سلام لبنات واش حوالكم 🤗
لبارت هادا في خاطرة كامل لبنوتات العسولات لي شجعوني في البارت الأول 😍💓
قرائة ممتعة للجميع 👇👇
#########
اليوم راح نحكيو على البطل تاعنا
صونالو التلفون وهو كان راقد رفد بلا ما يشوف
..: ألو وي ؟
رامي : واش يا سي آدم ماكش ناوي تجي للخدمة اليوم 😁
آدم بصوت بارد : كي كنت لبارح أنا ساهر خدام نتا كنت تبني في القصور (قصدو كان راقد ويحلم 😁)
رامي : هههه هدرنا ولصقنا المهم راني نستنى فيك في الشركة
غلق آدم التلفون بلا ميردلو ناض دار دوش خفيف ولبس الكوستيم النوار لباس رسمي للخدمة لبس ساعتو دار لبارفان تاعو هاديك لي تشمها على بعد مترتين 😁 ونزل للتحت بهدوء يحسد عليه
لقا العايلة راهي قاعدة تفطر قعد حتى هو في بلاصتو وقال : صباح الخير
ردو كامل ماعدا باباه ماعبروش خلاص
سعاد (الأم ) : علاه يا ولدي مزدتش رقدت شوي راك تبان عيان
إبتسم شبه إبتسامة لي قليل وين تظهر وسلم على يد أمو وقالها : عيطولي من الشركة راه عندي خدمة
مراد (الأب ) بسخرية : امم باينة خدمة
آدم حكم في روحو بسيف ماش حاب يدير لمشاكل على صباح ربي
نطق أمين (الأخ ) كالعادة يلطف الجو : ههه يا جماعة ماكمش تلاحظو في حاجة جديدة هنا ؟
لينا (الأخت ) : أنا راني نلاحظ في جرد قاعد يفطر معانا 😏
أمين : بلعي بلعي نتي normalement راكي فرحانة ليوم كي خوك لكبير راو قاعد يفطر معاكم (قصدو عليه هو 😁)
لينا : يكبر الطيحان في كرشك إنشاء الله
أمين : شوف ا سيدي البينازة هادي ولات ترد الهدرة
لينا بتشناف : ماما شوفي ليه 👿
سعاد : أمين خلي ختك صغيرة
مراد بقلقة : أيا صاي بركاونا من لعب الدر تعكم هادا
ومنبعد ناض خرج وخلاهم
آدم : كملو فطوركم
كملو فطورهم وآدم هز بورتابلو ومفاتحو وسلم على راس الأم نتاعو وخرج
سعاد في قلبها : ربي يفرح قلبك يا وليدي ويلاقيك بالطفلة لي تسعدك وتريحك
(بانتلي اليوم الدعوة تاعها حاتثبت 😁)
أمين : يما أنا نروح نضرب طلة على الجامعة
سعاد : روح برك تقرا نتا لازملك نديرلك نهار فيه يومين على القراية هادي لي مخليها
لينا : ههههههههه
أمين بزعاف : هكدا يما تخلي العديان يشفاو فيا (يخزر للينا ) تسما أنا ماش عبد
أنت تقرأ
نتي المَلكْ ديالي أنا (باللهجة الجزائرية )
Short Storyرواية باللهجة الجزائرية حاتلقاو فيها حوايج بزاف حب و ضحك وتمهبيل وتملك وغيرهم و كاينين شخصيات بزاف كل واحد وقصتو فيها بعض من الواقع الجزائري 🤗 حايعيشوا أحداث بزاف مشوقة وحماسية 👍👨👩👦👦 هل راح تكون نهاية سعيدة ؟ 👌 هذا الشيئ نخليكم أنتم تقر...
