#الحسن
#جمان_فريد
الجزء 25
وصلت للسيارة بعد ماهو وصللها مباشرة..
عليا وهي داهشه: اسمعني بالله عليك اللي ش ...
الحسن : اركبي...وركب للسيارة...
عليا مشت ركبت وهي خايفه من بروده الشديد..
في السيارة قعدت تشبحله وهو ولع السيارة وتحرك..
عليا شبحتله وتشجعت: احمم..اللي شفته بكري ه....
الحسن : سألتك ع حاجه..طلبت منك تفسير...لا..لذلك ماتبرري شي..
عليا بإصرار: لا..لازم نبرر..
الحسن : الواحد لما بيجي يبرر حاجه لحد لازم هالحد يكون مهم عنده سماع التبرير ..واني مايهمنيش..لذلك ارتاحي...
خوك هذا حندير جهدي كله بش نشده..مادامك مستعجله هكي..ووقتها نطلق سراحك وترتاحي وأني نرتاح..ومعاش نبي نسمع شي..دار اشاره بإيده...انهي..
عليا معاش قدرت تتكلم بكل خلاص ماعندها شن تقول قعدت حاطه وجهها في الروشن وشاده دمعتها بأقوى مافيها..
وهو ظاهره بارد..بس ربي عالم بحال قلبه اللي والعه فيه النار..وصدره اللي ضاق ع الآخر..يقول في نفسه لقلبه..قتلك ياقلبي مش ليك علاش ياقلبي دير فيا وفيك هكي ..كنت مرتاح..اني كنت مريحك لكن انت تبي تتعب وتتعذب..انت ياقلبي...💔
***
متكيين ع السيارة قدام البحر...في ايده شاورما ويوكل فيها..
هاله تاكل: اممم..خلاص معاش نبي..
حسان : شن كليتي انتي ماكليتي شي..
هاله بحزن: والله ماعندي نيه في حاجه..
حسان شبح للبحر بعدين شبحلها: هاله..انتي لازم تقوي..بوك لما زوجك كان يبي يطمن عليك..يعني انتي امانتي توا ..لذلك حتاكلي غصب عنك..لهذا افتحي فمك توا وقولي أاااه..
هاله بضحكه: باه سكر فمك مكبره ..
حسان : هههههه باه كولي..
هاله ابتسمت وبدت تاكل...
***
وصل الحسن عليا للحوش ...ومشي طول...هي مجرد خشت دموعها نزلوا ...مشت ركبت الدروج ارتاحت لما مالقت حد قبالتها..فتحت الفاصل وركبت فوق طول...
اما الحسن مجرد وصل المركز..تواصل مع جماعة المكافحه في مدينه تانيه ..يشوف شن صار معاهم واطمن انهم شدوا الشحنات وعدموها...في نفس الوقت كلم جماعه يسألوا ع الشركه اللي عرضت عمل ع أخته يجيبوله معلومات عنها...
***
اتصل بيا الحسن بكري وقالي ان الشركه امورها تمام وصاحبها سمعته كويسه..وإن هما دارو نفس الحركه مع موظفين عندهم حاليا قبل ليجيبوهم..
جنان : معناها حتمشي غدوة..
خوله: إن شاء الله..
جنان : موفقه حبيبتي..
خوله غمضت عيونها وفتحتهم بإبتسامه..
***
مقعمزه حاطه عيونها في الشيت تبي تركز مش قادرة ..تأففت ..تفكر في اللي صار اليوم مش قادره تنساه..الشي الغريب انها حست وقتها إن الحسن عندها مهم هلبه وأن منصف ولاحاجه..حست بخوف. هيا ماتبيش هكي..خايفه لوتخونها مشاعرها وقلبها وتميل لشخص مافيش ليها معاه مستقبل وجودهم مع بعض مربوط بشرط لو تحقق..كل منهم حيمشي في حاله...سكرت الشيت وارتمت ع الكنبه وتأففت وغمضت عيونها..فتحت عيونها وقعدت تشبح فوق..
<< خوك هذا حندير جهدي كله بش نشده..مادامك مستعجله هكي..ووقتها نطلق سراحك وترتاحي وأني نرتاح.>>
نزلت منها دمعه ..تبعتها دمعه تبعوها دموع..خدت مخده من جنبها حضنتها وقعدت تبكي بالعبره..
***
تاني يوم..
لبست وتأنقت..بعد فطرت وسمعت دعوات حلوة من أمها طلعت توجهت لسيارتها وركبت وتحركت من الحوش..وتوجهت للمكان اللي تتمنى انها تحظى فيه بالوظيفه..
وصلت درست في البركيدجو الخاص بالشركه نزلت وفي ايدها ملفها ..وشنطة يدها..وسكرت باب السيارة ..ومشت..طلعت من البركيدجو ..توجهت للمبني شبحتله وبعدين ابتسمت وركبت الدرجات وخشت المبنى..توجهت للمكان اللي فيه مقابله العمل..لقت فيه ناس قبلها "هادوا كلهم كلموهم" ..لقت كرسي فاضي قعمزت..وقعدت تستنى..شويه وجي واحد قعمز جنبها ..حست بيه التفتت جنبها...تفاجئت..
: احمم..ضايقتك..
خوله بإبتسامه : لا أبدا..ولفت وجهها القدام..
كان يشبحلها مركز عليها ..ع لبسها وع تقعميزتها وع الملف في ايدها ...
: حتى اني جاي ندير مقابله..
خوله ابتسمت مجامله وهزت راسها بإيجاب: اممم..
: بصراحه محتاج هلبه للوظيفه هادي..
خوله شبحتله..
: نخدم في عمل حكومي بس زي ماتعرفي المرتب مايدير شي لازم الواحديخدم خدمتين وتلاته بش توفي معاه..
خوله شبحت القدام وهزت راسها بإيجاب موافقه ع كلامه..
: اليوم دعتلي بنتي ..صغيرونه عمرها 5سنين..بابا ربي يحققلك احلامك..."قلد صوت الأطفال"
خوله ابتسمت : ربي يحفظها...احمم هي اللي كنت تكلم فيها يومها..
: ههههه يعني اذكرتيني زي ماأذكرتك
خوله بضحكه : ايه..
: ايه..هي اللي كنت نكلم فيها..
خوله : شن حالها..
ابتسم لأنها كانت مركزه ع حديثه وفهمت ان بنته مريضه: الحمد لله برده وراحت لحالها..
خوله : الحمد لله...
"تفضلي ياأختي"...
خوله شبحتله: تفضل...
: لالاا كيف انتي جيتي قبل..
خوله : وين المشكله خش انت واني بعدك ماقعدش غيرناوهما واضح مايطولوش...
: تمام ..ابتسم وناض خش...
داخل..
خش قعمز..مقابل المدير العام للشركه ماكانش في غيره داخل..
وليد بضحكه: عليك مسرحيه ممله ياراجل..
رياض : خلاص هيا حتخش بعدي..اسمع ماتسهلهاش حاول تصعبها وركز عليها وع ردة فعلها..
وليد : الصبببر..
رياض: اخدم وانت ساكت....ناض رياض وطلع انصدم لما مالقهاش..
:عفوا ياخوي..
رياض: نعم..
:تفضل اللي كانت مقعمزة بحداك بكري خلتهالك ..خدي الورقه وهو متفاجئ..فتحها
(شفت ان أنت انسب للوظيفه أكثر مني..واكيد دعاء مليكه زي بنتك ربي حيستجيبه موفق ويارب تكون الوظيفه من نصيبك)
قلبه قعد يدق بالقوة وابتسم ابتسامه من وسط قلبه..حط الورقه في جيبه ومشي..
"رياض شركته كبيره ومايجيش إلا لو في حاجات مهمه الموظفين العاديين ماكانوش يشوفوا فيه..وليد ذراعه اليمين هو اللي يتعاملوا معاه"....
***
فات كم يوم..
هاله روحت لحوشها مع حسان وعلاقتهم فيها ليونه شويه برغم ان هاله تتعامل معاه بحذر ..مش بالساهل حيكسب ثقتها...
اما عليا فعلي حالها نفسه..ماتغير شي والحسن معاش شافته بكككل...
ابتسام دارت خطوبه بسيطه هي وبلال برغم انه أمه مش راضيه وبوها مايبيش بش مافي ايدهم..شي..
خوله قاعده ادور ع خدمه لين في يوم جاها اتصال...ردت..
خوله : الو..
وليد : انسه خوله..
خوله : ايه من معاي..
وليد: احني من شركه RZB..حضرتك علاش ماجيتيش للمقابله..
خوله متفاجئه: كيف ..انتم ماقبلتوش حد لتوا..
وليد : مالقينا حد تناسبه الوظيفه الشاغرة اللي عندنا..
خوله قعدت ساكته..
وليد: لوسمحتي تعالي غدوة بش اديري المقابله..
خوله تنهدت :إن شاء الله..وصكرت..
خوله مطت شواربها بتساؤل...
...
وليد : شن تبي منها..
رياض : تستعبط..
وليد : باه ..وشنو ناوي ادير..
رياض ابتسم بحماس وبدي يحكي......
***
واقفه في الروشن وهو تحت..
ابتسام : لالا مش حلوه السودا أحلى..
بلال: تمام..تعرفي بسومتي متوتر..
ابتسام : ههههه..طبيعي..
بلال: قصدي بعد شاب ..
ابتسام : شاب شنو بس انت قعد صغيرون..صدقني بلال..مافي احسن من العلم..
بلال: اكيد مافيش احسن منه لوانتي قرتيني..
ابتسام: شن بنقري فيك..الحاسب..بعيد عن تخصصي..
بلال: بسومتي انت الانرجي متاعي وسبورت الذي يدفعني للأمام..
ابتسام : ههههههههههههههههههههه حي ع الفصاحه حيييي..
بلال بضحكه: ربي مايحرمني من هالضحكه..
ابتسام ابتسمت بخجل وهي تشبحله وهو بعتلها بوسه طايره..
ابتسام ادرقت وقعدت تضحك وصكرت عليه..وهو قعد يضحك وهو يشوف في التليفون متاعه..
شويه ووصلت رساله لإبتسام..كانت صورة لبلال..
رياكشن وجهه وكأنه خايف...
(بوك شافني واقف لوطا )..
ابتسام طول طفت الضي وخشت فراشها ودارت روحها راقده..
بلال لما شاف ضي دارها انطفي..ضحك ومشي..
اما عندها فطق بوها ع الدار..بعدها فتح الباب لقاها راقده هز راسه ايمين ويسار وسكر الباب..
وهي ضحكت تحت الغطا...
***
فات اسبوع..
مافيش جديد..غير ان خوله دارت المقابله مع وليد وقبلوها في الخدمه وحتبدا الأسبوع اللي بعده..
في يوم..
كان الحاج علي مداير مصالحه عنده وحوشه كان جهة محايده صارت فيها المصالحه ..
طبعا العيله كلها التمت..والنساوين يد بيد من الصبح وهما في التطييب والعواله..وجابوا من يعاونهم وسيله كانت موجوده..
كانت كل ماتحصل فرصه اضايق بيها عليا تستغلها وعليا ساكته ومتحمله وكلهم ملاحظين..
انعام : وسيله زودتها..
برنيه : غير يعدي هاليوم تو نتفاهم معاها...
بعد المغرب..
فاطمه: وين المكانس..
برنيه : بكري ريت وحده قدام الحوش..
عليا : تو نشوفها..لبست عليا وشاح ..وطلعت قعدت ادور ..
في هاللحظه انفتح الباب وخش الحسن ..
قامت عيونها فيه قلبها قعد يرجف ..كلها ع بعضها قعدت ترجف..تظاهرت بعكس هكي..وقعدت ادور هي اصلا نست شن كانت ادور..شويه ولمحت المكنسه حدا الدروج..
هو ركب وهي بتنزل..من كثر ماملخبطه زلقت رجلها كانت حطيح..بس هو بسرعه حاوطها بأيديه...قعدت تشبح لعيونه وهو يشبح لعيونها ...قراب هلبه ع بعض..انفاسهم تضرب في بعض..صدورهم تعلا وتهبط من قوة تنفسهم..وقلوبهم..
قربع💓قربع💓قربع💓قربع💓قربع💓
سمعوا صوت الباب انفتح بعدوا ع بعض طول ..
كان سرمد لما خش حس انه جي فوقت غلط كانوا ملخبطين هلبه احمرار وجوههم يدل ع هالشي..هي خدت المكنسه وركبت تجري طول ..اما الحسن فلف ع جنب وكمل طريقه اللي توصله للصاله الخارجيه...
سرمد: هو الحوش مولي حوش عشاق..واني بديت نتسهف نعيش حالاتهم..شبح فوق لقي حسان واقف في الروشن دارله 🖐 ردهاله حسان ..
حسان: استناني ياعم..
سرمد: هيا تعالى..
***
خلال يومين نبيك توصل الأمانه للأسم هذا...
ونبيك توصل الأمانه هادي توا للعنوان هذا...
: تم ياكاميليون..
***
عليا كانت واقفه ع البصله ...وريحانه تشبحلها ..تبي ادير اي شي ...وفراسها أكثر من فكرة خبيثه..
ريحانه: حناي تبي من يضربلها يبرة السكر..وعمتي انعام مش لاقيتها..
فاطمه : مانعرف يابنتي...
عليا: تو نمشي بالله عينكم ع البصله ...وخشت طول..
ريحانه " هههع ديما مدايره روحك فالحه تو تنفعك فلاحتك"..
استغلت انشغال امها بتطييب اللحم..
خدت سكرية الملح وصبتها في الطنجرة وقعدت تحرك..
وبهدوء ولت مكانها ولاكأنها دارت حاجه..
***
من قال هادو يتصالحوا ..
الحسن : ديما في مكان للصلح في اي خلاف او صراع ..
سرمد: بس مش كل الخلافات والصراعات...
الحسن شبحله بعدين شبح القدام..
***
بدوا يوتوا في العشي..القصاع والصفر....وبدوا يسقوا وسيله هي اللي حتسقي مع سلفتها فاطمه..
وقفت ع طنجرة البصله ..ومن عادتها لازم اذوق قبل ..ذاقت البصله..
وسيله بصدمه: اممممععع...حييي ع العار..هذا شنو..
برنيه: خيرك
وسيله : مالحه سم ياعمتي..
برنيه : نهار احرش..وقدمت برنيه ذاقتها..قعدت تكح..هذا شنوهذا اللطف من دايرها ..
فاطمه: عليا..
مجيده: كيف..عليا مقاديرها ديما مزبوطه..
وسيله: تعالي ذوقيها يامجيده بروحك..
مجيده : مش قصدي ياعمتي بس استغربت..
وسيله : وينها هيا..
ع خشة عليا..
وسيله : تعالي ياللا تعالي شوفي المصيبه اللي حطتينا فيها..
عليا بخلعه : شن في..
وسيله : تعالي ذوقي البصله..
عليا قدمت وهي خايفه ذاقتها..قريب ماتت..
وسيله : كيف نديروا حني توا قوليلي..
ع خشة البنات ..
انعام :شن في..
وسيله : تعالوا شوفوا العار ..حوش علي الصادق اللي عمره ماطلعت منه الحاجه الناقصه..مش حيطلعوا عشاهم لناس جايين من قطع الدنيا..
خوله : علاش..
انعام قدمت : شن في عليا..
عليا بصوت مرعوش: والله العظيم اني درتها صح ..مقادريها زابطتهم كويس..
انعام شبه فهمت وذاقت وجهها تغير..
وسيله : كشفتي بينا ..كشف بيك اكثر ما انتي مكشفه..
عليا تقول ماضربها بموس لما سمعت الكلمه..
برنيه : وسييييله..
وسيله قعدت تشبح بغل لعليا..
عليا انسحبت من بحداهم وطلعت برا..
وريحانه مروووقه ع الآخر..
فاطمه: كيف نديروا توا..
هاله : تو نتصرف..وخدت تليفونها وطلعت...
كلمت هاله وحده جارتهم اطيب في المناسبات لحسن الحظ المراة أمنتلهم مايسد عزومتهم...
كلمت هاله حسان يجيب العشي وفعلا مشي..وجابه في سيارة كبيرة المراه مدايرتها خدمة توصيل..وترقع الوضع..
بس عليا مسكينه طلعت للجنان قعمزت تحت وحده من النخلات وقعدت تبكي بقهرة..جتها هاله..
هاله: عليا حبيبتي اهدي خلاص..
عليابعبرتها: والله مادرتلها حاجه والله..ولدهم هو اللي جاني هو اني ماجبتاش ولاكنت نعرفه قبل ياهاله ولابيني وبينه حاجه...والله ماوافقت إلا ع خاطر بوي وعيلتي والله..وقعدت تبكي..هاله حضنتها..
هاله: حتى اني ماتبنيش لحسان وتشبح فيا اقل منهم ..ماتشبحيش فيها كيف تعامل فيا..ربي يهديها هي هكي عقليتها شن بديرلها في النهايه أم رجالاتنا..
عليا ببكي: اني نفسيتي تعبانه..تعبت ياهاله والله تعبت من كل شي...
هاله قعدت اطبطب عليها : خلاص حبيبتي خلاص..اهدي اهدي ..
..جو باقي البنات لعليا غيرولها جوها ودخلوها...وقعدت تتحاشى حتى تشبح لوسيله..وريحانه كان جوها مليح تغسل في الماعين وتغني..
انا يلي بحبك وحدي انا
انا يلي بريدك ليا انا
انا يلي بعمري ببقى أنا
ع وعدي ياوعدي ياوحدي انا..
....
روحوا الناس ...وطبعا كانوا متكتمين ع حكايه العشي لو يندري الحاج علي يقلب الدنيا..
المهم قعمزوا كلهم في الصاله بعد تمت الحوسه ...
كيف جايين الحسن وسرمد بيخشوا..طق الباب..
الحسن بإستغراب : من جاي توا..
سرمد مط شواربه بإستغراب..
مشي الحسن فتح الباب: لقي بوكس احمر ومربوط بشريط ابيض..
قامها الحسن ودخلها وسكر الباب..
سرمد بضحكه: هذا شنو..
الحسن : تو نعرفوا..دخلها الحسن داخل..
في الصاله متاع الحوش..
انعام : حييي جايبلي هديه ولد خوي ..سلمه ياربي
الحسن : امشي قعمزي في مكانك..
سرمد بضحكه: هادي لقيناها فم الحوش..
فاطمه: تتكلم جد..
الحسن : ايه..
جنان : باه شوف مافيش عليها حاجه ادل ع شي...كرت ..رساله..
سرمد: تستس..
سارة : افتحوها باه..
الباقي يراقبوا وبس...
فتحتها جنان ..لقت فيها لعبة قطنيه..وحاجه مغلفه..خدتهم وناضت ..شنو هذا..
عليا فتحت عيونها ع وسعهم بصدمه...ناضت..قدمت..
عليا بصدمه: هادي متاعي..
كلهم شبحولها ومتفاجئين..خدتها وخدت الحاجه المغلفه ..حولت الغلاف..كانت صورة بالكاترو..عيونها تعبوا دموع ..صورة ليها هي ومنذر..كانت في عمر السنتين..ومنذر قايمها ولابس ملابس الفروسيه واقف حدا حصان..
جنان : منو هادم..
عليا مصدومه وخلاص ودموعها نزلوا..
سارة: من هما عليا..
عليا : احمم..هادي اني..وهذا خوي..
انعام : ياوخيتي بطوطه وهي صغيره..
ساره : عسسسسل..
جنان : حلاتها ياناااس خدت الصورة..شوفها ..مدتها للحسن ..الحسن خدي الصورة وقعد يشوفلها..كانت دبدوبه وشعرها اسود ناعم وقصير ودايره قصه..وخدودها حمر..وشفايفها لونهم زي الكرز بالزبط..وعيونها زي الفنجال..تهببببل...💖💖💖
مدها لجنان وماباش يعلق ولايشبح لعليا..
قعدت جنان تمرر فيها عليهم وكلهم عجبتهم هلبه وقريب هبلوا فيها..
سارة: بنخلي صورتك عندي..وغمزت"قصدها تتوحم عليها"
سرمد يشبح للصورة: من هو خوك اللي فصورة..
عليا قعدت ساكته..وسرمد فهم علاش..
وسيله : شكله خوها متاع المخدرات..
شبحتلها بصدمه..وكلهم شبحوا لوسيله...
وسيله : خيركم تشبحولي من اللي مايعرفش من هو خوها..اكبر راس في الإجرام كله..
"اممممممي"
كلهم سكتوا ..
الحسن : قسما بالله مازال نسمع واحد يغلط فيها بكلمه ولايوجعها بالحاجه هادي يسمع مني شي مايعجباش من كان يكون..اللي بيوصل فيها وصل فيا...
كلهم شبحوله وكلهم عجبهم اللي قاله ماعدا ريحانه وامه اللي ناضت: اطلع ياسرمد قول لعابد هيا..وانت يالحسن دام هادي ع ذمتك..معاش اتجيني ولانبيك..
الحسن : ع راحتك...ولف وطلع ..
اما عليا خدت الحاجات وانسحبت طول وركبت شقتها..
روحت وسيله مع بناتها تبكي..وعابد طارتله منها لأن عارف ان هي السبب أما عليا فكانت تبكي طول الليل..
عليا ببكي: شن مازال تبي مني يامنذر علاش ادير فيا هكي علاش..
والحسن ليلتها ماروحش وزي العاده بات في المركز...ماكانش راضي ع اللي صار منه لأمه..بس امه هي اللي غلطتت وواجبه يوقف مع الحق ..وعليا مرته قدرها من قدره مش حيتحمل فيها شي..وهكي الراجل صح...مش كان امه ظالمه يناصرها ع ظلمها...
***
خشت للشركه ..وتوجهت لمكان عملها ..كانت حجرة فيها تلاته مكاتب خشت قعمزت..شويه وخشت وحده..
: صباح الخير
خوله ابتسمت: صباح النور...
: جديده هني..
خوله : ايه اول يوم..اسمي خوله..
: اني اسمي زاهيه..
خوله : عاشت الأسامي..
زاهيه:تسلمي..
شويه وخش واحد..خوله ابتسمت بمفاجئه لما شافته..
قعمز...
زاهيه : هذا زميل جديد بادي من اسبوع..
خوله ابتسمت بفرح..وهو ردلها الإبتسامه..
زاهيه : هادي خوله..
: اهلا خوله ..
خوله : وانت شن اسمك..
ابتسم : رياض...
...يتبع....
