عن الماضي *نصف مغلق* (بالدارجة المغربية)

احبيني بلا عقد (31)

#الفـــصــل_03
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
❀ #عن_الماضي ⁂ #نصف_مغلق ❀

عيشة : خبار الخير
ابتسام : (دموعها عشرة من العين) بنتي كاتولد .. يا ربي تفكها على خير .. اربي حبيبي لا توريني شي فيهم
عيشة : الله يفكها على خير ..

نزلات صوفيا كاتجري عندهم و عينيها منفوخين و وجها صفر  .. كانت نازلة حرق بيها الجوع تتغذا بعدندما هدن حريقها و غي فتحات الباب سمعات الغوات تفولجات ..

صوفيا : شواقع ! شنو كاين .. ماما لاش كاتبكي ؟
جمال : ساليمة طاحت .. و طرطقات ليها السقية واخا باقي عليها الحال
صوفيا : (حلات عينيها) اويلي و شنو مالها .. فينها .. البيبي ؟
جمال : ندعيو من ربي يرزقنا لي فيها الخير
صوفيا : غادي نمشي معاكم
ابتسام : سيري جمعي شب حوايج لختك و حوايج للبييي من لي شاريين حنا و لحقي علينا عفا بنتي الله يرضي عليك
صوفيا : (كاترعد و كاتبكي ) واخا واخا غي تهدني ...

خرجات ابتسام تابعة جمال كاتقاد فولارتها فالطريق .... و صوفيا مشات للبيت تا تجمع من الطرف ...

خرجات لبسات كونفيرس ديالها ، بقات ببيجامتها مع سدات باب دارهم تفكرات بلي طموبيلتها عند احسان ... جبدات التلفون تا ترعد و الدموع فعينيها و غادة باش تخرج للطريق ايلا لقات شي طاكسي تاخدها ... 
خرجات من منطقتهم و هو يوقف عليها احسان ..

صوفيا : (حلات السيارة و ركبات و هي كاتفتف) كانصوني ما كاتجاوبش
احسان : شواقع .. شنو مخرجك
صوفيا : ساليمة .. ك كاتولد
احسان : اش غادي تولد ؟
صوفيا : و طرطقات ليها السقية و ما نعرف شنو تاني ..
احسان : (دار  مارش ارير) الله يسمعنا خبار الخير
صوفيا : غي خليني انا نمشي و انت سير ترتاح
احسان : شمن راحة بقات ...
صوفيا : (هزات كتافها) و دوزني ناخد ليكوش
احسان : (شاف فيها مصدوم) راه ست اشهر
صوفيا : (كاتمسح دموعها) غا يعيش انا متأكدة ..

صونا تلفونها و هزاتو حطاتو فودنيها

صوفيا : (بصوت منغنغ) نعم ؟
مرية : (باستغراب) لاش كاتبكي ..
صوفيا : مرية ياك ختي ما غا يوقع ليها والو و البيبي حتى هو .. ياك غاديين يعيشو .. تقدر تولد فهاد الشهر ..
مرية : استغفر الله اش تا تقولي
صوفيا : ساليمة طاحت و طرطقات ليها السقية و دخلوها تولد .. ياك غا يعيش
مرية : (حلات عينيها) ياك هي مزال ما قفلات السادس .. اش تا تخربقي عليا
صوفيا : واااااا ما اقوليش ليا السادس و لا الثامن .. ياك ممكن
مرية : (تأفافات ) نتمناو من الله خير .. دعي معاها .. فينكم دابا !؟
صوفيا : عاد غاديين للكلينيك فين كنتي خدامة
مرية : هاني جايا

                                 𑁍᪥𑁍᪥𑁍᪥𑁍᪥𑁍᪥𑁍᪥𑁍᪥𑁍᪥𑁍᪥𑁍

قلبات الدورة و رجعات للكلينيك لي خلاتو فطريقها كانت عوالة على جمعية فالدار تا صدقات فكلينيك الالام ... بدايات قصتها كانت تماك و اكيد بمشيتها ليه عاوتاني غادي يزيد يغراق جرحها لي مزال ما تسد ...