كانحلو عينينا فهاد الدنيا و حنا ما عارفينش مصيرنا فيها كيفاش غادي يكون ..
✨واش غادي نكونو فرحانين و لا غادي نبكيو؟
✨واش غادي نكونو مرتاحين و لا غادي نشقاو ؟
✨واش حنا من لي تزادو بمعلقة ديال الذهب ففمهم و لا من لي على قد الحال ؟
بزاف ديال الحاجات كانكونو جاهلين عليها و مع دلك شغف الحياة كايكون راكبنا ... كلنا شفنا اشنو كايتسنا فينا فهاد الدنيا و قبلنا التحدي باش نخوضوها .. كان عندنا خيار واش نكملو قبل ما نبداو واش ننساحبو و لا نتيسرو على الله و لي ليها ليها .. و كلنا تيسرنا .. و ها حنا تا نعيشو .. جاهلين شنو ممكن يصادفنا .. حتى الاحداث لي سبقو هاد الدقائق ما كان عندنا علم بهم حتى عشناهم ... و كايوليو محسوبين على "الماضي"
الدنيا عبارة عن طريق كايدي ما كايرجعش .. فيه اتجاه واحد لي هو تزيد القدام .. لي فات ما كايرجعش و لي فات من هاد الدنيا كايمشي من عمرنا و تا ينقص من حياتنا ، و حنا عارفين بلي ما غاديش نعيشو ديما .. داكشي علاش تا حاجة ما تستاهل و خاصنا نزيدو للقدام كيفنا كيف الكل ... وقفتي غادي دير حادثة رجعتي غادي دير حادثة ... زيد القدام و ما تخافش .. *اعقلها و توكل*
ربي رحمة بعباده زرع فيهم النسيان ، مع الوقت كايتمسحو الذكريات القدام من العقل غير بوحدهم و تا يولي صعيب عليك تتفكرهم .. و لكن كاين مننا لي فشكل .. كايبقى متشبت بالحاجة و ما ساخيش بيها و كايبقى حبيس للماضي ...عن طريق أغنية تا يربطها بشنو صرا و لا عن طريق قطعة ديال الحوايج و لا عن طريق الكتابة .. المهم هو يبقاو محتفظين بالذكرى و موثقينها واخا تكون خايبة ما ساخيينش بيها .. و شحال من وحدين حبسو حياتهم عندها و ما قدروش يزيدو القدام و كايتعرضو لحادثة فحايتهم كايبقاو حبيسي "الماضي"
و لكن حتال ايمتا .. لا يعقل بنادم يبقى ساد على راسو و عايش مع الذكريات تا يدي مول الامانة امانتو ... ضروري ما يتفتح الشرحم و يتبدل الهوا و يدخل الضو ... طال الزمان و لا قصار تا حاجة ما كاتبقى على حالها .. و لي وقع زمان ما خاصش يعاود يتكرر .. طيح و نوض نفض حوايجك و زيد القدام .. السند ماشي ديما معاك و خاص تتعلم تسند راسك بيدك .. ما عرفتي الدنيا اش مخبية .. الدنيا امتحان على شكل مغامرة .. ما عرفتي شنو غادي يتحط ليك فالورقة و خاصك تكون مطالع و مراجع كلشي باش فين ما تحطيتي تلقى باش تعمر الورقة و ما تخليهاش خاوية .. الصفر نقطة موجبة للسقوط .. و السقوط يعني توقف و التوقف يعني حادثة و حنا ما باغيينش ندورو فبلاصتنا ... دير لي عليك و الكمال على الله ..
#safiyanagat
#صفصف_قد_مرت_من_هنا
أنت تقرأ
عن الماضي *نصف مغلق* (بالدارجة المغربية)
Romance#ممنوع_النشر 🔐 لا احد في الكون يشبهك ، لا لا الشمس و لا حتى القمر الجمال خاتم في اصبعك و انت سلطان العقل و الروح اذا كان حبي لك ذنب يستحق العقوبة فزدني دنوبا اني لا احيى من دونها دموع عيني يا ح...
