عن الماضي *نصف مغلق* (بالدارجة المغربية)

#دمعة_الماضي (3)

#الجزء_03
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
❀ عن الماضي ⁂ #نصف_مغلق ❀

على اشعة الشمس الحارة و لي ضربات فوجهها مباشرة فاقت و هي معنكشة و مخسرة وجهها حطات يديها على عنقها كاتحاول تمسدو باش ما يبقاش متشنج ... ناضت دخلات من البالكون .. و سدات بابو نزلات الريدو و تكسلات عوالة تكمل نعاسها ففراشها و هي تتفتح الباب ..

ابتسام : (شافتها واقفة و السرير مقاد عند بالها ناضت) هاه و انا لي جايا نفيقك .. ساعة نتي قضيتي غراض ، يرضي عليك ..
صوفيا : (بصوت مبحوح مع الغوات و الحيوح دالعرس و مخلط مع بحة الفياق و زيد عليه صوتها فيه بحة اصلا) صباح الخير
ابتسام : اجي حطي معايا الفطور و جمعي الكواش باش تغطاو ضيافنا
صوفيا : نقضي حاجتي و نبدل عليا و انا معاك
ابتسام : غا نزلي كاين غير العيالات
صوفيا : اوك واخا .. هاني جايا

خرجات ابتسام مخلية الباب مفتوحة وراها و خلات حتى صوفيا غي كاتشوف فالفراغ ..

صوفيا : لهاد الدرجة صعيب تقولي اش كاين .. اععع مني ..

حكات راسها و دخلات للحمام لي كان فوسط بيتها لي جا بوحدو الفوق ... كان عبارة عن علية و هي مصمماها كي بغات ... و خرجات سدات بابها بالساروت ، حيت الدار عامرة و هي عدوها لي يدخل لبيتها .. علقاتو فعنقها و هبطات و الابتسامة على وجهها و لي تلاقات بيه تصبح عليه ..

دخلات للصالة لقات شي طاوي غطاتو شي مخليها ..  تنهدات و بقات كاتطوي و تجمع لي دازت من حداها تقادها .. دخلات داكشي لبيت الغسيل باش يتصبن و خرجات للكوزينة هزات الصينية لي كانت موجدة ابتسام و المساعدة ديال دارهم .. و بدات كاتدي .. و تحط فالطبالي ..

نجاة : (كاتهضر بالجهد باش تسمعها ابتسام) اللهم بارك العاتق اتبع ختها باذن الله  ... الحداكة و الزين
(صوفيا : قلبها تزير عليها و غي كاتسمع و ساكتة)
ابتسام : (بوجه بشوش جايا هازة صينية تا هي ) ان شاء الله و لكن باقي الحال .. مزال بلاصت ختها خاوية و ما ولفنا بيها تزيد تا هي ما نقدر ..
نجاة : و لي فيها الخير الله يآتينا بيها
ابتسام : امين .. و مرحبا بيكم مدو يديكم ..  شنو نكب ليك ؟

بقات تسولهم شنو تكب ليهم و تمد .. و معاوناها عائشة المساعدة ديال الدار .. على قبل جوج طبالي تحماق بيناتهم و صوفيا موخرة اللور تتسخر من الكوزينة ايلا احتاجو شي حاجة .. حتى سمعات صوت خوها تا يعيط ...

صوفيا :  انا نمشي عندو ا ماما
ابتسام : واخا

ناضت كاتزرب دخلات عندو للبيت لقاتو فبلاصتو ما بغاش يتزعزع ..

صوفيا : مالك ؟؟
اسلام : (كايهز فراسو يمين بحركات متكررة) بب بغيت ماما !
صوفيا : مشغولة معاهم .. ما بغيتيش تقولي مالك ؟ ياك انا ختتيك لي كاتشري ليك داكشي الزوين !
اسلام : (حرك راسو بلا ) بب بغيت ماما
صوفيا : (جلسات حداه و حطات يديها على شعرو و هو يهرب راسو و كحز من حداها شوية )  ششش تهدن ..  ما غانقيصكش و ايلا بغيتي ماما ... قول ليا مالك و  شنو واقع نعيط ليها
اسلام : (كايهز راسو لجيهة اليمين ببطئء ) فف فراشي فازك ..
صوفيا : (بعدم اهتمام ما بغاتش تكبر الموضوع باش ما تجرحوش ) هذا و كان .. خفتي بالليل !؟ داكشي علاش ما نضتيش تمشي للحمام ؟
اسلام : (كايشوف فنقطة بعيدة) كاين بزاف د الناس
صوفيا : ديك الساعة طلع عندي !
(اسلام : ركز الشوفة فديك النقطة و ما بقاش جاوبها)
صوفيا : ( شافتو هكاك و مدات يديها تاني مسحات على راسو بيديها بجوج و باست جبهتو و هو يكحز ) فيها خير .. المرة الجايا ما تبقاش تحصرها باش ما تمرضش .. اسلام .. اسلااام .. (دار شاف فبها ببرود) ياله نوض لوي عليك ديك ليزار لي فالارض .. راه نقي .. و وقف تسناني زربا خفا نجمع هادشي و نطلعك لبيتي ندوش ليك