#الحسن
#جمان_فريد
الجزء الرابع🛡
المهم انتي ماترالك شي..
عليا بأبتسامه : لالا ياماما اهو قدامك شن فيا...
مديحه: عطيهم مايسحقهم إن شاء الله كان نفتكوا منهم نولوا في خيار خيرنا..
زينب تضايقت من دعوة مديحه وناضت متوجهه للمطبخ
عليا بهمس: معاش تدعي هكي قدامها
مديحه بنفاد صبر: والنبي فكيني ترا شن محصله منه غير العار والكشايف عطيه ماياخده
عليا: خلاص اسكتي ..
مديحه : قوليلي حق ماصارلك شي ...يعني ماكنتيش في نفس الحي لما صارت المطاردة
عليا سرحت واذكرت الحسن واللي صار بيناتهم الشعور الغريب نفسه ناض عليها بس سرعان ماتبدل بشعور الغيظ لما اذكرت اسلوبه معاها..
مديحه تأشر بإيدها: وين رحتي ياهووو
عليا استاقضت: لالا ماخشيتش قتلك جيت بنخش طلعوني..
***
ماشي ووراه آدم وعنصر تاني ..
الحسن: الحراسه نبيها مشددة بأضعاف ع فتحي...
آدم : وهذا اللي درناه يافندي
الحسن : حمدي ماانصابش..
آدم : لا ماصارله شي..
الحسن فتح الباب متاع مكتبه وخش : والعناصر اللي انصابوا شنو حالهم توا
العنصر: زوز انصابوا في رجليهم وحولولهم الرصاص بدون مضاعفات وواحد انصاب في كتفه بس رصاصه حفاته ماخشتش فيه...
الحسن : الحمد لله....نصلي الظهر ونقعمز نهدرز مع حمدي..
آدم : تمام يافندي...داروله الزوز التحيه وطلعوا ..
والحسن قام تليفونه واتصل برقم محدد:السلام عليكم...الحمد لله...انتي كيف حالك.....كويس....نجاة اليوم نبي نشوفك.....الساعه كم؟.....تمام تمام ...خلاص لنا لقاء
السلام عليكم...وصكر ..وطلع من مكتبه متوجه للمصلى لأقامة الصلاة...
***
<< :معاك ولد القاضي بلال
ياما قاطع سهول وجبال
وف عقلي فايت جيلي بأجيال..
واللي يعرفني نسياني عنده محال..
ابتسام لاأراديا ضحكت: شعر ولانثر...ولاشرموله ...
بلال ضحك لضحكتها وخفة دمها: اللي يعجبك..>>
ابتسام مبتسمه بروحها وهي تحط في الغدي ع طاولة الأكل "ههههههههههههه واحد بارد "وضحكت ..
عبدالقدوس يراقب فيها: شن يضحك في أمورتي..
ابتسام ووجهها أحمر وبربكه:شي اذكرت موقف صار في الكليه"استغفر الله واتوب اليه"
عبدالقدوس: اها ...وقعد يشبحلها بشك وهي تتهرب من نظراته
***
واقفه تسقي في الغدي...
وسيله: اني قلبي كان حاسس انه مش منها وعارفه انها مش مرتاحه معاه..لكن ماقدرتش نحل فمي كان هي ماتكلمتش
سارة وهي تحط في صواني السلاطه: المهم توا تفتك من وجهه
وسيله : يارب مايجي عرسك إلا وهي خالصه منه...
سارة: ايه حقه امي كلمتي الحسن ع ريحانه
وسيله طلقت الساقم: وووك وووك عليا ولع فيا ولعه اني امه خفت منه...
سارة:هههههههههههههه حتى حناي برنيه تخاف منه ...
وسيله: لأمتى بس...
سارة: اني من رأيي زوجوا حسان بالك هو يحسها خوه اصغر منه وتزوج
وسيله بشهقه: وشن قالولك عليا مانخافش ربي اللي نبلي بناويت الناس في خوك هذا..
سارة: صدقتي ولدك بدي يلبز هلبه والحسن ناويه...
وسيله : خل والله يعطيه ع راسه بالك يولي راجل...
***
مقعمز في مكان مظلم متكي بإيديه ع الطاوله فوق راسه لمبه تتحرك يمين ويسار...انفتح الباب وخش منه الضابط اللي مستحيل يطلع حد من تحت ايده إلا وهو معترف باللي داره في حياته كلها..
قعمز الحسن وقعد يشبحله..حمدي قام عيونه لقاه يشبحله شبحه حاده ممزوجه بالإستخفاف ...قعد الحسن ع هالوضع قريب 5دقايق لين تلفت أعصاب حمدي..
حمدي : شوف من الأخير حني مبيوعين واللي باعك بيعه زي مايقولوا واللي عندي كله بنحطه...
الحسن رفع حاجبه الإيسار: ماتخافش يصفوك...
حمدي ضحك بهزوة:دامني انشديت تم رصيدي من الحياه..
الحسن : هات اللي عندك...وحط فبالك لو كذبت حنزبطك...
حمدي : احمم............
***
مقعمز يكتب في حلقته الجديدة ع اللاب توب...ومركز كويس ..وصلاته رساله ع التليفون قامه وفتحها قري محتواها وابتسم بتهكم وكمل شغله..
طقطق...
سرمد : تفضل..
انعام خشت: هيا نوض تغدا..
سرمد شبحلها: بوي ماروحش
انعام : بيروح مع المغرب...
سرمد هز راسه بإيجاب وطلع ورا إنعام...وصلوا في غرفة المعيشه...
سرمد: اووووو كسكسي بالحوت..
برنيه بضحكه: قعمز قعمز ..قعمزوا هو وانعام..
برنيه: بش تتصل بالحسن وتقوله يجي معقبتله حصته..
سرمد بضحكه: اليوم بيجي وبيبات.
برنيه: كويس بكل..
انعام : امي قولي الحق الحسن ولدك وعاطيتيه لعابد يربيه..
سرمد بضحكه: حتى اني فكرت فيها
برنيه : كول انت وياها بلا تزعبين زايد
انعام وسرمد:😂😂
***
فتحي في العنايه وحمدي في ايديهم
:كويس ...الزوز سكروا حسابهم..
:تم ياكوماندا...
***
الله ياأمي ع الكسكسي من ايدياتك استاااااحشته
الساكته:صحيحه وليدي..
بلال وهو ياكل خطرت ع باله ابتسام
<< ابتسام: باهي شكرا يافايت بطولك الجبال..>>
ضحك لاإراديا...
الساكته: ضحكنا معاك
بلال شبحلها وابتسم: امي لو جيتك نهار وقتلك بنتزوج تفرحي
الساكته بشهقه: تو هذا سؤال وليدي...هذا اليوم اللي نتمناه..شنو في وحيده..
بلال ضحك وشبح للصونيه: لاهو..لاتوا لا ..
الساكته بضحكه: وبعدين..
بلال: ههههههههههه
الساكته بإبتسامه: ربي يرزقك باللي تفرح قلبك وتسر خاطرك
بلال: آااامين..
الساكته: قولي شن صار في المحل..
بلال طلق الكشيك وابتسم بنصر: اليوم حناخده منه عين تضحك وعين تبكي
الساكته: والله ياوليدي من نهار دار فيك اللي داره واني نتحسب عليه ليلي ونهاري 3سنين ياوليدي واني ندعي عليه وربك سبحانه خدالك حقك..
بلال شبحلها بحب: ربي مايحرمني منك ولامن دعواتك اللي ديما متقيين عليا..
الساكته: ولايحرمني منك ياغالي💗
***
الساعه6مساءا
خش لمقهى وقعد يدور لين طاحت عينه ع مبتغاها قدم ووصل في الطاولة المقصودة
الحسن: السلام عليكم
نجاة : وعليكم السلام تفضل..
الحسن حول نظراته وقعمز
نجاة: مابيتش نطلب لين تجي..قهوتك المعتاده
الحسن هز راسه بإيجاب
نجاة نادت ع القرسون وطلبت..
نجاة : لبين ماتجينا الطلبيه احكي نسمع فيك..
الحسن شبحلها:.......
***
طالعه من المطبخ بصفرة العصير والشكلاطه وصلت في الضيوف وبدت تفرق..وعيون النساوين الزوز عليها..حطت الصفرة ولت للمطبخ..
خالة خطيب مديحه: قوليلي ياوخيتي بنتك قاعده مخطوبه
زينب بضحكه: ايه..
ام خطيب مديحه: ياوخيتي سامحيني اختي راسها وألف سيف تكلمك عليها من لما رتها في البيان قلتلها مخطوبه لكن شي..
زينب: نصيبات وهي مخطوبه لوليد عمتها وتبيه ويبيها..
خالة خطيب مديحه: خسارة ياوخيتي المواصفات اللي يبيها ولدي فبنتك بزايد اللهم صل ع النبي..
زينب: يبعتله ربي اللي خير منها..
الزوز: تسلمي...
مديحة تسمع وشادة ضحكتها
....
مصح وجهها..
مديحه : والله صدمتني في جرأتها..قالي مراد قريب هبلت عليك منين شافتك في البيان..
أميرة: وهو ولدها شن نظامه
عليا بضحكه: بتاخديه انتي..
اميرة تنهدت: ياااريت ..
مديحه ضربتها: موليه سخيفه هلبه..
اميرة: كله منكم انتم ومكالماتكم عقابات الليل..سهفتوني نرتبط
عليا: ربطوك في عرف شجرة..الهي في قرايتك يافرخه
اميرة: وااااااك ياكلمتي وليلي ...
وصل لعليا مسج فتحاته وانصدمت
(لو تحبي بوك غدوة تلاقيني في كافتيريا الكليه)
مديحه مركزة معاها: خيرك عليا شن فيها الرساله
اميرة بتهكم: تلقيه سبع البرومبه بيسافر..
عليا ضيقت عيونها: خيرك انتي قوليلي..
اميرة ببرود: خيرني..
عليا: تلقحي هلبه ع منصف واني زابطاتك ونطنش..لكن بديتي تزودي فيها
اميرة: لانلقح لاشي غير ولد عمتي هذا من هني مش نازلي واشرت ع رقبتها..
عليا: رجاء اميرة قدامي معاش تغلطي فيه
اميرة: ياريته يستاهل
عليا بصوت عالي : أميييييرة..
مديحه: خلاص انتي وياها...اميرة اطلعي قدامي
اميرة : مانيش طالعه تطلع هي..
عليا ناضت وطلعت وهي معصبه ع الآخر...
مديحه : خيرك انتي..
اميره : ماخيرني شي خليني ترا..
مديحة قعدت تشبحلها بشك وسكتت...
***
بعد المغرب
درست السيارة في القراج..نزل منها راجل سبعيني لابس عربي وجرد خفيف مغطيه مازال بصحته لاظهر معوج ولاركاب بالهون...صحته خير من اللي عمره في الأربعين...
لحيته كثيفة مهذبه مصفيها الشيب وهو طالع من القراج قابلاته رفيقة دربه..
برنيه تبخر فيه: الحمدلله ع سلامتك ياحاج
علي بضحكه: الله يسلمك ياحاجه...وكمل هو وياها طريقهم ركبوا الدرجات مع بعض ووصلوا في الباب اللي كانوا فراديه الزوز مفتوحات واللي يخش تقابله صاله كبيرة مفرشه..
خش الحاج علي ووراه الحاجه برنيه..ع طلعت انعام من المطبخ في ايدها طاسه اميه: الحمد لله ع سلامتك ياغالي..وباست راسه وعطاته الميه..
الحاج علي : الله يسلمك بنيتي الغاليه ..
ع خشة الحسن: السلام عليكم
علي: اهلا اهلا اهلا ..جاه الحسن باس ع راسه
الحسن : الحمد لله ع سلامتك
علي : الله يسلمك ...الجماعه أكل يسلموا عليك..ماقابلت واحدالا وسألني عليك..
برنيه: حتى هو الأفندي الحسن الصادق...
انعام: خلاص اسكتوا هو نافخ روحه من غير شي..
جاها الحسن شد رقبتها من الخلف: بري وتي العشي تحركي..
انعام : هيه صح انت اكبر مني لكن ماتنساش اني عمتك..
الحسن: تعطيني الإذن ياحاج
علي بضحكه واشر بإيده: دونك ليها..
انعام طارت تجري للمطبخ وهي تضحك..
وقعمز الحسن مع جده وحناه وكملوها هدرزة والحسن يسأل ع جده شن دار في جلسات المصالحه
"الحاج علي من ضمن أعضاء لجنة مصالحه كبيرة متألفه من الشيوخ والحكماء وشخصيات من المثقفين ورجال الدين..والشباب..تشكلت هاللجنه هادي بعد انتهاء الصراعات في ليبيا "...
***
عليا تكلم في منصف بالتليفون..
عليا : خايفه يامنصف
منصف: ياروحي انتي ماتخافي من شي اني وراك
عليا: خايفه ع بوي مش ع روحي يامنصف
منصف: مافي حد حيطق فيه اطمني..وخوك هذا كله همه يضايقكم مادوريشي انتي بس
عليا: معاش فهمتك مرة تقولي خوك خطير ومش حاسبكم شي..وتوا تقولي مادوريشي وماحد حيطق في بوي..!!!
منصف بحزم: عليا كلمة وحدة نقولهالك واسمعيها ونفذيها..منذر هذا لاعاد تكلميه ولاترد عليه وتشوفيه ديري روحك ماتعرفيشي..
عليا تنهدت: حاضر..
منصف: يحضرلك الخير ياقلب قلبي..نحبك
عليا ابتسمت: حتى اني 💗
***
بعد تعشا الحاج علي مع عيلته خش لداره واتكي في سريره واتكت حداه الحاجه برنيه اللي لاحظت عليه انه سرحان ويفكر...
برنيه: خيرك ياحاج فشنو تخمم
علي شبحله : في حاجه في راسي نقلب نقلب فيها..
برنيه: إن شاء الله خير
علي: خير خير..غير نفكر لما بناخد عليك وين نحطها
برنيه خبطت ع صدرها: شنوووووو..
علي: ههههههههههههه
برنيه: حطها في تابوت لأني دقيقه واحده زايده في الدنيا مش حنخليها بعد تاخدها..
علي: هههههههههههه ...غير اهدي اهدي نضحك معاك يامراة خيرك..
برنيه : تو هادي بصارة ياحاج قريب شيطتلي السكر..
علي : هههههههههه...سامحينا ياودي معاش نبصروا معاك..
برنيه : باه قولي في شنو تفكر...
علي: تو مش اني من جماعة المصالحه ومانخلي وين نمشي ونصلح بين الناس...
برنيه : ايه
علي : مش أولى نبدا من نفسي..
برنيه شبه فهمت: عرفتك بيجيك نهار وتفكر في الصلح بين عيلتنا وعيلة الحافظ
علي: اقل شي منين نخش في صلح بين ناس مايجيني حد ويقولي شوف لروحك
برنيه : علاش في حد قايلهالك
علي: لا الحق ياربي لتو ماحد قالها..لكن اني نفكر القدام..هو غدوة الخميس ولا
برنيه : ايه..
علي : بإذن الله نهار الجمعه بناخد عابد ومحمد وضنا عمي ونمشوا لحوش الحاج جعفر..
برنيه: مرات يردكم..
علي: مايديرهاش جعفر راجل طيب وقلبه كبير...
برنيه : إن شاء الله خير..
علي: خير بإذن الله خير..
***
مفرشين فوق السطح وراقدين ويشبحوا للسمي ..
سرمد: يهددوا مايهددوا مش مدور حد
الحسن : بديت نتحرك في موضوع البي..
سرمد شبحله: تحكي جد!!
الحسن : اممم.
سرمد : من وين بديت..
الحسن شبحله :توا مانقدر نحكي شي خل لين نرسيها كويس ..
سرمد رجع شبح فوق وسكت..الأثنين ساد عليهم الصمت ..وقطع هالصمت الألعاب الناريه..
سرمد بضحكه: هذا عرس البتيه..
الحسن: حتى هذا تزوج
سرمد بضحكه: قعدت غير انت..
الحسن: هكي اريح...وبعدين انت التفتت عليا طول شوف لروحك
سرمد: مازال شوي..
الحسن: شن ناقصك الخدمه في وشقتك فوق حوش العيله تامه بأثاتها...
سرمد: مش فبالي ياولدخوي ...شبحله...ديرها انت اني تو نتشجع ونلحقك..
الحسن : ع هكي حتكمل عمرك وانت تستنى فيا نشجعك..
سرمد: تعرف قلبي يقولي حتتزوج وقريبا جدا..
الحسن : ريح روحك انت وقلبك ..
سرمد: تو يجي نهار وتجيك بنت امها وتجيب راسك من اول نظره...
الحسن طول جو بين عيونه البنت الملسنه صاحبة العيون السود اللي ذهبوا شيرته لما شافهم ...
سرمد بصوت عالي: حيييي ع أمه اللي سرح
الحسن ضربه : نقص حسك ياتافه..
سرمد: اعترف..
الحسن: بشنو يامريض..فوتني ولانوض انزل...
سرمد: ههههههههههه
***
جري في ممر طويل واللي يجروا تقابلوا بشخص يكنوله احترام كبير كان يمشي وهما وراه..
: يافندي عملية تصفيه اللي صارت للعقيد المسعودي..
: وراها جماعة شرودة...متأكد
: معناها التهديدات كانت جديه مش تخويف
: كلملي جماعة المكافحه...
: تم يافندي...وطلع العنصر طول...قابله واحد
: شن كانت ردة فعله..
: عيونه يقدحوا شرار..
بنمشي نكلم وحده المكافحه...
: "الفهد الأسود ""والليث الجريح" بتكبر هلبه...
: يستر الله...
الفهد الأسود او العقيد محمد رزق الله ضابط عمره 36عام ترقى للرتبه هادي نتيجه احباطه لأعمال أرهابيه كبيرة..يخدم في وحده مكافحه الإرهاب..اغتيال العقيد في الجيش اللي ذكر اسمه فاجعه كبيرة مش حتفوت ع خير لمرتكيبيها...
اللي متوقعه الفهد الأسود انهم من الروس الكبيرة من تجار المخدرات...لأن سبق والعقيد هذا احبط ادخال شحنات كبيرة من المخدرات عبر الحدود من الجنوب...
***
استغفر الله عليك خدمه سودا
الحسن وهو يلبس في كندرته: بلغ حناي بش ماتنشغلش..وطلع طول..
بينما سرمد قعد واقف هلبه يشبح للباب ويفكر وبعدين خش داخل...
...يتبع....
