The Everlasting One (volume 2 + 3 )

Chapter : 152

Warning : သွေးထွက်သံယိုတွေ ပါပါမယ်။

Unicode

ပြင်းထန်လွန်းသော သတ်ဖြတ်ပွဲ

____________________

စုန်းမကိဏီ​၏အသံကြောင့် နရတ်အနောက်သို့ ဆတ်ခနဲလှည့်ကြည့်သည်။ တစ်ပြိုင်နက်တည်းပင် သူ​၏လက်ဖဝါးမှ စွမ်းအားများက စုန်းမကိဏီကို တိုက်ခိုက်သည်။ ကိဏီသည် ပေါ့ပါးသွက်လက်စွာရှောင်ရှားနိုင်လိုက်​၏။ သူမက ဘာမှမဖြစ်သည့်နှယ် ပြုံးယောင်ယောင်တောင်သမ်းပြလိုက်သေးသည်။

" မင်းတို့ရဲ့ အချိန်ကူးသန်းပေါက်က ဘယ်တော့မှမဖြစ်လာစေရဘူး"

နရတ် အံကြိတ်၍ဆိုသည်။ ထိုအခါ ကိဏီိက ကျယ်လောင်စွာ အော်ရယ်သည်။ သူမ​၏ရယ်သံတွင် လှောင်ပြောင်သရော်ဟန်နှင့် မကောင်းဆိုးဝါးတစ်ကောင်ဟန် အပြည့်ပါဝင်နေသည်။

" ဘာလို့ သူရဲကောင်းယောင် ဆောင်တဲ့စကားတွေ ပြောနေတာတုံး။ ကျွန်ုပ်တို့ရဲ့အခုလုပ်ရပ်တွေ အကုန်လုံးက အတိတ်ဘဝမှာ သင် လုပ်ခဲ့တာတွေချည်းပဲလေ။ အခုကျမှလာပြီး တားဆီးမယ်လေး ဘာလေးနဲ့။ သင်ကမှ တကယ် ကြောင်သူတော် ကြွက်သူခိုးပဲ"

နရတ်​၏မျက်လုံးတို့ နက်မှောင်သွားသည်။ ကိဏီ သူ​၏အတိတ်ဘဝအကြောင်း သိရှိနေခြင်းမှာ သူ့အတွက် မည်သည့်ကောင်းကျိုးမှမရှိနေချေ။

" ငါ ပြန်ဝင်စားခဲ့တာကို မင်းသိတယ်?"

ကိဏီက နှုတ်ခမ်းထောင့်စွန်းတစ်ဖက်တည်း ကွေးရုံမျှ   ညုတုတုဆန်စွာပြုံးကာ တစ်ဖက်လူကို ဒေါသမထွက်ထွက်အောင် လှုံ့ဆော်နိုင်သော မထိတထိ၊ မထီမဲ့မြင် အမူအရာဖြင့် သရော်ဟန်ဆိုလာသည်။

" မင်းယောဇာက အဲ့ကိစ္စကို မရိပ်မိလောက်ဘူးလို့ သင်ထင်နေတာလား။ ကျွန်ုပ်တို့အစကတည်းက သင်ပြန်ဝင်စားတဲ့ကိစ္စတွေအားလုံးကို ခန့်မှန်းမိထားပါ့။ မင်းယောဇာက အတိတ်တုန်းက သင်ဘာတွေလုပ်ခဲ့လဲဆိုတာကအစ ပြောပြထားတယ်။ သင်နဲ့အရုဏနဲ့ပေါင်းပြီး တွင်းပေါက်ဖွင့်ဖို့ကြိုးစားကြတယ်ဆို....တွင်းပေါက်ဖွင့်တဲ့နေရာက ကျွန်ုပ်တို့နဲ့ မတူပေမဲ့ တွင်းပေါက်ဖွင့်ဖို့လိုအပ်တဲ့ လူပေါင်း ၇သန်း ၇ သိန်း ၇ သောင်း၇ ထောင်ကိုတော့ သတ်ခဲ့ကြတယ်မဟုတ်လား...