Unicode
ပုန်ကန်ခြင်းတွင် ပီယံမိတ်ပါဝင်လာခြင်း
__________________
" အရှင့်သား...ကျွန်ုပ်တို့ကို မင်းကြီးဘရဏသူတပ်က လာတိုက်နေပါပြီ။ အရှင့်သားကိုမတွေ့လို့ လောလောဆယ် တပ်မှူးသုန္ဒရီဟာ ခံစစ်ကို အမြန်အဆန်စီစဉ်ဆောင်ရွက်နေပါတယ်"
ထိုစကားကိုကြားကြားချင်း အရုဏ၏စိမ်းမြသောမျက်ဝန်းများသည် မာကြောကာ တင်းမာသွား၏။ တည်နေသော အညိုရောင် မျက်နှာထက်တွင် ပြင်းပြလာသော ရဲသွေးများနှင့်အတူ အာရုံစူးစိုက်ခြင်းဟာလည်း အပြည့်အဝတောက်လောင်လာသည်။
သူသည် ချက်ချင်းအသင့်အနေအထားသို့ ပြင်သွားပြီး တောထဲသို့သွားစဉ်က ကျားရဲအန္တရာယ်နှင့် မထင်မှတ်ထားသောအန္တရာယ်များမှ ကာကွယ်ရန်အလို့ငှါ သယ်ဆောင်သွားသည့် သူ၏လက်နက်ကို ခါးကြားမှ ထုတ်ကိုင်လိုက်သည်။
သူ ခလုတ်ကိုနှိပ်လိုက်သည်။ ထိုအခါ အနှီလက်တစ်ထွာခန့်အရွယ်ရှိ ငွေရောင်တုတ်ချောင်းမှာ ချက်ချင်းရှည်ထွက်လာကာ ထက်ရှသောဓားအသွားသည်လည်း အစွန်းနှစ်ဖက်၌ ပြန့်ကားလာသည်။
ထို့နောက် အရုဏ အရှေ့ကနေ မြန်ဆန်စွာထွက်ခွာသွားသည်။
ထို့ကြောင့် စစ်သည်နှင့် ယုဂန်သည်လည်း အရုဏအနောက်မှ ကမန်းကတန်းပြေးလိုက်သွားကြသည်။
တိုက်ပွဲသည်ကား ရွာကိုပတ်လည်ဝိုင်းကာ ကာရံထားသော ခံတပ်ပြင်ပ၌ ဖြစ်ပွားနေခြင်းဖြစ်သည်။ အနှီ အမျှော်အမြင်ရှိစွာ ဆောက်လုပ်ပြီးစီးခဲ့သော ခံတပ်သည် တခြားသော ခံတပ်များနှင့်မတူညီဘဲ တည်ဆောက်ပုံမှာ ဉာဏ်နှင့်ယှဉ်ပြီး အဆင့်မြှင့်ထားသည်ဖြစ်ရာ သာမန်ထက်ပို၍ တောင့်တင်းခိုင်မာလှသည်။ ခိုင်မာမှုကိုထပ်ဆင့်၍ စစ်သည်နေရာချထားခြင်းနှင့် လက်နက်များကို ထိရောက်သည့်နေရာတွင် တပ်ဆင်ထားခြင်းကလည်း ရန်သူများကိုဖောက်၍မရအောင် ကာရံထားနိုင်သည်။
မိမိတို့ကို လာ၍တိုက်ခိုက်သော မင်းကြီး၏ တပ်ဖွဲ့သည် အင်အားသိပ်မကြီးလှဘဲ စနည်းနာရန် ရှေ့ပြေးလွှတ်လိုက်သော တပ်ဖွဲ့နှင့်ပိုတူသည်။ တစ်နည်းအားဖြင့် အရုဏ၏တည်နေရာကိုသိသွားသဖြင့် အကဲလာစမ်းခြင်းသာ။ နောက်မှ အရုဏကိုအမိဖမ်းနိုင်ရန် အကူတပ်ဖွဲ့အင်အားများ လွှတ်ပေးလာမည့်သဏ္ဌာန်ရှိသည်။
YOU ARE READING
The Everlasting One (volume 2 + 3 )
FantasyStart Date : 24.11.2021 End Date : 1.4.2024 Unicode ဥတ္တရနိုင်ငံရဲ့ မင်းသားအရုဏဟာ သူ့ချစ်သူ ယုဂန်နိုင်နဲ့အတူ ပျော်ပျော်ရွှင်ရွှင်နေထိုင်သွားဖို့ပဲ ဆန္ဒရှိခဲ့တယ်။ ဒါပေမဲ့ မထင်မှတ်ထားတဲ့အရာတွေ သူတို့နှစ်ဦးဆီ ရောက်ရှိလာတဲ့အခါ.... ယုဂန်ကိုလက်တွဲပြီး သူက...
