عن الماضي *نصف مغلق* (بالدارجة المغربية)

احبيني بلا عقد (37)

#الفـــصــل_03
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
❀ #عن_الماضي ⁂ #نصف_مغلق ❀

فالجيهة اخرى الدراري محيحين مع عيساوة و الياس و احسان خواو جيبوهم بالغرامات .. فرحانين حتى هو و ناشطين مع الوقت  ... بقاو هاك بالاك هاك بالاك حتى صافي عياو و جمعو و طواو .. و نزلو العروسة للارض ...

ابتسام : ياله ابنتي طلعي نتي و راجلك بدلو الفوق .. انا نسيفط ليك البنات يعاونوك ..
صوفيا : واخا ..
ابتسام : تا يبدل عمير على خاطرو راه حطينا ليه باليزتو عندك ... و ارتاحو شوية باش تنزلو تقطعو الݣاطو .. 
صوفيا : و و واخا ..

شد فيدها و تم طالع هو وياها للفوقي و وراهم غير زينب هازة لصوفيا لبستها باش تسهل عليها المشي و صافي ...

دخلو بجوجهم و تسدات عليهم الباب الشي لي خلا قلبها يتقبض ... كاتسمع خطواتو كايتحركو هنا و لهيه ..

عمير : جلسي مالك واقفة ؟
صوفيا : لا والو ...

جلسات فوق فراشها كاتفك فاكسسوارتها وحدة بوحدة و كاتشوف فباليزاتها لي محطوطين فالجيهة الخاوية من البيت .  مزوقين و مقادين .. و كاتشوف فالكسوة ديال العرس ديالها لي معلقة قدام عينيها من نهار جات .. و كاتشوف فيه هو كايتحرك من هنا و من هنا .. كايجبد حاجة و يجمع حاجة ..  خاصو يبدل الكوستيم  ...

عمير : نقدر نخدم الحمام !
صوفيا : اه بطبيعة الحال .. تقضل ..

دخل هو و هي بدات كاتيحد و تجمع ديكشي .. حتى كايخرج عندها لابس كومبلي فالاسود مع قاميجة بيضة و بابيون كحلة جاياه يا سلام ...

عمير : انا واجد
صوفيا : حتى انا علاين ... (ناضت جلسات قدام المرايا كاتمسح الماكياج لي تجلط) ما قلتيش ليا كيفاش قنعتي العالية .. شوفتها طيحات مني النص
عمير : (نطق ببرود) حققت ليها حلمها

🎞️#𝚏𝚕𝚊𝚜𝚑_𝚋𝚊𝚌𝚔🎞️
                                                    ⚫🎥⚪

جالسة كاتفرج فالتلفازة و تاكل فالزريعة حتى كاتسمع الدقان فالباب .. ناضت من بلاصتها مستغربة و هي كاتعقد فزيفها من اللور باش يغطي كبة الشيب لي فوق راسها ... فتحات الباب و فتحات معاه فمها .. مصدومة من شكون كاتشوفو واقف قدامها ..

العالية : و و لدي
عمير : (دوز صبعو على نيفو و نطق) نقدر ندخل ؟
العالية : (خوات ليه الطريق بحماس ) ايه ايه ... تفضل .. نهار كبير هذا لي جيتي تشوف ميمتك فيه

دخل و جلس مقابل معاها مبرد ..

عمير : منين انا كاتقولي عليا ولدك علاش لي حطيتي يديك فيد ديك الشماتة و بغيتي تخرجي للبنت على مستقبلها و عائلتها .. شنو شفتي منها من غير الخير .. فرحها من فرحي و تقلقتها كانقلقني ..
العالية : خفتك تتأذى من وراها .. شنو جا لخوك منها (خسرات سيفتها) وجه النحس .. بقات وراه تا مات
عمير : (خرج فيها نيابو .. كايهضر و كايزير على مخارج الحروف)  تعرفي بلي نقدر ندخلك للحبس و ما نعقلش عليك و ننعس مرتاح بالليل حيت نتي ما كاتعني ليا والو .. و لكن ما بغيتش ندير فعايل ولاد الحرام .. انا رباني عبيد الله راجل واخا قاصح حقاني و ما كايبغيش الظلم واخا ظلمني علمني ما نظلم حد الله يرحمو و يوسع عليه .. واخا دار شحال من بلان خايب معاي فهمت الدافع ورا داكشي .. و سمحت ليه من بعد .. (رجع اللور و غير نبرتو) و مستعد ندير معاك نفس الحاجة ايلا خليتي البنت فالتيقار
العالية : (نزلو دموعها حيت خلعها) كاتبغيها اولدي
عمير : تقدري تبعدي من طريقنا و تخليني نعيش كيف بغيت .. غريزة الام لي عندك قتليها و ديري كيما درتي نهار عطيتيني .. 
العالية : عمير ها العار اولدي انا مزاوكة ما ديرهش هكاك
عمير : نتي لي بديتي
العالية : و مستعدة نصلح غلطي ..
عمير : قبل كلشي الشماتة لي عطيتيه التصاور ! شنو عاودتي ليه ؟؟ قلتي ليه بلي حنا توام ؟
العالية : (كاتنفي براسها) لا لا هو جا عندي و سولني على علاقتي بيك ..
عمير : ايييه و شنو جاوبتي !
العالية : ما تقتش فيه نعاود ليه قلت ليه بلي كنت الدادا ديالك فكندا ..
عمير : (تبسم برضا) ايييه و من بعد
العالية : م من بعد قال ليا محتاج شي حاجة يوريها لوالديها تخليكم تتفارقو .. و ما لقيت ما احسن من تصاور الغالي يلعبو دورك .. و هذا ما كان .. كلشي درتو على ودك
عمير : (بسخرية) همم كيما عطيتني لناس ما كاتعرفيهمش ..
العالية : ها العار نسا .. راني كانتقطع و كانموت كل نهار مليون مرة بسباب هادشي
عمير : صعيب الحالة ا العالية صعييييب ... (ناض واقف)  المهم شكرا حيت تعاونتي معاي و جاوبتيني على سؤالي ... (تنهد و عصر عينيه حيت عامر بلا قياس) عفاك ايلا بغيتي نبقاو انا وياك مزيانين بعدي من ساحتها ..
العالية : (مسحات دموعها و هزهزات راسها بالايجاب)   نتا طلب و طلبك اوامر عندي .. غير غفر ليا الله يرضي عليك .. انا بغيت غير نشوفك فرحان
عمير : (بقا ساكت تا يخمم)  بغيتي تحضري لعرسي اجي مرحبا بيك .. هادشي لي نقدر ندير معاك
العالية : و شحال حلمت بهاد اللحظة .. و ربي ما غا يضيعنيش منها