#الحسن
#جمان_فريد
الجزء 34
بعد المغرب..
فاق وهو يشم في ريحة عطرها فتح عيونه زين شافها اذكر هو وين راقد ..ابتسم..بس في نفس الوقت اضايق اكيد وضعها هذا تعبها بالشويه ناض ونزل رجليه وقعمز كويس قرب منها وهو يتامل في ملامحها الراقده💖تنهد ..
الحسن: عليا ...عليا..عليا..حط ايده ع خدها وقعد يمشي عليه...عليا ..
عليا فاقت لما شافته انخلعت: خيرك..تحس ف حاجه!!
الحسن ابتسم : لالا مافيا شي..نبيك تنوضي ترتاحي داخل..
عليا شبحتله ودارت بعيونها في المكان بعدين قعدت تتكسل
وهو كالعاده بيهبل عليها وع حركاتها💓
عليا : اممم..الساعه كم..
الحسن شبح للساعه فوق: 7ونص..
عليا بخلعه: الصبح!!!!!!
الحسن بضحكه: ياودي بعد المغرب..
ضحكت عليا : مازااااال وقت ع النوم..انت تبي ترقد..
الحسن : لا بننزل لوطا...
عليا : باه...
الحسن بينوض توجع شوي بس أخفى ألمه: بتقعدي هني..
عليا: لالا حتى اني بننزل...
الحسن: باه نوضي ...
عليا : تو انوض...
الحسن : خيرك..
عليا : شي..
الحسن قعد يشبحلها بعدين قال: رجلك نملت..
عليا ابتسمت: لالا..
نزل الحسن لمستوى رجليها وقعد يمسد فيها وهي تشبحله..
الحسن : اسف..
عليا : علاش تتأسف...
الحسن : تعبتك..
عليا: ولايهمك..اصلا كنت مرتاحه هلبه..
الحسن شبحلها وابتسم بعدين ناض...
عليا ناضت..ومشت معاه للدار...طلعتله حوايج...هو خش غسل وجهه وتوضا وطلع بيصلي...وهي خشت ادوش...
كمل صلاته وغير حوايجه بصعوبه وقف ع المرايه يمشط في شعره..
هي طلعت من الدوش كانت لابسه بلوزة حنية طويله وسروال جنيز وتنشف في شعرها خطمت وراه وهو واقف ع المرايه ويراقب فيها..شويه وشبحتله هو غير عيونه طول ..جاته..
عليا: توجعت وانت تلبس..
الحسن ابتسم : لا...
عليا : ماتسكرش سوريتك كلها ..وقعدت تفتح فيها..وهو خلاص اللي هناك من العقل طار..حوطها من خصرها شبحتله ..من قوة مشاعره اندفع وباسها وهو مش حاس بشي ..هي كانت تفكر في وضعيته ممكن يتوجع ..بس انسجمت معاه..هو اطور معاه الوضع شويه وعليا حست بأن القصه حتكبر..هي خافت عليه وبس مش مناسب ليه توا..قعدت تباعد فيه..هو انتبه لنفسه..بصعوبه وخر ..
الحسن بعيون دابله : اسفه ماحسيتش بنفسي..
عليا بنفس نظرته: خفت ع جرحك ينفتح..
الحسن ابتسم ووخر..وبدي يرجع لوعيه..وهي تشبحله..قعدت تتفحص في مكان جرحه ..
الحسن : مافي شي..
عليا هزت راسها بإيجاب..
الحسن: اني نازل...ومشي ومخلي قلبه وعقله عندها وحاله ماهوحاله 💖
اما هي تنهدت بشوق ووقفت ع المرايه..اكتسى وجهها باللون الأحمر مجرد ماشافت رقبتها ع المرايه ابتسمت بخجل ...
***
بسومتي شجعيني..
ابتسام: غصب عني بنخاف..
بلال: ماتخافيش كم سباق في سباق درته لتوا..
ابتسام تنهدت : استودعك الله..
بلال: احلى دعوة..حقه بش نزيد نأكدلك غدوة بتجي أمي..وبتتكلموا في العرس..خلاص حبيبتي مازال شهر بس..
ابتسام ابتسمت بخجل: تمام...
بلال: هيا ياعمري بنسكر توا...ادعيلي..
ابتسام : ديما ندعيلك..وحتى انت ردبالك ع روحك..
بلال بضحكه: حاااضر...
***
وقضى ربك ألا تعبدوا إلا إياه وبالوالدين إحسانا إما يبلغن عندك الكبر أحدهما أوكلاهما...
سكتت لما حست بيه واقف تلفتت جنبها وشبحتله..
حسان بإبتسامه: عندي سباق الليله..
سكرت المصحف وحطاته ع الطاولة وقدمتله..
هاله : دير بالك ارجوك..
حسان: ع خاطر هالعيون الحلوة اللي ذوبوا قلبي في حبهم حندير بالي ع روحي...
هاله ابتسمت...
حسان وخر خطوتين وبيطلع تلفت وولالها..قعد يشبحلها وهي تشبحله وعيونهم تتكلم مع بعضها...
حسان قدم اكثر..واكثر...حط ايده ع خدها وقربها ليه وباسها..وهاله مابتش تبعده..قعد شويه ووخر:نحبك 💖
ولف وتوجه للباب وطلع...
***
كان شبه منتهي من الضرب والتعذيب..لين خشوا عليه زوز...وقعدوا يفكوا فيه..
منذر:ههههه..افر..ااج..
: ايه..
منذر: عودة ....للملاعب..إذا..
: ماماتش الحسن
منذر: اممم...هكي ..احسن...لأن لو مات..كنتوا لحقتوني..بيه
قعدوا يفكوا فيه وناض وقف ع رجليه بصعوبه..طالع وهو يغني: أصبح الصبح ..فلا السجن ..ولاالسجان باقي"
هههههههههههه..
***
الساعه 11 ليلا...
رامي: ره الولد مليح نعرفه ماتستهينش بيه..
حسان يشبح للخصم: يبان عليه..
صاحبهم: خليك مركز ياحسان...
حسان : اطمنوا 11سباق فزت فيهم وهذا 12..
رامي: ماتنغرش...
حسان : مش غرور ...ثقه..هههههههه
....
:بلال الولد هذا فاز ب11سباق..
بلال يشبحله : سمعت بيه...
: خليك حريص...
بلال هز راسه بإيجاب..
الزوز قدموا ووقفوا حدا درجاتهم..سلم حسان ع بلال بحركة راسه وبلال ردله نفس طريقة السلام.. ولبس الخوذه وركبوا دراجاتهم
: هيا ياشباب...جاهزين..
الزوز هزو روسهم بإيجاب...
: 3..
2...
1....
انطلااااااق...
وانطلقوا حسان وبلال ..وكل واحد كان مبهر اكثر من التاني كيف يتخطوا في الحواجز ويستعرضوا في فنياتهم مرة بلال يفوت حسان ومرة حسان يفوت بلال..كان متساويين تماما في الإمكانيات والمهارة..بس لازم واحد منهم يفوز...
قوى بلال السرعه اكثر وفات حسان..وكان خلاص قراب ع خط النهايه ..حسان قوى سرعته ووصل ..كان في حاجز لازم يفوتوه وهو الفاصل ع خط النهايه ..
نقزوا الزوز مع بعض بكل اندفاع..ولما جو بينزلوا حسان حس روحه بدي يفقد في السيطره ع الموطو متاعه لما جي بينزل انحرف مسار الموطو ع نزله بلال وحسان جي قدامه معرفش كيف يتصرف نزل عليه طاح حسان بالموطو..اما بلال طاح من ع الموطو وتنطر....
الزوز معاش ناضوا..والموجودين مشولهم يجروا...
***
لالا سفر لاغيره..
عابد: اسمع..المرة هادي اني حنجبرك..
الحاج علي: لولا لطف الله راك رحت من بين ايدينا .
الحسن : والله احتمال زي هذا مفروض تحطوه في بالكم ديما طالما هادي خدمتي...
عابد: الدكتور قال لازم تاخد فترة نقاهه..
سرمد: خلاص معاش تعاند..
الحسن : مش عارف كيف تفكروا..تبوني بعد اللي صار..والارواح اللي راحت ..نطلع ندهور وناخد فترة نقاهه بكل دم بارد...اني من هني مش متحرك..ويكون عندكم علم غدوة مولي للعمل..
عابد: لاحول ولاقوة إلا بالله...
الحاج علي: ربي يهديك ربي يهديك...
الحسن ناض وطلع من حداهم..
الحاج علي: الولد هذا تصير فيه حاجه تانيه مش حنرحم حد..
عابد وسرمد شبحوا لبعض وشبحوا لبوهم بخوف..
....
طلعت برا لقاته واقف قدام الكرم متاع العنب..ابتسمت ومشتله..
الحسن كان حامق ومش قادر ينسى اللي صار ويبي ياخد بتار الجهاز كامل...وتحديدا منذر هو اهم هدف عنده حاليا..
"نشاركك وحدتك عادي"..
جمرة وطاحت في مية...زي النسمه البارده في عز الصيف..هذا كان تأثيرها عليه في هاللحظه..
تلفتلها: انتي الوحيده اللي يحقلك تشاركيني كل شي..
عليا ابتسمت وقلبها يدق بقوة: خيرك ..
الحسن : مضايق شوي..
عليا : من شنو..
الحسن : ماتحطيش في بالك..
عليا قربت وشدت ايده بإيديها الزوز: اللي صار صعب ويوجع هلبه..بس لازم انت ماياخدكش الغضب وتفكر كيف تنتقم لزملائك ولنفسك وانت في هالحاله..لازم تهدا وتستجمع نفسك وتعرف امتى ترد الضربه وكيف بدون ماتدفعوا ثمن غالي من جديد...
الحسن يشبح لعيونها : حالاتك كلها حلوة..مرة طفله..مرة مراة ناضجه..واني نحبك بكل حالاتك ...حتى لما تولي غولة جنانات وتفصلي...
عليا : هيييييييييي اني غولة جنانات..
الحسن بضحكه: تو سيبتي الكلام كله وشديتي في هادي...
عليا كيف جت بترد رن تليفون الحسن..شبح للتليفون
الحسن : حسان...رد ...ايوه.....ايه ....خوه..................تمام....صكر..
عليا ركزت ع ملامح وجهه اللي تغيروا: إن شاء الله خير..
الحسن : حسان دار حادث ...
عليا شهقت وحطت ايدها ع فهما..
الحسن : خشي..وماتبيني لحد شي..
عليا هزت راسها بإيجاب: باه..بتمشي بروحك؟!!
الحسن: تو نبعت لسرمد رساله يجي..خشي هيا...
عليا : تمام..وخشت طول...
وصل لسرمد مسج من الحسن قراه وتمالك نفسه..وشويه وناض وطلع من بحداهم بهدوء...
....
خشوا الزوز يجروا في الممر بعد دلوهم ع غرفته...لقوا الدكتور طالع من عنده..
الحسن : شن حاله
الدكتور: كويس انه كان لابس الخوذة..خلع في كتفه وكسر في ايده اللي طاح عليها..وشعر في رجله..وجروح مش عميقه في اماكن الإصابه...اطمنوا مافيش خطر ع حالته..
سرمد: الحمد لله..
الدكتور: لاباس عليه ومشي...
شاف الحسن شباب واقفين بعيد شويه مشالهم..
الحسن : معليشي ياشباب..واحد منكم يشرحلي شن صار بالزبط..
واحد منهم تقدم وقعد يحكيله...طارتله الحسن لأن ماكانش يعلم بحكاية السباقات هادي
سرمد: باه والولد اللي معاه شن صارله..
الشاب: حتى هو كسور...الخوده حمتهم من بعد ربي...
الحسن : هو هني..
الشاب : ايه...
قدم الحسن وفتح الباب شافه واتفاجأ ووخر بسرعه وسكر الباب...
سرمد: تعرفه..
الحسن : تستس..
***
غبارة سودا..
عليا: انعام وطي صوتك..
انعام: نطلعوا من مصيبه نخشوا في مصيبه....استغفر الله ياربي..
عليا : توا كيف صكرت من الحسن وقال حاله باهي كسور بس..
خشت ساره اللي سمعت اخر كلمه: ع منو تدوا من هو المكسور...
عليا سكتت..
انعام: حبيبتي سارة..حسان..دار حادث ...
سارة: هيييييي حسان خوي دار حادث..
سمعوا صوت حاجه ارتطمت بقوة..التفتوا لمصدر الصوت..
انعام بخلعه: حييي هاله...
***
سمعوا كلهم بالحادث ...مالهمش هلبه طالعين من مصيبة الحسن ..خشوا في غيرها..وسيله قريب هبلت..رفعوها طول عنده..
وسيله ببكي : علاش هكي ياولدي علاش..
حسان بإبتسامه: ماصار شي ياأمي اهو حالي باهي..
عابد: مستهتر مافيكش فايده نحسابك درت عقل لكن للأسف طلعت غالط..
حسان اكتفي بإبتسامه...
جنان : مبردك تبتسم وجوك رايق كأنه مافي شي...
خوله : كل واحد فيكم يتصرف ع هواه وناسي ان في بنت ناس في رقبته...
حسان بخوف:هاله وين..
عابد: به اللي اذكرتها ...والله هذا وين تأكدت اني جنيت ع البنيه الله يرحمك ياصاحبي ..ويسامحني ...وطلع من بحداهم
اما حسان غمض عيونه بشدة وكره روحه لين خلاص..
....
عليا : والله العظيم حاله باه...
هاله تبكي بالعبره..
سارة : تو كيف كلمني مرعي وقالي هدرز علينا وهدرزنا عليه..
انعام : تبي تمشي تتأكدي..
هاله قامت راسها وبعيونها المدمعات وبغضب: مش حنمشيله مش حنمشي..وناضت وركبت طول فوق...
عليا : لاحول ولاقوة إلا بالله..
سارة: والله ماتنلام...
***
طالعه تجري وتبكي ركبت السيارة..
عبدالقدوس : اهدي يابابا حاله باهي...
ابتسام ببكي : بسرعه بابا ارجوك ...
عبدالقدوس : باه باه...
وتحرك طول بالسيارة..
...
حلال فيك جلدات بالطوبو..لين يقولوا كيف دارتله..
بلال: هههههههه..
الساكته: اضحك يامكلوب اضحك..تي وديني وماأعبد هالسباقات هادي معاد دايرها..
بلال: إيييييييييه...علاش تحلفي يام بس..
الساكته: هذا اللي يمشي معاك انت...
....
خشت هي وبوها للمستشفى دلوهم ع غرفته..ركبوا بسرعه..وصلوا في الممر اللي فيه الغرفه..في نفس الممر كانوا واقفين سرمد والحسن..
الزوز قعدوا يشبحوا لعبد القدوس بحده..وهو كذلك ..قعدوا يتبادلوا في النظرات..لين فات من حداهم ومشي للغرفه اللي فيها بلال..
سرمد: يقربله..
الحسن : شكله..
...
طق الباب وانفتح..
ابتسام ببكي: معاش في سباقات معاش في...
بلال: هههههههههههههه
عبدالقدوس: راجل وع وشك تحمل مسؤوليه زوجه قاعد تلعب في لعب المفرخ هذا..
بلال بإبتسامه: ماتشوف باس ياعمي ..
الساكته بحده: الولد مكسر وتاعب مش وقته توا..
عبدالقدوس شبحلها ورافع حواجبه وهي شقلبت عيونه بإزدراء..
عبدالقدوس: استغفر الله..
ابتسام :شن حالك توا..
بلال: تواتوا..اني في احسن حال..
ابتسام شدت ضحكتها وهي تفنص فيه..
وامه لفت وجهها جهة تانيه وقعدت تضحك..
عبدالقدوس شبحله شبحه قسماته نصين لكن هو ماعبرش..
🌒فاتت هذيكا الليله ع هاله وهي تبكي وبس من الخوف..خوف الفقد كانت زعلانه من حسان وبتموت من خوفها عليه..هي حباته بكل عيوبه حباته ..وهو ولا كل حياتها..
اما هو النوم جفاه هاله لاجاته لاسألت عليه ..عرف انها زعلانه واكيد توا تبكي وخايفه..نزلت من عينه دمعه من خوفه عليها..وع قد ماأتصل بيها مابتش ترد...
عند عليا والحسن..
متمدد ع السرير ويفكر..
ع جيتها من برا..جايبه كبده مقليه وعصير بنجر..حطتهم حداه..
عليا : هيا نوض تعشا..
الحسن : ماعنديش نيه ..
عليا : مش بنيتك ياعزيزي غصب عنك..هيا نوض..
الحسن : والله ياعليا ماعندي نيه فحاجه..
تنهدت وقالت: شن كنت نقول مش قلنا لازم تشد حيلك ..حسن انت اصابتك هالمرة قويه هلبه ونزفت هلبه ولازم تعوض..البلاد تبيك بقوتك...
الحسن ابتسم : ال حسن..
عليا : هههههههههههه..باه نوض..
ناض وقعمز ع حيله وبدي ياكل..بس كل مايتحرك بإيديه كان يتوجع عنده الوضع عادي لأنه واخد عليه لكن عندها هي مش عادي ومش حتاخد عليه..
عليا : ترا وقف شويه..
هو وقف وشبحلها بإستغراب وهي قربت منه وحطت كبده في خبزة وقربتها لفمه هو يشبحلها..
عليا : هيا كول...
الحسن: مش باهي ليا المعامله هيا..الدلع مايمشيش معاي..
عليا : هذا مش دلع..انت مصاب وتتوجع..واني نساعد فيك وبس..وهي كول ايدي طاحت...
ابتسم وبدي ياكل...وهي توكل فيه وتشرب فيه العصير اللي كانت طعمته مش مرغوبه بتاتا..بس من ايديها عسسل💖
كمله كله...
وهي ناضت رفعت الصفرة وهو مشي للحمام ...شويه وطلع وهي غسلت الماعين وجاته...
الحسن يدور : وين تليفوني..
عليا وهي تمسح في ايديها : مش عارفه..تو ندور معاك..
قعدوا يدوروا لين لمحاته ورا الأباجورة ع الكامدينو ابتسمت ومشت بتاخده وهو كان يدور تحت السرير ناض وبيلف ع جيتها انخبطتت فيه شبحوا لبعض هلبه ..الحسن حضنها وبدي يبوس فيها..وهي مبتسمه ...
عليا: باه خلاص..
هو يحسابها اضايقت منه وخر ..
عليا : احمم..اهوا تليفونك..
الحسن خداه وهو مضايق...ورجع تمدد ع السرير
الحسن بنبرة حاده: سكري الضي ...
هي مشت سكرت الضي وحست انه اضايق منها...
هي تبيه ..تبيه يكون زوجها ..ومشتاقتله هلبه..وتحبه...بس تبيه يعدي اصابته هادي وكل شي حيكون احسن بعدها..
بس هو عقله صورله ان هي ماتحباش وماتبيشي وان قلبها قاعد مع حبها الأول..دار المنبه ورقد وهو مضايق ع الأخر..
وهي عطاته بالظهر بس قلبها عنده...
تاني يوم...
الساعه عشره صباحا...
طقطق باب غرفة حسان وانفتح هو كان يشبح للروشن لما انفتح الباب تلفت وتفاجأ..
هاله : صباح الخير..
حسان بفرحه:صباح الورد...
هاله سكرت الباب وقدمت: خاطري نعطيك كف ..
حسان بحب: اللي يجيني منك راضي بيه..
هاله : حسان ...اذا انت فعلا تحبني انسا الموطو والسباقات..
حسان بعشق: اني ع خاطرك ننسى نفسي ..حاضر...
هاله ابتسمت: طهور إن شاء الله..
حسان : هههههههههه شن لازم يردوا ع هادي..
هاله : ههههههههههه
***
انت هكي حتلخبط الدنيا كلها...
بلال : بالعكس صدقني..
...
ابتسام تمشي في الممر جايبه معاها ورد وكيكه طلبها منها بلال ...
...
الحسن : مش حتوقف ضد بوها لو من كان يكون..
بلال: انت ماتعرفهاش زي ماأني عرفتها..
الحسن : باه شن حتقوللها ترا..اني متعاون مع الشرطه بش نكشفوا اعمال بوك الغير قانونيه واستغليتك بش نوصله..بس توا نبيك تساعديني بش نقبضوا ع بوك وتم مهمتي بسرعه..
بلال بحزم: ايه...حس نسمه خشت عليه فجأة شبح للباب وانصدم صدمه عمره ..لكن مش زي صدمتها هي..اللي عطاته قلبها وثقت بيه وحباته وواجهت بوها ع خاطره وشافته احسن راجل في الدنيا واصدق من من عرفت حتى لما فقدت ثقتها في بوها حطتها فيه هو..توا تكتشف انها كانت عايشه في كذبه كبيرة...وكان مغفله لأبعد حد..
شبحتله شبحه واااااعره هلبه شبحه خيبه ..حقد..ألم..صدمه لوحت من ايدها الباقه والحافظه وحولت الدبله ولوحتها معاهم..ومشت بدون ماتنزل منها ولادمعه..
الحسن غمض عيونه باسف وفتحهم اللي خططله كله ذهب مع الريح..
الحسن : ارتاح توا..
بلال بصدمه: بس اني حبيتها من قلبي..
الحسن ابتسم بتهكم وفتح الباب وطلع..وخلا وراه بلال اللي قاعد يموت بالعرق...💔
...يتبع....
