السلام عليكم
علابالي صدمة ههه بصح عندي هدرة كبيرة ماش وقتها كي تكملو لبارت هادا ارواحو للبارت لي من وراه ونحكو بيا ✌️
قرائة ممتعة للجميع ❤️❤️❤️
______________________________________
لمحة عن الحلقات الماضية 🏁🏁
عرفنا من قبل أبطال حكايتنا يسرى و آدم لي تعرفو بطريقة غريبة جامي كانو يعرفو بعضاهم لكن القدر جمعهم و كان المكتوب أنهم يتلاقاو باه تتبنى بيناتهم قصة جميلة جدا
آدم حب يسرى من النظرة الأولى لي شافها فيها بصح ماقدرش يتلاقا بيها غير بعد مدة طويلة و كي لاقاها قرر أنو ما يتخلاش عليها
وهي بدات مشاعر الحب تتبنى في قلبها بصح مزالها تنكر مي في الاخير قدر أنو يخطبها أول خطوة باه يضمن أنها تكون ليه
عندنا نور صحبة يسرى الطفلة الغنية المتواضعة لي حبت الشخص الغلط وقدر أنو يلعب عليها وخسرها في أغلى حاجة عندها وهي شرفها ومن تم دمرت نفسيتها و تحطمت شخصيتها فيا ترى راح تكون عندها قصة أخرى ولا نن ؟
مريم الطفلة الحشامة ولي هي الصديقة الثالثة كانت تحب جارهم وليد لكن من نهار عرفت أنو عندو حبيبتو تجرح قلبها و تقاست بزاف بصح قصتها الحقيقية راهي تتكتب و مع الشخص المناسب لها ولي هو أسامة خو يسرى الإنسان العاقل و الناس ملاح
لينا أخت آدم عاشقة الشيكولا بسيف باه فرج عليها ربي هي وسي رامي تاعها هههه لي هو صاحب آدم وقدرو يجتامعو ويعترفو بالحب تاعهم لبعضاهم و يهنيونا منهم ولكن أكيد ماش راح تقعد لحياة سعيد و سعيدة لازم شوي فيلمات خخخخ
و ماننساوش رزان الشخصية الشريرة في حكايتنا هي ومراد لي يحبو يستولاو على أملاك آدم
هادي كانت لمحة على واش فات باقي الشخصيات كي نحكيو عليهم ولا نسيتوهم قولولي نفكركم بيسك أنا بعد و نسيتهم 😁😁
______________________________________
#عند آدم
بعد ما وصل الدار دخل دار دوش و بدل قشو و حط راسو على المخدة و الابتسامة ما فارقتش وجهو طول
يحس بشعور السعادة يحس روحو راهو طاير عندو مدة ما حسش بهاذ الشعور
رفد تلفونو و عيط ليسرى أكيد ماش راح يرقد بلا ما يسمع صوتها و يقلقها شوي 😉
# عند يسرى
بدلو لبنات قشهم و نحاو لمكياج وهوما غير الضحك و التمسخير
نور : منعنا اليوم من بشماق لامية
مريم وهي تمشط في شعرها في المراية : ياختي و حنا علاه كنا راح نروحو في الرجلين برك لحمارة هاديك هي السبة
دارت ليها يسرى و رمات عليها لمخدة : بلعي نتي كنتي شاهدة على الجريمة و ما هدرتي والو تسما حتى نتي من المشتبه بهم
نور و هي تحط راسها على المخدة : ها بركاينا من الفيلمات تاعك قلنا نتي سي نتي و هششششششت ما تهدريش
يسرى عوجت فمها : هاكا تسما وليتو كامل عل...
وقطع هدرتها تلفونها كي صونا شافت معاه شوي ومنبعد هزاتو و دارت لبنات تهدر و تبدل في صوتها : اسمحيلي ختي أنا وليت إنسانة مختوشبة و مانهدرش مع لغاشي كل و ديجا ختشيبي راهو يعيط لازمني نرفد عليها ايا تشاو
وطيشتلهم بوسة في الهواء و خرجت للبالكون 😂
مريم : اي دا يا ختي دي البنت تغيرت خالص جرالها ايه 😲
نور : معرفش والله دي مالهاش ساعة بس من انخطبت اومال لما تتجوز تنسانا نهائي
(واش رايكم بلهجتي المصرية 😂😂)
من بعد شافو مع بعضاهم و طرطقو بالضحك
نور & مريم : ههههههههه
عند يسرى خرجت للبالكون و قفلت الباب باه مايسمعوهاش
وبقات تشوف مع التلفون و متردةة : يا ربي نهز ولا منهزش نهز و لا مانهزش واش نهدر و واش نقول بعد الشي لي درتو بفففف هو تاني وجهو صحيح و يزيد يعيط على الأقل خليني نفهم روحي و نريڨل لخيوط في مخي ومنبعد ساهل
حبس التلفون مابقاش يصوني فرحت هي وتنهدت : الحمد لله يا ربي استجبت لدعائي 😁
و يرن الهاتف للمرة الثانية و قلب يسرى يخبط للمرة الألف
يسرى : عاااااا بلعقل بلعقل لازم نتكالما ياخي أنا مادرت والو هيا هيا كوراج أنت شجاعة يا يسرى تستطيعين فعلها نعم
رفدت عليه
آدم : واش ا لآلة عام باه ترفدي واش تفاهمنا
يسرى تلعبها سيريو : السلام عليكم كيف لحال بخير؟
آدم حاكمة الضحكة علابالو علاه راهي تبدل في الهدرة ايا ريڨل صوتو و هدر بحدة : يسرىىىىى
يسرى تخلعت من نبرة صوتو : هااا واش غير لخير شبيك تعيط أهدر بعقلك اووو
آدم تبسم : هاكا من نهار لول قوليلي راكي تمشي بالشبح
يسرى : ايا تشوف قادر روحك احم احم اهاه علاه عيطت كشما تسحق ؟
آدم : نسحق نسمع صوت حبيبتي و مرتي و أم ولادي إنشاء الله
يسرى خدودها طلعو حومر و مالقاتش واش تهدر : أحم اه ا... أنا ...
أدم عجبو لحال كي تسكت و ماتلقاش واش تهدر : ياخي مافيها والو واحد يحكي مع خطيبتو حتى والديك و علابالهم ضرك سي ديجا توحشتك و مانقدرش نرقد بلا صوتك
يسرى زادو لخيوط تخلطولها خلاص حتى راح تريسيتي ( ما ديروش على التعبير علابالي بروحي 😂)
:واش ...ا ..
آدم ماقدرش يحكم روحو كثر من هاك و طرطق بالضحك : هههههههههه علابالك حاجة تولي تهبلي كي تروحلك الهدرة
يسرى هو زاد ضحك و هي خرجت من لعالم هادا و راحت لعالم واحد آخر خلاص وين راهي غير تسمع في صوتو و ضحكتو حاجة في قلبها تتحرك و البسمة تترسم على وجهها لا إراديا
ولكن فجأة ضرب ماس في رأسها و فاقت مع روحها و هدرت بالغش ماش حابة تعلي صوتها بزاف باه مايسمعوهاش : شوف يا آدم يا ... مانعرف واش راح يقول فمي نتا عدت ما تحشمش على روحك و ...
منبعد بدى تخمام ليهود يحتل مخها
يسرى ذبلت في صوتها و دارت هاديك النبرة تاع وحدة مظلومة و بريئة ( علابالي راكم فهمتو ) : نتا تتمسخر بيا هاكا معلش صاي زعفت منك ماتزيدش تحكي معايا
آدم قلبو ضرو ما قدرش يشوفها تحكي هاكا رد بلهفة : خلاص حبيبتي ماقصديش نزعفك مني واش تحبي نديرلك باه تولي تحكي معايا
يسرى ضحكت بلعقل كانت طريقة فعالة و فجأة رجعت لشخصيتها تاع الصح : شوف بما أنك خطيبي ماش راح نطلب منك حوايج بزاف باه مانبانش نبروفيتي زعما اك فاهم حابة نروحو لبلاصة
آدم قعد متشوكي : هههه والله غير نتوما لبنات نعيا نفهمكم عندكم واحد التخمام كل دقيقة بعقلية مي واش تحب لامور تاعي نديرلها وين تحبي نروحو
يسرى : أحم هههههه خلي غدوة و نقلك
آدم : ههههه أوكي
يسرى : أصبر بصح قبل لازم دير حاجة لا لا حوايج
آدم. : لي هوما
يسرى : أولا لازمك تسقسي بابا
آدم : ساهلة زيدي
يسرى : بابابا كلش عندك ساهل المهم ثانيا لازمك تجيب معاك لماكلة لا مجبتهاش غير مكلاه تجي بيسك لبلاصة شوي بعيدة و انا كما تعرف نحتاج ناكل باه نقدر نكمل
آدم ضحك : ههههه حياتك كامل تهدري غير على لماكلة ما يكون غير خاطرك
يسرى : هاو لازم و ثالث حاجة لازمك تلبس لحاجة لي نبغيها أنا وما تقولش لا لا و علابالي معندكش لحاجة هادي في خزانتك تسما كي تنوض روح سع شريها
آدم بتعجب : واش هي ؟
يسرى واحد التخمام يدور في راسها : خلي غدوا ونقلك ههههه
آدم : بديتي تخلعيني
يسرى : ماتخلع ما والو علابالي لبلاصة راح تعجبك هههه
آدم : اوكي واش تحبي نجيبلك علابالي كرشك كبيرة
يسرى : بركا من التطياح ما نسمحلكش تحكي على كرشي بمانسبة لماكلة تشوف جربت هاديك النهار واحد الأكلة هاك عجيبة غريبة ........
أنت تقرأ
نتي المَلكْ ديالي أنا (باللهجة الجزائرية )
Short Storyرواية باللهجة الجزائرية حاتلقاو فيها حوايج بزاف حب و ضحك وتمهبيل وتملك وغيرهم و كاينين شخصيات بزاف كل واحد وقصتو فيها بعض من الواقع الجزائري 🤗 حايعيشوا أحداث بزاف مشوقة وحماسية 👍👨👩👦👦 هل راح تكون نهاية سعيدة ؟ 👌 هذا الشيئ نخليكم أنتم تقر...
