عن الماضي *نصف مغلق* (بالدارجة المغربية)

أحبيني بلا عقد (48)

#الفـــصــل_03
🔏
#🅂🄰🄵🄸🅈🄰_🄽🄰🄶🄰🅃
#𝓘𝓻𝓲𝓼
❀ #عن_الماضي ⁂ #نصف_مغلق ❀

ياله كي رجعو من المول ليليا و ايلا مشاو لبيتها و صوفيا دخلات لبيتها مع عمير و تزدحات فوق الفراش ...

عمير : عييتي
صوفيا : سخفاتني
عمير : نتي دايرة ليها الخاطر بزاف .. زيري معاها شوية
صوفيا : و بلا والو كاتكرهني .. ايلا زيرت شنو ؟
عمير : و خليها تكره .. صافي انا هزيت يدي معاها البنت كانت راس ولات رجلين .. اخلاقها غير غاديين و يتبدلو  ، تا حنا غادي يخصنا نبدلو طريقة تعاملنا معاها ... منين كانقولك ا صوفيا بدلي يعني بدلي راه بنتي هاديك و ما غادي نبغي ليها غير الخير و عارفك حتى نتي ما تبغي ليها غير الحاجة الزوينة ... و من مصلحتها نزيرو معاها باش تشد الطريق
صوفيا : (نطقات من بعد تردد) ما يكونش هذا ثأتير ليليا عليها ؟
عمير : (نطق ضاحك باغي يشد فيها) نتي تاني ما كاتحمليش ليليا .. كلشي غادي يبان ليك هي السباب فيه ..
صوفيا : (داوية من نيتها) و حتى كانقول كسبتها كاتقلب عليا ... ما يمكنش البنت غير هكاك كاتبدل
عمير : (كمل بنفس نبرته) غذا بحال هاد الوقت قولي بلي ثقب الاوزون سبابو ليليا !
صوفيا : (دقاتوقلبها تسارعو و جوابو جاها قداش ) نعم ؟ شنو قصدتي ؟
عمير : لا ديال بالصح دابا و ماشي كلشي هي سبابو ا صوفيا
صوفيا : (فقصة ايلا كملها ليها) واش واعي اش كاتقول .. كيفاش كلشي هي سبابو فين عمرني قلت ليك هي دارت شي حاجة ؟
عمير : و شوفي نتي اش كاتقولي
صوفيا : و شوف نتا جوابك ؟  انو علاش ما غاديش نحملها ؟ علاش غادي نزل عليها الباطل غير هكاك من السما ؟
عمير : ما عرفتش... نتي من الاول ما تقبلتيهاش .. 

دار فتح صدايف قاميجتو و هي كاتشوف فيه كاترعد كاتحس بالسخانة طالعة معاها و الدموع تحجرو فعينيها ما راضياش بهضرتو ... ناضت وقفات مقابلة معاه و كاتشوف ليه فعينيه و كشاكشها خارجين ...

صوفيا : لا بلا ما تفهم راسك بلي حيت هي كانت صاحبتك غادي نكرهها انا ... ما عندي حتى علاقة بيك لي تخليني نكرهها و لا نبغيها ... بلا ما تعطي لراسك هاد الشرف ... انا ما كانحملهاش حيت تصرفاتها مبرهشين ...  و حيت مايعة بلا قياس و سلعة رخيصة ...
عمير : (بلع ريقو و نطق مبرد عمرو شافها معصبة لهاد الدرجة ) صافي ساليتي ... قلتي اش عندك ؟ و ارتاحي انا غادي ندخل ناخد دوش و نخرح نتفاهمو بالعقل .. هاد الغواتات ما عندهم فين يخرجونا و زايدون ماشي هادشي لي قصدت انا

تخطاها و دخل مغدد للحمام و هي عدوها لي يجاوبها ببرود .. هزات صاكها و حلات الباب و عاود ردخاتو و خرجات منيرة و الضبابة على عينيها ...  ركبات فسيارتها ديمارات و زادت ...
*******

واقف قدام المرايا من بعد ما خرح من الدوش .. لاوي الفوطة على نصو و كايشوف فوجهو و مغدد .. شاد فحرف الرخامة لي وسط منها لافابو و مزير عليها كيما مزير على سنانو و هضرتها كاتعاود ليه فراسو ... وذنيه كايصفرو و صدرو كايطلع و ينزل ...