سلاااام هادي غيبة وينكم عدتو ماتبانوش 🤣🤣
بعد ماتعرضت للتهديد جيت نكمل 😁
قراءة ممتعة للجميع 👇
✔️✔️✔️✔️✔️✔️✔️✔️✔️✔️✔️✔️✔️✔️
#ايطاليا
#الساعة 22:45
واقفين في ثلاثة في بلاصة يتشاورو على الخطة قبل تنفيذها
حاطين خريطة البلاصة لي راح يروحولها فوق الطموبيل ودايرين بيها
فهد وهو يشوف مع لخريطة : علاه حاس انو البلاصة فيها حاجة غالطة
آدم : المهمة هادي لي جات بالزربة بلا خطط مسبقة ماطمنش
سيلفيا : شوفو جماعة مالڨري لمعلومات لي وصلونا على المهمة هادي قليلة بصح لجنرال قال لازم ليوم قبل غدوة وهذا على حساب المصادر تاعو
آدم : ممكن مصادر مغلوطة ؟
فهد : مانظنش
سيلفيا : هي على كل حال حنا لازم نروحو ونتأكدو تما
فهد : مالڨري حتى لمعلومات على رايس هاد الخدمة مكانش
آدم : نتكلو على ربي
تفرقو آدم ركب في طموبيل وهوما بلي موتار تاوعهم
وصلو للبلاصة لي لازم يروحو ليها
وقفو بقاو مصدومين بيسك الشي لي شافوه خالف كل توقعاتهم
✔️✔️✔️✔️✔️✔️✔️✔️✔️✔️✔️✔️✔️✔️
#الجزائر
#الساعة 20:35
أسامة & مريم
قاعد في لاشمبر تاعو حاط لبيسي ويريڨل في أمور الخدمة
حتى صونالو التلفون شوي هاكا وحبس
رفدو لقاها السكريتيرة تاعو هدى (لا شفيتو عليها )
أستغرب هو من اتصالها هذا الوقت ولأول مرة
مي ماترردش وعاودلها
صونا تلفون شوي ورفدت
مع قال آلو تفتح لباب ودخلت مريم شافاتو يحكي في التلفون سكتت بيسك كانت حاتهدر باش تخليه يحكي براحتو بيسك ماتستغربش تلفونو ديما يصوني من لخدمة
راحت لخزانة وقاعدة تريڨل في القش
أسامة : الو
هدى بصوت رقيق : الو وي
أسامة : أنعم هدى لقيتك عيطتيلي
سمعت مريم بالاسم حطت كلش من يدها ودارت تخزر فيه
هدى بحشمة: اسمحلي ميسيو أسامة كنت نحوس على نيميرو تاع واحد من لافامي وعيطتلك غلطة والله ديزولي
أسامة : معلش ماصرا والو أنا قلت كشما تحتاجي
هدى: لالا ميسيو يعطيك الصحة
أسامة : مالا نخليك على خير
هدى بزربة : غدوا تجي ؟ ...احم قصدي إذا جاي غدوا نريڨلك مواعديك ...بيسك ماقتليش قبل ماتخرج
أسامة : لالا غدوا مانيش جاي عندي خدمة بصح ممكن نفوت من تم الساعة لخرة كالعادة
هدى حست بفرحة كي راح يجي : اوك ميسيو نخليك على خير مالا
أسامة : وانتي من أهلو
كوبا لابال ورجع غرس راسو مع البيسي وهذا كل تحت عينين مريم
قدمت قعدت قدامو : معامن كنت تحكي
رفد راسو : مريومتي راكي هنا والله ماشفتك
طلعتلو حاجبها
قدم عنقها وباسها من خدها
أسامة : توحشتك علبالك
بعدت عليه وقاتلو بكل جدية: ماقتليش شكون هدى هادي
أسامة : نسيتي بعد هذي السكريتيرة تاعي ياك قتلك عليها
مريم : بصح ماقتليش بلي تعيط لوقت هادا
أسامة : وآش فيها مريومة الطفلة غلطت برك وزيد (حكملها نيفها ) علاش الغيرة هادي كل
مريم : مي نتا راك تحكي معاها تقول مداصرها
أسامة : يا حبي يا عمري تعرفيني أنا كيفاه نتعامل مع الموظفين تاعي في الشركة وزيد الطفلة يتيمة ومسكينة يعني بلا لغيرة الزايدة هادي لي تجيب المشاكل على حاجة تافهة
شافت معاه وهي تغلي من لداخل بصح خلات ملامحها باردة وقاتلو : اوك
أنت تقرأ
نتي المَلكْ ديالي أنا (باللهجة الجزائرية )
Short Storyرواية باللهجة الجزائرية حاتلقاو فيها حوايج بزاف حب و ضحك وتمهبيل وتملك وغيرهم و كاينين شخصيات بزاف كل واحد وقصتو فيها بعض من الواقع الجزائري 🤗 حايعيشوا أحداث بزاف مشوقة وحماسية 👍👨👩👦👦 هل راح تكون نهاية سعيدة ؟ 👌 هذا الشيئ نخليكم أنتم تقر...
