# وقفت قدام التلفزيون في بيت عمها بتستمع لمؤتمر الشهادة السودانيه ،،،ماسكة تلفون جدها منتظرة رسالة النتيجة ،،، جاها صوت مراه عمها بتهكم و سخرية : البشوف وقفتك من دغش الرحمن في وشي بقول اولة البلد و زاتك كان جيتي اولة البلد و لا طيشها ما نهايتك اوضة في بيت عمك حامد يا بت بدرية !
لترد عليها مراة عمها التانية و هي بتقول : خليها يا منال اختي دي عايزة تقرأ و تتعلم و باااكر تلقوها بقت زي بنات البندر ديل!
سكتت و ما ردت اتعودت على كلامهم ده ،،، مرت دقيقة و التانية و اهتز التلفون بصوت رسالة لتفتحها بلهفة و تلقى نتيجتها نجاح بنسبة 84.9 بكت و سجدت تشكر ربها و هي بتقول الحمدلله الحمدلله و قبل توضح لنسوان اعمامها شي طلعت تبشر جدها منصفها الوحيد في بيت الاسرة الكبير ده.
لوت منال خشمها (مراة العم الكبير) و وجهت كلامها لعديلتها القاعدة قدامها و قالت : شايفة بت بدرية جرت كيفن لجدها!! اصلوو هو بالحييييل عليها و قريب ده نسمع بيهو سفرها للجامعة!
اجابتها روضة ( مراة العم الوسطاني) : صحي كلامك الا عاد عمي ما خرف عشان يفتح سكة الجامعات دي للبنات ،، لو قراها معناتها بتي سارة زاتها تقرأ و تمشي البندر بت بدرية احسن منها في شنوو كماا
قاطعتها منال بحدة و هي بتقول : جنيتي يا بت عمي و لا مالك؟! ساره بتك شنو البتقرا ليها جامعة!! سارة دي مراة ولدي تعرسو و تمسك بيتها و اولادها ما عندنا بنات بقرن!
\=ما قلنا شي يا منال يا اختي الا لكن وينه ولدك ده!!! الناقصو شنو عشان ما يجي يعرس!! سارة زاتها باقية عليهو و عارفة البت ما ليها غير بيتها و شوفتيها زاتها ما شغالة كتير بالنتيجة و من الدغش فاتت لحبوبتها تسلم عليها.
\_هشام ما ناقصو شي و امبارح دي كان بتكلم مع ابوه انه جاي قريب عشان كده ولعي حفرة بتك و اتجهزي!
هزت روضة راسها بسكات و تابعت بهدوء و حذر : سمعت أميرة جاية باكر بتها تمت الاربعين خلاص!.
لوت منال خشمها و قالت : كفانا شرها الله!! سمعتها من امس بتتكلم مع عثمان و هو بقول ليها تنوري بيتك تنوري مطرحك! البشوفو مدلوق فيها كده ما بقول عرسوها ليهو غصب و هي ارملة اخوه الكان رافض اخوه يعرسها زاتو!
هزت راسها روضة في سكات و قالت : بتتمسكن ليه عشان كده!
عاينت ليها منال بنظرة تفحصية و ما علقت.
\_\_\_\_\_\_\_\_\_\_\_\_\_\_HMZ\_\_\_\_\_\_\_
