#الحسن
الجزء التاسع
#جمان_فريد
GomanFared
ﻻﺇﻟﻪ ﺇﻻ ﺍﻟﻠﻪ
ﻻﺇﻟﻪ ﺇﻻ ﺍﻟﻠﻪ
ﺃﻟﻒ ﺍﻟﺼﻼﺓ ﻭﺍﻟﺴﻼﻡ ﻋﻠﻴﻚ ﻳﺎﺣﺒﻴﺐ ﺍﻟﻠﻪ ﻣﺤﻤﺪ ..
ﻫﺎﺩﻱ ﺯﻓﺔ ﺳﺎﺭﺓ ﺩﺧﻠﻬﺎ ﺣﺴﺎﻥ ﺍﻟﻠﻲ ﻛﺎﻧﻮﺍ ﻋﻴﻮﻧﻪ ﻳﺪﻫﻮﺭﻭﺍ ﻓﻲ ﺍﻟﺼﺎﻟﻪ ﻣﻦ ﺗﺤﺖ ﻟﺘﺤﺖ ...😁
ﻃﻠﻌﺖ ﺣﻠﻮﺓ ﻫﻠﺒﻪ ... ﻭﺻﻠﺖ ﻓﻲ ﺍﻟﻜﻮﺷﻪ ﻭﺭﻗﺼﺖ ﻣﻊ ﺣﺴﺎﻥ ﺍﻟﻠﻲ ﻣﺎﻃﻠﻊ ﻣﻦ ﺍﻟﺼﺎﻟﻪ ﺇﻻ ﺑﺎﻟﺪﻑ " ﻧﺴﻮﻧﺠﻲ "😒
ﻛﺎﻧﺖ ﻟﻴﻠﻪ ﻭﻻ ﺃﺭﻭﻉ ﻟﻴﻠﺔ ﺍﻟﻌﻤﺮ ... ﺑﺎﻟﺬﺍﺕ ﻟﻤﺎ ﺧﺶ ﻣﺮﻋﻲ ﺍﻟﺰﻭﺯ ﻣﻌﺎﺵ ﺷﺎﻓﻮﺍ ﺣﺪ ﻏﻴﺮ ﺑﻌﺾ ﻭﻛﺎﻧﻮﺍ ﻳﺴﺘﻨﻮﺍ ﺍﻣﺘﻰ ﺍﺗﻢ ﺍﻟﺤﻔﻠﺔ ﻭﻳﺮﻭﺣﻮﺍ ﻟﺤﻮﺷﻬﻢ ...
ﺳﺎﺭﺓ ﻭﻣﺮﻋﻲ ﺣﻴﺴﻜﻨﻮﺍ ﻓﻮﻕ ﺣﻮﺵ ﺟﺪﻫﻢ ﻋﻠﻲ ﺍﻟﻠﻲ ﻛﺎﻥ ﺑﺎﻧﻲ ﺍﻟﺤﻮﺵ ﻋﻠﻰ ﺗﻼﺕ ﺩﻭﺍﺭ .. ﺍﻟﺪﻭﺭ ﺍﻟﺘﺎﻧﻲ ﻭﺍﻟﺘﺎﻟﺖ ﻓﻴﻪ ﺷﻘﺘﻴﻦ ﻣﻘﺎﺑﻼﺕ ﺑﻌﺾ .. ﺳﺎﺭﻩ ﺣﺘﺴﻜﻦ ﻓﻲ ﺍﻟﺪﻭﺭ ﺍﻟﺜﺎﻟﺖ ﻣﻊ ﻣﺮﻋﻲ ... ﻭﻃﺒﻌﺎ ﻫﺬﺍ ﺑﺄﻣﺮ ﻣﻦ ﺍﻟﺤﺎﺝ ﻋﻠﻲ ﻧﻔﺴﻪ ... ﺧﻼ ﻟﻮﻻﺩﻩ ﺣﺮﻳﻪ ﺍﻟﺴﻜﻦ ... ﻟﻜﻦ ﺍﺣﻔﺎﺩﻩ ﺍﻟﻠﻲ ﻳﻌﺰﻩ ﻣﻨﻬﻢ ﻳﺒﻴﻪ ﻗﺮﻳﺐ ﻋﻠﻴﻪ ﻭﻫﻮ ﻛﺎﻥ ﻳﻌﺰ ﻣﺮﻋﻲ ﻫﻠﺒﻪ ..
ﻣﻦ ﺟﻬﺔ ﺗﺎﻧﻴﻪ ﺣﻔﻠﺔ ﻣﺪﻳﺤﻪ ﻣﺎﻛﺎﻧﺘﺶ ﺃﻗﻞ ﺣﻼﻭﺓ ﻣﻦ ﺣﻔﻠﺔ ﺳﺎﺭﺓ ﺍﻟﺠﻮ ﻛﺎﻥ ﺣﻠﻮ ﻭﺍﻟﻬﻴﺎﺟﻪ ﻉ ﺃﺻﻮﻟﻬﺎ ﻭﻣﺪﻳﺤﻪ ﻋﺎﺷﺖ ﻓﺮﺣﺔ ﻋﻤﺮﻫﺎ ﺑﻌﺪ ﻋﻼﻗﻪ 6 ﺳﻨﻴﻦ ﻫﻲ ﻭﻣﺮﺍﺩ ...
ﺟﺖ ﻟﺤﻈﻪ ﻣﺮﻭﺍﺣﻬﺎ ... ﻟﻤﺎ ﻃﻠﻌﺖ ﻛﻴﻒ ﺩﺧﻠﻬﺎ ﻣﺮﺍﺩ ﻟﻠﺴﻴﺎﺭﺓ ..
ﺟﻲ ﻣﻮﻛﺐ ﺳﻴﺎﺭﺍﺕ ﻣﺰﻳﻨﻪ .. ﻭﺣﺪﻩ ﻣﻨﻬﻢ ﻧﺰﻝ ﻣﻨﻬﺎ ﻣﻨﺬﺭ .. ﻛﻠﻬﻢ ﺍﻧﺼﺪﻣﻮﺍ ﻭﺧﺎﻓﻮﺍ ﻫﻠﺒﻪ ...
ﻋﻠﻴﺎ : ﺍﻟﻠﻬﻢ ﺍﻟﺼﺒﺮ ..
ﺍﻣﻴﺮﺓ : ﺑﺎﻫﻲ ﺑﻮﻱ ﻣﺶ ﺣﺎﺿﺮ .. ﺭﻛﺰﻱ ﻉ ﺃﻣﻲ ..
ﻋﻠﻴﺎ ﻗﻌﺪﺕ ﺗﺸﺒﺢ ﻷﻣﻬﺎ ﺍﻟﻠﻲ ﻟﻘﺘﻬﺎ ﻭﺍﻗﻔﻪ ﻓﻲ ﻣﻜﺎﻧﻬﺎ ﻭﺗﺮﻋﺶ ﻭﻫﻲ ﺗﺸﺒﺢ ﻟﻤﻨﺬﺭ ﺍﻟﻠﻲ ﻟﻴﻬﺎ ﺳﻨﻴﻦ ﻭﺳﻨﻴﻦ ﻣﺎﺷﺎﻓﺎﺗﻪ .. ﻭﻣﻨﺬﺭ ﻛﺎﻥ ﻳﺸﺒﺤﻠﻬﺎ ﻭﻏﺼﺔ ﻛﺒﻴﺮﺓ ﻓﻲ ﻗﻠﺒﻪ ..
ﻓﻼﺵ ﺑﺎﻙ ..
ﺍﻟﻠﻬﻢ ﺑﺎﺭﻙ ﻋﻠﻰ ﻭﻟﻴﺪﻱ ..
ﺟﻌﻔﺮ : ﻭﺍﻟﻠﻪ ﻃﻮﻝ ﺍﻟﻮﻗﺖ ﺭﺍﻓﻊ ﺭﺍﺳﻲ ﻭﻧﺸﻮﻑ ﻟﻠﻨﺎﺱ ﻧﺒﻲ ﻧﻘﻮﻝ ﺑﺄﻋﻠﻰ ﺻﻮﺗﻲ ﻫﺬﺍ ﻭﻟﺪﻱ ... ﺍﻟﺘﺮﺗﻴﺐ ﺍﻷﻭﻝ ﻉ ﻣﺪﺍﺭﺱ ﺍﻟﻌﺎﺻﻤﻪ ﻓﻲ ﺍﻟﺸﻬﺎﺩﻩ ﺍﻹﻋﺪﺍﺩﻳﻪ .. ﻭﺍﻟﻠﻲ ﺧﺪﻱ ﺍﻟﻤﻴﺪﺍﻟﻴﻪ ﺍﻟﺬﻫﺒﻴﻪ ﻓﻲ ﻣﺴﺎﺑﻘﺔ ﺍﻟﻤﺪﺍﺭﺱ ...
ﻣﻨﺬﺭ ﺑﻀﺤﻜﻪ : ﻓﺮﺣﺎﻥ ﻫﻠﺒﻪ ﻳﺎﺑﻮﻱ؟
ﺟﻌﻔﺮ : ﻓﺮﺣﺎﻥ ﻭﺑﺲ ﺗﻲ ﺍﻧﻲ ﺑﻨﻄﻴﺮ ﻣﻦ ﻓﺮﺣﺘﻲ ..
ﺯﻳﻨﺐ ﻗﺪﻣﺘﻠﻪ ﻭﺑﺎﺳﺘﻪ ﻣﻦ ﺧﺪﻭﺩﻩ ﻭﻉ ﺭﺍﺳﻪ : ﺭﺑﻲ ﻳﺒﻠﻐﻨﻲ ﻓﻴﻚ ﻭﻧﺸﻮﻓﻚ ﻋﺮﻳﺲ ..
ﻣﻨﺬﺭ ﺿﺤﻚ ﻭﺑﺎﺱ ﺍﻳﺪ ﺃﻣﻪ ..
ﺍﻟﻮﻗﺖ ﺍﻟﺤﺎﺿﺮ
ﻓﻲ ﻧﻔﺲ ﺍﻟﻠﺤﻈﻪ ﻧﺰﻟﺖ ﻣﻦ ﻋﻴﻮﻧﻬﻢ ﺩﻣﻌﻪ ﺳﺨﻮﻧﻪ ... ﻛﺎﻧﺖ ﺗﺘﻤﻨﻰ ﻟﻮﺗﻔﺘﺢ ﺍﻳﺪﻳﻬﺎ ﻭﺗﻨﺎﺩﻳﻪ ﻳﺠﻲ ﻟﺤﻀﻨﻬﺎ ﺗﺸﻢ ﺭﻳﺤﺘﻪ ﻭﺍﻃﻔﻲ ﺷﻮﻕ ﺳﻨﻴﻦ ﻭﺳﻨﻴﻦ .. ﺑﺲ ﻣﺎﺗﻘﺪﺭ ... ﻣﺶ ﻷﻧﻪ ﺟﻌﻔﺮ ﻣﻨﻌﻬﺎ ﺍﺑﺪﺍ ﺟﻌﻔﺮ ﻗﺎﻟﻠﻬﺎ ﻣﺮﺓ " ﻟﻮﺗﺒﻲ ﺗﺸﻮﻓﻴﻪ ﺑﺮﺍ ﺍﻟﺤﻮﺵ ﺷﻮﻓﻴﻪ ﻣﺶ ﺣﻨﺤﺮﻣﻚ ﻣﻦ ﺷﻮﻓﺘﻪ ﻭﻻﻧﻘﻮﻟﻚ ﺍﻗﻄﻌﻴﻪ ﺍﻧﺘﻲ ﺃﻡ ﻭﺍﻧﻲ ﻣﺎﻧﺮﺿﺎﺵ ﻋﺬﺍﺑﻚ "
ﻫﻲ ﻧﻔﺴﻬﺎ ﺯﻋﻼﻧﻪ ﻣﻨﻪ ﻭﻋﻠﻴﻪ ﺍﻟﻠﻲ ﺩﺍﺭﻩ ﻣﺶ ﺷﻮﻳﻪ .. ﻭﻟﺪﻫﺎ ﺍﻧﺴﺎﻥ ﻣﻨﺤﺮﻑ ﻋﺎﺻﻲ ﻟﺮﺑﻪ .. ﻳﺎﻣﺎ ﻗﺘﻞ ﻧﺎﺱ ﻭﻇﻠﻢ ﻧﺎﺱ ﻭﺩﻣﺮ ﻣﺴﺘﻘﺒﻞ ﻫﻠﺒﻪ ﺷﺒﺎﺏ ﻭﻣﺮﺍﻫﻘﻴﻦ .. ﻭﺷﺘﺖ ﻋﺎﺋﻼﺕ .. ﻭﺧﻼ ﺑﻮﻩ ﻣﻜﺴﻮﺭ ﻣﻦ ﻓﻌﺎﻳﻠﻪ ... ﻭﻣﺶ ﻣﺨﻠﻴﻬﻢ ﻓﻲ ﺣﺎﻟﻬﻢ ﻳﺘﻌﻤﺪ ﻳﻀﺎﻳﻘﻬﻢ ﻭﻳﺘﻌﺐ ﺑﻮﻩ ﻛﻞ ﻣﺎﺗﺴﻨﺤﻠﻪ ﺍﻟﻔﺮﺻﻪ ..
ﻫﻮ ﻛﺎﻥ ﻳﺸﺒﺤﻠﻬﺎ ﻭﻋﺎﺭﻑ ﻧﻀﺮﺗﻬﺎ ﻛﻮﻳﺲ .. ﻟﻒ ﻭﺟﻬﻪ ﻋﻨﻬﺎ ﻫﺮﺑﺎ ﻣﻦ ﻫﺎﻟﻨﻈﺮﺓ ﺍﻟﻠﻲ ﻛﻠﻬﺎ ﻟﻮﻡ ﻭﻋﺘﺐ ﻭﻏﻀﺐ .. ﺭﻛﺐ ﺍﻟﺴﻴﺎﺭﻩ ﻭﺗﺤﺮﻙ ﻭﺭﺍ ﺳﻴﺎﺭﻩ ﺃﺧﺘﻪ ﻭﺑﺎﻗﻲ ﺍﻟﺴﻴﺎﺭﻩ ... ﻟﻴﻦ ﻭﺻﻠﻮﺍ ﺑﻴﻬﺎ ﻟﺤﻮﺵ ﺍﻫﻞ ﺭﺍﺟﻠﻬﺎ ... ﺧﻼ ﺟﻤﺎﻋﺘﻪ ﻳﻘﻠﺒﻮﺍ ﺍﻟﺪﻧﻴﺎ ﺑﺎﻷﻟﻌﺎﺏ ﺍﻟﻨﺎﺭﻳﻪ ﻭﺑﻌﺪﻳﻦ ﻣﺸﻲ ...
ﻛﺎﻥ ﺍﻟﻜﻞ ﻓﺎﻫﻢ ﺍﻥ ﻣﺼﻌﺐ ﺟﺎﺏ ﺻﺤﺎﺑﻪ ﻳﺪﻳﺮﻭﺍ ﻫﻜﻲ .. ﻣﺎﻋﺪﺍ ﻣﺪﻳﺤﻪ ﻭﻣﺮﺍﺩ ﺍﻟﻠﻲ ﻣﺎﻛﺎﻧﺘﺶ ﺍﺩﺭﻕ ﻋﻠﻴﻪ ﺷﻲ ...
ﻫﺬﻳﻜﺎ ﺍﻟﻠﻴﻠﻪ ﺭﻭﺣﻮﺍ ﻟﻠﺤﻮﺵ ﻭﺯﻳﻨﺐ ﻣﻦ ﺍﻟﺒﻜﻲ ﺃﻏﻤﻰ ﻋﻠﻴﻬﺎ .. ﺍﻟﻠﻲ ﺣﻮﺍﻟﻴﻬﺎ ﻳﺤﺴﺎﺑﻮ ﺍﻟﻠﻲ ﺻﺎﻳﺮ ﻓﻴﻬﺎ ﻉ ﻃﻠﻌﺔ ﺑﻨﺘﻬﺎ ﺑﺲ ﻓﻲ ﺍﻟﺤﻘﻴﻘﻪ ﻉ ﺧﺎﻃﺮ ﻭﻟﺪﻫﺎ ﺑﻜﺮﻫﺎ ﻭﺃﻭﻝ ﻓﺮﺣﺘﻬﺎ ﻭﺍﻟﺤﺎﻝ ﺍﻟﻠﻲ ﻭﺻﻠﻮﻟﻪ ﻫﻤﺎ ﻭﻳﺎﻩ ...
***
ﻓﺎﺗﻮﺍ ﻳﻮﻣﻴﻦ ﺳﺎﻓﺮﻭﺍ ﻓﻴﻬﻢ ﺍﻟﻌﺮﺳﺎﻥ ﺷﻬﺮ ﻋﺴﻞ ..
ﺳﺎﺭﺓ ﻭﻣﺮﻋﻲ ﺳﻨﻐﺎﻓﻮﺭﻩ ... ﻷﻥ ﻃﺒﻴﻌﺘﻬﺎ ﺣﻠﻮﺓ ﺑﺎﻟﻤﺮﺓ ... ﻭﻫﻤﺎ ﺍﺗﻨﻴﻦ ﻋﻨﺪﻫﻢ ﺭﻏﺒﻪ ﻳﺰﻭﺭﻭﻫﺎ ...
ﺃﻣﺎ ﻣﺮﺍﺩ ﻭﻣﺪﻳﺤﻪ ﻟﺘﺮﻛﻴﺎ ...
ﻓﻲ ﻟﻴﺒﻴﺎ
ﺍﻟﺴﺎﻋﻪ 8:30 ﻣﺴﺎﺀﺍ ..
ﻛﺜﻴﺮﺍ ﻣﺎﻧﻨﺨﺪﻉ ﺑﺎﻟﻤﻈﺎﻫﺮ .. ﺍﻟﻤﻈﺎﻫﺮ ﺧﺪﺍﻋﻪ .. ﻣﻦ ﺑﺮﺍ ﻳﺒﺎﻥ ﻋﻠﻴﻚ ﺍﻟﺸﺨﺺ .. ﻧﻈﻴﻒ .. ﻃﻴﺐ .. ﻣﺤﺘﺮﻡ .. ﺑﺲ ﻫﻮ ﻳﺨﻔﻲ ﻭﺭﺍ ﻫﺎﻟﻘﻨﺎﻉ
ﻗﺬﺍﺭﺓ .. ﺧﺒﺚ .. ﻧﻮﺍﻳﺎ ﺳﻴﺌﻪ .. ﻳﺴﺘﺨﺪﻡ ﻓﻲ ﻣﻈﻬﺮ ﺍﻟﺼﻼﺡ ﺳﺘﺎﺭ ﻷﻓﻌﺎﻝ ﺷﻨﻴﻌﻪ .. ﺍﺟﺮﺍﻣﻴﻪ .. ﻻﺗﺮﺿﻲ ﺍﻟﺨﺎﻟﻖ ﻭﻻ ﺍﻟﺨﻠﻖ ...
ﺍﻟﻴﻮﻡ ﺣﻨﺘﻜﻠﻢ ﺑﺼﺮﺍﺣﻪ .. ﺑﺪﻭﻥ ﺗﻠﻤﻴﺢ ﺯﻱ ﻣﺎﺗﻌﻮﺩﺗﻮﺍ ﻓﻴﻤﺎ ﺳﺒﻖ .. ﺣﻨﺘﻜﻠﻢ ﻋﻦ ﻭﺟﻪ ﻣﻦ ﺍﻟﻮﺟﻮﻩ ﺍﻟﻤﻌﺮﻭﻓﻪ ﻉ ﺍﻟﺴﺎﺣﻪ ..
ﺍﺑﻬﺮﻧﺎ ﺑﺄﻋﻤﺎﻟﻪ ﺍﻟﺨﻴﺮﻳﻪ .. ﻭﻣﺒﺎﺩﺭﺍﺗﻪ ﻟﺪﻋﻢ ﺍﻟﺸﺒﺎﺏ .. ﻭﺍﻟﻜﺜﻴﺮ ﻣﻦ ﺍﻷﻓﻌﺎﻝ ﺍﻟﻠﻲ ﺗﻌﻄﻲ ﺍﻧﻄﺒﺎﻉ ﺭﺍﺋﻊ ﻋﻨﻪ .. ﺑﺲ ﻓﻲ ﺣﺪ ﻓﻜﺮ ﺍﻥ ﻫﺎﻷﻋﻤﺎﻝ .. ﺳﺘﺎﺭ ﻷﻓﻌﺎﻝ ﺑﻌﻴﺪﻩ ﻛﻞ ﺍﻟﺒﻌﺪ ﻋﻦ ﺍﻟﺼﻼﺡ !!!
ﺣﻨﺘﻜﻠﻢ ﺍﻟﻴﻮﻡ ﻋﻦ ... ﻋﺒﺪﺍﻟﻘﺪﻭﺱ ﺻﺒﺮﻱ ﺍﻟﺒﻲ ...
️☝ ﻛﺎﻧﺖ ﻫﺎﺩﻱ ﻣﻘﺪﻣﻪ ﺣﻠﻘﺔ ﻣﺒﺎﺷﺮﺓ ﻣﻦ ﺑﺮﻧﺎﻣﺞ ﻟﻠﺤﻘﻴﻘﻪ ﻭﺟﻪ ﺃﺧﺮ ﺍﻟﻠﻲ ﻳﻘﺪﻡ ﻓﻴﻪ ﺳﺮﻣﺪ ... ﺍﻟﻠﻲ ﻳﻮﻣﻴﺎ ﺟﻌﻔﺮ ﻭﻋﻴﻠﺘﻪ ﻳﺘﻔﺮﺟﻮﺍ ﻋﻠﻴﻪ ..
ﺯﻳﻨﺐ : ﻣﺶ ﺍﻟﻠﻲ ﻳﺘﻜﻠﻢ ﻋﻠﻴﻪ ﻫﺬﺍ ﺑﻮﻙ ﺻﺎﺣﺒﺘﻚ
ﻋﻠﻴﺎ : ﺍﻳﻪ ﻫﻮ
ﺟﻌﻔﺮ ﺍﻟﺘﻔﺖ : ﺍﻱ ﻣﻨﻬﻢ ..
ﻋﻠﻴﺎ : ﺍﺑﺘﺴﺎﻡ ..
ﺟﻌﻔﺮ ﺗﻔﺎﺟﺊ : ﻫﺪﻳﻜﺎ ﺍﻟﺒﻨﻴﻪ ﺍﻟﻤﺤﺘﺮﻣﻪ ﺍﻟﺤﺎﻣﻠﻪ ﻟﻜﺘﺎﺏ ﺍﻟﻠﻪ
ﻋﻠﻴﺎ : ﺍﻳﻪ ..
ﺃﻣﻴﺮﻩ : ﺯﻋﻤﻪ ﺣﺘﻰ ﻫﻴﺎ ﺯﻱ ﺑﻮﻫﺎ ﻣﺪﺍﻳﺮﻩ ﺟﻮ ﺍﻷﻟﺘﺰﺍﻡ ﺳﺘﺎﺭ ..
ﻋﻠﻴﺎ : ﻣﺴﺘﺤﻴﻞ ﺍﺑﺘﺴﺎﻡ ﺻﺎﺣﺒﺘﻲ ﻣﻦ ﺍﻳﺎﻡ ﺍﻟﺜﺎﻧﻮﻱ ﻋﻤﺮﻱ ﻣﺎﺭﻳﺖ ﻋﻠﻴﻬﺎ ﻏﻠﻂ .. ﺑﺲ ﺑﻮﻫﺎ ﻣﺎﻧﻌﺮﻓﺶ ...
ﺟﻌﻔﺮ : ﺍﻟﻠﻪ ﺃﻋﻠﻢ ... ﻣﺎﻧﻄﻠﻘﻮﺱ ﺍﺣﻜﺎﻡ ﻉ ﺣﺪ ﻟﻤﺠﺮﺩ ﻛﻼﻡ ﻧﺴﻤﻌﻮﻩ .. ﻭﺣﻨﻲ ﻻﻋﺎﺷﺮﻧﺎﻩ ﻭﻻﻋﺮﻓﻨﺎﻩ ﻭﻻﻋﻨﺪﻧﺎ ﺩﻟﻴﻞ ﻳﺜﺒﺖ ﺻﺤﺔ ﺍﻷﺗﻬﺎﻣﺎﺕ ﺍﻟﻠﻲ ﻣﻮﺟﻬﺘﻠﻪ ..
ﻋﻠﻴﺎ ﺷﺒﺤﺖ ﻟﺒﻮﻫﺎ ﻭﺍﺑﺘﺴﻤﺖ ﻟﻜﻼﻣﻪ ...
....
ﻓﻲ ﺣﻮﺵ ﻋﺎﺑﺪ ﺍﻟﺼﺎﺩﻕ ..
ﻋﺎﺑﺪ ﻣﺮﻛﺰ ﻛﻮﻳﺲ ﻓﻲ ﺍﻟﺤﻠﻘﻪ ...
ﺟﻨﺎﻥ : ﺧﺎﻳﻔﻪ ﻉ ﻋﻤﻲ ﻫﻠﺒﻪ ..
ﺧﻮﻟﻪ : ﻭﺍﻟﻠﻪ ﺣﺘﻰ ﺍﻧﻲ ..
ﻭﺳﻴﻠﻪ : ﻛﺎﻥ ﻳﻔﻮﺕ ﺍﻟﺴﻴﺎﺳﻪ ﻭﺍﻳﺎﻣﻬﺎ ﺍﻟﺴﻮﺩ
ﻋﺎﺑﺪ ﺗﻠﻔﺘﻠﻬﻢ ﻭﺍﺑﺘﺴﻢ : ﻣﺎﻳﺼﻴﺮﻟﻪ ﺷﻲ ﺇﻥ ﺷﺎﺀ ﺍﻟﻠﻪ ..
ﻭﺳﻴﻠﻪ : ﻭﺷﻦ ﺿﻤﻨﻚ ..
ﻋﺎﺑﺪ ﺑﺈﺑﺘﺴﺎﻣﻪ : ﺑﻌﺪ ﺭﺑﻲ ... ﺍﻟﺤﺴﻦ .. ﻭﺭﺟﻊ ﺗﻠﻔﺖ ﻟﻠﺘﻠﻔﺰﻳﻮﻥ ﻭﻳﺘﻔﺮﺝ ..
***
ﺍﻟﺤﺴﻦ ﻛﺎﻥ ﻣﻊ ﺍﻟﻌﻘﻴﺪ ﻭﺿﺒﺎﻁ ﻭﻋﻨﺎﺻﺮ ﻣﻌﺎﻩ ﻳﺘﻔﺮﺟﻮﺍ ﻉ ﺍﻟﺤﻠﻘﻪ ..
ﺟﺎﺩ ﺍﻟﻠﻪ : ﻋﻤﻚ؟
ﺍﻟﺤﺴﻦ ﻫﺰ ﺭﺍﺳﻪ ﺑﺈﻳﺠﺎﺏ ﻭﻫﻮ ﻳﺘﻔﺮﺝ ..
ﺟﺎﺩ ﺍﻟﻠﻪ ﺭﺟﻊ ﻳﺘﻔﺮﺝ : ﻳﺠﻴﺐ ﻟﺮﻭﺣﻪ ﻓﻲ ﻭﺟﻊ ﺭﺍﺳﻪ ﻫﻠﺒﻪ ..
ﺍﻟﺤﺴﻦ ﺍﺑﺘﺴﻢ ﺑﺘﻬﻜﻢ ﻭﻣﺎﻋﻠﻘﺶ ..
***
ﻫﻤﺎ ﻫﺎﺩﻡ ﺟﻤﺎﻋﺔ ﺍﻟﻔﻠﻮﺱ .. ﺭﺑﻚ ﻣﻮﺳﻌﻬﺎ ﻋﻠﻴﻬﻢ ﻟﻜﻦ ﻫﻤﺎ ﻣﺎﻳﻘﻨﻌﻮﺵ ﺑﺎﻟﺬﺍﺕ ﻟﻮ ﻛﻠﻮﺍ ﺣﺮﺍﻡ ﻣﺴﺘﺤﻴﻞ ﻣﺎﺯﺍﻝ ﻳﺸﺒﻌﻮﺍ .
ﺑﻼﻝ ﻳﺴﻤﻊ ﻓﻲ ﺍﻣﻪ ﺷﻦ ﺗﻘﻮﻝ ﻭﻋﻴﻮﻧﻪ ﻓﻲ ﺍﻟﺘﻠﻔﺰﻳﻮﻥ .. ﺑﻌﺪﻳﻦ ﺳﺮﺡ ﺷﻮﻳﻪ ﻭﺍﺫﻛﺮ ﺍﻟﻠﻲ ﺻﺎﺭ ﺑﻴﻨﻪ ﻭﺑﻴﻦ ﺍﺑﺘﺴﺎﻡ ﺃﺧﺮ ﻣﺮﺓ ..
> ﺑﻼﻝ ﺑﻐﻀﺐ ﻭﻣﻀﻴﻖ ﻋﻴﻮﻧﻪ : ﻣﻦ ﻫﻮ ﺑﻮﻙ ﺑﺶ ﻧﺤﺎﻭﻝ ﻧﻮﺻﻠﻪ ؟ !! ﺑﻮﻙ ﻣﻌﺮﻭﻑ ﻭﺍﻟﻠﻲ ﻳﻨﻘﺎﻝ ﻋﻠﻴﻪ ﻣﺶ ﺧﺎﻓﻲ ﻋﻨﻚ .. ﻭﺍﻧﻲ ﺭﺍﺟﻞ ﻧﺎﻛﻞ ﻓﻲ ﻟﻘﻤﺘﻲ ﺑﺎﻟﺤﻼﻝ ..
ﺍﺑﺘﺴﺎﻡ ﺑﻐﻀﺐ : ﺑﻮﻱ ﺍﺷﺮﻑ ﻣﻨﻜﻢ ﻛﻠﻜﻢ ﺍﻟﻨﺎﺱ ﺍﻟﻠﻲ ﻳﻨﺎﻓﺲ ﻓﻴﻬﻢ ﺣﺎﻗﺪﻳﻦ ﻋﻠﻴﻪ ﻭﻣﻄﻠﻌﻴﻦ ﻋﻠﻴﻪ ﻫﺎﻹﻓﺘﺮﺍﺀﺍﺕ ﺑﺶ ﻳﺨﻠﻮﺍ ﺍﻟﻨﺎﺱ ﺗﻜﺮﻫﻪ ...
ﺑﻼﻝ ﺿﺤﻚ ﺑﺘﻬﻜﻢ : ﻃﺒﻴﻌﻲ ﺑﻮﻙ ﺑﺪﺍﻓﻌﻲ ﻋﻠﻴﻪ .. ﺑﺮﻏﻢ ﺍﻧﻲ ﺗﻮﻗﻌﺖ ﺍﻟﻌﻜﺲ ﻭﺣﺪﻩ ﺣﺎﻣﻠﻪ ﻛﺘﺎﺏ ﺍﻟﻠﻪ ﻣﻔﺮﻭﺽ ﺗﻜﻮﻥ ﻣﻊ ﺍﻟﺤﻖ ﺣﺘﻰ ﻟﻮ ﻛﺎﻥ ﺿﺪ ﺑﻮﻫﺎ ... ﻟﻜﻦ ﺷﻜﻠﻚ ﺣﺘﻰ ﺍﻧﻲ ﺗﻜﻤﻠﻲ ﻓﻲ ﺑﺮﺳﺘﻴﺞ ﺑﻮﻙ ﻗﺪﺍﻡ ﺍﻟﻨﺎﺱ ...
ﺍﺑﺘﺴﺎﻡ ﺭﺩﺕ ﻓﻌﻠﻬﺎ ﺍﻟﻮﺣﻴﺪﻩ ﻛﺎﻧﺖ ﺻﻔﻌﺔ ﻗﻮﻳﻪ ﻉ ﻭﺟﻬﻪ ﻭﺩﻣﻮﻋﻬﺎ ﻣﺒﺎﺷﺮﺓ ﻧﺰﻟﺖ ﺩﻓﺎﺗﻪ ﻭﻣﺸﺖ ﺗﺠﺮﻱ ﻟﻠﺤﻮﺵ ﻭﻫﻲ ﺗﺒﻜﻲ .. <<
ﺗﻨﻬﺪ ﻭﻣﺴﺢ ﻉ ﻭﺟﻬﻪ ﺑﺎﻳﺪﻩ ... ﻭﻛﻤﻞ ﻣﺘﺎﺑﻌﻪ ﻟﻠﺤﻠﻘﻪ ..
***
ﻓﻲ ﺣﻮﺵ ﺻﺎﺣﺐ ﺍﻟﺸﺄﻥ ..
ﻋﺒﺪﺍﻟﻘﺪﻭﺱ ﻳﺘﻔﺮﺝ ﻭﻛﺎﻥ ﺣﺎﻁ ﺭﺟﻞ ﻉ ﺭﺟﻞ ﻭﺍﻳﺪﻩ ﺗﺤﺖ ﺫﻗﻨﻪ ﻭﻣﺒﺘﺴﻢ ﺑﺘﻬﻜﻢ .. ﺑﻴﻨﻤﺎ ﺍﺑﺘﺴﺎﻡ ﺟﻨﺒﻪ ﺭﺟﻠﻬﺎ ﺗﻬﺰ ﻣﻦ ﺍﻟﻐﻀﺐ ..
ﺷﺒﺤﺖ ﻟﺒﻮﻫﺎ ﻫﻠﺒﻪ ﺑﻌﺪﻳﻦ ﻗﺎﻟﺖ : ﺷﻦ ﺭﺍﻳﻚ ﻓﻲ ﺍﻟﻠﻲ ﻳﻘﻮﻝ ﻓﻴﻪ ..
ﻋﺒﺪﺍﻟﻘﺪﻭﺱ : ﻗﻄﺎﻑ .
ﺍﺑﺘﺴﺎﻡ : ﻣﺶ ﺣﺘﺮﺩ ..
ﻋﺒﺪﺍﻟﻘﺪﻭﺱ : ﻣﺎﻳﺴﺘﺎﻫﻠﺶ ﺍﻟﺮﺩ
ﺍﺑﺘﺴﺎﻡ ﺑﻌﺼﺒﻴﻪ : ﻣﺎﻻ ﺷﻦ ﻫﻮ ﺍﻟﻠﻲ ﻳﺴﺘﺎﻫﻞ ﺍﻟﺮﺩ
ﻋﺒﺪﺍﻟﻘﺪﻭﺱ ﺷﺒﺤﻠﻬﺎ ﻭﺭﻓﻊ ﺣﻮﺍﺟﺒﻪ ..
ﺍﺑﺘﺴﺎﻡ ﺑﺼﻮﺕ ﻋﺎﻟﻲ ﻭﻧﺒﺮﺓ ﺑﺎﻛﻴﻪ : ﻳﺎﺑﺎﺑﺎ ﻷﻣﺘﻰ ﺑﺘﻘﻌﺪ ﻫﻜﻲ ﻣﺎﺗﺮﺩﺵ ﻋﻠﻴﻬﻢ ﺗﺨﻠﻲ ﻓﻴﻬﻢ ﻳﺸﻮﻫﻮﺍ ﻓﻴﻚ ﻭﺍﻧﺖ ﻣﺎﺗﺮﺩﺵ ﺍﻟﻨﺎﺱ ﺑﺪﺕ ﺗﺼﺪﻕ ﻳﺎﺑﺎﺑﺎ .. ﻓﻜﺮ ﻓﻴﺎ ﻳﺎﺑﺎﺑﺎ ﻓﻜﺮ ﻓﻴﺎ ﺭﺍﻧﻲ ﺑﻨﺘﻚ ﺍﻟﻨﺎﺱ ﻛﻠﻬﺎ ﺣﺘﻌﺎﻣﻠﻨﻲ ﻉ ﻫﺎﻷﺳﺎﺱ .. ﻭﻧﺎﺿﺖ ﺭﻛﺒﺖ ﻟﺪﺍﺭﻫﺎ ﻭﻫﻲ ﺗﺒﻜﻲ ..
ﻋﺒﺪﺍﻟﻘﺪﻭﺱ ﻛﺎﻥ ﻣﺼﺪﻭﻡ ﻟﺮﺩﺓ ﻓﻌﻠﻬﺎ ... ﺍﻭﻝ ﻣﺮﺓ ﺑﻨﺘﻪ ﺗﻜﻠﻤﻪ ﺑﻬﺎﻷﺳﻠﻮﺏ ﻭﺗﺠﺮﺣﻪ ﺑﻜﻼﻣﻬﺎ ... ﻗﺎﻡ ﺗﻠﻴﻔﻮﻧﻪ ﻭﻗﻌﺪ ﻳﻜﺘﺐ ﻓﻲ ﺭﺳﺎﻟﻪ ﻭﺑﻌﺘﻬﺎ ﻃﻮﻝ ...
...
ﻭﺻﻠﺖ ﺍﻟﺮﺳﺎﻟﻪ ﻟﻠﺸﺨﺺ ﺍﻟﻤﻌﻨﻲ ﺍﻟﻠﻲ ﺍﺑﺘﺴﻢ ﺗﻬﻜﻤﺎ ﻭﺭﺩ ﺑﺮﺳﺎﻟﻪ ﻭﺭﺟﻊ ﻳﺘﺎﺑﻊ ﻓﻲ ﻧﻔﺲ ﺍﻟﺤﻠﻘﻪ ..
***
ﺳﺮﻣﺪ ﺑﻌﺪ ﺗﻢ ﺍﻟﺤﻠﻘﻪ ﻭﻫﻮ ﻃﺎﻟﻊ ﻓﺘﺢ ﺗﻠﻴﻔﻮﻧﻪ ﻭﺟﺎﺗﻪ ﻛﻤﻴﺔ ﺭﺳﺎﺋﻞ ﻻﺣﺼﺮ ﻟﻬﺎ .. ﻭﻣﻨﻬﻢ ﺗﻬﺪﻳﺪ .. ﺿﺤﻚ ﻭﻛﻤﻞ ﻃﺮﻳﻘﻪ ﻟﺴﻴﺎﺭﺗﻪ
ﺭﻥ ﺗﻠﻴﻔﻮﻧﻪ ﺿﺤﻚ ﻟﻤﺎ ﺷﺎﻑ ﺍﻟﻤﺘﺼﻞ ﺭﺩ ﻃﻮﻝ ..
ﺳﺮﻣﺪﺑﻀﺤﻜﻪ : ﺣﺘﻬﺰﺏ ﻭﻻ ﺗﻤﺪﺡ
ﺍﻟﺤﺴﻦ : ﻋﻼﺵ ﻣﺎﻗﻠﺘﻠﻴﺶ ﻉ ﻣﻮﺿﻮﻉ ﺣﻠﻘﺘﻚ ﻫﺎﻟﻤﺮﺓ ..
ﺳﺮﻣﺪ : ﺍﻣﺘﻲ ﺷﻔﺘﻚ ﺑﺶ ﻧﻘﻮﻟﻚ
ﺍﻟﺤﺴﻦ : ﻭﺍﻷﺧﺘﺮﺍﻉ ﺍﻟﻠﻲ ﻗﺎﻋﺪ ﺗﺴﺘﻌﻤﻞ ﻓﻴﻪ ﺣﺎﻟﻴﺎ ! ؟
ﺳﺮﻣﺪ ﺿﺤﻚ ﻭﺳﻜﺖ ...
ﺍﻟﺤﺴﻦ : ﺍﻟﺼﺒﺢ ﺑﻨﻔﻄﺮ ﻣﻌﺎﻙ ..
ﺳﺮﻣﺪ : ﻫﻬﻬﻬﻬﻬﻬﻬﻪ ﻣﺮﺣﺒﺘﻴﻦ ﺑﻴﻚ ... ﻃﻮﻁ ﻃﻮﻁ ﻃﻮﻁ ... ﻫﻬﻬﻬﻬﻬﻬﻬﻬﻬﻬﻪ ﻣﺎﻳﻌﺮﻓﺶ ﻳﻨﻬﻲ ﻣﻜﺎﻟﻤﺎﺗﻪ ﺑﺬﻭﻕ ﺍﻟﺮﺍﺟﻞ ﻫﺎﺩﺍ .. ﻭﺭﻛﺐ ﺳﻴﺎﺭﺗﻪ ﻭﺗﺤﺮﻙ .. ﻭﻟﺤﻘﺎﺗﻪ ﻧﻔﺲ ﺍﻟﺴﻴﺎﺭﺓ .
ﻣﺘﺎﻉ ﻛﻞ ﻟﻴﻠﻪ ...
***
ﺗﺎﻧﻲ ﻳﻮﻡ ...
ﺳﺮﻣﺪ : ﺣﺎﻃﻪ ﻓﻲ ﺭﺍﺳﻲ ﻗﺪﺍﺵ ﻟﻴﺎ ﺑﺲ ﻛﻨﺖ ﻧﺴﺘﻨﻰ ﻓﻲ ﺍﻟﻔﺮﺻﻪ ...
ﺍﻟﺤﺴﻦ : ﺗﻤﻨﻴﺖ ﻟﻮﻗﻠﺘﻠﻲ ﻗﺒﻠﻬﺎ ..
ﺳﺮﻣﺪ ﻭﻫﻮ ﻳﺎﻛﻞ : ﺍﻣﻤﻢ .. ﻋﻼﺵ
ﺍﻟﺤﺴﻦ : ﻳﻜﻮﻥ ﻋﻨﺪﻱ ﻋﻠﻢ ﺑﺲ ..
ﺳﺮﻣﺪ : ﺷﻦ ﺻﺎﺭ ﻓﻴﻚ ﻣﻌﺎﻩ ...
ﺍﻟﺤﺴﻦ : ﻻﺟﺪﻳﺪ ...
ﺟﺘﻬﻢ ﺑﺮﻧﻴﻪ : ﻭﻫﺎﺩﻱ ﺯﻣﻴﺘﻪ ﺑﺰﻳﺖ ﺍﻟﺰﻳﺘﻮﻥ ..
ﺍﻟﺤﺴﻦ : ﻳﻌﻄﻴﻚ ﺍﻟﺼﺤﻪ ...
ﺳﺮﻣﺪ : ﺷﻴﺒﺎﻧﻲ ﺇﻻ ﺭﺑﻊ ..
ﺑﺮﻧﻴﻪ : ﻃﻴﺢ ﺳﻌﺪﻙ ﻫﺎﺩﻱ ﺍﻟﻠﻲ ﻓﻴﻬﺎ ﺍﻟﻔﺎﻳﺪﻩ ... ﺍﻧﺖ ﺷﻦ ﺗﻌﺮﻑ ...
ﺍﻟﺤﺴﻦ : ﺧﻠﻴﻪ ﻓﻲ ﺍﻟﺒﺎﻥ ﻛﻴﻚ ﻭﺍﻟﺒﺮﻳﻮﺵ ..
ﺳﺮﻣﺪ : ﻫﻬﻬﻬﻬﻬﻬﻬﻪ ﻭﻭﻭﺍﻙ ﺗﻼﻗﻴﺘﻮﺍ ﻋﻠﻴﺎ ... ﺣﺎﺱ ﺭﻭﺣﻲ ﻓﻲ ﺻﺮﺍﻉ ﺍﺟﻴﺎﻝ ...
ﺑﺮﻧﻴﻪ ﺗﻌﺒﺪ ﻓﻲ ﺍﻟﺰﻣﻴﺘﻪ : ﺷﻨﻮ ﻳﻘﻮﻝ ﻫﺬﺍ ..
ﺍﻟﺤﺴﻦ : ﻛﻮﻟﻲ ﻭﻓﻮﺗﻴﻪ ﻳﺎﺣﻨﺎﻱ ﺍﻟﻔﺎﻳﺪﻩ ﻫﻨﻲ ﻣﺶ ﻓﻲ ﻗﻄﺎﻓﻪ ..
ﺳﺮﻣﺪ 😂:
***
ﻓﻲ ﺍﻟﺠﺎﻣﻌﻪ ..
ﻋﻠﻴﺎ : ﺍﺑﺘﺴﺎﻡ ﺍﻧﺘﻲ ﻋﺎﺭﻓﻪ ﺭﻭﺣﻚ ﻭﻋﺎﺭﻓﻪ ﺑﻮﻙ ﻣﺎﻋﻠﻴﻚ ﻓﻲ ﺣﺪ
ﻧﺮﺟﺲ : ﺣﻨﻲ ﻧﻌﺮﻓﻮﻙ ﻛﻮﻳﺲ ..
ﺍﺑﺘﺴﺎﻡ ﺗﻨﻬﺪﺕ : ﻭﺍﻟﻨﺎﺱ ..
ﻋﻠﻴﺎ : ﻫﻤﺎ ﻫﻜﻲ ﻭﻻﻫﻜﻲ ﺑﻴﺘﻜﻠﻤﻮﺍ ﺷﻦ ﻋﻨﺪﻫﻢ ﺍﻟﻨﺎﺱ ﻓﻲ ﺑﻼﺩﻧﺎ ﻏﻴﺮ ﺍﻟﺘﻘﻄﻴﻊ ﻓﻲ ﺍﻟﻌﺒﺎﺩ ﻭﻣﺶ ﻣﻬﻢ ﻋﻨﺪﻫﻢ ﻛﻼﻣﻬﻢ ﺻﺢ ﻭﻻﻏﻠﻂ ..
ﻧﺮﺟﺲ : ﺍﻧﺘﻲ ﺧﻠﻴﻚ ﻭﺍﺛﻘﻪ ﻣﻦ ﻧﻔﺴﻚ ﻭﺣﻄﻲ ﻋﻴﻮﻧﻚ ﻓﻌﻴﻮﻧﻬﻢ ﺣﻴﻌﺮﻓﻮﺍ ﺍﻥ ﻧﻈﺮﺗﻬﻢ ﻭﻛﻼﻣﻬﻢ ﺯﺍﻳﺪ ﻧﺎﻗﺺ ..
ﺍﺑﺘﺴﺎﻡ : ﻧﺤﺒﻜﻢ ..
ﻋﻠﻴﺎ ﻭﻧﺮﺟﺲ ﺣﻀﻨﻮﻫﺎ ...
ﻋﻠﻴﺎ ﺑﻀﺤﻜﻪ : ﻭﺣﻨﻲ ﻧﻤﻮﺗﻮﺍ ﻓﻴﻚ ..
ﻧﺮﺟﺲ : ﺣﻴﻴﻲ ﻫﺬﺍﻛﺎ ﺍﻟﻮﻟﺪ ﻳﺎﺇﺑﺘﺴﺎﻡ ...
ﺍﺑﺘﺴﺎﻡ ﺷﺒﺤﺖ ﻭﻳﻦ ﻣﺎﺗﺸﺒﺢ ﻧﺮﺟﺲ ﻟﻘﺎﺗﻪ ﺑﻼﻝ ﻭﺍﻗﻒ ﻣﻦ ﺑﻌﻴﺪ ﻭﻳﺸﻮﻓﻠﻬﺎ ... ﻣﻦ ﺍﺧﺮ ﻣﺮﺓ ﺑﻌﺪ ﻫﺬﺍﻛﺎ ﺍﻟﻨﻘﺎﺵ ﻣﻌﺎﺵ ﺷﺎﻓﺎﺗﻪ ...
ﺍﺑﺘﺴﺎﻡ : ﻫﺬﺍ ﺍﻭﻝ ﻭﺍﺣﺪ ﻻﺯﻡ ﻧﺤﻂ ﻋﻴﻨﻲ ﻑ ﻋﻴﻨﻪ .. ﻧﺎﺿﺖ ﻃﻮﻝ ﻭﺗﻮﺟﻬﺘﻠﻪ ..
ﻋﻠﻴﺎ : ﻳﺎﻟﻄﻴﻒ ..
ﻧﺮﺟﺲ 😂:
ﻭﺻﻠﺖ ﻓﻴﻪ ﻭﻣﻼﻣﺤﻬﺎ ﻛﻠﻬﺎ ﻋﺼﺒﻴﻪ : ﺷﻦ ﻣﺎﺯﺍﻝ ﻓﻲ ﺍﺿﺎﻓﻪ ﻉ ﻛﻼﻡ ﺍﻟﻤﺬﻳﻊ ﻣﺘﺎﻉ ﺣﻠﻘﺔ ﺍﻣﺲ ﻗﻌﺪ ﻓﻲ ﺧﺎﻃﺮﻙ ﺑﺘﻘﻮﻟﻪ ..
ﺑﻼﻝ ﺍﺑﺘﺴﻢ ﻭﺑﻬﻴﺎﻡ : ﺍﻳﻪ ..
ﺍﺑﺘﺴﺎﻡ ﺗﻠﺨﺒﻄﺘﺖ ﻣﻦ ﻧﻈﺮﺍﺗﻪ ﺑﺲ ﺣﺎﻭﻟﺖ ﺗﺘﻤﺎﺳﻚ : ﻗﻮﻝ ..
ﺑﻼﻝ : ﻧﺤﺒﻚ 💓
ﺍﺑﺘﺴﺎﻡ ﺍﻧﺼﺪﻣﺖ ﻭﻗﻠﺒﻬﺎ ﻗﻌﺪ ﻳﺪﻕ ﺑﻌﻨﻒ ... ﻣﺶ ﻋﺮﻓﺖ ﺷﻦ ﺍﺩﻳﺮ ﻟﻔﺖ ﻭﻣﺸﺖ ﻭﻭﺟﻬﻬﺎ ﻃﻤﺎﻃﻢ .. ﻭﺣﺎﺳﻪ ﺣﺮﺍﺭﺗﻬﺎ ﺍﺭﺗﻔﻌﺖ ..
ﺑﻼﻝ ﺑﻀﺤﻜﻪ ﻭﺑﺼﻮﺕ ﻋﺎﻟﻲ : ﻓﻜﻜﻜﻜﺮﺭﺭﻱ ...
ﺍﺑﺘﺴﺎﻡ ﻭﺻﻠﺖ ﻓﻲ ﺻﺎﺣﺒﺘﻬﺎ ﻭﻫﻲ ﻣﺘﻠﺨﺒﻄﻪ : ﻫﻴﺎ ﻧﻮﺿﻮﺍ ﻧﻮﺿﻮﺍ ﻫﻴﺎ ..
ﻋﻠﻴﺎ : ﺧﻴﺮﻙ
ﺍﺑﺘﺴﺎﻡ ﻣﺸﺖ ﻭﺧﻠﺘﻬﻢ ..
ﻧﺮﺟﺲ ﺑﻀﺤﻜﻪ : ﺍﺷﺒﺢ ﺷﻦ ﻗﺎﻟﻠﻬﺎ ...
ﻋﻠﻴﺎ ﻣﻄﺖ ﺷﻮﺍﺭﺑﻬﺎ ﺑﺘﺴﺎﺅﻝ ﻭﻟﺤﻘﻮﻫﺎ ﺍﻟﺰﻭﺯ ...
...
ﻭﺍﻧﺘﻲ ﺍﻧﺨﺒﻄﺘﻲ ﻓﻴﻪ ﻓﻲ ﻫﺎﻟﻤﺮﺗﻴﻦ ﺍﻟﻠﻲ ﺷﻔﺘﻴﻪ ﻓﻴﻬﻢ ..
ﺟﻨﺎﻥ : ﺟﺬﺍﺏ ﻫﻠﺒﻪ ﻳﺎﻋﻼ ...
ﻋﻼ : ﺑﺲ ﻓﻜﺮﺗﻲ ﻓﻲ ﻟﻮﻧﻪ ...
ﺟﻨﺎﻥ : ﻛﻴﻒ؟
ﻋﻼ : ﺷﻦ ﻛﻴﻒ .. ﺍﻧﺘﻲ ﻓﺎﻫﻤﻪ ﻗﺼﺪﻱ
ﺟﻨﺎﻥ : ﺍﻭﻝ ﺷﻲ ﻛﻠﻪ ﻉ ﺑﻌﻀﻪ ﻣﺠﺮﺩ ﺍﻋﺠﺎﺏ .. ﻭﻟﻮ ﺭﺑﻲ ﻗﺪﺭ ﻟﻬﺎﻟﻤﺸﺎﻋﺮ ﺗﻄﻮﺭ .. ﻣﺎﻋﻨﺪﻳﺶ ﻣﺸﻜﻠﻪ ﻧﻬﺎﺋﻲ ﻭﻧﻈﺮﺓ ﺍﻟﺠﺎﻫﻠﻴﻪ ﺍﻷﻭﻟﻰ ﻫﺎﺩﻱ ﻋﻤﺮﻱ ﻣﺎﺗﺒﻨﻴﺘﻬﺎ ...
ﻋﻼ : ﺍﻫﻠﻚ ﻧﺎﺳﻚ ﻓﻜﺮﻱ ﻓﻲ ﻫﺎﺩﻡ ..
ﺟﻨﺎﻥ ﺧﺎﻓﺖ : ﺧﻼﺹ ﻋﺎﺩ ﻭﺍﻧﺘﻲ ﻛﺒﺮﺗﻴﻬﺎ ... ﺧﻞ ﻧﻤﺸﻮﺍ ﻧﺎﻛﻠﻮﺍ ﺣﺎﺟﻪ ﻗﺒﻞ ﺍﻟﻤﺤﺎﺿﺮﺓ ...
***
ﻣﻘﻌﻤﺰﺓ ﻓﻲ ﻧﻔﺲ ﺍﻟﺤﺪﻳﻘﻪ ﻣﻘﺎﺑﻠﻪ ﺗﻼﺟﺘﻬﺎ ﺍﻟﻠﻲ ﻓﻴﻬﺎ ﺍﻟﻄﻌﻤﻴﻪ ... ﻭﺗﺬﻛﺮ ﻓﻲ ﺍﻟﺤﺪﻳﺚ ﺍﻟﻠﻲ ﺳﻤﻌﺎﺗﻪ ﺩﺍﺭ ﺑﻴﻦ ﺑﻮﻫﺎ ﻭﺻﺪﻳﻘﻪ ...
ﻓﻼﺵ ﺑﺎﻙ ...
ﻣﺎﺷﻴﻪ ﺭﺍﻓﻌﻪ ﺻﻔﺮﻩ ﺍﻟﻘﻬﻮﺓ ﻭﻗﻔﺖ ﻟﻤﺎﺳﻤﻌﺖ ﺟﻤﻠﻪ ﺻﺪﻣﺘﻬﺎ ..
ﻳﻮﻧﺲ : ﻧﺒﻲ ﻧﺰﻭﺟﻬﺎ ﺯﻭﺍﺟﻪ ﺗﺮﻳﺤﻬﺎ ... ﻣﺶ ﺗﺘﺰﻭﺝ ﻭﺧﻼﺹ ..
ﻋﺎﺑﺪ : ﻋﺎﺭﻑ ﻭﻟﻬﺎﻟﺴﺒﺐ ﻣﺎﻟﻘﻴﺖ ﺣﺪ ﻳﺴﺘﺎﻫﻠﻬﺎ ..
ﻳﻮﻧﺲ ﺑﺄﻟﻢ : ﻗﻠﺒﻲ ﻭﺍﻛﻠﻨﻲ ﻋﻠﻴﻬﺎ ﻳﺎﻋﺎﺑﺪ ﻧﺒﻲ ﻧﻄﻤﻦ ﻋﻠﻴﻬﺎ ﻧﺒﻲ ﻧﺸﻮﻓﻬﺎ ﺗﺤﺖ ﺟﻨﺎﺡ ﺭﺍﺟﻞ ﺣﻘﺎﻧﻲ ﻳﺮﺩ ﺑﺎﻟﻪ ﻋﻠﻴﻬﺎ ﻭﻳﻌﻮﺿﻬﺎ ..
ﻋﺎﺑﺪ ﺗﻨﻬﺪ ﻭﺳﻜﺖ ..
ﺍﻟﻮﻗﺖ ﺍﻟﺤﺎﺿﺮ ..
ﻧﺎﺿﺖ ﻭﻗﻌﺪﺕ ﺍﺩﻭﺭ ﺑﻌﻴﻮﻧﻬﺎ ﻟﻴﻦ ﻟﻘﺖ ﻣﺒﺘﻐﺎﻫﺎ .. ﻭﻫﻲ ﻣﺘﻮﺗﺮﺓ ﺗﻮﺟﻬﺘﻠﻪ ﻟﻴﻦ ﻭﺻﻠﺖ ﻓﻴﻪ ..
ﻫﺎﻟﻪ ﻭﻋﻴﻮﻧﻬﺎ ﻟﻮﻃﺎ : ﺍﻟﺴﻼﻡ ﻋﻠﻴﻜﻢ ..
ﺧﺎﻟﺪ ﺑﺄﺑﺘﺴﺎﻣﻪ : ﻭﻋﻠﻴﻜﻢ ﺍﻟﺴﻼﻡ ..
ﻫﺎﻟﻪ : ﺍﺣﻤﻢ .. ﺧﺎﻟﺪ
ﺧﺎﻟﺪ : ﻧﺴﻤﻊ ﻓﻴﻚ ..
ﻫﺎﻟﻪ ﻭﻫﻲ ﺗﻔﺮﻙ ﻓﻲ ﺍﻳﺪﻳﻬﺎ ﺑﺒﻌﺾ : ﺍﺣﻤﻢ .. ﺍﻧﺖ ﻣﺎﺯﺍﻝ ..
ﺧﺎﻟﺪ ﻗﺎﻃﻌﻬﺎ : ﺍﻛﻴﺪ ﻣﺎﻻ ﻋﻼﺵ ﻳﻮﻣﻴﺎ ﺍﻧﻲ ﻫﻨﻲ ..
ﻫﺎﻟﻪ : ﺑﺎﻫﻲ ... ﺍﻧﻲ .. ﺍﺣﻤﻢ .. ﻣﻤﻮﺍﻓﻘﻪ ..
ﺧﺎﻟﺪ ﺑﻔﺮﺣﻪ : ﺍﻟﺤﻤﺪ ﻟﻠﻪ ﻫﺬﺍ ﻭﻳﻦ ﺍﺭﺗﺎﺡ ﻗﻠﺒﻲ ..
ﻫﺎﻟﻪ ﻣﺘﺤﺸﻤﻪ ﻭﻻﻛﻠﻤﻪ ...
ﺧﺎﻟﺪ : ﺧﻼﻝ ﻫﺎﻟﺸﻬﺮ ﻋﻨﺪﻱ ﺃﻣﻮﺭ ﻻﺯﻡ ﻧﺘﻤﻬﺎ .. ﺑﻌﺪﻳﻦ ﻧﺠﻴﺐ ﺍﻟﻌﻮﻳﻠﻪ ...
ﻫﺎﻟﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ .. ﻭﻟﻔﺖ ﻭﻣﺸﺖ ﻭﻫﻲ ﺗﺪﻋﻲ ﺭﺑﻲ ﻳﻘﺪﻣﻠﻬﺎ ﺍﻟﻠﻲ ﻓﻴﻪ ﺍﻟﺨﻴﺮ ﻭﻳﻜﻮﻥ ﺍﻟﻠﻲ ﺩﺍﺭﺗﻪ ﺻﺢ ..
***
ﻣﻘﻌﻤﺰﻳﻦ ﻓﻲ ﻭﺍﺣﺪ ﻣﻦ ﺍﻟﻤﻘﺎﻫﻲ ..
ﺭﺍﻣﻲ : ﺍﻟﻠﻴﻠﻪ ﻟﻴﻠﻪ %&¥$@
ﺣﺴﺎﻥ ﺑﻐﻤﺰﺓ : ﺷﻜﻠﻚ ﺟﺎﻳﺐ ﺣﺎﺟﺎﺕ ﺻﺢ
ﺭﺍﻣﻲ : ﻋﺎﺭﻓﻨﻲ ﺍﻧﺖ ..
ﺻﺎﺣﺒﻬﻢ ﺍﻟﺘﺎﻟﺖ : ﻛﻠﻪ ﻓﻲ ﺍﻟﺴﻠﻴﻢ ..
ﺭﺍﻣﻲ : ﺟﺪﻳﺪ ﺑﺴﻔﺎﺭﻩ ..
ﺣﺴﺎﻥ : ﺣﻠﻮﻭﻭﻭﻭ ﻫﻠﺒﻪ ... ﻗﺪﺍﺵ ﻟﻴﻨﺎ ﻉ ﺍﻟﺤﻠﻮ ﻭﺗﻮﺍﺑﻌﻪ ..
ﺭﺍﻣﻲ : ﺍﻟﻠﻴﻠﻪ ﺍﺷﺒﻊ ﻓﻴﻪ ..
ﺣﺴﺎﻥ : ﻫﻬﻬﻬﻬﻬﻬﻬﻪ ﺟﻨﺲ ﺣﻮﺍﺀ ﻣﺎﻳﻨﺸﺒﻌﺶ ﻣﻨﻪ ...
ﺿﺤﻜﻮﺍ ﻛﻠﻬﻢ ...
***
ﺍﺳﺘﺮﺍﺣﻪ ﻓﻲ ****
ﺍﻟﺤﺴﻦ : ﺍﻧﺴﻮﺍ ﺍﻧﻪ ﺧﻮﻱ .. ﺩﻳﺮﻭﺍ ﺍﻟﻼﺯﻡ ..
: ﺗﻤﺎﻡ ﻳﺎﻓﻨﺪﻱ ...
ﺻﻜﺮ ﺍﻟﺤﺴﻦ ﻭﻗﻌﺪ ﻳﺸﺒﺢ ﻟﻠﺨﺮﻳﻄﻪ : ﺭﺻﺪﻧﺎ ﺗﺤﺮﻛﺎﺗﻬﻢ .. ﻭﺍﺷﺮ ﺑﺼﻮﺍﺑﻌﻪ .. ﻓﻲ ﺣﺪﻭﺩ ﻫﺎﻟﻤﻨﻄﻘﻪ ..
ﻣﺤﻤﺪ ﺍﻟﻔﻬﺪ : ﺣﻴﺼﻴﺮ ﺷﻲ ﺧﻼﻝ ﺍﻷﻳﺎﻡ ﺍﻟﺠﺎﻳﻪ ..
ﺍﻟﺤﺴﻦ ﻭﻗﻒ ﻉ ﺣﻴﻠﻪ : ﺍﻟﻠﻲ ﻭﺻﻠﻨﻲ ﺻﻔﻘﺔ ﻛﺒﻴﺮﺓ ﺣﺘﻌﻘﺪ ﺑﻴﻦ ﺭﻭﺱ ﻛﺒﻴﺮﺓ ﻣﻦ ﺑﻴﻨﻬﻢ ..
ﻳﻮﺳﻒ ﺍﻟﺸﺎﺭﺩ ﺍﻟﻤﻠﻘﺐ ﺏ " ﺷﺮﻭﺩﺓ "
ﻭﻣﻨﺬﺭ ﺍﻟﺤﺎﻓﻆ ﺍﻟﻤﻠﻘﺐ ﺏ " ﺑﻮﻛﺸﺎﺵ "
ﻣﺤﻤﺪ ﺍﻟﻔﻬﺪ : ﻓﻲ ﺍﻳﺪ ﺧﻔﻴﻪ ﻗﺎﻋﺪﺓ ﺗﺘﺤﻜﻢ ﺑﺎﻟﻤﺸﻬﺪ ﻛﻠﻪ ..
ﺍﻟﺤﺴﻦ : ﺍﻛﻴﺪ ... ﺣﻴﺠﻲ ﻳﻮﻡ ﻭﻧﻮﺻﻠﻮﺍ ﻓﻲ ﻫﺎﻹﻳﺪ ﻭﻧﻘﺼﻮﻫﺎ ﻣﻦ ﻣﻨﺒﺘﻬﺎ ...
***
ﻣﺎﺷﻲ ﺟﺎﻱ ﻳﺘﻜﻠﻢ ﺑﺎﻟﺘﻠﻴﻔﻮﻥ ..
ﻣﻨﺬﺭ : ﻛﻞ ﺷﻲ ﻣﺎﺷﻲ ﺯﻱ ﻣﺎﻧﺒﻮﺍ
: ﺷﺮﻭﺩﺓ ﺑﺪﻱ ﻟﺒﺰ ﺭﺩ ﺑﺎﻟﻚ
ﻣﻨﺬﺭ ﺑﺈﺑﺘﺴﺎﻣﺔ ﻣﻜﺮ : ﻣﺎﺗﻔﻜﺮﺵ ﻓﻲ ﺷﻲ ﻛﻮﻥ ﻫﺎﻧﻲ .. ﺍﻳﻴﻴﻪ .. ﺍﻟﻮﻟﺪ ﺍﻟﻠﻲ ﻓﺒﺮﻧﺎﻣﺞ ﺍﻣﺲ ﻣﺶ ﻻﺯﻡ ﻳﻨﻘﺺ ﻟﺴﺎﻧﻪ ..
: ﻣﺶ ﻣﻬﻢ ﺗﻮﺍ ... ﺗﻮ ﻧﻔﻀﻮﺍ ﺑﻴﻪ .. ﺗﻮﺍ ﺭﻛﺰﻭﺍ ﻓﻲ ﺍﻟﺼﻔﻘﺔ .. ﺭﺍﻩ ﻫﺎﺩﻱ ﻟﻮ ﺧﺴﺮﻧﺎﻫﺎ ﺣﻨﺨﺴﺮﻭﺍ ﻣﻼﻳﻴﻦ ﺍﻟﺪﻭﻻﺭﺍﺕ .. ﻭﺍﻧﻲ ﻭﻗﺘﻬﺎ ﺣﻨﺨﺴﺮ ﻫﻠﺒﻪ ﻧﺎﺱ ﺍﺭﻭﺍﺣﻬﺎ ..
ﻣﻨﺬﺭ : ﺍﻃﻤﻦ ﻳﺎﻛﻮﻣﺎﻧﺪﺍ ﻛﻞ ﺷﻲ ﺣﻴﻤﺸﻲ ﺯﻱ ﺍﻟﺴﺎﻋﻪ
: ﻧﻌﺒﺎ ﻋﻠﻴﻚ
ﻣﻨﺬﺭ : ﻭﻋﺒﺎﻧﺎ ﻉ ﺍﻟﻠﻪ ... ﻫﻬﻬﻬﻬﻬﻬﻬﻬﻬﻬﻬﻪ
: ﻫﻬﻬﻬﻬﻬﻬﻬﻬﻬﻬﻬﻬﻬﻪ
***
ﻓﻲ ﺍﻟﻠﻴﻞ ...
ﻓﻲ ﻭﺣﺪﻩ ﻣﻦ ﺍﻻﺳﺘﺮﺍﺣﺎﺕ ..
ﺍﺻﻮﺍﺕ ﺿﺤﻜﺎﺕ ﻣﺎﺟﻨﻪ ﻭﻣﻮﺳﻴﻘﻰ ﺻﺎﺧﺒﻪ ... ﻗﻄﻊ ﻫﺬﺍ ﻛﻠﻪ ﺍﻗﺘﺤﺎﻡ ﻟﻮﺣﺪﺓ ﻣﻜﺎﻓﺤﻪ ﺍﻋﻤﺎﻝ ﺍﻟﺪﻋﺎﺭﺓ ... ﻗﺒﻀﻮﺍ ﻉ ﻛﻞ ﺍﻟﻤﻮﺟﻮﺩﻳﻦ ﺩﺍﺧﻞ ﻭﻣﻦ ﺑﻴﻨﻬﻢ ... ﺣﺴﺎﻥ ...
... ﻳﺘﺒﻊ
