عن الماضي *نصف مغلق* (بالدارجة المغربية)

#دمعة_الماضي (9)

#الجزء_09
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
❀ #عن_الماضي ⁂ #نصف_مغلق ❀

الانسان خبيث بطبعو .. كايعطي وجه و كايمشي بوجه ... شنو دار زياد شافها ناجحة كلشي عندها و مقاتلة واخا هكاك قال هادي هي الفريسة و فين نضرب ضربتي ... استهدفها طيحها فشباكو و حيت هي نية و قلبها بيض دغيا تاقت و طاحت و ولا زياد هو الاكسجين ديالها ، بكلمة يراضيها و بتبسيمة يخليها طايرة فوق السحاب ... ضحات معاه و تقاتلات و البركة لي تجمعها تخليها عندو و تقولو هادي لدواير الزمان ، و دار الزمان و عطاها بالبزيم .. كان ممكن يمشي و يخليها بلا هاد الهايلالا و الهندقة و لكن نفسو الخبيثة و ما قالت ليه ، خسر عليا ميساج

* نتي بنت الناس و لكن انا عمري بغيتك ، ربي يسخر ليك فما برك ، و اه ديك البركة لي كانت عندي بيها قاديت تكاليف سفري نمشي نبني مستقبلي و ندير علاش نرجع  .. انا غادي و ليوم طيارتي ، نتمنى منين نرجع تكوني نسيتيني و قدرتي تتجاوزي فاش حطيتك ، بقيتي عليا الخطبة الخطبة الخطبة و ها هي درتيها و لكن ما كاين عريس ، هانية تكبري و تنساي ، بسلامة عليك*
اشكال زياد منهم عدد اللهم اجرنا منهم و رغم كلشي الحياة ما كاتوقفش على شخص واحد .. كانقابلو ناس جداد و كايتخلاو علينا ناس قدام و ماشية الحياة عادي ... و دازت ليلة مظلمة على العائلة ... كل الافواه تا تمتم فيه بالله ياخد الحق ... و تستمر الحياة و ضروري ما يختفي القمر و تبان الشمس باش يصبح صباح ما كانعرفوه زين ما كانعرفوه شين ، نتوكلو على الله و مدبرها حكيم ... دازت الليلة المظلمة و تبعوها ليالي و ايام اخرى ...

✨*بعد مرور ثلت ايام*✨

✨اصبحنا و اصبح الملك لله✨

جالسين فالبيت هي و راجلها  ... باقي مكسور .. الدموع فعينيه ما قادرش يهبطهم .. متحسر على حال بناته .. و على حال عائلته لي استقرارها بين ليلة و ضحاها تهز ... حطات راسها على كتفو و هضرات ..

سهام : صافي ربي كبير .. ما تهزش الهم
جواد : بنتي تهرسات .. ديك الضحكة لي كنت نصبح و نمسي عليها غادي تبخر .. بنتي كبرات دغيا و بغات و تغدرات و انا فدار غفلون
سهام : (تنهدات و مسحات دموع عينيها) يكون خير ان شاء الله .. انا وياك خاصنا نكونو اقوياء باش نقويو ولادنا ... استغفر ربي و نوض خود ليك دوش صحصح .. انا نهبط ندير الفطور .. ما كاين لاش نديرو كنازة على شي حد ما كايسواش .. ربي ينتقم منو .. تلت ايام فاتت و حالتها تا تتحسن ، ربي يدير لي فيها الخير
جواد : امين ..

ناضت ضربات على كتافو و خرجات من بيتها ، مع فتحات الباب عطاتها ريحة القهوة ... استغربت و نزلت للكوزينة تشوف شكون فالكوزينة و هي تحل فمها ...  كانت الطبلة موجدة على حقها و طريقها و هي واقفة كاتقطع الكاشير فوق البوطاجي عاطياها بالظهر ..

كنزة : ماما صباح الخير ..
سهام : شش شكاديري هنا !
كنزة : وجدت الفطور ...
سهام : كنزة نتي لباس ا ماما
كنزة : (دارت تكمل شغالها) الا و لكن الحزن فالقلب .. شحال قدني نبقى نبكي و ندمع و انا مخشية فبيتي ... الحمدلله لي ربي بينو على حقيقته قبل ما نديرو فالطاجين ما يتحرق .. الله يحاسبو على فعاله و انا ربي يعطيني على قد نيتي ..
سهام : (قربات ليها دوزات يديها على راسها) الله يكملك بعقلك ..
كنزة : اجي جلسي انا نمشي نفيق ايمان و الياس و بابا ..
سهام : ما تخبيش فقلبك خرجي اش عندك
كنزة : ما تخافيش .. ربي عالم بحالي و عالم دوايا و ان شاء الله غادي نتشافى ...
سهام : ان شاء الله ...