عن الماضي *نصف مغلق* (بالدارجة المغربية)

#دمعة_الماضي (1)

#الجزء_ 01
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
❀ عن الماضي ⁂ #نصف_مغلق ❀

فقاعة حفلات كبيييييرة وسط مدينة فاس العريقة ، النايض كثر من الكالس ، فرحانين و ما قاداهم فرحة ... و لما لا و البنت البكر ديال العائلة غادة تتزوج و تفتح الطريق لخوتها ... السربايا غاديين جايين و الموسيقى مجهدة ... و الدراري الصغار دايرين حقهم ... العروسة و العريس فبيتهم كايبدلو .. و المغني مهدن الطرح ...

*ما هو جاري ما قريب لدواري ، ما هو جاري ما قريب لدواري
*المحبة لي جابتو عينيا ، المحبة لي جابتو يا البنية
*و الليل ا بابا الليل اسيدي و الليل ا بابا الليل*
فالقنت ، وسط القاعة ، مجموعين حول طبلة كبيرة ، مع بعضياتهم ... تا يرتاحو و يردو النفس من الطرح لي نوضوه مع عيساوة ... مدات يديها خدات كلينكس من الكارطونة و بقات تا تمسح حبات العرق لي كانو على جبهتها ... ردات شعرها ورا ودنها ..

كنزة : عييت
مرية : ههههههه حتى انا
... : انا بعدا لا ... و جاني الملل من هاد الموسيقى
مرية : اش خصك ؟
... : انا تا نعرف .. عرس ختي هذا ، خاصني نشخدها فيه ... و تا نعرف دايرين عرس خاصنا نتصرفو على داك المنوال .. ما يتحسبش عليا عرس و انا غي جالسة تا نصفق ...
علي : هانا على التمرد ... هل تفكرين فيما افكر !
... : (شافت فيها بعينيها النايمين لي تفتحو على وسعهم لبرهة و رجعو كي كانو) اها ...
علي : نمشي نجيبها ؟
... : سير انا نمشي نهضر معاه ..
كنزة : لا حول ، البريستيج ا صوفيا البريستيج
صوفيا : (هزات كتافها بلا مبالاة) ماشي ديما غاديين نعرسو ..
كنزة : مهما انو ساليمة بدات عولي عليها .. نتي و لا مرية تابعينها
صوفيا : (ضحكات باستهزاء) ايه ايه ... ما تلهنيش ..

ناضت هازة قفطانها و مخلية رجليها مكشوفين و باين السنيكرز لي ضاربة معاه .. السر انها ما عياتش ..

مرية : زوينة عندك تابعينها .. غا زربانة على راسك و باغا تسرسبينا .. و نطمنك ا زين بت نبت كالسة على قلبك ما مزوجاش 🙂
كنزة : (شافت فيها تا تضحك ) واخا واخا ... (و عاودات متبعة مع صوفيا تشوفها اش بغات تصنع )

مشات باتجاه المغني لي كان قريب للباب .. مع وقفات تهضر معاها وقف عليها و تحنى هضر فوذنها ..
... : العقبة لينا ا زين

هزات عينيها فيه و هي مخنزرة ديال بلعاني ...

صوفيا : تا تقلب عليا ، جاي تال دابا ا احسان ، و زايدها بالكلام الناقص ..
احسان : ( تبسم ليها) غا سموحات و كان هادي هي فاس ، ما يمكنش نوصل فالوقت .. مبروك عليها (مد ليها الكادو)
صوفيا : (شداتو من عندو) هههه العقبة ليك .. قولي اشنو فيه باش ايلا عجبني ناخدو ما نعطيهش ليها
احسان : ههههه لا حول .. دي الكادو لماليه
صوفيا : تسناني هنا ..

مشات بخفة للبيت فين تا يحطو داكشي ، حطات الهدية و الطريق لي جابتها رداتها .. لقاتو واقف فبلاصتو داير يديه فجيب السروال و واقف تا يشوف و متوتر ..