#الحسن
#جمان_فريد
الجزء14💓💓💓💓
ملامح الصدمه ع وجوههم من الكلام اللي سمعوه لاقدروا يصدقوا ولا يستوعبوا...الصمت ظل سيد الموقف للحظات..بعدين أمه قطعت هالصمت ..
وسيله بغضب: من لما بديت تكبر واني نشوف فيك ديما سابق سنك اني امك فرضت عليا احترامك..لافكرت نعارضك في شي تبيه ولانفرض عليك شي..لكن هني بنقولك لا ومش راضيه ومش حنخطبهالك انسى ..
الحسن ببرود: اني جيت وكلمتك انتي ماتبيش ماعندي مانديرلك مش حنفرضها عليك..في النهايه اني اللي بنتزوجها..سامحيني ياأمي..مش حنتراجع ..
وسيله مصدومه فيه وساكته
عابد: انت بعقلك!!فوق من الكلام اللي لاحقها..خوها مجرم ماترددش يضر عيلته من قال مش حيضرنا حتى حني وانت الأدرى بيه!!
الحسن : أولا اني شاهد ع اللي صار واخلاق البنت توضحتلي كويس وكلام الناس اني اللي حنخليه يموت في مكانه..تانيا خوها مش حيدير شي واني متأكد...
عابد: مالا اعذرني اني مش حنمشيلك في شي..
الحسن ناض: كويس اني واجبي ودرته وعطيتكم علم.
يعز عليا نتزوج وأنتم مش راضيين بس انتم اللي اخترتوا...نشوفكم ع خير..ولف وطلع...
وسيله بصدمه: فهمت قصده من كلمة نشوفكم ع خير!!
عابد هز راسه بإيجاب :فاهم ....
***
طلعت من دارها متوجهه لدار المعيشه لقت امها وبوها مقعمزين قدمت ..
جعفر: قعمزي يابنتي...
قعمزت عليا ...
جعفر تنهد: بنتي ...الحياة ماتوقفش ..الحياة مستمرة..ع قد ماصار فينا..مازلنا نتنفسوا وعايشين..معناها مازال في حاجات بنعيشوها حلوة وبعد العسر يسرا ..هي هكي سنة الله في الدنيا...
عليا تسمع ومركزة ...
جعفر: احمم..يابنتي...سكت
زينب : تو اني ندوي...بنتي في واحد جي طلبك من بوك
عليا ضيقت عيونها بتساؤل وماتكلمتش..
جعفر: الراجل مافيشي مايتعيب يابنتي راجل حقاني ..لكن اكبر منك هلبه..
زينب : بينه وبينك 18سنه...
عليا ابتسمت بتهكم: واكيد متزوج قبل..او مطلق...اوأرمل ..وعنده عيل عيلين تلاته سته...منو مازال بيرضى بيا غير هادم..
جعفر ضايقه هلبه كلام بنته وزينب شبحتله وبعدين شبحت لبنتها...
زينب: ايه هو كبير عليك لكن عزابي وراجل الناس كلها تحبه وتقدره...تعرفيه..
عليا : نعرفه !!!
زينب : ايه ...الحسن الصادق...
عليا من صدمتها عيونها انفتحوا ع وسعهم ومعاش قدرت تنطق بحرف...
زينب : خودي وقتك وفكري بنتي ...هادي حياتك وقرارك هادا خوديه بروحك..
عليا شبحت لبوها هز راسه بإيجاب موافق لكلام امها..
عليا للحظات فكرت..تغيروا ملامح وجهها للحده...
عليا: تسمحلي بوي نتكلم معاه قبل لناخد قراري في هالموضوع..
امها وبوها شبحوا لبعض..
جعفر شبحلها: حقك...تو نقوله نهار يجي...وتقوليله اللي عندك..
عليا بنظرة حاده..هزت راسها بإيجاب ...
***
انعام : بالحققق!!!
برنيه : ايه...
انعام : راجل من يوم يومه..
برنيه : يعني عاجبك اللي داره...
انعام : اكيد عاجبني وحنمشي معاك ونخطبوها
برنيه ابتسمت بفرح ...
***
مديحه تهدرز مع اميرة ع تليفون...
مديحه : الحسن الحسن نفسه
اميرة بفرحه: ايه هو..
مديحه تنهدت بفرح: يااااااربي...
اميرة: مانحكيليكش والله قريب زغرطت لما امي قالتلي..
مديحه : وعليا شن قالت..
اميرة : قالت تبي تشوفه قبل تبي تقوله شروطها شكلها ..
مديحه بضحكه: والله لو اني مكانها لانفكر لانتردد لانشرط نوافق طووول
اميره: ههههههههههه ره يسمعك مراد
مديحه: هههههههههههه
***
صدمه للفرع بالكامل...
الحسن : توقعت من البدايه...شكيت فيه..
جاد الله : اني كنت نبي نحطه معاك فالعمليه بس هو رفض بحجة ان العمليه هادي انت اللي خططتلها ولازم تكملها بروحك وتاخد فرصتك..
جادالله : هما حملوه المسؤوليه لأن مابلغهمش بالتفاصيل..مايعرفوش ان انت ظللت كل مصادرهم..
الحسن : صورته وهو مقتول بهالطريقه البشعه لازم تنسخوا منها نسخ وتتعلق في المركز كله بش يبدا عظة وعبرة...
جاد الله بإزدراء: يالطيف...
رن تليفون الحسن شاف الرقم: عن اذنك يافندي..
جاد الله : ولي بعد تكمل عندي ليك بشارة..وابتسم..
الحسن هز راسه بإيجاب وهو ماشي طلع للممر ورد ع الكالمه وهو يمشي...
الحسن : السلام عليكم
جعفر: وعليكم السلام ان شاء الله مانكونش معطلك ع شي..
الحسن : لا ابدا ...تفضل..
جعفر : بنقولك..بخصوص الموضوع اللي كلمتني عليه..
الحسن قلبه يدق بقوة: ايه...
جعفر: شاورت البنت ..وقالت انها مش حتعطي رايها قبل متتكلم معاك..
الحسن وقف: امم ...مافيش مشكله..امتى يناسبكم نجي؟
جعفر: أمتى تكون فاضي ياولدي..
الحسن : احمم غدوة العشيه إن شاء الله بعد العصر..
جعفر: كويس..هيا مالا مانعطلش عليك..
الحسن: لا ولايهمك...ماتبي شي..
جعفر ابتسم : سلامتك ياولدي..السلام عليكم
الحسن : وعليكم السلام ..وصكر...خدي شهيق وزفير ولف ورجع لمكتب رئيسه...
الحسن خش: ايه ..شن هي البشارة..
جادالله بإبتسامه: العمليه الأخيره كانت مهمه وطاحوا فيها هلبه روس...واحبطت فيها صفقة خطيرة...لذلك صدرت أوامر بالترقيه...كل عنصر وكل ضابط درجه...
الحسن : يعني انت توا العميد جاد الله عون
جاد الله : وأنت العقيد الحسن الصادق...
***
زينب : قال غدوة بعد العصر بيجي..
اميرة بضحكه: مستعجل ...
زينب شاده ضحكتها : تحشمي...
اميرة : شكله طاح في بنتك رسمي...
زينب قرصتها : قتلك تحشمي
اميره: اححححح محرررها 😖
***
العيله مجتمعين في حوش الحاج علي...
محمد بعيلته وسارة ومرعي...مع برنيه وانعام وسرمد...والحسن..
برنيه: روروروروروروروروروري...هالنهار المبروك..
الحسن: ربي يحفظك ياحناي..
انعام : والله انت اللي تزيد للرتبه هيبه..
سرمد: زيدي انفخي زيدي ناقص هو...
محمد : ههههه ...لاياسرمد الحسن يستاهل اللي ينقال فيه..
الحسن: مانحبذش المديح بزايد..
سرمد : هههههههه وجهه ولا طماطم..
الحسن:😒
سرمد: 😂
مرعي بضحكه: بيديرولكم حفلة ترقيه...
الحسن : ايه خلال هالشهر إن شاء الله..بس مازال ماحددوش اليوم..
برنيه : جدك لما يعرف حيذبحلك القعدان...
سرمد: ياريت في ترقيه في خدمتنا راضي والله تذبحولي حتى دجاجه..
ساره: ههههههههه محسدي ياعم
الحسن : لين فايت فيه...
سرمد : نعترف😂😂
ريحانه كانت تتأمل في الحسن وهايمه فيه ..وهو لاحاسبها مقعمزة أساسا..
برنيه : والفرحه ولت فرحتين...
كلهم شبحولها ..
محمد: شن هي الفرحه الأولى كان هادي التانيه..
برنيه شبحت للحسن بضحكه: تو يجي وقتها وتعرفوا..
الحسن دار روحه لاهي بتليفونه...ماحد ركز ع نظرات برنيه غير ريحانه اللي قلبها قبضها...
***
تاني يوم
الساعه 6مساءا...
جعفر وهو يمد في العصير : آنست ياولدي...
الحسن خدي الطاسه: الله يأنسك...
شويه وطق الباب...
ناض جعفر...طلع..
جعفر: بنتي اللي عندك قوليه وأي قرار بتاخديه اني معاك..
عليا ابتسمت لبوها وتوجهت للمربوعه...
الحسن يشرب في العصير..طق الباب طقتين..حط العصير في مكانه وعيونه لوطا..
عليا خشت : السلام عليكم
الحسن قلبه يدق بقوة وعيونه لوطا: وعليكم السلام..
قعمزت عليا مقابلاته قعدت تشبحله وهو موطي عيونه وتاني مرافقه ع ركابه...
عليا : اسمع هما حاجتين بنقولهم...
الحسن بنفس الوضعيه: نسمع..
عليا : اني حنوافق لسبب واحد ...هو اني نبي ناخد بتاري من منذر وعن طريقك أنت حيصير هالشي..مستعده نساعدك باللي نقدر عليه بش نجيبه في يدك..
الحسن ماباش يعلق يسمع بس...
عليا : الحاجه التانيه اهم من الأولى..انت طلبت تتزوجني لنفس السبب بش توصل لمنذر..
الحسن ابتسم تهكما وماعلقش..
عليا: حتى لو اظاهرت بعكس هكي..ومتلت دور البطوله قدام الناس كلهاقدام حتى بوي اني مش حيمشي عليا...
الحسن ساكت ولاكلمه..
عليا : لذلك..بنقولك انت لو كملت فالموضوع لازم تعرف انك حتتزوج انسانه قلبها مع واحد غيرك..
رفع عيونه فيها طول...
عليا: اني مضطرة نتزوجك لهذامن توا ماتطمع مني بشي..بولا شي...وناضت طول طلعت..وهو يلحق فيها بعيونه الجاحظه فيها بصدمه...ناض..وطلع طول دون مايسلم ع جعفر حتى...
...
بالزبط فاتوا 4أيام...عليا ضامنه ان الحسن حينهي الموضوع..وجعفر حس انه مش حيصير منه لما طلع الحسن يومها بدون مايسلم عليه ..
خاب أمل زينب اللي كانت متأمله هلبه حاجات بهالزواج ..
وفي يوم
وجعفر مروح من صلاة العشي رن تليفونه...لقاه رقم الحاج علي...رد...
الحاج علي: ايوه السلام عليكم
جعفر: وعليكم السلام ...كيف حالك ياحاج..
الحاج علي : الحمد لله ..انت كيف حالك وكيف حال العويله..
جعفر: الحمد لله...
الحاج علي: بنقولك ياحاج نهار الخميس شن عندك..
جعفر بإستغراب: ماعندي شي...
الحاج علي: مالا بعد العصر إن شاء الله بنجيك اني وولادي وضنا عمي...بنتموا موضوع ولد ولدي..
جعفر من كثر ماتفاجئ وقف في النص الطريق...
الحاج علي : شن قولك..
جعفر بدهشه مخفيه: تفضلوا ..مرحبتين بيكم..
الحاج علي : خلاص موعدنا بعد غدوة...
جعفر: ان شاء الله..
الحاج علي: هي تصبح ع خير..
جعفر :قدامك كل خير..وصكر وتوجه للحوش بسرعه...
....
رووروررورورىوروىرروري
جعفر بضحكه: تي غير يولد ويسموه...
زينب بفرحه : يولد ان شاء الله يولد ويسموه...
اميره جت تجري: شن في ..
زينب: موضوع اختك عليا تم..
اميره: مع الحسن ..
زينب: هههه ايه
اميرة: رووووووووررووووروورري..
جعفر وزينب: ههههههههههههههههههه
عليا كانت تسمع فيهم وفهمت اللي صار برغم عدم رضاها بالموضوع وصدمتها كيف الحسن كمل فيه بعد اللي قالتهوله.
لكنها ابتسمت لفرحة أهلها ...
***
يعني تعرفي ياعمتي تعرفي..
انعام :ايه نعرف..ريحانه خلاص صفحة الحسن اطويها حتى نهار فكر يتزوج اختار من برا العيله مرة وحده..
ريحانه وخرت وطلعت من حداها وروحت لحوشهم اللي كان يبعد عن حوش جدها بحوشين بس كانت مقهورة ومتألمه وقلبها تعبا كره لعليا من قبل ماتوصل..
***
يوم الخميس
الساعه 12ظهرا..
السكرتيرة: استاذ عبدالقدوس في واحد براطالب يشوفك وقال يبيك فموضوع خاص
عبدالقدوس استغرب: قوليله يخش
السكرتيره : حاضر...
شويه وطق الباب وخش بلال..شبحله عبدالقدوس بإستغراب..بعدين أشرله يجي يقعمز...
قدم بلال وقعمز...
عبدالقدوس: بشن نقدر نخدمك..
بلال: امم هكي طول مافيش شن تشرب والجو هذا اللي نشوف فيه في التلفزيون..
عبدالقدوس برفعة حاجب: هذا نديروه للناس اللي نعرفوهم ..لكن أنت حتى اسمك مانعرفه..
بلال بضحكه: تبي تعرف اسمي ..اوكين..
معاك ولد القاضي بلال..أاا..لاليك انت هكي ساد..
عبدالقدوس بملل: من ماكنت تكون...شن تبي..
بلال بكل ثقه: نبي بنتك..
عبدالقدوس ناض وقربع الطاوله بإيده..
بلال بضحكه: ااها تو الحركه هادي شفتها في هلبه مسلسلات
عبدالقدوس: امشي اطلع اقلب وجهك برا .
بلال: غير اهدى وقعمز ياعمي...
عبدالقدوس : عمي العيون ...اقلب خليقتك خير مانجيب من يخربهالك ويلوحك برا..
بلال: اني نبيها بالحلال..
عبدالقدوس بصوت عالي : اطططططططللللللع...
بلال ناض: صل ع النبي ياعمي...
عبدالقدوس في قمة الغضب: معاااااش تقول عمممممي ياحيووووان..
بلال تصنع الزعل: حيوووان ...الله يسامحك ياعمي..
عبد القدوس: هديييييييل...
خشت السكرتيره تجري: نعم
عبدالقدوس: ضبحي ع الأمن يطلعوا هذا من هني...
بلال: ماديري شي ياهديل طالع بروحي...لف ومشي ولما وصل في الباب...نجيك في وقت تاني تكون رايق فيه ياعمي...وسكر الباب
عبدالقدوس: شن هالنماذج المعفنه هادي..! هاذا اللي ناقص احسن الناس في البلاد طلبوها مني ورديتهم بنرضى بفسخه زي هذا!!!
****
حوش الحاج جعفر ..
تسييق جنان ...مكنسه كهربائيه تكنس في المربوعه...غسل ماعين يطلعوا من المناسبه للمناسبه....
اما عليا فكانت مسكرة عليها دارها تتفرج ع صورها مع منصف وصور الحوش متاعهم وتذكر في احلامهم مع بعض ولشنو كانوا يخططوا....وتبكي ....قعدت تدعي ع منذر اللي كان سبب في فراقها عن اللي تحبه...
بعد العصر...
جو الرجاله...
لاحظ جعفر غياب عابد..مع ان كل شي تم ع خير ..
روحوا الرجاله..وجعفر شاغله عدم وجود عابد بو العريس كيف مايحضرش نهار زي هذا ...طول الليل وهو يفكر..زعمه عابد رافض زواج ولده من عليا...
اما عليا طول الليل دمعتها ماجفت...اميره كانت حاسه بيها..
اميرة"اه ياعليا لو فيدي شي يثبتلك حقارة منصف وان مايستاهلش دمعه من عيونك"
***
بعد كام يوم دار فضانيه جاب فيها الحسن جاهه كبيره وحتى ضباط..ورئيس بلديه المنطقه متاعهم ورئيس بلديه طرابلس...الحسن كان شخصية مهمه ومعروفه ومحبوبه من الناس ..لهالسبب هلبه يتوددوله بش يكسبوا الناس..وهو استغل هالشي..وجاب هالجاهه..بش الناس كلها تسمع وتعرف..لو كان الكلام اللي انقال ع عليا صح..ماكانش اختارها زوجه ليه وماكانش جاب هالجاهه بش يفضوا فيها...
وزادها في الظهر يوم الفضانيه جاب كانتر بضاعه وسبيزا وزوز سقايط وخضرة وفواكه وكانت جايه بالكلاكسات..والألعاب الناريه..كله كان مقصود من الحسن..عيلة عليا فرحوا هلبه وفهموا علاش الحسن دار هكي وزاد كبر في عيونهم..اما جعفر فتسأل ع عدم حضور عابد للمرة التانيه..
الحاج علي: وحني مانكفوش ياجعفر
جعفر : لا والله كلكم أقدار..لكن بو العريس يغيب مرتين في اهم مناسبه لولده حاجه مش طبيعيه...
الحاج علي: اني كبير حوش الصادق وبعدي مافي حد..واني نعزك ونقدرك ياجعفر..والحسن اكثر احفادي قرب لقلبي..وفرحان اليوم أكثر من فرحته هو..
جعفر شبه فهم كل شي وابتسم بضيق..وفوتها لأنه عارف ان الحسن شاري بنته واللي داره هو مادراش القريب عليه من دمه..
تحدد عرس الحسن وحسان بعد شهر مباشرة..والزوز حيسكنوا في الدور التاني في حوش الحاج علي..شقتين مقابلات بعض...
***
منصف يكلم في عبدالقدوس: بنروح اليومين الجايات نشوف شن صار.
عبد القدوس : كويس...اها ماسمعتش..
منصف : بشنو..
عبدالقدوس: بنت خالك انخطبت..
منصف بلع ريقه: من بنت خالي..
عبدالقدوس: اللي كانت خطيبتك..
منصف مصدوم وماقدرش يرد...
عبدالقدوس : وكان تعرف لمنو...
منصف : لمنو...
عبدالقدوس: العقيد في جهاز مكافحة المخدرات الحسن الصادق..
صدمه قويه لمنصف صدمه خلاته يحس للحظه بأن الدنيا لفت بيه..
عبدالقدوس: هذا اللي كان تذكر مرة قتلك يربش وراي..ولما انت سألت اكثر عرفت انها مجرد اشاعه...
منصف قعد يحك في جبهته بصبعه من القهر: احمم يابي ..توا ..مشغول..احمم ..مشغول توا..احمم..نكلمك بعدين...وصكر...
عبدالقدوس ابتسم بتهكم وكمل شغله...
اما منصف فكان يرجف ..مش مصدق..وقعدوا دموعه تلقائيا ينزلوا...
***
مروا كم يوم..والحال كما هو...
عليا ماكانتش مهتمه لموضوع العرس بتاتا رفضت تطلع تشري أي شي كله شروه أمها وخواتها وهي قاعده عايشه ع أطلال منصف..
بينما هاله توتي ع حسب ماتعرف مابتش تكلف بوها فوق طاقته لذلك ماخدتش هلبه في نفس الوقت مش حاسه بروحها عروسه مافي شي محسسها بأنها عروسه أصلا..
حسان فايت كل شي ومش مدور ولاهي بالوجيج متاع البنات بس ع الخفيف هالمره..خوفا من الحسن..
والحسن كان منهمك بخدمته ..وتحقيقاته مع شرودة اللي سلمه لفرع مكافحه الأرهاب بعد انحكم عليه بالإعدام...وأعدم ..طول..
وانحكم ع ضباط الجيش اللي متورطين مع تجار المخدرات بالإعدام ..
وضباط الشرطة كذلك..وتهمتهم خيانة الوطن...
***
في يوم
كان جعفر مداير لوليد يتيم يقرا في الجامع حفلة ختمه في حوشه...ام الولد كانت تعول في حوش جعفر مع مرته وبناته..والمفاجأة ان هذاكا اليوم بثينه جتهم تستسمح من خوها وجعفر سامحها وزينب ع خاطر راجلها سامحت..لكن بنات خوها ماتقبلوهاش بالذات عليا..
حلف عليها جعفر تقعد تحضر معاهم عشي الختمه وقعدت هي وبناتها..
ناضت تعول معاهم هي ونوال بنتها...بينما رشا حاطه رجل ع رجل ومابت تقيم طاسه...
بعد المغرب...
زينب: عليا بنتي اطلعي مصمصي القعد هذا برا...
عليا : حاضر ..خدت عليا القعد وقعدت تمصمص فيه..وحديدتها اللي هدالها منصف بانت عليها من ايدها مابتش تحولها تألمت وكيف سكرت الشيشمه...
"كيف حالك عليا"
تسمع ومش مصدقه..قامت عيونها بالشويه لين شافته كان واقف مقابلها..قعدت تشبحله هلبه ..وهو يشبحلها..
منصف بتوسل: عليا ارجوك اسمعيني..اني سمعت بأنك انخطبتي وماصدقتش كيف ترضي تكوني لغيري..عليا...عليا..اني مستعدنصلح كل شي...
عليا قعدت تشبحله هلبه تشبح لعيونه المدمعات المليانات ندم..
...
مرضت شويه ..
الحسن: خيرها..
مصعب : حرارتها ارتفعت ..الجو بدي يتغير وتغييرته تمرض..
الحسن خاف عليها هلبه ..اول مرة قلبه يخاف ع حد اخطى عيلته وخوفه مش طبيعي خوفه خلاه يتجرأ ويطلب طلب ما توقعش في يوم ممكن يطلبه..
الحسن بربكه: معليشي مصعب ..لو مافيش مشكله..احمم..طبعا من بعد اذنك..ناخد رقمها..نطمن بس..
مصعب شبحله هلبه بعدين ابتسم: لأني عارفك راجل أصلي حنعطيهولك..
الحسن: بارك الله فيك..
عطاه مصعب الرقم وهو خداه ومشي ع تركينه واتصل طول..
في حوش عليا..
اميرة كانت خاطمه حدا الدار سمعت تليفون يرن خشت لقاته تليفون عليا كان رقم غريب..رن لين فصل..بعدها بعت رساله..فتحتها..من الفضول
(معاك الحسن)
ضحكت اميره بعد عاود طول بعد بعت الرساله...وطلعت بتبلغ عليا..
...
منصف: عليا ارجوك..
عليا قعدت تشبحله اذكرت روحها لما كانت تترجى فيه وهو لزها.. ماتوقعتش ربي حياخدلها حقها بسرعه هكي...
قعدت تشبحله هلبه بنظره باردة تماما خاليه من أي معنى...
🎶فاكر ياحبيبي في يوم
ماسبتني أمشي ودموعي فعيني..
يومها انا بالزات جتلك عشان انت اللي بتقويني
وبدال ماهدى وارتاح وانا جوا حضنك اوتطمن عيني
كده وادفيني القاك انت بتبكيني..
تسأل عليا ليه هو حنا لسا إحنا
مستني مني إيه
ملامحنا مش ملامحنا
دلوقتي بينا ايه غيرذكرى بتجرحنا
أهي دنيا بتفرحنا لحظات والباقي بتدبحنا...
طلعت اميرة لقت عليا واقفه تشبح لمنصف اللي كان يشبحلها..
اميره: عليا خطيبك يتصل بيك من بكري..
منصف الكلمه خشت في وذنه زي السيف...
عليا لفت وجهها عنه ومشت خشت داخل حطت القعد ومش لدارها..
ومنصف اللي كان مصدوم هذا وين استوعب انه ضيع عليا منه بأنانيته للأبد..قام عينه في الروشن لقي مديحه تشبحله بكره وحولت طول من الروشن..تحرك من المكان متوجه للخارج...
في هالوقت عليا خشت للدار وسكرت الباب انهدت ع السرير وانهارت بالبكي"علاش يامنصف سيبتني من الأساس لو بترجع تترجاني بش نوليلك ..علاش يامنصف قتلت كل شي حلو بينا..شن اللي ردك ..ولابعد وليت لغيرك ماتحمتلش..خلاص يامنصف فات الأوان توا "
🎶عايز طب نرجع ليه..
هو انا مش نفسي نرجع تاني..
بس الحياة طب مين سبها ورجع يعيشها حتى تواني..
لو يوم جربت تكون ودا صعب جدا لو تكون في مكاني
وتعيش حرماني وادوق طعم مالهوش تاني..
تسأل عليا ليه هو احنا لسا احنا
مستني مني ايه ملامحنا مش ملامحنا
دلوقتي بينا ايه غير ذكرى بتجرحنا
اهي دنيا بتفرحنا لحظات والباقي بتدبحنا...
هي تبكي بالعبره والتليفون جنبها يرن ولا كأنها تسمع فيه..
***
في الليل..
اميره : هاك مصعب..اميره مدت صفرة العشي لخوها بش يطلعها خداها ومشي..
جعفر: هاتي بنتي هي ...نوال مدت صفرة...
جي بعده مراد ...أميرة: راجلك يامديحه...
مديحه: هيا هي ..قامت صفرة ومدتهوله..
عليا قامت صفرة تراجي من بيجي..ماجي حد طلعت بيها ..
لقت قدامها الحسن ..جمدت في مكانها وقعدت تشبحله..هو قدملها وحط ايديه الزوز ع ايديها
عليا تلخبطتت: انت هبلت..😳
الحسن ببرود: خيرك ماترديش ع تليفونك..
عليا بحدة: منين جبت رقمي..
الحسن بالتشديد ع العبارات: علاش ..ماترددييش..على..تليفونك..
عليا بحده: مانبيش نرد باهي ..
الحسن شد ع ايديها..توجعت
عليا تحاول تخفي ألمها: شن تبي باه..
الحسن خفف الشدة متاعه برفعة حاجب :عندي شروط حتى أني...
عليا ابتسمت بتهكم: يعني لو ماوافقتش عليهم نسيبك طول..
الحسن : ماتقدريش خلاص انتي..حصلتي...حول ايديه وشد الصفرة ومشي وخلاها...وهي لفت وخشت طول ووجهها احمر لقت خواتها قدامها يضحكوا..
عليا :بروا عليا غادي 😳..وخشت وخلتهم..
مديحه وأميرة:😂😂
اما الحسن اللي كان ماشي بالصفرة وقلبه مابطلش تقربيع ..تغيرت ملامح وجهه بش ترجع لحدتها لما شاف منصف قدامه يشبحله بغل ..فات من جنبه ولاعبره...
ومنصف قعد معاه بعيونه اللي كانوا يعبروا عن مدى حقده
ع الحسن...
....يتبع...
