بعد اسبوع..،،، كان سيف قاعد في صفرة المطبخ متابع بشغف خديجة البتخلط في عصير ،،، قال ليها : فضل لينا الفرن و البوتجاز ،، كنت عايز اجيبه بدري بس قلت حتقولي عايزة تطبخي و تشتغلي فأخرته ،،عاينت ليه خديجة و قالت : صدق انا مبسوطة و حاتبسط اكتر لو انا الطبخت ليك! قال ليها : اممم عارفك بس انا كمان من حقي ادلعك صاح!، خجلت و دنقرت رأسها ،، كبت العصير و قعدت قصاده ، ،عاين ليها و قال : فكرت بعد الفطور نمشي نشتري طقم جلوس! بعد شوية الجيران حيفقدونا ،، قالت ليه ممكن.
قال ليها : و لا نخليه بعد نمشي البلدو نرجع! ،،قالت ليه : ممكن نخليه ،، عاين ليها باستغراب فردت بسرعة : البتشوفه ويريحك بس!.
قام من الكرسي و جا جنبها اتكل على الطربيزه و انحنى عليها و قال : انا عايزك تناقشيني!
عاينت ليه ببلاهة فرد : شوفي يا خديجة ،، انتي من حقك تقولي رأيك و تدي و تاخدي في الكلام! الطاعة المطلقة للزوج الفهموها ليك في البلد ما صحيحة مية في المية! صح حقه عليك ان تطيعيهو بس كمان هو من حقه يسمعك! ما اي شي يقولوا تقولي حاضر تمام اوك،، دي بتقوليها لمن تكوني عايزة تطلعي و تكلميه و يرفض هنا لازم تسمعيه و قيسي على كده من الامور دي. لكن في امور تانية لازم توري فيها انك عندك كلمه و شخصية و ما أله بحرك فيها يمين و شمال!.
انا اسي سألتك عايزة نشتري العفش اسي و لا بعد نرجع من البلد ،، انت فكري و ردي عايزاهو اسي عشان كذه او عايزاه بعد نرجع عشان كذا ،،، ناقشيني و اتكلمي و في النهاية بنصل لحل يرضينا نحن الاتنين ،، ،تمام!!
سكتت مسافة و بعدين عاينت لي و قالت تمام!.
باس رأسها و قال : انا حامشي املا بنزين عشان بكرة حنقوم الصباح بدري!
قالت ليه : عندك ملابس معينة عايز تشيلها !!
بغمزة قال ليها : اختاري انتي و حألبس بذوقك!.
دخلت غرفة النوم و هي بتفكر في كلام سيف ،،، هو شايف انها عديمة شخصية !! يعني شخصيتها ما عاجباهو !! ما الشخصية الرسمها في خياله و كان عايز يعرسها ! ؟ اخدت نفس طويل و عاينت لروحها في المراية نصيبها من الجمال معقول،، بس هي خجولة خجولة شديد ما بتحب تتكلم عشان ما تغلط و تسمع كلام جارح!! هي برغم سكاتها ده سمعت ماسمعت من عماتها و نسوان اعمامها ،، لو علقت على اي شي بعدي بتسمع اليتيم ما حقود!! بس هي ماحقوده عمرها ما اتمنت الشر لزول! حتى البغلط عليها بتسامحو و الحاجة دي جات عليها ،، ما اتعلمت ترد الكلمة بكلمة كانت دايما بتستغرب من بسمة ،، بسمة الاصغر منها بسنتين بترد و تقول رأيها و التصرف الماعاجبها بتقول في وش سيدو ما عاجبني !! بس هي بتجامل و تمشي!.
قبلت على الدولاب بعد فكرت طويل في كذا قرار ،، طلعت ليها توب بلون زينب و تطقيمته و فتحت دولاب سيف و اختارت ليه قميص بنفس درجة التوب!.
جواه احساس انها عايزة تثبت لناس البلد و تحديداً البنات انه سيف راجلها بخصها براها !!..
__________________________________HMZ____________:
⁂ تاني يوم في القرية :⁂
رقدت منال مدعية التعب و المرض قدام زوجها عثمان و بتها ندى،، سألت ندى : قومي يمه خلينا نمشي الوحدة!.
منال هزت رأسها و قالت بتمثيل بارع : مافيني حيل ماافيني!.
عاينت ليها ندى بحزن و عاينت لابوها نظام اتصرف ،، ابوها قال ليها : خلاص نشوف دكتور من ناس القافلة ديل و خليهو يجي معاك!.
هزت ندى رأسها و جات تتحرك ابوها قال ليها ما تمشي براك سوقي اختك بسمة معاك!.
……………………………..
