑﻌﺪﺕ ﻃﻴﻔﻚ ﻋﻦ ﻋﻘﻠﻲ ﻉ ﻗﺪ ﻣﺎﻧﻘﺪﺭ ﻭﺍﺻﺮ ﺍﻟﻘﺪﺭ ﻳﺠﻴﺒﻚ ﻓﻲ ﻃﺮﻳﻘﻲ ..
ﺍﻣﻴﺮﺓ ﻭﻃﺖ ﻋﻴﻮﻧﻬﺎ ﻟﻮﻃﺎ ..
ﺳﺮﻣﺪ : ﺍﻣﻴﺮﻩ ﻗﻴﻤﻲ ﺭﺍﺳﻚ ..
ﺍﻣﻴﺮﺓ ﺷﺒﺤﺘﻠﻪ ..
ﺳﺮﻣﺪ : ﺍﻧﻲ ﻓﻲ ﻧﺎﺱ ﺗﻬﺪﺩ ﻓﻴﺎ ﻭﻣﻼﺣﻘﺘﻨﻲ ﺣﺎﻭﻟﺖ ﻉ ﻗﺪ ﻣﺎﻧﻘﺪﺭ ﻧﺘﺤﺎﺷﻬﻢ .. ﻗﺎﺑﻠﺖ ﺣﺘﻰ ﻧﺎﺱ ﻣﻨﻬﻢ ﻭﻃﺒﻌﺎ ﻫﻤﺎ ﺍﻟﻠﻲ ﺭﺗﺒﻮﺍ ﻟﻬﺎﻟﻤﻘﺎﺑﻼﺕ ..
ﺍﻣﻴﺮﺓ ﺗﺸﺒﺤﻠﻪ ﺑﺄﺳﺘﻐﺮﺍﺏ ﻭﺧﻮﻑ ..
ﺳﺮﻣﺪ : ﺑﺲ ﻫﺎﻟﻤﺮﺓ ﻉ ﺍﻟﻐﺎﻟﺐ ﻣﺶ ﻧﺎﻭﻳﻴﻦ ﻉ ﺧﻴﺮ .. ﻟﺬﻟﻚ .. ﺍﻣﻴﺮﻩ ﻟﻮ ﺻﺎﺭﺕ ﻓﻴﺎ ﺣﺎﺟﻪ .. ﻧﺒﻴﻚ ﺗﻘﻮﻟﻲ ﻷﺧﺘﻚ .. ﺗﻘﻨﻊ ﺍﻟﺤﺴﻦ ﻳﺴﻴﺐ ﺧﺪﻣﺘﻪ ﻷﻧﻬﻢ ﺣﻴﻀﻴﻌﻮﻩ ..
ﺍﻣﻴﺮﺓ ﻧﺰﻟﺖ ﻣﻦ ﺍﻟﻤﻮﻃﻮ ﻭﺟﺖ ﻗﺪﺍﻣﻪ : ﺍﻧﺖ ﺷﻦ ﺗﻘﻮﻝ ..
ﺳﺮﻣﺪ : ﺍﻣﻴﺮﻩ .. ﺍﻧﺘﻲ ﺻﻐﻴﺮﻩ ﺻﺢ ﺑﺲ ﻭﺍﺿﺢ ﺍﻧﻚ ﻗﻮﻳﻪ ﻭﻗﺪ ﺍﻟﻠﻲ ﻗﺘﻠﻚ ﻋﻠﻴﻪ ..
ﺍﻣﻴﺮﺓ ﺑﺨﻮﻑ ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ : ﻋﻼﺵ ﺷﻨﻮ ﻳﺒﻮﺍ ﻣﻨﻚ ..
ﺳﺮﻣﺪ ﺑﺈﺑﺘﺴﺎﻣﻪ ﺃﻟﻢ : ﻳﺒﻮﺍ ﻣﻨﻲ ﻧﺨﻮﻥ ﻭﻟﺪ ﺧﻮﻱ .. ﻭﺍﻧﻲ ﻭﻭﺍﻟﻠﻪ ﻣﺎﺣﻨﺨﻮﻧﻪ ﻭﻻﺣﻨﺪﻳﺮﻫﺎ ..
ﺍﻣﻴﺮﻩ ﺑﺼﺪﻣﻪ : ﺑﺎﻩ ﻋﻼﺵ ﻣﺶ ﺍﻧﺖ ﺍﻟﻠﻲ ﺗﻘﻮﻟﻪ ..
ﺳﺮﻣﺪ : ﻻﻧﻲ ﺩﺭﻗﺖ ﻋﻠﻴﻪ ﺍﻧﻲ ﻗﺎﺑﻠﺘﻬﻢ ﻭﺍﻟﺤﺴﻦ ﻟﻮ ﻋﺮﻑ ﺣﻴﺰﻋﻞ ﻫﻠﺒﻪ ﻭﺯﻋﻠﻪ ﺍﻟﻠﻪ ﻻﻳﻮﺭﻳﻚ ..
ﺍﻣﻴﺮﺓ ﺗﺸﺒﺤﻠﻪ ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ..
ﺳﺮﻣﺪ : ﺍﻣﻴﺮﻩ ﻧﻌﺒﺎ ﻋﻠﻴﻚ ..
ﺍﻣﻴﺮﺓ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻧﺰﻟﺖ ﻣﻨﻬﺎ ﺩﻣﻌﻪ ..
ﻣﺴﺤﻬﺎ ﺳﺮﻣﺪ ﺑﻄﺮﻑ ﺻﺒﻌﻪ .. ﻭﻟﺒﺴﻬﺎ ﺍﻟﺨﻮﺩﻩ ﻭﻫﻲ ﺗﺸﺒﺤﻠﻪ ﻭﻟﺒﺴﻬﺎ ﻫﻮ ﻭﺭﻛﺐ ﻭﺭﻛﺒﺖ ﻭﺭﺍﻫﺎ ﻭﺗﻮﺟﻪ ﺑﻴﻬﺎ ﻟﻠﺤﻮﺵ ﺣﻄﻬﺎ ﺑﻌﻴﺪ ﻋﻦ ﺷﺎﺭﻋﻬﻢ ﻫﻲ ﻧﺰﻟﺖ ﻭﺣﻮﻟﺖ ﺍﻟﺨﻮﺩﺓ ﻋﻄﺎﺗﻬﺎﻟﻪ ﻭﻣﺸﺖ ﻭﻫﻲ ﺑﺘﻤﻮﺕ ﻣﻦ ﺍﻟﺨﻮﻑ ﻋﻠﻴﻪ ﻭﻉ ﺭﺍﺟﻞ ﺍﺧﺘﻬﺎ ﻭﺍﺧﺘﻬﺎ .. ﺍﻟﺘﻔﺘﺖ ﻣﺎﻟﻘﺘﺎﺵ ﺭﺟﻌﺖ ﺗﺸﺒﺢ ﺍﻟﻘﺪﺍﻡ ﻭﻛﻤﻠﺖ ﻃﺮﻳﻘﻬﺎ ﻭﻫﻲ ﻣﺤﺘﺎﺭﺓ ﻭﺧﺎﻳﻔﻪ ..
ﻣﺮﺕ ﺍﻟﺴﺎﻋﺎﺕ ﻭﺭﺍ ﺑﻌﺾ ﻟﻴﻦ ﺟﺖ ﺍﻟﺴﺎﻋﻪ 8:30 ..
ﺍﻟﻜﻞ ﻣﻘﻌﻤﺰ ﻳﺴﺘﻨﻰ ﺣﻠﻘﻪ ﺳﺮﻣﺪ ﺑﺲ ﻣﺎﺟﺎﺵ ﺍﻟﺒﺮﻧﺎﻣﺞ ﻓﺎﺗﺖ ﺭﺑﻊ ﺳﺎﻋﻪ ﻧﺺ ﺳﺎﻋﻪ .. ﻣﺎﺟﺎﺵ .. ﻟﻴﻦ ﻃﻠﻌﺖ ﺍﻟﻘﻨﺎﻩ ﺷﺮﻳﻂ ﻉ ﺷﺎﺷﺘﻬﺎ ﻳﻌﺘﺬﺭﻭﺍ ﻓﻴﻪ ﻋﻦ ﺑﺚ ﺣﻠﻘﺔ ﺍﻟﻴﻮﻡ ..
ﻛﻠﻬﻢ ﻣﺎﺗﻮﺍ ﻣﻦ ﺧﻮﻓﻬﻢ .. ﻭﺍﻟﺤﺴﻦ ﻃﻮﻝ ﺍﺗﺼﻞ ﺑﻴﻪ ﻋﻄﺎﻩ ﻣﻘﻔﻞ .. ﺧﺎﻑ ﻫﻠﺒﻪ .. ﺷﻮﻳﻪ ﻭﺍﺗﺼﻞ ﺑﻴﻪ ﺍﻟﻔﻬﺪ .. ﺭﺩ
ﺍﻟﺤﺴﻦ : ﻫﺎﻩ ﻣﺤﻤﺪ ..
ﺍﻟﻔﻬﺪ : ﻛﻴﻒ ﺻﺎﺭ ﻭﻳﻦ ﺳﺮﻣﺪ ﺍﺳﺘﻨﻴﺖ ﻫﻠﺒﻪ ﻧﺨﺶ ﻣﺪﺍﺧﻠﻪ ﻗﺎﻟﻮﺍ ﻣﺎﺻﺎﺭﺵ ﻣﻦ ﺍﻟﺤﻠﻘﻪ ﻭﻫﻮ ﻣﺎﺟﺎﺵ ﻟﻺﺫﺍﻋﻪ ..
ﺍﻟﺤﺴﻦ ﺳﻜﺖ ﻏﻤﺾ ﻋﻴﻮﻧﻪ ﺑﺸﺪﻩ ﻭﻓﺘﺤﻬﻢ : ﺳﻜﺮ ﻳﺎﻣﺤﻤﺪ ..
ﺳﻜﺮ ﺍﻟﻔﻬﺪ .. ﻭﺍﻟﺤﺴﻦ ﺣﻂ ﺍﻳﺪﻩ ﻉ ﺭﺍﺳﻪ ﻭﻣﺶ ﻋﺎﺭﻑ ﺷﻦ ﺑﻴﺪﻳﺮ .. ﻟﻴﻦ ﺟﺎﻩ ﺍﺗﺼﺎﻝ ﻛﺎﻥ ﻣﻦ ﺭﻗﻢ ﺧﺎﺹ .. ﻣﻜﺎﻟﻤﺔ ﻓﻴﺪﻳﻮ .. ﻓﺘﺢ .. ﺍﻧﺼﺪﻡ ﺑﺎﻟﻠﻲ ﺷﺎﻓﻪ .. ﺳﺮﻣﺪ ﻣﻀﺮﻭﺏ ﺑﻌﻨﻒ ﺷﺪﻳﺪ ﻟﻤﺎ ﺑﻌﺪﺕ ﺍﻟﻜﺎﻣﻴﺮﺍ .. ﺍﻧﺼﺪﻡ ﺍﻛﺜﺮ .. ﻛﺎﻥ ﻣﻌﻠﻖ ﻓﻲ ﺭﺍﻓﻌﻪ ﺍﻳﻠﻪ ﻟﻠﺴﻘﻮﻁ ﻭﻉ ﺍﻷﻏﻠﺐ ﺣﻄﻴﺢ ﺧﻼﻝ ﺳﺎﻋﺎﺕ .. ﺻﻜﺮﻭﺍ ﺍﻟﻤﻜﺎﻟﻤﻪ ...
ﺍﻟﺤﺴﻦ ﻣﺶ ﻣﺼﺪﻕ ﺗﺸﺘﺖ ﻫﻠﺒﻪ .. ﻟﻴﻦ ﺟﺎﺗﻪ ﺭﺳﺎﻟﻪ
( ﺍﻧﺖ ﺍﻟﻠﻲ ﺍﺟﺒﺮﺗﻨﻲ .. ﻭﻫﺎﺩﻱ ﺍﻟﺒﺪﺍﻳﻪ ﻳﺎ ﺍﻓﻨﺪﻳﻨﺎ .. ﺗﻌﺎﻟﻰ ﺧﻮﺩ ﻋﻤﻚ ﻣﻦ **** ﺑﺲ ﺗﻌﺎﻝ ﺑﺴﺮﻋﻪ ﻳﺎﺗﻠﺤﻖ ﻳﺎﻣﺎﺗﻠﺤﻘﺶ ) ...
ﺍﻟﺤﺴﻦ ﻣﻦ ﻏﻀﺒﻪ ﺿﺮﺏ ﻣﺮﺵ ﺳﻴﺎﺭﺗﻪ ﺑﻴﺪﻩ ﻛﺴﺮﻩ .. ﻭﻗﻌﺪ ﻳﺘﻨﻔﺲ ﺑﺼﻌﻮﺑﻪ .. ﺑﻌﺪﻳﻦ ﺍﺗﺼﻞ .. ﺑﺮﻗﻢ ﺭﺩ ﻋﻠﻴﻪ ..
ﺍﻟﺤﺴﻦ : ﻛﻠﻢ ﺟﻤﺎﻋﺔ ﺍﻟﺪﻓﺎﻉ ﺍﻟﻤﺪﻧﻲ .. ﻭﺟﻴﺐ ﻭﺣﺪﻩ ﻣﻦ ﺍﻟﻔﺮﻉ ﻭﺗﻌﺎﻟﻮﺍ ﻝ ******* ﻭﻳﻦ ﻣﺎﻓﻲ ﺍﻟﺮﺍﻓﻌﻪ ﺍﻟﻤﺎﻳﻠﻪ .. ﻭﺻﻜﺮ ...
ﻭﺑﺴﺮﻋﻪ ﺭﻛﺐ ﺳﻴﺎﺭﺗﻪ ﻭﺍﻧﻄﻠﻖ ﺑﻴﻬﺎ ﺑﺄﻗﺼﻰ ﺳﺮﻋﻪ ﻣﺘﺠﺎﻫﻞ ﻓﻴﻬﺎ ﺍﻳﺪﻩ ﺍﻟﻠﻲ ﺗﻨﺰﻑ .. ﻳﻔﻜﺮ ﺑﺲ ﻓﻲ ﻋﻤﻪ ﻭﻳﻔﻜﺮ ﻓﻲ ﺍﻟﻤﻐﺰﻯ ﻣﻦ ﺍﻟﻠﻲ ﺩﺍﺭﻭﻩ ﻉ ﺷﻦ ﻧﺎﻭﻳﻴﻦ .. ﺍﻟﺤﺴﻦ ﻛﺎﻥ ﻣﺸﺘﺖ ﺗﻤﺎﻣﺎ ﻭﻣﺶ ﻋﺎﺭﻑ ﺷﻦ ﻻﺯﻡ ﻳﺪﻳﺮ .. ﻛﻞ ﻫﻤﻪ ﻳﻨﻘﺬ ﻋﻤﻪ ﻭﺑﺲ ...
... ﻳﺘﺒﻊ
