_______________
شمس الصباح بدت تعلن عن ظهورها و اتسللت اشعتها الدهبية لبيت الحج مضوي الكان واقف بتابع ضبح البهيمة احتفالاً برجوع احفاده التلاتة من الغربة ,, في نفس اللحظة كانت النسوان برمن الزلابية و بجهزن شاي الصباح.
انتفضت منال و هي بتقول وينن بناتكن يا اميرة و روضة؟! و لوت خشمها بتهكم و تابعت : بناتي من اللذان الاول كنّسن البيوت و جهزوها للضيافة
جاوبتها روضة بقلة حيلة و قالت : يا منال نحن ما عرفنا في كرامة الا الصبح ده و البنات صحيتن و طلعت..... يتسوكن و يجوا يساعدن اخواتن!
اضافت اميرة بعدم مبالاة : بسمة صحيتها و كلمتها تمشي تساعد خديجة عشان يحموا حبوبتهم و يطلعوها بجاي.!
دخل عليهم احمد و هشام بصبحوا و قعدوا ليضيف هشام بمرح : يا سلاااام يااا خالتي روضة ! ما بتعرفي اشتقت لريحة زلابيتك دي كيف! الله يقطع الغربة و سنينها ياخ!
عاينت ليه منال بعدم رضا و قالت : من متين الرجال عندنا بجوا المطبخ و بجلسوا زي جلستكم دي!!! و لا خلاص الغربة نستكم اصولكم!
جاوبها هشام : يا يمة مالك اسي؟! ابوي مضوي هو زاتو القال لينا امشوا صبحوا على امهاتكم عشان ما بقدروا يجوكم في ديوان الرجال
هزت منال راسها بتفهم و اضافت : وينه سيف طيب!
جاوبها احمد : قال بلحقنا عشان نمشي نسلم على حبوبة عايدة!
جاوبتهم اميرة : خديجة و بسمة حيطلعوها اسي هنا.
ليدخل سيف و هو بسمع اسم خديجة و عينو تلقائيا تتجه للحوش البودي لبيت جدو!
بعد مرور لحظات.
وقفت بسمة و هي بتعاين لخديجة الكانت بتعدل لحبوبتها التوب و قالت بمشاكسة : حلاااوة يا بت يا عايدة!
عايدة ابتسمت بتعب و مدت يدها ليها عشان يسندوها الاتنين و اثناء ما هم طالعين انضمت ليهم ندى و هي بتقول :
_ابوي مضوي شكلو عازم الحلة كلها !!! الليلة الله يقدرنا على الشغل بس!.
بسمة : فرحان باولادو ليهم سنين متغربين .. اتنهدت بحزن و تابعت : ياريت لو عاصم اخوي جاء معاهم كمان كان فرحتنا اكتملت!
ردت ندى : انا شوية و ح انسى اصلا انه عندي ود عم اسمو عاصم !! بعد ده دي سنتو التاسعة في بلد الكفار ديك!
