#الحسن
ﺍﻟﺠﺰﺀ ﺍﻟﺤﺎﺩﻱ ﻭﺍﻟﺴﺘﻴﻦ 💮
صورة 3.7K صورة 90 صورة 15
ﺑﻮﺍﺳﻄﺔ GomanFared
ﺍﻟﺴﺤﻮﺭ ...
ﻛﺎﻧﻮﺍ ﻣﻘﻌﻤﺰﻳﻦ ﻳﺎﻛﻠﻮﺍ ﻓﻲ ﻣﻜﺮﻭﻧﻪ ﺳﺮﻣﺪ ﺑﺈﻳﺪﻳﻬﻢ ﻭﺭﺟﻠﻴﻬﻢ ..
ﻋﻠﻴﺎ : ﺗﻬﺒﺒﺒﻞ 😍
ﻫﺎﻟﻪ : ﺍﻣﻤﻢ ... ﺑﺮﻏﻢ ﺍﻧﻬﺎ ﺣﺎﺭﺓ ﻣﺶ ﻗﺎﺩﺭﺓ ﻧﻮﻗﻒ ...
ﺟﻨﺎﻥ ﺑﻀﺤﻜﻪ : ﻣﻜﺮﻭﻧﺔ ﺳﺮﻣﺪ ﺻﻌﺐ ﺗﺨﻠﻴﻬﺎ ﻭﺗﻨﻮﺿﻲ ..
ﺳﺎﺭﻩ ﺗﻠﻔﺘﺖ ﻟﻠﺠﻬﺔ ﺍﻟﻠﻲ ﻳﺎﻛﻠﻮﺍ ﻓﻴﻬﺎ ﺍﻟﺮﺟﺎﻟﻪ ﺑﺼﻮﺕ ﻋﺎﻟﻲ : ﻏﻴﺮ ﻛﺎﺍﻥ ﺗﻘﻮﻭﻟﻲ ﺷﻦ ﺍﺩﻳﻴﺮ ﻓﻴﻬﺎ ﺑﺲ ..
ﺳﺮﻣﺪ ﺑﻠﻊ ﻟﻘﻤﺘﻪ ﻭﺿﺤﻚ : ﺍﻟﻨﻔﺲ ﺍﻟﻨﻔﺲ ﻳﺎﺑﻨﺖ ﺧﻮﻱ ..
ﺍﻟﺤﺴﻦ : ﺷﻦ ﺟﻮ ﺳﻮﻕ ﺍﻟﺘﻼﺕ ﻫﺬﺍ !! ﻛﻮﻝ ﺍﻧﺖ ﻭﻳﺎﻫﺎ ﺑﻼﺻﻮﺕ ..
ﺳﺮﻣﺪ ﻭﺳﺎﺭﺓ 🠾
ﻛﻠﻬﻢ 😂😂😂😂😂😂😂:
ﺗﺴﺤﺮﻭﺍ ﻭﻏﺴﻠﻮﺍ ﺍﻣﺎﻋﻴﻨﻬﻢ ﺍﻟﺒﻨﺎﺕ ﺟﺰﺀ ﻣﻨﻬﻢ ﻓﻲ ﺍﻟﻜﻮﺟﻴﻨﻪ ﻭﺟﺰﺀ ﺑﺮﺍ ...
ﻋﻠﻴﺎ ﺑﺮﺍ ﻭﺍﻗﻔﻪ ﻉ ﺍﻟﻼﻭﻳﻨﺪﻳﻨﻮ ﺗﻐﺴﻞ ﻓﻲ ﺍﻟﺼﻔﺮ ..
ﺷﺎﻓﻬﺎ ﺍﻟﺤﺴﻦ ﺍﺑﺘﺴﻢ ﻭﻗﺪﻣﻠﻬﺎ : ﺍﻟﻠﻪ ﻳﻌﺎﻭﻥ ..
ﻋﻠﻴﺎ ﺍﺑﺘﺴﻤﺖ : ؛ﺗﺴﻠﻢ ..
ﺍﻟﺤﺴﻦ ﻗﺮﺏ : ﺍﻟﻔﺠﺮ ﻣﺎﺯﺍﻝ ﻋﻠﻴﻪ ﺭﺑﻊ ﺳﺎﻋﻪ ..
ﻋﻠﻴﺎ : ﻭﺍﻟﻤﻌﻨﻰ 😳
ﺍﻟﺤﺴﻦ : ﻧﺒﻲ ﻧﺤﻠﻲ ﺑﺎﻟﻘﻄﺎﻳﻒ ﻗﺒﻞ ﺍﻟﺼﻴﺎﻡ ...
ﻋﻠﻴﺎ ﺷﺒﺤﺘﻠﻪ ﻉ ﺟﻨﺐ ﺑﺄﺑﺘﺴﺎﻣﻪ : ﻏﻠﻂ . ﻣﺎﻛﻠﺔ ﺍﻟﺤﻠﻮ ﻗﺒﻞ ﺍﻟﺴﺤﻮﺭ ... ﺗﻮﺗﻌﻄﺶ ﻏﺪﻭﺓ ..
ﺍﻟﺤﺴﻦ : ﺑﺎﻟﻌﻜﺲ ﺗﺼﺒﺮﻧﻲ ﻏﺪﻭﺓ ...
ﻋﻠﻴﺎ : ﺑﺮﺍ ﻏﺎﺩﻱ ﺗﺮﺍ ..
ﺍﻟﺤﺴﻦ ﺍﺑﺘﺴﻢ ﻉ ﺟﻨﺐ : ﺫﻧﺒﻲ ﻓﺮﻗﺒﺘﻚ ﻭﺍﻧﺘﻲ ﺍﺳﺘﻘﺒﻠﺘﻲ ﺭﻣﻀﺎﻥ ﺑﺎﻟﺬﻧﻮﺏ ..
ﻋﻠﻴﺎ ﺑﻀﺤﻜﻪ : ﻭﻫﺎﺩﻱ ﻓﺘﻮﺓ ﻣﻨﻮ ..
" ﺁﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﺍﻩ "
ﻋﻠﻴﺎ ﻭﺍﻟﺤﺴﻦ ﺍﻧﺨﻠﻌﻮﺍ ...
ﻋﻠﻴﺎ : ﻳﺎﻟﻄﻴﻒ .. ﻣﺸﺖ ﻋﻠﻴﺎ ﻭﻭﺭﺍﻫﺎ ﺍﻟﺤﺴﻦ .. ﻟﻠﻜﻮﺟﻴﻨﻪ ﺍﻟﺨﺎﺭﺟﻴﻪ ﻟﻘﺖ ﺍﻟﺒﻨﺎﺕ ﻣﺘﻜﻤﺸﺎﺕ ﻓﻲ ﺍﻟﺘﺮﻛﻴﻨﻪ ﺟﺖ ﻋﻴﻨﻬﺎ ﻉ ﻫﺎﻟﻪ ﻣﻦ ﻏﻴﺮ ﺣﺠﺎﺏ ..
ﻋﻠﻴﺎ : ﺍﻟﺤﺴﻦ ﺑﺮﺍ ﻫﺎﻟﻪ ﻣﻦ ﻏﻴﺮ ﺣﺠﺎﺏ ... ﻭﺧﺮ ﺍﻟﺤﺴﻦ ..
ﺍﻟﺤﺴﻦ : ﺑﺎﻩ ﻓﻬﻤﻮﻧﺎ ﺷﻦ ﻓﻲ ...
ﻋﻠﻴﺎ : ﺧﻴﺮﻛﻢ ...
ﺟﻨﺎﻥ ﺍﺷﺮﺕ ﺑﺼﺒﻌﻬﺎ ﻭﻫﻲ ﺧﺎﻳﻔﻪ : ﺷﻮﻓﻔﻔﻲ ﻏﺎﺍﺍﺩﻱ ..
ﺷﺒﺤﺖ ﻋﻠﻴﺎ ﻭﻳﻦ ﻣﺎﺍﺷﺮﺗﻠﻬﺎ ﻟﻘﺖ ﺑﻮﺭﺑﺮﻳﺺ ﺣﺪﺍ ﺍﻟﺮﺧﺎﻣﻪ ..
ﻋﻠﻴﺎ : ﻫﻮﺍ ﻫﺬﺍ ...😑
ﺷﺒﺤﻮﻟﻬﺎ 😮😮😮😮
ﺩﻭﺭ ﺑﻌﻴﻮﻧﻬﺎ ﻭﺍﺩﻭﺭ ﻉ ﺍﻟﻤﻜﻨﺴﻪ ...
ﻣﻦ ﺑﺮﺍ ..
ﺳﺮﻣﺪ ﻭﺍﻷﻭﻻﺩ ﺟﻮﺍ ..
ﺳﺮﻣﺪ : ﺷﻦ ﻓﻲ !!!
ﺍﻟﺤﺴﻦ : ﻋﻠﻴﺎﺍﺍﺍﺍ ..
ﻋﻠﻴﺎ : ﺑﻮﺑﺮﻳﺺ ..
ﺍﻟﺤﺴﻦ ﺭﻓﻊ ﺣﻮﺍﺟﺒﻪ .. ﺳﻤﻌﻮﺍ ﺧﺒﻄﻪ ﻗﻮﻳﻪ ... ﻭﺷﻮﻳﻪ ﻭﻃﻠﻌﺖ ﻋﻠﻴﺎ ﻭﻓﻲ ﺍﻳﺪﻫﺎ ﺍﻟﺒﺎﻟﻪ ﻓﻴﻬﺎ ﺍﻟﺒﻮﺑﺮﻳﺺ ﻣﻴﺖ ..
ﻋﻠﻴﺎ ﻗﺎﺑﻠﺖ ﺍﻟﺤﺴﻦ ﻭﺍﻷﻭﻻﺩ : ﺍﻟﻌﻴﺎﻁ ﻫﺬﺍ ﻛﻠﻪ ﻉ ﺧﺎﻃﺮ ﻫﺬﺍ 😑
ﻭﻣﺸﺖ ﺣﺎﻃﺎﺗﻪ ﻓﻲ ﺍﻟﻜﻨﺎﺳﻪ ﻭﺍﻟﺒﻨﺎﺕ ﻃﻠﻌﻮﺍ ﻭﺭﺍﻫﺎ ﻳﺸﻮﻓﻮﺍ ﻓﻴﻬﺎ 🤤🤤🤤🤤🤤:
ﺑﻌﺪ ﻟﻮﺣﺎﺗﻪ ﻭﻟﺖ ﻋﻠﻴﺎ ﺗﻜﻤﻞ ﻓﻲ ﻣﺎﻋﻴﻨﻬﺎ .. ﻭﻫﻤﺎ ﻭﻟﻮﺍ ﺩﺍﺧﻞ ﻣﺼﺪﻭﻣﺎﺕ ..
ﺳﺮﻣﺪ ﺑﻀﺤﻜﻪ ﻣﺮﺗﺒﻜﻪ : ﺟﺒﺎﺭﻩ ..
ﺣﺴﺎﻥ : ﻣﺎﺟﻤﻊ ﺇﻻ ﻣﺎﻭﻓﻖ ..
ﻣﺮﻋﻲ : ﻟﻜﻦ ﺻﺤﻪ ﻹﻳﺪﻫﺎ ﻣﺮﺍﺓ ﺗﻬﻨﻲ ..
ﺍﻟﺤﺴﻦ ﺍﻟﺘﻔﺘﻠﻬﻢ : ﻫﻴﺎ ﺍﻧﺖ ﻭﻳﺎﻫﺎ ﻃﻴﺮﻭﺍ ﻣﻦ ﻫﻨﻲ ..
ﺍﻟﺜﻼﺛﻪ ..😅😅😅: ﻭﻣﺸﻮﺍ ﻃﻮﻝ ..
ﻭﻫﻮ ﻗﻌﺪ ﻣﻌﺎﻫﻢ ﺑﻌﻴﻮﻧﻪ ﻟﻴﻦ ﻣﺸﻮﺍ ﺷﺒﺤﻠﻬﺎ ﻟﻘﺎﻫﺎ ﺗﻜﺪ ﻓﻲ ﻃﻨﺠﺮﻩ ﻛﺒﻴﺮﻩ .. ﻗﺪﻣﻠﻬﺎ ...
ﺍﻟﺤﺴﻦ : ﻫﺬﺍ ﺷﻨﻮ؟؟ !!
ﻋﻠﻴﺎ : ﺷﻨﻮ؟؟ !!
ﺍﻟﺤﺴﻦ : ﺟﺒﺎﺭﺓ ﻳﺎﺳﻤﺤﻪ ﺍﻧﺘﻲ ..
ﺷﺒﺤﺘﻠﻪ : ﻻﻭﺍﻟﻠﻪ ﻻﻧﻲ ﺟﺒﺎﺭﺓ ﻭﻻﺷﻲ ﺑﺲ ﻫﺎﺩﻱ ﺣﺎﺟﺎﺕ ﻋﺎﺩﻳﻪ .. ﻭﺍﻧﻲ ﻣﺶ ﻣﻦ ﺍﻟﻨﻮﻋﻴﻪ ﺍﻟﻠﻲ ﻧﺨﺎﻑ ﻫﻠﺒﻪ ﻣﻦ ﺣﺎﺟﺎﺕ ﺯﻱ ﻫﺎﺩﻱ ...
ﺍﻟﺤﺴﻦ ﻗﺪﻣﻠﻬﺎ : ﺍﻧﺘﻲ ﻣﺮﺍﺓ ﻗﻮﻳﻪ ﻳﺎﻋﻠﻴﺎ ﻛﻞ ﺍﻟﻤﻮﺍﻗﻒ ﺍﻟﻠﻲ ﺷﻔﺘﻚ ﻓﻴﻬﺎ ﻛﻨﺘﻲ ﻗﻮﻳﻪ ... ﺍﻭﻝ ﻣﺮﺓ ﺷﻔﺘﻚ ﻓﻴﻬﺎ ﻭﺻﺒﻌﻲ ﻳﺸﻬﺪ ..
ﻋﻠﻴﺎ ﺿﺤﻜﺖ .. ﻭﺗﺎﻧﻲ ﻣﺮﺓ ﺑﺮﻏﻢ ﺍﻧﻲ ﺷﺪﻳﺖ ﻉ ﺫﺭﺍﻋﻚ ﺑﺎﻟﻘﻮﺓ .. ﺷﺪﻳﺘﻲ ﺩﻣﻌﺘﻚ ﺑﻘﻮﺓ ﻭﺭﺩﻳﺘﻲ ﻋﻠﻴﺎ ﺭﺩ ﺳﻜﺘﻨﻲ ...
ﻭﺍﻟﻤﺮﺓ ﺍﻟﻠﻲ ﺑﻌﺪﻫﺎ ﻛﻴﻒ ﺩﺍﻓﻌﺘﻲ ﻉ ﺷﺮﻓﻚ ﻭﻃﻌﻨﺘﻲ ﻣﺠﺮﻡ ﺧﻄﻴﺮ ﺑﺪﻭﻥ ﺗﺮﺩﺩ ..
ﻋﻠﻴﺎ ﺍﺑﺘﺴﻤﺖ : ﻋﻨﺪﻙ ﻋﻠﻢ ﻣﻦ ﺍﻟﺨﻮﻑ ﻫﻜﻲ ﻛﺎﻧﺖ ﺭﺩﺓ ﻓﻌﻠﻲ ..
ﺍﻟﺤﺴﻦ : ﻟﻤﺎ ﺗﻜﻮﻥ ﻣﻦ ﺍﻟﺨﻮﻑ ﻫﺎﺩﻱ ﺭﺩﺕ ﻓﻌﻠﻚ ﻣﻌﻨﺎﻫﺎ ﻛﻼﻣﻲ ﺻﺢ ...
ﻋﻠﻴﺎ : ﻣﻤﻜﻦ ﻗﻮﻳﻪ ﻓﻲ ﺑﻌﺾ ﺍﻷﺷﻴﺎﺀ ﺑﺲ ﺿﻌﻴﻔﻪ ﻓﻐﻴﺮﻫﺎ .. ﺿﻌﻴﻔﻪ ﻓﻴﻚ ﺍﻧﺖ ﻳﺎﻟﺤﺴﻦ ..
ﺍﻟﺤﺴﻦ ﺑﻌﺸﻖ : ﺁﺍﺍﺍﻩ ﻳﺎﺭﻭﻭﺡ ﺍﻟﺤﺴﻦ ... ﻗﺮﺏ ﺍﻛﺜﺮ ﻭﻋﻠﻴﺎ ﻣﻌﺎﺵ ﻋﺮﻓﺖ ﺗﺘﺼﺮﻑ
ﺍﻟﻠﻪ ﺃﻛﺒﺮ ﺍﻟﻠﻪ ﺃﻛﺒﺮ ..
ﻛﺎﻥ ﺣﻴﻮﺻﻞ ﻓﻴﻬﺎ ﺿﺤﻚ ﻭﻭﺧﺮ ﻃﻮﻝ ﻭﻣﺸﻲ ﻣﻦ ﺣﺪﺍﻫﺎ ... ﻭﻫﻲ ﻗﻌﺪﺕ ﺗﻀﺤﻚ ﻭﺗﻨﻬﺪﺕ ﺑﺤﺐ .. ﻛﻤﻠﺖ ﺍﻟﻠﻲ ﻓﻴﺪﻫﺎ ﻭﻣﺸﺖ ﻟﻠﻲ ﺩﺍﺧﻞ ﻟﻘﺘﻬﻢ ﻛﻤﻠﻮﺍ .. ﻫﺪﺭﺯﻭﺍ ﻭﻋﻠﻘﻮﺍ ﻋﻠﻴﻬﺎ ﻫﻠﺒﻪ ﻓﻲ ﻟﻘﻄﺔ ﺍﻟﺒﻮﺑﺮﻳﺺ ﻭﻫﻲ ﺗﻀﺤﻚ ﻭﺗﺘﺴﻬﻮﻙ ﻋﻠﻴﻬﻢ .. ﺑﻌﺪﻫﺎ ﻃﻠﻌﻮﺍ ﺗﻮﺿﻮﺍ ﻭﺻﻠﻮﺍ ﻭﻓﺮﺷﻮﺍ ﻣﻊ ﺑﻌﺾ ﻭﺭﻗﺪﻭﺍ ﻓﻲ ﺩﺍﺭ ﺍﻟﻤﻌﻴﺸﻪ ...
💓 ﺃﻭﻝ ﻳﻮﻡ ﺭﻣﻀﺎﻥ 🌙
ﻛﺎﻥ ﺍﻟﺸﻐﻞ ﻉ ﻗﺪﻡ ﻭﺳﺎﻕ ﺗﻄﻴﻴﺐ ﻭﺣﻮﺳﻪ ﻭﺍﻟﻨﺴﺎﻭﻳﻴﻦ ﻋﺎﻟﻘﺎﺕ ﻃﻮﺍﺭﻱ .. ﺍﻭﻝ ﺣﻴﻔﻄﺮﻭﺍ ﻋﻨﺪﻫﻢ ﺍﺍﻷﻗﺎﺭﺏ ﺍﻭﻝ ﺭﻣﻀﺎﻥ ﻣﻦ ﻏﻴﺮ ﺍﻟﺤﺎﺝ ﻋﻠﻲ ..
ﻓﻲ ﺍﻟﻤﺮﻛﺰ ..
ﺳﺎﻣﺮ ﻣﻌﺼﺐ ﻭﻳﻤﺸﻲ : ﺍﻟﺤﺎﻝ ﺣﺎﻝ ﺻﻴﺎﻡ ﻭﻫﻤﺎ ﻳﺸﺤﻄﻮﺍ ﻓﻴﺎ ﻓﻲ ﺟﺮﺓ ﺷﻴﺎﻃﻴﻦ ﺍﻷﻧﺲ ﺍﻟﻠﻲ ﺣﺘﻰ ﻓﺮﻣﻀﺎﻥ ﻣﺎﻳﺘﺼﻔﺪﻭﺵ ..
ﺍﻟﺤﺴﻦ ﻭﺭﺍﻩ : ﺧﻴﺮﻙ ﺗﺪﻭﻱ ﻣﻊ ﺭﻭﺣﻚ ..
ﺳﺎﻣﺮ ﺍﻧﺨﻠﻊ : ﻧﻘﻘﺮﺍ ﻓﻲ ﺍﻷﺫﻛﺎﺭ 🤤
ﺍﻟﺤﺴﻦ : ﻗﺎﻋﺪ ﺍﻭﻝ ﻳﻮﻡ ﻭﺑﺎﺩﻱ ﺑﺎﻟﻜﺬﺏ ﻣﺎﻻ ﻓﻌﻘﺎﺑﻪ ﺷﻦ ﺍﺩﻳﺮ .. ﻓﺎﺕ ﻣﻦ ﺣﺪﺍﻩ ﻭﻛﻤﻞ ﻃﺮﻳﻘﻪ ...
ﻭﺳﺎﻣﺮ ﺍﻧﺤﺮﺝ ﻉ ﺍﻵﺧﺮ ..
ﻭﺻﻞ ﺍﻟﺤﺴﻦ ﻟﻤﻜﺘﺐ ﺍﻟﻌﻤﻴﺪ .. ﻃﻖ ﻭﺧﺶ .. ﺍﺩﻯ ﺍﻟﺘﺤﻴﻪ ..
ﻋﺎﺩﻝ ﺑﺈﺑﺘﺴﺎﻣﻪ : ﺗﻌﺎﻟﻰ ﻗﻌﻤﺰ ...
ﻗﺪﻡ ﺍﻟﺤﺴﻦ ﻭﻗﻌﻤﺰ : ﻃﻠﺒﺘﻨﻲ ﺳﻴﺪﻱ
ﻋﺎﺩﻝ : ﺍﻳﻪ ... ﻧﺒﻲ ﻧﺘﻜﻠﻢ ﻣﻌﺎﻙ ﺑﺨﺼﻮﺹ ﻣﻠﻒ ﻋﺼﺎﺑﺔ ﺍﻟﻜﻮﺑﺮﺍ ..
ﺍﻟﺤﺴﻦ : ﻭﺍﻧﻲ ﻗﻠﺖ ﺍﻟﻤﻠﻒ ﻫﺬﺍ ﻣﺶ ﺣﻨﺴﻴﺒﻪ ..
ﺍﻟﻌﻤﻴﺪ ﺿﺤﻚ : ﺗﻤﺎﻡ .. ﺍﻧﻲ ﻗﺎﻋﺪ ﻧﺘﻜﻠﻢ ..
ﺍﻟﺤﺴﻦ : ﺍﺳﻒ .. ﺳﻴﺪﻱ ..
ﺍﻟﻌﻤﻴﺪ : ﻗﺪﺍﺵ ﻟﻴﻚ ﻣﺎﺳﻚ ﺍﻟﻤﻠﻒ ﻫﺬﺍ ..
ﺍﻟﺤﺴﻦ : 5 ﺳﻨﻴﻦ ..
ﺍﻟﻌﻤﻴﺪ : ﻭﺍﻧﻲ ﺷﻔﺖ ﺷﻦ ﺩﺭﺕ ﻓﻲ ﻫﺎﻟﺨﻤﺴﻪ ﺳﻨﻴﻦ ﺿﺮﺑﺘﻬﻢ ﺿﺮﺑﺎﺕ ﻗﻮﻳﻪ ﻭﺧﺴﺮﺗﻬﻢ ﻫﻠﺒﻪ .. ﻭﻏﻴﺮ ﻫﻜﻲ ﻣﻮﺕ ﺍﻟﻤﺪﻋﻮ " ﺍﻟﻜﻮﻣﺎﻧﺪﺍ " ﻫﻤﺎ ﺗﻮﺍ ﻓﻲ ﺣﺎﻟﺔ ﺍﻧﻬﻴﺎﺭ .. ﻳﻌﻨﻲ ﺍﻧﺖ ﺍﺑﻠﻴﺖ ﺑﻼﺀ ﺣﺴﻦ ﻟﻬﺎﻟﻠﺤﻈﻪ .. ﺧﻠﻲ ﻏﻴﺮﻙ ﻳﻜﻤﻞ ﻋﻨﻚ ..
ﺍﻟﺤﺴﻦ ﺑﺤﺪﻩ : ﺍﻧﻲ ﻳﺎﻧﻜﻤﻞ ﻓﻲ ﺍﻟﻤﻠﻒ ﻫﺬﺍ .. ﻳﺎﺣﻨﺴﻴﺐ ﺍﻟﺸﺮﻃﻪ ﻛﻠﻬﺎ ..
ﺍﻟﻌﻤﻴﺪ ﺭﻓﻊ ﺣﻮﺍﺟﺒﻪ ﻣﺘﻔﺎﺟﺄ ..
ﺍﻟﺤﺴﻦ : ﺍﻧﺖ ﻣﺪﺣﺘﻨﻲ ﻉ ﺍﻟﻠﻲ ﺩﺭﺗﻪ ﻓﻲ ﺍﻟﺨﻤﺴﻪ ﺳﻨﻴﻦ ﺍﻫﺘﻤﻴﺖ ﺑﺨﺴﺎﺭﺗﻬﻢ ﻭﻣﻮﺕ ﺍﻟﻜﺒﺎﺭ ﻣﻨﻬﻢ .. ﻟﻜﻨﻚ ﺗﺠﺎﻫﻠﺖ ﻛﻢ ﺭﻭﺡ ﺭﺍﺣﺖ ﺑﺶ ﻭﺻﻠﻨﺎ ﻟﻬﺎﻟﻨﺘﻴﺠﻪ .. ﺍﻷﺭﻭﺍﺡ ﺍﻟﻠﻲ ﺭﺍﺣﺖ ﻫﺎﺩﻱ ﻏﺎﻟﻴﻪ .. ﻭﺣﻠﻔﺖ ﺍﻧﻲ ﻣﺎﻧﺨﻠﻲ ﺩﻣﻬﻢ ﺗﺎﺭﻫﻢ ﺣﻨﺎﺧﺪﻩ ﺑﻴﺪﻱ ..
ﻋﺎﺩﻝ : ﻣﻤﻜﻦ ﺭﻭﺣﻚ ﺗﻜﻮﻥ ﺛﻤﻦ ..
ﺍﻟﺤﺴﻦ : ﻣﺶ ﺃﻏﻠﻰ ﻣﻦ ﺍﺭﻭﺍﺣﻬﻢ ..
ﻋﺎﺩﻝ ﺑﻀﺤﻜﻪ : ﺳﻴﻒ ﺍﻟﺼﺎﺩﻕ
ﻻﺟﻴﺖ ﻻﻣﺸﻴﺖ ...
ﺍﻟﺤﺴﻦ : ﻣﺶ ﺣﺘﻘﻮﻝ ﻳﺎﻓﻨﺪﻱ ﻣﻦ ﻭﻳﻦ ﺗﻌﺮﻓﻪ ..
ﻋﺎﺩﻝ ﺍﺑﺘﺴﻢ : ﻛﺎﻥ ﺭﺋﻴﺴﻲ ﺯﻣﺎﻥ ....
ﺍﻟﺤﺴﻦ ﺷﺒﺤﻠﻪ ﻳﺒﻴﻪ ﻳﻜﻤﻞ ..
ﻋﺎﺩﻝ ﺷﺒﺢ ﺍﻟﻘﺪﺍﻡ : ﻛﺎﻥ ﻗﺪﻭﺗﻲ ﻭﻣﺜﻠﻲ ﺍﻷﻋﻠﻰ .. ﺩﻳﻤﺎ ﻣﺮﺍﻗﻔﻪ ﺯﻱ ﻇﻠﻪ ... ﻛﺎﻥ ﻗﻮﻱ ﻋﻨﺪﻩ ﻫﻴﺒﻪ ﺧﻠﻮﻕ .. ﻭﺗﺎﺑﺚ ﻉ ﻣﺒﺎﺩﺋﻪ .. ﻭﺿﻤﻴﺮﻩ ﻋﻤﺮﻩ ﻣﺎﺭﻗﺪ ... ﻉ ﻗﺪ ﻣﺎﺣﺎﻭﻟﻮﺍ ﻓﻴﻪ ﺍﻧﻌﺮﺿﺖ ﻋﻠﻴﻪ ﻣﻨﺎﺻﺐ ﺍﻣﺘﻴﺎﺯﺍﺕ ﻣﻼﻳﻴﻦ ﻣﻼﻳﻴﻦ ﺍﻟﺪﻳﻨﺎﺭﺍﺕ ﺍﺑﺪﺍ ﻭﻻ ﺍﻧﻬﺰﺗﻠﻪ ﺷﻌﺮﻩ ﻭﻻﻣﺎﻝ ﻟﻠﺤﺮﺍﻡ ﻭﻟﻮﺷﻮﻱ .. ﺷﺒﺤﻠﻪ .. ﻛﺎﻥ ﻣﺎﺳﻚ ﻧﻔﺲ ﺍﻟﻤﻠﻒ ﻣﻦ ﺍﻛﺜﺮ ﻣﻦ 37 ﻋﺎﻡ .. ﻛﺎﻥ ﻋﻈﻤﻪ ﻓﻲ ﺭﻗﺎﺑﻴﻬﻢ .. ﺷﻮﻛﻪ ﻓﻲ ﺣﻠﻮﻗﻬﻢ .. ﺻﺎﺭ ﻫﻠﺒﻪ ﻭﻳﺎﻣﺎ ﺗﻌﺮﺽ ﻟﻠﻤﻮﺕ ﺑﺲ ﻓﻲ ﻛﻞ ﻣﺮﺓ ﻳﻄﻠﻊ ﻣﻨﻪ ﺍﻗﻮﻱ ﻣﻦ ﻗﺒﻞ .. ﻛﺎﻥ ﻳﺪﻭﺭ ﻭﺭﺍ ﺍﻟﺮﻭﺱ ﺍﻟﻜﺒﺎﺭ ﻓﻴﻬﻢ ﺑﺲ ﻣﺎﻗﺪﺭ ﻳﻮﺻﻞ ﻟﺸﻲ .. ﻟﻴﻦ ﺗﻌﺮﻑ ﻉ ﺿﺎﺑﻂ ﻓﻲ ﺍﻹﺳﺘﺨﺒﺎﺭﺍﺕ .. ﻣﺮﺓ ﻛﻨﺖ ﻣﻌﺎﻩ ﻟﻤﺎ ﺟﺎﻩ ﺍﺗﺼﺎﻝ .. ﻃﻠﻊ ﺑﺴﺮﻋﻪ ... ﻭﺍﻧﻲ ﺣﺴﻴﺖ ﺍﻥ ﻓﻲ ﺷﻲ ﺧﻄﻴﺮ ﺗﺒﻌﺘﻪ ﺑﺪﻭﻥ ﻣﺎﻳﺤﺲ .. ﺿﺤﻚ .. ﺍﻭ ﺍﻧﻲ ﻛﻨﺖ ﻫﻜﻲ ﻣﻔﻜﺮ .. ﻭﺻﻞ ﻟﻤﻘﺮ ﺍﻹﺳﺘﺨﺒﺎﺭﺍﺕ .. ﺧﺶ ﻭﺍﻧﻲ ﻗﻌﺪﺕ ﺑﺮﺍ ﻧﺴﺘﻨﻰ ﺑﻌﺪ ﺣﻮﺍﻟﻲ ﺳﺎﻋﻪ ﻃﻠﻊ ﻳﺠﺮﻱ ﺭﻛﺐ ﺳﻴﺎﺭﺗﻪ ﻭﺍﻧﻄﻠﻖ ﺑﺄﻗﺼﻰ ﺳﺮﻋﻪ .. ﺍﻭﻝ ﻣﺮﺓ ﻳﺴﻮﻕ ﺑﺴﺮﻋﻪ ﺟﻨﻮﻧﻴﻪ ﺯﻱ ﻫﺎﺩﻱ .. ﻭﺻﻞ ﺑﺄﻋﺠﻮﺑﻪ ﻟﺤﻮﺵ ﺑﻮﻩ ﺍﻟﻠﻲ ﻛﺎﻥ ﻋﺎﻳﺶ ﻓﻴﻪ ﻣﻊ ﺯﻭﺟﺘﻪ ﻭﻭﻟﺪﻩ .. ﻗﻌﺪﺕ ﻭﺍﻗﻒ ﺑﺴﻴﺎﺭﺗﻲ ﺑﻌﻴﺪ ﻣﺶ ﻋﺎﺭﻑ ﻋﻼﺵ ﻣﺎﻣﺸﻴﺘﺶ .. ﻧﺺ ﺳﺎﻋﻪ ﺑﺎﻟﺰﺑﻂ .. ﻟﻘﻴﺘﻪ ﻃﺎﻟﻊ ﻣﻊ ﻣﺮﺗﻪ ﺍﻟﻠﻲ ﻛﺎﻧﺖ ﻗﺎﻳﻤﻪ ﻭﻟﺪﻫﻢ ﻓﻲ ﻏﻤﺮﻫﺎ ﻭﺭﻛﺒﻮﺍ ﺍﻟﺴﻴﺎﺭﺓ ﻭﺗﺤﺮﻙ ﻃﻮﻝ ...
ﺍﻧﻲ ﺍﺳﺘﻐﺮﺑﺖ ﻫﻠﺒﻪ ﻟﻔﻴﺖ ﻭﻭﻟﻴﺖ ﻟﻠﻤﺮﻛﺰ ... ﺗﻨﻬﺪ ... ﺧﺪﻱ ﺍﺟﺎﺯﺓ ﻳﻮﻣﻴﻦ .. ﺍﻧﻲ ﻫﻨﻲ ﺑﺪﺕ ﻧﺸﻚ ﻭﺧﻔﺖ ... ﺑﻌﺪ ﻳﻮﻣﻴﻦ ﻭﻻ .. ﺑﺲ ﻣﺶ ﺯﻱ ﺍﻷﻭﻝ ﻓﻌﻴﻮﻧﻪ ﺍﻟﺤﺎﺩﻩ ﺍﻟﻠﻲ ﺗﺸﺒﻪ ﻋﻴﻮﻧﻚ ﻧﻈﺮﺓ ﻏﺮﻳﺒﻪ ﻋﻤﺮﻱ ﻣﺎﺷﻔﺘﻬﺎ ﻗﺒﻞ .. ﻭﺃﺻﺮ ﻳﻜﻤﻞ ﺷﻐﻠﻪ ﻉ ﺍﻟﻤﻠﻒ .. ﺗﻌﺮﺽ ﻟﺘﻬﺪﻳﺪﺍﺕ .. ﺭﺅﻭﺳﺎﺋﻨﺎ ﻓﻲ ﺍﻟﻌﻤﻞ ﺣﺎﻭﻟﻮﺍ ﻳﺴﺤﺒﻮﺍ ﻣﻨﻪ ﺍﻟﻤﻠﻒ ﻟﻜﻦ ﻫﻮ ﺳﻜﺮ ﺭﺍﺳﻪ ﻭﻷﻧﻬﻢ ﻛﺎﻧﻮﺍ ﻳﺤﺒﻮﻩ ﻭﻳﺤﺘﺮﻣﻮﺍﻓﻴﻪ ﺧﻠﻮﻩ ﻳﻜﻤﻞ
ﻣﺮﺓ ﻛﻨﺖ ﻣﻌﺎﻩ ﺑﻌﺪ ﺩﺍﺭ ﻣﺸﻜﻠﻪ ﻛﺒﻴﺮﻩ ﻣﻊ ﺭﺋﻴﺴﻨﺎ ﻭﻗﺘﻬﺎ ﺍﻟﻠﻲ ﻛﺎﻥ ﺧﺎﻳﻒ ﻋﻠﻴﻪ ﻭﻳﺒﻲ ﻳﺒﻌﺪﻩ ﺑﺄﻱ ﺷﻜﻞ ﻋﻦ ﺍﻟﻤﻠﻒ ﻫﺬﺍ ..
ﻓﻼﺵ ﺑﺎﻙ ..
ﻋﺎﺩﻝ : ﻳﺎﻓﻨﺪﻱ ﻋﻨﺪﻫﻢ . ﺣﻖ ..
ﺳﻴﻒ : ﺍﻣﺎ ﺣﻖ ﻫﺬﺍ ﺍﻧﻬﻢ ﻳﺨﻠﻮﺍ ﺍﻟﻤﺠﺎﺭﻡ ﻳﺪﻫﻮﺭﻭﺍ ﻓﻲ ﺍﻟﺒﻼﺩ ﺑﺮﺍﺣﺘﻬﻢ ﻭﻳﺪﻣﺮﻭﺍ ﺷﺒﺎﺏ ﺯﻱ ﺍﻟﻮﺭﺩ ... ﻫﺬﺍ ﺑﺎﻃﻞ ﻳﺎﻋﺎﺩﻝ ﺑﺎﻃﻞ ..
ﻋﺎﺩﻝ؛ ﻓﻲ ﻧﺎﺱ ﻛﺒﺎﺭ ﻫﻠﺒﻪ ﻓﻲ ﺍﻟﺤﻜﺎﻳﻪ ..
ﺳﻴﻒ : ﻃﺰﺯﺯﺯﺯﺯﺯﺯﺯﺯ ﻓﻴﻬﻢ ﻛﻠﻬﻢ ... ﺍﺷﺮ ﺑﺴﺒﺎﺑﺘﻪ ﻟﻌﺎﺩﻝ .. ﻣﺶ ﺟﺎﺑﺮﻙ ﻉ ﺷﻲ ﻟﻮ ﺧﻔﺖ ﻉ ﻧﻔﺴﻚ ﻭﻫﺬﺍ ﺣﻘﻚ .. ﺍﻧﺴﺤﺐ ﻭﺍﻧﻲ ﺣﻨﻜﻤﻞ ﻷﺧﺮ ﻟﺤﻈﻪ ﻭﻣﺸﻲ ﻭﺧﻼﻩ ...
ﺍﻟﻮﻗﺖ ﺍﻟﺤﺎﺿﺮ ..
ﺍﻟﺤﺴﻦ ﻋﻴﻮﻧﻪ ﺗﻌﺒﻮﺍ ﺩﻣﻮﻉ : ﻭﺍﻧﺖ ﺷﻦ ﺩﺭﺕ ..
ﻋﺎﺩﻝ : ﻛﻤﻠﺖ ﻣﻌﺎﻩ ﻭﻣﺎﺧﻠﻴﺘﺎﺵ ﺑﻜﻞ ... ﻭﺍﻛﺘﺸﻔﻨﺎ ﻣﻊ ﺑﻌﺾ ﻛﻮﺍﺭﺙ .. ﻭﺍﻟﺘﻬﺪﻳﺪﺍﺕ ﺯﺍﺩﺕ ﻟﻴﺎ ﻭﻟﻴﻪ ... ﻟﻴﻦ ﻓﻨﻬﺎﺭ .. ﺟﻴﺖ ﻟﻠﺨﺪﻣﻪ ﻟﻘﻴﺖ ﺍﻟﻠﻲ ﻓﻲ ﺍﻟﻤﺮﻛﺰ ﻛﻠﻬﻢ ﻭﺟﻮﻫﻬﻢ ﻣﺎﺗﺘﻔﺴﺮﺵ .. ﻭﻟﻘﻴﺖ ﻣﻨﻬﻢ ﻳﺒﻜﻮﺍ .. ﻗﻠﺒﻲ ﻗﺒﻀﻨﻲ .. ﻭﺍﻧﻲ ﻣﺎﺷﻲ ﻃﻠﻊ ﻗﺪﺍﻣﻲ ﺍﻟﻌﻤﻴﺪ ﺍﻟﻠﻲ ﻋﻴﻮﻧﻪ ﻛﺎﻧﻮﺍ ﺣﻤﺮ .. ﺳﺄﻟﺘﻪ ﺑﺨﻮﻑ ﺷﻦ ﻓﻲ .. ﻗﺎﻟﻲ ﺍﻟﺮﺍﺋﺪ ﺳﻴﻒ ﺗﻮﻓﻰ ... ﻣﺎﻗﺪﺭﺗﺶ ﻧﻘﺒﻞ ﺍﻟﻠﻲ ﺳﻤﻌﺘﻪ ﻃﻠﻌﺖ ﺑﺴﺮﻋﻪ ﻣﻦ ﺍﻟﻤﺮﻛﺰ ﺭﻛﺒﺖ ﺳﻴﺎﺭﺗﻲ ﻭﻃﻮﻝ ﻣﺸﻴﺖ ﻟﺤﻮﺵ ﺑﻮﻩ ﻟﻘﻴﺖ ﺍﻟﺪﻧﻴﺎ ﻣﻘﻠﻮﺑﻪ ﻭﺳﻴﺎﺭﻩ ﺍﺳﻌﺎﻑ .. ﺷﻔﺖ ﺍﻟﺒﺎﺭﻳﻼ ﻃﺎﻟﻌﻪ ﻣﻦ ﺍﻟﺤﻮﺵ ﻟﻤﺎ ﻗﺪﻣﺖ ﻭﺷﻔﺖ ﻟﻘﻴﺘﻪ ﺟﺪﻙ ﻋﻠﻲ .. ﺗﺄﻛﺪﺕ ﺍﻥ ﺳﻴﻒ ﻓﻌﻼ ﻣﺎﺕ .. ﻧﺰﻟﻮﺍ ﺩﻣﻮﻉ ﺍﻟﻌﻤﻴﺪ ﻟﻒ ﻭﺟﻬﻪ ﻋﻦ ﺍﻟﺤﺴﻦ ﻭﻗﻌﺪ ﻳﻤﺴﺢ ﻓﻴﻬﻢ ..
ﺍﻟﺤﺴﻦ ﺑﺄﻟﻢ : ﻣﺎﺕ ﺑﺤﺎﺩﺙ .
ﻋﺎﺩﻝ : ﺍﺣﻤﻢ .. ﻫﻜﻲ ﻛﺎﻥ ﺍﻟﻈﺎﻫﺮ ﺑﺲ ﺍﻧﻲ ﻛﻨﺖ ﻣﺘﺄﻛﺪ ﺍﻧﻪ ﻣﺶ ﺣﺎﺩﺙ ﻋﺮﺿﻲ ... ﻛﻠﻤﺖ ﻭﺍﺣﺪ ﻣﻦ ﺻﺤﺎﺑﻲ ﻓﻲ ﻗﺴﻢ ﺍﻟﺒﺤﺚ ﺍﻟﺠﻨﺎﺋﻲ .. ﺍﺳﺘﻔﺴﺮﻟﻲ ﺍﻛﺜﺮ ﻭﺃﻛﺜﺮ ﻋﻦ ﻃﺮﻳﻖ ﻣﻌﺎﺭﻓﻪ ﻭﺟﺎﺑﻠﻲ ﺍﻟﻤﻌﻠﻮﻣﻪ ﻭﺣﻠﻔﻨﻲ ﻉ ﺍﻟﻤﺼﺤﻒ ﻣﺎﻧﻄﻠﻌﻬﺎ .. ﺷﺒﺢ ﻟﻠﺤﺴﻦ .. ﺍﻟﺴﻴﺎﺭﺓ ﻛﺎﻧﻮﺍ ﻻﻋﺒﻴﻦ ﻓﻴﻬﺎ .. ﻳﻌﻨﻲ ﻗﺘﻞ ﻋﻤﺪ ...
ﺍﻟﺤﺴﻦ : ﻫﻤﺎ ﺩﺍﺭﻭﻫﺎ ..
ﻋﺎﺩﻝ : ﻃﺒﻌﺎ .. ﻭﺗﺴﻜﺮ ﺍﻟﻤﻠﻒ ﻃﻮﻝ ﺑﺄﻭﺍﻣﺮ ﻣﻦ ﻓﻮﻕ ﻭﺍﻧﺪﻓﻦ ﻣﻊ ﺳﻴﻒ ... ﺍﻟﻠﻪ ﻳﺮﺣﻤﻪ ..
ﺍﻟﺤﺴﻦ ﺣﻂ ﺍﻳﺪﻩ ﻉ ﺟﺒﻬﺘﻪ ﻭﻳﻤﺸﻲ ﺑﺼﻮﺍﺑﻌﻪ ﻋﻠﻴﻬﺎ ﻣﺶ ﻣﺼﺪﻕ ﺑﻌﺪﻳﻦ ﺷﺒﺢ ﺍﻟﻌﻤﻴﺪ ..
ﺍﻟﺤﺴﻦ ﺑﺤﺰﻡ : ﺍﻧﻲ ﺗﻮﺍ ﺗﻤﺴﻜﺖ ﺑﺎﻟﻤﻠﻒ ﻫﺬﺍ ﺍﻛﺜﺮ ﻣﻦ ﻗﺒﻞ ﻭﻋﻨﺪﻱ ﺳﺒﺐ ﺍﻗﻮﻯ ﻭﻣﺶ ﺣﻨﺴﻴﺒﻪ ﻟﻮ ﻛﺎﻥ ﻓﻴﻪ ﺍﻟﻤﻮﺕ .. ﻭﻧﺎﺽ ﺍﺩﻯ ﺍﻟﺘﺤﻴﻪ ﻭﻃﻠﻊ ..
ﻋﺎﺩﻝ " ﺇﻥ ﺷﺎﺀ ﺍﻟﻠﻪ ﻣﺎﻳﻜﻮﻧﺶ ﻣﺼﻴﺮﻙ ﺯﻱ ﻣﺼﻴﺮﻩ ..."
...
ﻧﻬﺎﺭﻩ ﺍﻟﺤﺴﻦ ﻛﻤﻠﻪ ﻓﻲ ﺍﻟﺠﺎﻣﻊ ﻛﺎﻥ ﻳﺴﺘﻤﺪ ﻓﻲ ﺍﻟﻘﻮﺓ ﻣﻦ ﺻﺎﺣﺐ ﻫﺎﻟﺒﻴﺖ .. ﻭﻛﺎﻥ ﻳﻔﻜﺮ ﻓﻲ ﻧﻔﺲ ﺍﻟﻮﻗﺖ .. ﺍﻛﺜﺮ ﺷﻲ ﺣﻴﺮﻩ ... ﻓﻲ ﺍﻟﻠﻲ ﺣﻜﺎﻫﻮﻟﻪ ﻋﺎﺩﻝ .. ﻫﻮ ﺍﻟﻴﻮﻡ ﺍﻟﻠﻲ ﻃﻠﻊ ﻓﻴﻪ ﺳﻴﻒ ﻣﻦ ﺍﻹﺳﺘﺨﺒﺎﺭﺍﺕ ﻭﻃﻮﻝ ﻟﺤﻮﺵ ﺑﻮﻩ ﻭﻃﻠﻊ ﻣﻨﻪ ﻭﻣﻌﺎﻩ ﻋﻴﻠﺘﻪ ﻫﺎﺩﻱ ﻛﺎﻧﺖ ﺍﻛﺒﺮ ﺍﺷﺎﺭﺓ ﺍﺳﺘﻔﻬﺎﻡ ...
ﻗﺒﻞ ﺍﻟﻤﻐﺮﺏ ﺑﺮﺑﻊ ﺳﺎﻋﻪ ..
ﺭﻭﺡ ﻟﻠﺤﻮﺵ ﻭﺗﻮﺟﻪ ﻟﻠﺼﺎﻟﻪ ﺍﻟﺨﺎﺭﺟﻴﻪ ﺳﻠﻢ ﻉ ﺍﻷﻗﺎﺭﺏ ﻭﻗﻌﻤﺰ ﻛﺎﻥ ﺍﻟﻔﻄﻮﺭ ﻭﺍﺗﻲ ... ﻭﻓﺎﺗﺤﻴﻦ ﺍﻟﺘﻠﻔﺰﻳﻮﻥ ﻳﺮﺍﺟﻮ ﻓﻲ ﺍﻟﻤﻐﺮﺏ ..
ﻓﻲ ﺍﻟﺤﻮﺵ ..
ﺍﻟﻨﺴﺎﻭﻳﻦ ﻧﻔﺲ ﺍﻟﻮﺿﻊ ... ﺑﺲ ﺑﺮﻧﻴﻪ ﻛﺎﻧﺖ ﺑﺮﺍ ﻋﺎﺩﺗﻬﺎ ﻓﻲ ﺭﻣﻀﺎﻥ ﻗﺒﻞ ﺍﻵﺫﺍﻥ ﺗﺴﺒﺢ ﻭﺗﺪﻋﻲ ﺑﺮﻭﺣﻬﺎ ... ﻟﻴﻦ ﺳﻤﻌﺖ ﺻﻮﺕ .
ﺍﻧﻌﺎﻡ : ﻫﻴﺎﺍﺍﺍﺍﻳﻤﺎ ﺍﻟﻤﻐﺮﺏ ﻣﺎﺯﺍﻝ ﻋﻠﻴﻪ ﺧﻤﺴﻪ ﺩﻗﺎﻳﻖ ...
ﻓﻼﺵ ﺑﺎﻙ ..
ﻗﺒﻞ 34 ﻋﺎﻡ ...
" ﺧﺎﻟﺘﻲ ﺑﺮﻧﻴﻪ ﺍﻟﺤﺎﺝ ﺟﻲ "
ﺑﺮﻧﻴﻪ ﻣﻦ ﺍﻟﻤﻄﺒﺦ : ﻫﻲ ﻫﻲ ... ﻃﻠﻌﺖ ﻣﻌﺎﻫﺎ ﺻﻮﻧﻴﻪ ﺗﻤﺮ ﻣﺤﻮﻟﻪ ﺍﻟﻨﻮﺍﻳﺎ ﻣﻨﻬﺎ ﻭﻗﻌﻤﺰﺕ ﺍﺑﺘﺴﻤﺖ ﻟﻌﻠﻲ ﻭﻫﻮ ﻧﻔﺲ ﺍﻟﺸﻲ ..
ﺳﻴﻒ ﻣﺸﺎﻏﺒﺔ : ﻣﺎﺯﺍﻝ ﺍﻟﻤﻐﺮﺏ ﺭﻩ ..
ﺯﻫﺮﺓ ﺿﺮﺑﺖ ﺳﻴﻒ ﺑﺨﻔﻪ : ﺗﺤﺸﻢ ..
ﺳﻴﻒ : ﻫﻬﻬﻬﻬﻬﻬﻪ ...
ﺍﺫﻥ ﺍﻟﻤﻐﺮﺏ ﻗﺮﺑﺖ ﺻﻮﻧﻴﺔ ﺍﻟﺘﻤﺮ ﻟﺮﺍﺟﻠﻬﺎ ..
ﻣﺤﻤﺪ : ﺣﺘﻰ ﺍﻧﻲ ﻳﺎﺍﻣﻲ ﺣﻮﻟﻴﻠﻲ ﺍﻟﻨﻮﺍﻳﺎ ﻣﻦ ﺍﻟﺘﻤﺮ ..
ﺑﺮﻧﻴﻪ : ﻛﻮﻝ ﺑﻼﺩﻟﻊ ...
ﺳﻴﻒ : ﻫﺎﺩﻱ ﻣﻌﺎﻣﻠﻪ ﺧﺎﺻﻪ ﻣﺶ ﻟﻴﻚ ﻳﺎﻣﺤﻤﺪ ..
ﺑﺮﻧﻴﻪ ﺗﺤﺸﻤﺖ
ﻋﻠﻲ : ﺍﻓﻄﺮ ﻭﺍﻧﺖ ﺳﺎﻛﺖ ..
ﺳﻴﻒ ﻗﻌﺪ ﻳﺎﻛﻞ .. ﻗﺮﺑﺖ ﻣﻨﻪ ﺯﻫﺮﺓ ﻭﻗﺎﻟﺖ : ﺗﺴﺘﺎﻫﻞ .
ﺳﻴﻒ : ﻣﺸﻤﺘﻪ ﻓﻴﺎ ﺑﺪﺍﻝ ﻣﺎﺩﻳﺮﻱ ﺯﻳﻬﺎ .
ﺯﻫﺮﺓ : ﺧﻠﻴﻚ ﺍﻧﺖ ﺯﻱ ﻋﻤﻲ ﺍﻧﻲ ﻧﺪﻳﺮﺯﻳﻬﺎ
ﺳﻴﻒ ﺭﻓﻊ ﺣﻮﺍﺟﺒﻪ : ﺑﺎﻩ ﺑﺎﻩ ..
ﺯﻫﺮﺓ ﺿﺤﻜﺖ ﻭﺑﺮﻧﻴﻪ ﺍﻟﻠﻲ ﻛﺎﻧﺖ ﺗﺴﻤﻊ ﻓﻴﻬﻢ ﺿﺤﻜﺖ ﻭﺷﺒﺤﺖ ﻟﺮﺍﺟﻠﻬﺎ ﺍﻟﻠﻲ ﻃﺎﻳﺤﻪ ﻓﻲ ﺣﺒﻪ ﻟﻠﻐﺮﻕ 💓...
ﺍﻟﻮﻗﺖ ﺍﻟﺤﺎﺿﺮ
ﻣﺴﺤﺖ ﺩﻣﻮﻋﻬﺎ ﻭﻧﺎﺿﺖ .. ﺗﻤﺎﺳﻜﺖ ﻭﺧﺸﺖ ﺩﺍﺧﻞ ...
ﻗﻌﻤﺰﺕ ﻣﻌﺎﻫﻢ ...
ﻭﻛﻴﻒ ﺟﺖ ﺑﺘﻘﻴﻢ ﺍﻟﺘﻤﺮﺓ .. ﺷﺒﺢ ﺍﻟﺬﻛﺮﻳﺎﺕ ﻣﺼﺮ ﻳﺮﺍﻓﻘﻬﺎ ...
ﻓﻼﺵ ﺑﺎﻙ ..
ﺍﺧﺮ ﺭﻣﻀﺎﻥ ﻟﻠﺤﺎﺝ ﻋﻠﻲ ..
ﻋﻠﻲ : ﺍﺣﺴﻦ ﺷﻲ ﻧﻔﻄﺮ ﻣﻌﺎﻙ ﺑﺮﻭﺣﻨﺎ ﻭﻧﺘﻤﻠﻰ ﻣﻦ ﻫﺎﻟﻮﺟﻪ ﺍﻟﺴﻤﺢ ﻉ ﺍﻟﻔﻄﻮﺭ ..
ﺑﺮﻧﻴﻪ ﺑﻀﺤﻜﻪ : ﺗﺤﺸﻢ ﻳﺎﻫﻤﻲ .. ﺭﺍﻙ ﺟﺪ ... ﻭﺍﺣﻔﺎﺩﻙ ﻃﻮﻟﻚ ..
ﻋﻠﻲ : ﻭﻛﺎﻧﻲ ﺟﺪ .. ﻣﻌﺎﺵ ﻧﺤﺐ !! ؟ ﻧﺤﺐ ﻋﺰﻳﺰﺗﻲ ﺣﺪ ﻋﻨﺪﻩ ﻟﻴﺎ ﺣﺎﺟﻪ ..
ﺍﺫﻥ ﺍﻟﻤﻐﺮﺏ ..
ﺑﺮﻧﻴﻪ : ﺍﻓﻄﺮ ﺍﻓﻄﺮ ...
ﻋﻠﻲ : ﻣﺶ ﺣﻨﺤﻞ ﺻﻴﺎﻣﻲ ﺇﻻ ﺑﺈﻳﺪﻙ ...
ﺑﺮﻧﻴﻪ ﺑﻀﺤﻜﻪ : ﺧﻴﺮﻙ ﻳﺎﻫﻤﻲ ..
ﻋﻠﻲ : ﻣﺎﻧﻴﺶ ﺣﺎﻃﻪ ﻓﻔﻢ ﺇﻻ ﻣﻦ ﻳﺪﻙ ..
ﺑﺮﻧﻴﻪ ﺧﺪﺕ ﺗﻤﺮﻩ ﺣﻄﺘﻬﺎ ﻓﻔﻤﻪ ﻛﻼﻫﺎ ﻭﻫﻮ ﻳﺸﺒﺤﻠﻬﺎ .. ﻭﻗﺎﻝ : ﺫﻫﺐ ﺍﻟﻀﻤﺄ ﻭﺍﺑﺘﻠﺖ ﺍﻟﻌﺮﻭﻕ ..
ﺑﺮﻧﻴﻪ ﻭﺟﻬﻬﺎ ﺍﺣﻤﺮ ﻭﺗﻀﺤﻚ : ﻳﺎﻭﺍﻟﻠﻪ ﻋﻠﻴﻚ ﺷﻴﺒﺎﻧﻲ ﻣﻬﺒﻮﻝ ..
ﻋﻠﻲ : ﻓﻲ ﺣﺒﻚ ﻳﺎﻋﺰﻳﺰﺗﻲ ..
ﺑﺮﻧﻴﻪ : ﻫﻬﻬﻬﻬﻬﻬﻬﻪ ....
ﺍﻟﻮﻗﺖ ﺍﻟﺤﺎﺿﺮ ..
ﺑﺮﻧﻴﻪ ﺳﻴﺒﺖ ﺍﻟﺘﻤﺮﻩ ﻭﻧﺎﺿﺖ ﻣﻦ ﺣﺪﺍﻫﻢ ﻭﺍﻟﺤﺎﺿﺮﺍﺕ ﺩﻣﻮﻋﻬﻢ ﻧﺰﻟﺖ ﺍﻧﻬﺎﺭﺕ ﺍﻧﻌﺎﻡ ﺑﺎﻟﺒﻜﻲ ﻭﺑﻜﻮﺍ ﻛﻠﻬﻢ ﻣﻌﺎﻫﺎ .. ﻭﺍﻧﻘﻠﺐ ﺍﻭﻝ ﻓﻄﻮﺭ ﻓﻲ ﺍﻭﻝ ﺭﻣﻀﺎﻥ ﻣﻦ ﻏﻴﺮ ﻛﺒﻴﺮ ﺍﻟﻌﻴﻠﻪ ﻟﻌﺰﻱ ﺟﺪﻳﺪ ...
ﻋﻨﺪ ﺍﻟﺮﺟﺎﻟﻪ ..
ﻓﻲ ﻧﻔﺲ ﺍﻟﻮﻗﺖ ﻛﻴﻒ ﺍﺫﻥ ﺍﻟﻤﻐﺮﺏ .. ﺑﺪﻭﺍ ﻳﻔﻄﺮﻭﺍ ...
ﺑﺲ ﻓﻲ ﺯﻭﺯ ﻣﺎﻗﺪﺭﻭﺵ ﻳﺎﻛﻠﻮﺍ ...
ﺳﺮﻣﺪ ﻭﺍﻟﺤﺴﻦ ...
ﻓﻼﺵ ﺑﺎﻙ ...
ﺭﻣﻀﺎﻥ ﺍﻟﻠﻲ ﻓﺎﺕ ..
ﺳﺮﻣﺪ ﻭﺍﻟﺤﺴﻦ ﺣﺪﺍ ﺑﻌﺾ ..
ﺳﺮﻣﺪ ﺑﻀﺤﻜﻪ ﻭﻫﻤﺲ : ﺷﻮﻑ ﺟﺪﻙ ﻛﻴﻒ ﻳﺰﺭﺑﺰ ﻳﺒﻲ ﻳﻔﻄﺮ ﻣﻊ ﺣﻨﺎﻙ ..
ﺍﻟﺤﺴﻦ : ﻣﺶ ﻗﺎﺩﺭ ﻳﻨﻮﺽ ﻭﻳﺨﻠﻲ ﻭﻻﺩ ﻋﻤﻪ ..
ﺳﺮﻣﺪ : ﻭﺍﻧﺖ ﺗﺮﺿﻰ ﻧﺨﻠﻮﺍ ﻛﺒﻴﺮﻧﺎ ﻓﻲ ﻫﺎﻟﺤﺎﻟﻪ ..
ﺍﻟﺤﺴﻦ ﺷﺒﺤﻠﻪ : ﻭﺭﻳﻨﻲ ﺷﻦ ﺑﺒﺎﻟﻚ ..
ﺳﺮﻣﺪ : ﺷﻮﻑ ... ﺍﺣﻤﻤﻢ ﻳﺎﺣﺎﺝ ... ﻧﻮﺿﻲ ﺍﺿﺮﺏ ﻳﺒﺮﺓ ﺍﻟﺴﻜﺮ ﻭﺗﻌﺎﻟﻰ ..
ﺍﻟﺤﺴﻦ ﺍﻧﺼﺪﻡ ... ﻭﻋﻠﻲ ﺷﺒﺢ ﻟﺴﺮﻣﺪ ﻭﻓﻬﻢ ﻋﻠﻴﻪ ...
ﻋﻠﻲ : ﻣﺎﺗﻮﺍﺧﺪﻭﻧﻴﺶ ﺍﻓﻄﺮﻭﺍ ﻭﺗﻮ ﻧﻠﺤﻖ .. ﻧﺎﺽ .. ﻫﻴﺎ ﻧﺴﺘﺎﺫﻥ ... ﻭﻣﺸﻲ .
: ﻣﻦ ﺍﻣﺘﻰ ﺍﻟﺤﺎﺝ ﻋﻠﻲ ﻓﻴﻪ ﺍﻟﺴﻜﺮ .. ﻋﺎﺑﺪ ﻭﻣﺤﻤﺪ ﻭﺍﻟﺤﺴﻦ ﻗﻌﺪﻭﺍ ﻳﺸﺒﺤﻮﺍ ﻟﺴﺮﻣﺪ ..
ﺳﺮﻣﺪ ﺍﺑﺘﺴﻢ ﺑﺮﺑﻜﻪ : ﻟﻴﻪ ﻣﺪﻩ ﻏﻴﺮ ﻣﺎﻳﺒﻴﺶ ﻳﻘﻮﻝ ..
: ﺭﺑﻲ ﻳﺸﻔﻴﻪ ..
ﺍﻟﺤﺴﻦ ﺑﻬﻤﺲ : ﻭﻳﻘﻮﻟﻮﺍ ﺍﻟﺸﻴﺎﻃﻴﻦ ﻣﺼﻔﺪﻩ ..
ﺳﺮﻣﺪ ﺑﻀﺤﻜﻪ : ﺷﻴﺎﻃﻴﻦ ﺍﻟﺠﻦ ﺍﻟﻠﻲ ﺗﺘﺼﻔﺪ ..
ﺍﻟﺤﺴﻦ ﻫﺰ ﺭﺍﺳﻪ ﺍﻳﻤﻴﻦ ﻭﺍﻳﺴﺎﺭ ﻭﺳﺮﻣﺪ ﻳﻀﺤﻚ ..
ﺍﻟﻮﻗﺖ ﺍﻟﺤﺎﺿﺮ ...
ﻫﺎﻟﻤﺮﻩ ﻛﻞ ﻭﺍﺣﺪ ﻓﻴﻬﻢ ﻣﻘﻌﻤﺰ ﻓﺠﻬﺔ .. ﻧﺎﺿﻮﺍ ﺍﻟﺰﻭﺯ ﻣﻊ ﺑﻌﺾ .. ﺷﺒﺤﻮﺍ ﻟﺒﻌﺾ ﻫﻠﺒﻪ ﻭﺍﻟﺤﺎﺿﺮﻳﻦ ﻳﺸﺒﺤﻮﻟﻬﻢ ..
ﻟﻒ ﺍﻟﺤﺴﻦ ﻭﻃﻠﻊ ... ﻭﻟﺤﻘﻪ ﺳﺮﻣﺪ ...
ﻭﺍﻟﺤﺎﺿﺮﻳﻦ ﻓﻬﻤﻮﺍ ﻋﻠﻴﻬﻢ ﻭﺍﺿﺎﻳﻘﻮﺍ ﻫﻠﺒﻪ ..
ﺍﻟﺤﺴﻦ ﻃﻠﻊ ﻣﻦ ﺍﻟﺼﺎﻟﻪ ﻳﻤﺸﻲ ﻳﺬﻛﺮ ﻓﻲ ﺟﺪﻩ ﻭﻓﺎﻟﻘﺼﻪ ﺍﻟﻠﻲ ﺳﻤﻌﻬﺎ ﻋﻦ ﻋﻤﻪ " ﺳﻴﻒ ..." ﻳﻤﺸﻲ ﻭﻋﻴﻮﻧﻪ ﻣﻌﺒﻴﺎﺕ ﺩﻣﻮﻉ ﻭﻣﺨﻨﻮﻕ ﻣﺎﻭﻗﻔﺶ ﺇﻻ ﻟﻤﺎ ﺷﺎﻑ ﺣﻨﺎﻩ ﻣﻘﻌﻤﺰﻩ ﺣﺪﺍ ﻧﺨﻠﻪ ﻭﻭﺍﺿﺢ ﺍﻧﻬﺎ ﺗﺒﻜﻲ ﻣﺸﺎﻟﻬﺎ ﺑﺴﺮﻋﻪ ﻗﻌﻤﺰ ﺟﻨﺒﻬﺎ ...
ﺑﺮﻧﻴﻪ ﺑﺒﻜﻲ : ﻋﺰﻣﻲ ﻣﺶ ﻗﻮﻱ ﻣﻌﺎﻩ ﺣﻲ ﻭﻻ .. ﻣﻴﺖ .. ﺣﻀﻨﻬﺎ ﺍﻟﺤﺴﻦ .. ﻭﺩﻣﻮﻋﻪ ﻧﺰﻟﻮﺍ ...
ﻛﺎﻥ ﺳﺮﻣﺪ ﻳﺸﻮﻑ ﻓﻴﻬﻢ ﻣﻦ ﺑﻌﻴﺪ ﻭﺩﻣﻮﻋﻪ ﺗﻨﺰﻝ ﻭﻧﻈﺮﺗﻪ ﺗﺨﻮﻑ " ﺷﻔﻌﻠﻚ ﻋﻨﺪﻱ ﺣﺎﺟﺘﻴﻦ ﺍﻭﻟﻬﻢ ﺍﻥ ﺑﻮﻱ ﻗﺎﺗﻞ ﺑﻮﻙ ﻳﻌﻨﻲ ﺗﺼﺎﻓﻴﻨﺎ .. ﻭﺗﺎﻧﻴﻬﻢ ﺍﻧﻚ ﻣﺎﺗﻬﻮﻧﺶ ﻋﻠﻴﺎ ﻭﻻﻧﻘﺪﺭ ﻧﻔﺮﻁ ﻓﺮﻭﺣﻚ .. ﻟﻜﻦ ﻗﻠﺒﻲ ﻣﺶ ﺻﺎﻓﻲ ﻣﻦ ﻧﺎﺣﻴﺘﻚ ﻣﺶ ﻗﺎﺩﺭ ﻧﻌﺪﻳﻬﺎﻟﻚ ﺑﺪﻭﻥ ﺣﺴﺎﺏ ﺣﻨﺤﺎﺳﺒﻚ ﻳﺎﻭﻟﺪ ﺧﻮﻱ ﻏﻴﺮ ﻳﻌﺪﻱ ﺭﻣﻀﺎﻥ ..."
ﻗﺒﻞ ﺍﻟﺘﺮﺍﻭﻳﺢ ...
ﻓﺎﻃﻤﻪ ﻛﺎﻧﺖ ﺗﺘﻜﻠﻢ ﺑﺎﻟﺘﻠﻴﻔﻮﻥ ﺳﻜﺮﺕ ﻭﻣﺸﺖ ﺍﺩﻭﺭ ﻓﻲ ﺭﻳﺤﺎﻧﻪ ﻟﻘﺘﻬﺎ ﺗﺘﻔﺮﺝ ﻉ ﺍﻟﺘﻠﻔﺰﻳﻮﻥ ..
ﻓﺎﻃﻤﻪ : ﺭﻳﺤﺎﻧﻪ .. ﺍﻃﻠﻌﻲ ﺑﺎﻭﻱ ﺑﻠﻐﺔ ﺑﻮﻙ ﺗﻠﻘﻴﻬﺎ ﺣﺪﺍ ﺍﻟﻤﺪﺧﻞ ...
ﺭﻳﺤﺎﻧﻪ ﻭﻋﻴﻮﻧﻬﺎ ﻓﻲ ﺍﻟﺘﻠﻔﺰﻳﻮﻥ ﻧﺎﺿﺖ : ﺑﺎﻩ ..
ﻓﺎﻃﻤﻪ ﺗﺸﺒﺤﻠﻬﺎ ﻭﻫﻲ ﻭﺍﻗﻔﻪ ﺗﺘﻔﺮﺝ : ﺭﻳﺤﺎﺍﺍﺍﻧﻪ ..
ﺭﻳﺤﺎﻧﻪ ﺍﻧﺨﻠﻌﺖ : ﻫﻴﺎ ﻫﻲ .. ﻭﻃﻮﻝ ﻣﺸﺖ .. ﻃﻠﻌﺖ ﻓﻢ ﺍﻟﺒﺎﺏ ﻭﺷﺎﻓﺖ ﺑﻠﻐﺔ ﺑﻮﻫﺎ ﺣﺪﺍ ﺍﻟﻤﺪﺧﻞ ﻗﻌﺪﺕ ﺗﺒﻮﻱ ﻓﻴﻬﺎ ... ﺣﺴﺖ ﺑﺤﺮﻛﻪ ﺑﺮﺍ ﺣﻄﺖ ﺍﻟﺒﻠﻐﻪ ﻭﻧﺎﺿﺖ ﺗﺸﻮﻑ ﻟﻘﺖ ﺳﺮﻣﺪ ﻳﻤﺸﻲ ﻭﻳﺠﻲ ﻭﻳﺘﻜﻠﻢ ﺑﺎﻟﺘﻠﻴﻔﻮﻥ .. ﻟﻤﺎ ﻟﻒ ﻃﻠﻌﺖ ﻓﻲ ﻭﺟﻬﻪ ﻗﻄﻮﺳﻪ ﺧﻠﻌﺎﺗﻪ .. ﺻﻜﺮ ﺍﻟﻤﻜﺎﻟﻤﻪ .. ﻭﺟﺮﻱ ﻓﻲ ﺟﺮﺓ ﺍﻟﻘﻄﻮﺳﻪ ... ﺷﺪﻫﺎ ...
ﻭﻭﻗﻒ ﺑﻴﻬﺎ ﺣﻂ ﺍﻳﺪﻩ ﻉ ﺭﺍﺳﻬﺎ ﻭﻛﺴﺮ ﺭﻗﺒﺘﻬﺎ .. ﻗﺪﻡ ﺧﻄﻮﺍﺕ ﺍﻟﻘﺪﺍﻡ ﻭﻟﻮﺣﻬﺎ ﻉ ﻃﻮﻝ ﺑﺮﺍ ﺍﻟﺼﻮﺭ ..
ﺭﻳﺤﺎﻧﻪ ﻋﻴﻮﻧﻬﺎ ﻣﻔﺘﻮﺣﺎﺕ ﻉ ﻭﺳﻌﻬﻢ ﻣﺼﺪﻭﻣﻪ ﺻﺪﻣﻪ ﺷﺪﻳﺪﻩ ﺧﺎﻓﺖ ﻣﺎﺗﺖ ﻣﻦ ﺍﻟﺨﻮﻑ ...
ﺳﺮﻣﺪ ﺑﻌﺪ ﻟﻮﺣﻬﺎ ﻗﻌﺪ ﻳﺪﻭﺭ ﺑﻌﻴﻮﻧﻪ ﻓﻲ ﺍﻟﻤﻜﺎﻥ ﻭﻛﻴﻒ ﺑﻴﺘﻠﻔﺖ ﺭﻳﺤﺎﻧﻪ ﺍﺩﺭﻗﺖ ﻃﻮﻝ ... ﻫﻮ ﺭﻛﺰ ﺑﻨﻈﺮﻩ .. ﺑﺲ ﺑﻌﺪﻳﻦ .. ﺗﻮﺟﻪ ﻟﻠﺒﺎﺏ ﻭﻃﻠﻊ ..
ﺭﻳﺤﺎﻧﻪ ﺗﺮﺟﻒ ﻣﻊ ﺑﻌﻀﻬﺎ ﻭﺑﻬﻤﺲ : ﺷﻨﻮ ﻫﺬﺍ !!! ﻫﺬﺍ ﻋﻤﻲ ﺳﺮﻣﺪ ﻣﺴﺘﺤﻴﻞ .. ﻳﺎﺭﺑﻲ ﺭﺣﻤﺘﻚ .. ﻳﺪﻳﺮﻟﻬﺎ ﻫﻜﻲ ﻉ ﺧﺎﻃﺮ ﺧﻠﻌﺎﺗﻪ ⚡.. ﻓﻲ ﻟﺤﻈﻪ ﺟﻲ ﻭﺫﺍﻧﻬﺎ ﻛﻼﻡ ﻣﻨﺬﺭ ...
>> ﺭﻳﺤﺎﻧﻪ ﺿﻴﻘﺖ ﻋﻴﻮﻧﻬﺎ : ﺍﻟﻜﻮﺑﺮﺍ ..
ﻣﻨﺬﺭ ﺑﻐﻞ : ﻫﺬﺍ ﻭﺍﺣﺪ ﺷﻴﻄﺎﻥ ﻣﺠﺮﻡ ﻣﺎﻓﻴﺶ
ﻓﻘﻠﺒﻪ ﺍﻟﺮﺣﻤﻪ ﺍﻟﻠﻲ ﻳﻮﻗﻒ ﻓﻲ ﻃﺮﻳﻘﻪ ﺣﻴﺤﺮﻕ ﺭﻭﺣﻪ <<.
ﺭﻳﺤﺎﻧﻪ ﺣﻄﺖ ﻳﺪﻫﺎﻉ ﻓﻤﻬﺎ ﻭﺑﻬﻤﺲ : ﻳﺎﺭﺑﻲ ﻳﺎﺭﺑﻲ ﻳﺎﺭﺑﻲ ...
ﻣﻦ ﺧﻮﻓﻬﺎ ﺧﺸﺖ ﻃﻮﻝ ﻭﺧﻠﺖ ﺍﻟﺒﻠﻐﻪ ﺑﺮﺍ ...
***
🍃 ﻓﺎﺗﻮﺍ ﻣﻦ ﺭﻣﻀﺎﻥ 15 ﻳﻮﻡ ﻣﺎﻓﻴﺶ ﺟﺪﻳﺪ ... ﺍﻟﻮﺿﻊ ﻫﺎﺩﻱ ... ﻷﻥ ﺳﺮﻣﺪ ﻣﺼﻔﺪ ...
ﺳﺮﻣﺪ : ﻫﻬﻬﻬﻬﻬﻬﻬﻬﻪ ﺣﻠﻮﺓ ﺣﻠﻮﺓ ﻋﺠﺒﺘﻨﻲ ..
[ ﺍﻟﻜﺎﺗﺒﻪ : [😑
ﺳﺮﻣﺪ ...️♂️♂️♂
...😒 ﺍﻟﻤﻬﻢ ... ﻛﺎﻧﺖ ﺍﻷﻳﺎﻡ ﻣﺎﺷﻴﻪ ﺑﺮﻭﺗﻴﻦ ﺭﻣﻀﺎﻥ ﺍﻟﻤﻌﺘﺎﺩ ..
ﻏﻴﺮ ﺍﻥ ﺭﻳﺤﺎﻧﻪ ﺑﺪﺕ ﺗﺸﻚ ﻓﻲ ﺳﺮﻣﺪ ﺑﺰﻳﺎﺩﻩ ﻭﻓﻨﻔﺲ ﺍﻟﻮﻗﺖ ﻣﺎﺗﺒﻴﺶ ﻳﺤﺲ ﺑﺸﻲ ﻓﻘﻌﺪﺕ ﺗﺘﻌﺎﻣﻞ ﻣﻌﺎﻩ ﻋﺎﺩﻱ ...
ﻭﻓﻲ ﻳﻮﻡ ....
ﺑﻌﺪ ﻣﺸﻮﺍ ﺍﻟﺮﺟﺎﻟﻪ ﺍﻟﺘﺮﺍﻭﻳﺢ ﺍﻟﻠﻲ ﻫﺬﺍ ﺭﻛﺒﺖ ﻟﺤﻮﺷﻬﺎ ... ﻭﻗﻌﺪﺕ ﺭﻳﺤﺎﻧﻪ ﺍﻟﻠﻲ ﻛﺎﻧﺖ ﻓﺎﻃﺮﻩ ﻓﻲ ﺣﻮﺵ ﺟﺪﻫﺎ ﻳﻮﻣﻬﺎ ﺗﺘﻔﺮﺝ ﻉ ﺍﻟﺘﻠﻔﺰﻳﻮﻥ ﻣﻊ ﺇﻧﻌﺎﻡ ..
ﺭﻳﺤﺎﻧﻪ : ﻣﺘﺄﻛﺪﻩ ﺍﻧﻪ ﺑﻴﻄﻠﻊ ﻳﺒﻴﻬﺎ .. ﺍﻟﺘﻔﺘﺖ ﻟﻌﻤﺘﻬﺎ ﺍﻟﻠﻲ ﻣﺎﺭﺩﺗﺶ ﻋﻠﻴﻬﺎ ﻭﻫﻲ ﺗﻨﺎﻗﺶ ﻓﻴﻬﺎ ﻉ ﺃﺣﺪﺍﺙ ﻣﺴﻠﺴﻞ ﻣﺎ ... ﺷﺒﺤﺘﻠﻬﺎ ﻫﻠﺒﻪ ﺑﻌﺪﻳﻦ ﺷﺒﺤﺖ ﻟﻠﺘﻠﻔﺰﻳﻮﻥ ... ﺷﻮﻳﻪ ﻭﻏﻴﺮﺕ ﻧﻈﺮﻫﺎ ﻟﻠﺒﺎﺏ .. ﺷﺒﺤﺖ ﻟﻌﻤﺘﻬﺎ ﻣﻦ ﺟﺪﻳﺪ .. ﺣﻄﺖ ﺍﻟﺮﻳﻤﻮﺕ ﻣﻦ ﻳﺪﻫﺎ ﻭﻧﺎﺿﺖ ... ﻃﻠﻌﺖ ﻣﻦ ﺩﺍﺭ ﺍﻟﻤﻌﻴﺸﻪ ﻣﺘﻮﺟﻬﻪ ﺑﺨﻄﻮﺍﺕ ﺑﻄﻴﺌﻪ ﻟﺪﺍﺭ ﻋﻤﻬﺎ ﺳﺮﻣﺪ ..
ﻭﻗﻔﺖ ﻗﺪﺍﻡ ﺍﻟﺒﺎﺏ .. ﺧﺪﺕ ﺷﻬﻴﻖ ﻭﺯﻓﻴﺮ .. ﻭﺣﺎﻭﻟﺖ ﺗﻔﺘﺤﻬﺎ ﺍﻧﻔﺘﺤﺖ ..
ﺭﻳﺤﺎﻧﻪ : ﻏﺮﻳﺒﻪ ﻣﺨﻠﻴﻬﺎ ﻣﻔﺘﻮﺣﻪ .. ﺧﺸﺖ ﺭﻳﺤﺎﻧﻪ ﻭﻫﻲ ﺍﺩﻭﺭ ﺑﻌﻴﻮﻧﻬﺎ ﻓﻴﻬﺎ ﺷﺒﺤﺖ ﻟﻠﺪﻭﻻﺏ ﺑﻌﺪﻳﻦ ﻟﻠﻤﻜﺘﺐ ﻣﺘﺎﻋﻪ .. ﺑﻌﺪﻳﻦ ﻟﻠﺴﺮﻳﺮ .. ﻭﺑﻌﺪﻳﻦ ﻟﻠﻜﻨﺒﻪ ﺍﻟﻠﻲ ﻛﺎﻧﺖ ﻗﺪﺍﻣﻪ
ﺑﻌﺪﻳﻦ ﺷﺎﻓﺖ ﻟﻠﻘﻴﺘﺎﺭ ﺍﻟﻤﻌﻠﻖ ﻓﻮﻕ ﺍﻟﺴﺮﻳﺮ .. ﺗﻠﻔﺘﺖ ﻟﻠﺒﺎﺏ ﺳﻜﺮﺍﺗﻪ ﺑﻬﺪﻭﺀ ... ﻭﺍﻟﺘﻔﺖ ﺗﺸﺒﺢ ﻟﻠﺪﺍﺭ ..
ﺭﻳﺤﺎﻧﻪ : ﺯﻋﻤﻪ ﻧﻠﻘﻰ ﻓﻴﻬﺎ ﺷﻲ ! ؟ ..
ﻗﺪﻣﺖ ﻭﻗﻌﺪﺕ ﺗﺸﺒﺢ ﻟﻠﻤﻜﺘﺐ ﻭﻗﺎﻟﺖ : ﺯﻋﻤﻪ ﻻﺏ ﺗﻮﺑﻪ ﻓﻴﻪ ﺷﻲ ﻭﻫﻮ 24 ﺳﺎﻋﻪ ﺷﺎﺩﻩ ... ﻗﺪﻣﺖ ﻟﻠﻤﻜﺘﺐ ﺟﺖ ﺣﺪﺍ ﺍﻟﻼﺏ ﺗﻮﺏ ﻛﻴﻒ ﺟﺎﻳﻪ ﺑﺘﻔﺘﺤﻪ ﺟﺖ ﻋﻴﻨﻬﺎ ﻉ ﺣﺎﺟﻪ ﺧﻠﺘﻬﺎ ﺗﺠﻤﺪ ﻓﻲ ﻣﻜﺎﻧﻬﺎ .. ﺍﻟﺨﺎﺗﻢ ﺧﺪﺍﺗﻪ ﻗﺮﺑﺎﺗﻪ ﻟﻴﻬﺎ ﺩﻗﻘﺖ ﺍﻟﻨﻈﺮ .. ﻛﺎﻥ ﻣﺮﺳﻮﻡ ﻋﻠﻴﻪ ﺭﺍﺱ ﺃﻓﻌﻰ ﺍﻟﻜﻮﺑﺮﺍ ...
>>⚡ ﻣﻨﺬﺭ : ﺑﺲ ﻻﺯﻡ ﺧﻄﻮﻩ ﺯﻱ ﻫﺎﺩﻱ ﻣﺎﻧﺪﻳﺮﻫﺎﺵ ﺇﻻ ﺑﻌﺪ ﻣﺎﻧﻜﺸﻔﻬﻢ ﻛﻠﻬﻢ ... ﺑﺎﻟﺬﺍﺕ ﺍﻟﻜﻮﺑﺮﺍ <<..
ﺷﻬﻘﺖ ﺑﺼﻮﺕ ﻭﺍﻃﻲ ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ﻗﻌﺪﺕ ﺗﺮﺟﻒ .. ﻣﺶ ﻗﺎﺩﺭﻩ ﺗﺼﺪﻕ ... ﺟﺖ ﻋﻴﻨﻬﺎ ﻉ ﺻﻮﺭﺗﻪ ..
ﺭﻳﺤﺎﻧﻪ ﺑﻨﺒﺮﺓ ﺑﺎﻛﻴﻪ : ﻋﻤﻮ ﺳﺮﻣﺪ ﺍﻟﻄﻴﺐ ﺍﻟﺤﻨﻴﻦ ﺍﻟﻠﻲ ﺭﻭﺣﻪ ﺣﻠﻮﻩ ﺍﻟﻠﻲ ﻳﻀﺤﻚ ﻓﻴﻨﺎ ﺍﻟﻠﻲ ﻟﻤﺎ ﻳﻐﻴﺐ ﻋﻠﻴﻨﺎ ﺗﻐﻴﺐ ﺍﻟﻀﺤﻜﻪ ...
ﺳﺮﻣﺪ ﻋﻤﻲ ﻣﺴﺘﺤﻴﻴﻴﻴﻞ ﻋﻼﺵ ﻫﻜﻲ ﻋﻼﺵ ...
ﻣﻦ ﺑﺮﺍ ..
ﺳﺮﻣﺪ ﻳﺘﻜﻠﻢ ﺑﺎﻟﺘﻠﻴﻔﻮﻥ : ﺍﻳﻮﺍﺍﺍﺍﺍﻩ ...
ﺭﻳﺤﺎﻧﻪ ﻗﺮﻳﺐ ﻣﺎﺗﺖ ﺟﻤﺪﺕ ﻓﻲ ﻣﻜﺎﻧﻬﺎ ﺍﻟﺼﻮﺕ ﻛﺎﻥ ﻳﻘﺮﺏ ﻭﻫﻲ ﻗﺮﻳﺐ ﺗﻤﻮﺕ .. ﺳﺮﻣﺪ ﻳﺘﻜﻠﻢ ﺑﺎﻟﺘﻠﻴﻔﻮﻥ ﻭﻳﻤﺸﻲ ﻓﻲ ﺍﻟﻤﻤﺮ ﻭﻗﺮﺏ ﻣﻦ ﺩﺍﺭﻩ .. ﻭﺻﻞ ﻓﻲ ﺍﻟﺒﺎﺏ ﻭﻓﺘﺤﻪ ﻭﺗﻔﺎﺟﺄ ...
ﺳﺮﻣﺪ " ﺧﻠﻴﺘﻬﺎ ﻣﻔﺘﻮﺣﻪ "!! ﻭﺗﺎﺑﻊ ﻛﻼﻣﻪ ﻓﻲ ﺍﻟﺘﻠﻴﻔﻮﻥ ﺑﻌﺪ ﺻﻜﺮ ﺍﻟﺒﺎﺏ : ﺍﻳﻪ ﺟﻴﺒﻮﻫﻢ ﻣﻦ ﺗﺤﺖ ﺍﻷﺭﺽ .. ﺍﻭﻝ ﻣﺎﺗﻠﻘﻮﻫﻢ ﻃﺮﺑﻮﻗﻮﻫﻢ ﻃﻮﻝ ﺍﻟﻠﻲ ﻳﺘﺨﺎﺫﻝ ﻫﺬﺍ ﺟﺰﺍﺋﻪ ... ﻭﺻﻮﺭﻫﻢ ﺑﻌﺪ ﺗﺼﻔﻮﻫﻢ ﻭﺍﺑﻌﺘﻮﻟﻲ ﺍﻟﺼﻮﺭ ...
ﻛﺎﻧﺖ ﺗﺮﺟﻒ ﻣﻊ ﺑﻌﻀﻬﺎ ﻭﻫﻲ ﻣﺘﻤﺪﺩﻩ ﻭﺭﺍ ﺍﻟﻜﻨﺒﻪ ﻣﺶ ﻣﺼﺪﻗﻪ ﺍﻟﻠﻲ ﺳﻤﻌﺎﺗﻪ .. ﻳﺘﻜﻠﻢ ﻉ ﺍﻟﻘﺘﻞ ﻋﺎﺩﻱ ﺟﺪﺍ ... ﻗﻠﺒﻬﺎ ﻳﺨﺒﻂ ﺑﻘﻮﺓ ﺗﻤﻨﺖ ﻟﻮ ﻭﻗﻒ ﻣﻦ ﺧﻮﻓﻬﺎ ﻟﻴﺴﻤﻊ ﺩﻗﺎﺗﻪ ..
ﺳﺮﻣﺪ ﺧﺪﻱ ﺍﻟﻼﺏ ﻭﺷﺒﺢ ﻟﻠﺨﺎﺗﻢ ... ﻓﺘﺢ ﺍﻟﻘﺠﺮ ﻭﺣﻄﻪ ﻓﻴﻪ ﻭﺟﺎﻱ ﺑﻴﻄﻠﻊ ﻭﻗﻒ .. ﺗﻠﻔﺖ ﻭﻭﺯﻉ ﻧﻈﺮﻩ ﻉ ﺍﻟﺪﺍﺭ
ﺳﺮﻣﺪ : ﻓﻲ ﺣﺪ ﺧﺶ ﻫﻨﻲ ... ﺭﻳﺤﻪ ﻧﺴﺎﺋﻴﻪ .. ﺭﻳﺤﺔ ﺇﻧﻌﺎﻡ ﻫﺎﺩﻱ .. ﺷﻜﻠﻬﺎ ﺧﺸﺖ ﺑﺘﺎﺧﺪ ﺣﺒﻮﺏ ﺍﻟﺮﺍﺱ ﺍﻟﻠﻲ ﺗﺒﻴﻬﻢ ﻣﻨﻲ ... ﺭﻥ ﺗﻠﻔﻮﻧﻪ ﺭﺩ : ﺍﻳﻮﻩ ﻳﺎﺷﺎﻣﻞ ﻫﻲ ﻧﺺ ﺳﺎﻋﻪ ﻭﻧﻜﻮﻥ ﻏﺎﺩﻱ .. ﻓﺘﺢ ﺍﻟﺒﺎﺏ ﻉ ﻋﺠﻠﻪ ﻭﻃﻠﻊ ﻭﻧﺴﻲ ﻳﺴﻜﺮﻩ ﺑﺎﻟﻤﻔﺘﺎﺡ ..
ﺭﻳﺤﺎﻧﻪ ﻗﺎﻋﺪﻩ ﻣﺘﻤﺪﺩﻩ ﺗﺒﻜﻲ ﻣﻦ ﺍﻟﺨﻮﻑ ﻭﻣﻦ ﺍﻟﺼﺪﻣﻪ ﻣﺶ ﻣﺼﺪﻗﻪ ﺑﻜﻞ ﺍﻥ ﻫﺬﺍ ﺳﺮﻣﺪ ﻋﻤﻬﺎ ﺍﻟﻠﻲ ﺗﺤﺒﻪ ﻫﻠﺒﻪ .. ﻣﺴﺤﺖ ﺩﻣﻮﻋﻬﺎ ﻭﻧﺎﺿﺖ .. ﺑﺼﻌﻮﺑﻪ .. ﻣﺸﺖ ﻟﻠﺒﺎﺏ ﻓﺘﺤﺎﺗﻪ ﻭﻃﻠﻌﺖ .. ﺗﻮﺟﻬﺖ ﻟﻠﺸﻤﺎﻋﻪ ﺧﺪﺕ ﻋﺒﺎﻳﺘﻬﺎ ﻭﻭﺷﺎﺣﻬﺎ ﻟﺒﺴﺘﻬﻢ .. ﻭﺗﻮﺟﻬﺖ ﺑﺮﺍ ﻓﺘﺤﺖ ﺑﺎﺏ ﺍﻟﺤﻮﺵ ﻭﻃﻠﻌﺖ ﻭﺭﻭﺣﺖ ﻟﺤﻮﺷﻬﻢ ...
***
ﺍﻟﺴﺎﻋﻪ 12 ﻟﻴﻼ ...
ﺍﻟﺤﺴﻦ ﺭﻭﺡ ﻣﻦ ﺍﻟﺘﺮﺍﻭﻳﺢ ﻟﻘﻲ ﺣﻨﺎﻩ ﻓﻲ ﺍﻟﺼﺎﻟﻪ ﻣﻘﻌﻤﺰﻩ ﺗﻤﺴﺪ ﻓﻲ ﺭﺟﻠﻴﻬﺎ ..
ﺍﻟﺤﺴﻦ : ﺍﻟﺴﻼﻡ ﻋﻠﻴﻜﻢ ..
ﺑﺮﻧﻴﻪ : ﻭﻋﻠﻴﻜﻢ ﺍﻟﺴﻼﻡ ﻭﻟﻴﺪﻱ ﻣﺮﻭﺡ ﺑﺮﻭﺣﻚ؟ !
ﺍﻟﺤﺴﻦ : ﺣﺴﺎﻥ ﻭﻣﺮﻋﻲ ﺑﻴﺴﻬﺮﻭﺍ ﻣﻊ ﺻﺎﺣﺒﻬﻢ .. ﻭﻳﻦ ﺍﻟﺒﺎﻗﻲ ..
ﺑﺮﻧﻴﻪ : ﺍﻧﻌﺎﻡ ﺗﺘﻔﺮﺝ ﻉ ﺍﻟﺘﻠﻔﺰﻳﻮﻥ .. ﻭﻋﻠﻴﺎ ﻭﻫﺎﻟﻪ ﻭﺳﺎﺭﻩ ﻣﻦ ﺑﻌﺪ ﻛﻤﻠﻮﺍ ﺍﻟﺤﻮﺳﻪ ﺭﻛﺒﻮﺍ .. ﻭﺭﻳﺤﺎﻧﻪ ﻗﻴﺴﻬﺎ ﺭﻭﺣﺖ ..
ﺍﻟﺤﺴﻦ ﺭﻛﺰ ﻉ ﻣﻼﻣﺤﻬﺎ ﺍﻟﻤﺘﻮﺟﻌﻪ : ﺧﻴﺮﻙ ﺣﻨﺎﻱ ..
ﺑﺮﻧﻴﻪ : ﺭﺟﻠﻴﺎ ﻧﺎﺿﻮﺍ ﻋﻠﻴﺎ ..
ﺍﻟﺤﺴﻦ : ﺍﻧﺘﻲ ﻣﺎﺗﻬﻨﻴﺶ ﻓﻲ ﺭﻭﺣﻚ ..
ﺑﺮﻧﻴﻪ ﺑﻀﺤﻜﻪ : ﻣﺎﻧﺤﺒﺶ ﺍﻟﺘﻘﻌﻤﻴﺰ .. ﺍﺍﻩ ... ﺳﻠﻢ ﻭﻟﻴﺪﻱ ﺑﻨﺘﻌﺒﻚ ..
ﺍﻟﺤﺴﻦ : ﺷﻦ ﺗﻘﻮﻟﻲ ﺍﻧﺘﻲ ﺍﻧﻲ ﻉ ﺣﺴﺎﺑﻚ ..
ﺑﺮﻧﻴﻪ ﺑﺈﺑﺘﺴﺎﻣﻪ : ﺭﺑﻲ ﻳﺤﻔﻈﻚ ﻳﺎﻏﺎﻟﻲ .. ﺳﻠﻢ ﻭﻟﻴﺪﻱ ﺧﺶ ﻟﺪﺍﺭﻱ ﻓﻲ ﻗﺠﺮﺍﻟﺰﻳﺎﻧﻪ ﻳﺎﺗﺎﻟﺖ ﻳﺎﺭﺍﺑﻊ ﻗﺠﺮ ﺗﻠﻘﻰ ﺑﻮﻣﺎﻃﻪ ﺍﻟﺮﺍﺟﻞ ﺍﻟﻌﺮﻳﺎﻥ ( ﻣﺴﺎﺩﺟﻮ ) ﺟﻴﺒﻬﺎ ..
ﺍﻟﺤﺴﻦ ﺿﺤﻚ ﻭﻫﺰ ﺭﺍﺳﻪ ﺍﻳﻤﻴﻦ ﻭﻳﺴﺎﺭ ﻭﻣﺸﻲ ...
ﻭﺻﻞ ﻓﻲ ﺍﻟﺪﺍﺭ ﻓﺘﺤﻬﺎ ﻣﺸﻲ ﺟﻴﻬﺔ ﺍﻟﺰﻳﺎﻧﻪ ﻗﻌﻤﺰ ﻉ ﺻﻮﺍﺑﻊ ﺭﺟﻠﻴﻪ .. ﻭﻓﺘﺢ ﺍﻟﻘﺠﺮ ﺍﻟﺘﺎﻟﺖ ﻗﻌﺪ ﻳﺪﻭﺭ ﻣﻬﻨﺎﺵ .. ﻓﺘﺢ ﺍﻟﺮﺍﺑﻊ .. ﻗﻌﺪ ﻳﺪﻭﺭ ﻟﻘﺎﻫﺎ .. ﻟﻜﻦ ﻟﻔﺖ ﻧﻈﺮﻩ ﺃﻟﺒﻮﻡ ﺻﻮﺭ ﻗﻌﺪ ﻳﺸﻮﻓﻠﻪ ﺟﺎﻩ ﻓﻀﻮﻝ ﻳﻔﺘﺤﻪ ﻭﻳﺸﻮﻓﻪ ﺍﻭﻝ ﻣﺮﻩ ﻳﺸﻮﻑ ﺍﻟﺒﻮﻡ ﺻﻮﺭ ﺯﻱ ﻫﺬﺍ ... ﻗﺎﻣﻪ ﻭﻗﻌﻤﺰ ﻉ ﺍﻟﺴﺮﻳﺮ ﻭﻓﺘﺤﻪ ﻛﺎﻥ ﻗﺪﻳﻢ ﻭﻓﻴﻪ ﺻﻮﺭ ﺑﺎﻷﺑﻴﺾ ﻭﺍﻷﺳﻮﺩ ﻟﻠﺤﺎﺝ ﻋﻠﻲ ﻭﺭﻗﻴﻪ ﺟﺪﺍﻩ ﺍﻟﻠﻲ ﺷﺎﻳﻔﻠﻬﺎ ﺻﻮﺭﻩ ﻋﻨﺪ ﺑﻮﻩ ﻋﺎﺑﺪ .. ﻭﻣﻌﺎﻫﻢ ﻋﺎﺑﺪ ﻓﻲ ﺍﻟﺼﻮﺭﺓ ﻛﺎﻥ ﺻﻐﻴﺮ ﻫﻠﺒﻪ .. ﺷﺎﻑ ﺻﻮﺭ ﻫﻠﺒﻪ ﻟﺠﺪﻩ ﻭﻋﺎﺑﺪ ﺑﻌﺪﻳﻦ ﻗﻌﺪ ﻳﻘﻠﺐ ﻟﻘﻲ ﺻﻮﺭ ﻟﺠﺪﻩ ﺷﻜﻠﻪ ﺍﻛﺒﺮ ﺷﻮﻱ .. ﻭﻛﺄﻧﻪ ﻋﺮﺳﻪ .. ﻗﻌﺪ ﻳﺘﻔﺮﺝ ﻉ ﻫﻠﺒﻪ ﺻﻮﺭ ﻟﻠﻌﺮﺱ .. ﺑﻌﺪﻳﻦ ﺷﺎﻑ ﺻﻮﺭﺓ ﻟﻴﻪ ﻣﻊ ﺑﺮﻧﻴﻪ ﻭﻫﻲ ﺻﻐﻴﺮﻩ ﻛﺎﻧﺖ ﺣﻠﻮﺓ ﻫﻠﺒﻪ .. ﺍﺑﺘﺴﻢ .. ﻣﺮﻭﺍ ﻋﻠﻴﻪ ﺻﻮﺭ ﻫﻠﺒﻪ ﻟﺠﺪﻩ ﻓﻲ ﻫﻠﺒﻪ ﺃﻣﺎﻛﻦ ﻭﻣﻨﻬﻢ ﺻﻮﺭﺓ ﻑ ﺟﺒﻞ ﻋﺮﻓﺎﺕ ﻣﻊ ﺑﺮﻧﻴﻪ .. ﻗﻌﺪ ﻳﻘﻠﺐ ﻳﻀﺤﻚ ﻉ ﺍﻟﻤﺮﺍﺣﻞ ﺍﻟﻌﻤﺮﻳﻪ ﺍﻟﻠﻲ ﻣﺮﺓ ﻓﻴﻬﺎ ﻫﻮ ﻭﻋﻤﺎﻣﻪ ﻭﺧﻮﻩ ﻋﻠﻲ ﻭ ﺷﺎﻑ ﺻﻮﺭﺓ ﻟﺴﺮﻣﺪ ﻭﺍﻧﻌﺎﻡ ﻭﻫﻤﺎ ﺻﻐﺎﺭ .. ﻭﻗﺎﻝ " ﻳﺎﻣﺎ ﻋﻄﻴﺘﻬﻢ ﻃﺮﺍﻳﺢ ﻣﻠﺤﺘﻬﻢ .." ﻛﻤﻞ ﻳﺸﻮﻑ .. ﻭﻛﺎﻧﺖ ﺍﺧﺮ ﺻﻮﺭﺓ ﻟﻴﻪ ﻫﻮ ﻟﻤﺎ ﺗﺨﺮﺝ ﻣﻦ ﻛﻠﻴﺔ ﺍﻟﺸﺮﻃﻪ ﻭﻣﻌﺎﻩ ﻋﺎﺑﺪ ﻭﺟﺪﻩ ... ﺍﺑﺘﺴﻢ ﻟﻤﺎ ﺍﺫﻛﺮ ﻫﺬﺍﻛﺎ ﺍﻟﻴﻮﻡ .. ﻟﻒ ﺍﺧﺮ ﺻﻔﺤﻪ ﺍﻷﻟﺒﻮﻡ ﻛﺎﻧﺖ ﻓﺎﺿﻴﻪ ﻣﻦ ﻭﺟﻪ ﻭﻟﻤﺎ ﻗﻠﺒﻬﺎ ﻉ ﺍﻟﻮﺟﻪ ﺍﻟﺘﺎﻧﻲ ﺷﺎﻑ ﺻﻮﺭﻩ ﺻﺪﻣﺎﺗﻪ ﺻﺪﻣﻪ ﻗﻮﻳﻪ ... ﻗﻠﺒﻪ ﻗﻌﺪ ﻳﺪﻕ ﺑﻌﻨﻒ ﻗﻌﺪﻳﺘﻨﻔﺲ ﺑﺼﻌﻮﺑﻪ .. ﻫﻮ ﻛﺎﻥ ﻳﻌﺮﻑ ﺷﻜﻠﻪ ﻟﻤﺎ ﻛﺎﻥ ﻋﻤﺮﻩ ﻓﻲ 5 ﺳﻨﻴﻦ ﻷﻧﻪ ﻋﻨﺪﻩ ﺻﻮﺭ ﻓﻲ ﺣﻮﺵ ﻋﺎﺑﺪ ... ﻛﺎﻧﺖ ﺍﻏﻠﺒﻬﺎ ﻣﻊ ﻭﺳﻴﻠﻪ ﻭﺧﻮﻫﺎ ﺟﻤﺎﻝ ﺍﻟﻠﻲ ﻛﺎﻥ ﻳﺤﺒﻪ ﺍﻟﺤﺴﻦ ﻫﻠﺒﻪ ...
ﺍﻟﻠﻲ ﺷﺎﻓﻪ ﺗﻮﺍ ﺻﻮﺭﺓ ﻟﻴﻪ ﻭﻫﻮ ﺻﻐﻴﺮ ﻣﺎﺑﻴﻦ ﺯﻭﺯ ... ﺭﺍﺟﻞ ﻳﺸﺒﻬﻪ ﺷﺒﺢ ﻟﻠﻤﺮﺍﻳﻪ ﻭﺭﺟﻊ ﺷﺒﺢ ﻟﻠﺼﻮﺭﺓ .. ﺍﻟﺮﺍﺟﻞ " ﺳﻴﻒ ..." ﻭﻣﻌﺎﻩ ﻣﺮﺍﺓ ﺣﻠﻮﻩ ﺍﺑﺘﺴﺎﻣﺘﻬﺎ .. ﻗﻌﺪ ﻳﺸﺒﺢ ﻟﻠﺼﻮﺭﺓ .. ﻭﻣﺼﺪﻭﻡ ﺑﻘﻮﻩ ﻃﻠﻌﻬﺎ ﻭﻫﻮ ﻳﺮﺟﻒ ﻟﻤﺢ ﻛﺘﻴﺒﻪ ﻭﺭﺍﻫﺎ ﻟﻔﻬﺎ ...
( ﺍﺑﻨﻲ ﺳﻴﻒ ﻭﺯﻭﺟﺘﻪ ﺯﻫﺮﻩ ﻭﺍﺑﻨﻬﻢ ﺍﻟﺤﺴﻦ .... )
ﻃﺎﺣﺖ ﺍﻟﺼﻮﺭﺓ ﻣﻦ ﺍﻳﺪﻩ ﻭﻗﻌﺪ ﻳﺮﻋﺶ ﻭﺯﺍﺩﺕ ﺩﻗﺎﺕ ﻗﻠﺒﻪ ﻭﻳﺎﺧﺪ ﻓﻲ ﺍﻟﻨﻔﺲ ﺑﺼﻌﻮﺑﻪ ... ﺻﺪﻣﻪ ﺑﻜﻞ ﻣﺎﺗﻌﻨﻴﻪ ﻛﻠﻤﺔ ﺍﻟﺼﺪﻣﻪ ﻣﻦ ﻣﻌﻨﻰ .. ﺻﺪﻣﻪ ﻋﻤﺮ ...
ﺑﺮﻧﻴﻪ ﺍﺳﺘﻐﺮﺑﺖ ﻋﻼﺵ ﻋﻄﻞ ﻧﺎﺿﺖ ﺑﺼﻌﻮﺑﻪ ﺗﻮﺟﻬﺖ ﻟﻠﺪﺍﺭ ﻛﺎﻧﺖ ﻣﻔﺘﻮﺣﻪ ..
ﺑﺮﻧﻴﻪ : ﺷﻨﻮ ﻣﺎﻝ ........... ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ﻭﻗﻌﺪﺕ ﺗﺮﻋﺶ .. ﻭﺗﺒﻠﻊ ﻓﺮﻳﻘﻬﺎ ... ﻫﻮ ﻟﻤﺎ ﺳﻤﻊ ﺻﻮﺗﻬﺎ ﺷﺪ ﺍﻟﺼﻮﺭﺓ ﻭﺟﻬﻬﺎ ﻟﻴﻬﺎ ﻭﺗﻠﻔﺘﻠﻬﺎ ﺑﻌﻴﻮﻧﻪ ﺍﻟﻤﺪﻣﻌﺎﺕ ﻭﻗﺎﻝ ﺑﺼﻮﺕ ﻣﺨﻨﻮﻕ : ﺃﻧﻲ ﻣﻨﻮ .. ؟؟؟
... ﻳﺘﺒﻊ
