#الفـــصــل_03
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
❀ #عن_الماضي ⁂ #نصف_مغلق ❀
صوفيا : (تبسمات ليه) ما كاتفكروش تخليو ايلا قريبة لشمس ؟
عمير : ايلا صبرات لفراق مها و لكن ما غاديش تصبر لفراق يما ... راك شفتيها فالشهرين لي كانت فيهم بعيدة .. كون ما مشات تعواج
صوفيا : (عضات على شفتها) و شمس ما تقدرش ترجع ؟
عمير : هي باغا تبعد .. ما بقاتش باغا تجلس فديك الدار
صوفيا : علاش انا قلت تجلس فديك الدار ؟ (هزات يديها كاتعبر) و شفتي ليليا و صابرة ليها غير حيت غادي تمشي بحالها شحال ما طولات .. و ما كانحملهاش من نهار جات غير على قبل قلتي ليا بلي كنتو مصاحبين شحال هادي .. متخايلني نبغي نبقا انا و مراتك اللولة تحت سقف واحد للابد .. (كاتنفي بصبعها) نو نو نو نموت قبل ما نوافق على حاجة بحال هاكا ..
عمير : (تبسم من طريقتها) كلنا صابرين ليها حيت وصية و صافي و حيت عشرة عمر .. و لكن شمس راه منا و فينا و عندها حقها حتى هي تماك ... انا لي ما عنديش الحق !
تبسم جنب و سكت و هي عينيها ما حيدوش عليه .. كاتشوف شحال هاد الجانب من حياتو جارحو و محرر عليه عيشتو .. واخا عمرو هضر ليها عليه و عمرو تشكا و لا لمح و لكن باين الجرح عميق و عمرو غادي يبرا خصوصا عرف الحقيقة معطل .. ضرها فخاطرها منظره بحال هكاك و بلا ما تخمم حطات يديها فوق يديه مزيرة عليه و تنهدات بلا هواها متألم لألمو ، ماشي شفقة و لكن ما هاينش عليها تشوفو على ديك الحال .. كاتبغي تشوفو ديما ضاحك و مملوء بالطاقة ...
صوفيا : عادي نخرجو انا وياك ، خالتي ما حيدها ليك حد و ايلا حتى هي ... هادشي ايلا هي بغات ترجع للدار و تبقا حدا بنتها ...
عمير : ان شاء الله ، حتى نهضرو و يكون خير ..
صوفيا : ان شاء الله (هزات كتافها غير مبالية بالهضرة لي غادي تقول من بعد) واخا شمس بينات ليا شحال من مرة بلي خرجاتك من عقلها انا ما غاديش نبغيها تكون معاك تحت سقف واحد ، على قلة الديور ؟ الا ...
عمير : ههههه كاتغيري
صوفيا : كاتسول و لا كاتتأكد ؟ كانموت بالغيرة ، كانحس بحال شي خنجر كايدخل فقلبي و يخرج من الجيهة لوخرا منين كاتبقا مخيلتي تفصل و تخيط على هواها .. و اصلا نتا ما خليتيش راسك مخصوص .. عشتي الحياة طول و عرض عمرتي الضوسي اسي ..
عمير : (تبسم ليها) واخا كاع شنو فات كاتبقاي نتي هي لي عشقاتها الخاطر و عشقها القلب و ملكات الروح ..
صوفيا : (ضحكات حتى غبرات خالتها وسط الغمازة لي عندها جنب فمها) شكرا ..
عمير : هادشي باش اتاك مولانا ؟
صوفيا : كانبغيك و كانتيق فيك ا مولا قلبي
عمير : (حط يديه على قلبو و غمض عينيه لوهلة) هاااح ا قلبي ..
صوفيا : حل عينيك لا تمشي تقلبنا ..
عمير : هههه ها هو ..
صوفيا : كنت سولتك على شحال من وحدة دوزتي قبل مني !
عمير : منين عاقلة على السؤال راك عاقلة على الجواب
صوفيا : لا زعما بغيت نعرف ياكما عندك شي ولد مخبيه عليا ! من ديك القشلة ؟
عمير : بعقلك ؟
صوفيا : و قولي !
عمير : يا ربي نكون غا كانحلم .. هههه صوفيا رجعي لعقلك
صوفيا : و بغيت غا نعرف و صافي
عمير : و فنظرك عندي الولاد و غادي نخبيهم ؟
صوفيا : و حيت كيف شفتي عقل الصغر كايخليك دير ما كثر
عمير : كنت صغير فواحد الوقت و كبرت .. ماشي راجل انا ايلا نكرت ولادي
صوفيا : واخا ما تكونش باغيهم ؟
عمير : لي غلط كايتحمل مخلفات اغلاطو ... واخا الولاد نعمة و ماشي غلطة
صوفيا : صافي فهمت .. انا بغيت غير نعرف و صافي ! ما تقلقش مني ..
عمير : لا عادي ... فراسك نهار شفت ولادي (تنهد) زعما انا و شمس .. قلت مع راسي بلي هاديك هي احسن غلطة فالعالم واخا ما كتتش واعي براسي و ما كنتش باغيهم فالاول .. منين شفت الايكو ديالهم قلبي ضرب بالزربة و وليت متحمس نشوفهم .. ما كانتش هاديك اول مرة نشوف ايكو و لكن اول مرة نحس باحساس بحال هذاك .. كايقولو الام كاتولي ام من نهار كاتحمل بالبيبي و الاب حتى كايشدهم عاد كايولي اب و لكن انا غير شفتهم حسيت براسي وليت اب و شي حاجة فشكل تزادت فيا ، (تبسم بألم و عينيه دمعو) غير قالت الطبيبة بلي ماتو نفسي تزيرات و قلبي تهرس يمكن خيبتي تماك كانت اكثر من فاش عرفت بلي انا غير متبنييني ...
صوفيا : كان عام صعيب !
عمير : صعيب بزاف خسرت فيه ولادي ، كنيتي ، عائلتي و حياتي كلها و الحمدلله على كل حال ... و واخا هكاك ربحتك نتي .. جا الضو لي نور حياتي من بعد ما ولات ظلام .. فاي حاجة كايكون الزوين و الخايب
صوفيا : و انا كنت هي الزوين فديك الحاجة ! (تبسمات محاولة تلطف الجو) سعداتي خاصني نحس براسي ..
عمير : فلحظة تسلب مني كلشي و فوحدة اخرى ملكت كلشي ... صوفيا ، قلبها ، خاطرها ، راسها ! انا لي سعداتي
أنت تقرأ
عن الماضي *نصف مغلق* (بالدارجة المغربية)
Romance#ممنوع_النشر 🔐 لا احد في الكون يشبهك ، لا لا الشمس و لا حتى القمر الجمال خاتم في اصبعك و انت سلطان العقل و الروح اذا كان حبي لك ذنب يستحق العقوبة فزدني دنوبا اني لا احيى من دونها دموع عيني يا ح...
