عاد أسامه إلى منزله و هو في حالة يرثى لها ، رأته والدته و أسرعت إليه عندما رأته في هذه الحاله من الصمت و الامبالاه و كانت تعلم أنه ذهب للقاء يارا و أعترافه لها بحبه ، وقفت أمامه وجدت وجهه لا يُفسر ولا تعرف ماذا حدث في لقائه مع يارا و ماذا قالت هي له لكي يعود إلى المنزل و هو في هذه الحاله فسألته قائله :
_ مالك يا حبيبي وشك أصفر كده ليه ؟
جاءها صمت من أسامه فتابعت هي قائله :
_ هي يارا قالتلك أيه بالظبط ؟
جاوب أسامه وهو يحبس دموعه :
_ رفضتني يا ماما ، قالتلي أنها مش مستعده نفسياً أنها تدخل أي علاقه تاني بعد اللي الكلب إيهاب عمله فيها .
قالت رجاء في غضب :
_ أما معندناش ذوق فعلاً ، أزاي ترفض واحد زيك ، معندهاش نظر دي ولا أيه ؟
أسامه بوهن : متظلميهاش يا ماما هي ضحية اللي حصل فيها من سنين مهو مش قليل برضوا اللي مرت بيه .
رجاء في حنق : و أيه يعني اللي كان حصل فيها ؟ واحد ضحك عليها بكلمتين خايببن و هي صدقته عشان هبله و أديته كليتها و هو واطي و مصانهاش ولا قدر اللي عملته عشانه و طلع ندل و بعدها أتطلقت منه و خلص الموضوع ، ذنبك أيه أنت بقا في اللي حصل ده ، ده بدل ما تحمد ربنا أن بعتلها العوض اللي بيحبها و هيسعدها و يشلها جوه عينه تقوم ترفضك .
أسامه في ضيق من طريقة والدته في الحديث عن يارا :
_اللي حصلها جابلها عقده يا ماما و دي مش حاجه سهله أن يمر بيها أي شخص و يعدي منها بالسهوله دي ، دي محتاجه علاج نفسي و بيئه نفسيه سليمه عشان تقدر تتعالج من اللي هي فيه ده ، هي عندها فوبيا يا ماما من دخول أي علاقه حتى لو كانت عارفه و متأكده أن الشخص ده مش زي الباقي برضوا هيفضل صعب عليها أنها تتخطى كل ده و تنساه كده عادي .
_ هي كان المفروض تعرف أنها مينفعش تضحي بكليتها عشان راجل ، و بعدين هي متعلمتش من سميه الخشاب و أحمد سعد ولا أيه ؟ دول بقوا عبره لأي حد يفكر يتجوز أصلاً .
_يا ماما الموضوع مش موضوع كليه ، الموضوع أكبر من كده بكتير ، هي كانت بتحبه جداً و كان بالنسبه ليها كل حاجه حلوه في حياتها و مكنتش تتوقع أنه يغدر بيها في يوم من الأيام .
_ يبقى كان المفروض تتعلم بقا و تاخد درس و تعرف أن ما أفسده الرجال يصلحه الرجال الأخرى .
أسامه بسخريه : مهي فعلاً خدت الدرس و أتعلمت منه أنها متدخلش في أي علاقه تاني و متثقش في حد ، بس على العموم أنا مش هسيبها ولا هستسلم أنا هفضل وراها لحد ما تتعالج و تبقى كويسه و تعرف أن أنا غير الحيوان اللي أسمه إيهاب .
رجاء بغضب : و أنت لسه هتضيع وقت تاني و مجهود عشانها كمان ؟
_أومال عايزاني أتخلى عنها بالسهوله دي كده ؟
_أيوه زي ما هي رفضتك أنت كمان تنساها و تشوف حياتك و مستقبلك و مستقبل شركة أبوك اللي هو أستأمنك عليها هي و فلوسه و تكبرها عشان تثبتله أنك قد المسؤوليه اللي هو أدهالك بعد ما بقى ميقدرش يشتغل بسبب الحادثه اللي عملها زمان و أتسببت في أنه يقطع رجله .
_ هو الموضوع سهل أوي كده يعني ؟ بالبساطه دي أنساها و أحب غيرها عادي .
_كل حاجه سهله بس أنت اللي مكبر الموضوع .
أسامه بإصرار : أسمعي يا ماما أنا مش عايز غير يارا ومش هتجوز غيرها و هي كبرت في دماغي بقا .
_________________
خرج حمزه من الغرفه بعدما أخذ الحقنه و هو يسير بتعرج من تأثير الحقنه و هو يقول :
_ أه ياني يا صغير على الوجع و الحقن يا حمزه روح يا شيخ ألهي ينتقم منك يا بعيد أنت ورهف اللي فرحانه فيا دي .
