صحة فطوركم ❤🌙
#الحسن
#رمضان_احلا_مع_جمان_فريد
الجزء 13💓💓💓
يتأمل في بنته وهي راقده ع سرير المستشفى وجمالها مطفي ..والحزن انهكها ..انصدم لما شاف شعرها..من لما روحت كانت تتعمد تقعد بالحجاب بش مايشوفاش..
نزلوا دموعه ودموع الرجال ماتنزلش بالساهل ..قعد يدعي في قلبه ربي يرفع هالغمه ويجعل في اللي صاير كله خيرة..
***
جنان بصدمه: خطيبها سيبها!!
ابتسام بألم : ايه طلع واطي..
جنان : توجع القلب معقوله هذا كله يصيرلها في مرة..ربي يكون في عونها...
نرجس: بنمشولها اليوم للمستشفى..
جنان : بنمشي معاكم..
ابتسام ابتسمت : تمام..
....
هاك ولدي قهوتك..
الحسن: تسلم ايدك ياغاليه...
ع خشة جنان بنبرة حزينه: السلام عليكم
الزوز : وعليكم السلام..
وسيله تتفحص في وجه بنتها: خيرك جرتك باكيه..
جنان نزلوا دموعها: تعرفي في من كنت نزور في المستشفى..
الحسن ركز معاها..
وسيله بخلعه: منو اللطف..
جنان: عليا ياماما..
الحسن قام عيونه في اخته ومنتبه زين..
وسيله: خيرها!!
جنان: مسكينه فوق اللي صارلها والكلام اللي طلع عليها خطيبها سيبها..
وسيله : الفجي في هالبنيه...
جنان: كان تشوفيها كيف ولت ياماما ..البنت اللي الكليه تحكي بجمالها ..ذبلت في مرة وحده...
وسيله: ربي يلطف بيها مسكينه..
جنان: يااارب..ماما بنمشي نرقد تو نتغدا لما انوض..
وسيله هزت راسها بإيجاب...وجنان مشت لدارها خطمت من حداها خوله وجت لأمها وخوها
خوله: خيرها جنان..
وسيله : مضايقه ع بنت الحافظ
خوله : ياناري عليها...
هما الزوز كملوا هدرزتهم ع عليا والحسن كان طول الوقت يفكر..اكثر مشهد يتكرر قدام عيونه لحظة اللي طلعت قدامه يوم العمليه ..وكيف شاف شرودة مطعون بمقص..كان فاهم اللي صار كويس وكان زابط أن عليا دافعت عن شرفها وماخلت حد يتمكن منها وهذا اللي زاد كبرها في عينه..وفقلبه 💓
***
ابتسام بفرحه مكتومه تظاهر بعكسها: انت مش حتشعف لين تاكل طريحه..
بلال بضحكه: بشرط..وبنظرات حب..انتي تعطيهالي..
ابتسام وجهها نار من الخجل: اسمع طروح الملاعبيه نزبطها ره ..
بلال : ههههههههه ملاعبيه صار..
ابتسام : حول من طريقي..
بلال: بنجيب امي..
ابتسام انصدمت: شنو؟!!
بلال بجديه: شوفي يابنت الناس اني راجل ع قد حالي لكن ناكل في لقمتي بالحلال فاتح ورشة لحام وأموري والحمد لله ماشيه..نسكن في منطقه شعبيه في حوش فيه دارين وصاله وحمامين ومطبخ..وماعندي حد في الدنيا غير أمي...
امي مراة طيبه وحنينه هي صعبه شوي بس حتحبيها...ايه عيشتي مش عيشه جنب حياتك اللي عايشتها في هالقصر..وأشر عليه...لكن معاي ..وأشر ع روحه..حنعيشك اميره..تنقصك حاجه نخبط راسي في الحيط ونجيبها ولاتقعدفخاطرك ...مش كلام بس صدقيني..
ابتسام تسمع فيه وقلبها بيفر..ع راس لسانها كلمة" نحبك " اللي ماحستهاش إلا معاه..كلامه زاد اعجابها بيه...بس تفكرت بوها وخافت..
بلال ركز ع ملامحها كيف تغيروا: بوك خليه عليا..
ابتسام ابتسمت: واثق من نفسك هلبه..
بلال: مافي شي مايخلنيش نوثق في نفسي..المهم خودي وقتك في التفكير..ردك نستنى فيه بش نجيب الساكته..
ابتسام بضحكه استغراب: الساكته!!
بلال بإبتسامه : أمي اسمها الساكته...لف بيمشي وأشرلها بإيده 🖐وهو عاطي بظهره وماشي
وابتسام حست بشعور فرحه ليه طعم تاني وخشت للحوش وهي تضحك...
***
فاتوا يومين...
طلع حسان من السجن وصلاته سيارة للحوش..اول مانزل لقي الباب البراني مردود خش داخل طق الباب...فتحت أمه..
وسيله بفرحه مخفيه: طلعت..
حسان كان مضايق هلبه خش وماباش يرد عليها لقي قدامه الحسن مقعمز وحاط رجل ع رجل
حسان: خير شن مازال تاني..
الحسن ناض وقدمله : هالمرة جاتك في شهر..مرة تانيه في 5سنين..اشر بسبابته..اعقل لأني في الجايه مش حنرحم..خطم من جنبه وطلع..
حسان شبح لأمه بضيق ومشي لداره طول..
وهي برغم انه ولدها وجعها لكن مافيش غير هالطريقه بش يتربى بيها
....
في الجامع...
عابد : يومين بإذن الله ونبعتوا العويله
يونس: مرحبتين بيكم ..
عابد: والله فرحان من قلبي اللي بنتك حتولي كنتي ..
يونس: مش اكثر من فرحتي اللي بيناسبوني ناس زيكم...
***
اطلع يابوي حط عيونك في عيونهم اثبتلهم ان كل كلامهم كذب وانه مستحيل يأثر فيك..انت انسان نظيف طول عمرك
وهما عارفين كويس ..مادورهمش واجه يابوي واجه..
جعفر كان يسمع في كلام ولده وهو يتألم..
زينب: ولدك عنده حق ..نوض توا دوش والبس وامشي للجامع وراسك مرفوع...
تشجع جعفر وناض توجه للحمام ..زينب فرحت مشت وتتله سوريته العربيه وعطرتها...طلع من الدوش..ولبس حوايجه وتعطر..وطلع من الحوش..
مشي ع رجليه قاصد..الناس يشبحوله بس هو كان رافع راسه ومش مدور حد لين وصل في الجامع..خش صلى ركعتين تحية المسجد ..اللي ليه مده ماجاه..استاحش هالمكان الطاهر اللي حس بيه وكأنه حضنه..وكأنه استاحشه حتى هو ...
جاه راجل من بعيد: قدم ياشيخ جعفر..
وزع نظره ع الناس اللي كانوا يشبحوله..بعدين شبح لمحراب الإمام...ابتسم وقدم طول...والناس اصطفت وراه..وصلى بيهم وصدره انشرح ع الآخر...
هذا حنان ربي ورحمته معيته مع عباده المظلومين المكسورين ...تحس وكإن ربي مدلك ايده وساعدك توقف بعدطحت..وكانه مسح ع قلبك همومه برحمته..وكإن طبطب عليك ..وكإن يقولك
"لاتحزن إني معك"...ومن زيه اللي ربي يكون معاه💓
***
نعم نعم نعم!!!
عابد ببرود: الله ينعم عليك...
حسان : مستحيل..شنو هذا ..بتزوجوني بالغصب وانتم اللي اخترتوا...هلبه هكي والله حتى البنات معاش يديرولهم فيها..
عابد: انت اللي جبته لروحك..اسمع ياولد اني كلمة وقلتها حتتزوج..وخلال نهارين حنرفع امك وخواتك يخطبوا البنيه..واحمد ربك اللي في من ترضى بيك..لو تعرف عمايلك وبلاك الأسود
حسان ناض: تمام تمام ..بس لازم تعرف إن ذنب هالبنت في رقبتك..وطلع من حدا بوه...
عابد : يااارب اجعل اللي درته كله هو الصح..
...
هاله: مش كإن بسرعه هلبه..العرس بعد شهر بس..
يونس: عادي يابنتي مش مشكله...وكانك ع البتات والعرس كله حندبرله يابنتي..
هاله : مش هذا قصدي اني قصدي زي الغمان يابوي..
يونس بنبرة هاديه: بنتي نبي نطمن عليك تربحي يابنتي..
ناضت هاله باست راسه: اللي تبيه يصير..
يونس: ربي يرضى عليك دنيا وآخرة ويسخرلك قلوب كل من تقابليهم..
...
وفعلا فاتوا يومين ومشوا خطبوا هاله وسيله وبناتها التلاثه..وكانت نظرة شرعيه بالمرة...
وهنا كانت الصدمه 💥
هاله بصدمه : أنت!!!
حسان بضحكه: إنتي متاع الطعميه !!!هههههه يالا سخرية القدر..
هاله اضايقت بس في جمله استفزتها اكثر من استهزائه بيها: كلمه سخريه القدر معاش تقولها لاتجوز..
حسان :ههههههههههه كملت..
هاله ساكته وتشبحله بضيق..
حسان: شوفي من الأخير اني هالزواج مجبور عليه اجبار..اني مانبيش بس مضطر نتقبل لأن بوي صديق بوك..بتعيشي معاي ماتطمعي مني بشي ..بتهكم واني طبعا مش حنطمع منك بشي لأن مافيك شي ينطمع فيه..
هاله تاني مرة تنجرح منه: حتى اني مجبورة ع فكره..الله غالب النصيب جابك ليا وكان هذا واحد زيك مستحيل نرضى بيه..
حسان بتفاجئ: انتي اطولي اصلا بري تفرجي ع روحك في المرايه..
هاله بإبتسامه ثقه: نتفرج ع روحي في المرايه نشوف في نفسي نظيفه والحمد لله...لكن انت؟!!
حسان تنرفز ع الآخر: الله يسامح بوي وخلاص.
هاله: حني فيها انهي الموضوع من عندك اني بنت مانقدرش نواجه بوي لكن انت تقدر ...ماه أنت وبضحكه هزوة راجل!!
حسان رقاله الزيت عصابته ع الآخر ..ضحك بمكر: تي والله لما ناخدك باهي..وتو نوريك الرجوله اللي عندي..
هاله ناضت طلعت طول...وهو ضحك..
حسان: صدقت روحها..هي وجهها يبشر بعام الجدم..لكن والله لما نكرهها في جلدها...
***
عبدالقدوس: سفرتك هالمره حتطول هلبه..
منصف: هذا اللي نبيه..
عبدالقدوس: شوف اني مانحبش ندخل في خصوصيات حد ..بس انت استعجلت في اللي درته..
منصف: رجاءا يابي سكر ع الموضوع..
عبدالقدوس هز راسه بأيجاب وسكت..
***
عليا بدت تطلع من دارها تعول في الحوش بس من فم ساكت تاكل وتشرب احسن من قبل بس كانت تتحشا تقعمز مع عيلتها ..بوها كان مضايق ع خاطرها بس خلاها ع راحتها اكيد زي ماطلعت من عزلتها في دارها حتطلع من عزلتها في الحوش..
...
كان يتمشي في حي يسكنوا فيه اصحاب الحاله المتوسطه..
كان يخش ويسأل في الناس ع حوش الحاج جعفر..وكل واحد يقوله حاجه شكل..اللي يشكر واللي يذم..واللي يذم كان أكثر...حس ان أغلب الناس طاحت من عينهم هالعيله..
هو كان يحس بدمه يفور لما يتكلموا عليها ...يحاول يتمالك نفسه ع قد مايقدر..فات من جنب اخر شخص سأله..ولقي روحه واصل في حوشهم كان واقف بمسافه بعيده شوي...كان يفكر هلبه ...نهاية هالتفكير وصل لقرار وحينفذه طول...
***
عدوا بالزبط تلات ايام..
وفي يوم..
برنيه : واثقه فيه وفي اي شي يديره واني معاه..
الحاج علي: حتى اني..برغم اني عارف ان عابد ووسيله حيعارضوا...
برنيه: اللي يعارض سيوره بيرضى يبي ولا مايبي..
الحاج علي بضحكه: متحمسه الحاجه..
برنيه : فرحانه من وسط قلبي...
الحاج علي: انتي بنت اصول يابرنيه رغم انهم مش احفادك لكن تحبيهم اكثر من احفادك..
برنيه بإبتسامه: دامهم ليك معاناها ليا حتى اني..
الحاج علي ابتسم: ربي يطول في عمرك
برنيه : وفي عمرك يابو جرد مغطينا
الحاج علي: هههههههههه
***
جيب الطوبو خل بنغسلها..
مصعب : هي شويه..طقطق الباب..
جعفر: شوف من يطق قبل..
مصعب توجه للباب وفتحه: تفضل...
الحسن : السلام عليكم
مصعب: وعليكم السلام...
الحسن: الشيخ جعفر موجود..
جعفر جاهم تفاجئ لما شافه: الحسن الصادق..
مصعب بصدمه: الضابط هداكانفسه
جعفر: ايه هو..تفضل ياولدي تفضل...
خش الحسن: يزيد فضلك ياشيخ..
سكر مصعب الباب..
جعفر: هيا تفضل داخل تفضل...جعفر شبح لولده بنظرة فهمها مصعب..وخش قال لأمه ان في ضيف جي لبوه..
خشش جعفر الحسن للمربوعه وقعمزه..
جعفر بإبتسامه: كيف حالك وحال بوك وجدك..
الحسن : الحمد لله كلهم بخير..وانت ياشيخ كيف حالك وحال العيله..
جعفر هز راسه يإيجاب: الحمد لله ع كل حال...
...
ولد عابدالصادق..
مصعب : ايه الأفندي اللي طرابلس كلها تحبه وتحكي عليه
زينب : زعمه مش جاي ع خاطر قضية خطف اختك
مصعب: ممكن
...
الحسن : زي ماتعرف ياحاج جعفر اني اللي داهمت وكر منذر في أخر عمليه..ولقيت بنتك غادي..
جعفر بضيق: والله ياولدي كان خاطفها بالله حلف..
الحسن: لاياحاج ماتحلفش اني عارف انه كان خاطفها وواضح هالشي...
جعفر: شوف ياولدي من نهار روحت بنتي وحني معاش نندروا ع هذاكا المجرم..ولاعاد كلمنا..ولاجي جيهتنا..وصدقني لو بنتي تعرف مكانه كانت خبرت طول..
الحسن: عارف ..
جعفر: ياولدي بنتي نفسيتها تاعبه من اللي صار..وبدت شوي شوي تطلع من الحاله اللي هي فيها مانبيهاش تنتكس مرة تانيه..
الحسن: واني والله ماجيت بش نضرها..
جعفر: انت جاي بش تحقق معاها ولا؟
الحسن ابتسم نص ابتسامه: ولا جاي نحقق معاها..
جعفر ضيق عيونه: مالا عدم المؤاخذة ياولدي انت علاش جاي..
الحسن بحزم: جاي نطلبها منك ع سنة الله ورسوله...
...يتبع....
