#الحسن
#جمان_فريد
الجزء30
القنوات الليبيه ناقله لحفل تخريج دفعه جديده من كلية الشرطه...واللي يخصهم الأمر كلهم يتابعوا..تخلل الحفل استعراض لإمكانيات الشرطه اللبييه بعد إعادة هيكلتها عقب انتهاء الحرب وكان شي مشرف..بعدها جت اخر فقرة في الحفل هي تكريم الضابط في جهاز مكافحة المخدرات
العقيد الحسن الصادق🛡...الكاميرا عليه وهو يمشي لين وصل في الشخصيات المهمه..لبسه رئيس الوزراء وسام الشرف ..وهناه ع تفانيه واخلاصه في خدمه وطنه من خلال مكافحه تجارة السم اللي قاعده اضيع في شباب البلاد..
كان كله هيبه والكاميرا مسلطه عليه وهو يصور مع وزير الداخليه بعدها رئيس الوزراء بعده رئيس البرلمان
💖العيله كلها قدام التلفزيون كلهم فخر وفرحه وفي اللي دموعهم نزلت..حاطه ايدها ع قلبها وهي تشوف فيه وتذكر في اللي صار قبل ليطلع غمضت عيونها وشعور حلو هلبه مسيطر عليها...ادور بعيونها ع العيله تشوف في ردود أفعالهم
.وفرحانه أكثر إن الراجل هذا يخصها هي أكثر منهم كلهم💖
💖حوش جعفر كالعاده فرحانين وفخورين بنسيبهم زينب لين دموعها نزلوا وهي تتفرج واللي مفرحها أكثر ان راجل زي هذا من نصيب عليا بنتها...
🖤في مكتب عبدالقدوس البي الوجوه متجهمه ..ومنصف قريب يتفجر"مش دايمتلك يالحسن وتو تشوف"..
...
وليدي مش هذا الراجل اللي جانا يومها للحوش
بلال : ايه هو..
الساكته: نهارك معجج الحسن الصادق يجي لحوشنا وماياخدش قدره ؟؟
بلال بضحكه: هو جي فجأة يام..
الساكته : حتى لو..مفروض قلت يجي مرة تانيه حياخد قدره وبزايد...
بلال: هههههههههه..
...
خوها!!
رياض: ايه خوها..
وليد : غريبه وحده تانيه غيرها ره أول حاجه جابت سيرتها لما تقدم للوظيفه خوها..
رياض ابتسم : وحده تانيه مش خوله..
وليد ابتسم ورجع يتفرج..
...
منذر يتفرج ومبتسم بتهكم"راس الحيه لو نخلصوا منك أنت حتمشي امورنا..سامحيني ياريلا حنرملك بكري يا وخيتي " وقعد يضحك..
***
شن ديري لولو..
عليا بإبتسامه : قطايف..
جنان : سارة قالتلك ..
عليا : لا اني خاطري فيها...حطتها في الكوشه وعدلت درجة الحرارة..
ساره جتهم: الحسن روح..
طلعوا معاها طول وركبوا فوق السطح كانوا النساوين كلهم فوق ويتفرجوا ع النوبه اللي دايرها الحاج علي لولد ولده..ذبح قعود ...وجاب رجاله يطيبوا الغدي...
عليا تشبح للحسن كيف واقف وايديه في جيوبه ويفرج ع النوبه وملامح وجهه جادة تماما..
سارة: ياوخيتي نجيلي وخييي صقر ..
جنان : الليث اللي ليبيا كلها تحكي عليه يكون خويا ياناس..
انعام : ويكون ولد خويا ياناس..
ميسون : ويكون عمي ياناس..
هاله بضحكه: ويكون سلفي ياناس..
عليا : ويكون راجلي ياناس💖
كلهم: ههههههههههههههههههههههههه
تمت الفرقه خدمتها ومشوا ..وخش الحسن وباقي العيله والأحباب وهو يمشي في وسط جده وبوه ..وتوجهوا لصالة المناسبات..
النساوين مقعمزين حدا عالة الحاجه برنيه..اللي تلالي ع حفيدها وكلهم يسمعولها فرحانه بيه وفجأة قعدت تبكي..
استغربوا فيها بكت بشكل غريب وماهدت إلا بالسيف..
بعد شويه..
جابوا حصة النساوين من الغدي...وقعدوا يتغدوا..
خوله : في بالي فكره ..
انعام : قولي..
خوله : مازال ع عطلة نص السنه اسبوع شن رايكم نديروا رحله..
جنان : في الجبل توا تلج وأجوائه حلوة وفي منتجع شتوي غادي اسمه "****"(طبعا كله من وحي الخيال)
سارة : والله فكره...باه انتو جماعه الشركات والمصارف بتاخدوا اجازة...
خوله: اني ناخدها تلاته ايام...
انعام : عندي رصيد باهي في الإجازات نقدر ناخد..
عليا : خلاص كلموهم الرجاله وشوفوا..
***
هكي ياسمحه انتي خلتيني نحطك في راسي..
التمساح : راك تقول كبدت..
كامليون: لالا عجبتني ونبيها..
التمساح: مش عارف علاش مش قادر نصدقك..
كاميليون : جعلك ماصدقت..
التمساح : ههههههههه
***
معليشي ياولدي لو نقدر نشوف بنتي شويه..
الحسن : اكيد ياعمي امتى تبي تشوفها تعالى ..وقام تليفونه وكلم انعام..
انعام : افندم ياحضرة الزابط ..
الحسن : كلمي عليا قوليلها تركب لشقتها بوها يبي يشوفها
انعام : حاضر..وصكرت ...عليا ياعليا...جتها ..
عليا: نعم..
انعام: اركبي لشقتك بوك يبي يشوفك..
عليا بفرحه : باهي..وطول مشت لشقتها ..وهذا كان ع عيون هاله اللي خنقتها العبرة..💔
...
ركبت لشقتها..وتت ضيافه وبخرت الحوش..شويه وطق الباب..كان بوها ومعاه الحسن..
عليا بعيون مدمعه: بابا..
جعفر: الريلا متاعي..تعالي فتح ايديه وخشت عليا في حضنه مستاحشاته هلبه..دخلاته ووراهم الحسن قعمزوا..
جعفر: شن حالك بنتي وشن دايره..
عليا : الحمد لله ..انت شن حالك بابا وشن داير ..
جعفر: الحمد لله..بنتي..شبح للحسن كيف بنتنا معاك..
الحسن شبحلها وشبحله : ونعم التربيه ..
عليا ابتسمت بخجل وجعفر فرح هلبه..
قعدت عليا تهدرز مع بوها والحسن يتفرج عليهم..واضح تعلقها بيه وواضح كذلك حب جعفر الكبير لبنته عليا..ولفت نظره انه مايناديش فيها إلا ريلا....وكان خاطره يعرف شن معناه..استأذن بوها برغم انهم شدوا فيه هلبه بس هو اصر ع المرواح..طلع هو والحسن وعليا بعد دمعت..غسلت وجهها ونزلت لحوش العيله..
....
اوووووه الحاج جعفر كان عندهم ...
: ايه..
منذر : تمام ...
: كامليون شن في فراسك
منذر: ...اني وعيلتي شي خاص يعني..
: مش قصدي ياراس..بس نبي نحذرك خليك بعيد عنهم لإن راجل اختك اكيد يترصد فيك..
منذر: هههههههههه تو نشوفوا منو اللي مفروض يحذر..
***
بعد العصر..
روحوا الناس..والحسن ركب للشقه غير حوايجه..ونزل ..خش للحوش..
مالقي حد في الصاله توقعهم داخل مقعمزين لأن سمع صوت ضحك وهدرزة..وهو ماشي لدار المعيشه اللي مقعمزين فيها العيله..خطم حدا الكوجينه لمح عليا فيها وواضح كانت بروحها..
شو واثق بحالو وشو قلبو قوي
وقلبي من جمالو ذايب مكتوي..
كانت قصة إعجاب صارت حب وعذاب
تاري شيخ الشباب حبو بيكوي كوي..
"شكلاطه هالمرة"..
نفس الرجفه تصيب فقلبها غير تسمع صوته..شمت ريحته والتفتت لقاته واقف وراها يشبح للصونيه..
الحسن : ماتكتريش عسل..
عليا : مش حنكتر شويه بس ها..زي توا..وقعدت ادير فيها وهو يشبحلها ومبتسم...نزل راسه وباس خدها بعمق..وهي جمدت في مكانها..وخر..
الحسن : ماتعطليش بيها ..وطلع وخلاها قريب يغمى عليها..حطت ايدها ع خدها وغمضت عيونها وبعدين ضحكت.."ياربي ساعدني 💓💓"..
خش قعمز داخل وجوه فوق الريح وقعدوا يهدرزوا اقترحوا عليه حكاية الرحله وقال انه مايقدرش يمشي..ع خشة عليا..
سرمد: معناها عليا تمشي معانا..
الحسن : دام اني مش ماشي هي علاش ماشيه..
برنيه: خليها تمشي وليدي بين عيلتك هي شن بيصير فيها ..
الحسن : اني قلت لا..
عليا : بس اني خاطري فيها..
انعام : خليها تمشي ماتقعدش في خاطرها..
الحسن : كلمه وقلتها لا يعني لا انهوا..
سكتوا كلهم وعليا دمعتها في عينها ..قعدوا يهدرزوا عادي بعدها ..وهو كان لاهي بالهدرزة مع سرمد ومرعي..
اما هي كانت قريب تتفجر..شويه وانسحبت من بحداهم وطلعت برا..دموعها نزلوا ..شافت جهة العنبه مشتلها ..خشت قعمزت ع الكرسي اللي كان تحتها وقعدت تبكي..كان كرم العنبه كبير هلبه ومضلل...
هو بعدين وزع نظره ع مكان مالقهاش ..
سارة: بكل خوي هذا وشن فيها كانت مشت معانا...
خوله: ممكن خايف عليها...
انعام : العفو من شنو اهو حني ماشيين..
هو حاول يتجاهل التفكير فيها ماقدرش ناض من بحداهم وطلع يدور عليها..مالقهاش في الكوجينه بابها البراني كان مفتوح تنهد وتوجهله ..طلع...دور عليها مالقهاش مقابله جت عينه ع الكرم متاع العنب لمحها فيه..ابتسم ومشالها..
وصل فيها لقاها راقده ع ايدها المحطوطه ع الطاوله وتبكي..
الحسن : هذا كله ع خاطر المشيه..
عليا: خليني بروحي..
الحسن قدم قعمز جنبها هيا بعدت ولفت وجهها جهة التانيه وهي بنفس وضعيتها..
الحسن ابتسم وتنهد: بكري نشبح في نظرات بوك ليك حسيتها نظرات فرح لإنه مطمن عليك عندي..حسيت بالمسؤوليه اتجاهك اكثر واكثر..مانقدرش نطلقك بروحك ياعليا..
عليا وهي بنفس وضعيتها:بس أني مش بروحي..
الحسن : طالما اني مش معاك معناها انتي بروحك..
عليا قامت راسها وشبحتله: انت خايف عليا من منذر الصندوق اللي بعته اخر مرة خلاك تحس انه ناوي ع شي ولا من يومها واني حسيت بيك زاد حرصك عليا اكثر..وره مركزة ع الناس اللي باعتهم وراي في الكليه وين مانمشي..
الحسن ورافع حواجبه : لاحظيتهم صار..هذا غير موصيهم..
عليا : هما دارو جهدهم مساكين..بس أني مش ساهله ماتعديش عليا..
الحسن قعد يشبحلها وابتسم وشبح القدام: تمام امشي..
عليا بفرحه : والله..
الحسن : ايه.. حنأمنك ع نفسك ياعليا ...
عليا : ع قد مانقدر حنحافظ ع الأمانه...
الحسن ابتسم وناض: هيا نوضي خشي صقع..
عليا ابتسمت : تمام وناضت معاه وخشوا داخل..
خشوا الزوز لغرفة المعيشه..
سارة : كملت عليكم القطايف...تسلموا ايدك مرت خوي ..
عليا بضحكه : صحتين ..بس يعني ماقعد شي للحسن شافها بكري..
جنان: قضت عليهم حماتك المخرومه..
الحسن : مش مشكله..اساسا الصبح واكل قطايف احلى من هادي بويين..
عليا فنصت بصدمه...
برنيه : قصدك خديت من برا..
الحسن : يعني..
سرمد: شن لغز هذا..
الحسن: مالاش حل..
عليا غاصت في حوايجها هي بس فاهمه ع أي قطايف يحكي 💖..
***
دور عليها لوطا مالقهاش ركب للشقه سمع صوتها وكأنها تبكي..
كانت مقعمزة ع الصلايه وتدعي وتبكي: يارب اجعل قبره روضه من رياض الجنه..يارب استاحشته هلبه هلبه..حاسه روحي بروحي يارب حاسه بوحشه حاسه روحي معاش عندي حد..لابو لاأم لاخوت..اغفرلي يارب لو كان هذا اعتراض..بس اللي نحس بيه انت عارفه يااارب عارفه..حطت ايديها ع وجهها وقعدت تبكي بالعبره..فجأة حست بدفء حاوطها..كان حضنه..
حسان وهو حاضنها: حبيبتي ..ياروحي...اني موجود اني زوجك اني خوك اني بوك..ولو تبي نكون امك ماعنديش مشكله..ضحكت هاله من بين دموعها...حضنها بزياده..آااه ياقلبي ..نبيك ديما تضحكي هلو ياسرك دموع عيونك الحلوات هادم مفروض ديما يضحكوا..
هاله بعدت شويه وقعدت تشبحله: حسان ماتخذلنيش ..
حسان : يجعله ربي اخر يوم فعمري اليوم اللي نخذلك فيه..
خشت فحضنه من جديد وقعدت شاده فيه وهو زاد حضنها بش تحس بالأمان والراحه..
في الليل...
ههههههههههههههههههه
الحسن : علاش تضحكي..
عليا : من وأنت صغير عقدة..
الحسن : عقدة!!بدل ماتفرحي اني ماعنديش في العوج من يوم يومي ...
عليا : ههههههههههه...بس انت اوفر..
الحسن : ماه انتم هكي الواحدلما يمشي صح اديروه معقد..
عليا : باه خلاص وانت ولعت..
الحسن : ماولعتش عادي نتكلم ..
عليا قعدت تشبحله...
الحسن شبحلها : خيرك تشبحيلي هكي..
عليا: خاطرك نعرفك اكثر واكثر..
الحسن ابتسم: شن تبي تعرفي..
عليا : يعني علاش انت طلعت بالشخصيه هادي..علاش جدي زيادة عن اللزوم..علاش اخترت تكون في الشرطه..علاش..سكتت وشبحتله..علاش ماحبيتش بكل..
الحسن تنهد وشبح القدام: الجديه طبع فيا ممكن قربي من خالي جمال الله يرحمه اللي كان عسكري وكنت نشوف فيه قدوة وخديت عنه جديته هادي هواللي خلاني نختار نخش الشرطه بعد ماكنت حاط في راسي الجيش قالي بلادنا فيها جبهات هلبه مفتوحه..ومن بينها جبهة تجار المخدرات..اللي قاعده اضيع أهم فئه في اي مجتمع ..الشباب...قالي تقدر غادي تحارب وادافع ع بلادك بحمايه شبابها ..والقضاء ع تجار هالسم اللي هما اعداء للوطن..خشت راسي وكبر معاي كلامه وفعلا خشيت كليه الشرطه واخترت قسم المكافحه..وممكن شغلي ليه علاقه كبيره في بناء شخصيتي...
شبحلها..اما عن اخر سؤال..ماجتش اللي تستاهل نحبها او تحرك مشاعري..اللي بصراحه اني حطيتهم ع جنب ..لأن خدمتي هكي تبي ..
عليا: امممم...وزعمه من هي هادي اللي تقدر تحرك مشاعرك..
شبحلها برفعة حاجب: القطايف..
عليا احمروا خدودها وططت عيونها لوطا ..
الحسن ابتسم: هيا نوضي ارقدي..
عليا ابتسمت : باه..تصبح ع خير...
الحسن : وانتي من اهله ..تمدد ع كنبه وهي ماشيه للدار بعدين التفتت وقعدت تشبحله كيف حط ايد ع راسه وايد ع صدره وغمض عيونه بعد ماتغطا...تنهدت وخشت للدار...
***
تاني يوم...
زاهيه : بتاخدي اجازه..
خوله : ايه ...
زاهيه : ديريها مرضيه مش حيقبلوا بيها غير هكي..
خوله :بس اني مش مريضه..
زاهيه : معناها مش حيسمحولك..
خوله : تو نجرب حظي...ناضت طلعت ..شويه وناض بعدها رياض..هيا تمشي وهو وراها بمسافه..دار تليفون تكلم شويه بعدين سكر..
ركبت الاصنصير..وهو الدروج ..وصلت قبله طبعا وهو بعدها..خشت لمكتب المدير..بعد حوالي 5دقايق طلعت فرحانه..وقفت لما قابلت رياض ...
رياض بإبتسامه : وافقولك..
خوله : ايه ..
رياض : كويس..
خوله : عندك حاجه هني
رياض بربكه: ء..لا..خوله..
خوله : اممم
رياض : بنسألك سؤال بس نتمنى مايكونش تطفل...
خوله :تفضل
رياض: احمم ...يومها جاتك بطاقه دعوة او حاجه زي هكي حسيتها ضايقاتك..يعني..
خوله تنهدت: انت شبه تعرف بعض الحاجات..بطاقة الدعوة كانت لصديقتي ودكتورتي مع الأسف عرسها ع طليقي ..
رياض: مايستاهلوش اضايقي نفسك ع خاطرهم..
خوله : مش ع خاطرهم ع خاطر نفسي..ابتسمت ..خلينا من هذا كله خل ننزلوا نشوفوا شغلنا أحسن..
رياض ابتسم : اوكي...ونزلوا مع بعض..
***
شكله حلو هلبه..
بلال: عجبك..
ابتسام : حلو هلبه..بس بالله عليك بلال رد بالك..
بلال : ماتخافيش بسومتي..
ابتسام : الخوده ديما ع راسك..
بلال : اوكي..
ابتسام : وابعتلي الفيديو
بلال بضحكه: باهي..
ابتسام : بالله عليك رد بالك..
بلال : هههههههه والله امي ارحم منك...
ابتسام بضحكه: اسمع الكلام وانت ساكت..
بلال أبتسم : حاااااااضر...
***
رد بالك ارجوك..
حسان بضحكه: هادي المرة20اللي تقولي فيها هالكلمه
هاله بضحكه: اسمع الكلام ..
حسان : ع راسي..احمم ممكن ناخد منك حاجه قبل لنطلع..
هاله فهمت قصده ضحكت مدتله خدها هو ضحك وباسه بعمق ..وبعدين بعد ابتسم وطلع...وهي قعدت تضحك..
***
واقف مع رئيسه ويتناقشوا في شي مهم ..
جاد الله : ضربه قويه ليهم ..الهجوم المباغت ع أوكارهم حيضربهم في مقتل..وحيضعفهم هلبه..
الحسن : المنطقه كبيره..العمليه مش حتكون عاديه خطيره هلبه يافندي..
جاد الله : عارف لهالسبب حنتعاونوا فيها مع الأمن العام..
وأنت اللي حتخطط للعمليه..
الحسن : ليا فترة واني نخطط للعمليه وإن شاء الله خير..
جاد الله : خيرك نحس فيك متردد..
الحسن : مش تردد بس ممكن لأني متوجس من فكرة ان حنفقدوا ارواح في هالعمليه..
جاد الله ضحك بإستغراب: مش أول مرة يالحسن..
الحسن : بس حتكون المرة الأولى اللي حنفقدوا فيها شهداء بعدد كبير ومنهم خريجين جدد..
جاد الله : الحسن عمرك ماكنت هكي..قلبك مولي رهيف..
الحسن ابتسم تلقائيا..
جاد الله بضحكه: نتايج الزواج ...
الحسن : ممكن...
***
تجهزوا كلهم للرحله ...وطبعا الرحله شبابيه خالصه..كلهم ركبوا سيارة الحسن اللي كان يسوق فيها سرمد ..ومرعي وراهم بأخته وميسون وصهيب...وتسقدوا..عليا حاسه روحها ماشيه ومخليه قلبها وراها..بس مع هذا حاولت تتأقلم معاهم ...
...
ثلج ورعد وبرد ريح الدنيا برا مجنونه
ثلج مكوم مابيزيح وأنتي عندي مسجونه...
: المكان مليح ياراس..
منذر: مليح هلبه...بس صقع هلبه..
: وصلوا ياراس..
منذر: ههههع...حمد لله ع سلامتهم ...
...
جنان : الاجواء تهبل ...
عليا : ايه فضيعه..
انعام : هي تعالوا نقعمزوا...
كلهم كانوا مقنطات بكبابيط ولبس غليظ وشالات..ومقعمزين
في مطعم في المنتجع جابولهم شاهي سخون وكعك تركي..
جنان: حلو هلبه..
عليا : ايه مشروع ناجح ...
انعام: بالذات في مكان زي هذا جبل نفوسه ...
خوله : حاسه بشعور حلو هلبه..
ساره : ايه حتى اني..
ميسون : شن رايكم نديروا جلسة مصارحه..
ريحانه : كيف يعني..
ميسون: يعني كل وحده فينا تصرح بشي او شعور معين هكي يعني..
هاله : حلوة ..
انعام : اني مواقفه...
جنان : كلنا موافقين...وزعت نظرها عليهم ..ولا..كلهم ابتسموا وهزو راسهم بإيجاب...
ميسون: من عندها شجاعه تبدا الأولى..
جنان : اني..
ميسون بضحكه: هيا..
جنان ابتسمت: احممم...اني حاليا عايشه قصة حب..
كلهم اندهشوا بضحكه معادا عليا ابتسمت..
سارة : منو ياخاينه..
جنان : مش مهم منو ..المهم إني حاسه بشعور حلو هلبه ..ونتمنى يستمر معاي..
انعام ابتسمت: إن شاء الله..
جنان : باه منو توا...
خوله : أني..احمم..بعد التجربه اللي عشتها تعلمت ان الوحده لما تجي تتزوج لازم تختار راجل صح..مش مهم الحب قد مامهم ان اللي يحبك يكون راجل بكل معنى الكلمه...
عليا اذكرت الحسن وابتسمت..
انعام: يعني لو جاتك فرصه تانيه للزواج حتتزوجي..
خوله ابتسمت : اكيد اهم شي نختار صح ومايعميش الحب ع قلبي..
انعام شربت شاهي وسكتت..
خوله : منو توا...
هاله : اني...حكمت بالظاهر ع حسان ..حكمي كان غلط ..لاني مازال ماعرفتاش صح من داخله إنسان طيب دمه خفيف حنين وعنده رغبه ان يكون انسان كويس..
خوله بإبتسامه: حبتيه..
هاله وجهها أحمر...
ساره : باينه خلاص...
ابتسموا كلهم..
ميسون : شنو مافيش وحده تانيه تبي تصرح بشي..
عليا : مستاحشة...
كلهم شبحولها..
سارة : بعد هكي صراحه مافيش..
كلهم ضحكوا وعليا ابتسمت بخجل ...
في الطاوله اللي وراهم كان يسمع فيهم ويضحك..
منذر"حتستاحشيه هلبه ياريلا "...
....
كملوا يومهم وهما يدهورا ويصوروا في الأماكن اللي صب عليها ثلج ..لعبوا بيه ودارو بيه رجل تلج وصوره..وخودلك ياتنزيل ع الفيس..والشباب كانوا محاوطينهم ..زي مانبه عليهم الحسن..
ليل الليل وكل وحده خشت فراشها ورقدت في المكان اللي حاجزينه...عليا قعدت تتقلب ماقدرتش ترقد ..عقلها عنده وتفكر فيه ماحست بشي من غيره..صح هو مايقعدش معاها هلبه ..بس حتى لو كان مش معاها فهي وياه في نفس المدينه..بس هالمرة هو بعيد هلبه..حست بوحشه من دونه..
تلفتت شبحتهم راقدين ماعدا فراش واحد كان فاضي..
عليا "وين مشت هاله"
...
بس والله خطيره..
حسان: واخد احتياطي ومنتبه كويس..
هاله شبحتله : حسان انت علاش ماتخدمش..
حسان ابتسم : من قالك مانخدمش..
هاله بإستغراب: كيف..
حسان بضحكه: مافكرتيش اني وين نكون طول النهار..
هاله بضحكه: فكرت بصراحه ومش حيعجبك اللي فكرت فيه..
حسان: هههههههههههههه توقعتك..
هاله: باه وين تكون طول النهار...
حسان : نخدم في محل تصليح اجهزة الكترونيه..
هاله بدهشه : حققه..
حسان بضحكه: والله..اني خريج هندسه الكترونيه..
هاله : ماكنتش نعرف..
حسان ابتسم
هاله : نبي نعرفك أكثر ...
حسان يشبح لعيونها: واني حنكون كتاب مفتوح قدامك..
هبت نسمه
هاله: هرررر..هههههههههه
حسان بضحكه: صقعتي..
هاله : شويه ...
حسان لف ايده عليها وضمها ليه وهي ابتسمت وخشت في حضنه وغمضت عيونها..
وهذا كله كانت تشوف فيه عليا وهي مبتسمه وحطت ايدها ع قلبها"ياترى شن دير توا"...
***
المنطقه هادي اللي بلون الأحمر..ليهم فيها مزارع هلبه وأماكن تواجدهم الدائم فيها المنطقه مأمنه من قبلهم ..وطبعا في ناس داعمه ليهم من الدوله..حيتم كشفهم قريبا..
آدم: لازم مايصيرش غلط..
الحسن: ع قد ماتقدروا ياآدم..ووزع نظره ع العناصر..مش حنخفيكم العمليه هادي خطيرة للغايه..
واحد من العناصر: لما خشينا لهالمجال واخترنا فرع مكافحة المخدرات عارفين اننا اخترنا اكثر الأقسام خطر واننا ممكن ندفعوا حياتنا في هالخدمه..وبإذن الله حنكونوا شهداء ...
الحسن ابتسم : بعد يومين العمليه..سكت شويه ..لو تبوا ودعوا اللي تحبوهم...واني أولكم..
كلهم شبحوله متأثرين وبعدين هزوا روسهم بإيجاب وأبتسموا..
***
تاني يوم الصبح ...
طلعوا يتمشوا في مكان جديد ..وتوزعوا في المكان...عليا كانت تمشي بروحها وحاطه سماعات في وذنها وتسمع في أغاني..وفي عيون تراقب فيها..هيا ماكانت مركزة ع شي كانت سرحانه وتمشي وخلاص ..وماركزتش انها بعدت هلبه..
وهني وفي لحظه ايد غمت ع فمها وسحبتها بالقوة واختفت ...
...يتبع....
سامحوني رمضان وراسي دايخ غيى هكي ننشر في روايتين ثانيات في قروب غير هذا ❤
