#الفـــصــل_03
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
❀ #عن_الماضي ⁂ #نصف_مغلق ❀
دارت لحداش هزات صاكها و خرجات من الدار .. ركبات فسيارتها و زادت الوجهة دار ساليمة .... طلعات فالمصعد و هي كاتفكر لقائها مع عمير هنا كيفاش داز .. كلشي كايدوز بحال ايلا وقع غير البارح ... و لكن لا الوقت كايطير و عام فات .. فات و فاتو معاه شلاااا حاجات ... و أهمهم ها هي تجوجات بعمير النيت .. ولات محسوبة عليها تزوجية و سميتها جات حدا سميتو .. و رسخو لكلشي انهم دوزو قصة حب خيالية تتوجات بالزواج ... قاطع حبل افكارها الباب لي فتحاتها ساليمة و دخلات صوفيا ... كون تعطلات شوية كانت لقاتها كاتفكر فالمستقبل منين غادي تطلق هي و عمير ...
ساليمة : صباحو ..
صوفيا : صباح النور ... كي صبحتي
ساليمة : فوق السلك .. هاني عاد خرجت من الدوش ! فطرتي ؟
صوفيا : مع الثمنية !
ساليمة : هههه بالصحة ...
صوفيا : ايوا .. هانا جيت
ساليمة : على سلامتك .. نتي عارفة عصام ما كايبغيش البراني يدخل للدار .. و انا كانحشم من خالتي عيشة فهاد الامور . ما لقيت ما حسن منك يعاونني ..
صوفيا : واش عاد تحتاجي تبرري ليا ..
ساليمة : لبارح قلت ليه بلي لفراش ولا يخرح شي حشرات خاصني نقلبو و ناض خرجو عليا من البيت .. ايوا راه كايصفر دابا خاصنا نقادو جليسة دايزها الكلام ..
صوفيا : (باندهاش) نعم !
ساليمة : انا نوريك كيفاش ..
صوفيا : ايييه كملي
ساليمة : و غادي تختاري معايا شنو غادي نلبس و تقاديني .. هذا ما كان .. منها نيت ندير ليك فورماسيون .. الرجال خاصهم التغيير
صوفيا : ههههه الله يستر ... عصام ما غاديش يجي للغذا ؟
ساليمة : (هزات حجبانها كاتنفي) لاء .. غادي يبقا يكمل شي حاجات باش يخرج فالعشية بكري ... (هزهزات ليها صوفيا راسها ببالثقالة زعما فهمت) سالينا الهضرة هيا للعمل ؟؟
جراتها معاها و دخلو للبيت كايقادو فيه و هز من هنا حط من هنا و هوما داويين مع بعضياتهم
ساليمة : ايه سولت عصام على ليليا ..
صوفيا : قال ليا عمير عليها ... هههه غير عدبتي راسك
ساليمة : قالك بلي منين قالك صاحبتو قصدها .. راه الاكس هاديك
صوفيا : نتي عارفة عمير ترابي برا مݣور فمخو .. واخا مابقاوش كوبل مزال صحاب
ساليمة : و نتي سكتتي
صوفيا : اش غادي نقول ..
ساليمة : شحال غادي تجلس ؟
صوفيا : الى اجل غير مسمى ... قالت ليها خالتي حكمت باش تجلس معانا تا تكمل خدمتها
ساليمة : الصواب واجب .. على الله تفهم صوتها من جنبها و تهز قلوعها
صوفيا : مالنا حاطينها على قلبنا
ساليمة : ما كاتغيريش ؟
صوفيا : (بلعات ريقها سكتاتها) تزوجنا حيت كانبغيو بعضياتنا او لا ؟؟
ساليمة : و هاد الراجل عندك شبعان سوابق .. ها شمس ها ليليا ... و يعلم الله شكون ! و هادشي غا كنتو مع بعضياتكم قبل .. ايمتا لحق ..
صوفيا : ايوا هذا هو مصير العلاقات عن بعد .. غفل طارت عينيك ..
ساليمة : و مصير باردات القلب بحالك
صوفيا : راها غا اكس .. ماشي شي حاجة .. كون قنعاتو كان ايبقا معاها
ساليمة : (باستغراب) قنعاتو ؟ اويلي نعس معاها ..
صوفيا : شحال هادي ..
ساليمة : و مخلياها فدارك
صوفيا : (تنهدات) ساليمة قلبي عليا الموضوع ..
ساليمة : باز ليك اختي باز و الله
صوفيا : ههههه فين نحط هادي
ساليمة : تلفيني .. اويلي انا كنت مستغربة كيفاش تقبلتي مراتو اللولة و الولاد لي كانو غاديين يولدو زدتيني بصيحبتو .. مالك باردة بحال هاكا ..
صوفيا : (مجارياها بالكلام) هاني غوتت و هضرت و تعصبت شكون غادي يتهد .. انا ! شنو غادي يتبدل ؟ والو ..
ساليمة : و ايلا بقيتي هاكا .. تا نتي غادي يجي شي نهار و تسالي ساعتك .. زيري !
صوفيا : و يكون خير صافي فهمنا ...
ساليمة : غير لمصلحتك اختي و لمصلحتنا جميع .. الحب باين فعينيه .. اما تا نتي باردة .. و الا بقيتي هاكا غير غادي تنفريه منك .. تحركي ديري شي حركة تا نتي ..
صوفيا : راني دايرة جهدي ..
ساليمة : علاش كاتهضري بحال ايلا مبززين عليك شي حاجة .. ياك نتي بغيتيه .. ياك نتي حماقيتي عليه و قرن و نتي معاه ... شنو وقع دابا
صوفيا : انا ماشي باردة .. انا غير كانختار الوقت لي نبين ليه حبي و صافي .. انا ما كانعرفش نهضر بحالك و نعبر قدام كلشي ... من ديما كان حبي ليه مخبع و كانبينو غير ليه و تا دابا راني هكاك .. ما عرفتش نتبدل ..
ساليمة : صافي ريلاكس نتي ادرى انا غير باغاك تزيدي القدام و تزيري الشغل .. خصوصا مع هاد ليليا .. الراجل يبغيك تا يفنا راه غير يلقا لي تهلا فيه و ديرو ملك يقلب عليك .. ما تخليش ليه المجال فين يشوف فبلاصة اخرى .. و منين قلتي بيناتكم ما راكش خشبة فإذا صافي خودي راحتك اختي ...
صوفيا : ههههه لهلا يخطيك ا ساليمة و كان
ساليمة : امين .. ايوا و فين خليتي ضيفتكم ؟
صوفيا : (ببرود) معاه .. بغات تشوف الاجواء عندو فالخدمة .. غادي يدوزو نهارهم بجوج
ساليمة : (ضربات على فخاضها) اربي اما ما غا يقتلني لا سكار لا تلاميذ انا غادي تقتلني ختي .. كيفاش يدوزو نهارهم بجوج
صوفيا : بحالي مع احسان ...
ساليمة : (قرصاتها) علاش هي بحالو ؟
أنت تقرأ
عن الماضي *نصف مغلق* (بالدارجة المغربية)
Romance#ممنوع_النشر 🔐 لا احد في الكون يشبهك ، لا لا الشمس و لا حتى القمر الجمال خاتم في اصبعك و انت سلطان العقل و الروح اذا كان حبي لك ذنب يستحق العقوبة فزدني دنوبا اني لا احيى من دونها دموع عيني يا ح...
