#الحسن
ﺍﻟﺠﺰﺀ ﺍﻟﺴﺎﺩﺱ ﻭﺍﻟﺨﻤﺴﻴﻦ 🖤💔
صورة 3.5K صورة 98 صورة 11
ﺑﻮﺍﺳﻄﺔ GomanFared
ﺳﻴﺎﺭﺍﺕ ﺍﺳﻌﺎﻑ ... ﻧﺎﺱ ﻣﺘﺠﻤﻬﺮﺓ ... ﻣﺮﺍﺳﻠﻴﻦ ﻗﻨﻮﺍﺕ ... ﻛﺎﻣﻴﺮﺍﺕ ..
ﺍﺷﻼﺀ .. ﺩﻣﺎﺀ ... ﻭﺍﻟﻤﻄﺮ ﺗﺼﺐ ...🌧 ﻭﻫﻮ ﻭﺍﻗﻒ ﻳﺘﻔﺮﺝ ﺑﺼﺪﻣﻪ ﺷﺪﻳﺪﻩ ﻭﺣﺎﻁ ﺍﻳﺪﻳﻪ ﻓﻨﺼﻪ .. ﺷﻦ ﻗﺎﻋﺪ ﻳﺼﻴﺮ ... ﻋﻼﺵ ﻗﺎﻋﺪ ﻧﺨﺴﺮ ﻓﻲ ﺍﻟﻨﺎﺱ ﺍﻟﻠﻲ ﺣﻮﺍﻟﻴﺎ ﻭﺍﺣﺪ ﻭﺭﺍ ﺍﻟﺘﺎﻧﻲ .. ﻛﺎﻥ ﻳﺴﺄﻝ ﻓﻲ ﻧﻔﺴﻪ ﻫﺎﻷﺳﺌﻠﻪ .. ﻛﺎﻥ ﺣﺎﺱ ﺑﻀﻌﻒ ﺷﺪﻳﺪ ﻭﻫﺬﺍ ﺍﻛﺜﺮ ﺷﻲ ﻛﺎﻥ ﻳﻜﺮﻩ ﻳﻌﻴﺸﻪ ... ﻳﻬﺮﺏ ﻣﻨﻪ ..
" ﺍﻧﺘﻘﻤﻮﺍ .."
ﻳﺴﻤﻊ ﻓﻲ ﺯﻣﻴﻠﻪ ﺍﻟﻠﻲ ﺟﻲ ﻣﺬﻋﻮﺭ ﻟﻤﻜﺎﻥ ﺍﻹﻧﻔﺠﺎﺭ ..
ﺍﺣﻤﺪ : ﻓﺠﺮﻭﺍ ﺣﺘﻰ ﻣﺮﻛﺰ ﻣﻜﺎﻓﺤﺔ ﺍﻹﺭﻫﺎﺏ .. ﺍﻧﺘﻘﺎﻡ ﻭﺍﺿﺢ ..
ﺍﻟﺤﺴﻦ ﻳﺴﻤﻊ ﻭﺳﺎﻛﺖ ﻣﺶ ﻗﺎﺩﺭ ﻳﻔﻜﺮ ﻭﻻﻋﺎﺭﻑ ﻳﺪﻳﺮ ﺷﻲ ..
ﺍﺣﻤﺪ ﻳﺸﺒﺤﻠﻪ : ﺍﻟﺤﺴﻦ ..
ﺍﻟﺤﺴﻦ ﺑﺘﻮﻫﺎﻥ : ﻛﺎﻥ ﻳﻜﻠﻢ ﻓﻴﺎ .. ﻓﺮﺣﺎﻥ .. ﻭﻻ ﺟﺪ .. ﻣﺶ ﻋﺎﺭﻑ .. ﻭﻫﻮ ﻳﻜﻠﻢ ﻓﻴﺎ ﺳﻤﻌﺖ ﺻﻮﺕ ﺍﻹﻧﻔﺠﺎﺭ ﻭﻣﻌﺎﺵ ﺳﻤﻌﺘﻠﻪ ﺣﺲ ..
ﺍﺣﻤﺪ ﺍﻧﺼﺪﻡ ﻓﻬﻢ ﺍﻥ ﺍﻟﻌﻤﻴﺪ ﺟﺎﺩ ﺍﻟﻠﻪ ﻛﺎﻥ ﻣﻮﺟﻮﺩ ﻟﺤﻈﻪ ﺍﻹﻧﻔﺠﺎﺭ ... ﻳﻌﻨﻲ ... ﺍﺷﻼﺋﻪ ﻣﻦ ﺿﻤﻦ ﺍﻷﺷﻼﺀ ﺍﻟﻠﻲ ﻳﻠﻤﻮﺍ ﻓﻴﻬﺎ ﺗﻮﺍ ... ﻳﻌﻨﻲ ﺃﻫﻠﻪ ﺑﺪﻝ ﻣﺎﻳﻔﺮﺣﻮﺍ ﺑﺄﻭﻝ ﺣﻔﻴﺪ ﻟﻠﻌﻴﻠﻪ .. ﺣﻴﻨﺼﺒﻮﺍ ﺧﻴﻤﺔ ﻋﺰﻱ ﺟﺪﻩ ...💔
ﺍﻟﺤﺴﻦ ﻟﻴﻠﺘﻬﺎ ﻛﺎﻥ ﺿﻌﻴﻒ ﻭﻣﻨﻬﺎﺭ ﻣﻦ ﺩﺍﺧﻞ ﻟﺪﺭﺟﺔ ﺍﻧﻪ ﻣﺎﻗﺪﺭﺵ ﻳﻘﻌﺪ ﻓﻲ ﺍﻟﻤﻜﺎﻥ ﺍﻧﺴﺤﺐ .. ﻭﻗﻌﺪ ﻳﻤﺸﻲ ﻭﻳﻤﺸﻲ ﻭﺍﻟﻤﻄﺮ ﺗﺼﺐ ... ﻣﺶ ﻋﺎﺭﻑ ﻭﻳﻦ ﻳﻤﺸﻲ ﻭﻻﺷﻨﻮ ﻳﺪﻳﺮ .. ﻗﻌﻤﺰ ﻉ ﺍﻟﺮﺻﻴﻒ ﺑﺈﺣﺒﺎﻁ ﺷﺪﻳﺪ ... ﻭﺣﻂ ﺍﻳﺪﻳﻪ ﻉ ﺭﺍﺳﻪ ﻭﻗﺎﻋﺪ ﻓﻲ ﺣﺎﻟﺔ ﺻﺪﻣﻪ ...
ﻋﻠﻴﺎ ﻓﻲ ﻫﺪﻳﻜﺎ ﺍﻟﻠﻴﻠﻪ ﻭﻟﻤﺎ ﺳﻤﻌﺖ ﺑﺎﻟﻠﻲ ﺻﺎﺭ ﻣﺎﻗﺪﺭﺗﺶ ﺗﺘﺤﻤﻞ .. ﻃﻠﻌﺖ ﺑﺪﻭﻥ ﻋﻠﻢ ﺍﻟﺠﻤﻴﻊ ﺧﺪﺕ ﺗﺎﻛﺴﻲ .... ﻭﻣﺸﺖ ﻟﻠﻤﺮﻛﺰ .. ﻛﺎﻧﺖ ﻋﺎﺭﻓﻪ ﺍﻥ ﺭﺍﺟﻠﻬﺎ ﺣﻴﻜﻮﻥ ﻓﻲ ﺃﺿﻌﻒ ﺣﺎﻻﺗﻪ ..
ﺣﺎﺳﻪ ﻣﻦ ﻓﺘﺮﻩ ﺍﻧﻪ ﻣﺶ ﺍﻟﺤﺴﻦ ﺍﻷﻭﻝ ﺑﻜﻞ .. ﻭﺻﻠﺖ ﻏﺎﺩﻱ ﻭﻧﺰﻟﺖ ﻭﻫﻲ ﻣﺼﺪﻭﻣﻪ ﻓﻲ ﺍﻟﻠﻲ ﺗﺸﺒﺢ ﻓﻴﻪ ﺑﻌﺪﻳﻦ ﻗﻌﺪﺕ ﺍﺩﻭﺭ ﻋﻠﻴﻪ .. ﺷﺎﻓﻬﺎ ﺳﺎﻣﺮ ﺍﺳﺘﻐﺮﺏ ﺷﻦ ﺩﻳﺮ ﻣﺮﺍﺓ ﻫﻨﻲ ﻓﻬﺎﻟﻤﻜﺎﻥ ..
ﺳﺎﻣﺮ ﻗﺪﻣﻠﻬﺎ : ﻋﻔﻮﺍ ﻳﺎﺍﺧﺘﻲ ﻣﻤﻨﻮﻉ ﺗﺨﺸﻲ ﻫﻨﻲ ..
ﻋﻠﻴﺎ ﺍﺩﻭﺭ ﺑﻌﻴﻮﻧﻬﺎ ﺍﻟﻤﺪﻣﻌﺎﺕ : ﺍﻟﻌﻘﻴﺪ ﺍﻟﺤﺴﻦ ﻭﻳﻨﻪ ..
ﺳﺎﻣﺮ : ﻗﺮﻳﺒﺘﻪ ..
ﻋﻠﻴﺎ ﺷﺒﺤﺘﻠﻪ ﺑﺤﺪﻩ : ﻭﻳﻨﻪ ..
ﺳﺎﻣﺮ ﺍﺭﺗﺒﻚ : ﻛﺎﻥ ﻫﻨﻲ ﻭﻣﺸﻲ ﻟﻜﻦ ﺳﻴﺎﺭﺗﻪ ﻗﺎﻋﺪﻩ ...
ﻗﺎﻟﺖ ﻓﻲ ﻧﻔﺴﻬﺎ ﺍﻧﻪ ﻗﺮﻳﺐ ﻣﻦ ﻫﻨﻲ .. ﺗﺠﺎﻫﻠﺖ ﻛﻞ ﺷﻲ ﻭﻣﺸﺖ .. ﻭﺳﺎﻣﺮ ﻳﺸﺒﺤﻠﻬﺎ ﻭﺧﻼﺹ ..
ﺟﺎﻩ ﺍﺣﻤﺪ : ﻣﻦ ﻫﻲ ﻫﺎﺩﻱ ..
ﺳﺎﻣﺮ ﺑﺈﻋﺠﺎﺏ : ﺷﻜﻠﻬﺎ ﻗﺮﻳﺒﺔ ﺍﻷﻓﻨﺪﻱ ..
ﺍﺣﻤﺪ ﻳﺸﺒﺤﻠﻪ : ﺳﺎﺍﺍﺍﻣﺮ ..
ﺳﺎﻣﺮ ....😨: ﺍﺳﻒ ..
ﺍﺣﻤﺪ ﺷﺒﺤﻠﻪ ﺑﺤﺪﻩ ﻭﻣﺸﻲ ﻭﺳﺎﻣﺮ ﺍﻧﺤﺮﺝ ﻫﻠﺒﻪ ..
💔 ﻋﻠﻴﺎ ﻣﺎﺷﻴﻪ ﻭﺍﺩﻭﺭ ﻭﻣﺶ ﺧﺎﻳﻔﻪ ﺑﻜﻞ ﺍﻟﺪﻧﻴﺎ ﻟﻴﻞ ﻭﻣﺎﻓﻴﺶ ﻫﺬﺍﻛﺎ ﺍﻷﻣﺎﻥ .. ﻣﺎﻛﻨﺘﺶ ﻣﻬﺘﻤﻪ ﻟﺸﻲ ﻏﻴﺮﻩ ﻫﻮ .. ﺗﻤﺸﻲ ﻭﺍﺗﺒﻠﺖ ﻣﻦ ﺍﻟﻤﻄﺮ ﻭﺗﻔﻜﺮ ﻓﻴﻪ ﻭﺗﻘﻮﻝ : ﺍﻛﻴﺪ ﻳﻘﻄﺮ ﺗﻘﻄﻴﺮ ﺗﻮﺍ ...
ﻟﻴﻦ ﻟﻤﺤﺎﺗﻪ ﻣﻘﻌﻤﺰ ﻉ ﺍﻟﺮﺻﻴﻒ ﺍﻳﺪﻳﻪ ﻉ ﺭﺍﺳﻪ .. ﻗﻠﺒﻬﺎ ﺍﻧﻔﻄﺮ 💔 ﻣﻦ ﺍﻟﻠﻲ ﺷﺎﻓﺎﺗﻪ ﻣﺸﺘﻠﻪ ﺗﺠﺮﻱ .. ﻗﻌﻤﺰﺕ ﺣﺪﺍﻩ ..
ﻋﻠﻴﺎ ﺑﺪﻣﻮﻉ : ﺣﺒﻴﺒﻲ ..
ﺍﻟﺤﺴﻦ ﺍﻧﺼﺪﻡ ﻭﺗﻠﻔﺘﻬﺎ ﻣﻼﻣﺢ ﻭﺟﻬﻬﺎ ﻭﻟﺖ ﺗﺨﻮﻑ : ﺷﻦ ﺟﺎﺑﻚ ﻫﻨﻲ ..
ﻋﻠﻴﺎ ﺑﺮﻏﻢ ﺧﻮﻓﻬﺎ ﺟﺎﻭﺑﺖ : ﺟﻴﺖ .. ﻧﺸﻮﻓﻚ ..
ﺍﻟﺤﺴﻦ ﻓﻲ ﻗﻤﺔ ﺍﻟﻐﻀﺐ ﻭﺍﻟﻌﺼﺒﻴﻪ ﻧﺎﺽ ﻭﻗﻒ : ﺍﻧﺘﻲ ﻣﻬﺒﻮﻟﻪ .. ﻣﺎﻓﻴﺶ ﻋﻘﻞ ﻫﻨﻲ ﺑﻜﻞ .. ﻭﺍﺷﺮ ﻉ ﺭﺍﺳﻪ .. ﻃﺎﻟﻌﻪ ﻓﻮﻗﺖ ﺯﻱ ﻫﺬﺍ .. ﺳﻜﺖ ﺷﻮﻳﻪ ﻭﺭﻓﻊ ﺣﻮﺍﺟﺒﻪ ... ﻭﺑﻨﺒﺮﺓ ﺳﺨﺮﻳﻪ ... ﻭﺧﻄﻤﺘﻲ ﻉ ﺍﻟﻤﺮﻛﺰ .. ﻭﺷﺎﻓﻮﻙ ﺍﻟﻠﻲ ﻏﺎﺩﻱ ﻛﻠﻬﻢ ... ﻣﻼﻣﺢ ﻭﺟﻬﻪ ﻭﻟﺖ ﺗﺨﻮﻑ ﺍﻛﺜﺮ .. ﺗﻲ ﺷﻦ ﻫﺎﻟﻌﺎﺭ ﺍﻟﻠﻲ ﺩﺭﺗﻴﻪ ﻳﺎﻣﺪﺍﻡ .. ﻭﻻﺧﺪﻳﺘﻲ ﻋﻠﻴﻪ ﺧﻼﺹ ..
ﻋﻠﻴﺎ ﻛﻠﻤﺘﻪ ﺍﻷﺧﻴﺮﻩ ﻣﻮﺱ ﻭﺧﺶ ﻗﻠﺒﻬﺎ .. ﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ﻣﻦ ﺍﻟﺼﺪﻣﻪ ﻣﺎﻗﺪﺭﺗﺶ ﺗﺮﺩ ﺑﻜﻞ ... ﺗﻐﻴﺮﺕ ﻣﻼﻣﺢ ﻭﺟﻬﻬﺎ ﻓﻲ ﻟﺤﻈﻪ ﻟﻠﺤﺪﻩ ﻭﻧﻈﺮﺗﻬﺎ ﻟﻠﺒﺮﻭﺩ ... ﺷﺒﺤﺘﻠﻪ ﻫﻠﺒﻪ ﺑﻌﺪﻳﻦ ﻣﺸﺖ ﻭﺧﻼﺗﻪ ..
ﻫﻮ ﺍﺳﺘﺎﻗﺾ ﻟﺮﻭﺣﻪ ﺷﻦ ﻗﺎﻝ .. ﻫﻮﻛﺎﻥ ﻳﺒﻲ ﻳﻔﺶ ﻏﻠﻪ ﻭﺧﻼﺹ .. ﻭﺟﺖ ﻓﻴﻬﺎ ﻫﻲ ... ﺗﻠﻔﺖ ﻳﺸﻮﻓﻠﻬﺎ ﻭﻫﻲ ﺗﻤﺸﻲ ﺑﺮﻭﺣﻬﺎ ﻟﺤﻘﻬﺎ ﺑﺴﺮﻋﻪ ...
ﻋﻠﻴﺎ ﺩﻣﻮﻋﻬﺎ ﻳﻨﺰﻟﻮﺍﻭﻗﻠﺒﻬﺎ ﻳﻨﺰﻑ ﻣﺶ ﻣﺼﺪﻗﻪ ﻛﻴﻒ ﺍﻟﺤﺴﻦ ﻳﺠﺮﺣﻬﺎ ﺟﺮﺡ ﺯﻱ ﻫﺬﺍ ..
ﺍﻟﺤﺴﻦ ﻳﻤﺸﻲ ﻭﺭﺍﻫﺎ ﺑﺴﺮﻋﻪ : ﻋﻠﻴﺎ ... ﻋﻠﻴﺎ ...
ﻭﻫﻲ ﻭﻻ ﺑﺖ ﺗﻌﺪﻝ ﻋﻠﻴﻪ ..
ﺍﻟﺤﺴﻦ ﺳﺮﻉ ﺧﻄﻮﺗﻪ ﻭﺷﺪﻫﺎ ﻣﻦ ﺫﺭﺍﻋﻬﺎ ..
ﻋﻠﻴﺎ ﻏﻤﻀﺖ ﻋﻴﻮﻧﻬﺎ ﻭﺑﻌﻴﺎﻁ : ﻣﺎﺗﻤﺴﻨﻴﻴﻴﺶ ..
ﺍﻟﺤﺴﻦ ﺃﺗﺄﻟﻢ ﻫﻠﺒﻪ ﻹﻥ ﻋﺎﺭﻑ ﺍﻧﻬﺎ ﺗﺘﻮﺟﻊ ﻣﻨﻪ ﺑﺸﺪﻩ ...
ﺍﻟﺤﺴﻦ ﺑﺼﻮﺕ ﻧﺒﺮﺗﻪ ﻣﺨﻨﻮﻗﻪ : ﻧﺮﻭﺡ ﺑﻴﻚ ..
ﻋﻠﻴﺎ ﻟﻔﺖ ﻭﺟﻬﻬﺎ ﻟﻴﻪ ﻭﺑﺤﺪﻩ : ﺣﻨﺮﻭﺡ ﻣﻌﺎﻙ ﻟﺴﺒﺐ ﻭﺍﺣﺪ .. ﺑﺶ ﻣﺎﻧﺪﻳﺮﻟﻜﺶ ﺍﻟﻌﺎﺭ ﻳﺎﺃﻓﻨﺪﻱ ...
ﻣﺸﺖ ﻗﺪﺍﻣﻪ ﻭﻫﻮ ﻣﺸﻲ ﻭﺭﺍﻫﺎ ﻟﻴﻦ ﻭﺻﻠﻮﺍ ﻓﻲ ﺍﻟﺴﻴﺎﺭﺓ ﺭﻛﺒﺖ ﻭﻫﻮ ﺭﻛﺐ ... ﻃﻮﻝ ﺍﻟﻄﺮﻳﻖ ﻛﺎﻧﻮﺍ ﺳﺎﻛﺘﻴﻦ ﻫﻲ ﺩﻣﻮﻋﻬﺎ ﺗﻨﺰﻝ ﻭﺗﺸﺒﺢ ﺑﺲ ﻟﻠﺮﻭﺷﻦ ﻭﻫﻮ ﻳﻔﻜﺮ ﻓﻲ 100 ﻫﻢ .. ﻭﻗﻠﺒﻪ ﻳﻠﻮﻡ ﻓﻴﻪ ﻹﻧﻪ ﺟﺮﺣﻬﺎ ﺑﻘﺴﻮﺓ ﺷﺪﻳﺪﻩ ... ﺟﺮﺡ ﺻﻌﺐ ﻳﻐﺘﻔﺮ ..💔
ﻭﺻﻠﻮﺍ ﻟﻠﺤﻮﺵ .. ﻣﺎﺑﺘﺶ ﺗﻨﺰﻝ .. ﻭﻫﻮ ﻓﻬﻢ ﻗﺼﺪﻫﺎ ﻧﺰﻝ ﻓﺘﺢ ﺍﻟﺒﺎﺏ ﻭﻭﺧﺮ ﻭﻫﻲ ﻧﺰﻟﺖ ﻭﺧﺸﺖ ﻃﻮﻝ ... ﺧﺶ ﻭﺭﺍﻫﺎ ﻟﻘﺎﻫﺎ ﻭﺍﻗﻔﻪ ﺟﺎﺗﻪ ﻗﺪﻣﺘﻠﻪ ..
ﻋﻠﻴﺎ : ﻏﺪﻭﺓ ﻣﻦ ﻳﺼﺒﺢ ﺍﻟﺼﺒﺢ .. ﺣﻨﻜﻠﻢ ﺧﻮﻱ ﻳﺠﻲ ﻳﺮﻓﻌﻨﻲ .. ﻣﺎﺩﺍﻡ ﻃﻠﻌﺖ ﻣﺘﺎﻉ ﻋﺎﺭ ﻭﻭﺍﺧﺪﻩ ﻉ ﺍﻟﻌﺎﺭ ﻣﺎﻧﻠﺰﻣﻜﺶ ..
ﺍﻟﺤﺴﻦ ﺷﺒﺤﻠﻬﺎ ﻫﻠﺒﻪ ﺑﻌﺪﻳﻦ ﻗﺎﻝ ﻣﻦ ﻭﺭﺍ ﻗﻠﺒﻪ : ﺩﻳﺮﻱ ﺍﻟﻠﻲ ﻳﺮﻳﺤﻚ .. ﻭﻟﻒ ﻭﻃﻠﻊ ..
ﻭﻋﻠﻴﺎ ﻣﺼﺪﻭﻣﻪ ... ﺗﻠﻔﺖ ﺑﺘﺨﺶ ﻟﻘﺖ ﺳﺮﻣﺪ ﻭﺍﻗﻒ ﻓﻲ ﺍﻟﺮﻭﺷﻦ ﻳﺸﺒﺤﻠﻬﻢ ... ﻣﻂ ﺷﻮﺍﺭﺑﻪ ﻟﺪﺍﺧﻞ ﺑﺄﺳﻒ .. ﻭﻫﻲ ﺧﺸﺖ ﻃﻮﻝ ..
ﺳﺮﻣﺪ : ﻣﺶ ﺣﺘﻤﺸﻲ ﻟﻮﻻ ﻣﻜﺎﻥ ﻏﺪﻭﺓ ﺣﺘﻜﻮﻧﻲ ﻣﺠﺒﺮﺓ ﺍﻧﻚ ﺗﻘﻌﺪﻱ ... ﺻﻜﺮ ﺍﻟﺮﻭﺷﻦ ... ﻭﻃﻠﻊ ﻣﻦ ﺍﻟﻤﺮﺑﻮﻋﻪ ﻭﻓﻲ ﺍﻳﺪﻩ ﺍﻟﻼﺏ ﺗﻮﺏ .. ﻭﻣﺸﻲ ﻟﺪﺍﺭﻩ ..
ﺗﺎﻧﻲ ﻳﻮﻡ ...
ﺑﺮﻧﻴﻪ ﻛﺎﻧﺖ ﺗﺼﻠﻲ ﻓﻲ ﺍﻟﻔﺠﺮ ... ﻛﻤﻠﺖ ﻧﺎﺿﺖ ﻭﻗﺎﻣﺖ ﺻﻼﻳﺘﻬﺎ ﺣﻄﺘﻬﺎ ﻓﻲ ﺍﻟﺘﺮﻛﻴﻨﻪ ﻭﻛﻴﻒ ﺟﺖ ﺑﺘﻄﻠﻊ ﻣﻦ ﺍﻟﺼﺎﻟﻪ .. ﻭﻗﻔﺖ ﺟﺎﻣﺪﻩ ﻓﻲ ﻣﻜﺎﻧﻬﺎ ﻭﻗﻠﺒﻬﺎ ﺍﻧﻘﺒﺾ .. ﻟﻘﺖ ﻋﺎﺑﺪ ﻭﻣﺤﻤﺪ ﻭﺳﺮﻣﺪ . ﻭﻣﻌﺎﻫﻢ ﻋﻠﻲ ﻭﺍﻗﻔﻴﻦ ﻳﺸﺒﺤﻮﻟﻬﺎ ..
ﺑﺮﻧﻴﻪ ﻗﺪﻣﺖ : ﺩﺍﺭﻫﺎ ﻭﻻ ...
ﻛﻠﻬﻢ ﻳﺸﺒﺤﻮﻟﻬﺎ ﺑﺄﻟﻢ ..
ﺑﺮﻧﻴﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ : ﻗﺎﻟﻲ .. ﻧﺤﻠﻢ ﺑﺴﻴﻒ ﻫﻠﺒﻪ ﻳﺎﺑﺮﻧﻴﻪ .. ﻧﺤﻠﻢ ﺑﻴﻪ ﻣﻜﻠﺒﺸﻨﻲ ﻭﺭﺍﻓﻌﻨﻲ ﻣﻌﺎﻩ .. ﻭﺍﻧﻲ ﻧﺴﺄﻟﻪ ﻧﻘﻮﻟﻪ ﻋﻼﺵ ﺗﺸﻮﻑ ﻓﻴﻪ ﻓﻲ ﺍﻟﺤﻠﻢ ﻳﻜﻠﺒﺶ ﻓﻴﻚ .. ﻳﻘﻮﻟﻲ ... ﻳﺎﺑﺮﻧﻴﻪ ﻟﻠﻨﺎﺱ ﺍﻟﻈﺎﻫﺮ ﻭﻟﻠﻪ ﺍﻟﺒﺎﻃﻦ .. ﻭﺍﻧﻲ ﻟﺘﻮﺍ ﻣﺶ ﻓﺎﻫﻤﻪ ﺷﻦ ﻳﻘﺼﺪ .. ﺷﺒﺤﺘﻠﻬﻢ .. ﺷﻦ ﻗﺼﺪﻩ ..
ﻃﺒﻌﺎ ﻣﺤﻤﺪ ﻭﻋﺎﺑﺪ ﻭﺳﺮﻣﺪ ﻓﺎﻫﻤﻴﻦ ﻗﺼﺪﻩ .. ﻟﻜﻦ ﻋﻠﻲ ﻻ ﺑﺮﻧﻴﻪ ﻗﺪﻣﺘﻠﻬﻢ : ﻋﺰﻱ ﺑﻮﻛﻢ ﻻﺯﻡ ﻳﻜﻮﻥ ﻋﺰﻱ ﻳﻠﻴﻖ ﺑﺎﻟﺤﺎﺝ ﻋﻠﻲ ﺍﻟﺼﺎﺩﻕ .. ﻭﺩﻓﺘﻬﻢ ﻣﻦ ﻗﺪﺍﻣﻬﺎ ﻭﻃﻠﻌﺖ .. ﻭﻫﻤﺎ ﻣﺘﻔﺎﺟﺌﻴﻦ ﻭﻳﺸﺒﺤﻮﺍ ﻟﺒﻌﺾ .. ﺷﻮﻳﻪ ﻭﺳﻤﻌﻮﺍ ﻋﻴﺎﻁ ﺍﻧﻌﺎﻡ ...
ﻋﻴﺎﻁ ﺍﻧﻌﺎﻡ ﻧﺰﻝ ﻫﺎﻟﻪ ﻭﻋﻠﻴﺎ ﻭﺳﺎﺭﺓ .. ﺍﻟﻠﻲ ﻟﻘﻮﺍ ﻣﺠﻴﺪﻩ ﻭﻣﻴﺴﻮﻥ ﻳﺒﻜﻮﺍ ﺑﺎﻟﻌﺒﺮﻩ ... ﺑﻌﺪ ﺳﺄﻟﻮﺍ ﻋﺮﻓﻮﺍ ﻭﺍﻧﺼﺪﻣﻮﺍ .. ﺷﻮﻳﻪ ﻭﺗﻌﺒﺎ ﺍﻟﺤﻮﺵ ..
ﻓﻲ ﺍﻟﺼﺎﻟﻪ ﺍﻟﺨﺎﺭﺟﻴﻪ ﺍﻟﻠﻲ ﺗﻌﺒﺖ ﺑﺎﻟﻤﻌﺰﻳﻦ ..
ﻭﺍﺣﺪ ﻣﻦ ﺍﻟﻤﻌﺰﻳﻦ : ﻛﻴﻒ ﺗﻮﻓﻰ؟ !!
ﻣﺤﻤﺪ ﻭﻋﻴﻮﻧﻪ ﺣﻤﺮ : ﻣﺪﺍﻳﺮ ﺣﺎﺩﺙ ﻉ ﻃﺮﻳﻖ ﺑﻨﻲ ﻭﻟﻴﺪ ﻭﺳﻴﺎﺭﺗﻪ ﺍﻧﺤﺮﻓﺖ ﻋﻦ ﻣﺴﺎﺭﻫﺎ ﻭﻃﺎﺣﺖ ﻓﻲ ﻭﺣﺪﻩ ﻣﻦ ﺍﻟﺸﻌﺐ ..
: ﻭﺍﻧﺘﻢ ﺍﻣﺘﻰ ﻋﻠﻤﺘﻮﺍ ﺑﻴﻪ ..
ﻣﺤﻤﺪﺑﺄﺳﻒ : ﻭﺍﺣﺪ ﺻﺎﺩﻑ ﺳﻴﺎﺭﺗﻪ ﻃﺎﻳﺤﻪ ﻓﻲ ﺍﻟﺸﻌﺒﻪ ﻭﺟﺮﺗﻬﺎ ﻣﺤﺮﻭﻗﻪ .. ﻭﺧﻨﻘﺎﺗﻪ ﺍﻟﻌﺒﺮﻩ ...
ﺍﻟﺤﺴﻦ ﻛﺎﻥ ﻳﺴﻤﻊ ﻭﻫﻮ ﻣﺘﺄﻟﻢ ﻫﻠﺒﻪ ﺗﻜﺎﻟﺒﺖ ﻋﻠﻴﻪ ﺍﻟﻤﺼﺎﻳﺐ ﻣﻦ ﻛﻞ ﺗﺮﻛﻴﻨﻪ ...
ﺟﺎﺑﻮﺍ ﺗﺎﺑﻮﺗﻪ .. ﻭﻣﻨﻌﻮﺍﺑﺮﻧﻴﻪ ﻭﺑﺎﻗﻲ ﺍﻟﻨﺴﺎﻭﻳﻦ ﻳﺸﻮﻓﻮﻩ ﻷﻧﻪ ﻛﺎﻥ ﺷﺒﻪ ﻣﺘﻔﺤﻢ ...
ﺷﺎﻓﻮﺍ ﺍﻟﺘﺎﺑﻮﺕ ﻣﻦ ﺑﻌﻴﺪ ﻭﻛﺎﻧﻮﺍ ﻗﺎﻳﻤﻴﻪ ﺍﻟﺤﺴﻦ ﻭﺳﺮﻣﺪ ﻭﺣﺴﺎﻥ ﻭﻣﺮﻋﻲ .. ﻭﻛﺎﻧﻮﺍ ﻳﺒﻜﻮﺍ ﻣﻌﺎﺩﺍ ﺍﻟﺤﺴﻦ ﺩﻣﻌﺘﻪ ﻣﺴﺘﺤﻴﻞ ﺗﻈﻬﺮ ﻟﻠﻨﺎﺱ ﻭﻟﻮ ﻷﻱ ﺳﺒﺐ ﻛﺎﻥ ...
ﺩﻓﻨﻮﻩ ﺑﻌﺪ ﺻﻠﻮﺍ ﻋﻠﻴﻪ ﺍﻟﻈﻬﺮ ﻭﺍﻟﻠﻲ ﺣﻀﺮ ﺍﻟﺪﻓﻴﻨﻪ ﺃﻣﻢ .. ﻭﺃﻓﻮﺍﺝ .. ﻛﺎﻥ ﻣﺤﺒﻮﺏ ﻫﻠﺒﻪ ﻭﺃﻳﺪﻳﻪ ﻃﺎﻳﻠﻪ ﻓﻲ ﺍﻟﺨﻴﺮ ﻫﻠﺒﻪ .. ﻫﺬﺍ ﻭﺟﻪ ﻋﻠﻲ ﺍﻟﺼﺎﺩﻕ ﺍﻟﻈﺎﻫﺮ ﻟﻠﻨﺎﺱ .. ﻭﻣﺎﺣﺪ ﻋﺎﻟﻢ ﺍﻟﺒﺎﻃﻦ ﺇﻻ ﺍﻟﻠﻪ .. ﺑﺲ ﺍﻟﺤﻘﻴﻘﻪ ﺍﻟﺘﻲ ﻻﻳﻤﻜﻦ ﻧﻜﺮﺍﻧﻬﺎ ﺇﻥ ﺍﻟﺮﺍﺟﻞ ﺍﻟﻠﻲ ﺍﺻﻠﺢ ﺑﻴﻦ ﻫﻠﺒﻪ ﻧﺎﺱ .. ﻭﺳﺎﻋﺪ ﺍﻟﻤﺤﺘﺎﺟﻴﻦ ﻣﻨﻬﻢ .. ﻭﻧﺼﺮ ﺍﻟﻤﻈﻠﻮﻡ ﻓﻴﻬﻢ .. ﻫﻮ ﻧﻔﺴﻪ .. ﺍﻟﻠﻲ ﻳﺎﻣﺎ ﺳﻔﻚ ﺩﻣﺎﺀ ﻭﻳﺘﻢ ﺃﻃﻔﺎﻝ ﻭﺭﻣﻞ ﻧﺴﺎﺀ .. ﻭﺣﺎﺭﺏ ﺑﻼﺩﻩ ﺑﺘﺪﻣﻴﺮ ﺷﺒﺎﺑﻬﺎ ﺑﺘﺠﺎﺭﺗﻪ ﻓﻲ ﺍﻟﺴﻢ ﺍﻟﻬﺎﺭﻱ ... ﻓﻲ ﻫﻠﺒﻪ ﻧﺎﺱ ﻓﻲ ﻭﺍﻗﻌﻨﺎ ﻋﺎﻳﺸﻴﻦ ﺑﺤﻘﻴﻘﺘﻴﻦ ﻫﻠﺒﻪ .. ﻭﻛﻞ ﺣﻘﻴﻘﺔ ﻋﺎﻳﺸﻴﻦ ﺑﻴﻬﺎ ﺗﻤﺜﻞ ﺟﺰﺀ ﻣﻦ ﺷﺨﺼﻴﺎﺗﻬﻢ .. ﻭﻓﻴﻬﺎ ﻣﺼﻠﺤﺘﻬﻢ ﺑﺎﻟﺪﺭﺟﻪ ﺍﻷﻭﻟﻰ .. ﻣﻤﻜﻦ ﺗﻤﻨﻮﺍ ﻟﻮ ﻛﺎﻧﻮﺍ ﻋﺎﻳﺸﻴﻦ ﺑﺲ ﺑﺎﻟﺠﺎﻧﺐ ﺍﻟﻤﻀﻲﺀ ﻓﺤﻴﺎﺗﻬﻢ .. ﺑﺲ ﻫﻤﺎ ﺍﺧﺘﺎﺭﻭﺍ ﻳﺤﻄﻮﺍ ﺭﺟﻞ ﻓﻲ ﺍﻟﻈﻼﻡ ﻭﻏﺎﺻﺖ ﻫﻠﺒﻪ ﻭﻣﻌﺎﺵ ﻗﺪﺭﻭﺍ ﻳﻄﻠﻌﻮﻫﺎ ...
ﺍﻭﻝ ﻟﻴﻠﻪ ﻣﻦ ﺍﻟﻌﺰﻱ ﺩﻳﻤﺎ ﺍﺻﻌﺐ ﻟﻴﻠﻪ .. ﺑﺮﻧﻴﻪ ﻛﺎﻧﺖ ﺻﺎﺑﺮﻩ ﺑﺸﻜﻞ ﻏﺮﻳﺐ .. ﺑﻜﺖ ﻣﺶ ﻣﺎﺑﻜﺘﺶ .. ﺑﺲ ﻣﺎﻛﺎﻧﺘﺶ ﻣﺘﻮﻗﻌﻪ ﻣﻨﻬﺎ ﺭﺩﺓ ﺍﻟﻔﻌﻞ ﻫﺎﺩﻱ ﺍﺑﺪﺍ .... ﺗﺴﺘﻘﺒﻞ ﻓﻲ ﺍﻟﻤﻌﺰﻳﻦ ﻭﺗﺮﺩﺩ ﻓﻲ ﺍﻻﺳﺘﺮﺟﺎﻉ .. ﻭﻛﺎﻧﺖ ﺗﺘﻜﻠﻢ ﻋﻦ ﻣﺤﺎﺳﻦ ﺷﻴﺒﺎﻧﻴﻬﺎ ﺍﻟﺮﺍﺣﻞ ﻭﺗﺘﺮﺣﻢ ﻋﻠﻴﻪ .. ﺑﻴﻨﻤﺎ ﺑﻨﺘﻪ ﺍﻟﻮﺣﻴﺪﻩ ﻛﺎﻧﺖ ﺗﺒﻜﻲ ﺑﺤﺮﻗﻪ ﻭﻣﺶ ﻣﺼﺪﻗﻪ ﻣﻮﺕ ﺑﻮﻫﺎ ﺑﻜﻞ .. ﻫﺎﻻﻳﺎﻡ ﻛﺎﻧﺖ ﺍﻳﺎﻡ ﺻﻌﺒﻪ ﻋﻠﻴﻬﻢ .. ﻳﻄﻠﻌﻮﺍ ﻣﻦ ﺷﻲ ﻳﺨﺸﻮﺍ ﻓﺸﻲ ...
ﻓﻲ ﺍﻟﺠﻨﺎﻥ ..
ﻫﺎﻟﻪ ﺑﺒﻜﻲ : ﻛﻨﺖ ﻧﺸﻮﻑ ﻓﻴﻪ ﺻﻮﺭﺓ ﻭﺑﻴﻲ ﺍﻟﻠﻪ ﻳﺮﺣﻤﻪ .. ﺗﻮﺍ ﻣﻌﺎﺵ ﻓﻲ ﺣﺪ ﻛﺒﻴﺮ ﻧﺤﺲ ﺟﻴﻬﺘﻪ ﺑﻨﻔﺲ ﺍﻹﺣﺴﺎﺱ ..
ﻋﻠﻴﺎ ﺑﺒﻜﻲ : ﺍﻟﻠﻪ ﻳﺮﺣﻤﻪ ﻛﺎﻥ ﻃﻴﺐ ﻭﺣﻨﻴﻦ ﻫﻠﺒﻪ .. ﻓﻲ ﺍﻟﻮﻗﺖ ﺍﻟﻠﻲ ﺑﻮ ﺍﻟﺤﺴﻦ ﺭﻓﺾ ﺯﻭﺍﺝ ﺍﻟﺤﺴﻦ ﻣﻨﻲ .. ﻫﻮ ﻭﻗﻒ ﻣﻌﺎﻩ ﻭﺟﻲ ﻭﺟﺎﺏ ﺟﺎﻫﻪ ﻛﺒﻴﺮﻩ ﻭﻗﺪﺭﻧﺎ ... ﺍﻟﻠﻪ ﻳﺮﺣﻤﻪ .. ﻭﻗﻌﺪﺕ ﺗﺒﻜﻲ ...
ﻫﺎﻟﻪ : ﺍﺳﺘﻐﻔﺮ ﺍﻟﻠﻪ .. ﺍﻷﻳﺎﻡ ﻫﺎﺩﻱ ﺻﻌﺒﻪ ﻫﻠﺒﻪ ..
ﻋﻠﻴﺎ ﺗﻨﻬﺪﺕ ﺑﺄﻟﻢ : ﻫﻠﺒﻪ ...
🍁 ﻓﺎﺗﻮﺍ ﺑﺎﻟﺰﺑﻂ ﺗﻼﺗﻪ ﺃﻳﺎﻡ .... ﻭﺍﻟﻨﺎﺱ ﻗﺎﻋﺪﻩ ﺗﻤﺸﻲ ﻭﺗﺠﻲ ..
ﻓﻲ ﺍﻟﺼﺎﻟﻪ ﺍﻟﺨﺎﺭﺟﻴﻪ ﻛﺎﻥ ﻓﻲ ﻣﺠﻤﻮﻋﻪ ﻣﻦ ﺿﺒﺎﻁ ﺍﻟﺸﺮﻃﻪ ﺯﻣﻼﺀ ﺍﻟﺤﺴﻦ ﻭﻣﻌﺎﺭﻓﻪ ﻓﻲ ﺍﻟﺨﺪﻣﻪ ﺟﺎﻳﻴﻦ ﻳﻌﺰﻭﺍ ...
: ﺩﺍﻋﺶ ﺗﺒﻨﻮﺍ ﺍﻟﻌﻤﻠﻴﻪ ..
: ﻭﺍﻧﺖ ﻓﺎﺗﺖ ﻋﻠﻴﻚ .. ﺗﻲ ﺍﻟﺤﻜﺎﻳﻪ ﻫﺎﺩﻱ ﻣﻜﺸﻮﻓﻪ .. ﺩﺍﻋﺶ ﺍﺩﻓﻌﻠﻬﺎ ﺗﺘﺒﻨﺎﻟﻚ ﺍﻷﻧﻔﺠﺎﺭ ﺍﻟﻜﻮﻧﻲ ﺍﻷﻭﻝ ..
ﺍﻟﺤﺴﻦ : ﺣﺘﻰ ﺍﻧﻲ ﻣﺎﺧﺸﺘﻠﻴﺶ ﺭﺍﺱ ﻭﻋﺎﺭﻑ ﻣﻦ ﻭﺭﺍﻩ ..
: ﺟﻤﺎﻋﻪ ﺍﻟﻜﻮﺑﺮﺍ ...
ﺳﺮﻣﺪ ﺭﻛﺰ ﻣﻌﺎﻫﻢ ..
: ﺷﻴﻄﺎﻥ ﺭﺟﻴﻢ ﻫﺬﺍ .. ﺣﻜﻮﻟﻲ ﻋﻠﻴﻪ ﺯﻣﺎﻥ ﻗﺎﻟﻮﺍ ﻛﺎﻥ ﻣﺎﺳﻚ ﻭﺣﺪﻩ ﻣﻦ ﺍﻟﺠﺒﻬﺎﺕ ﺍﻳﺎﻡ ﺍﻟﺜﻮﺭﺓ ﻭﻛﺎﻥ ﻳﺠﻴﺐ ﻓﻲ ﺍﻟﺴﻼﺡ ..
ﺍﻟﺤﺴﻦ : ﺍﻟﻠﻲ ﺣﻜﺎﻟﻚ ﻋﻠﻴﻪ ﺷﺎﻳﻔﻪ ..
: ﻗﺎﻝ ﻣﺮﺓ ﻭﺣﺪﻩ ﻛﺎﻥ ﺷﻌﺮﻩ ﻃﻮﻳﻞ ﻭﻣﻠﺘﺤﻲ ﻭﻣﻨﻈﺮﻩ ﻣﺒﻬﺪﻝ ﻣﻦ ﺍﻟﺤﺮﺏ ..
ﺍﺣﻤﺪ : ﻛﺎﻥ ﺗﺎﺟﺮ ﺳﻼﺡ ﻭﺧﺶ ﻓﻲ ﺻﻔﻮﻑ ﺍﻟﻠﻲ ﻳﺤﺎﺭﺑﻮﺍ ﺿﺪ ﺍﻟﻘﺬﺍﻓﻲ .. ﺑﻌﺪ ﺣﺲ ﺍﻧﻬﺎ ﺧﻼﺹ ﺑﻄﻴﺢ ﺑﻴﻪ ..
: ﺍﻟﻜﻮﻣﺎﻧﺪﺍ ﻛﺒﻴﺮﻫﻢ ﻛﺎﻥ ﻟﻴﻪ ﺣﻴﻮﻁ ﻫﻠﺒﻪ ﺳﺎﻧﺪﺍﺗﻪ ﺍﻳﺎﻡ ﺍﻟﻘﺬﺍﻓﻲ .. ﻟﻜﻦ ﺑﺎﻋﻬﻢ ﻃﻮﻝ ﻭﺭﺑﻂ ﺣﺒﺎﻟﻪ ﻣﻊ ﺍﻟﻠﻲ ﺑﻌﺪﻫﻢ ..
ﺍﻟﺤﺴﻦ : ﺍﻟﻜﻮﺑﺮﺍ ... ﺍﺧﻄﺮ ﻣﻨﻪ .. ﻭﺍﻛﺜﺮ ﺩﻣﻮﻳﻪ ..
ﺍﺣﻤﺪ : ﻓﻌﻼ .. ﻋﻨﺪﻙ ﻋﻠﻢ ﺍﻧﻪ ﻛﺎﻥ ﻳﻌﺎﻗﺐ ﻓﻲ ﺭﺟﺎﻟﻪ ﺍﻟﻠﻲ ﻳﻀﻴﻌﻮﺍ ﺍﻟﺒﻀﺎﻋﻪ ﺍﻭ ﻳﺨﺴﺮﻭﻫﺎ ... ﺑﺘﺼﻔﻴﺔ ﻋﺎﺋﻼﺗﻬﻢ ..
: ﻫﺬﺍ ﻧﻈﺎﻡ ﺍﻟﻤﺎﻓﻴﺎ ﺍﻟﻌﺎﻟﻤﻴﻪ ..
ﺍﻟﺤﺴﻦ ﺑﺘﻬﻜﻢ : ﻭﻫﻮ ﻳﻮﺍﻛﺐ ﻓﻲ ﺍﻟﻌﺎﻟﻢ ﺍﻟﻤﺘﻄﻮﺭ ..
ﺿﺤﻜﻮﺍ ﺑﺴﺨﺮﻳﻪ ..
ﺳﺮﻣﺪ " ﺗﻀﺤﻜﻮﺍ ﻭﺍﻟﻀﺤﻚ ﻋﻠﻴﻜﻢ .. ﺍﻟﻜﻮﺑﺮﺍ ﺍﻟﻠﻲ ﺗﻀﺤﻜﻮﺍ ﻋﻠﻴﻪ ﺩﺍﻳﺨﻴﻦ ﻓﻲ ﺟﺮﺗﻪ ﻭﻫﻮ ﻣﻘﻌﻤﺰ ﻓﻲ ﻧﺼﻜﻢ ﻭﺣﺎﻁ ﺭﺟﻞ ﻉ ﺭﺟﻞ ﻭﻳﺘﻔﺮﺝ ﻉ ﺧﻴﺒﺘﻜﻢ ﻫﻬﻬﻬﻊ ..."
***
ﻭﻳﻦ ﻣﺎﺷﻲ ...
ﺑﻼﻝ : ﻣﺎﺷﻲ ﺑﻨﻌﺰﻱ ﺍﻟﺮﺍﺟﻞ ..
ﺍﺑﺘﺴﺎﻡ : ﺑﺎﻩ ﺑﺎﻟﻠﻪ ﻋﻠﻴﻚ ﻣﺎﺗﻌﻄﻠﺶ ﺑﺪﻳﺖ ﻧﺨﺎﻑ ﺑﺮﻭﺣﻲ ..
ﺑﻼﻝ : ﺑﺎﻩ ﺑﺴﻮﻣﺘﻲ ﺷﻦ ﺭﺍﻳﻚ ﻧﺠﻴﺐ ﺍﻣﻲ ﺗﻘﻌﺪ ﻣﻌﺎﻧﺎ ..
ﺍﺑﺘﺴﺎﻡ ﺑﻔﺮﺣﻪ : ﻳﺎﺍﺍﺍﺭﻳﺖ ...
ﺑﻼﻝ ﺍﺑﺘﺴﻢ : ﺗﻢ .. ﻭﺍﻧﻲ ﻣﺮﻭﺡ ﺗﻮﻧﺠﻴﺒﻬﺎ ﻣﻌﺎﻱ ..
ﺍﺑﺘﺴﺎﻡ ﻗﺪﻣﺖ ﻭﺑﺎﺳﺘﻪ ﻣﻦ ﺧﺪﻩ : ﻣﺤﻼﻙ ﻳﺎﻭﻟﺪ ﺍﻟﻘﺎﺿﻲ ﺑﻼﻝ ..
ﺑﻼﻝ ﺑﻀﺤﻜﻪ : ﺧﻞ ﻧﻄﻠﻊ ﻗﺒﻞ ﻟﻨﻐﻴﺮ ﺭﺍﻳﻲ .. ﻭﻃﻠﻊ ﺑﺴﺮﻋﻪ .. ﻭﻫﻲ ﻗﻌﺪﺕ ﺗﻀﺤﻚ ﺑﺨﺠﻞ ..
***
ﻫﻴﺎ ﻳﺎﺍﻣﻴﺮﻩ ..
ﻃﻠﻌﺖ ﺍﻣﻴﺮﻩ ﻣﻦ ﺍﻟﺪﺍﺭ : ﺍﻫﻮ ﻭﺗﻴﺖ ... ﻣﺸﺖ ﻷﻣﻬﺎ ﻭﺍﺧﺘﻬﺎ ﻣﺪﻳﺤﻪ ﻭﻃﻠﻌﻮﺍ ﻟﺴﻴﺎﺭﺓ ﻣﺼﻌﺐ ﺍﻟﻠﻲ ﻳﻴﺮﻓﻌﻬﻢ ﻟﺤﻮﺵ ﺷﻴﺎﻳﺒﻴﻦ ﻋﻠﻴﺎ ... ﻭﺟﻌﻔﺮ ﺳﺎﺑﻘﻬﻢ ﻏﺎﺩﻱ ... ﻭﻣﺸﻮﺍ ..
***
ﻓﺎﻃﻤﻪ : ﻋﻠﻴﺎ ﺑﻨﺘﻲ ﺑﺮﻱ ﺷﻮﻓﻲ ﺭﺍﺟﻠﻚ ﺷﻦ ﻳﺒﻲ ..
ﻋﻠﻴﺎ ﺑﻀﻴﻖ : ﺑﺎﻩ .. ﻣﺸﺖ ﺑﺎﻟﺴﻴﻒ ﻗﺎﻋﺪﻩ ﺯﻋﻼﻧﻪ ﻭﻣﺠﺮﻭﺣﻪ ﻣﻨﻪ ﻛﻠﻤﺘﻪ ﻓﻲ ﻭﺫﻧﻬﺎ ﻗﺎﻋﺪﻩ ﺗﺮﻥ ....
ﻃﻠﻌﺖ ﻟﻘﺎﺗﻪ ﻳﺘﻜﻠﻢ ﺑﺎﻟﺘﻠﻴﻔﻮﻥ ... ﺷﺒﺤﻬﺎ ﺍﺳﺘﻌﺠﻞ ﺍﻧﻬﺎﺀ ﺍﻟﻤﻜﺎﻟﻤﻪ ﻭﺻﻜﺮ ﻭﻗﻌﺪ ﻳﺸﺒﺤﻠﻬﺎ ﻛﺎﻥ ﻣﺴﺘﺎﺣﺸﻬﺎ ﻫﻠﻠﻠﻠﻠﺒﻪ 💖
ﺑﺲ ﻫﻲ ﻣﺎﺑﺘﺶ ﺗﺸﺒﺤﻠﻪ ﻭﻭﺍﺿﺢ ﺍﻧﻬﺎ ﻃﺎﻟﻌﻪ ﺑﺎﻟﺴﻴﻒ ..
ﺍﻟﺤﺴﻦ ﺑﺤﺪﻩ : ﺍﻧﻲ ﻧﺎﺩﻳﺖ ﻉ ﺍﻧﻌﺎﻡ ..
ﻋﻠﻴﺎ ﺷﺒﺤﺘﻠﻪ .. ﻭﺧﺸﺖ ﻃﻮﻝ .. ﺍﻟﺤﺴﻦ ﻫﺰ ﺭﺍﺳﻪ ﺍﻳﻤﻴﻦ ﻭﻳﺴﺎﺭ ... ﺷﻮﻳﻪ ﻭﻃﻠﻌﺖ ﺍﻧﻌﺎﻡ ..
ﺍﻧﻌﺎﻡ ﺑﻤﻼﻣﺢ ﺑﺎﻫﺘﻪ : ﺧﻴﺮﻙ ...
ﺍﻟﺤﺴﻦ ﻓﺘﺢ ﺍﻳﺪﻳﻪ : ﺗﻌﺎﻟﻲ ... ﺧﺸﺖ ﺍﻧﻌﺎﻡ ﻓﻲ ﺣﻀﻨﻪ ﻭﻗﻌﺪﺕ ﺗﺒﻜﻲ ...
ﺍﻧﻌﺎﻡ ﺑﺒﻜﻲ : ﻭﻳﻦ ﻛﺎﻧﻮﺍ ﻣﺪﺳﻮﺳﺎﺕ ﻫﺎﻷﻳﺎﻡ ﺍﻟﺴﻮﺩ ...
ﺍﻟﺤﺴﻦ : ﻗﻀﺎﺀ ﺍﻟﻠﻪ ﻭﻗﺪﺭﻩ ﻭﺣﻨﻲ ﻻﺯﻡ ﻧﺮﺿﻮﺍ .. ﻭﻫﺎﺩﻱ ﺩﺍﺭ ﺍﺑﺘﻼﺀ ﻣﻦ ﺍﻷﺳﺎﺱ .. ﺑﻌﺪﻫﺎ ﻭﺑﺎﺱ ﺭﺍﺳﻬﺎ .. ﺧﻠﻴﻚ ﻗﻮﻳﻪ ﻉ ﺧﺎﻃﺮ ﺣﻨﺎﻱ .. ﻣﺎﻳﻐﺮﻛﺶ ﺣﺎﻟﻬﺎ ﻫﺬﺍ ﺭﺍﻫﻲ ﻗﺎﻋﺪﻩ ﺗﻜﺎﺑﺮ ..
ﺍﻧﻌﺎﻡ : ﻃﻮﻝ ﺍﻟﻠﻴﻞ ﺗﺨﺶ ﻟﺪﺍﺭﻫﻢ ﻭﺗﻘﻌﺪ ﺗﺒﻜﻲ ﻭﺗﻐﺮﺩ ..
ﺍﻟﺤﺴﻦ ﻗﻠﺒﻪ ﻭﺟﻌﻪ ﻋﻠﻴﻬﺎ : ﺭﺑﻲ ﻳﺼﺒﺮﻫﺎ ﻭﻳﺼﺒﺮﻧﺎ ﺟﻤﻴﻌﺎ ... ﺍﻧﻌﺎﻡ ﺍﻧﻲ ﻃﺎﻟﻊ ﺷﻮﻳﻪ ﻣﺎﺗﺒﻮﺍ ﺷﻲ ..
ﺍﻧﻌﺎﻡ : ﺳﻼﻣﺘﻚ ﻳﺎﻏﺎﻟﻲ ..
ﺍﻟﺤﺴﻦ : ﺗﺮﺍ ﺿﺒﺤﻴﻠﻲ ﻋﻠﻲ ﻋﻠﻴﺎ ..
ﺍﻧﻌﺎﻡ : ﺑﺎﻩ .. ﻭﺧﺸﺖ ...
ﺷﻮﻳﻪ ﻭﻃﻠﻌﺖ ﻋﻠﻴﺎ ﻭﻭﺟﻬﻬﺎ ﻣﻘﻠﻮﺏ ﻭﺗﻨﻔﺦ ..
ﺍﻟﺤﺴﻦ : ﺷﻦ ﺗﺒﻲ ..
ﻋﻠﻴﺎ ﻓﻨﺼﺖ : ﺍﻧﺖ ﺍﻟﻠﻲ ﻗﻠﺖ ﺗﺒﻴﻨﻲ ..
ﺍﻟﺤﺴﻦ : ﻣﺎﻗﻠﺘﺶ ﺑﻜﻞ .. ﻏﻴﺮ ﺍﻧﺘﻲ ﺷﻜﻠﻚ ﺗﺘﺴﺒﻠﻲ ... ﻭﻟﻒ ﻭﻣﺸﻲ ﻭﺧﻼﻫﺎ ﻭﺍﻗﻔﻪ ﻣﺼﺪﻭﻣﻪ ..
ﻋﻠﻴﺎ " ﺑﺎﺍﺍﻩ ﻏﻴﺮ ﻳﺘﻢ ﺍﻟﻠﻲ ﺣﻨﻲ ﻓﻴﻪ ﻭﺟﻬﻲ ﻓﻬﺎﻟﺤﻮﺵ ﻛﻠﻪ ﻣﺶ ﺣﺘﺸﻮﻓﻪ ..."
***
ﺟﻲ ﺑﻼﻝ ﻟﻠﻌﺰﻱ ﻭﻋﺰﺍ ﻛﻞ ﺍﻟﻤﻮﺟﻮﺩﻳﻦ ﻭﻗﻌﻤﺰ ﺣﺪﺍ ﺣﺴﺎﻥ .. ﺳﺮﻣﺪ ﻛﺎﻥ ﻳﺸﺒﺤﻠﻪ ﻫﻠﺒﻪ " ﻓﻲ ﺷﻲ ﻳﺨﺺ ﻫﺎﻟﻮﻟﺪ ﻧﻌﺮﻓﻪ ﺑﺲ ﻣﺶ ﻗﺎﺩﺭ ﻧﺬﻛﺮﻩ ﻛﻮﻳﺲ .. ﺷﻔﺘﻪ ﻓﻲ ﺍﻟﻤﺼﺤﻪ ﻳﺎﺳﺮﻣﺪ .. ﻭﻫﻮ ﺩﺍﺭ ﺍﻟﺤﺎﺩﺙ ﻣﻊ ﺣﺴﺎﻥ .. ﺗﻤﺎﻡ ﺷﻦ ﺗﺎﻧﻲ ﻏﻴﺮ ﻫﻜﻲ !!.. ؟ .."
ﺷﻮﻳﻪ ﻭﺧﺶ ﺍﻟﺤﺴﻦ .. ﻧﺎﺿﻠﻪ ﺑﻼﻝ ﻭﺣﻀﻨﻪ ﻭﻫﻮ ﻳﻌﺰﻱ ﻓﻴﻪ .. ﺯﺍﺩ ﺭﻛﺰ ﺳﺮﻣﺪ ﻭﻫﻮ ﻣﻀﻴﻖ ﻋﻴﻮﻧﻪ ﻭﻳﺸﺒﺤﻠﻬﻢ ﻉ ﺟﻨﺐ .. ﻛﺎﻥ ﻳﻬﺪﺭﺯ ﻉ ﺍﻟﺤﺴﻦ ﻭﻛﺄﻧﻪ ﻳﻌﺮﻓﻪ ﺍﻛﺜﺮ ﻣﻦ ﺣﺴﺎﻥ ... ﺩﻗﻖ ﻫﻠﺒﻪ ﺳﺮﻣﺪ ﻓﻴﻬﻢ .. ﻗﻌﺪ ﻳﺸﺒﺤﻠﻬﻢ ⚡⚡⚡... ﻭﺍﺫﻛﺮ
>> ﺳﺮﻣﺪ : ﺑﺎﻩ ﻭﺍﻟﻮﻟﺪ ﺍﻟﻠﻲ ﻣﻌﺎﻩ ﺷﻦ ﺻﺎﺭﻟﻪ ..
ﺍﻟﺸﺎﺏ : ﺣﺘﻰ ﻫﻮ ﻛﺴﻮﺭ ... ﺍﻟﺨﻮﺩﻩ ﺣﻤﺘﻬﻢ ﻣﻦ ﺑﻌﺪ ﺭﺑﻲ ...
ﺍﻟﺤﺴﻦ : ﻫﻮ ﻫﻨﻲ ..
ﺍﻟﺸﺎﺏ : ﺍﻳﻪ ...
ﻗﺪﻡ ﺍﻟﺤﺴﻦ ﻭﻓﺘﺢ ﺍﻟﺒﺎﺏ ﺷﺎﻓﻪ ﻭﺍﺗﻔﺎﺟﺄ ﻭﻭﺧﺮ ﺑﺴﺮﻋﻪ ﻭﺳﻜﺮ ﺍﻟﺒﺎﺏ ...
ﺳﺮﻣﺪ : ﺗﻌﺮﻓﻪ ..
ﺍﻟﺤﺴﻦ : ﺗﺴﺘﺲ <<..
>> ﺧﺸﺖ ﻫﻲ ﻭﺑﻮﻫﺎ ﻟﻠﻤﺴﺘﺸﻔﻰ ﺩﻟﻮﻫﻢ ﻉ ﻏﺮﻓﺘﻪ .. ﺭﻛﺒﻮﺍ ﺑﺴﺮﻋﻪ .. ﻭﺻﻠﻮﺍ ﻓﻲ ﺍﻟﻤﻤﺮ ﺍﻟﻠﻲ ﻓﻴﻪ ﺍﻟﻐﺮﻓﻪ .. ﻓﻲ ﻧﻔﺲ ﺍﻟﻤﻤﺮ ﻛﺎﻧﻮﺍ ﻭﺍﻗﻔﻴﻦ ﺳﺮﻣﺪ ﻭﺍﻟﺤﺴﻦ ..
ﺍﻟﺰﻭﺯ ﻗﻌﺪﻭﺍ ﻳﺸﺒﺤﻮﺍ ﻟﻌﺒﺪ ﺍﻟﻘﺪﻭﺱ ﺑﺤﺪﻩ .. ﻭﻫﻮ ﻛﺬﻟﻚ .. ﻗﻌﺪﻭﺍ ﻳﺘﺒﺎﺩﻟﻮﺍ ﻓﻲ ﺍﻟﻨﻈﺮﺍﺕ .. ﻟﻴﻦ ﻓﺎﺕ ﻣﻦ ﺣﺪﺍﻫﻢ ﻭﻣﺸﻲ ﻟﻠﻐﺮﻓﻪ ﺍﻟﻠﻲ ﻓﻴﻬﺎ ﺑﻼﻝ ..
ﺳﺮﻣﺪ : ﻳﻘﺮﺑﻠﻪ ..
ﺍﻟﺤﺴﻦ : ﺷﻜﻠﻪ <<..
ﺳﺮﻣﺪ ﻓﻨﺺ ﻋﻴﻮﻧﻪ ﺑﺄﺑﺘﺴﺎﻣﺔ ﺳﺨﺮﻳﻪ " ﻳﺎﻭﻟﺪ ﺍﻟﺬﻳﻦ ﻳﺎﻟﺤﺴﻦ .. ﺗﻮ ﺑﺲ ﻓﻬﻤﺖ ﻛﻞ ﺷﻲ .. ﻓﻬﻤﺖ ﺍﻟﻠﻲ ﺻﺎﺭ ﻑ ...3\29 ﺑﻼﻝ ﻳﺎﺑﻼﻝ .. ﺟﺎﺑﻚ ﺭﺑﻲ ﻓﻲ ﻃﺮﻳﻘﻲ .. ﻭﺍﻧﻲ ﻭﺍﻟﻠﻪ ﻣﺎﻛﺎﻥ ﺑﻮﺩﻱ ﻧﻮﺟﻊ ﻗﻠﺐ ﺧﺎﻟﺘﻲ ﺍﻟﺴﺎﻛﺘﻪ ﻋﻠﻴﻚ . ﺑﺲ ﺍﻟﻠﻪ ﻏﺎﻟﺐ ﻫﺬﺍ ﻗﺪﺭﻙ ...."
***
ﺍﻧﻌﺎﻡ ﻓﻘﺪﺕ ﺍﻣﻬﺎ ﻭﻗﻌﺪﺕ ﺍﺩﻭﺭ ﻋﻠﻴﻬﺎ .. ﻟﻘﺘﻬﺎ ﻃﺎﻳﺤﻪ ﻗﺪﺍﻡ ﺩﺍﺭﻫﺎ ... ﻋﻴﻄﺖ ﻉ ﻃﻮﻝ ﺭﻗﺒﺘﻬﺎ ﺟﻮ ﻳﺠﺮﻭﺍ ... ﻧﻬﻀﻮﻫﺎ ﺑﺎﻟﺴﻴﻒ .. ﺟﺎﺑﻮﺍ ﺟﻬﺎﺯ ﻗﻴﺎﺱ ﺍﻟﻀﻐﻂ ﻭﻗﺎﺳﺎﺗﻪ ﻋﻠﻴﺎ .. ﺿﻐﻄﻬﺎ ﻛﺎﻥ ﻫﺎﺑﻂ ﻫﻠﺒﻪ ...
ﺑﺮﻧﻴﻪ : ﺟﻴﺒﻮﻟﻲ ﺟﺒﻨﻪ ﻣﺎﻟﺤﻪ ..
ﺍﻧﻌﺎﻡ : ﺟﺒﻨﺔ ﺷﻨﻮ ﻳﺎﻡ ﺍﻧﺘﻲ ﺗﺒﻲ ﻧﺮﻓﻌﻮﻙ ..
ﺑﺮﻧﻴﻪ : ﻣﺎﺗﻜﺒﺮﻳﻬﺎﺵ .. ﺷﺒﺤﺘﻠﻬﻢ ﻛﻴﻒ ﻭﺍﻗﻔﺎﺕ ﻋﻠﻴﻬﺎ ... ﻫﻴﺎ ﺗﺤﺮﻛﻮﺍ ﺍﻃﻠﻌﻮﺍ ﻟﻠﻨﺎﺱ ﺑﺴﺮﻋﻪ .. ﻭﺍﻧﺘﻲ ﺟﻴﺒﻴﻠﻲ ﺟﻨﺒﻪ ﻣﺎﻟﺤﻪ ﻫﻴﺎ ... ﻛﻠﻬﻢ ﻃﻠﻌﻮﺍ ﻣﻦ ﺣﺪﺍﻫﺎ ﻭﺍﻧﻌﺎﻡ ﻣﻄﺖ ﺷﻮﺭﺍﺑﻬﺎ ﺑﺈﺳﺘﻴﺎﺀ ﻭﻣﺸﺖ ﺗﺠﻴﺐ ﻷﻣﻬﺎ ﻓﻄﻠﺒﻬﺎ ..
***
ﻣﻊ ﺍﻟﻤﻐﺮﺏ ...
ﺃﻣﻴﺮﻩ ﻛﺎﻧﺖ ﺗﺒﻲ ﺗﺸﻮﻑ ﺳﺮﻣﺪ ﺑﺄﻱ ﺷﻜﻞ ... ﺧﺸﺖ ﻣﻌﺎﻫﻢ ﺍﻟﻜﻮﺟﻴﻨﻪ ﺩﺍﺭﺕ ﺭﻭﺣﻬﺎ ﺗﻌﻮﻝ ﻣﻌﺎﻫﻢ .. ﺍﺳﺘﻐﻠﺖ ﺍﻟﺰﺣﻤﻪ ﺍﻟﻠﻲ ﻓﺎﻟﻜﻮﺟﻴﻨﻪ .. ﻭﻃﻠﻌﺖ ﻣﻦ ﺍﻟﺒﺎﺏ ﺍﻟﺒﺮﺍﻧﻲ .. ﻭﻣﺸﺖ ﻟﻠﻌﻨﺒﻪ ﻭﻗﻔﺖ ﻏﺎﺩﻱ ﻭﻃﻠﻌﺖ ﺗﻠﻴﻔﻮﻧﻬﺎ ﻣﻦ ﺟﻴﺒﻬﺎ ﻛﺘﺒﺖ ﺭﺳﺎﻟﻪ ﻟﺴﺮﻣﺪ ﻭﺑﻌﺘﺘﻬﺎﻟﻪ ..
ﺳﺮﻣﺪ ﻛﺎﻥ ﻭﺍﻗﻒ ﻉ ﺟﻤﺎﻋﻪ ﺟﺎﻳﻴﻦ ﻳﻌﺰﻭﻩ ﻣﻦ ﺍﻹﺫﺍﻋﻪ ﺳﻤﻊ ﺻﻮﺕ ﺭﻧﺔ ﺍﻟﻤﺴﺞ .. ﻃﻠﻊ ﺗﻠﻴﻔﻮﻧﻪ ﻭﻓﺘﺢ ﺍﻟﻤﺴﺞ ﻭﻗﺮﺍﻩ ..
( ﻧﺒﻲ ﻧﺸﻮﻓﻚ .. ﻧﺒﻲ ﻧﻄﻤﻦ ﻻﺃﻛﺜﺮ .. ﺍﻧﻲ ﺣﺪﺍ ﺍﻟﻌﻨﺒﻪ ) ..
ﺳﺮﻣﺪ ﻗﻠﺒﻪ ﻗﻌﺪ ﻳﺪﻕ ﺑﻌﻨﻒ .. ﺍﻭﻝ ﻣﺮﺓ ﻫﻲ ﺗﻄﻠﺐ ﺗﺸﻮﻓﻪ ﺣﺲ ﺑﺨﻮﻓﻬﺎ ﻋﻠﻴﻪ .. ﺗﺤﺠﺞ ﻟﺠﻤﺎﻋﺔ ﺍﻹﺫﺍﻋﻪ ﻭﺍﻧﺴﺤﺐ ﻃﻮﻝ ...
🍁 ﻫﻲ ﺧﺸﺖ ﻗﻌﻤﺰﺕ ﺩﺍﺧﻞ ﺗﺤﺖ ﺍﻟﻜﺮﻣﺎ ﻣﺘﺎﻉ ﺍﻟﻌﻨﺒﻪ ...
ﻭﻛﺎﻧﺖ ﺗﺸﺒﺢ ﻟﻠﻜﺮﻣﻪ ...
" ﺍﻣﻴﺮﺗﻲ .."
ﻋﻴﻨﻬﺎ ﺟﺖ ﻓﻌﻴﻨﻪ ﻧﺎﺿﺖ ﻗﺪﻣﺘﻠﻪ ﻭﻗﻌﺪ ﺗﺸﺒﺢ ﻟﻌﻴﻮﻧﻪ ﺍﻟﻠﻲ ﻛﺎﻥ ﻭﺍﺿﺢ ﻋﻠﻴﻬﻢ ﺍﻧﻬﻢ ﺑﺎﻛﻴﺎﺕ ﻫﻠﺒﻪ ﻫﻮ ﺗﻠﺨﺒﻂ ﻫﻠﺒﻪ ﻣﻦ ﻧﻈﺮﺍﺗﻬﺎ ﻗﻌﺪ ﻣﺴﻬﻢ ﻓﻴﻬﺎ ﻭﺧﻼﺹ .. ﻫﻴﺎ ﻗﺮﺑﺖ ﺍﻳﺪﻫﺎ ﻷﻳﺪﻩ ﺑﺒﻂﺀ ﻭﺷﺪﺗﻬﺎ ... ﺳﺮﻣﺪ ﻗﺮﻳﺐ ﻣﺎﺕ ﻉ ﺣﺮﻛﺘﻬﺎ ﺗﻠﺨﺒﻂ ﻫﻠﺒﻪ ﻫﻠﺒﻪ ... ﻭﺟﺴﻤﻪ ﻛﻠﻪ ﺗﻜﻬﺮﺏ ..
ﺍﻣﻴﺮﻩ : ﺍﻟﻠﻪ ﻳﺮﺣﻤﻪ ... ﻫﻮﻥ ﻋﻠﻴﻚ .. ﺍﺩﻋﻴﻠﻪ ﺩﻳﻤﺎ ﺑﺎﻟﺮﺣﻤﻪ ﻫﺬﺍ ﺍﻟﻠﻲ ﻳﺒﻴﻪ ﺗﻮﺍ ...
ﺳﺮﻣﺪ ﻣﺶ ﻗﺎﺩﺭ ﻳﻨﻄﻖ ﺑﺤﺮﻑ ﻳﺸﺒﺤﻠﻬﺎ ﻭﺑﺲ ...
ﺍﻣﻴﺮﻩ : ﻟﻮ ﺍﺣﺘﺠﺘﻨﻲ ﺍﺗﺼﻞ ﺑﻴﺎ ﻓﻲ ﺍﻱ ﻭﻗﺖ ... ﺟﺖ ﺑﺘﻤﺸﻲ ... ﺷﺪ ﻳﺪﻫﺎ ..
ﺳﺮﻣﺪ ﺑﺼﻮﺕ ﻳﺪﻭﺏ ﻃﺎﻟﻊ : ﻣﺎﺗﻤﺸﻴﺶ .. ﺧﻠﻴﻚ ﺷﻮﻳﻪ
ﻭﻗﻔﺖ ﺍﻣﻴﺮﻩ ﻭﻗﻌﺪ ﺗﺸﺒﺤﻠﻪ ﻭﻳﺸﺒﺤﻬﺎ ﻧﻈﺮﺍﺕ ﺑﺲ ﺑﺪﻭﻥ ﻭﻻﺣﺮﻑ .. ﺍﻟﻌﻴﻮﻥ ﻛﺎﻧﺖ ﺗﺘﻜﻠﻢ ..
ﺳﺮﻣﺪ " ﻗﺪﺍﻣﻲ ... ﻋﻴﻨﻲ ﻓﻌﻴﻨﻚ .. ﺍﻳﺪﻱ ﻓﻲ ﻳﺪﻙ .. ﺑﺲ ﻣﻊ ﻫﺬﺍ ﺍﻧﺘﻲ ﺑﻌﻴﺪﻩ ﺑﻌﻴﻴﻴﻴﻴﺪﻩ ﻫﻠﺒﻪ ﻭﻣﺴﺘﺤﻴﻞ ﻧﻮﺻﻞ ﻓﻴﻚ "
ﺍﻣﻴﺮﺓ " ﺑﺮﻏﻢ ﺍﻥ ﻧﻈﺮﺍﺗﻚ ﺣﻠﻮﺓ ﻭﺗﺴﺤﺮ ﻓﻴﺎ .. ﺑﺲ ﻣﺶ ﻋﺎﺭﻓﻪ ﻋﻼﺵ ﻭﻛﻴﻒ ﻗﻠﺒﻲ ﻳﻨﺒﻀﻠﻚ ﻭﻳﻨﻘﺒﺾ ﻣﻨﻚ ﻓﻲ ﻧﻔﺲ ﺍﻟﻮﻗﺖ ..."
ﻓﻲ ﻧﻔﺲ ﺍﻟﻠﺤﻈﻪ ...
ﺳﺮﻣﺪ : ﺃ .....
ﺍﻣﻴﺮﻩ : ﺱ ....
ﻗﻄﻊ ﻋﻠﻴﻬﻢ ﺗﻠﻴﻔﻮﻥ ﺍﻣﻴﺮﻩ ﺍﻟﻠﻲ ﺭﻥ ... ﻭﻛﺎﻧﺖ ﺍﻣﻬﺎ .. ﻃﻠﻘﺖ ﺍﻳﺪ ﺳﺮﻣﺪ ﻭﻣﺸﺖ ﺗﺠﺮﻱ ﻭﻫﻮ ﻳﺸﺒﺤﻠﻬﺎ .. ﺗﻠﻔﺘﺖ ﻭﻫﻲ ﻣﺎﺷﻴﻪ ﺍﺑﺘﺴﻤﺖ ﻭﻛﻤﻠﺖ ﻃﺮﻳﻘﻬﺎ ﻟﻴﻦ ﺍﺧﺘﻔﺖ ﻣﻦ ﻗﺪﺍﻣﻪ ..
ﺳﺮﻣﺪ " ﺁﺍﺍﺍﺍﻩ ﻳﺎﻟﻴﺘﻨﻲ ﻣﺖ ﻗﺒﻞ ﻫﺬﺍ ﻭﻛﻨﺖ ﻧﺴﻴﺎ ﻣﻨﺴﻴﺎ ..."
***
ﺍﻟﺴﺎﻋﻪ 2 ﻟﻴﻼ ..
ﻋﻠﻴﺎ ﻛﺎﻥ ﺷﺎﻏﻠﻬﺎ ﺣﺎﻝ ﺑﺮﻧﻴﻪ .. ﻣﺸﺖ ﻟﺪﺍﺭﻫﺎ ﺑﺮﻏﻢ ﺍﻥ ﺑﺮﻧﻴﻪ ﻣﺤﺮﺻﻪ ﻋﻠﻴﻬﻢ ﻣﺎﺣﺪ ﻳﺨﺶ ﻋﻠﻴﻬﺎ ... ﺑﺲ ﻫﻲ ﺧﺎﻓﺖ ﻋﻠﻴﻬﺎ ﻟﺘﻜﻮﻥ ﺻﺎﺭﺗﻠﻬﺎ ﺣﺎﺟﻪ ﻭﻫﻤﺎ ﻣﺎﻳﻨﺪﺭﻭﺵ ..
ﻭﺻﻠﺖ ﻓﻲ ﺍﻟﺒﺎﺏ ﻃﻘﺖ ﻃﻘﺘﻴﻦ ﻣﺎﺭﺩ ﺣﺪ ﺧﺎﻓﺖ ﻓﺘﺤﺖ ﺍﻟﺒﺎﺏ ﻭﺧﺸﺖ .. ﻗﺪﻣﺖ ﺑﺒﻂﺀ ﻟﻘﺖ ﺑﺮﻧﻴﻪ ﺭﺍﻗﺪﻩ ﺗﺄﻛﺪﺕ ﺍﻧﻬﺎ ﺭﺍﻗﺪﻩ ﻭﻣﺶ ﻣﻐﻤﻰ ﻋﻠﻴﻬﺎ .. ﻏﻄﺘﻬﺎ ﺑﺸﺮﺷﺎﻑ ... ﻷﻥ ﺍﻟﺮﻭﺷﻦ ﻛﺎﻥ ﻣﻔﺘﻮﺡ ﻭﺍﻟﻨﺴﻤﻪ ﻣﺼﻘﻌﻪ ﺷﻮﻳﻪ .. ﺑﻌﺪ ﻏﻄﺘﻬﺎ ﻟﻤﺤﺖ ﺣﺎﺟﻪ ﻓﻲ ﻳﺪ ﺑﺮﻧﻴﻪ .. ﻛﺎﻧﺖ ﺻﻮﺭﻩ .. ﺍﻟﻔﻀﻮﻝ ﺧﻼﻫﺎ ﺗﺴﺤﺒﻬﺎ ﻣﻦ ﺍﻳﺪﻫﺎ ﺑﺎﻟﺸﻮﻳﻪ ﻭﻭﻗﻔﺖ ﻉ ﺣﻴﻠﻬﺎ ﻭﺷﺎﻓﺖ ﺍﻟﺼﻮﺭﺓ ..
ﻋﻠﻴﺎ " ﻫﺎﺩﺍﺟﺪﻱ ﻋﻠﻲ ﺍﻟﻠﻪ ﻳﺮﺣﻤﻪ ﻭﺍﺿﺢ ﻗﺪﻳﻤﻪ ﺍﻟﺼﻮﺭﺓ ﻫﻠﺒﻪ ﺑﺲ ﻣﻨﻮ ﺍﻟﺮﺍﺟﻞ ﻭﺍﻟﻮﻟﺪ ﺍﻟﺼﻐﻴﺮ ﺍﻟﻠﻲ ﻣﻌﺎﻩ ... ﺩﻗﻘﺖ ﺍﻛﺜﺮ .. ﺍﻟﺮﺍﺟﻞ ﻳﺸﺒﻪ ﻟﻠﺤﺴﻦ ﻫﻠﺒﻪ .. ﻭﺍﻟﻮﻟﺪ ﺍﻟﻠﻲ ﻓﺤﺠﺮ ﺟﺪﻱ ﻋﻠﻲ ﻣﻦ ﻫﻮ "...
ﻋﻠﻴﺎ ﻗﻌﺪﺕ ﺍﻷﺳﺌﻠﻪ ﺍﺩﻭﺭ ﻓﻲ ﺭﺍﺳﻬﺎ ﺑﻬﺪﻭﺀ ﺷﺪﻳﺪ ﺣﻄﺖ ﺍﻟﺼﻮﺭﻩ ﺷﺎﻓﺖ ﻛﺘﺎﺑﻪ ﻓﻲ ﻗﻔﺎﻫﺎ .. ﻭﻗﻔﺖ ﻉ ﺣﻴﻠﻬﺎ ﻣﺮﺓ ﺗﺎﻧﻴﻪ ﻭﻗﻌﺪﺕ ﺗﻘﺮﺍ ...
( ﺍﻟﺤﺎﺝ ﻋﻠﻲ ﻭﻭﻟﺪﻩ ﺳﻴﻒ ) ..
ﺍﻧﺼﺪﻣﺖ ﻋﻠﻴﺎ " ﺳﻴﻒ !!! ﻣﺎﺳﻤﻌﺘﺶ ﺑﻴﻪ ﻗﺒﻞ ﺑﻜﻞ ..." ﻋﻠﻴﺎ ﻣﻦ ﺗﻮﺗﺮﻫﺎ ﺭﺩﺕ ﺻﻮﺭﺓ ﻟﻤﻜﺎﻧﻬﺎ ﺑﺴﺮﻋﻪ .. ﻭﻃﻠﻌﺖ ﺑﻬﺪﻭﺀ ﻭﺻﻜﺮﺕ ﻭﻓﻌﻘﻠﻬﺎ ﺳﺆﺍﻝ ﻭﺍﺣﺪ " ﺍﻟﺤﺴﻦ ﻋﻨﺪﻩ ﻋﻢ ﺍﻧﻲ ﻣﺎﻧﻌﺮﻓﺎﺵ ﻋﻼﺵ ﻣﺎﺟﺎﺑﻮﺵ ﺳﻴﺮﺗﻪ ﺑﻜﻞ؟؟ ....(!
.... ﻳﺘﺒﻊ
