#الحسن
#جمان_فريد
الجزء29
هو ماشي متوجه لخيمة الرجاله وقاعده بين عيونه ..بيهبل عليها ..طول الوقت شاغله تفكيره..وشوقه بدي يكبر ويكبر ويكبر..
وصل في الخيمه..
سرمد: وين الورقه..
الحسن بإستغراب: أما ورقه...
محمد عمه: الورقه متاع الأرض اللي قالك عليها..
الحسن اذكر إن كان ماشي يجيب ورقه أرض تخص سرمد من شقته نساها مرة وحدة كله منها هي 💓
الحسن بربكه: ءا..زحمه ونساوين..ودوشه ياراجل..حتى غدوة..هوراجل خالتك بايت...شبح للراجل..بايت؟
الراجل: ايه بايت..
الحسن : هاه خلاص وشبح القدام وجهه أحمر..
سرمد ابتسم وكإن فهم شني اللي صار..
...
عند النساوين مجرد خشت عليا وحولت عبايتها..فتحوا فمهم فيها ونسوا صاحبة الشأن مرة وحده..كانت مبهرة..مذهله..وقفطانها فضيييع..هي احمر وجهها من نظراتهم اللي محاصرتها ...
جتها جنان: واااااااو للوشه واااااو
عليا ابتسمت: مالا شن نقول عليك انتي تهبببلي..
جنان : انتي قلعتي الكل هني..القفطان يجنن..
عليا : ذوق خوك..
جنان بإستغراب: من خوي..
عليا بضحكه: من خوك يعني راجلي..
جنان بدهشه: مستحييييييل..
عليا : والله ذوقه هو اللي خداه..
جنان: هذا مركز عليك كويس مقاسك ..طولك وزنك..
عليا وجهها ولا أحمر..
كلهم بعدين جوها وسألوها عليه وتفاجئوا لما عرفوا إن اللي جايبه الحسن..بنات اخت برنيه مش طايقينها وبالذات العروسة متاع البيان خطفت منها الأضواء😂
المهم ..تمت حفلة البيان..وكل حد توجه لحوشهم..واللي بايت لوطا بايت..
ركبوا عليا وهاله ساعدت عليا في القفطان لين وصلوا في شققاهم وخشوا الزوز...
عندهاله...
خشت حولت عبايتها وحطتها ع السرير وبدت تحول في الذهب ع خشة حسان..اللي شاف كندرتها بحدا الباب ابتسم
توجه لدار النوم ..
هاله : احمم..كملتوا الحوسه..
حسان مستوه فيها وخلاص..
هاله شبحت للمرايه وجهها احمر..
حسان لاإردايا قدم وجي جنبها حوللها الخرصه اللي من بكري وهي حاصله فيها..
هاله سخنت من قربه كان قريب هلبه..وهو بدي يضيع وهو يشم في ريحتها..
هاله تبي تهرب: ترا شويه..
حسان بصوت هادي : وين..
هاله : حول خل بنبدل ونرقد..
حسان بهيام : واني شن بيرقدني..
هاله :احمم ..حسان ..
حسان بهيام شديد: طالعه تهبلي تهببببلي..
هاله سكتت وراسها لوطا..
حسان قام راسها بصوابعه وقعد مركز ع مكان واحد في وجهها: هاله..هاله ..اني ..قلبي..يوجع فيا..
هاله تشبح لعيونه الدابله وبدوخ من الخجل.
حسان : هاله ..انتي ..انتي خليتني..آااه حتى الكلام مش قادر نتكلم..
هاله : حول حسان..
حسان بهيام : لا ....قرب أكثر..
بس هاله اللي كانت ع وشك الإستسلام جي بين عيونها حسان متاع النساوين اللي مرات نظرته ليها زي نظرته اللي عرفهم قبل بالحرام..بكل قوتها دفاته..
هو انصدم ..وهي كانت تشبحله بنظرة حاده.
هاله : رد بالك تفكر ان ممكن نسلمك نفسي واني عارفة كويس انك تشوفلي بشهوانيه زيي زي غيري..ره مركزة عليك قاعد تكلم وقاعد في سريبك الأول لكن متجاهله لأنه مايهمنش كل اللي يهمني إني نعيش بسلام وخلاص..بعيد عن المشاكل..
حسان لأول مرة ينجرح قلبه توجع لين خلاص: لو كنت نشوفلك بالنظره اللي قلتي عليها..ره من زمان حقي الشرعي واخده تبي ولاماتبيش..واما قصة اني نكلم في غيرك..فيشهد عليا ربي من اليوم اللي صار بيني وبينك فيه نقاش ومديت ايدي عليك ...قطعت كل جنس حواء ولا عاد قمت عيني في غيرك..طلع تليفونه من جيبه ..ولو تبي تعرفي فمن نكلم شوفي ..فتحلها ع قروب ماسنجر ليه هو وولاد معاه ..كانوا يديروا في سباقات موطوات شبه كل ليله وهو كان يحب يركب ع الموطو وكانت في بيناتهم تحديات..وكانوا يجهزوا لمسابقه فيه..عندك التليفون فتشيه براحتك حتى رمز مش مداير...صدقتي ولالا...انتي حرة المهم اني ضمير مرتاح..
لأني صادق في كل حرف قلته...ولف وجي بيطلع بس وقف وتلفتلها...اللي بنقوله توا هو أكثر كلمة صادقه نقولها في حياتي لأنها طالعه من هني ..واشر ع قلبه..
"نحبك"💖....ولف وطلع من الشقة كلها مرة وحده..
وهاله مصدومه ومش مستوعبه حاجه من اللي صار ودموعها نزلوا..
عند عليا...
حولت عبايتها اول ماسكرت باب الحوش ومشت لدار النوم ..بتحول القفطان ..هو خش ..تلفتت وعطاته بوجهها لأن ظهرها ولا عريان..بس ماركزتش ع كتاف القفطان اللي نزلوا..بس هو ركز..
الحسن يشبحلها ونار ولعت فيه ..معاش قادر يصبر عليها..
هي حست من نظراته أن في شي مش طبيعي..خافت وهلبه مش شويه ومش عارفه علاش خافت هكي تلقائيا تصرفت تصرف لاإرادي..
عليا بعصبيه : كيف تخش عليا هكي من غير ماتستأذن ..
الحسن انصدم نزل عيونه وحس روحه في موقف خيييييي...كلمه وحده طلعت من فمه وبنبرة غريبه : آسف..لف وطلع طول...انتفتضت لما سمعت باب الشقه تقربع ..رجعت لوعيها..انصدمت في نفسها علاش كلماته هكي ..علاش اهناته علاش جرحاته...كرهت روحها هلبه هلبه ...
اما هو نزل وطلع للجنان خدي نفس عميق وغمض عيونه بشده بش يتمالك نفسه...عمره ماتعرض لموقف فيه إهانه زي هالموقف..شد رقبته وقعد يمسد عليها حس بإنه مخنوق..
وزع نظره في المكان لقي حسان مقعمز بعيد شوي..وكان واضح عليه مضايق هلبه...
"انت وهو"
الزوز التفتوا لمصدر الصوت..
سرمد بضحكه: تحسدوا فيا ع عزوبيتي صح ؟
حسان ضحك غصب عنه..والحسن ابتسم بتهكم..
سرمد: داري ترحب بكم..هي تعالوا..
جوه هما الزوز وخشوا معاه لداره..ومشت ليلتهم معاه هدرزه لين هو رقد لكن هما كل واحد اظاهر بالنوم..وقلوبهم محروقه حرق...
الصبح🌄
كان الجو باهي والسمي صافيه والحوش ولا خلية نحل..
برنيه : قولولهم يجوا يسووه..
انعام : تو نكلمهم..
عليا وهاله خشوا اتصبحوا عليهم وردوا عليهم..
عليا : شن في..
سارة: المظله اللي برا مايله والقيطون الفاصل طايح..بينادوهم يساووها..
هاله : اها...
....
متوجهين بالعدة..الحسن وحسان وسرمد وولد خالتهم اسمه الهادي ...
النساوين في الكوجينه يوتوا في الفطور..وهما برا من الجهة التانيه يساووا في المظله..
الهادي كان يغني لمحمد حسن وكلهم منسجمين معاه حتى النساوين داخل في الكوجينه يسمعوا فيه..
سارة: هذا صوت خوك ابتهال
ابتهال : ايه..
كلهم ابتسموا ومنسجمين..
...
سرمد : الله ع صوتك واحساسك ياراجل...
حسان: حق والله انسجمت..
الهادي بضحكه: مال لوتسمعوا صوت بعض الناس..
الحسن ابتسم بتهكم..
سرمد: منو..
الهادي: ولد خوك
سرمد : من ولدخوي..
الهادي : اللي وراك اللي داير روحه الدوه مش عليه..
التفتوله سرمد وحسان بدهشه..وهو يركب في القيطون..
الهادي: نهارها خطم علينا ..وبات عندنا نضت ليلتها ع صوته وهو يغني لمحمد حسن..حبيبي تجرح في..
سرمد: قول والله..
الهادي بضحكه: وحق الله..
حسان : مستحيييل..
الهادي : تربح يافندي اتبتلهم كلامي..
الحسن : كلام شنو..
الهادي بضحكه : اللي قلته توا..
الحسن: ماعندي مانتبت..
سرمد : معناها كلامه حق
الحسن ماباش يرد..
حسان بمكر: تحششم..
الحسن : وعلاش..
حسان بضحكه : واضح..
سرمد بمكر : ايييه هههههههههه
الحسن قدملهم : وعلاش بنتحشم ..
الهادي : تي باهي غني..
الحسن شبحلهم ..هو خاطره يغني يبي يغني ..الأغنيه اللي قال عليها الهادي..اللي من لما حب عليا تسلل في قلبه وهو وين يقعمز مع روحه ويذكرها يغني فيها..
الحسن : عادي جدا ...نغني...احمم..حمم ..
🎶حبيبي حبيبي وتجرح في وأنا نسامح فيك
حبيبي ماتقول داير شي ننسى الزعل ونجيك..
مانيش عارف وين نلقالك العذر منين
مانيش عارف وين نلقالك العذر منين..
ونقول تدلل عليا ونسامحك ونجيك حبيبي..
أنت اللي غلطان ونقولك سامحني
مانك اللي تنهان حتى بعد تجرحني
نحبك صحيح نحبك نحبك صحيح نحبك
بقلبي وروحي ماجبرت دراعي
نحبك صحيح نحبك نحبك صحيح نحبك
ولامن ضربني فوق رووس اصباعي
ولايهمني في شي إلا رضاك علي..
من الشوق القوي نصارحك يجمعنا حبيبي..
هو يغني قلبه يغني بمشاعره يغني..وحسان سرحان معاه وعقله عندها..
لداخل..
كلهم سيبوا اللي في ايديهم ومركزين مع اللي يغني..
انعام شافت من الروشن بحذر: والله هو..
خوله : منو..
انعام التفتت : الحسن اللي يغني..
كلهم انصدموا..وعليا قلبها يدق بقوة..
ريحانه لاشعوريا: حتى من صوته يهبببل..
عليا شبحتلها بحده وكان تلقى تخنقها من رقبتها...
والشوق هذا حالي غالبني حنيني
لاقدرت نصبر لانريح بالي ولاريحتني عيني..
منهو اللي يغني عليك وعنك
هيهات نلقى ياحبيبي صبر
حتى ان كان العيب فيك ومنك
ياعزيز نجيبلك في عذر...
عليا تسمع فيه وحست بكلام الأغنيه طالع من قلبه زاد وجعها قلبها وكرهت روحها لما اذكرت الموقف اللي صار أمس..
سرمد صفق وحسان صفق...والهادي يضحك
الهادي : شن رايكم ...
سرمد: عمه ودايرني صاحبه مانعرف عليه هالمعلومه الخطيره..
الهادي: والله كان مش صدفت ليلتها نضت ره قعدت هالموهبه مدفونه..
الحسن : هيا انت وياه هيا ..بصوت عالي...كممممملنااا..ومشي وهما ضحكوا ولحقوه..
ساره:ياحظك بيه ياللي فبالي..
عليا وجهها احمر..وهما ابتسموا ما عدا بعض العيون الحاقده 😈
....
جي وقت الغدي...وتوه ..عليا كانت تجيب في صفرة من برا وهي ماشيه شافت الحسن جاي تلخبطت وقلبها قعد يرجف..بس انصدمت لما طلعت ريحانه ووقفاته وقعدت تكلم فيه..
ريحانه : بنكلمك في موضوع..
الحسن بإستغراب : شن في..
ريحانه : في واحد تافه ليه فترة يلحق فيا ومدرهلي كبدي
الحسن : كيف؟!
ريحانه : كل مانجي مروحه من الخدمه"ابله في مدرسه" نلقى فيه قدامي كرهني في عمري..
الحسن : تو نشوف الموضوع..اهم شي انتي تجاهليه ومادوريشي..
ريحانه: ايه حتى اني هكي مدايره"كذابه"
الحسن : تمام...
ريحانه: شكرا
الحسن : ماتشكرنيش هذا واجبي بنت عمي انتي..
"خيرها بنت عمك"
انصدم بيها وقفت بيناتهم تسأل فيه بنبرة حاده وتشبح لريحانه من فوق للوطا..
ريحانه دارت روحها مصدومه وماتبيش ترد..
الحسن : شن ديري بالصفره هني..
عليا شبحت للصفرة واذكرت انهم يراجو فيها..شبحت لريحانه..واندفعت طول وشدتها من ذراعها: هيا تعالي وقت ع الغدي..وقعدت تجر فيها وريحانه مصدومه"ياقعادها يجرجروا فيها عليا وخوها 😂"..خشوا داخل..
الحسن "تو هادي غيره ولاشنو بالزبط"..ابتسم ع جنب..ونادى ع انعام وصاها ع حاجات ومشي..
***
عبدالقدوس: راجل بنت خالك بدي يكبر هلبه..
منصف يشبح للملف : منو فيهم..
عبدالقدوس: اللي كانت خطيبتك..
منصف مط شواربه داخل وسكر الملف وشبح لعبد القدوس:معليشي يابي لو معاش تجيب سييرته أفضل..
عبد القدوس بتهكم: غصب عني وعنك حتجي سيرته وانت فاهم قصدي..
منصف بحقد: وراسك يابي حنصغره هلبه مش شوي واذكر كلامي هذا كويس..
عبدالقدوس: واني نراجي شن يطلع معاك..
منصف: حيطلع معاي هلبه مش شويه..
***
فات النهار مع المغرب كانوا خوات برنيه مروحات وقعدوا العيله بس..
كانوا مقعمزين في الصاله..كلهم..
عيون حسان مافارقتش هاله اللي كانت لاهيه في الهدرزة مع ميسون وخوله..وعيون الحسن يسرقوا في النظرات لعليا اللي قارنه الراس هي وجنان..
عليا: ياربي عليك صدفه..
جنان : مش هكي وبس..لقيته باعتلي طلب اضافه بعدها..عليا من الحماس شهقت بصوت عالي..
كلهم سكتوا وشبحولها..
هي استاقضت وقعدت ادور بعيونها عليهم لين جت في عيونه اللي يشبحوا بحده..لفت وجهها عنه..
جنان بربكه: نحكيلها ع موقف صار في الكليه وهي تحمست شويه...
رجعوا بعدين لهدرزتهم
جنان : يافضيحه انتي..
عليا بضحكه: تحمست معاك..
جنان: هههههههههه..وكملوا هدرزة...وكانت أغلبها ضحك..
سارة :ترا جنان شوفي ..ورتها صورة قفطان تبي تاخده وعليا تنهدت وقامت عيونها فيه لقاته يشبحلها وهي قعدت تشبحله ..ماقدرتش تلف وجهها عنه لأن نظرته كانت حلوة هلبه..الزوز قعدوا يشبحوا لبعض وناسين الموجودين اللي كانوا لاهيين عنهم بالهدرزة...
عليا "حاسه روحي بديت ...ياربي معقوله هكي بهالسرعه ..االي نحس بيه معاه ماحسيتاش من قبل بكل بكل حتى مع منصف ..قلبي عمره مارجف لمنصف ليه هو يرجف حتى لو سمعت اسمه بس بدون مانشوفه"
الحسن "استسلمت ولأول مرة نستسلم في حياتي..عيونك صعب يتقاوموا ..انتي كل ع بعضك مقاومتك مستحيله..اني اللي قاومت عصابه مسلحه بروحي ماأستسلمتش..بنيه صغيرونه زيك مش قادر نقاومها"...
سرمد معاهم ع خط"اااه خاطري نعيش مشاعرهم..حتى عمك حسان رايح فيها وهاله تشبحله بالخنبه..لازم ندور ع وحده نحبها حتى أني خير مانقعد نمص في الليم 😂"
سرمد: اشبحولي هني..
كلهم قطعوا حديثهم وركزوا معاه..
سرمد: الخميس الجاي أن شاء الله....
انعام : بتخطب...
سرمد: خليني نكمل كلامي يامطرشقه..
كلهم :😂😂😂😂😂
سرمد: الخميس الجاي حيكون فيه حفل تخريج دفعات من كلية الشرطه وحيحضر وزيرالداخليه ورئيس الوزراء ورئيس البرلمان..المهم في هذا كله انه حيتم تكريم ولدنا..الحسن الصادق ..بوسام شرف...من قبل رئيس الوزراء...
كلهم شبحوا للحسن بفرحه..
برنيه : روووووووووروووووورووووووي..
وبدت المباركات من الجميع وعليا تشبحله بإعجاب شديد وفرحانه بيه اكثر منهم كلهم...
ريحانه : ديما وانت رافع اسم عيلتنا فوق اكثر ماهو مرفوع...
ابتسم الحسن..وعليا عيونها نار...كان تلقى تريشها من شفاشيفها..
🍃فاتوا كم يوم رجعت الحياة لما كانت عليه ..
الحسن ولا معاش يركب للشقه بكل ولو اضطر يركب فلازم يتأكد ان عليا مش فيها..معاش تكلموا مع بعض إلا بالنظرات..وكل منهم نظراته تقول الف كلمه وكلمه..حال حسان وهاله زي حاله عليا والحسن بالزبط...
الحسن لهي بالتجهيز لحفل التخريج وتأمين المكان مع جماعة الأمن العام تأمين كامل...
في ليلة اللي تسبق يوم حفل التخريج..
هاله في شقتها وكانت ادير في مشروب شكلاطه ساخن الأنسب لهالجو المصقع وحسبت حسان اللي قررت واخيرا بعد طول تفكير تعطيه فرصه..مشت لداره طقت الباب...
حسان وقلبه يدق بقوة: تفضلي..
خشت هاله بإبتسامه: مشغول..
حسان : لا..
هاله: اممم..درت مشروب شكلاطه سخون وحسبتك فيه ..تجي تشرب..
حسان قعد يشبحلها: معليشي بنرقد..
هاله تلاشت ابتسامتها: احمم..به تصبح ع خير وطلعت وسكرت الباب ...مشت للمطبخ وهي مضايقه لين خلاص ماتوقعتش يردها..قعدت تشبح للطواسي في الصاله طارت النيه منه ..تنهدت وقدمت بترفع الصفرة..
"خليها"..التفتت لقاته وراها بالزبط..
هاله برفعة حاجب: مش بترقد..
حسان : ماقدرتش نرقد واني كاسر بخاطرك ماتهونيش عليا..
هاله : ومن قالك خاطري انكسر..مش بسهوله ينكسر..
حسان: به طمنتيني..بس ماقلتيش كيف جاتك وناديتي عليا نقعمز معاك...
هاله : الحق فيا اللي سخفتني وانت قاعد بروحك في الدار...قلت نغيرلك جوك..
حسان بإبتسامه : فيك الخير..قعدوا يشبحوا لبعض هو يوزع في نظره ع وجهها وهي تشبح لعيونه كيف يشوفلها..
هاله بصوت هادي: فشن تفكر..
حسان شبح لعيونها : فهلبه حاجات قلبي يقولي ديرهم وعقلي يقولي رد بالك
هاله : وعلاش يقولك ردبالك..
حسان :خايف منك...
هاله ابتسمت : قوله مايخافش..نبي نعطي صاحبه فرصه..
حسان فتح عيونه ع وسعهم بدهشه مش مصدق اللي سمعه قلبه يدق بعنف شدييييد...
حسان : يعني...
هاله ابتسمت ...
حسان تنهد: آااااااه ياروحي ياقلبي انتي...وقرب وباسها...بحب بعشق بشوق بوله..وهي غمضت عيونها وانسجمت معاه وحست بشعور حلو هلبه..حاوطها من خصرها بإيديه وقاعد ضايع فيها..وهي كذلك...شويه وبعد عنها بش تاخد نفس...
هاله بصوت يدوب طالع: حنعطيك..فرصة ...تثبتلي فيها انك فعلا تغيرت..وقتها حنكون ليك بقلبي ومشاعري وكل مافيا..
حسان بعيون دابله شاد وجهها بإيديه : حنتبتلك ياهاله وحتشوفي بعيونك حسان اللي حبك غيره 180درجه ..
حطت ايديها ع ايديه ونزلتهم : هيا تعالى نشربوه صقع خلاص..
حسان : مش حنحس انه صقع من النار اللي والعه فيا ..
هاله قعمزت: هههههههههه قعمز قعمز ..قعمزوا وقعدوا يشربوا ويهدرزوا ويضحكوا وجوهم حلو وهديكا الليله كانت البدايه الجديده الحلوة بين حسان وهاله..برغم انه كل واحد فيهم فدار بس قلوبهم قعدت حاضنه بعضها💖💖...
عند عليا...
كانت راقده ع السرير وتتأمل في بدله الشرطه المعلقه ع الروشن..هو علقها وهي مهناش..فهمت انه حيركب يلبس فوق..قعدت تتأمل فيها وتبتسم لين غلبها النوم ورقدت...
تاني يوم..
نزلوا فطروا لوطا وهما يضموا في حوسه الفطور ..الحسن استغل وجودها لوطا وركب يبدل..
هي قاعده تفكر فيه ..استأذنت وركبت بتشوفه..ركبت وقلبها سابقها...خشت للحوش شمت ريحته غمضت عيونها وابتسمت مشت لدار النوم مالقت حد ومالقتش البدله حتى الحمام فاضي مافيه حد..تلفتت جت عينها ع طاقيه الشرطه متاعه شبحتلها وابتسمت وقدمت خدتها وقعدت تتأمل فيها وبعدين شبحت للمرايه وحطتها ع راسها..ضحكت ع روحها كيف طلعت عليها قعدت تشبح للمرايه وادير في حركات هبله وقدمت شورابها وتساوي في شعرها المفرود ع كتافها وتضحك..ريحته زادت قويت..لفت جنبها لقاته حاط ايديه في جيوبه ويشبحلها بإبتسامته اللي ع جنب اللي هي حبتها هلبه..💖
الحسن : شن غيرتي تخصصك..
عليا تلفتت بجسمها كله: اممم نفكر نديرها..
الحسن ضيق عيونه بإستغراب : علاش..
عليا : بش نقبض عليك لو فكرت تهرب مني..
الحسن : نهرب منك..
عليا : ايه لما تزعل مني ..معاش نبيك تهرب نبيك تجي تواجهني وتقول زعلت منك..
الحسن : عمري مادرتها اللي زعلني لازم يعرف بروحه انه زعلني..
عليا بإبتسامه ورفعه حاجب : معناها حنضطر نقبض عليك..
الحسن قعد يشبحلها هلبه بعدين قدم لين جي قدامها بالزبط وقعد يشبح لعيونها: واني حنسلمك نفسي دون مقاومه..
عليا قعدت تشبحله وعيونها في عيونه قلبها يرجف كلها ترجف ..وهو مش قادر يقاوم نظرتها ...مش قادر يقاومها قرب حط ايده ع خدها وقربها ليه وأخيرا باسها..
هي كانت مصدومه بعض الشي مبادلاتاش بس هو مش حاس بشي..يرتوي من حبها يروي في عطشه وبس قلبه يخبط بعنف شديد..شويه وبعد عنها...وهي تشبحله بصدمه ومش مستوعبه اللي صار..هو وقف ع حيله غمض عيونه وفتحهم خد الطاقيه من ع راسها ولبسها خدي نفس عميق ماباش يشبحلها مرة تانيه لأن حس بأنه مش حيطلع بعدها..ولف ومشي وخلاها واقفه مش مستوعبه..
حطت ايديها ع شفايفها..وبعدين ع خدودها اللي كانوا سخان ..وشويه وبدت تضحك..بعدين حطت ايدها ع قلبها وتنهدت وقالت:طحتي ياعليا 💖
