عن الماضي *نصف مغلق* (بالدارجة المغربية)

احبيني بلا عقد (61)

#الفـــصــل_03
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
❀ #عن_الماضي ⁂ #نصف_مغلق ❀

دخلات ليها الحليب دافي مع التمر و الكرموس شريحة  ... و جلسات حداها كاطمن عليها .. باين عليها العيا و لونها مخطوف ...

فاطمة : كولي هادشي تقوتي ..
صوفيا : ما فياش ا ميمتي .. غير خليني ..
فاطمة : لواه لواه .. نوضي .. (طبطبات على ظهرها) نوضي عفا بنتي و شبعيني هضرة
صوفيا : (جلسات و جمعات رجليها عندها و حابسة دموعها بالزز) نن نعم
فاطمة : مالك ؟ شنو واقع ؟ الراجل و مراتو كايدابزو و يتصالحو عادي .. ما تخليوش للشيطان فين يدخل
صوفيا : (بلعات ريقها) الله ينعلو و يخزيه ا ميما ..
فاطمة : (ما عاجباها حالتها)  تظغطتي ؟
صوفيا : فوق القياس و فوق الجهد و ما بقيت عرفت منين نلقاها ...
فاطمة : (شافت فتلفونها لي كايشعل و يطفا كل شوية باتصالاته) و ما قلتيش ليه راك جايا للهنا ..
صوفيا : ما هضرناش .. صافي دابا يعيا و يشد الارض .. انا وياه وصلنا للخر
فاطمة : العياذ بالله .. اش كاتقولي ..
صوفيا : ميما و الله ما بقيت قادة ..
فاطمة : اش كايدير ليك ؟
صوفيا : غير الخير ، ما شفت منو غير الخير .. فين ما كان شي حب غرقني فيه و لي حليت عليها فمي تحضر و دايرني فوق راسو و كلشي .. انا لي ما نستاهلوش .. انا لي ديما خارجة للعيب ..

طللات تاني على التلفون و شافت فيها ، عارفة نايمة العيون قصح من راسها ما كاين ... تنهدات على حالها و طبطبات عليها ...

فاطمة : زعما هو فنظرك ما شافش هادشي ؟
صوفيا : همم !
فاطمة : ما شافكش عوجة ، ما كملاش ، ما كاتعرفي ديري حتى حاجة ، حتى باش تعبري على شنو كاين فقلبك ما كاتقديش .. كاتحشمي بلا قياس و يمكن مسبقة الناس عليه ... هو ما شافش هادشي ؟ شحال و نتوما مزوجين ؟  سبع اشهر .. ما قدر يخرج حتى باستنتاج كايشبه لهادشي لي قلت .. شحال و نتونا كاتعرفو بعضياتكم .. سنين .. ما عرفش فيهم هادشي .. و واخا هكاك قبل عليك
صوفيا : ما بقيتش بغيتو يبقا قابل على خلا دارو ... ما بقيتش بغيتو يبقا معدب مع وحدة بحالي .. انا عفيتو
فاطمة : دخول الحمام بحال خروجو ؟
صوفيا : انا بحالي بحال قباب الحمام ... كاندخل خاوية و كانخرج خاوية .. ما عنديش مشكيل كي دخلت كي خرجت ..
فاطمة : الزواج ماشي هو هذا ..
صوفيا : داكشي علاش ما تليتش باغا نكمل فيه ..
فاطمة : (تنهدات) و شنو غادي نقولك .. خليك حتى تبردي ..
صوفيا : ميما سمحي ليا جيت مصدعاك فهاد الوقت
فاطمة : باركة من البسالة و شربي الحليب و خودي الشريحة راها مزيانة
صوفيا : ميمتي بلا ما تسيق ليا ماما الاخبار الله يخليك .. خليني حتى نقولها ليها و الله ما قادة على اسئلة و هضرة و لغا .. من الطبيب لعندك باغا نرتاح ..
فاطمة : كون بقيتي فالطبيب نهناو عليك كثر .
صوفيا : (مسحات دموعها) ما عندهم فاش ينفعوني
فاطمة : شنو قالو ليك بعدا !
صوفيا : انا بيخير ..

فاطمة تنهدات عليها ما بغات تعطيها راس الخيط .. هزات راسها و عاود شافت فالتلفون ..

فاطمة : احسان كايعيط .. انا نخليكم تهضرو ..